ନନ୍ଦିଘୋଷ ବ୍ୟୁରୋ :ଥମୁନି ମାୟାନଗରୀରେ ବର୍ଷା ବିତ୍ପାତ। ଆଜି ଲଗାଣ ବର୍ଷା ଯୋଗୁ ଗୁରୁତର ବାଧାପ୍ରାପ୍ତ ହୋଇଛି ବସ, ବିମାନ ଓ ଟ୍ରେନ ସେବା। ବର୍ଷା ଯୋଗୁ ଆର୍ଥିକ ରାଜଧାନୀରେ ଜୀବନଯାତ୍ରା ପ୍ରଭାବିତ। ଅନେକ ରାସ୍ତାରେ ପାଣି ଜମିବା ଯୋଗୁ ଯୋଗାଯୋଗ ବିଚ୍ଛିନ୍ନ ହୋଇଛି। ମୁମ୍ବାଇ-ପୁଣେ ଏକ୍ସପ୍ରେସ ପଥ, ମୁମ୍ବାଇ-ଅହମ୍ମଦାବାଦ ରାଜପଥ, ମୁମ୍ବାଇ-କୋଙ୍କଣ ରାଜପଥ ବନ୍ଦ ହୋଇଛି। ବିଭିନ୍ନ ସ୍ଥାନରେ ଭୂସ୍ଖଳନ ଯୋଗୁ ରାଜପଥରେ ଯାତାୟାତ ବନ୍ଦ ହୋଇଛି। ମୁମ୍ବାଇ-ଅହମ୍ମଦାବାଦୀ ରାଜପଥର ଅନେକ ସ୍ଥାନରେ ପାଣି ଚାଲିବା ଯୋଗୁ ଯାତାୟାତ ଠପ୍ ହୋଇଛି। ପୁଣେ- ମୁମ୍ବାଇ ଟ୍ରେନ ସେବା ବାତିଲ କରାଯାଇଛି। ବର୍ତ୍ତମାନ ସୁଦ୍ଧା ବର୍ଷାଜନିତ ମୃତ୍ୟୁ ସଂଖ୍ଯା ୧୩ ହୋଇଛି। ପୁଣେର ମାଭାଲ ଅନ୍ତର୍ଗତ ପାଟନ ଗ୍ରାମରେ ଭୂସ୍ଖଳନ ଯୋଗୁ ୨ ଜଣ ପ୍ରାଣ ହରାଇଛନ୍ତି। ବର୍ଷାକୁ ଦୃଷ୍ଟିରେ ରଖି ମହାରାଷ୍ଟ୍ରର ଦୁଇଟି ଯାକ ବିଧାନସଭା ସଦନର କାର୍ଯ୍ୟ ସ୍ଥଗିତ ରଖାଯାଇଛି। IMD ମୁମ୍ବାଇ ପାଇଁ ଅରେଞ୍ଜ ଆଲର୍ଟ ଜାରି କରିଛି ।
କଟକ-ନରାଜ କାଠଯୋଡ଼ିରେ ନିଖୋଜ ଯୁବକ : ୨୦ ଘଣ୍ଟା ପରେ ମଧ୍ୟ ମିଳୁନି ପତ୍ତା
ନନ୍ଦିଘୋଷ ବ୍ୟୁରୋ: କଟକର ନରାଜ କାଠଯୋଡ଼ିରେ ସେଲଫି ନେବା ସମୟରେ ବୁଡ଼ି ଯାଇଥିବା ଯୁବକଙ୍କ ଖୋଜ ଜାରି ରହିଛି। ଏପର୍ଯ୍ୟନ୍ତ ତାଙ୍କର ପତ୍ତା ମିଳୁନାହିଁ। ଗତକାଲି ସେଲଫି ନେବାବେଳେ ତିନି ଯୁବକ କାଠଯୋଡ଼ିରେ ଭାସି ଯାଇଥିଲେ। ସ୍ଥାନୀୟ ଲୋକେ ଓ ମତ୍ସ୍ୟଜୀବୀଙ୍କ ସହାୟତାରେ ଦୁଇ ଜଣଙ୍କୁ ଜୀବିତ ଉଦ୍ଧାର କରାଯାଇଥିଲା। କିନ୍ତୁ ତୃତୀୟ ଯୁବକ ଏପର୍ଯ୍ୟନ୍ତ ନିଖୋଜ ରହିଛନ୍ତି। ଅଗ୍ନିଶମ ବାହିନୀ ଓ ଓଡ୍ରାଫ୍ ଟିମ୍ ପକ୍ଷରୁ ସର୍ଚ୍ଚ ଅପରେସନ ଜାରି ରହିଛି।
ବର୍ଷା ଯୋଗୁଁ ନଦୀରେ ପ୍ରବଳ ପାଣି ଥିବାରୁ ଉଦ୍ଧାର କାର୍ଯ୍ୟ କଷ୍ଟସାଧ୍ୟ ହୋଇପଡ଼ିଛି। ଘଟଣା ଘଟି ୨୦ ଘଣ୍ଟାରୁ ଅଧିକ ସମୟ ବିତିଯାଇଥିଲେ ମଧ୍ୟ ନିଖୋଜ ଯୁବକଙ୍କ ଖୋଜ ଜାରି ରହିଛି। କଟକ ମାଛୁଆ ବଜାର ଅଞ୍ଚଳର ତିନି ଯୁବକ ନରାଜ ପୁରୁଣା ବନ୍ଧ ନିକଟରେ ସେଲଫି ନେଉଥିବା ସମୟରେ ଏହି ଦୁର୍ଘଟଣା ଘଟିଥିଲା।
ପୁରୁଷ ବନ୍ଧୁଙ୍କ ଘରୁ ନାବାଳିକାଙ୍କ ମୃତଦେହ ଉଦ୍ଧାର
ନନ୍ଦିଘୋଷ ବ୍ୟୁରୋ: ପୁରୁଷ ବନ୍ଧୁଙ୍କ ଘରୁ ନାବାଳିକାଙ୍କ କ୍ଷତାକ୍ତ ମୃତଦେହ ଉଦ୍ଧାର । ଗଞ୍ଜାମ ଜିଲ୍ଲାର ଜରଡ଼ା ଥାନା ଅନ୍ତର୍ଗତ ଏସ ନୁଆଁ ଗାଁ ରେ ସାମ୍ନାକୁ ଆସିଛି ଏପରି ଏକ ଚାଞ୍ଚଲ୍ୟକର ଘଟଣା । ଜଣେ ନାବାଳିକାଙ୍କ କ୍ଷତାକ୍ତ ମୃତଦେହ ତାଙ୍କ ପୁରୁଷ ବନ୍ଧୁ ଅଜୟ ନାୟକଙ୍କ ଘରୁ ପୋଲିସ ଦ୍ୱାରା ଉଦ୍ଧାର କରାଯାଇଛି। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଆଲୋଡ଼ନ ସୃଷ୍ଟି ହୋଇଥିବା ବେଳେ, ପରିବାର ଲୋକେ ଏହାକୁ ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ଅଭିଯୋଗ କରିଛନ୍ତି।
ସୂଚନା ଅନୁଯାଇ ମୃତ ନାବାଳିକା ଜଣକ କିଛି ମାସ ପୂର୍ବରୁ ଅଭିଯୁକ୍ତ ଯୁବକଙ୍କ ସହ ଫେରାର ହୋଇଯାଇଥିଲେ। ତେବେ କିଛି ଦିନ ପରେ ଉଭୟ ଗାଁକୁ ଫେରିଆସି ଏକାଠି ବସବାସ କରୁଥିଲେ। ବର୍ତ୍ତମାନ ଯୁବକଙ୍କ ଘରୁ ନାବାଳିକାଙ୍କ ଶରୀରରେ କ୍ଷତ ଚିହ୍ନ ଥିବା ମୃତଦେହ ମିଳିବା ପରେ ଝିଅକୁ ଯୋଜନାବଦ୍ଧ ଭାବେ ହତ୍ୟା କରାଯାଇଥିବା ନେଇ ପରିବାର ସଦସ୍ୟମାନେ ଅଭିଯୋଗ କରିଛନ୍ତି।
ତେବେ ଘଟଣା ସମ୍ପର୍କରେ ଖବର ପାଇବା ପରେ ଜରଡ଼ା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରାଯାଇ ମୃତ୍ୟୁର ପ୍ରକୃତ କାରଣ ଜାଣିବା ପାଇଁ ଶବକୁ ବ୍ୟବଚ୍ଛେଦ ନିମନ୍ତେ ପଠାଯାଇଛି। ବର୍ତମାନ ଏହି ଘଟଣାରେ ଜରଡ଼ା ଥାନାରେ ଏକ ମାମଲା ରୁଜୁ କରାଯାଇଛି। ବ୍ରହ୍ମପୁର ରୁ ସାଇଣ୍ଟିଫିକ ଟିମ ଏବଂ ସନ୍ଧାନି କୁକୁର ଆସି ତଦନ୍ତ କରିଥିବା ବେଳେ ଯୁବକ କୁ ଥାନାରେ ଅଟକ ରଖି ପଚରାଉଚରା କରୁଛି ପୋଲିସ ।
ଅଶାନ୍ତ ସମୁଦ୍ର: ଗୋପାଳପୁର ବନ୍ଦରରେ ଆଶ୍ରୟ ନେଲେ ଆନ୍ଧ୍ରର ୩୪ଟି ମାଛଧରା ବୋଟ୍
ନନ୍ଦିଘୋଷ ବ୍ୟୁରୋ: ଲଘୁଚାପ ପ୍ରଭାବରେ ସମୁଦ୍ର ଅଶାନ୍ତ ରହିଛି। ଅଧିକ ପବନ ସାଙ୍ଗକୁ ସମୁଦ୍ରରେ ଉଚ୍ଚ ଢେଉ ସୃଷ୍ଟି ହେଉଥିବାରୁ ଆସନ୍ତା ୭ ତାରିଖ ପର୍ଯ୍ୟନ୍ତ ମତ୍ସ୍ୟଜୀବୀମାନଙ୍କୁ ସମୁଦ୍ର ଭିତରକୁ ନଯିବା ପାଇଁ ଏସଆରସି ବାରଣ କରିଛନ୍ତି। ଏହି ପରିପ୍ରେକ୍ଷୀରେ ଗଞ୍ଜାମ ସାମୁଦ୍ରିକ ମତ୍ସ୍ୟ ବିଭାଗ ପକ୍ଷରୁ ମଧ୍ୟ ସ୍ଥାନୀୟ ମତ୍ସ୍ୟଜୀବୀଙ୍କୁ ବ୍ୟାପକ ସଚେତନ କରାଯାଉଛି।
ସମୁଦ୍ରରେ ବାତ୍ୟା ଭଳି ସ୍ଥିତି ଯୋଗୁଁ ଆନ୍ଧ୍ର ପ୍ରଦେଶର କାକିନାଡ଼ା ଅଞ୍ଚଳର ୩୪ଟି ମାଛଧରା ବୋଟ୍ ଆର୍ଯ୍ୟପଲ୍ଲୀ ସମୁଦ୍ର ନିକଟରେ ଫସି ରହିଥିଲେ। ପ୍ରବଳ ଢେଉ ଯୋଗୁଁ ସେମାନେ ନିଜ ଅଞ୍ଚଳକୁ ଫେରିବା ସମ୍ଭବ ହୋଇନଥିଲା।
ମତ୍ସ୍ୟଜୀବୀମାନଙ୍କ ସୁରକ୍ଷାକୁ ଦୃଷ୍ଟିରେ ରଖି ଗଞ୍ଜାମ ଜିଲ୍ଲା ପ୍ରଶାସନ ତୁରନ୍ତ ଏଥିରେ ହସ୍ତକ୍ଷେପ କରିଥିଲେ। ପ୍ରଶାସନର ଅନୁମତି କ୍ରମେ ସମସ୍ତ ବୋଟ୍କୁ ଗୋପାଳପୁର ବନ୍ଦରକୁ ଅଣାଯାଇଛି।
ବର୍ତ୍ତମାନ ସେହି ସମସ୍ତ ୩୪ଟି ବୋଟ୍ ଗୋପାଳପୁର ବନ୍ଦରରେ ଲଙ୍ଗର ପକାଇ ସୁରକ୍ଷିତ ଭାବେ ରହିଛନ୍ତି। ଏହାସହ ବୋଟ୍ରେ ଥିବା ସମସ୍ତ ମତ୍ସ୍ୟଜୀବୀ ସମ୍ପୂର୍ଣ୍ଣ ସୁରକ୍ଷିତ ଥିବା ବିଭାଗ ପକ୍ଷରୁ ସ୍ପଷ୍ଟ କରାଯାଇଛି।
ଆଇଆଇସି ବିୟୁଟି ମହାନ୍ତିଙ୍କ ମୃତ୍ୟୁ ରହସ୍ୟ: ହତ୍ୟା ନା ଆତ୍ମହତ୍ୟା?
କଟକ: କଟକ ଚାଉଳିଆଗଞ୍ଜ ଥାନା IIC ବିୟୁଟି ମହାନ୍ତିଙ୍କ ରହସ୍ୟଜନକ ମୃତ୍ୟୁକୁ ନେଇ ସସପେନ୍ସ ଜାରି ରହିଛି। ଗତ ଶନିବାର ତାଙ୍କ ସରକାରୀ କ୍ୱାର୍ଟର୍ସରୁ ଝୁଲନ୍ତା ଅବସ୍ଥାରେ ମୃତଦେହ ଉଦ୍ଧାର ହେବା ପରେ, ଏହା ଆତ୍ମହତ୍ୟା ନା ଏହା ପଛରେ ଅନ୍ୟ କିଛି କାରଣ ରହିଛି, ସେ ନେଇ ଏପର୍ଯ୍ୟନ୍ତ କୌଣସି ପକ୍କା ତଥ୍ୟ ମିଳିପାରିନାହିଁ।
ଏହି ହାଇପ୍ରୋଫାଇଲ୍ ମାମଲାର ସ୍ୱଚ୍ଛ ଓ ନିରପେକ୍ଷ ତଦନ୍ତ ପାଇଁ କଟକ ଡିସିପିଙ୍କ ନିର୍ଦ୍ଦେଶରେ ଏକ ସ୍ୱତନ୍ତ୍ର ଟିମ୍ ଗଠନ କରାଯାଇଛି। ଘଟଣାର ସବୁ ଦିଗକୁ ଅନୁଧ୍ୟାନ କରିବାକୁ ଥିବା ଏହି ସ୍ୱତନ୍ତ୍ର ଟିମ୍ରେ ଅଛନ୍ତି, ଜଣେ ଏଡିସିପି, ଜଣେ ଏସିପି, ଦୁଇ ଜଣ ଇନ୍ସପେକ୍ଟର ।
ତେବେ ମୃତ୍ୟୁର ପ୍ରକୃତ କାରଣ ଖୋଜିବା ପାଇଁ ପୋଲିସ ମୃତ ଆଇଆଇସିଙ୍କ ମୋବାଇଲ୍ ଫୋନ୍ ଜବତ କରିଛି। ମୋବାଇଲ୍ରୁ କଲ୍ ରେକର୍ଡ, ମେସେଜ୍ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଡାଟା ବାହାର କରିବା ପାଇଁ ଏହାକୁ ଫୋରେନସିକ୍ ଏବଂ ସାଇଣ୍ଟିଫିକ୍ କୁ ପଠାଯାଇଛି। ସେହିପରି ମୃତଦେହ ବ୍ୟବଚ୍ଛେଦ ରିପୋର୍ଟ ଯେପରି ଶୀଘ୍ର ହସ୍ତଗତ ହେବ, ସେଥିପାଇଁ ପୋଲିସ ବିଭାଗ ସମ୍ପୃକ୍ତ ଡାକ୍ତରୀ ଦଳ ସହ ନିୟମିତ ଯୋଗାଯୋଗରେ ରହିଛି।
ଅନ୍ୟପଟେ କଟକ ଡିସିପିଙ୍କ ସୂଚନା ଅନୁସାରେ, ଏପର୍ଯ୍ୟନ୍ତ ବିୟୁଟି ମହାନ୍ତିଙ୍କ ପରିବାର ପକ୍ଷରୁ ଥାନାରେ କୌଣସି ବିଧିବଦ୍ଧ ଭାବେ ଲିଖିତ ଅଭିଯୋଗ କରାଯାଇନାହିଁ। ପରିବାର ଲୋକଙ୍କ ବୟାନ ଏବଂ ଫୋରେନସିକ୍ ରିପୋର୍ଟ ଆସିବା ପରେ ହିଁ ଏହି ମୃତ୍ୟୁ ରହସ୍ୟ ଉପରୁ ପରଦା ହଟିବ ବୋଲି ଆଶା କରାଯାଉଛି।
ମାମୁଁଘର ଗାଁରେ ରକ୍ତାକ୍ତ ସଂଘର୍ଷ: ଭୁଜାଲି ଚୋଟରେ ଯୁବକଙ୍କ ହାତ ପାପୁଲି କଟି ଅଲଗା
ନନ୍ଦିଘୋଷ ବ୍ୟୁରୋ: ଜଣେ ଯୁବକଙ୍କୁ ଅତି ନିର୍ମମ ଭାବେ ଭୁଜାଲିରେ ଆକ୍ରମଣ କରାଯାଇଛି। ଆକ୍ରମଣ ଏତେ ଭୟାବହ ଥିଲା ଯେ, ଯୁବକ ଜଣକ ନିଜ ଜୀବନ ବଞ୍ଚାଇବାକୁ ଚେଷ୍ଟା କରୁଥିବା ବେଳେ ତାଙ୍କ ଡାହାଣ ହାତର ପାଖରୁ ପାପୁଲିଟି କଟି ସମ୍ପୂର୍ଣ୍ଣ ଅଲଗା ହୋଇଯାଇଛି। ଏଭଳି ଏକ ଅଭାବନୀୟ ଘଟଣା ଘଟିଛି ରାଜକନିକା ଥାନା ଅନ୍ତର୍ଗତ ବରୁଣାଡିହା ଗାଁରେ। ଆହତ ଯୁବକ ଜଣକ ହେଲେ ପଟ୍ଟାମୁଣ୍ଡାଇ ନୂଆ ଅରସା ଗାଁର ଗାଲେଖ ଥାଟୋଇଙ୍କ ପୁଅ ସୌରଭ ଥାଟୋଇ।
ମିଳିଥିବା ସୂଚନା ଅନୁଯାଇ , ସୌରଭ ଆଜି ସକାଳେ ତାଙ୍କ ମାମୁଁଘର ଗାଁ ବରୁଣାଡିହାକୁ ଯାଇଥିଲେ। ସେ ସେଠାରେ ବୁଲାବୁଲି କରୁଥିବା ସମୟରେ, ସେହି ଗାଁର ଜଣେ ଯୁବକ କୌଣସି କାରଣରୁ ହଠାତ୍ ଏକ ଭୁଜାଲି ଧରି ତାଙ୍କ ଉପରକୁ ଅତର୍କିତ ଆକ୍ରମଣ କରିଥିଲା। ଭୁଜାଲି ଚୋଟରୁ ନିଜ ମୁଣ୍ଡ ଓ ଶରୀରକୁ ବଞ୍ଚାଇବା ପାଇଁ ସୌରଭ ନିଜ ଡାହାଣ ହାତ ଆଗକୁ ବଢ଼ାଇ ଦେଇଥିଲେ। ଫଳରେ ଧାରୁଆ ଭୁଜାଲି ଚୋଟରେ ତାଙ୍କ ହାତଟି କଟି ଅଲଗା ହୋଇଯାଇଥିଲା।
ସୌରଭ ରକ୍ତ ଜୁଡ଼ୁବୁଡ଼ୁ ସ୍ୱାସ୍ଥ୍ୟାବସ୍ଥା ଅତ୍ୟନ୍ତ ସଂକଟାପନ୍ନ ଥିବାରୁ ଏବଂ ପ୍ରଚୁର ରକ୍ତସ୍ରାବ ହୋଇଥିବାରୁ ତାଙ୍କୁ ଜରୁରୀକାଳୀନ ଭାବେ କଟକ ବଡ଼ ମେଡିକାଲ ପଠାଯାଇଛି।
ତେବେ ଉକ୍ତ ଯୁବକ ଜଣକ କେଉଁ କାରଣ ପାଇଁ ସୌରଭଙ୍କୁ ଏଭଳି ମରଣାନ୍ତକ ଆକ୍ରମଣ କଲା, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଖବର ପାଇ ପୋଲିସ ବରୁଣାଡିହା ଗାଁରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିବା ସହ ଫେରାର ଥିବା ଅଭିଯୁକ୍ତକୁ ଧରିବା ପାଇଁ ସ୍ଥାନୀୟ ଅଞ୍ଚଳରେ ଚଢ଼ାଉ ଜାରି ରଖିଛି।
ଭେନେଜୁଏଲାରେ ପୀଡ଼ିତଙ୍କୁ ଭେଟିଲେ ଭି.କେ ପାଣ୍ଡିଆନ, ବିପର୍ଯ୍ୟୟ ମୁକାବିଲାରେ ବାଣ୍ଟିଲେ ଓଡ଼ିଶାର ଅଭିଜ୍ଞତା
ନନ୍ଦିଘୋଷ ବ୍ୟୁରୋ: ଓଡ଼ିଶାର ବିପର୍ଯ୍ୟୟ ମୁକାବିଲାର ସଫଳ ମଡେଲ ଏବେ ଆନ୍ତର୍ଜାତିକ ସ୍ତରରେ ପ୍ରଶଂସିତ। ଏହି କ୍ରମରେ ଭେନେଜୁଏଲାରେ ହୋଇଥିବା ଭୟାବହ ଭୂକମ୍ପ ପରବର୍ତ୍ତୀ ସ୍ଥିତି ଏବଂ ଉଦ୍ଧାରକାର୍ଯ୍ୟର ସମୀକ୍ଷା ପାଇଁ ଭେନେଜୁଏଲା ରାଷ୍ଟ୍ରପତିଙ୍କ ନିମନ୍ତ୍ରଣ କ୍ରମେ ଓଡ଼ିଶାର ପୂର୍ବତନ 5T ଅଧ୍ୟକ୍ଷ ଭି.କେ ପାଣ୍ଡିଆନ ଭେନେଜୁଏଲା ଗସ୍ତ କରିଛନ୍ତି। ସେଠାରେ ସେ ଭୂକମ୍ପ ପୀଡ଼ିତଙ୍କୁ ଭେଟି ସମବେଦନା ପ୍ରକାଶ କରିବା ସହ ଉଦ୍ଧାର ଓ ପୁନର୍ବାସ କାର୍ଯ୍ୟ ନେଇ ଆଲୋଚନା କରିଛନ୍ତି।
ପ୍ରାକୃତିକ ବିପର୍ଯ୍ୟୟ ମୁକାବିଲା ଏବଂ ପ୍ରଶମନ କ୍ଷେତ୍ରରେ ଓଡ଼ିଶାର ଆନ୍ତର୍ଜାତିକ ଖ୍ୟାତି ରହିଛି। ବାତ୍ୟା ଓ ଅନ୍ୟାନ୍ୟ ବିପର୍ଯ୍ୟୟ ସମୟରେ ଓଡ଼ିଶା ସରକାରଙ୍କ ତ୍ୱରିତ ପଦକ୍ଷେପ ଏବଂ ‘ଶୂନ୍ୟ ଜୀବନ ହାନି’ ନୀତିକୁ ସାରା ବିଶ୍ୱ ଗ୍ରହଣ କରିଛି। ପାଣ୍ଡିଆନଙ୍କ ଏହି ଦୀର୍ଘ ଦିନର ପ୍ରଶାସନିକ ଅଭିଜ୍ଞତାକୁ ବିନିଯୋଗ କରିବା ପାଇଁ ଭେନେଜୁଏଲା ରାଷ୍ଟ୍ରପତି ତାଙ୍କୁ ସ୍ୱତନ୍ତ୍ର ଭାବେ ଆମନ୍ତ୍ରଣ କରିଥିଲେ।
ଗସ୍ତ ସମୟରେ ଭି.କେ ପାଣ୍ଡିଆନ ଭେନେଜୁଏଲାର ଉଚ୍ଚପଦସ୍ଥ ଅଧିକାରୀ ଓ ଉଦ୍ଧାରକାରୀ ଦଳ ସହ ଏକ ବୈଠକରେ ଯୋଗ ଦେଇଥିଲେ। ବିପର୍ଯ୍ୟୟ ପ୍ରଶମନରେ ଓଡ଼ିଶାର ପଦକ୍ଷେପ ବିଷୟରେ ସୂଚନା ଦେବା ସହ କିଭଳି ତତ୍କାଳ ରିଲିଫ୍ ଏବଂ ପ୍ରତିକାର ବ୍ୟବସ୍ଥା କରାଯାଇପାରିବ, ସେ ନେଇ ସେ ନିଜର ଅଭିଜ୍ଞତା ଦେଇଥିଲେ ।
ଭି.କେ ପାଣ୍ଡିଆନ ଭୂକମ୍ପ ପ୍ରଭାବିତ ଅଞ୍ଚଳ ପରିଦର୍ଶନ କରି ପୀଡ଼ିତ ଏବଂ ଉଦ୍ଧାରକାର୍ଯ୍ୟରେ ନିୟୋଜିତ ଦଳ ସହିତ ଆଲୋଚନା କରିଥିଲେ। ଏଭଳି ଏକ ଆହ୍ୱାନପୂର୍ଣ୍ଣ ସମୟରେ ସେଠାରେ ସେବା ଯୋଗାଇ ଦେଉଥିବା ଭାରତୀୟ ସେନାର ଅତୁଳନୀୟ କାର୍ଯ୍ୟକୁ ସେ ଉଚ୍ଚ ପ୍ରଶଂସା କରିଥିଲେ। ଏଥିସହିତ ଦିନରାତି ଏକ କରି ଲୋକଙ୍କ ଜୀବନ ବଞ୍ଚାଉଥିବା ଡାକ୍ତରୀ ଦଳ ଏବଂ ସ୍ୱାସ୍ଥ୍ୟକର୍ମୀଙ୍କ ତ୍ୟାଗକୁ ମଧ୍ୟ ସେ ପ୍ରଶଂସା ଜଣାଇଛନ୍ତି।
ପାଣ୍ଡିଆନ କାହିଁଛନ୍ତି ଏହି ସଙ୍କଟ ସମୟରେ ଉଦ୍ଧାରକାରୀ ଦଳର ସାହସିକତା ପ୍ରଶଂସନୀୟ। ଭେନେଜୁଏଲାରେ ଖୁବ୍ ଶୀଘ୍ର ସ୍ୱାଭାବିକ ସ୍ଥିତି ଏବଂ ଶାନ୍ତି ଫେରିଆସୁ, ଏହା ହିଁ ମୋର ପ୍ରାର୍ଥନା।
ମୁମ୍ବାଇରେ ବର୍ଷାର ତାଣ୍ଡବ ; ମୃତ୍ୟୁ ସଂଖ୍ୟା ୧୩କୁ ବୃଦ୍ଧି
ମୁମ୍ବାଇରେ ପ୍ରବଳ ବର୍ଷା ଯୋଗୁଁ ସ୍ଥିତି ସଂଗୀନ ହୋଇପଡ଼ିଛି। ମନଖୁର୍ଦର ଜନତା ନଗର ଅନ୍ତର୍ଗତ ହନୁମାନ ମନ୍ଦିର ନିକଟରେ ଏକ ବହୁତଳ କୋଠା ଭୁଶୁଡ଼ି ପଡ଼ିବା ଫଳରେ ୬ ଜଣ ପ୍ରାଣ ହରାଇଛନ୍ତି ଏବଂ ଅନେକ ଆହତ ହୋଇଛନ୍ତି। ଏହି ଘଟଣାକୁ ମିଶାଇ ମୁମ୍ବାଇରେ ବର୍ତ୍ତମାନ ସୁଦ୍ଧା ବର୍ଷାଜନିତ ମୃତ୍ୟୁ ସଂଖ୍ୟା ୧୩କୁ ବୃଦ୍ଧି ପାଇଛି। ଦୁର୍ଘଟଣା ସ୍ଥଳରେ ଏବେ ମଧ୍ୟ ରେସ୍କ୍ୟୁ ଅପରେସନ ଜାରି ରହିଛି।
ସହରର ଅଧିକାଂଶ ରାସ୍ତା ଜଳମଗ୍ନ ହୋଇ ରହିଥିବା ବେଳେ ପ୍ରବଳ ପବନ ଯୋଗୁଁ ଜୀବନଯାତ୍ରା ଗମ୍ଭୀର ଭାବେ ପ୍ରଭାବିତ ହୋଇଛି। ମେଟ୍ରୋ, ବସ୍ ଏବଂ ବିମାନ ସେବା ବାଧାପ୍ରାପ୍ତ ହୋଇଛି। କ୍ରମାଗତ ଚାରି ଦିନ ଧରି ବର୍ଷା ଜାରି ରହିଥିବାରୁ ପୁଣେ ସହରରେ ମଧ୍ୟ ସ୍ଥିତି ବେହାଲ ହୋଇଛି ଏବଂ ପଞ୍ଚଗଙ୍ଗା ନଦୀର ଜଳସ୍ତର ବୃଦ୍ଧି ପାଇବା ଯୋଗୁଁ ଅନେକ ଅଞ୍ଚଳ ଜଳମଗ୍ନ ହୋଇଛି। ଆଜି ମଧ୍ୟ ପ୍ରବଳ ବର୍ଷାର ଆଶଙ୍କା ଥିବାରୁ ସରକାରୀ ଓ ବେସରକାରୀ ସମସ୍ତ ସ୍କୁଲ ଏବଂ କଲେଜକୁ ଛୁଟି ଘୋଷଣା କରାଯାଇଛି।
ପ୍ରବଳ ବର୍ଷା ସହିତ ଭୂସ୍ଖଳନ ହେବା ଯୋଗୁଁ ମୁମ୍ବାଇ-ପୁଣେ ରାଜପଥରେ ଯୋଗାଯୋଗ ସମ୍ପୂର୍ଣ୍ଣ ବିଚ୍ଛିନ୍ନ ହୋଇଯାଇଛି। ଏହା ସହିତ ମୁମ୍ବାଇରେ ୧୬ଟି ଟ୍ରେନକୁ ବାତିଲ କରାଯାଇଛି। ଗତ ୨୪ ଘଣ୍ଟା ମଧ୍ୟରେ ସହରରେ ପ୍ରାୟ ୫୨୩ଟି ଗଛ ଉପୁଡ଼ି ପଡ଼ିଛି। ଦାଦରର ଶିବାଜୀ ପାର୍କରେ ଦୁଇଟି ବଡ଼ ଗଛ ଉପୁଡ଼ି ପଡ଼ିବା ଯୋଗୁଁ ସେଠାରେ ପାର୍କିଂ କରାଯାଇଥିବା ଗାଡ଼ିଗୁଡ଼ିକ କ୍ଷତିଗ୍ରସ୍ତ ହୋଇଛି। ପାଣିପାଗ ବିଭାଗ ଆଗାମୀ ୨୪ ଘଣ୍ଟା ମଧ୍ୟରେ ମୁମ୍ବାଇ, ଥାନେ, ପାଲଘର, ରାୟଗଡ଼ ଏବଂ ରତ୍ନଗିରିରେ ମଧ୍ୟମରୁ ଉଚ୍ଚ ଧରଣର ବନ୍ୟା ଆସିବାର ଆଶଙ୍କା ଥିବା ନେଇ ଚେତାବନୀ ଦେଇଛି।
ବୃହନ୍ମୁମ୍ବାଇ ମ୍ୟୁନିସିପାଲ୍ କର୍ପୋରେସନ୍ (BMC) ର ରିପୋର୍ଟ ଅନୁଯାୟୀ, ଗଛ ପଡ଼ିବା ଘଟଣାରେ ୬୩ ବର୍ଷୀୟ ୟୁନୁସ୍ କୁଣ୍ଡାୱାଲାଙ୍କ ମୃତ୍ୟୁ ଘଟିଛି ଏବଂ ଅନ୍ୟ ୧୦ ଜଣ ଆହତ ହୋଇଛନ୍ତି। ମୋଟ ୫୨୩ଟି ଗଛ ମଧ୍ୟରୁ ଦ୍ୱୀପ ନଗରୀରେ ୧୮୫, ପୂର୍ବ ଉପନଗରରେ ୧୫୦ ଏବଂ ପଶ୍ଚିମ ଉପନଗରରେ ୧୮୮ଟି ଗଛ ପଡ଼ିଛି। ସୋମବାର ସକାଳେ ଯୋଗେଶ୍ୱରୀରେ ଏକ ଘର ଉପରେ ଗଛ ପଡ଼ିବାରୁ ୭ ଜଣ ଆହତ ହୋଇଛନ୍ତି, ଯେଉଁଥିରୁ ୪ ଜଣଙ୍କୁ କୁପର ହସ୍ପିଟାଲରେ ଭର୍ତ୍ତି କରାଯାଇଛି। ସେହିପରି ୱର୍ଲିର ବିଡିଡି ଚାଲରେ ଏବଂ ଅନ୍ୟ ଏକ ଘଟଣାରେ ଜଣେ ଅଟୋରିକ୍ସା ଯାତ୍ରୀ ମଧ୍ୟ ଗଛ ପଡ଼ିବା ଯୋଗୁଁ ଆହତ ହୋଇଛନ୍ତି।
ପାଣିପାଗ ବିଭାଗ (IMD) ସୋମବାର ପାଇଁ ମୁମ୍ବାଇ, ଥାଣେ, ପାଲଘର, ରାୟଗଡ଼ ଏବଂ ରତ୍ନଗିରି ଜିଲ୍ଲା ପାଇଁ ‘ରେଡ୍ ଆଲର୍ଟ’ ଜାରି କରିଛି। ଏହି ସମୟରେ ଘଣ୍ଟା ପ୍ରତି ୭୦-୮୦ କିଲୋମିଟର ବେଗରେ ପ୍ରବଳ ପବନ ବହିବା ସହ ଅତି ପ୍ରବଳ ବର୍ଷା ହୋଇପାରେ। ଅପରପକ୍ଷରେ ସିନ୍ଧୁଦୁର୍ଗ ଜିଲ୍ଲାକୁ ‘ଅରେଞ୍ଜ ଆଲର୍ଟ’ରେ ରଖାଯାଇଛି। ଆଗାମୀ ମଙ୍ଗଳବାର ପାଇଁ ମଧ୍ୟ ପାଲଘର ଏବଂ ରାୟଗଡ଼ ଜିଲ୍ଲାରେ ‘ରେଡ୍ ଆଲର୍ଟ’ ବଳବତ୍ତର ରହିବ ବୋଲି ସୂଚନା ମିଳିଛି।
ଖରାପ ପାଗ ଯୋଗୁଁ ବିମାନ ଚଳାଚଳ ସବୁଠାରୁ ଅଧିକ ବାଧାପ୍ରାପ୍ତ ହୋଇଛି। ରବିବାର ଦିନ ଛତ୍ରପତି ଶିବାଜୀ ମହାରାଜ ଅନ୍ତର୍ଜାତୀୟ ବିମାନବନ୍ଦରରେ ପ୍ରବଳ ବର୍ଷା ଓ ଝଡ଼ ପବନ ହେତୁ କାର୍ଯ୍ୟ ବନ୍ଦ ରହିଥିଲା। ‘Flight radar 24’ ର ସୂଚନା ଅନୁଯାୟୀ, ସେହିଦିନ ମୁମ୍ବାଇ ବିମାନବନ୍ଦର ବିଶ୍ୱର ସବୁଠାରୁ ବାଧାପ୍ରାପ୍ତ ବିମାନବନ୍ଦର ପାଲଟିଥିଲା। ବିମାନବନ୍ଦର ଅଞ୍ଚଳରେ ଦୃଶ୍ୟମାନତା ହ୍ରାସ ପାଇବା ଏବଂ ପବନର ବେଗ ପ୍ରାୟ ୪୨ ନଟ୍ ଛୁଇଁବା ଯୋଗୁଁ ରନୱେ କାର୍ଯ୍ୟକୁ ପ୍ରାୟ ଏକ ଘଣ୍ଟା ପାଇଁ ସ୍ଥଗିତ ରଖିବାକୁ ପଡ଼ିଥିଲା।
ଅଯୋଧ୍ୟା ରାମ ମନ୍ଦିର ଦାନ ଚୋରି ମାମଲା : ଜେଲରେ ଥିବା ଅଭିଯୁକ୍ତଙ୍କୁ ଜେରା କରିବ ପୋଲିସ
ନନ୍ଦିଘୋଷ ବ୍ୟୁରୋ: ଅଯୋଧ୍ୟା ରାମ ମନ୍ଦିର ଦାନ ଚୋରି ମାମଲାରେ ଅଯୋଧ୍ୟା ଜେଲରେ ଥିବା ଅଭିଯୁକ୍ତମାନଙ୍କୁ ପୋଲିସ ଜେରା କରିବ। ଅଭିଯୁକ୍ତ ଅନୁକଳ୍ପ ମିଶ୍ର, ଲବକୁଶ ମିଶ୍ର, ରାମ ଶଙ୍କର ଯାଦବ, କରୁଣେଶ ପାଣ୍ଡେ ଏବଂ ମନୀଷ ଯାଦବଙ୍କ ବୟାନ ଜେଲ ଭିତରେ ରେକର୍ଡ କରାଯିବ। ଏହି ବୟାନଗୁଡ଼ିକ ଅତ୍ୟନ୍ତ ଗୁରୁତ୍ବପୂର୍ଣ୍ଣ ହୋଇଥିବାରୁ, ଅଧିକ ତଥ୍ୟ ଆଦାୟ କରିବା ପାଇଁ ପୋଲିସ ସେମାନଙ୍କୁ ନିଜରିମାଣ୍ଡରେ ନେବାର ମଧ୍ୟ ସମ୍ଭାବନା ରହିଛି। କୋଟି କୋଟି ଟଙ୍କାର ଏହି ହେରଫେର ଘଟଣା ଏବେ ସାରା ଦେଶରେ ଚର୍ଚ୍ଚାର ବିଷୟ ପାଲଟିଛି।
ସେପଟେ ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟର ସାଧାରଣ ସମ୍ପାଦକ ଚମ୍ପତ ରାୟଙ୍କୁ ଅଯୋଧ୍ୟା ସନ୍ଥ ମଣ୍ଡଳ ପୂର୍ଣ୍ଣ ସମର୍ଥନ ଜଣାଇଛି। ସଂଗଠନ କହିଛି ଯେ ସେମାନେ ଚମ୍ପତ ରାୟଙ୍କ ଇସ୍ତଫା ଗ୍ରହଣ କରିବେ ନାହିଁ। ଏହି ଚୋରି ମାମଲାର ଏସଆଇଟି ତଦନ୍ତ ପାଇଁ ଖୋଦ୍ ଚମ୍ପତ ରାୟ ହିଁ ଅନୁରୋଧ କରିଥିଲେ, ତେଣୁ ଏହି ଲୁଟ୍ ମାମଲାରେ ତାଙ୍କର କୌଣସି ହାତ ନାହିଁ।
ଅନ୍ୟପଟେ, ଆହ୍ଲାବାଦ ହାଇକୋର୍ଟର ଲକ୍ଷ୍ନୌ ବେଞ୍ଚ ରାମ ମନ୍ଦିର ଦାନ ଅନିୟମିତତା ମାମଲାରେ ସିବିଆଇ (CBI) ତଦନ୍ତ ଦାବି କରୁଥିବା ଏକ ଜନସ୍ୱାର୍ଥ ମାମଲା ଉପରେ ଶୁଣାଣି କରିବାକୁ ସ୍ଥିର କରିଛନ୍ତି। ବିଚାରପତି ରାଜନ ରାୟ ଏବଂ ବିଚାରପତି ମନଜୀବ ଶୁକ୍ଳାଙ୍କ ଡିଭିଜନ ବେଞ୍ଚ ଜୁନ୍ 12 ରେ ଦାଖଲ ହୋଇଥିବା ଏହି ଆବେଦନର ଶୁଣାଣି କରିବେ। ଆବେଦନକାରୀ ଏଫଆଇଆର୍ ପଞ୍ଜିକରଣ ସହ ନିରପେକ୍ଷ ତଦନ୍ତ ଏବଂ ମହାଲେଖା ନିୟନ୍ତ୍ରକ ଦ୍ୱାରା ମନ୍ଦିର ଦାନର ଅଡିଟ୍ କରିବାକୁ କୋର୍ଟଙ୍କୁ ଅନୁରୋଧ କରିଛନ୍ତି।
ଦାନ ଅନିୟମିତତା ବିବାଦ ବଢ଼ୁଥିବା ବେଳେ ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟର ଏକ ଉଚ୍ଚସ୍ତରୀୟ ବୈଠକ ଅଯୋଧ୍ୟାରେ ଅନୁଷ୍ଠିତ ହେବ। ଏହି ବୈଠକରେ SIT ର ପ୍ରାରମ୍ଭିକ ତଦନ୍ତ ରିପୋର୍ଟର ସମୀକ୍ଷା କରାଯିବ। ଏହାସହ ପୂର୍ବତନ ସାଧାରଣ ସମ୍ପାଦକ ଚମ୍ପତ ରାୟ ଏବଂ ପୂର୍ବତନ ଟ୍ରଷ୍ଟି ଅନିଲ ମିଶ୍ରଙ୍କ ଇସ୍ତଫା ଉପରେ ମଧ୍ୟ ଚୂଡ଼ାନ୍ତ ନିଷ୍ପତ୍ତି ନିଆଯିବାର ସମ୍ଭାବନା ରହିଛି।
ପୋଲିସ ହେପାଜତରେ ଥିବା ଅଭିଯୁକ୍ତ ଅଭିନାଶ ଶୁକ୍ଲା ଜେରା ସମୟରେ ଅନେକ ନୂଆ ଆର୍ଥିକ ତଥ୍ୟ ପ୍ରକାଶ କରିଛି। ସେ ମନ୍ଦିରରୁ ଆତ୍ମସାତ କରିଥିବା ଟଙ୍କାରୁ ପ୍ରାୟ ୧୯ ଲକ୍ଷ ଟଙ୍କା ନିଜ ପରିବାର ଓ ବନ୍ଧୁମାନଙ୍କ ପାଇଁ ଖର୍ଚ୍ଚ କରିଥିବା ସ୍ୱୀକାର କରିଛି।
ଜଣେ ଭାଇଙ୍କ ବିବାହରେ ପ୍ରାୟ ୬ ଲକ୍ଷ ଟଙ୍କା ଖର୍ଚ୍ଚ କରିଥିଲା। ଅନ୍ୟ ଜଣେ ଭାଇଙ୍କୁ ୫ ରୁ ୬ ଲକ୍ଷ ଟଙ୍କା ଦେଇଥିଲା। ପ୍ରାୟ ୩.୫ ଲକ୍ଷ ଟଙ୍କା ମୂଲ୍ୟର ଏକ କାର୍ କିଣିଥିଲା। ଜଣେ ବନ୍ଧୁଙ୍କୁ ୨.୫ ଲକ୍ଷ ଟଙ୍କା ଦେବା ସହ ଏକ ମହଙ୍ଗା ମୋବାଇଲ୍ ଫୋନ୍ ଉପହାର ଦେଇଥିଲା। ଏହା ବ୍ୟତୀତ ଅନ୍ୟ କେତେକ ବ୍ୟକ୍ତିଙ୍କ ମଧ୍ୟରେ ମଧ୍ୟ କିଛି କିଛି ଟଙ୍କା ବାଣ୍ଟିଥିଲା।
ତେବେ ପୂର୍ବରୁ ପୋଲିସ ଶୁକ୍ଳାଙ୍କ ନିକଟରୁ ନଗଦ ୨୦.୩୯ ଲକ୍ଷ ଟଙ୍କା, ୧,୧୨୧ ଆମେରିକୀୟ ଡଲାର, ସୁନା ଓ ରୂପା ଅଳଙ୍କାର ସମେତ ଏକ SUV ଗାଡ଼ି ଜବତ କରିସାରିଛି।
ପିଫା ବିଶ୍ୱକପ୍ରେ ବଡ଼ ବିପର୍ଯ୍ୟୟ : : ରାଉଣ୍ଡ ଅଫ୍ ୧୬ରୁ ବିଦାୟ ନେଲା ୫ ଥରର ଚ୍ୟାମ୍ପିଅନ୍ ବ୍ରାଜିଲ
ନନ୍ଦିଘୋଷ ବ୍ୟୁରୋ: ପିଫା ବିଶ୍ୱ କପ୍ ରେ ବଡ଼ ବିପର୍ଯ୍ୟୟ। ରାଉଣ୍ଡ ଅଫ ୧୬ରୁ ବିଦା ହେଲା ୫ ଥର ର ବିଶ୍ୱକପ୍ ବିଜେତା ବ୍ରାଜିଲ। ଏକ କଡ଼ା ସଂଘର୍ଷ ପୂର୍ଣ୍ଣ ମ୍ୟାଚ୍ ରେ ନରୱେ ବ୍ରାଜିଲକୁ ୨-୧ ଗୋଲ ରେ ପରାସ୍ତ କରିଛି। ନ୍ୟୁୟର୍କ ନ୍ୟୁ ଜର୍ସି ଷ୍ଟାଡିୟମରେ ଅନୁଷ୍ଠିତ ହୋଇଥିବା ମ୍ୟାଚ୍ ରେ ପ୍ରଥମାର୍ଦ୍ଧ ଗୋଲଶୂନ୍ୟ ରହିଥିଲା। ବ୍ରାଜିଲ ୧୩ତମ ମିନିଟରେ ପେନାଲ୍ଟି କିକ୍କୁ ଗୋଲରେ ପରିଣତ କରିପାରିନଥିଲା, ଦ୍ୱିତୀୟାର୍ଦ୍ଧ ନରୱେର ଷ୍ଟାର ଷ୍ଟ୍ରାଇକର ଏର୍ଲିଙ୍ଗ ହାଲାଣ୍ଡଙ୍କ ହାତରେ ଥିଲା, ଯିଏ ୭୮ତମ ମିନିଟରେ କ୍ଲିନିକାଲ୍ ଷ୍ଟ୍ରାଇକ୍ ସହିତ ପ୍ରଥମ ଗୋଲ କରିଥିଲେ। ତା’ପରେ ହାଲାଣ୍ଡ ୮୯ତମ ମିନିଟରେ ଦ୍ୱିତୀୟ ଗୋଲ ସ୍କୋର କରି ନରୱେର ଅଗ୍ରଣୀକୁ ଦ୍ୱିଗୁଣିତ କରି ମ୍ୟାଚ୍ କୁ ପ୍ରଭାବଶାଳୀ ଭାବରେ ସିଲ୍ କରିଥିଲେ। ନେମାର ଷ୍ଟପେଜ୍ ଟାଇମ୍ ରେ ପେନାଲ୍ଟିକୁ ଗୋଲରେ ପରିଣତ କରି ବ୍ରାଜିଲ ପାଇଁ ଗୋଟିଏ ଗୋଲ କରିବାରେ ସଫଳ ହୋଇଥିଲେ, କିନ୍ତୁ ବହୁତ ଡେରି ହୋଇଯାଇଥିଲା। ଏହି ବିଜୟ ସହ ନରୱେ କ୍ୱାର୍ଟର କୁ ପ୍ରବେଶ କରିଛି।
ସେପଟେ ୨୦୨୬ ଫିଫା ବିଶ୍ୱକପରୁ ବ୍ରାଜିଲର ହୃଦୟବିଦାରକ ବାଦ ପରେ ନେମାର ଜୁନିଅର ତୁରନ୍ତ ଅନ୍ତର୍ଜାତୀୟ ଫୁଟବଲ୍ ରୁ ଅବସର ଘୋଷଣା କରିଛନ୍ତି।ବ୍ରାଜିଲୀୟ ସୁପରଷ୍ଟାର ମ୍ୟାଚ୍ ର ଶେଷ ହ୍ୱିସିଲ୍ ବାଜିବା ପରେ ତୁରନ୍ତ ଭାବପ୍ରବଣ ହୋଇ ଏହି ଘୋଷଣା କରିଥିଲେ।ସେ ୧୨୯ ମ୍ୟାଚ୍ରେ ୮୦ ଗୋଲ୍ କରି ବ୍ରାଜିଲର ସର୍ବକାଳୀନ ଶ୍ରେଷ୍ଠ ପୁରୁଷ ଗୋଲ୍ ସ୍କୋରର୍ ଭାବରେ ଅବସର ଗ୍ରହଣ କରିଛନ୍ତି, ଫୁଟବଲ୍ ଲିଜେଣ୍ଡ ପେଲେଙ୍କ ଦୀର୍ଘକାଳୀନ ରେକର୍ଡକୁ ଅତିକ୍ରମ କରିଛନ୍ତି। ନେମାର ୨୦୧୩ ଫିଫା କନଫେଡେରେସନ କପ୍ ଜିତିଥିଲେ ଏବଂ ୨୦୧୬ ରିଓ ଗେମ୍ସରେ ବ୍ରାଜିଲକୁ ଅଲିମ୍ପିକ୍ ସ୍ୱର୍ଣ୍ଣ ପଦକ ଦେଇଥିଲେ।