ଭୁବନେଶ୍ବର: ଅଶାନ୍ତି ରାଜଧାନୀ ଭୁବନେଶ୍ବର । ପୋଲିସକୁ ବି ନାହିଁ ଡର । ଥାନା ନିକଟରେ ବି ଅପରାଧ ଘଟାଇବାକୁ ଡରୁ ନାହାନ୍ତି ଅପରାଧୀ । ରାଜଧାନୀ ଉପକଣ୍ଠ ବାଲିପାଟଣା ଥାନା ନିକଟରେ ଫୁଟିଲା ଗୁଳି । ଜଣେ ଯୁବକ ଆହତ । ଆହତ ଯୁବକ ହେଲେ ଗୁଆପୁର ଗ୍ରାମର ଦୀପ୍ତି ରଞ୍ଜନ ମହାପାତ୍ର । ଦୀପ୍ତିଙ୍କ ବାମ ହାତରେ ଗୁଳି ବାଜିଛି ।
ସୂଚନାଯୋଗ୍ୟ, ଦୀପ୍ତି ଥାନା ନିକଟ ଭଡା ଘର ବାରଣ୍ଡାରେ ରାତିରେ ବସିଥିଲେ । ଏହି ସମୟରେ ୨ ଜଣ ଯୁବକ ଏକ ବାଇକରେ ଆସି ଦୀପ୍ତିଙ୍କୁ ଗୁଳି ମାଡ଼ କରି ଫେରାର ହୋଇଯାଇଛନ୍ତି । ପୂର୍ବ ଶତ୍ରୁତାରୁ ଗୁଳି ମାଡ଼ ହୋଇଥିବା ଅନୁମାନ କରାଯାଉଛି ।
ନନ୍ଦିଘୋଷ ବ୍ୟୁରୋ: ଶିଶୁଙ୍କ ଲାଗି ନର୍କ ପାଲଟିଛି ଗାଜା । ଇସ୍ରାଏଲର ଆକ୍ରମଣ ପରଠାରୁ ସାରା ଗାଜା ହୋଇଛି ଧ୍ବସ୍ତବିଧ୍ବସ୍ତ । ଏହି ଆକ୍ରମଣରେ ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଛନ୍ତି ଶିଶୁ । ଏନେଇ ପ୍ରମୁଖ ସହାୟତାକାରୀ ସଂସ୍ଥା ଆଶଙ୍କା ବ୍ୟକ୍ତ କରିଛନ୍ତି । ଏହି ଶିଶୁମାନେ ଦୈନିକ ମୁଠାଏ ଖାଦ୍ୟ ପାଇବା କଷ୍ଟକର ହୋଇଛି ।
ଦୀର୍ଘ ୧୮ ମାସ ଧରି ଚାଲିଥିବା ହତ୍ୟାଲୀଳାରେ ଗାଜାକୁ ବାହାରୁ ଖାଦ୍ୟପଦାର୍ଥ, ଔଷଧ ଆଦି ପଠାଯାଇପାରୁନାହିଁ । ସେଠାରେ ବିଭୀଷିକାମୟ ପରିସ୍ଥିତି ସୃଷ୍ଟି ହୋଇଛି । ଗାଜାରେ କାର୍ଯ୍ୟରତ ୪୩ଟି ଅନ୍ତର୍ଜାତୀୟ ଓ ପାଲେଷ୍ଟିନୀୟ ସହାୟତାକାରୀ ସଂସ୍ଥା ମଧ୍ୟରୁ ୯୫ ପ୍ରତିଶତ ସଂସ୍ଥା ସେବା ବନ୍ଦ କରିସାରିଲେଣି । ଡକ୍ଟର୍ସ ଉଇଦଆଉଟ ବର୍ଡର୍ସର ସଂଯୋଜକ କହିଛନ୍ତି, ଗାଜାରେ ମହିଳା, ଶିଶୁ ଓ ସାଧାରଣ ଲୋକଙ୍କୁ ଜଗିବା ଲାଗି ସହାୟତାକାରୀ ସଂସ୍ଥାର କର୍ମଚାରୀଙ୍କୁ ନିର୍ଦ୍ଦେଶ ଦିଆଯାଉଛି । ଏହାସହ ସେମାନଙ୍କୁ ନେବା ଆଣିବା କରିବା ବେଳେ କର୍ମୀମାନେ ପ୍ରାଣ ହରାଉଛନ୍ତି । ସେଠାରେ ମାନବିକ ସହାୟତା ବିଫଳ ହୋଇଛି । ଶିଶୁ ଓ ନବଜାତମାନେ ଜୀବନ ସହ ସଂଗ୍ରାମ କରୁଛନ୍ତି । ଅଧିକାଂଶ ହସ୍ପିଟାଲରେ ବି ଚିକିତ୍ସା ଅଭାବରୁ ନବଜାତମାନେ ପ୍ରାଣ ହରାଉଛନ୍ତି । ଚିକିତ୍ସା ଲାଗି ଔଷଧ ଓ ଯନ୍ତ୍ରପାତିର ଅଭାବ ଶିଶୁଙ୍କ ଲାଗି କାଳ ସାଜିଛି । ଯୁଦ୍ଧରେ ୪ ଲକ୍ଷରୁ ଅଧିକ ଗାଜାବାସୀ ଭିଟାମାଟି ଛାଡ଼ିଲେଣି ।
ନନ୍ଦିଘୋଷ ବ୍ୟୁରୋ: ବଢ଼ିବ ଚିତାଙ୍କ ବାସସ୍ଥଳୀର ପରିସର । ମଧ୍ୟପ୍ରଦେଶର ଶେଓପୁର ଜିଲ୍ଲା ସ୍ଥିତ କୁନୋ ନ୍ୟାସନାଲ ପାର୍କରୁ କେତେକ ଚିତାଙ୍କୁ ଗାନ୍ଧୀ ସାଗର ବନ୍ୟପ୍ରାଣୀ ଅଭୟାରଣ୍ୟଙ୍କୁ ଆଜି କରାଯିବ ସ୍ଥାନାନ୍ତର । ସୀମାନ୍ତ ଜିଲ୍ଲା ମନ୍ଦସୋର ଓ ନିମୁଚ ଜିଲ୍ଲା ସ୍ଥିତ ଅଭୟାରଣ୍ୟ ହେବ ସେମାନଙ୍କ ନୂଆ ଠିକଣା ।
ଚିତାଙ୍କୁ ସ୍ଥାନାନ୍ତର ନେଇ ସୂଚନା ଦେଇଥିଲେ କେନ୍ଦ୍ର ପରିବେଶ, ଜଙ୍ଗଲ ଓ ଜଳବାୟୁ ମନ୍ତ୍ରୀ ଭୂପେନ୍ଦ୍ର ଯାଦବ । ଚିତାଙ୍କ ଲାଗି ପରିବେଶ ଅନୁକୂଳ ଥିବାରୁ ନୂଆ ଅଭୟାରଣ୍ୟକୁ ଚିତାଙ୍କୁ ସ୍ଥାନାନ୍ତର କରାଯିବ । ଚିତାଙ୍କ ସ୍ଥାନାନ୍ତର ନେଇ ଜାତୀୟ ବ୍ୟାଘ୍ର ସଂରକ୍ଷଣ କର୍ତ୍ତୃପକ୍ଷ ବା ଏନଟିସିଏ ସହ ଆଲୋଚନା ହୋଇଥିଲା । ଦେଶରେ ୫୮ଟି ବ୍ୟାଘ୍ର ଅଭୟାରଣ୍ୟ ରହିଛି । ସେଥିରୁ ୫୮ତମ ଅଭୟାରଣ୍ୟ ମଧ୍ୟପ୍ରଦେଶରେ ରହିଛି । ଗତ ୨୦୨୨ ସେପ୍ଟେମ୍ବର ୧୭ରେ ନାମିବ୍ୟାରୁ ୫ ମାଈ ଓ ୩ଟି ଅଣ୍ଡିରା ଚିତାଙ୍କୁ କୁନୋ ପାର୍କରେ ଛଡାଯାଇଥିଲା । ୨୦୨୩ ଫେବ୍ରୁଆରୀରେ ଦକ୍ଷିଣ ଆଫ୍ରିକାରୁ ଆଉ ୧୨ଟି ଚିତାଙ୍କୁ ଆଣି କୁନୋରେ ଛଡାଯାଇଥିଲା । ବର୍ତ୍ତମାନ କୁନୋ ଜାତୀୟ ପାର୍କରେ ମୋଟ ୨୬ଟି ଚିତା ଥିବାବେଳେ ସେମାନଙ୍କ ମଧ୍ୟରୁ 9ଟି ଚିତା ଏନକ୍ଲୋଜରରେ ରହୁଛନ୍ତି । ଏହି ୨୬ଟି ଚିତାଙ୍କ ମଧ୍ୟରୁ ଭାରତରେ ଜନ୍ମ ନେଇଥିଲେ ୧୪ଟି ଛୁଆ ।
ନନ୍ଦିଘୋଷ ବ୍ୟୁରୋ: ମହାରାଷ୍ଟ୍ର ରାଜନୀତିରେ ନୂଆ ସମୀକରଣ ସୃଷ୍ଟି ହେବା ପରି ଲାଗୁଛି । ଏକାଠି ହୋଇପାରନ୍ତି ଶିବସେନା(ୟୁବିଟି) ଓ ନବନିର୍ମାଣ ସେନା । ୨୦୦୫ରେ ଠାକରେ ପରିବାରର ସଦସ୍ୟ ତଥା ଉଦ୍ଧବ ଠାକରେଙ୍କ ପୁତୁରା ରାଜ ଠାକରେ ଗଠନ କରିଥିଲେ ନବ ନିର୍ମାଣ ସେନା । ଦୀର୍ଘ ଦିନ ଧରି ରାଜନୈତିକ ବିଫଳତା ପରେ ଖୁବ୍ ଶୀଘ୍ର ରାଜ ଠାକରେ ନୂଆ ନିଷ୍ପତ୍ତି ଗ୍ରହଣ କରିବା ସମ୍ଭାବନା ରହିଛି ।
ମହାରାଷ୍ଟ୍ରର ଭାଷାଗତ ଓ ସାଂସ୍କୃତିକ ସ୍ବାର୍ଥକୁ ଅଗ୍ରାଧିକାର ଦେବା ଲକ୍ଷ୍ୟରେ ଦୁଇ ନେତା ଏକାଠି ହେବାକୁ ଯାଉଥିବା ଚର୍ଚ୍ଚା ହେଉଛି । ରାଜନୈତିକ ସ୍ବାର୍ଥ ଅପେକ୍ଷା ମହାରାଷ୍ଟ୍ରର ସ୍ବାର୍ଥକୁ ଦୁଇ ନେତା ଅଗ୍ରାଧିକାର ଦେବା ଦେଖାଯାଇଛି । ଏକ ସାକ୍ଷାତକାରରେ ରାଜ ଠାକରେ କହିଛନ୍ତି, ଉଦ୍ଧବଙ୍କ ସହ ତାଙ୍କର ମାମୁଲି ମତପାର୍ଥକ୍ୟ ରହିଛି । ମାତ୍ର ମହାରାଷ୍ଟ୍ରର ସ୍ବାର୍ଥ ସର୍ବାଗ୍ରେ ରହିଛି । ମହାଠାମାନଙ୍କ ବୃହତ ସ୍ବାର୍ଥ ଦୃଷ୍ଟିରୁ ସେ ବିକଳ୍ପ ପଦକ୍ଷେପ ନେବାର ସମ୍ଭାବନା ରହିଛି ।
୨୦୨୨ରେ ମୂଳ ଶିବସେନାରୁ ଏକନାଥ ସିନ୍ଦେ ଅଲଗା ହୋଇ ଯିବା ପରେ ଶିବସେନା ଦୁର୍ବଳ ହୋଇପଡିଥିଲା । ଉଭୟ ଲୋକସଭା ଓ ବିଧାନସଭା ନିର୍ବାଚନରେ ଦଳ ଆଶାନୁରୂପ ପ୍ରଦର୍ଶନ କରିପାରି ନଥିଲା । ରାଜ ଠାକରେ କହିଛନ୍ତି, ତାଙ୍କ ସହ ଶିବସେନା ବିଧାୟକ ଓ ସାଂସଦମାନେ ଥିବାବେଳେ ସେ ଶିବସେନା ପରିତ୍ୟାଗ କରିଥିଲେ । ସେ ବାଲ ଠାକରେଙ୍କ ବ୍ୟତୀତ ଅନ୍ୟ କାହା ନିକଟରେ କାମ କରିବାକୁ ଚାହିଁ ନଥିଲେ । ଏବେ ଉଦ୍ଧବଙ୍କ ସହ କାମ କରିବାରେ ତାଙ୍କର କିଛି ଆପତ୍ତି ନାହିଁ । ସେପଟେ ଉଦ୍ଧବ କହିଛନ୍ତି, ମହାରାଷ୍ଟ୍ରର ସ୍ବାର୍ଥ ଲାଗି ସମସ୍ତ ମହାରାଷ୍ଟ୍ରବାସୀ ଏକ ହୁଅନ୍ତୁ । ବର୍ତ୍ତମାନ ଗୁଜରାଟକୁ ବୃହତ ଶିଳ୍ପଗୁଡିକୁ ନିଆଯାଉଛି । ଯଦି ମହାରାଷ୍ଟ୍ରବାସୀ ଏକାଠି ହେବେ ତେବେ ଏହା ଘଟିବ ନାହିଁ । ମହାରାଷ୍ଟ୍ରର ସ୍ବାର୍ଥ ଲାଗି ଯିଏ ଆସିବେ ତାଙ୍କୁ ସେ ଗ୍ରହଣ କରିବେ । ମହାରାଷ୍ଟ୍ରରେ ସମସ୍ତ ମରାଠୀ ଓ ଇଂରାଜୀ ମିଡିୟମ ସ୍କୁଲରେ ପ୍ରଥମ ଶ୍ରେଣୀରୁ ପଞ୍ଚମ ଶ୍ରେଣୀ ଯାଏ ହିନ୍ଦିକୁ ବାଧ୍ୟତାମୂଳକ ବିଷୟ କରାଯାଇଛି । ଏହାକୁ ନେଇ ରାଜନୀତି ଜୋର ଧରିଛି । ଏହାକୁ ଉଭୟ ରାଜ ଠାକରେ ଓ ଉଦ୍ଧବ ଠାକରେ ବିରୋଧ କରୁଛନ୍ତି ।
ନନ୍ଦିଘୋଷ ବ୍ୟୁରୋ: ଡ୍ରଗ୍ସ ସେବନ ଅଭିଯୋଗରେ ମାଲାୟାଲମ ଅଭିନେତା ସାଇନ ଟମ୍ ଚାକୋ ଗିରଫ । ଗିରଫ ପରେ ତାଙ୍କୁ ଜାମିନ ମିଳି ଯାଇଛି । ତାଙ୍କ ବିରୋଧରେ ନାର୍କୋଟିକ୍ ଡ୍ରଗ୍ସ ଆଣ୍ଡ ସାଇକୋଟ୍ରୋପିକ୍ ସବଷ୍ଟନ୍ସ (NDPS) ଆଇନର ଧାରା ୨୭ (ଯେକୌଣସି ନିଶାଦ୍ରବ୍ୟ କିମ୍ବା ମାନସିକ ପଦାର୍ଥ ସେବନ) ଏବଂ ୨୯ ( ପ୍ରୋତ୍ସାହନ ଓ ଅପରାଧିକ ଷଡଯନ୍ତ୍ର)ର ଦଫା ଲାଗିଥିଲା ।
କୋଚିର ଏକ ହୋଟେଲରେ ନାର୍କୋଟିକ୍ସ ଟିମ୍ ଚଢାଉ ବେଳଏ ସେ ପଳାଇ ଯାଇଥିଲେ । ପରେ ତାଙ୍କୁ ଗିରଫ କରାଯାଇଥିଲା । କିନ୍ତୁ ତାର କିଛି ଘଣ୍ଟା ଭିତରେ ହିଁ ଟମଙ୍କୁ ମିଳିଛି ଜାମିନ । ୨୦୧୪ର ସର୍ବାଧିକ ଆୟ କରିଥିବା ମାଲାୟଲମ ଫ୍ୟାଣ୍ଟାସି କମେଡି ଚଳଚ୍ଚିତ୍ର ‘ଇତିହାସ’ ପାଇଁ ବେଶ ଚର୍ଚ୍ଚାକୁ ଆସିଥିଲେ ଟମ୍ । ଏକ ଇନଷ୍ଟାଗ୍ରାମ ଭିଡିଓରେ, ଭିନ୍ସି ତାଙ୍କର ଅଭିଜ୍ଞତା ସେୟାର କରି କହିଛନ୍ତି ଯେ ସେ ଆଉ ମଦ୍ୟପାନ କିମ୍ବା ଡ୍ରଗ୍ସ ଭଳି ପଦାର୍ଥର ଅପବ୍ୟବହାର କରୁଥିବା ବ୍ୟକ୍ତିଙ୍କ ସହିତ କାମ କରିବେ ନାହିଁ ।
ନନ୍ଦିଘୋଷ ବ୍ୟୁରୋ: ଋଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ବଡ଼ ଘୋଷଣା । ୩୦ ଘଣ୍ଟିଆ ଅସ୍ତ୍ର ବିରତି ଘୋଷଣା କଲେ । ଶନିବାର ରାତି ୮.୩୦ରୁ ରବିବାର ସରିବା ଯାଏଁ ଏହି ଅସ୍ତ୍ର ବିରତି ଘୋଷଣା ହୋଇଛି ।
ଋଷ ପରି ୟୁକ୍ରେନ ବି ସମଧରଣ ପଦକ୍ଷେପ ନେବ ବୋଲି ଆଶା ପ୍ରକାଶ କରିଛନ୍ତି ପୁଟିନ । ତେବେ ଏହି ଅସ୍ତ୍ର ବିରତି ଅବସରରେ ରୁଷ ସୈନ୍ୟବାହିନୀ ପୂର୍ବ ପରି ନିଜ ସ୍ଥାନରେ ରହିବେ ବୋଲି ଋଷର ସାମରିକ ମୁଖ୍ୟ ଭାଲେରି ଗ୍ରେସିମୋଭଙ୍କୁ ନିର୍ଦ୍ଦେଶ ଦେଇଛନ୍ତି ପୁଟିନ । ଇଷ୍ଟରକୁ ଦୃଷ୍ଟିରେ ରଖି ପୁଟିନ ଏହି ଘୋଷଣା କରିଛନ୍ତି । ମାନବିକତା ଦୃଷ୍ଟିରୁ ଏହି ଘୋଷଣା କରାଯାଇଛି ବୋଲି କହିଛନ୍ତି ପୁଟିନ । ଋଷ ଓ ୟୁକ୍ରେନ ମଧ୍ୟରେ ଶାନ୍ତି ପ୍ରତିଷ୍ଠା ଲାଗି ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ଉଦ୍ୟମ ଜାରି ରହିଥିବାବେଳେ ପୁଟିନ ଏହି ପଦକ୍ଷେପ ନେଇଛନ୍ତି ।
ପୁରୀ: ଜଗନ୍ନାଥ ଧାମ ପୁରୀରେ ଶକ୍ତି ବିଭାଗର ଅପାରଗତା । ଅନ୍ଧାରରେ ବୁଲିଲେ ରାଜ୍ୟପାଳ । ରାଜ୍ୟପାଳଙ୍କ ଗସ୍ତବେଳେ ହେଲା ପାୱାର କଟ୍ । ଅନ୍ଧାରରେ ଘଣ୍ଟେ କାଳ ବୁଲିଲେ ରାଜୃପାଳ କେ. ହରିବାବୁ କମ୍ଭମପାଟି ।
ଏଭଳି ଘଟଣା ଘଟିଛି ପୁରୀ ଭିଆଇପି ରୋଡସ୍ଥିତ ବୈଷ୍ଣବ ଦେବୀ ଗଳିରେ । ଆଜି ରାଜ୍ୟପାଳ ପୁରୀରେ ବିଭିନ୍ନ ଉନ୍ନୟନମୂଳକ କାମ ସମୀକ୍ଷା କରିବା ପରେ ପ୍ରଧାନମନ୍ତ୍ରୀ ଆବାସିକ ଯୋଜନା ମାଧ୍ୟମରେ ପାଇଥିବା ହିତାଧିକାରୀଙ୍କ ଘର ପରିଦର୍ଶନ କରିବାକୁ ଯାଇଥିଲେ । ରେଣୁବାଳା ପଣ୍ଡା ଓ ରାଧାରାଣୀ ଦେବନାଥଙ୍କ ଘର ବୁଲିବା ସମୟରେ ପାୱାର କଟ୍ ହୋଇଥିଲା । ରାଜ୍ୟପାଳ ପୁରୀରେ ସମୀକ୍ଷା କରୁଥିବାରୁ ସବୁ ବଡ଼ବଡ଼ିଆ ସହରରେ ଉପସ୍ଥିତ ଥିଲେ । ତଥାପି କିଭଳି ପାୱାର କଟ ହେଲା ତାକୁ ନେଇ ଅସନ୍ତୋଷ ପ୍ରକାଶ ପାଇଛି ।
ନନ୍ଦିଘୋଷ ବ୍ୟୁରୋ: ବାଙ୍କୀ ନବୋଦୟ ବିଦ୍ୟାଳୟ ହଷ୍ଟେଲରୁ ଆସିଲା ସାଂଘାତିକ ଅଭିଯୋଗ । ଛାତ୍ରାବାସରେ ପଶି ଜଣେ ଛାତ୍ରଙ୍କ ସହ ଅପ୍ରାକୃତିକ ଯୌନ ସମ୍ପର୍କ ରଖିଥିଲେ ରଙ୍ଗମିସ୍ତ୍ରୀ । ଘଟଣା ପ୍ରଘଟ ପରେ ଅଭିଯୁକ୍ତକୁ ପୋଲିସ ଗିରଫ କରିଥିବା ବେଳେ ହଷ୍ଟେଲର ସୁରକ୍ଷା ବ୍ୟବସ୍ଥା ନେଇ ଉଠିଛି ପ୍ରଶ୍ନ । ଛାତ୍ରାବାସରେ ଘଟିଥିବା ଏହି ଲଜ୍ଜାଜନକ ଘଟଣା ପରେ ଏଠାର ଅନ୍ତେବାସୀ ଛାତ୍ରଙ୍କ ସୁରକ୍ଷା ନେଇ ପ୍ରଶ୍ନ ଉଠାଇଛନ୍ତି ବୁଦ୍ଧିଜୀବୀ ଓ ଅଭିଭାବକ । ଏଥିପାଇଁ ପ୍ରିନ୍ସପାଲ ଓ ହଷ୍ଟେଲ ୱାର୍ଡେନଙ୍କ ଅବହେଳାକୁ ଦାୟୀ କରାଯାଉଛି ।
କେତେ ସୁରକ୍ଷିତ ଛାତ୍ର ହଷ୍ଟେଲ ? ଛାତ୍ରାବାସରେ ରାତିରେ ପଶୁଛନ୍ତି ଅପରାଧୀ । ଅଧ୍ୟକ୍ଷ ଓ ୱାର୍ଡେନଙ୍କ ନିକଟରେ ନାହିଁ ଖବର । ଛାତ୍ରଙ୍କ ସହ ଅପ୍ରାକୃତିକ ଯୌନ ସମ୍ପର୍କ ରଖି ରଙ୍ଗମିସ୍ତ୍ରି ଗିରଫ । ଏମିତି ଏକ ସାଂଘାତିକ ଅଭିଯୋଗ ଆସିଛି ବାରଙ୍ଗ ଥାନା ମୁଣ୍ଡଳି ସ୍ଥିତ ଜବାହର ନବୋଦୟ ବିଦ୍ୟାଳୟ ଛାତ୍ରାବାସରୁ । ରାତିରେ ହଷ୍ଟେଲ ଭିତରେ ପଶି ଜଣେ ରଙ୍ଗ ମିସ୍ତ୍ରୀ ନାବାଳକଙ୍କ ସହ ଅପ୍ରାକୃତିକ ଯୌନ ସମ୍ପର୍କ ରଖିବା ଘଟଣାରେ ପୋଲିସ ଅଭିଯୁକ୍ତକୁ ଗିରଫ କରିଛି । ଏହି ଘଟଣା ପରେ ହଷ୍ଟେଲରେ ଛାତ୍ରଙ୍କ ସୁରକ୍ଷା ନେଇ ଉଠିଛି ପ୍ରଶ୍ନ । ପ୍ରିନ୍ସପାଲ ଓ ହଷ୍ଟେଲ ୱାର୍ଡେନଙ୍କ ଦାୟିତ୍ବହୀନତା କାରଣରୁ ଏପରି ଘଟିଥିବା ଅଭିଯୋଗ କରିଛନ୍ତି ବୁଦ୍ଧିଜୀବୀ ଓ ଅଭିଭାବକ । ଘଟଣା ପରେ ଉଭୟ ଅଧିକାରୀଙ୍କ ବିରୋଧରେ ସେମାନେ କାର୍ଟ୍ରାନୁଷ୍ଠାନ ଦାବି କରିଛନ୍ତି ।
୪ ଦିନ ତଳେ ଘଟିଥିଲା ଏପରି ଘଟଣା । ଠିକା ସଂସ୍ଥା ପକ୍ଷରୁ ହଷ୍ଟେଲରେ ମରାମତି କାର୍ଯ୍ୟ ଚାଲିଛି । ଅଭିଯୁକ୍ତ ରଙ୍ଗମିସ୍ତ୍ରୀ ନାବାଳକଙ୍କୁ ପ୍ରଲୋଭିତ କରିବା ସହ ଅସୁସ୍ଥତା ଦର୍ଶାଇ ହଷ୍ଟେଲରେ ରହିଥିବା ଅଭିଯୋଗ ହୋଇଛି । ଘଟଣା ପରେ ଛାତ୍ର ଜଣକ ମାନସିକ ଓ ଶାରୀରିକ ସ୍ତରରେ ଅସୁସ୍ଥ ହୋଇ ଜଣେ ସାଙ୍ଗଙ୍କୁ ଘଟଣା ସମ୍ପର୍କରେ କହିବା ପରେ କଥା ସାମ୍ନାକୁ ଆସିଥିଲା । ବାରଙ୍ଗ ଥାନାରେ ଲିଖିତ ଅଭିଯୋଗ ହେବା ପରେ ଅଭିଯୁକ୍ତ ରଙ୍ଗ ମିସ୍ତ୍ରୀକୁ ଗିରଫ କରି କୋର୍ଟ ଚାଲାଣ କରିଛି ପୋଲିସ୍ । ସେପଟେ ଅଧ୍ୟକ୍ଷଙ୍କ କହିବା କଥା, ଅସୁସ୍ଥତା ଦର୍ଶାଇ ଶ୍ରମିକ ରହିବାକୁ ଅନୁମତି ମାଗିଥିଲେ । ଛାତ୍ର ଓ ଶ୍ରମିକ ଗୋଟିଏ ଜିଲ୍ଲାର ଥିବାରୁ ଉଭୟଙ୍କ ମଧ୍ୟରେ ଭଲ ସମ୍ପର୍କ ହୋଇଥିଲା । ତେବେ ଘଟଣା ପରେ ଆମେ ପୋଲିସକୁ ଜଣାଇଛୁ । ସିକ୍ୟୁରିଟି ନେଇ କୌଣସି କମ୍ପ୍ରମାଇଜ କରାଯାଏ ନାହିଁ ।
ଏଠି ପ୍ରଶ୍ନ ଉଠୁଛି । ଘଟଣା ସମ୍ପର୍କରେ କିପରି ଜାଣି ପାରିଲେନି କର୍ତ୍ତୃପକ୍ଷ ? ଜାଣିବା ପରେ ଲୁଚାଇବାକୁ ଉଦ୍ୟମ କରାଯାଇଛି କି ? ଟାଇଟ୍ ସିକ୍ୟୁରିଟି ଭିତରେ ଏପରି ଲଜ୍ଜାଜନକ ଘଟଣା ଘଟିଲା କିପରି ? ଶିକ୍ଷା ବିଭାଗ ଘଟଣାକୁ ଗୁରତର ସହ ନେଇ ଛାତ୍ରଙ୍କ ସୁରକ୍ଷା ପ୍ରତି ଯତ୍ନବାନ ହେବାକୁ ଦାବି ହୋଇଛି ।
ନନ୍ଦିଘୋଷ ବ୍ୟୁରୋ: ଟ୍ୱିନ ସିଟିରେ ହେବ ନୂଆ ଆଇଟି ପାର୍କ । ହଜାରେ ହେକ୍ଟର ଜମିରେ ତିଆରି ହେବ ନୂଆ ଆଇଟି ପାର୍କ । ଆଇଟି ଶିଳ୍ପ ପାଇଁ ରାଜ୍ୟରେ ତିଆରି ହେବ ପ୍ଲଗ ଆଣ୍ଡ ପ୍ଲେ ସୁବିଧା ଥିବା ୫୦ ନିୟୁତ ବର୍ଗ ମିଟରର ବିଲ୍ଟ ଅପ୍ ଏରିଆ । ଭୁବନେଶ୍ୱରର ସତ୍ୟନଗର ଓ ୟୁନିଟ-୨ ଅଞ୍ଚଳରେ ଆଇଟି ଶିଳ୍ପ ପାଇଁ ଚଳିତବର୍ଷ ୧୦ ନିୟୁତ ବର୍ଗ ମିଟରର ବିଲ୍ଟ ଅପ୍ ଏରିଆ ତିଆରି ଆରମ୍ଭ ହେବ ।
ଆଗାମୀ ୫ ବର୍ଷରେ ଓଡ଼ିଶାରେ ସଡ଼କ ନିର୍ମାଣ ପାଇଁ ଖର୍ଚ୍ଚ ହେବ ୨ ଲକ୍ଷ ୩୦ ହଜାର କୋଟି ଟଙ୍କା । ଏଥିରୁ NHAI ୧ ଲକ୍ଷ ୫ ହଜାର କୋଟି ଟଙ୍କା ଖର୍ଚ୍ଚ କରିବାକୁ ଥିବା ବେଳେ ରାଜ୍ୟ ପାଣ୍ଠିରୁ ଖର୍ଚ୍ଚ ହେବ ୧ ଲକ୍ଷ ୨୫ ହଜାର କୋଟି । ବ୍ରହ୍ମପୁରରୁ ଜୟପୁର ମଧ୍ୟରେ ନିର୍ମାଣ ହେବ ଗ୍ରୀନ ଫିଲ୍ଡ କରିଡର । ଏବେ ଏହି ଦୁଇ ସହର ମଧ୍ୟରେ ଯାତାୟାତ ପାଇଁ ୮ ଘଣ୍ଟା ସମୟ ଲାଗୁଥିବା ବେଳେ ଏହି ପ୍ରକଳ୍ପ ସରିବା ପରେ ମାତ୍ର ସାଢ଼େ ୩ ଘଣ୍ଟା ଲାଗିବ । ରାଜ୍ୟର ୫ଟି ବଡ଼ ସହର ସମେତ ୧୧ଟି ସହରରେ ତିଆରି ହେବ ରିଙ୍ଗ ରୋଡ । ବିକଶିତ ଓଡ଼ିଶାରେ ୨୦୩୬ ସୁଦ୍ଧା ରାଜ୍ୟ ଅର୍ଥନୀତି ୦.୫ ଟ୍ରିଲିୟନ ଡଲାରରେ ପହଞ୍ଚିବ । ୨୦୪୭ ସୁଦ୍ଧା ୧.୫ ଟ୍ରିଲିୟନ ଅର୍ଥନୀତି ହେବ ଓଡ଼ିଶା । ଆଗାମୀ ୫ ବର୍ଷରେ ରାଜ୍ୟରେ ଆଉ ୧୫ ଲକ୍ଷ ହେକ୍ଟର ଜମିକୁ ଜଳସେଚନ ସୁବିଧା କରାଯିବ । ୨୦୩୬ ବିକଶିତ ଓଡିଶା ପାଇଁ ରାଜ୍ୟ ସରକାର ଏପରି ଖସଡ଼ା ପ୍ରସ୍ତୁତ କରିଛନ୍ତି । ବିକଶିତ ଓଡ଼ିଶା- ୨୦୩୬ ନେଇ ଇଣ୍ଡିଆନ ଚାମ୍ବର ଅଫ୍ କମର୍ସ-ଆଇସିସିର ଜାତୀୟ ଆଲୋଚନାଚକ୍ରରେ ଭାଗ ନେଇ ମନ୍ତ୍ରୀ ଓ ସଚିବମାନେ ସରକାରଙ୍କ ବ୍ଲୁ ପ୍ରିଣ୍ଟ ବାବଦରେ ଏପରି କହିଛନ୍ତି ।
ନନ୍ଦିଘୋଷ ବ୍ୟୁରୋ: ରାଜ୍ୟରେ ଆଇଏଏସ ମରୁଡି ଦେଖା ଦେଇଥିବା ବେଳେ ଦକ୍ଷ ଅଫିସରମାନେ ଓଡ଼ିଶା ଛାଡୁଛନ୍ତି । ୧୦ ମାସରେ ମୋହନ ସରକାରରେ ସିଏମଓରୁ ୨ ଜଣ ଚର୍ଚ୍ଚିତ ଅଧିକାରୀଙ୍କୁ ଦାୟିତ୍ବରୁ ହଟାଇ ଦିଆଯିବା ପରେ ପାଓ୍ବାର କରିଡରରେ ହଲଚଲ ସୃଷ୍ଟି ହୋଇଛି । ସରକାର ଠିକ ଚାଲୁ ନଥିବାରୁ ଅଧିକାରୀମାନେ ଅସନ୍ତୋଷ ପ୍ରକାଶ କରି ଓଡିଶା ଛାଡ଼ିବାକୁ ଚାହୁଁଛନ୍ତି ବୋଲି ବିରୋଧୀ ଅଭିଯୋଗ କରିଛନ୍ତି ।
ରାଜ୍ୟରେ ଆଇଏଏସ ସଙ୍କଟ ଥିବା ବେଳେ ବିଜେପି ଶାସନର ୧୦ ମାସରେ ଦକ୍ଷ ଅଧିକାରୀମାନେ ଓଡିଶା ଛାଡୁଛନ୍ତି । ଶାସନ କଳରେ ଯେତିକି ସଂଖ୍ୟକ ଅଫିସର ଦରକାର, ତା’ଠାରୁ କମ ସଂଖ୍ୟକ ଅଧିକାରୀରେ ଚାଲିଛି କାମ । ଏହାରି ଭିତରେ ବିଜେପି ସରକାରଙ୍କ ଶାସନରେ ଅଣନିଃଶ୍ବାସୀ ହୋଇପଡ଼ିଛନ୍ତି ସରକାରୀ ବାବୁ । ସବୁଠାରୁ ବଡ଼ କଥା ହେଉଛି ସିଏମଓରୁ ୨ ଜଣ ଚର୍ଚ୍ଚିତ ଅଧିକାରୀ ଅନ୍ୟ ସ୍ଥାନକୁ ବଦଳି ହେବା କଥା ହଜମ ହେଉନି । ରାଜ୍ୟ ସରକାରଙ୍କ ଗୁଡ ବୁକରେ ଥିବା ଅଧିକାରୀଙ୍କୁ ହଠାତ କାହିଁକି ସିଏମଓରୁ ହଟାଇ ଦିଆଗଲା ତାହାକୁ ନେଇ ପ୍ରଶ୍ନ ଉଠଛି । ମୁଖ୍ୟ ବିରୋଧୀ ବିଜେଡି ଅଭିଯୋଗ କରିଛି, ସରକାର ଠିକ ସେ ଚାଲୁ ନଥିବାରୁ ଅଫିସରମାନେ ଠିକସେ କାମ କରିପାରୁନାହାଁନ୍ତି । ସରକାରୀ କଳରେ ବହୁ ଅଧିକାରୀ ପଦ ଖାଲିପଡ଼ିଥିବା ବେଳେ ଅଫିସରମାନେ ସ୍ବେଚ୍ଛାକୃତ ଅବସର ନେବା, ଡେପୁଟେସନକୁ ଯିବା ମୋହନ ସରକାର ବିଫଳତାକୁ ପଦାରେ ପକାଇଛି । ସରକାର ଏଥିରୁ ଚେତିଯିବା ଦରକାର ବୋଲି ବିଜେଡି ବିଧାୟକ ସାରଦା ଜେନା କହିଛନ୍ତି ।
ରାଜ୍ୟରେ ୬୬ ଆଇଏଏସ ଓ ୬୯ ଆଇପିଏସ ପଦବୀ ଖାଲି ପଡିଛି । ରାଜ୍ୟରେ ୨୪୮ଟି ଆଇଏଏସ ପଦବୀ ପାଇଁ ଅନୁମୋଦନ ମିଳିଥିବା ବେଳେ ୧୮୧ ଜଣ କାର୍ଯ୍ୟରତ ଅଛନ୍ତି । ସେମାନଙ୍କ ମଧ୍ୟରୁ ଜଣକ ପରେ ଜଣେ କେନ୍ଦ୍ରୀୟ ଡେପୁଟସନକୁ ଯିବା ପରେ ରାଜ୍ୟରେ ପ୍ରଶାସନିକ କଳ ଉପରେ ଚାପ ସୃଷ୍ଟି ହୋଇଛି । ପୂର୍ବତନ ପିସିସି ସଭାପତି ଜୟଦେବ ଜେନା କହିଛନ୍ତି, ରାଜ୍ୟରେ ଶାସନ ଚାଲିଛି ବୋଲି ଲୋକେ ଅନୁଭବ କରିପାରୁନାହାନ୍ତି । ସରକାରୀ ଅଧିକାରୀମାନେ ସରକାରଙ୍କ କାର୍ଯ୍ୟଶୈଳୀରେ ଅସନ୍ତୋଷ ଅଛନ୍ତି । ଫଳରେ ଓଡ଼ିଶା କ୍ୟାଡର ଅଧିକାରୀମାନେ ଓଡିଶା ଛାଡିବାକୁ ବାଧ୍ୟ ହେଉଛନ୍ତି । ୧୦ ମାସ ମଧ୍ୟରେ ୨ଜଣ ଓଡିଆ ଅଧିକାରୀ ସରକାରରୁ ବଦଳି ହେବା ଓଡିଆ ଅସ୍ମିତା କି ବୋଲି କଂଗ୍ରେସ ପ୍ରଶ୍ନ କରିଛି । ସେହିପରି ବରିଷ୍ଠ ବିଜେଡି ନେତା ପ୍ରଶାନ୍ତ ମୁଦୁଲି ମଧ୍ୟ ଏ ପ୍ରସଙ୍ଗରେ ସରକାରଙ୍କୁ ଟାର୍ଗେଟ କରିଛନ୍ତି । ଅନ୍ୟପଟେ ବିଜେପି ବିଧାୟକ ସରୋଜ ପାଢି ପ୍ରସଙ୍ଗକୁ ନେଇ ବିତଣ୍ଡା ଯୁକ୍ତି ବାଢିଛନ୍ତି ।
ଆଇଏଏସ ନୁହେଁ, ୧୦ ମାସ ମଧ୍ୟରେ ବହୁ ଆଇପିଏସ ଅଫିସରଙ୍କୁ ମଧ୍ୟ ବାରମ୍ବାର ବଦଳି କରାଯାଉଛି । ଯାହାକୁ ନେଇ ଶାସକ ଦଳକୁ ଟାର୍ଗେଟ କରିଛନ୍ତି ଦୁଇ ବିରୋଧୀ ।
