ଭୁବନେଶ୍ବର: ବିକଶିତ ଭାରତ ଓ ବିକଶିତ ଓଡ଼ିଶାର ଗତି ଦିଗହରା । ଡବଲ ଇଞ୍ଜିନ ସରକାରରେ ଡବଲ ସ୍ବପ୍ନ ଚୁରମାର । ଡବଲ ବିକାଶର ଅଭିବୃଦ୍ଧି ହାର ୬ ପ୍ରତିଶତ ବି ଛୁଇଁପାରିବ ନାହିଁ ବୋଲି ଆକଳନ କରିଛି ଅନ୍ତର୍ଜାତୀୟ ମୁଦ୍ରା ପାଣ୍ଠି l ଏହାରି ଭିତରେ ଅର୍ଥନୀତି ପରିଚାଳନା ସଠିକ୍ ନଥିବାରୁ ବିକାଶର ନକ୍ସା ଦିଗହରା ହୋଇଛି । ପୂର୍ବତନ ଅର୍ଥମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ପଞ୍ଚାନନ କାନୁନଗୋ କହିଛନ୍ତି ଯେ, ବିଜେପି ସରକାର ସମୟରେ ଅର୍ଥନୈତିକ ସ୍ଥିତି ପୂରା ଦେଶରେ ଦିଗହରା ହୋଇଛି l ଯାହାକୁ ସଜାଡିବାରେ ଫେଲ ମାରିଛି ବିଜେପି ସରକାର l ସେପଟେ ବିଜେଡି କହିଛି ନବୀନ ପଟ୍ଟନାୟକଙ୍କ ନେତୃତ୍ବରେ ଓଡିଶା ଆର୍ଥିକ ପରିଚାଳନାରେ ଦେଶରେ ଅଗ୍ରଣୀ ଥିଲା l ହେଲେ ୧୧ମାସର ବିଜେପି ସରକାର ଏହାକୁ ଠିକ ଦିଶାରେ ନେଇପାରୁନାହିଁ l ଫଳରେ ଓଡିଶାର ବିକାଶ ଆଜି ଠପ୍ ହୋଇଯାଇଛି l ଫଳରେ ବିକଶିତ ଗାଁ ଓ ବିକଶିତ ଓଡିଶାର ସ୍ବପ୍ନ ସ୍ବପ୍ନରେ ରହିଯିବ l ତେଣୁ ବିଜେପି ସରକାର ବିକାଶର ଅଭିବୃଦ୍ଧିକୁ ଗୁରୁତ୍ଵ ଦେବା ଆବଶ୍ୟକ ବୋଲି ବିଜେଡି ନେତା ପ୍ରଶାନ୍ତ ମୁଦୁଲି କହିଛନ୍ତି l

ଅନ୍ତର୍ଜାତୀୟ ମୁଦ୍ରା ପାଣ୍ଠି ଦେଶର ବିକାଶ ଅଭିବୃଦ୍ଧି ୬ ପ୍ରତିଶତ ଛୁଇଁବନାହିଁ ବୋଲି ବହୁ ପୂର୍ବରୁ ଆକଳନ କରିଛି l ଆଉ ଏବେ ପହଲଗାଓଁ ଆକ୍ରମଣ ନେଇ ଆଗକୁ କଣ ହେବ ତାହା ବି ଆକଳନ କରିପାରୁନାହାନ୍ତି ବିଶେଷଜ୍ଞ l ଡବଲ ଇଞ୍ଜିନ ସରକାର ବିକାଶ ଉପରେ ଓ ଆର୍ଥିକ ପରିଚାଳନା ଉପରେ ଫୋକସ କରିବାର ସମୟ ଆସିଛି ବୋଲି ରାଜନୈତିକ ସମୀକ୍ଷକ କହିଛନ୍ତି l ସେପଟେ ବିଜେପି କହିଛି ସବୁ ଦିଗକୁ ବିଚାରକୁ ନେଇ ଡବଲ ଇଞ୍ଜିନ ସରକାର କାମ କରୁଛି l

୨୦୦୦ ମସିହାରୁ ଓଡ଼ିଶାର ନେତୃତ୍ଵ ନେଇ ନବୀନ ପଟ୍ଟନାୟକ ଉଜୁଡ଼ା ଓଡ଼ିଶାକୁ ଅଭିବୃଦ୍ଧିଶାଳୀ ଓଡ଼ିଶାରେ ପରିଣତ କରିଥିଲେ l ଆର୍ଥିକ ପରିଚାଳନାରେ ଓଡ଼ିଶା ସାରା ଦେଶକୁ ବାଟ ଦେଖାଇଥିଲା l ଓଡିଶାର ବିକାଶ ବି ଦ୍ରୁତ ଗତିରେ ଆଗେଇ ଚାଲିଥିଲା l ହେଲେ ଡବଲ ଇଞ୍ଜିନ ସରକାର କେବଳ ସ୍ବପ୍ନ ଦେଖାଇ ଏଥିରେ ବ୍ରେକ୍ ଲଗାଇଛି l ଏପରି ସ୍ଥିତିରେ ବିକଶିତ ଭାରତ ଓ ବିକଶିତ ଓଡିଶାର ଆଜି ଗତି ଦିଶାହୀନ ହୋଇପଡିଛି ବୋଲି କୁହାଯାଉଛି ।

ଭୁବନେଶ୍ବର: କେତେ ଅସହାୟ ରାଜ୍ୟର ବିଜେପି ସରକାର। ଓଡ଼ିଶାର କେତେ ଲୋକ ରାଜ୍ୟ ବାହାରେ ଖଟୁଛନ୍ତି ଦାଦନ ? କେତେ ନିର୍ଯାତିତ ହେଉଛନ୍ତି ଓ କେତେ ଜଣଙ୍କ ଜୀବନ ଯାଉଛି ? ରାଜ୍ୟ ସରକାରଙ୍କ ପାଖରେ ନାହିଁ ତଥ୍ୟ। ଅନ୍ତର୍ଜାତୀୟ ଶ୍ରମିକ ଦିବସ ପାଳନ ଅବସରରେ ରାଜ୍ୟର ଦାଦନ ପ୍ରସଙ୍ଗକୁ ନେଇ ନିଜର ଦୁର୍ବଳତା ବଖାଣିଛନ୍ତି ସରକାର। ଶ୍ରମିକ ଦିବସରେ ଉଭୟ ମୁଖ୍ୟମନ୍ତ୍ରୀ ଓ ଶ୍ରମମନ୍ତ୍ରୀ ମାନିଛନ୍ତି ଯେ, ଓଡ଼ିଶାର ଦାଦନ ସମ୍ପର୍କରେ ସରକାରଙ୍କ ପାଖରେ ନାହିଁ ଡାଟା। କେତେ ଲୋକ ଦାଦନ ଖଟିବାକୁ ଯାଉଛନ୍ତି ତାର ନାହିଁ ସଠିକ ତଥ୍ୟ। ସରକାରୀ ରେକର୍ଡ ଅନୁସାରେ, ରାଜ୍ୟ ବାହାରକୁ ଦାଦନ ଖଟିବାକୁ ଯାଇଥିବା ଶ୍ରମିକଙ୍କ ସଂଖ୍ୟା ମାତ୍ର ୭୦ ହଜାର। କିନ୍ତୁ ବାସ୍ତବ ଚିତ୍ର ପୂରା ଓଲଟା। ପଶ୍ଚିମ ଓଡ଼ିଶାର ୯ଟି ଜିଲ୍ଲାକୁ ଦାଦନ ପ୍ରବଣ ବୋଲି ଚିହ୍ନଟ କରାଯାଇଛି। ପ୍ରତ୍ୟେକ ଦିନ ରାଜ୍ୟ ବାହାରେ ଶ୍ରମିକଙ୍କର ଜୀବନ ଯାଉଛି। ହେଲେ ସରକାର ତଥ୍ୟ ପାଉନାହାନ୍ତି ବୋଲି ମାନିଛନ୍ତି ଶ୍ରମମନ୍ତ୍ରୀ। ସେପଟେ ନୂଆପଡା, ବଲାଙ୍ଗୀର, କଳାହାଣ୍ଡିରୁ ଅଧିକ ଲୋକ ଦାଦନ ଖଟିବାକୁ ଯାଉଛନ୍ତି। ଦାଦନ ସମସ୍ୟାର ସମାଧାନ ପାଇଁ ଟାସ୍କ ଫୋର୍ସ ଗଠନ ସହ ସ୍ବତନ୍ତ୍ର ପଲିସି ଅଣାଯିବ ବୋଲି କହିଛନ୍ତି ମୁଖ୍ୟମନ୍ତ୍ରୀ।

ସେପଟେ ରାଜ୍ୟ ଓ ଦେଶରେ ଶ୍ରମିକ ବିରୋଧୀ ସରକାର ଚାଲିଥିବା ଅଭିଯୋଗ କରିଛି ବିଜୁ ଶ୍ରମିକ ସାମ୍ମୁଖ୍ୟ। କେନ୍ଦ୍ର ସରକାରଙ୍କ ଦ୍ବାରା ଅଣାଯାଇଥିବା ୪ଟି ଶ୍ରମ କୋଡକୁ ବିରୋଧ କରୁଛନ୍ତି ପ୍ରମୁଖ ରାଜନୈତିକ ଦଳ। ନବୀନ ପଟ୍ଟନାୟକ ଶ୍ରମିକଙ୍କ ସର୍ବନିମ୍ନ ମଜୁରୀ ୧୦୭ ଟଙ୍କା ବଢ଼ାଇଥିଲେ। କିନ୍ତୁ ଏବେର ସରକାର ବଢ଼ାଇଲେ ମାତ୍ର ୧୦ ଟଙ୍କା। ଶ୍ରମିକଙ୍କ କାର୍ଯ୍ୟ ସମୟ ୮ରୁ ୧୨ ଘଣ୍ଟା ହେଲାଣି। ତେଣୁ ଶ୍ରମିକଙ୍କୁ କିଭଳି ନ୍ୟାୟ ମିଳିବ ସେନେଇ ଯୁକ୍ତି ବାଢ଼ିଛି ବିଜୁ ଶ୍ରମିକ ସାମ୍ମୁଖ୍ୟ। ଅନ୍ୟପଟେ ଶ୍ରମିକଙ୍କୁ ବିଭିନ୍ନ ଉପାୟରେ ଲୁଣ୍ଠନ କରାଯାଉଛି ବୋଲି ଅଭିଯୋଗ କରିଛି ସିଟୁ। ତେଣୁ ପ୍ରଥମେ ଶ୍ରମିକଙ୍କ ସର୍ବନିମ୍ନ ଆବଶ୍ୟକତା ସାଙ୍ଗକୁ ସୁରକ୍ଷା ଉପରେ ଧ୍ୟାନ ଦିଆଯାଉ ବୋଲି ଦାବି ହୋଇଛି।

ଭୁବନେଶ୍ବର: ଶ୍ରମିକଙ୍କୁ ପୂର୍ବ ସରକାର ଯାହା ଦେଉଥିଲେ ତାହା ନୂଆ ସରକାର ଛଡ଼ାଇନେଲେ। ଆଉ ଏବେ ଶ୍ରମିକ ଦିବସ ପାଳନ ବେଳେ ବଡ଼ବଡ଼ କଥା କହୁଛନ୍ତି। ଯାହାକୁ ନେଇ କେନ୍ଦୁପତ୍ର ତୋଳାଳି ଓ ଶ୍ରମିକ ନିଜର ଦୁଃଖ ବଖାଣିଛନ୍ତି। ଜଙ୍ଗଲ ଅଧିକାର ଆଇନ ଲାଗୁ ପରେ କେନ୍ଦୁପତ୍ର ସଂସ୍ଥାରୁ ଯେଉଁ ଲାଭ ମିଳେ ସେ ଲାଭାଂଶ କେନ୍ଦୁପତ୍ର ତୋଳାଳି ଓ ସିଜନାଲ କର୍ମଚାରୀଙ୍କ ମଧ୍ୟରେ ବାଣ୍ଟିବା ପାଇଁ ପୂର୍ବ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଷ୍ପତ୍ତି ନେଇଥିଲେ। କେନ୍ଦୁପତ୍ର କ୍ଷେତ୍ରରେ କାର୍ଯ୍ୟ କରୁଥିବା ତୋଳାଳି ଓ ଶ୍ରମିକଙ୍କୁ ବୋନସଠୁ ଆରମ୍ଭ କରି ମୃତ୍ୟୁକାଳୀନ ସହାୟତା, ପାଣି, ଚପଲ ଓ ଟୋପି ପାଇଁ ଭତ୍ତା ଓ କନ୍ୟା ବିବାହ ପାଇଁ ସହାୟତା ମିଳୁଥିଲା। ହେଲେ ଏସବୁ ଏବେ ଠପ। କେନ୍ଦୁପତ୍ରରେ ଜିଏସଟି ଲାଗୁ ପରେ ଲାଭାଂଶ କମିଲା। ଯାହାକୁ ନେଇ କେନ୍ଦ୍ର ସରକାରଙ୍କୁ ବାରମ୍ବାର ଚିଠି ଲେଖିଥିଲେ ନବୀନ ପଟ୍ଟନାୟକ। ଜିଏସଟି ଉଚ୍ଛେଦ ପାଇଁ ଦାବି କରିଥିଲେ। କିନ୍ତୁ କେନ୍ଦ୍ର ସରକାର କୌଣସି ପଦକ୍ଷେପ ନେଲେ ନାହିଁ। ଯାହା ଫଳରେ ଏବେ ରାଜ୍ୟର ୧୫ ଲକ୍ଷ ମହିଳା କେନ୍ଦୁପତ୍ର ତୋଳାଳିଙ୍କ ସମେତ ୧୮ ହଜାର ସିଜିନାଲ କର୍ମଚାରୀ ଓ ୨୦ ହଜାର ବନ୍ଧେଇ ଶ୍ରମିକ ସଂକଟରେ। ସରକାର ପରିବର୍ତ୍ତନ ହେଲେ କଣ ଯୋଜନା ପରିବର୍ତ୍ତନ ହୁଏକି ବୋଲି ପ୍ରଶ୍ନ କରିଛି କେନ୍ଦୁପତ୍ର କର୍ମଚାରୀ ସଂଘ। ଆଦିବାସୀ ମୁଖ୍ୟମନ୍ତ୍ରୀ ଆଦିବାସୀଙ୍କ କଥା ଶୁଣିବା କଥା। କିନ୍ତୁ ଗତ ୨୧ ତାରିଖରେ ସମ୍ବଲପୁର ଜନଶୁଣାଣି ପାଇଁ ଗଲେ କିନ୍ତୁ, ଏକଥା ଶୁଣିଲେ ନାହିଁ ବୋଲି ଅଭିଯୋଗ ହୋଇଛି। କନ୍ୟା ବିବାହ ସହାୟତା ବନ୍ଦ କରିଦେଲେ। ତେଣୁ ଲୋକଙ୍କ ପାଖକୁ ଯିବାର ଲାଭ କଣ ବୋଲି କହିଛି ସଙ୍ଘ।

ସେପଟେ ବିଜେଡି ଏ ପ୍ରସଙ୍ଗରେ ସରକାରଙ୍କ ଆଭିମୁଖ୍ୟକୁ ସମାଲୋଚନା କରିଛି। ପାହାଡ଼ ଅଞ୍ଚଳରେ ଆଦିବାସୀ ସମ୍ପ୍ରଦାୟର ଜୀବନ ଜୀବିକାର ବାଟ ହେଉଛି କେନ୍ଦୁପତ୍ର। ତେଣୁ ଏଥିରେ ଜିଏସଟି ମାଡ଼ ପ୍ରହାର ସଦୃଶ।ଏପରିକି ବିଜେଡି ସରକାର ସମୟରେ ସେମାନଙ୍କୁ ମିଳୁଥିବା ସୁବିଧା ସୁଯୋଗ ଏବେ ନମିଳିବାକୁ ନେଇ  ସମାଲୋଚନା କଲା ବିଜେଡି।ସେପଟେ ଏହାକୁ ନେଇ ଉତ୍ତର ରଖିଛନ୍ତି ଶ୍ରମମନ୍ତ୍ରୀ। କହିଛନ୍ତି, କେନ୍ଦୁପତ୍ର ତୋଳାଳି ଓ କର୍ମଚାରୀଙ୍କ ଉପରେ ଜିଏସଟିର କିଛି ପ୍ରଭାବ ପଡେନି।ଯେଉଁମାନେ କେନ୍ଦୁପତ୍ର କିଣୁଥିବେ ସେମାନେ ଜିଏସଟି ଦେଉଥିବେ।ଏପରିକି ସେମାନଙ୍କ ପାଇଁ ୫୦କୋଟି ବୋନସ ପ୍ରଦାନ କରାଯାଇଛି। ପରବର୍ତ୍ତୀ ପର୍ଯ୍ୟାୟରେ ୧୦୦ କୋଟି ଦିଆଯିବ ।

ରଥକାଠ ସମସ୍ୟା ଦୂର କରିବାକୁ ପ୍ରସ୍ତୁତ ହେବ ସ୍ବତନ୍ତ୍ର ଡାଟାବେସ୍ । ଠିକଣା ସମୟରେ ପହଞ୍ଚିବ ରଥକନା । ତାମିଲନାଡୁରୁ ଆସିବ ଚନ୍ଦନ କାଠ । ରଥଯାତ୍ରା ସମୟରେ ୩୦ ଜଣଭକ୍ତଙ୍କ ପାଇଁ ୫ ଲକ୍ଷ ଟଙ୍କାର ସ୍ୱତନ୍ତ୍ର ବୀମା ବ୍ୟବସ୍ଥା । ସେବାୟତଙ୍କ ପାଇଁ ମଧ୍ୟ ହେବ ବୀମା । ରଥଯାତ୍ରା ପାଇଁ ପୁରୀରେ କେନ୍ଦ୍ରାଞ୍ଚଳ ରାଜସ୍ବ ଆୟୁକ୍ତଙ୍କ ଅଧ୍ୟକ୍ଷତାରେ ଅନୁଷ୍ଠିତ ପ୍ରଥମ ସମନ୍ବୟ କମିଟି ବୈଠକରେ ହୋଇଛି ଗୁରୁତ୍ବପୂର୍ଣ୍ଣ ଆଲୋଚନା । ରଥଯାତ୍ରା ପାଇଁ ୮୬୫ ଖଣ୍ଡ କାଠର ଆବଶ୍ୟକତା ଥିବାବେଳେ ବର୍ତ୍ତମାନ ସୁଦ୍ଧା ରଥଖଳାକୁ ଓ ଖପୁରିଆ କରତ କଳକୁ ଆବଶ୍ୟକୀୟ କାଠ ଆସିଛି । ଭବିଷ୍ୟତରେ ଯେପରି ରଥକାଠ ସମସ୍ୟା ନହୁଏ, ସେଥିପାଇଁ  ଶ୍ରୀଜଗନ୍ନାଥ ବନ ପ୍ରକଳ୍ପ ସ୍ଥିତି ନେଇ ଡାଟାବେସ ପ୍ରସ୍ତୁତ ହେବ । ୧୪ ଟି ରଥଟଣା ଓ ୬ଟି ଇନର ଓ ଆଉଟର କର୍ଡନ ଦଉଡ଼ି ଆସିସାରିଛି । ତେବେ ସ୍ୱାସ୍ଥ୍ୟ, ଔଷଧ ଯୋଗାଣ ଓ ଡାକ୍ତର ଅଭାବକୁ ନେଇ ଉଦବେଗ ପ୍ରକାଶ ପାଇଛି ।

ବଡ଼ଦାଣ୍ଡର ଉଭୟ ପାର୍ଶ୍ଵର ନାଳ ସଫେଇ କାର୍ଯ୍ୟ ଆରମ୍ଭ ହୋଇଛି । ରେଡ଼କ୍ରସ ରୋଡ ସମେତ କ୍ରସ ଡ୍ରେନ୍ ଓ ବଡ଼ଦାଣ୍ଡର ସଫେଇ କାର୍ଯ୍ୟ ଯଥାଶୀଘ୍ର ଶେଷ ହେବ । ବଡ଼ଦାଣ୍ଡକୁ ୧୫ ଟି ଜୋନରେ ବିଭକ୍ତ କରାଯାଇଛି । ସହରରେ ବିଶୁଦ୍ଧ ପାନୀୟ ଜଳ ଯୋଗାଣ ଉପରେ ଗୁରୁତ୍ବ ଦିଆଯାଇଛି । ବିଦ୍ୟୁତ ସମସ୍ୟା ନେଇ ହୋଇଛି ଆଲୋଚନା । ସ୍ବତନ୍ତ୍ର ବସ୍ ଚଳାଚଳ, ନିର୍ଦ୍ଧାରିତ ରେଟଚାର୍ଟ, ଦୁର୍ଘଟଣା ରୋକିବା ପାଇଁ ଇଣ୍ଟରସେପ୍ଟର କ୍ରେନ୍ ନିୟୋଜିତ ହେବ । ପୂର୍ବତଟ ରେଳବାଇ ପକ୍ଷରୁ ୩୬୫ଟି ସ୍ବତନ୍ତ୍ର ଟ୍ରେନ ଚଳାଚଳ କରିବ । ୩୦ ହଜାର ଲୋକଙ୍କ ପାଇଁ ଷ୍ଟେସନରେ ବ୍ୟବସ୍ଥା ସହ ଟ୍ରେନ୍ ସୂଚନା ପ୍ରଦାନ ପାଇଁ ଭିଡିଓ ୱାଲ୍ ସହ ୩୫ଟି ଟିକେଟ ବୁକିଙ୍ଗ କାଉଣ୍ଟର ଓ ୬ଟି ଅଟୋମେଟିକ୍ ଟିକେଟ ଭେଣ୍ଡିଙ୍ଗ ମେସିନ୍ ଲଗାଯିବ । ଶାନ୍ତି ଶୃଙ୍ଖଳା ରକ୍ଷା, ଆଇନ ଶୃଙ୍ଖଳା ପରିସ୍ଥିତି, ଜନଗହଳି ନିୟନ୍ତ୍ରଣ, ଟ୍ରାଫିକ ସୁପରିଚାଳନା ପାଇଁ ପର୍ଯ୍ୟାପ୍ତ ପୋଲିସ ମୁତୟନ ସହ ସହରରେ ସିସିଟିଭି କ୍ୟାମେରା ଲଗାଯିବ ।

ଭୁବନେଶ୍ବର: ବସ୍ତିରେ ବଢୁଛି ହିଂସା, ଗଡୁଛି ମୁଣ୍ଡ । ରକ୍ତ ଚରିତ୍ର ଫିଲ୍ମ ଷ୍ଟାଇଲରେ ବୁଲୁଛି ହତିଆର । ନିଶା ଖାଇ ନାରକୀୟ କାଣ୍ଡ ଘଟାଉଛନ୍ତି ବସ୍ତି ବାସିନ୍ଦା । ସକାଳୁ ସାଇନ୍ସପାର୍କ ଆଉ ରାତିରେ ଶାନ୍ତିପଲ୍ଲୀରେ ଗଡ଼ିଲା ମୁଣ୍ଡ । ଗତ ୨୬ ତାରିଖରେ ସହିଦନଗର ଥାନା ଅନ୍ତର୍ଗତ ସାଇନ୍ସ ପାର୍କ ବସ୍ତିରେ ହୋଇଥିବା ଛୁରାମାଡ଼ ଘଟଣାରେ ବୁଧବାର ଜନ୍ମେଜୟ ନାୟକଙ୍କ ମୃତ୍ୟୁ ହୋଇଛି । ଆଉ ଠିକ ପରେ ପରେ ପୁଣି ଶାନ୍ତିପଲ୍ଲୀ ବସ୍ତିରେ ହୋଇଛି ଆଉଏକ ମର୍ଡର । ନିଶାଖାଇ ଭାଇକୁ ମାରିଛି ଭାଇ । ମୃତକଙ୍କ ନାଁ ହମ୍ମିଦୁଲ ଖାଁ । ଭାଇ ଇମ୍ମତ ଖାଁ ଲୁହାରଡରେ ପିଟିଦେବାରୁ ତାଙ୍କର ମୃତ୍ଯୁ ହୋଇଛି । ପୋଲିସ ମୁଖ୍ୟ ଅଭିଯୁକ୍ତକୁ ଗିରଫ କରିଥିବା ବେଳେ ଅତ୍ୟଧିକ ନିଶା ଖାଇ ଏଭଳି ଘଟଣା ଘଟାଇଥିବା ସୂଚନା ଦେଇଛନ୍ତି ଏସିପି । କ୍ୟାପିଟାଲ ହସ୍ପିଟାଲକୁ ମୃତଦେହ ବ୍ୟବଚ୍ଛେଦ ପାଇଁ ପଠାଯାଇଛି । ମୃତକଙ୍କ ମାଆ ଓ ପତ୍ନୀଙ୍କ ଅଭିଯୋଗ ଆଧାରରେ ତଦନ୍ତ ଚଳାଇଛି ସହିଦନଗର ଥାନା ପୋଲିସ ।

ହୋଲି ଦିନ ସହିଦନଗର ଥାନା ଅନ୍ତର୍ଗତ ଶାନ୍ତିପଲ୍ଲୀ ବସ୍ତିରେ ଗୋପୀ ଗୁଣିଙ୍କୁ ଦିନ ଦ୍ୱିପ୍ରହରେ ନିର୍ମମ ହତ୍ୟା ଓ ଠିକ ସେହିଦିନ ମଞ୍ଚେଶ୍ୱର ଥାନା ଠାରୁ କିଛି ଦୂରରେ ସମେଇଗାଡ଼ିଆର ଆୟୁସ୍ମାନ ପତିଙ୍କୁ ହତ୍ୟା କରିଥିଲେ ଦୁର୍ବୃତ୍ତ । ଏହି ଦୁଇଟି ଘଟଣା ପୂର୍ବରୁ ରାଜରାସ୍ତା ଉପରେ ସହଦେବ ନାୟକଙ୍କୁ ଗଣ୍ଡି ମୁଣ୍ଡ ଅଲଗା କରି ବିଭତ୍ସ ହତ୍ୟା କରାଯାଇଥିଲା । ବସ୍ତିରେ ରହୁଥିବା ଯୁବକଙ୍କୁ ହତ୍ୟା ପଛରେ ନିଶା ସାଜିଛି ମୂଳ କାରଣ । ବସ୍ତିରେ ଅପରାଧ ରୋକିବା ପାଇଁ କମିଶନରେଟ ପୋଲିସ ପକ୍ଷରୁ କିଛିଦିନ ତଳେ ବସ୍ତି ମାନଙ୍କରେ ଲାଗିଥିଲା ଲଟକା । ଅପରାଧୀଙ୍କ ଘର ଆଗରେ ବାଜିଥିଲା ଡେଙ୍ଗୁରା । ସେପଟେ ବସ୍ତିକୁ ଚାଲ, ଖେଳକୁଦ ଭଳି ପ୍ରତିଯୋଗିତା କରି କମ୍ୟୁନିଟି ପୋଲିସିଂ ବ୍ୟବସ୍ଥାକୁ ସୁଦୃଢ଼ କରାଯାଉଥିଲେ ମଧ୍ୟ ନିଶା ପାଇଁ ପାଣି ଫୋଟକା ଭଳି ଚାଲିଯାଉଛି ଜୀବନ । ଖୋଲାଖୋଲି ପୋଲିସକୁ ଚ୍ୟାଲେଞ୍ଜ ଦେଉଛନ୍ତି ଅପରାଧୀ ।

ଭୁବନେଶ୍ବର: ଭୁବନେଶ୍ଵର ଓ କଟକ ମଧ୍ୟରେ ମେଟ୍ରୋ ଟ୍ରେନ ଚଳାଚଳ ପାଇଁ ରାଜ୍ୟ ସରକାର ପ୍ରକ୍ରିୟା ଆରମ୍ଭ କରିବାକୁ ଯାଉଛନ୍ତି । ଭୁବନେଶ୍ୱର ବିମାନ ବନ୍ଦରରୁ ତ୍ରିଶୁଳିଆ ପରିବର୍ତ୍ତେ କଟକ ବସଷ୍ଟାଣ୍ଡ ଓ କଟକ ବଡ଼ ମେଡିକାଲ ପର୍ଯ୍ୟନ୍ତ ସମ୍ପ୍ରସାରଣ ହେବ ମେଟ୍ରୋ ପ୍ରକଳ୍ପ । ଲୋକଙ୍କ ସୁବିଧା ଦୃଷ୍ଟିରୁ ସରକାର ଏଭଳି ନିଷ୍ପତ୍ତି ନେଇଛନ୍ତି । ମେଟ୍ରୋ ପାଇଁ ଏକ କମିଟି ଗଠନ କରାଯାଇଛି । ଦେଶରେ ମେଟ୍ରୋ ଚାଲୁଥିବା ବିଭିନ୍ନ ସହର ବୁଲି ଅନୁଧ୍ୟାନ କରୁଛି କମିଟି । ନୂଆ DPR ପ୍ରସ୍ତୁତ କରାଯାଉଛି । କେବଳ ରାଜ୍ୟ ପାଣ୍ଠିରୁ ନୁହେଁ, କେନ୍ଦ୍ର ସରକାରଙ୍କ ସହଯୋଗରେ ମେଟ୍ରୋ ପ୍ରକଳ୍ପ ତିଆରି ହେବ ବୋଲି ସୂଚନା ଦେଇଛନ୍ତି ନଗର ଉନ୍ନୟନ ମନ୍ତ୍ରୀ ।