ନନ୍ଦିଘୋଷ ବ୍ୟୁରୋ: ଆସନ୍ତାକାଲି ପ୍ରକାଶ ପାଇବ ଯୁକ୍ତ ଦୁଇ ପରୀକ୍ଷା ଫଳ । ଏକାସାଙ୍ଗେ ଯୁକ୍ତ ଦୁଇ ବିଜ୍ଞାନ, କଳା ଓ ବାଣିଜ୍ୟ ଫଳ ପ୍ରକାଶ ପାଇବ । ଫେବୃଆରୀ ୧୮ରେ ଆରମ୍ଭ ହୋଇଥିଲା ଯୁକ୍ତ ଦୁଇ ପରୀକ୍ଷା । ୧୨୭୬ ପରୀକ୍ଷା କେନ୍ଦ୍ରରେ ପରୀକ୍ଷା ଦେଇଥିଲେ ୧.୧୪ ବିଜ୍ଞାନ ଛାତ୍ରଛାତ୍ରୀ । chseodisha.nic.in ରେ ରେଜଲ୍ଡ ପ୍ରକାଶ ପାଇବ । odisharesults.nic.in ରେ ରେଜଲ୍ଡ ପ୍ରକାଶିତ ହେବ ।
ପାକିସ୍ତାନୀ ଏଜେଣ୍ଟ ଜ୍ୟୋତିଙ୍କ ପୁରୀ ଗସ୍ତ, ଜଗନ୍ନାଥ ବଲ୍ଲଭ ଭକ୍ତ ନିବାସରୁ ଗୁରୁତ୍ବପୂର୍ଣ୍ଣ ତଥ୍ୟ ହାତେଇଲା ପୋଲିସ
ନନ୍ଦିଘୋଷ ବ୍ୟୁରୋ: ଧୀରେ ଧୀରେ ଫିଟୁଛି ସ୍ପାଏ ସୁନ୍ଦରୀ ଜ୍ୟୋତି ମଲହୋତ୍ରାଙ୍କ ଗୁମର । ପୁରୀ ଆସି ଜଗନ୍ନାଥ ବଲ୍ଲଭ ଭକ୍ତ ନିବାସରେ ରହିଥିଲେ । ପୋଲିସ ଏବେ କରୁଛି ତନାଘନା । ଭକ୍ତ ନିବାସରୁ କେତେକ ଗୁରୁତ୍ଵପୂର୍ଣ୍ଣ ତଥ୍ୟ ପାଇଛି ପୋଲିସ । ସେହି ଖିଅରୁ ଅଧିକ ତଥ୍ୟ ସଂଗ୍ରହ କରାଯାଉଛି । ସେପଟୋ ଜ୍ୟୋତି ମଲହୋତ୍ରା ଲିଙ୍କରେ ପୁରୀର ୟୁଟ୍ୟୁବର ପ୍ରିୟଙ୍କା ସେନାପତିଙ୍କୁ ମଧ୍ୟ ଘନ ଘନ ଜେରା କରୁଛି ପୋଲିସ । ପାକିସ୍ତାନ ପାଇଁ ଗୁପ୍ତଚର ଭାବେ କାମ କରୁଥିବା ୯ ଜଣଙ୍କୁ ସାରା ଦେଶରୁ ଗିରଫ କରାଗଲାଣି ।
ପୁରୀର ଜଗନ୍ନାଥ ବଲ୍ଲଭ ଭକ୍ତ ନିବାସ । ରୁମ୍ ନମ୍ଵର ୨୦୩ । ଏହି ରୁମରେ ରହିଥିଲେ ସ୍ପାଏ ସୁନ୍ଦରୀ ଜ୍ୟୋତି ମଲହୋତ୍ରା । ପାକିସ୍ତାନ ପାଇଁ ଗୁପ୍ତଚର କାମ କରି ଗିରଫ ହେବା ପରେ ସେ ଚର୍ଚ୍ଚାକୁ ଆସିଛନ୍ତି । ଜଗନ୍ନାଥ ବଲ୍ଲଭ ଭକ୍ତ ନିବାସକୁ ଆସି ତନାଘନା କରିଛି ପୋଲିସ । ମ୍ୟାନେଜରଙ୍କୁ କରିଛି ପଚରା ଉଚରା । କେବେ ଆସିଥିଲେ ଜ୍ୟୋତି, କେତେ ଦିନ ରହିଥିଲେ, କେବେ ଚେକ୍ ଆଉଟ୍ କରିଥିଲେ, ତାଙ୍କ ସହିତ ଆଉ କିଏ ଥିଲେ କି, ଏଠାରୁ ଗାଡ଼ି ନେଇ କୁଆଡ଼େ ଯାଇଥିଲେ କି ? ଏସବୁ ତଥ୍ୟ ସଂଗ୍ରହ କରିଛି ପୋଲିସ ।
ମ୍ୟାନେଜର କହିଛନ୍ତି, ଗତବର୍ଷ ସେପଟେମ୍ଵର ୨୧ ତାରିଖରେ ଜଗନ୍ନାଥ ବଲ୍ଲଭ ଭକ୍ତ ନିବାସରେ ଚେକ୍ ଇନ୍ କରିଥିଲେ ଜ୍ୟୋତି । ତା’ ପରଦିନ ୨୨ ତାରିଖ ସନ୍ଧ୍ୟାରେ ଚେକ୍ ଆଉଟ କରିଥିଲେ । ଅନଲାଇନରେ ବୁକିଂ, ଅନଲାଇନରେ ପେମେଣ୍ଟ । ମ୍ୟାନେଜର କହିଛନ୍ତି, ଜ୍ୟୋତିଙ୍କ ହାବଭାବରେ କୌଣସି ପ୍ରକାର ସନ୍ଦେହଜନକ କଥା ନଥିଲା । ଗିରଫ ହେବା ପରେ ହିଁ ତାଙ୍କ ବିଷୟରେ ଆମେ ଜାଣୁଛୁ । ପୋଲିସ ଆସି କିଛି ଡକ୍ୟୁମେଣ୍ଟ ନେଇଛି ଓ ତଦନ୍ତରେ ଆମେ ସହଯୋଗ କରୁଛୁ ବୋଲି କହିଛନ୍ତି ଜଗନ୍ନାଥ ବଲ୍ଲଭ ଭକ୍ତ ନିବାସର ମ୍ୟାନେଜର ।
ଜ୍ୟୋତି ମଲହୋତ୍ରାଙ୍କ ସହିତ ଲିଙ୍କ୍ ଯୋଗୁଁ ତଦନ୍ତ ଘେରକୁ ଆସିଛନ୍ତି ପୁରୀର ପ୍ରିୟଙ୍କା ସେନାପତି । କେବଳ ୟୁଟ୍ୟୁବର-ୟୁଟ୍ୟୁବର ସଂପର୍କ ବୋଲି ପ୍ରିୟଙ୍କା କହୁଥିଲେ ମଧ୍ୟ ସବୁ ଦିଗକୁ ନେଇ ଚାଲିଛି ଛାନବିନ୍ । ତଦନ୍ତରେ ପ୍ରିୟଙ୍କା ଓ ତାଙ୍କ ପରିବାର ସହଯୋଗ କରୁଛନ୍ତି । ଏନଆଇଏ, ରାଜ୍ୟ ଗୁଇନ୍ଦା ବିଭାଗ ଓ ହରିୟାଣାର ହିସାର ପୋଲିସକୁ ସହଯୋଗ କରୁଛି ପୁରୀ ଜିଲ୍ଲା ପୋଲିସ । ପ୍ରିୟଙ୍କାଙ୍କ ସୋସିଆଲ ମିଡିଆ ଆକାଉଣ୍ଟ, ସେ କ’ଣ କ’ଣ ପୋଷ୍ଟ କରିଥିଲେ ? କ’ଣ କ’ଣ ଡିଲିଟ୍ କରିଛନ୍ତି, କଲ୍ ଡିଟେଲ ରେକର୍ଡ, ବ୍ୟାଙ୍କ୍ ଆକାଉଣ୍ଟ ସବୁ ତନ୍ନ ତନ୍ନ କରି ଯାଞ୍ଚ କରାଯାଉଛି । ପ୍ରିୟଙ୍କା ଏବେ ପୁରୀରେ ଅଛନ୍ତି । ଜ୍ୟୋତିଙ୍କ ସହିତ ପୁରୀର କେଉଁ କେଉଁ ସ୍ଥାନକୁ ସେମାନେ ବୁଲିବାକୁ ଯାଇଥିଲେ, ଜ୍ୟୋତି କିଛି ତଥ୍ୟ ସଂଗ୍ରହ କରିଥିଲେ କି, ତାଙ୍କର ହାବଭାବ ସନ୍ଦେହ କରିବା ଭଳି ଥିଲା କି, ଏସବୁ ପ୍ରଶ୍ନର ଉତ୍ତର ଖୋଜୁଛି ପୁରୀ ପୋଲିସ ।
ପହଲଗାଓଁ ଆକ୍ରମଣ, ଜବାବରେ ଭାରତର ଅପରେସନ ସିନ୍ଦୂର ପରେ ସାରା ଦେଶରେ ଧରପଗଡ଼ । ପାକିସ୍ତାନ ପାଇଁ କାମ କରୁଥିବା ଅନେକ ଗୁପ୍ତଚର ଧରା ପଡ଼ିଛନ୍ତି । ହରିୟାଣା ହିସାରରୁ ଧରାପଡ଼ିଥିବା ଜ୍ୟୋତି ମଲହୋତ୍ରା ପୁରୀ ଆସିଥିବା ଜଣାପଡ଼ିବା ପରେ ରାଜ୍ୟରେ ସୃଷ୍ଟି ହୋଇଛି ହଇଚଇ । ତାଙ୍କର ପ୍ରକୃତ ଉଦ୍ଦେଶ୍ୟ କ’ଣ ଥିଲା ? ସେ କେବଳ ବୁଲିବାକୁ ଆସିଥିଲେ ନା ଅନ୍ୟ କିଛି ଭିତିରି ଉଦ୍ଦେଶ୍ୟ ଥିଲା । କୌଣସି ମିଶନରେ ନ ଥିଲେ ତ ? ପୁରୀରୁ କିଛି ଗୁରୁତ୍ଵପୂର୍ଣ୍ଣ ସୂଚନା ନେଇ ନାହାନ୍ତି ତ ସ୍ପାଏ ସୁନ୍ଦରୀ ? ଏମିତି ଅନେକ ପ୍ରଶ୍ନର ଚାଲିଛି ଉତ୍ତର ଖୋଜା ।
ଜୁଲାଇ ପହିଲାରୁ ମାଟ୍ରିକ ସପ୍ଲିମେଣ୍ଟାରୀ ପରୀକ୍ଷା
ନନ୍ଦିଘୋଷ ବ୍ୟୁରୋ: ପ୍ରକାଶ ପାଇଲା ମାଟ୍ରିକ ସପ୍ଲିମେଣ୍ଟାରୀ ପରୀକ୍ଷା କାର୍ଯ୍ୟସୂଚୀ । ଜୁଲାଇ ପହିଲାରୁ ଆରମ୍ଭ ହେବ ପରୀକ୍ଷା । ରେଗୁଲାର ଓ ଏକ୍ସ-ରେଗୁଲାର ପିଲାଙ୍କ ହେବ ପରୀକ୍ଷା । ଆସନ୍ତା ୧ ଜୁଲାଇରୁ ୧୦ ତାରିଖ ପର୍ଯ୍ୟନ୍ତ ଚାଲିବ ପରୀକ୍ଷା । ଗୋଟିଏ ସିଟିଂରେ ପରୀକ୍ଷା ହେବ । ସକାଳ ୯ଟାରୁ ଦିନ ୧୧.୩୦ ପର୍ଯ୍ୟନ୍ତ ପରୀକ୍ଷା ହେବ । କେବଳ ଗଣିତ ପରୀକ୍ଷା ୧୧.୪୫ରେ ଶେଷ ହେବ ।
୧ ଜୁଲାଇରେ ପ୍ରଥମ ଭାଷା ପରୀକ୍ଷା
୨ ଜୁଲାଇରେ ସାମାଜିକ ବିଜ୍ଞାନ
୪ ଜୁଲାଇରେ ଗଣିତ
୭ ଜୁଲାଇରେ ଦ୍ଵିତୀୟ ଭାଷା ପରୀକ୍ଷା
୯ ଜୁଲାଇରେ ବିଜ୍ଞାନ ପରୀକ୍ଷା
୧୦ ଜୁଲାଇରେ ତୃତୀୟ ଭାଷା ପରୀକ୍ଷା
ସେହିପରି ଓପନ ସ୍କୁଲ ସାର୍ଟିଫିକେଟ ପରୀକ୍ଷା ଲାଗି ମଧ୍ୟ କାର୍ଯ୍ୟସୂଚୀ ଘୋଷଣା ହୋଇଛି । ଆସନ୍ତା ୩୦ ଜୁନରୁ ପରୀକ୍ଷା ଆରମ୍ଭ ହୋଇ ଜୁଲାଇ ୧୦ ତାରିଖରେ ଶେଷ ହେବ ପରୀକ୍ଷା । ଓଡ଼ିଶା ମାଧ୍ୟମିକ ଶିକ୍ଷା ପରିଷଦ ପକ୍ଷରୁ କାର୍ଯ୍ୟସୂଚୀ ପ୍ରକାଶ ପାଇଛି ।
କେନ୍ଦ୍ର ଓ ରାଜ୍ୟ ବିଜେପି ସରକାର ବିରୋଧରେ ଗର୍ଜିଲେ ଶ୍ରମିକ ସଙ୍ଗଠନ
ନନ୍ଦିଘୋଷ ବ୍ୟୁରୋ: ସହି ହେଲାନି କଷଣ । କେନ୍ଦ୍ର ଓ ରାଜ୍ୟ ବିଜେପି ସରକାରର ଶ୍ରମିକ ବିରୋଧୀ କାର୍ଯ୍ୟ ବିରୋଧରେ ରାସ୍ତାରେ ଗର୍ଜିଲେ ଶ୍ରମିକ ସଂଗଠନ । ସାରା ଦେଶରେ ଏହି ପ୍ରତିବାଦ ଓ ବିକ୍ଷୋଭ ପ୍ରଦର୍ଶନ ଦେଖିବାକୁ ମିଳିଥିବା ବେଳେ ରାଜ୍ୟର ବିଭିନ୍ନ ସ୍ଥାନରେ ବିକ୍ଷୋଭ ହୋଇଛି । ଭୁବନେଶ୍ୱର ଲୋୟର ପିଏମଜିରେ ଶ୍ରମିକ ସଂଗଠନର ଶତାଧିକ କାର୍ଯ୍ୟକର୍ତ୍ତା ଚାରୋଟି ଶ୍ରମ କୋଡ୍ ପ୍ରତ୍ୟାହାର, ସମାନ କାମକୁ ସମାନ ମଜୁରୀ ଆଦି ନେଇ ବିକ୍ଷୋଭ କରିଛନ୍ତି । ତୁରନ୍ତ ସରକାର ଦାବି ନ ମାନିଲେ ଆସନ୍ତା ଜୁଲାଇ ୯ ତାରିଖରେ ଚକ ଅଖ ବନ୍ଦ କରିବାକୁ ନିଷ୍ପତ୍ତି ନିଆଯାଇଛି ।
ରାଜରାସ୍ତାରେ ଶ୍ରମିକ ସଂଗଠନଙ୍କ ରଣହୁଙ୍କାର । ଭୁବନେଶ୍ଵର ପିଏମଜିରେ ପ୍ରମୁଖ ଶ୍ରମିକ ସଂଗଠନ ଏକାଠି । ଦାବି ପୂରଣ ନହେଲେ ଜୁଲାଇ ୯ରେ ଦେଶବ୍ୟାପୀ ହରତାଳ । ଶ୍ରମିକଙ୍କ ସ୍ୱାର୍ଥ ବିରୋଧୀ କାର୍ଯ୍ୟ ପାଇଁ ସରକାରଙ୍କ ବିରୋଧରେ ଶ୍ରମିକ ସଂଗଠନର ମିଳିତ ଆନ୍ଦୋଳନ । ଶ୍ରମିକ ବିରୋଧୀ ଚାରୋଟି ଶ୍ରମ କୋଡ୍ ପ୍ରତ୍ୟାହାର, ଦେଶରେ ଶ୍ରମିକଙ୍କୁ ସମାନ କାମକୁ ସମାନ ମଜୁରୀ, ଶ୍ରମିକଙ୍କୁ ଛଟେଇ ଓ ଅତ୍ୟାଚାର ବନ୍ଦ କରିବା ଦାବିରେ ପ୍ରମୁଖ ଶ୍ରମିକ ସଂଗଠନ ଦେଶବ୍ୟାପୀ ପ୍ରତିବାଦ ଦିବସ ପାଳନ କରିଛନ୍ତି ।
ସେହିପରି ଭୁବନେଶ୍ଵରରେ ରାଜ୍ୟସ୍ତରୀୟ ବିକ୍ଷୋଭ ପ୍ରଦର୍ଶନରେ ଆଇଏନଟିୟୁସି ଏଆଇଟିୟୁସି, ଏଚଏମଏସ, ସିଟୁ, ଟିୟୁସିସି, ଏଲପିଏଫ ସମେତ ବହୁ ଟ୍ରେଡ୍ ୟୁନିୟନର ଶତାଧିକ କାର୍ଯ୍ୟକର୍ତ୍ତା ଓ ଶ୍ରମିକ ସାମିଲ ହୋଇଥିଲେ । ଶୋଭାଯାତ୍ରାରେ ଆସି ପିଏମଜିରେ ବିକ୍ଷୋଭ ସମାବେଶ ହୋଇଥିଲା । ରାଜ୍ୟରେ ବିଜେପି ସରକାର ଆସିବା ପରେ ଶ୍ରମିକ ମାରଣ ନୀତି ଆପଣାଇଛନ୍ତି । ଡବଲ ଇଞ୍ଜିନ ସରକାର ତୁରନ୍ତ ଶ୍ରମିକଙ୍କ ଦାବି ପୂରଣ ନକଲେ ଆସନ୍ତା ଜୁଲାଇରେ ଦେଶବ୍ୟାପୀ ହରତାଳ ଡାକରା ଦେଇଛନ୍ତି ଟ୍ରେଡ୍ ୟୁନିୟନ ।
ଓଡ଼ିଶାରେ ବିଜେପି ସରକାର ଆସିବା ପରେ ଡବଲ ଇଞ୍ଜିନ କଥା କହୁଥିଲେ ମଧ୍ୟ ଶ୍ରମିକଙ୍କ ଉପରେ ଜୁଲମ ବଢ଼ିବାରେ ଲାଗିଛି । ରାଷ୍ଟ୍ରୀୟ ସମ୍ପତ୍ତିର ଘରୋଇକରଣ ବନ୍ଦ କରିବାକୁ ଜୋରଦାର ଦାବି ହୋଇଛି । ଏଥିସହିତ ନରେଗାରେ ୨୦୦ ଦିନର କାର୍ଯ୍ୟ ପାଇଁ ମଧ୍ୟ ଶ୍ରମିକ ସଂଗଠନଗୁଡ଼ିକ ଦୃଢ଼ ଦାବି ରଖିଛନ୍ତି । ଶ୍ରମ କୋଡ୍ ଲାଗୁ କଲେ ଶ୍ରମିକମାନେ ନିଜର ନାର୍ଯ୍ୟ ଅଧିକାର ପାଇବା ପାଇଁ ଆନ୍ଦୋଳନର ସୁଯୋଗ ହରାଇବେ । ତେଣୁ ଏହି ଶ୍ରମ କୋଡ୍ ଲାଗୁ ପାଇଁ ଉଦ୍ୟମ କଲେ ପରିସ୍ଥିତି ଭୟଙ୍କର ହେବ ବୋଲି ଚେତାଇ ଦିଆଯାଇଛି ।
ଓବିସିଙ୍କୁ ୨୭ ପ୍ରତିଶତ ସଂରକ୍ଷଣ ଦାବିରେ କାଲି ରାଜଭବନ ଆଗରେ ବିଜେଡିର ଆନ୍ଦୋଳନ, ବିଜେପି ଛାନିଆ
ନନ୍ଦିଘୋଷ ବ୍ୟୁରୋ: ଓବିସି ସଂରକ୍ଷଣ ନେଇ ମୁହାଁମୁହିଁ ହୋଇଛନ୍ତି ଶାସକ ଓ ବିରୋଧୀ । ମେଡିକାଲ ଓ ଇଞ୍ଜିନିୟରିଂରେ ଓବିସି ବର୍ଗକୁ ସଂରକ୍ଷଣ ଦାବି କରି ଆସନ୍ତାକାଲି ରାଜଭବନ ଆଗରେ ଆନ୍ଦୋଳନ କରିବ ବିଜେଡି । ବିଜେଡି ବିଧାୟକ ଅରୁଣ ସାହୁ କହିଛନ୍ତି, କେନ୍ଦ୍ରରେ ୧୧ ବର୍ଷ ଶାସନ କରିଥିଲେ ବି ପଛୁଆବର୍ଗକୁ ସବୁବେଳେ ଅବହେଳା କରିଛନ୍ତି ବିଜେପି ସରକାର । ଚାପରେ ପଡି ଜାତିଭିତ୍ତିକ ଜନଗଣନା କରୁଛନ୍ତି । ହେଲେ ମେଡିକାଲ ଓ ଇଞ୍ଜିନିୟରିଂରେ କେବେ ଓବିସି ସଂରକ୍ଷଣ ଲାଗୁ କରିବେ ତା’ର ଜବାବ ମାଗି ବିଜେଡି ଆନ୍ଦୋଳନକୁ ଓହ୍ଲାଉଛି । କଂଗ୍ରେସ ମଧ୍ୟ ବିଜେପି ପରେ ପରେ ଆନ୍ଦୋଳନକୁ ଓହ୍ଲାଇବାକୁ ନିଷ୍ପତ୍ତି ନେଇଛି । ସେପଟେ ଚାପରେ ଚେପା ବିଜେପି ବିଳିବିଳେଇ ହୋଇ କହିଛି ଓବିସି ପ୍ରସଙ୍ଗରେ ଆନ୍ଦୋଳନ କରିବାର ଅଧିକାର ବିରୋଧୀଙ୍କର ନାହିଁ ।
ତରବରିଆ ଭାବେ ସଂରକ୍ଷଣ ନିଷ୍ପତ୍ତି ନେଲେ ରାଜ୍ୟ ସରକାର l ଯେଉଁଠି ସିଟ ଖାଲି ପଡୁଛି, ସେଠି ସଂରକ୍ଷଣ ଦେଲେ l ଓବିସି ଛାତ୍ରଛାତ୍ରୀଙ୍କୁ ମେଡିକାଲ, ଇଞ୍ଜିନିୟରିଂ କ୍ଷେତ୍ରରେ ସରଂକ୍ଷଣ କେବେ ? ଏହି ଦାବି ନେଇ ବୁଧବାର ରାଜଭବନ ଆଗରେ ଆନ୍ଦୋଳନ କରିବ ବିଜେଡି । ଓଡିଶା ସରକାର ଶିକ୍ଷା କ୍ଷେତ୍ରରେ ୧୧.୨୫ ପ୍ରତିଶତ ସଂରକ୍ଷଣ ଦେବାର ନିଷ୍ପତ୍ତିରେ କାହିଁକି ରାଜ୍ୟ ସରକାର ଓବିସି ଛାତ୍ରଛାତ୍ରୀଙ୍କୁ ଧୋକା ଓ ପ୍ରବଞ୍ଚନା ଦେଲେ ତାହାକୁ ନେଇ ପ୍ରଶ୍ନ ଉଠାଇଛି ବିଜେଡି । ଓବିସିଙ୍କୁ ଶିକ୍ଷା କ୍ଷେତ୍ରରେ ୨୭ ପ୍ରତିଶତ ସଂରକ୍ଷଣ ଦେବାକୁ ଦଳ ଦାବି କରିଛି । ସେହିପରି ଶିକ୍ଷା କ୍ଷେତ୍ରରେ SC/STଙ୍କୁ ମଧ୍ୟ ଉଚିତ ସଂରକ୍ଷଣ ଦେବାକୁ ଦଳ ଦାବି କରିଛି । ଯାହାକୁ ନେଇ ଶାସକ ବିଜେପି ଚେଇଁ ଉଠିବା ପରେ ବିଜେପିକୁ ଘେରିଛି ବିଜେଡି । ବିଜେଡି ବିଧାୟକ ଅରୁଣ ସାହୁ କହିଛନ୍ତି, ମୁଁ ଖୁସି ଆଜି ବିଜେଡି ଡାକରାକୁ ବିଜେପି ଗ୍ରହଣ କରିଛି । କେନ୍ଦ୍ରରେ ୧୧ ବର୍ଷ ଶାସନ କରିଥିଲେ ବି ପଛୁଆବର୍ଗକୁ ସବୁବେଳେ ଅବହେଳା କରିଛି ବିଜେପି । ୟୁଜି, ପିଜିରେ ସିଟ୍ ଖାଲି ପଡୁଛି । ସେଠାରେ ସଂରକ୍ଷଣ ଦେବାର ମାନେ କ’ଣ ବୋଲି ମନମୋହନଙ୍କୁ ପ୍ରଶ୍ନ କରିଛି ବିଜେଡି । ସେପଟେ ବିଜେପି ସଭାପତି ମନମୋହନ ସାମଲ କହିଛନ୍ତି ବିଜେଡି ଓ କଂଗ୍ରେସର ଓବିସି ନେଇ ଆନ୍ଦୋଳନ କରିବାର ଅଧିକାର ନାହିଁ ।
ଓବିସି ସଂରକ୍ଷଣ ପ୍ରସଙ୍ଗରେ ବିଜେପି ରାଜ୍ୟ ସଭାପତି ମନମୋହନ ସାମଲ ପ୍ରେସମିଟ କରିବା ପରେ ଶାସକ ଦଳକୁ ଘେରିଛନ୍ତି ବିରୋଧୀ ଦଳର ନେତା । କାହିଁକି ପଛୁଆ ବର୍ଗମାନଙ୍କୁ ଅବହେଳା କରୁଛି ବିଜେପି ତାହାକୁ ନେଇ ପ୍ରଶ୍ନ କରିଛନ୍ତି ବିରୋଧୀ ଦଳର ଗୋଟିଏ ପରେ ଗୋଟିଏ ବିଧାୟକ । ବିଜେଡି ବିଧାୟକ ଧୃବ ସାହୁ କହିଛନ୍ତି ରାଜ୍ୟ ସରକାର ପଛୁଆ ବର୍ଗର ପିଲାଙ୍କ ମେଡିକାଲ ଓ ଇଞ୍ଜିନିୟରିଂ ଶିକ୍ଷାରୁ ବଞ୍ଚିତ କରୁଥିବାରୁ ଦଳ ଏହା ବିରୋଧରେ ଆନ୍ଦୋଳନକୁ ଓହ୍ଲାଇଛି । ସେହିପରି ସଂରକ୍ଷଣ ପ୍ରସଙ୍ଗକୁ ନେଇ କଂଗ୍ରେସ ମଧ୍ୟ ବିଜେପିକୁ ଟାର୍ଗେଟ କରିଛି । କଂଗ୍ରେସ ଚାପରେ କେନ୍ଦ୍ର ସରକାର ଜାତିଭିତ୍ତିକ ଜନଗଣନା କରିବାକୁ ନିଷ୍ପତ୍ତି ନେଇଛନ୍ତି ବୋଲି କଂଗ୍ରେସର ବରିଷ୍ଠ ନେତା ସୁରେଶ କୁମାର ରାଉତରାୟ କହିଛନ୍ତି ।
ଓବିସିଙ୍କୁ ଶିକ୍ଷା କ୍ଷେତ୍ରରେ ୨୭ ପ୍ରତିଶତ ସଂରକ୍ଷଣ ଦାବିକୁ ନେଇ ବିଜେଡି ତାର ସ୍ବରକୁ ଶାଣିତ କରିଛି । ରାଜଭବନ ଆଗରେ ଆସନ୍ତାକାଲି ଆନ୍ଦୋଳନ କରି ଦଳ ବିଜେପି ସରକାର ଉପରେ ଚାପ ସୃଷ୍ଟି କରିବ । ଯାହାର ସଂଖ୍ୟା ଯେତେ ତାହାର ଭାଗ ସେତେ ନ୍ୟାୟରେ ସମାନତା ଆଣିବାକୁ ସ୍ବର ଉଠାଇଛି ବିଜେଡି ।
ଚିଟଫଣ୍ଡ ଟଙ୍କା ଫେରସ୍ତ ପ୍ରସଙ୍ଗରେ ବିଜେପିର ପଛଘୁଞ୍ଚା, ୨୪ ଘଣ୍ଟାରେ ଟଙ୍କା ଫେରସ୍ତ କରିବାକୁ ମାରିଥିଲେ ବାହାସ୍ଫୋଟ
ନନ୍ଦିଘୋଷ ବ୍ୟୁରୋ: ଚିଟଫଣ୍ଡ ଜମାକାରୀଙ୍କୁ ଟଙ୍କା ଫେରସ୍ତ ପ୍ରସଙ୍ଗରେ ପଛଘୁଞ୍ଚା ଦେଉଛି ବିଜେପି । କ୍ଷମତାକୁ ଆସିଲେ ୨୪ ଘଣ୍ଟାରେ ଜମାକାରୀଙ୍କୁ ଟଙ୍କା ଫେରସ୍ତ କରାଯିବ ବୋଲି ନିର୍ବାଚନ ସମୟରେ ବାହାସ୍ଫୋଟ ମାରିଥିଲେ ବିଜେପି ରାଜ୍ୟ ସଭାପତି ଓ ଅନ୍ୟ ନେତା । ଦିନ କେଇଟା ପରେ ବିଜେପି ସରକାର ବର୍ଷେ ପୂର୍ତ୍ତି ପାଳନ କରିବାକୁ ଯାଉଛି । ହେଲେ ଏଯାଏଁ ଜମାକାରୀଙ୍କ ତଥ୍ୟ ସଂଗ୍ରହ କରିପାରିନାହାନ୍ତି ।
ବର୍ଷ ପୂର୍ତ୍ତି ଉତ୍ସବ ସମ୍ପର୍କିତ ସାମ୍ବାଦିକ ସମ୍ମିଳନୀରେ ରାଜ୍ୟ ସଭାପତି ମନମୋହନ ସାମଲଙ୍କୁ ପ୍ରଶ୍ନ କରାଯିବାରୁ ଚାଉଳ ଚୋବାଇଲା ଭଳି କହୁଛନ୍ତି, ଜମାକାରୀଙ୍କ ତଥ୍ୟ ସଂଗ୍ରହ କରାଯାଉଛି । ବିଜେପିର ଏଭଳି ଦୋମୁହାଁ ନୀତିକୁ ସମାଲୋଚନା କରିଛନ୍ତି ବିରୋଧୀ । ଏ ପ୍ରସଙ୍ଗରେ ବିଜେପି ସଭାପତିଙ୍କୁ କଡା ସମାଲୋଚନା କରିଛି ବିଜେଡି । ଦଳ ପକ୍ଷରୁ କୁହାଯାଇଛି ସରକାରରେ ଥାଇ କାଗଜପତ୍ର ସଂଗ୍ରହ କରିବା କଥା କାହାକୁ କହୁଛନ୍ତି । ନିଜ କାନ୍ଧରୁ ଜୁଆଳି ଖସାନ୍ତୁ ନାହିଁ । ସବୁ କଥାରେ ୨୪ ବର୍ଷକୁ ଦୋଷ ହେଲେ ହେବନି । ଯାହା କରିପାରୁଛ ତାକୁ ନେଇ ବାହାବା ନେଉଛ ଆଉ ନକରିପାରିଲେ ୨୪ ବର୍ଷକୁ ଦୋଷ ଦେଉଛ । ଏବେ ବିଜେପି ସରକାରରେ ଅଛି । ଚିଟଫଣ୍ଡ କାଗଜ ଖୋଜିବା ଦାୟିତ୍ଵ ସରକାରଙ୍କ ଓ ଖୋଜନ୍ତୁ ବୋଲି କହିଛନ୍ତି ବିଜେଡି ବିଧାୟକ ଅରୁଣ ସାହୁ । ସେପଟେ କଂଗ୍ରେସ ମଧ୍ୟ ସରକାରକୁ କଡ଼ା ଭାଷାରେ ସମାଲୋଚନା କରିଛି । ଚିଟଫଣ୍ଡ ସଂସ୍ଥା ଦ୍ଵାରା କ୍ଷତିଗ୍ରସ୍ତ ମିଳିତ ମଞ୍ଚ କହିଛି, ବିଜେପି ସଭାପତି ଫାର୍ସ କରୁଛନ୍ତି । ଆର୍ଥିକ କ୍ଷତିଗ୍ରସ୍ତ ଜମାକାରୀଙ୍କୁ ଭଣ୍ଡଉଛନ୍ତି ।
ପହଲଗାଓଁ ଆକ୍ରମଣ ଷଡଯନ୍ତ୍ରକାରୀ ତଥା ପାକିସ୍ତାନ ସେନା ମୁଖ୍ୟ ଅସିମ ମୁନିରଙ୍କୁ ଫିଲ୍ଡ ମାର୍ଶଲ ରାଙ୍କକୁ ପ୍ରମୋସନ
ନନ୍ଦିଘୋଷ: ପହଲଗାଓଁରେ ଆତଙ୍କବାଦୀ ରକ୍ତର ହୋଲି ଖେଳିବାର ସ୍କ୍ରିପ୍ଟ ଲେଖିଥିବା ପାକିସ୍ତାନ ସେନା ମୁଖ୍ୟଙ୍କୁ ପ୍ରମୋଶନ । ମଙ୍ଗଳବାର ପାକିସ୍ତାନ କ୍ୟାବିନେଟ୍ ମୁନିରଙ୍କ ପ୍ରମୋସନକୁ ମଞ୍ଜୁରୀ ଦେଇଛି । ଏହାଦ୍ବାର ସେନା ମୁଖ୍ୟ ଜେନେରାଲ ଅସିମ ମୁନିର ଫିଲ୍ଡ ମାର୍ଶଲ ରାଙ୍କକୁ ପଦୋନ୍ନତି ପାଇଛନ୍ତି । ସୂଚନାଯୋଗ୍ୟ, ପହଲଗାଓଁ ଆକ୍ରମଣର ସମ୍ପର୍କ ପାକିସ୍ତାନ ଓ ଆଇଏସଆଇ ସହ ରହିଥିବା ପ୍ରମାଣ ମିଳିଛି । ଏହାସହ ପାକିସ୍ତାନ ସେନାର ଜଣେ ଅଫିସର ସ୍ବୀକାର କରିଛନ୍ତି, ପହଊଗାଓଁ ଆତଙ୍କମବାଦୀ ଆକ୍ରମଣର ଯୋଜନା ଅସିମ ମୁନିର ହିଁ ବନାଇଥିଲେ ।
ଆପଣଙ୍କୁ କହି ରଖିବାକୁ ଚାହୁଁ, ପାକିସ୍ତାନ ସେନାରେ ଫିଲ୍ଡ ମାର୍ଶଲଙ୍କ ପଦ ନା କେବଳ ଏକ ବଡ଼ ସମ୍ମାନ, ଏହା ରଣନୈତିକ କ୍ଷେତ୍ରରେ ନିଷ୍ପତ୍ତି ନେବାର ଅଧିକାର ଦେଇଥାଏ । ଅର୍ଥାତ ମୁନିରଙ୍କ ପାଖରେ ଏବେ ପାକିସ୍ତାନ ସେନାର ଶକ୍ତି ସହ ସରକାରରେ ମଧ୍ୟ ଦବଦବା ରହିବ । ଏହା ମୁନିରଙ୍କୁ ନା କେବଳ ସେନାକୁ ଦେବ ବରଂ ରାଜେନୖତିକ ଓ ସୈନ୍ୟ ପ୍ରସଙ୍ଗରେ ନିର୍ଣ୍ଣାୟକ ନିଷ୍ପତ୍ତି ନେବାର ଅଧିକାର ଦେବ ।
ଫିଲ୍ଡ ମାର୍ଶଲ ହେବା ପରେ ମୁନିର ଏବେ ପାକିସ୍ତାନ ସେନା, ଗୁଇନ୍ଦା ସଂସ୍ଥା ସମନ୍ବୟ ରଖିବା ଓ ଏହାକୁ ମଜଭୁତ କରିବାକୁ ଖୋଲା ଅଧିକାର ମିଳିପାରେ । ଏହା ଭାରତ ବିପକ୍ଷରେ ହାଇବ୍ରିଡ଼ ଓ୍ବାର୍, ଆତଙ୍କବାଦ, ସାଇବର ଆଟାକ ଓ ପ୍ରୋକ୍ସି ଓ୍ବାର କରି ସ୍ଥିତିକୁ ଅଧିକ ବଢ଼ାଇ ପାରେ ।
ତେବେ ପାକିସ୍ତାନ ସରକାର କେବଳ ଏକ ପ୍ରୋପାଗେଣ୍ଡା ଆଧାରରେ ଏମିତି ନିଷ୍ପତ୍ତି ନେଇଛନ୍ତି । ପାକିସ୍ତାନ ବିଶ୍ବକୁ ମିଛ ମେସେଜ ଦେବାକୁ ଚେଷ୍ଟା କରୁଛି । ମୁନିରଙ୍କୁ ପ୍ରମୋସନ ଦେଇ ପାକିସ୍ତାନ ଦୁନିଆକୁ ଦେଖାଇବାକୁ ଚାହୁଁଛି, ସେ ଭାରତ ବିରୋଧୀ ଯୁଦ୍ଧରେ ବିଜୟ ହାସଲ କରିଛି । ଏଥିପାଇଁ ସେନାମୁଖ୍ୟଙ୍କୁ ପ୍ରମୋସନ ଦିଆଯାଇଛି । ଏପରି କରି ପାକିସ୍ତାନ ଦୁନିଆକୁ ଭୂଆଁ ବନାଇବାକୁ ଚେଷ୍ଟା କରୁଛି ।
କୋଲକାତା ନୁହେଁ, ଅହମ୍ମଦାବାଦରେ ହେବ IPL ଫାଇନାଲ
ନନ୍ଦିଘୋଷ ବ୍ୟୁରୋ: IPLକୁ ନେଇ ବଡ଼ ଖବର । ନୂଆ ସିଡ୍ୟୁଲ ଅନୁସାରେ କୋଲକାତା ନୁହେଁ, ଅହମ୍ମଦାବାଦରେ ହେବ ଫାଇନାଲ ମ୍ୟାଚ୍ । ଜୁନ ୩ ତାରିଖରେ ଅହମ୍ମଦାବାଦର ନରେନ୍ଦ୍ର ମୋଡି ଷ୍ଟାଡିୟମରେ ଏହି ମ୍ୟାଚ୍ ଖେଳାଯିବ । ମଙ୍ଗଳବାର ବିସିସିଆଇର ବସିଥିବା ବୈଠକରେ ଏହି ନିଷ୍ପତ୍ତି ନିଆଯାଇଛି । ଏହାସହ ଜୁନ ୧ ତାରିଖରେ କ୍ବାଲିଫାୟର-୨ ମ୍ୟାଚ ବି ଅହମ୍ମଦାବାଦରେ ହେବା ନେଇ ଶୁଣାଯାଉଛି ।
ପ୍ଲେ ଅଫର ପ୍ରଥମ ଦୁଇଟି ମ୍ୟାଚ୍ କ୍ବାଲିଫାୟର-୧ ଓ ଏଲିମିନେଟର ୨୯ ଓ ୩୦ ତାରିଖରେ ମୁଲ୍ଲାମ୍ପୁର ନ୍ୟୁ ଚଣ୍ଡିଗଡ଼ରେ ଖେଳାଯାଇ ପାରେ । ମୌସୁମୀ ସ୍ଥିତିକୁ ଦେଖି ବିସିସିଆଇ ଏପରି ନିଷ୍ପତ୍ତି ନେଇଛି । ସୂଚନାଯୋଗ୍ୟ, ଭାରତ ଓ ପାକିସ୍ତାନ ଯୁଦ୍ଧ ମଧ୍ୟରେ ବିସିସିଆଇ ଆଇପିଏଲକୁ ଗୋଟିଏ ସପ୍ତାହ ପାଇଁ ସ୍ଥଗିତ ରଖିଥିଲା । ମେ’ ୧୭ ତାରିଖରୁ ଏହା ପୁଣି ଥରେ ଆରମ୍ଭ ହୋଇଛି । ଏହି କାରଣରୁ ସିଡ୍ୟୁଲରେ ମଧ୍ୟ ପରିବର୍ତ୍ତନ କରିବାକୁ ପଡ଼ିଛି । ସେହିପରି ମୌସୁମୀକୁ ଦୃଷ୍ଟିରେ ରଖି ଆରସିବି ଓ ହାଇଦ୍ରାବାଦ ମଧ୍ୟରେ ଖେଳା ଯିବାକୁ ଥିବା ଅନ୍ତିମ ଲିଗ ମ୍ୟାଚକୁ ଲକ୍ଷ୍ନୌ ସ୍ଥାନାନ୍ତର କରି ଦିଆଯାଇଛି । ଏବେ ଆରସିବି ହାଇଦ୍ରାବାଦ ବିପକ୍ଷ ମ୍ୟାଚ୍ ୨୩ ତାରିଖରେ ଖେଳିବ । ସେହିପରି ଲକ୍ଷ୍ନୌ ବିପକ୍ଷ ମ୍ୟାଚ୍ ୨୭ ମେ’ ରେ ଲକ୍ଷ୍ନୌରେ ଖଷଳିବ ।
ନୂଆ ସିଡ୍ୟୁଲ
କ୍ବାଲିଫାୟର ୧ : ମେ’ ୨୯, ମୁଲାନପୁର, ନ୍ୟୁ ଚଣ୍ଡିଗଡ଼
ଏଲିମିନେଟର : ମେ’ ୩୦, ମୁଲାନପୁର, ନ୍ୟୁ ଚଣ୍ଡିଗଡ଼
କ୍ବାଲିଫାୟର ୨ : ଜୁନ ୧, ଅହମ୍ମଦାବାଦ
ଫାଇନାଲ : ଜୁନ ୩, ନରେନ୍ଦ୍ର ମୋଦି ଷ୍ଟାଡିୟମ, ଅହମ୍ମଦାବାଦ
ଜୁନ ୧ ତାରିଖ ପର୍ଯ୍ୟନ୍ତ ବଢ଼ିଲା ଯୁକ୍ତ ତିନି ନାମଲେଖା ଆବେଦନ ତାରିଖ
ନନ୍ଦିଘୋଷ ବ୍ୟୁରୋ: ବଢ଼ିଲା ଯୁକ୍ତ ତିନି ନାମଲେଖା ଆବେଦନ ତାରିଖ । ଆଜି ନାମଲେଖା ପାଇଁ ଆବେଦନ ତାରିଖ ଶେଷ ହେଉଥିବା ବେଳେ ଏହାକୁ ଜୁନ ୧ ତାରିଖ ପର୍ଯ୍ୟନ୍ତ ବଢ଼ାଇ ଦିଆଯାଇଛି । ଯୁକ୍ତଦୁଇ ରେଜଲ୍ଟ ପ୍ରକାଶ ପାଇ ନଥିବାରୁ ଯୁକ୍ତତିନି ନାମଲେଖା ଆବେଦନ ତାରିଖ ଘୁଞ୍ଚାଇ ଦିଆଯାଇଛି । ଉଚ୍ଚଶିକ୍ଷା ବିଭାଗ ପକ୍ଷରୁ ଏନେଇ ବିଜ୍ଞପ୍ତି ପ୍ରକାଶ ପାଇଛି ।
ସୂଚନାଯୋଗ୍ୟ, ଏପର୍ଯ୍ୟନ୍ତ ରାଜ୍ୟରେ ଯୁକ୍ତଦୁଇ ରେଜଲ୍ଟ ବାହାରିନି । ଏମିତି ସ୍ଥିତିରେ ଯୁକ୍ତତିନି ଆବେଦନ ତାରିଖ ଆଜି ଶେଷ ହେଉଥିଲା । ଏମିତି ସ୍ଥିତିରେ ଯୁକ୍ତଦୁଇରେ ପାସ୍ କରିଥିବା ଛାତ୍ରଛାତ୍ରୀ ଯୁକ୍ତତିନି ପଢ଼ିବା ପାଇଁ ନାମ ଲେଖାଇବାରୁ ବଞ୍ଚିତ ହୋଇଥାନ୍ତେ । ଏହାକୁ ଦୃଷ୍ଟିରେ ରଖି ସ୍ନାତକ ପାଠ୍ୟକ୍ରମରେ ନାମଲେଖା ପାଇଁ ରହିଥିବା Common Application Form ବା CAF ପୂରଣ ପ୍ରକିୟାର ଅବଧିକୁ ବୃଦ୍ଧି କରିବାକୁ ଉଚ୍ଚଶିକ୍ଷା ବିଭାଗ ନିଷ୍ପତ୍ତି ନେଇଛି । ଛାତ୍ରଛାତ୍ରୀମାନେ ଆସନ୍ତା ଜୁନ୍ ୧ ତାରିଖ ପର୍ଯ୍ୟନ୍ତ SAMS ପୋର୍ଟାଲରେ ଅନଲାଇନ୍ ମାଧ୍ୟମରେ ଫର୍ମ ପୂରଣ କରିପାରିବେ । ଏଥିସହ ଯୁକ୍ତଦୁଇ ପରୀକ୍ଷାରେ ରଖିଥିବା ମାର୍କକୁ ଜୁନ୍ ୧ ତାରିଖ ସୁଦ୍ଧା ଅପଲୋଡ଼ କରିପାରିବେ ।