ଭୁବନେଶ୍ବର: ଭୁବନେଶ୍ୱର ବିମାନବନ୍ଦର ନିର୍ଦ୍ଦେଶକଙ୍କ କାର୍ଯ୍ୟାଳୟରେ ଗୁରୁତ୍ଵପୂର୍ଣ୍ଣ ବୈଠକ। କମିଶନରେଟ ପୋଲିସ, ଗୁଇନ୍ଦା ବିଭାଗ, ଓଡ଼ିଶା ସରକାରଙ୍କ ଅନ୍ୟ ବିଭାଗର ଅଧିକାରୀ ବୈଠକରେ ସାମିଲ ଅଛନ୍ତି। ମେ ୧୦ ଯାଏଁ ବିମାନ ସେବା ବନ୍ଦ ନେଇ ଆଲୋଚନା ସମ୍ଭାବନା। ସେହିପରି ଆସନ୍ତା ୧୦ ଓ ୧୧ରେ ଦୁଇ ଦିନିଆ ଓଡିଶା ଗସ୍ତରେ ଗୃହ ମନ୍ତ୍ରୀ ଅମିତ ସାହ ଆସିବାର କାର୍ଯକ୍ରମ ରହିଛି। । ଯୁଦ୍ଧ ପରିସ୍ଥିତି ସମୟରେ ଗୃହମନ୍ତ୍ରୀଙ୍କ ଦୁଇଦିନିଆ ଓଡ଼ିଶା ଗସ୍ତ ପୂର୍ବରୁ ଗୁରୁତ୍ଵପୂର୍ଣ୍ଣ ASL ବୈଠକ ବସିଛି।
ଭାରତର ସୀମାନ୍ତବର୍ତ୍ତୀ ଗାଁ ଓ ଗୁରୁଦ୍ବାର ଉପରେ ପାକିସ୍ତାନର ଟାର୍ଗେଟ: ୧୫ ଜଣ ନିରୀହ ଲୋକଙ୍କ ପ୍ରାଣହାନୀ
ଅପରେସନ୍ ସିନ୍ଦୂରରେ ଧ୍ବଂସ ହେଲା ପାକିସ୍ତାନରେ ଥିବା ଆତଙ୍କୀଙ୍କ ଆଡ୍ଡା । ପ୍ରତି ଜବାବରେ ଭାରତର ସୀମାନ୍ତବର୍ତ୍ତୀ ଗାଁ ଓ ଗୁରୁଦ୍ବାରାକୁ ଟାର୍ଗେଟ କରିଛି ପାକିସ୍ତାନ । ଜାମୁ କାଶ୍ମୀରର ପୁଞ୍ଚ ଓ ରାଜୌରୀ ଜିଲ୍ଲାରେ ପାକ ସେନା ପ୍ରବଳ ଗୁଳିଗୋଳା ବର୍ଷଣ କରିଛନ୍ତି । ପାକ ସେନାଙ୍କ ଗୁଳିମାଡ଼ରେ ପୁଞ୍ଚର ଗୁରୁଦ୍ବାରା ଶ୍ରୀ ଗୁରୁସିଂ ସଭାର କିଛି ଅଂଶ କ୍ଷତି ହେବା ସହ ଗୋଟିଏ କବାଟ ନଷ୍ଟ ହୋଇଛି। ଏହା ସହିତ ୧୫ ଜଣ ନିରୀହ ଲୋକଙ୍କ ପ୍ରାଣହାନୀ ଘଟିଛି । ଆଉ କେତେ ଭାରତୀୟ ନାଗରିକ ମଧ୍ୟ ଆହତ ହୋଇଛନ୍ତି ।
ସାଙ୍ଗକୁ ଗୁଳି କଲା ସାଙ୍ଗ: ବିଳମ୍ବିତ ରାତିରେ ରାଜଧାନୀରେ ଫୁଟିଲା ଗୁଳି
ମେଣ୍ଢାଶାଳ: ଭୁବନେଶ୍ବର ଚନ୍ଦକା ଥାନା ଅଧୀନ ପାଣିଓଳା ଅଂଚଳରେ ବିଳମ୍ବିତ ରାତିରେ ଫୁଟିଲା ଗୁଳି । ଗୁଳିମାଡ଼ରେ ପାଣିଓଳା ଗ୍ରାମର ପୂର୍ଣ୍ଣଚନ୍ଦ୍ର ନାୟକ ଗୁରୁତର ହୋଇଛନ୍ତି। ଗୁରୁତର ଅବସ୍ଥାରେ ତାଙ୍କୁ ଏମ୍ସରେ ଭର୍ତ୍ତି କରାଯାଇଛି । ଗୁଳିମାଡ଼ ଘଟଣାରେ ଅଭିଯୁକ୍ତ ବିଶ୍ୱଜିତ ସାହୁକୁ ଥାନାରେ ଅଟକ ରଖାଯାଇଥିବାବେଳେ ତା ନିକଟରୁ ବନ୍ଧୁକ ଜବତ ହୋଇଛି ।ଉଭୟ ଗୋଟିଏ ଗାଁର ୨ସାଙ୍ଗ ବୋଲି ଜଣାପଡିଛି । ଉଭୟଙ୍କ ମଧ୍ୟରେ କୌଣସି କାରଣରୁ ବଚସା ଯୋଗୁଁ ସାଙ୍ଗକୁ ଗୁଳି କରିଛି ସାଙ୍ଗ । ଏନେଇ ସୂଚନା ଦେଇଛନ୍ତି ଚନ୍ଦକା ଥାନା ଅଧିକାରୀ।
ଭାରତ-ପାକିସ୍ତାନ ଉତ୍ତେଜନା: ୫ ରାଜ୍ୟର ୨୭ ବିମାନବନ୍ଦର ବନ୍ଦ
ନୂଆଦିଲ୍ଲୀ: ଦେଶର ୨୭ ବିମାନବନ୍ଦର ବନ୍ଦ। ଜାମ୍ମୁ କାଶ୍ମୀର, ହିମାଚଳପ୍ରଦେଶ, ରାଜସ୍ଥାନ, ଗୁଜରାଟ ଓ ପଞ୍ଜାବର ୨୭ ବିମାନବନ୍ଦର ବନ୍ଦ କରିଛନ୍ତି କେନ୍ଦ୍ର ସରକାର। ପାକିସ୍ତାନ ସହିତ ଉତ୍ତେଜନାକୁ ଦେଖି ଅନିର୍ଦ୍ଦିଷ୍ଟ କାଳ ପାଇଁ ଏହି ସବୁ ଏୟାରପୋର୍ଟକୁ ବନ୍ଦ କରାଯାଇଛି। ସେଗୁଡ଼ିକ ହେଲା ଲେହ, ଥୋଇସେ, ଶ୍ରୀନଗର, ଜାମ୍ମୁ, ଅମୃତସର, ପଠାନକୋଟ,ଚଣ୍ଡିଗଡ଼, ଯୋଧପୁର, ଜୈସଲମେର, ଜାମନଗର, ଭଟିଣ୍ଡା,ଭୁଜ, ଧର୍ମଶାଳା, ସିମଳା, ରାଜକୋଟ, ପୋରବନ୍ଦର ବିମାନବନ୍ଦର। ସାଧାରଣ ଲୋକଙ୍କ ଯାତାୟତ ପାଇଁ ଏହି ସବୁ ଏୟାରପୋର୍ଟ ବନ୍ଦ ରହିବ। ସେହିପରି ୪୩୦ ଫ୍ଲାଇଟ ବାତିଲ କରାଯାଇଛି ।
ନକ୍ସଲଙ୍କ IED ଆକ୍ରମଣ: ତିନି ଯବାନ ସହିଦ
ମୁଲୁଗୁ: ତେଲେଙ୍ଗାନାର ମୁଲୁଗୁ ଜିଲ୍ଲାରେ ନକ୍ସଲମାନେ ଆଇଡି ବ୍ଲାଷ୍ଟ କରିଛନ୍ତି । ଏହି ବିସ୍ଫୋରଣରେ ୩ ଜଣ ଯବାନ ସହିଦ ହୋଇଛନ୍ତି । ଯେଉଁ ଅଞ୍ଚଳରେ ଆଇଇଡି ବିସ୍ଫୋରଣ ହୋଇଥିଲା, ତାହା ଛତିଶଗଡ଼ର ସୁକୁମା ବର୍ଡରର ନିକଟରେ ରହିଛି । ନକ୍ସଲମାନେ ପୋଲିସକୁ ଟାର୍ଗେଟ କରି ବିସ୍ଫୋରଣ କରିଥିଲେ । ଯାହାଦ୍ବାରା କି ୩ ଯବାନ ସହିଦ ହୋଇଥିଲେ । ପୋଳିସ ରୁଟିମ କମ୍ବିଂ କରୁଥିବା ସମୟରେ ନକ୍ସଲମାନେ ବ୍ଲାଷ୍ଟ କରିଦେଇଥିଲେ ।
ସୂଚନାଯୋଗ୍ୟ ଯେ, ଏହା ପୂର୍ବରୁ ଛତିଶଗଡ଼-ତେଲେଙ୍ଗାନା ସୀମାର ବୀଜାପୁର ଜିଲ୍ଲାର ଜଙ୍ଗଲରେ ସୁରକ୍ଷାବଳଙ୍କ ସହ ନକ୍ସଲଙ୍କର ମୁହଁମୁହିଁ ହୋଇଥିଲା । ସେହି ସମୟରେ ୨୨ରୁ ଅଧିକ ନକ୍ସଲ ନିପାତ ହୋଇଥିଲେ । ନକ୍ସଲଙ୍କ ବିରୋଧରେ ଏହି ଅଭିଯାନ ଜାରି ରହିଛି । ଏହି ଅପରେସନରେ ଡିଆରଜି, ଏସଟିଏଫ, ସିଆରପିଏଫ ଆଦି ପାଖାପାଖି ୨୪ ହଜାର ସୁରକ୍ଷାକର୍ମୀ ସାମିଲ ରହିଛନ୍ତି ।
ରାଜ୍ୟ କ୍ୟାବିନେଟରେ ଆଠଟି ପ୍ରସ୍ତାବକୁ ମଂଜୁରୀ: ମୁଖ୍ୟମନ୍ତ୍ରୀ ସଡକ ଯୋଜନାକୁ କ୍ୟାବିନେଟ ମଂଜୁରୀ
ଭୁବନେଶ୍ବର: ରାଜ୍ୟ କ୍ୟାବିନେଟରେ ଆଠଟି ପ୍ରସ୍ତାବକୁ ମଂଜୁରୀ ମିଳିଛି । ମୁଖ୍ୟମନ୍ତ୍ରୀ ସଡକ ଯୋଜନାକୁ କ୍ୟାବିନେଟ ମଂଜୁରୀ ମିଳିଛି । ରାଜ୍ୟର ବିପର୍ଯ୍ୟୟ ପ୍ରଭାବିତ ଅଂଚଳରେ ବିପର୍ଯ୍ୟୟ ସମୟରେ ଏବଂ ପରେ ଜରୁରୀ ସେବା ଯେପରି ବାଧା ସୃଷ୍ଟି ନହୁଏ ତାହା ସୁନିଶ୍ଚିତ କରିବାକୁ ଏହି ଯୋଜନାକୁ ମଂଜୁରୀ ମିଳିଛି । ଏହା ବିପର୍ଯ୍ୟୟ ପ୍ରବଣ ଅଞ୍ଚଳରେ ଜୀବନରେଖା ଭାବେ କାମ କରିବ । ୨୦୨୫-୨୬ରୁ ୨୦୨୯-୩୦ ଏହି ଚାରି ବର୍ଷରେ ୫୦୦ କିଲୋମିଟର ରାସ୍ତା ନିର୍ମାଣ ପାଇଁ ହଜାରେ କୋଟି ଟଙ୍କାର ବ୍ୟୟବରାଦ କରାଯାଇଛି। ସେହିଭଳି ସବୁ ନିର୍ବାଚନମଣ୍ଡଳୀରେ ଥିବା ଗ୍ରାମାଞ୍ଚଳ ରାସ୍ତା ନିର୍ମାଣ କରିବା ଏବଂ ସଡକ ଉନ୍ନତିକରଣ ପାଇଁ ନିର୍ବାଚନମଣ୍ଡଳୀୱାରୀ ଅର୍ଥ ବ୍ୟବସ୍ଥା ଯୋଜନାକୁ କ୍ୟାବିନେଟ ମଂଜୁରୀ ମିଳିଛି। ଏହି ଯୋଜନାରେ ୨୦୨୪-୨୫ରୁ ୨୦୨୬-୨୭ ଏହି ତିନି ବର୍ଷରେ ୪୨୬ କୋଟି ଟଙ୍କା ଖର୍ଚ୍ଚ କରାଯିବ ।
ହିଭଳି ମୁଖ୍ୟମନ୍ତ୍ରୀ ଆମ ବସ ସେବାକୁ ମଧ୍ୟ କ୍ୟାବିନେଟ ମଂଜୁରୀ ମିଳିଛି । ଗ୍ରାମାଞ୍ଚଳର ଲୋକଙ୍କୁ ସୁରକ୍ଷିତ, ନିର୍ଭରଯୋଗ୍ୟ, ସୁଲଭ ପରିବହନ ସେବା ଯୋଗାଇଦେବାକୁ ଲକ୍ଷ୍ୟ ରଖାଯାଇଛି। ଏହାର ତଦାରଖ ଓ ନିୟନ୍ତ୍ରଣ ଦାୟିତ୍ବ ଓଏସଆରଟିସିକୁ ଦିଆଯିବ ।ସବୁ ବସରେ ସିସିଟିଭି, ଲାଇଭ ଭ୍ୟାନ ଟ୍ରାକିଂ, ଯାତ୍ରୀ ସୂଚନା ବ୍ୟବସ୍ଥା ସହ ପାନିକ ବଟନ ବି ରହିବ । ମହିଳା, ଛାତ୍ରଛାତ୍ରୀ, ଭିନ୍ନକ୍ଷମ ଓ ବରିଷ୍ଠଙ୍କ ପାଇଁ ବସ ଭଡାରେ ୫୦ ପ୍ରତିଶତ ରିହାତି ପ୍ରଦାନ କରାଯିବ। ଏହି ଯୋଜନାକୁ ୨୦୩୨-୩୩ ଆର୍ଥିକ ବର୍ଷ ପର୍ଯ୍ୟନ୍ତ ଜାରି ରଖିବାକୁ କ୍ୟାବିନେଟରେ ମଂଜୁରୀ ମିଳିଛି । ଏଥିସହିତ ସରକାରୀ ଡାକ୍ତରଖାନାରେ ମାଗଣା ଡାଇଗ୍ନୋଷ୍ଟିକ ଓ ଡାଏଲିସିସ ସେବା ଯୋଗାଇଦେବାକୁ ପୂର୍ବରୁ କାର୍ଯ୍ୟକାରୀ ହେଉଥିବା ନିଦାନ ଯୋଜନାର ଦ୍ବିତୀୟ ପର୍ଯ୍ୟାୟକୁ କ୍ୟାବିନେଟ ମଂଜୁରୀ ମିଳିଛି । ଏଥିପାଇଁ ଆଗାମୀ ୫ ବର୍ଷ ପାଇଁ ୨୪୫୯ କୋଟି ୫୧ ଲକ୍ଷ ଟଙ୍କାକୁ କ୍ୟାବିନେଟ ଅନୁମୋଦନ ଦେଇଛି । ସେହିଭଳି ପୂର୍ବରୁ କାର୍ଯ୍ୟକାରୀ ହେଉଥିବା ନିର୍ମଳ ଦ୍ବିତୀୟ ପର୍ଯ୍ୟାୟ ଯୋଜନାକୁ ମଧ୍ୟ ମଂଜୁରୀ ମିଳିଛି । ଏହାଦ୍ବାରା ସରକାରୀ ଡାକ୍ତରଖାନାରେ ସ୍ବଚ୍ଛତା, ସୁରକ୍ଷା, ଆଟେଣ୍ଡାଣ୍ଟ ଭଳି ଆନୁସଙ୍ଗୀକ ସେବାକୁ ସୁନିଶ୍ଚିତ କରାଯାଇପାରିବ । ଏହି ଯୋଜନାରେ ଆଗାମୀ ୫ ବର୍ଷ ପାଇଁ ୫୧୭୪ କୋଟି ୭୯ ଲକ୍ଷ ଟଙ୍କାର ବ୍ୟୟ ଅଟକଳକୁ ମଂଜୁରୀ ମିଳିଛି।
ଅପରେସନ ସିନ୍ଦୂରକୁ ନେଇ ସର୍ବଦଳୀୟ ବୈଠକ: ଦିନ ୧୧ଟାରେ ବସିବ ଏହି ବୈଠକ
ନୂଆଦିଲ୍ଲୀ: ପହଲଗାଓଁ ଆକ୍ରମଣକୁ ନେଇ ଅପରେସନ ସିନ୍ଦୂର ପରେ ସର୍ବଦଳୀୟ ବୈଠକ ଡାକିଛନ୍ତି କେନ୍ଦ୍ର ସରକାର। ଆଦି ଦିନ ୧୧ଟାରେ ବସୁଛି ସର୍ବଦଳୀୟ ବୈଠକ। ଅପରେସନ ସିନ୍ଦୂରକୁ ନେଇ ଭାରତୀୟ ସେନା ବାହିନୀଙ୍କ ପ୍ରଶଂସା କରିଛି କେନ୍ଦ୍ର କ୍ୟାବିନେଟ। ସେନାବାହିନୀ ଦ୍ୱାରା କରାଯାଇଥିବା ଅପରେସନକୁ ପ୍ରଶଂସା କରିଛନ୍ତି ପ୍ରଧାନମନ୍ତ୍ରୀ। ଅପରେସନ୍ ସିନ୍ଦୂରର କିଛି ଘଣ୍ଟା ପରେ ପ୍ରଧାନମନ୍ତ୍ରୀ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଭେଟି ସାମରିକ ଆକ୍ରମଣ ବିଷୟରେ ସୂଚନା ଦେବା ପାଇଁ ଏକ କ୍ୟାବିନେଟ୍ ବୈଠକ ଡାକିଥିଲେ। ସଂସଦରେ ଅପରେସନ୍ ସିନ୍ଦୂର ବିଷୟରେ ସମସ୍ତ ରାଜନୈତିକ ଦଳକୁ ସୂଚନା ଦେବା ପାଇଁ ଏହି ସର୍ବଦଳୀୟ ବୈଠକ ଡକାଯାଇଛି।
ପହଲଗାଓଁ ଆତଙ୍କବାଦୀ ଆକ୍ରମଣ ପରେ ଏପ୍ରିଲ ୨୪ ତାରିଖରେ ଡକାଯାଇଥିବା ଶେଷ ସର୍ବଦଳୀୟ ବୈଠକରେ ପ୍ରଧାନମନ୍ତ୍ରୀ ଯୋଗ ଦେବେ ବୋଲି ବିରୋଧୀ ଆଶା କରିଥିଲେ। କିନ୍ତୁ କୌଣସି କାରଣରୁ ସେ ଯୋଗ ଦେଇପାରିନଥିଲେ। ଶକ୍ତିଶାଳୀ ଏବଂ ନିର୍ଣ୍ଣାୟକ ଅପରେସନ୍ ସିନ୍ଦୂର ପରେ ଏହା ପ୍ରଥମ ସର୍ବଦଳୀୟ ବୈଠକ। ରାଜ୍ୟସଭା ଏବଂ ଲୋକସଭାରେ ବିରୋଧୀ ଦଳ ନେତା ମଲ୍ଲିକାର୍ଜୁନ ଖଡଗେ ଏବଂ ରାହୁଲ ଗାନ୍ଧି ଉଭୟ ଏହି ବୈଠକରେ ଯୋଗଦେବେ। ଏଥିରେ କୂଟନୈତିକ ଏବଂ ସୁରକ୍ଷା ରଣନୀତି ଉପରେ ଆଲୋଚନା କରାଯିବା ସମ୍ଭାବନା ରହିଛି।
ଉତ୍ତରକାଶୀରେ ହେଲିକପ୍ଟର କ୍ରାସ: ୫ ଜଣଙ୍କ ମୃତ୍ୟୁ, ୨ ଆହତ
ଉତ୍ତରକାଶୀ: ଉତ୍ତରକାଶୀରେ ଏକ ବଡ଼ ଅଘଟଣ ଘଟିଯାଇଛି । ହେଲିକପ୍ଟର କ୍ରାସରେ ୫ ଜଣଙ୍କ ମୃତ୍ୟୁ ଘଟିଛି । ଏଥିସହିତ ଦୁଇଜଣ ଆହତ ହୋଇଛନ୍ତି । ହେଲିକପ୍ଟରଟି ଗଙ୍ଗୋତ୍ରୀ ଅଭିମୂଖେ ଯାତ୍ରା କରୁଥିଲା । ହେଲିକପ୍ଟରଟି କୌଣସି ଏକ ଘରୋଇ କମ୍ପାନୀର ବୋଲି କୁହାଯାଉଛି । ସକାଳ ୯ଟା ସମୟରେ ଏହି ଦୁର୍ଘଟଣା ଘଟିଥିଲା । ଖବ ପାଇ ଘଟଣାସ୍ଥଳରେ ପ୍ରଶାସନ ଓ ଉଦ୍ଧାରକାରୀ ଟିମ୍ ପହଞ୍ଚିଥିଲେ । ଗଢଓ୍ବାଲ ଡିଭିଜନାଲ କମିଶନର ଏ ବାବଦରେ ସୂଚନା ଦେଇଛନ୍ତି ।
ପାକିସ୍ତାନରେ ଭାରତର ମିସାଇଲ ଷ୍ଟ୍ରାଇକ୍ ପରେ ବଦଳିଲା ଚୀନର ସ୍ବର
ନୂଆଦିଲ୍ଲୀ: ଅପରେସନ ସିନ୍ଦୁର ପରେ ଚୀନର ସ୍ବର ବଦଳିଛି । ଭାରତ ଓ ପାକିସ୍ତାନକୁ ଶାନ୍ତି ଏବଂ ସ୍ଥିରତା ବଜାୟ ରଖିବା ପାଇଁ ଚାପକୁ କମ୍ କରିବା ଉପରେ ଗୁରୁତ୍ବ ଦେବାକୁ ପଡ଼ିବ । ଅନ୍ତରାଷ୍ଟ୍ରୀୟ ସମୁଦାୟ ସହ କାମ କରି ଚାପକୁ କମ୍ କରାଯାଇପାରେ ବୋଲି ଚୀନ କହିଛି । ପାକିସ୍ତାନର ଆତଙ୍କୀ ଆଡ୍ଡା ଉପରେ ଭାରତର ଏୟାର ଷ୍ଟ୍ରାଇକ ପରେ ପଡ଼ୋଶୀ ଅଞ୍ଚଳରେ ଭୟର ବାତାବରଣ ଦେଖିବାକୁ ମିଳିଛି । ପହଲଗାମ ଆକ୍ରମଣ ପରେ ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନା ବଢ଼ୁଥିବା ବେଳେ ଚୀନ କ୍ରମାଗତ ଭାବେ ପାକିସ୍ତାନକୁ ସମର୍ଥନ ଦେଇ ଆସୁଥିଲା । ମାତ୍ର ଭାରତର ଅପରେସନ ସିନ୍ଦୂର ପରେ ଚୀର ସ୍ବର ଏବେ ବଦଳି ଯାଇଛି ।
ଚୀନର ବିଦେଶ ମନ୍ତ୍ରଣାଳୟ ପକ୍ଷରୁ କୁହାଯାଇଛି, ବର୍ତ୍ତମାନର ସ୍ଥିତିକୁ ନେଇ ଆମେ ଚିନ୍ତିତ । ଭାରତ ଓ ପାକିସ୍ତାନ ସର୍ବଦା ପରସ୍ପରର ପଡ଼ୋଶୀ ହୋଇ ରହିବେ । ଏହି ଦୁଇ ଦେଶ ଚୀନର ମଧ୍ୟ ପଡ଼ୋଶୀ ଅଟନ୍ତି । ଚୀନ ଆତଙ୍କବାଦକୁ ସବୁକ୍ଷେତ୍ରରେ ବିରୋଧ କରେ । ଉଭୟ ପକ୍ଷଙ୍କ କ୍ଷେତ୍ରରେ ସ୍ଥିରତା ପାଇଁ ଶାନ୍ତି ବଜାୟ ରଖିବା ଓ କୌଣସି ପ୍ରକାରର ଉତ୍ତେଜନା ପରିସ୍ଥିତି ଠାରୁ ଦୂରେଇ ରହିବା ଆବଶ୍ୟକ । ସୂଚନାଯୋଗ୍ୟ ଯେ, ଭାରତୀୟ ସେନା ମଙ୍ଗଳବାର ବିଳମ୍ବିତ ରାତିରେ ଅପରେସନ ସିନ୍ଦୂର ଜରିଆରେ ପାକିସ୍ତାନ ଓ ପିଓକେର ଆତଙ୍କୀ ଆଡ୍ଡାରେ ଏୟାରଷ୍ଟ୍ରାଇକ୍ କରିଥିଲା ।
ଟେଷ୍ଟ କ୍ରିକେଟରୁ ସନ୍ନ୍ୟାସ ଘୋଷଣା କଲେ ରୋହିତ ଶର୍ମା
କ୍ରୀଡ଼ା ଜଗତରୁ ଆସିଛି ଏକ ବଡ଼ ଖବର । ଭାରତୀୟ ଟିମର ଷ୍ଟାର ବ୍ୟାଟ୍ସମ୍ୟାନ ତଥା ହିଟମ୍ୟାନ ରୋହିତ ଶର୍ମା ଟେଷ୍ଟ କ୍ରିକେଟକୁ ବାଏ ବାଏ କରିଛନ୍ତି । ଏହା ପୂର୍ବରୁ ସେ ଟି-୨୦ ଅନ୍ତର୍ଜାତୀୟ କ୍ରିକେଟ ଫର୍ମାଟରୁ ମଧ୍ୟ ସନ୍ନ୍ୟାସ ନେଇ ସାରିଥିଲେ । ଆଗକୁ ସେ ଦିନିକିଆରେ ଖେଳ ଜାରି ରଖିବେ । ଏନେଇ ରୋହିତ ସୋସିଆଲ ମିଡ଼ିଆରେ ସୂଚନା ଦେଇଛନ୍ତି । ରୋହିତ ଲେଖିଛନ୍ତି, ’ମୁଁ ଏହା କହିବାକୁ ଚାହୁଁଛି ଯେ, ମୁଁ ଟେଷ୍ଟ କ୍ରିକେଟରୁ ଅବସର ନେଉଛି । ଭଲ ପାଇବା ଓ ସହଯୋଗ ପାଇଁ ମୁଁ ସମସ୍ତଙ୍କୁ ଧନ୍ୟବାଦ ଜଣାଉଛି । ମୁଁ ଦିନିକିଆରେ ଭାରତ ପାଇଁ ଖେଳିବା ଜାରି ରଖିବି ।’
୧୧ ବର୍ଷର ନିଜ ଟେଷ୍ଟ କ୍ୟାରିୟରରେ ରୋହିତ ୬୭ଟି ମ୍ୟାଚ ଖେଳିଥିଲେ । ସେଥିମଧ୍ୟରୁ ସେ ୨୪ଟି ମ୍ୟାଚରେ ଅଧିନାୟକତ୍ବ କରିଥିଲେ । ସେ ଟେଷ୍ଟରେ ୪୩୦୧ ରନ ସଂଗ୍ରହ କରିବା ସହ ସେଥିରେ ୧୨ଟି ଶତକ ସାମିଲ ଅଛି । ଇଂଲଣ୍ଡ ବିପକ୍ଷ ଟେଷ୍ଟ ସିରିଜ ପୂର୍ବରୁ ରୋହିତ ଏହି ନିଷ୍ପତ୍ତି ନେଇଛନ୍ତି । ତେଣୁ ଖୁବଶୀଘ୍ର ଟିମ୍ ପାଇଁ ଜଣେ ନୂଆ ଅଧିନାୟକଙ୍କ ନାମ ଘୋଷଣା କରାଯିବ । ନିକଟରେ ଅଷ୍ଟ୍ରେଲିଆ ବିପକ୍ଷ ଟେଷ୍ଟରେ ରୋହିତ ଦୁର୍ବଳ ପ୍ରଦର୍ଶନ କରିଥିଲେ ।