ନୂଆଦିଲ୍ଲୀ: ନୂଆଦିଲ୍ଲୀସ୍ଥିତ ପାକ୍ ହାଇକମିଶନର କାର୍ଯ୍ୟକଳାପକୁ ନେଇ ସସପେନ୍ସ। ବାରମ୍ବାର କେତେକ ଘଟଣା ହାଇକମିଶନ କାର୍ଯ୍ୟାୟଳୟକୁ ସନ୍ଦେହ ବଳୟକୁ ନେଇଯାଉଛି। ଏପରିକି ଆଇଏସଆଇର ସ୍ଲିପରସେଲ ଭାବେ ହାଇକମିଶନ କାର୍ଯ୍ୟ କରୁଛି ବୋଲି ଅଭିଯୋଗ ହେଉଛି। ଜ୍ୟୋତି ମାଲହୋତ୍ରା ଓ ଦାନିସଙ୍କ ସହ ସମ୍ପର୍କର ପର୍ଦ୍ଦାଫାସ୍ ହେବା ପରେ ଏହି ଆଶଙ୍କା ଘନୀଭୂତ ହେଉଛି। ଉତ୍ତରପ୍ରଦେଶ, ପଞ୍ଜାବ, ହରିୟାଣା ଆଦି ଅଞ୍ଚଳରୁ ସାମାଜିକ-ଅର୍ଥନୈତିକ ଅସମାନତାର ଶିକାର ବ୍ୟକ୍ତି ବିଶେଷଙ୍କୁ ରିକ୍ରୁଟ କରିବା ଲାଗି ପାକ୍ କର୍ମକର୍ତ୍ତାମାନଙ୍କୁ ଆଇଏସଆଇ କହୁଥିବା କୁହାଯାଉଛି। ଏକ୍ଷେତ୍ରରେ କୂଟନୈତିକ ମୁଖା ପିନ୍ଧା କର୍ମଚାରୀମାନେ ନିୟୋଜିତ ହୋଇଥାନ୍ତି। ଦୂତାବାସଗୁଡିକରେ ଆଇଏସଆଇ କର୍ମକର୍ତ୍ତାମାନେ ଭିସା ଅଧିକାରୀ ଭାବେ କାମ କରିଥାନ୍ତି। ଆଇଏଲଆଇ ଅଧିକାରୀମାନେ ବେଳେବେଳେ ନିଜକୁ ସ୍ବାମୀ-ସ୍ତ୍ରୀ ଭାବେ ପରିଚୟ ଦେଇଥାନ୍ତି। ହାଇକମିଶନର ପୂର୍ବତନ କର୍ମକର୍ତ୍ତା ଏହସାନ ଉର ରହିମ ଓରଫ ଦାନିସ ଓ ମୁଜାମିଲ ଯେପରି ଭାବେ ଭାରତୀୟ ୟୁଟ୍ୟୁବର ଓ ଇନଫ୍ଲୁଏନ୍ସରମାନଙ୍କୁ ଯୋଗାଡ଼ କରୁଥିଲେ ତାହା ଏହି ସବୁ ଅଭିଯୋଗକୁ ପ୍ରମାଣିତ କରୁଛି। ହରିୟାଣା ମେବାତର ମହମ୍ମଦ ଟାରିଫଙ୍କୁ ଭିସା ଦେବା ଲାଗି ପ୍ରଲୋଭିତ କରାଯାଇଥିଲା। ପରେ ତାଙ୍କୁ ସାମରିକ ପ୍ରତିଷ୍ଠାନର ଫଟୋଗ୍ରାଫି ଲାଗି ପ୍ରବର୍ତ୍ତାଯାଇଥିଲା। ହାଇକମିଶନର ପୂର୍ବତନ ଅଧିକାରୀ ଅସିଫ ବାଲୁଚ ଏହି ୟୁଟ୍ୟୁବର ଟାରିଫକୁ ପ୍ରଥମେ ଯୋଗାଡ କରିବା ପରେ ପାକିସ୍ତାନ ପଠାଇଥିଲା। ଭିସା ଆବେଦନ କରୁଥିବା ଜାମୁ ଓ କାଶ୍ମୀରର ବିଭିନ୍ନ ସ୍ପର୍ଶକାତର ସ୍ଥାନରେ ଥିବା ବ୍ୟକ୍ତିବିଶେଷ ଓ ସାମରିକ ବିଭାଗରେ ଥିବା ପରିବାରଗୁଡ଼ିକୁ ଟାର୍ଗେଟ କରାଯାଉଥିଲା। ଉତ୍ତରପ୍ରଦେଶର ଶାମଲି ଓ ରାମପୁର ଜିଲ୍ଲାର ନୌମନି ଇଲାହିକୁ ଏଥିରେ ନିୟୋଜିତ କରାଯାଇଥିଲା। ସେ ଜଣେ ସିକ୍ୟୁରିଟି ଗାର୍ଡ ଥିଲା। ସେହିପରି ଶେହଜାଦ ୱାହଦ ଥିଲା ଜଣେ ସ୍ମଗଲର। ସେମାନଙ୍କୁ ଆର୍ଥିକ ସହାୟତା ଦିଆଯାଇଥିବା ଜଣାପଡିଛି। ବାବ୍ରିମସଜିଦ ଭଙ୍ଗା ଘଟଣା ତଥା ସିଏଏ ଓ ଏନଆରସି ବିରୋଧୀ ଆଭିମୁଖ୍ୟ ଅନୁସାରେ ଅନସରଉଲ ମିୟା ଅନସାରୀକୁ ରିକ୍ରୁଟ କରାଯାଇ ପାକିସ୍ତାନ ପଠାଯାଇଥିବା ସୂଚନା ମିଳିଛି ।

ଚଣ୍ଡିଗଡ଼: ପଞ୍ଜାବରେ ବଢ଼ିଲା ଜଳ ବିବାଦ । ଭାକ୍ରା ଜଳ ବିବାଦ ନିଆଁରେ ଘିଅ ଢାଳିଲା ଭାରତୀୟ ଜାତୀୟ ଲୋକଦଳ ବା ଆଇଏନଏଲଡି । ଆଜି ପଞ୍ଜାବ-ହରିୟାଣା ସୀମାକୁ ଅବରୋଧ କରିବ ଦଳ । ଏପରିକି ପଞ୍ଜାବ ନମ୍ବର ଥିବା ସମସ୍ତ ଗାଡିକୁ ଅଟକାଯିବ ବୋଲି ଦଳ ସୂଚନା ଦେଇଛି । ଜୁନ ୧ ସୁଦ୍ଧା ଯଦି ନିର୍ଦ୍ଧାରିତ ପରିମାଣ ଅନୁସାରେ ହରିୟାଣାକୁ ପଞ୍ଜାବ ପାଣି ନ ଛାଡେ ତେବେ ଆନ୍ଦୋଳନ ଜୋରଦାର କରାଯିବ ବୋଲି ଦଳ ଧମକ ଦେଇଛି । ଭାକ୍ରା ପ୍ରକଳ୍ପରୁ ହରିୟାଣାକୁ ପଞ୍ଜାବ ନିର୍ଦ୍ଧାରିତ ୯ ହଜାର କ୍ୟୁସେକ ପାଣି ଛାଡ଼ିବା ବଦଳରେ ୫ ହଜାର କ୍ୟୁସେକ ପାଣି ଛାଡୁଛି ବୋଲି କହିଥିଲେ ଆଇଏନଏଲଡି ଜାତୀୟ ସଭାପତି ଅଭୟ ସିଂ ଚୌତାଲା । ଫଳରେ ହରିୟାଣାରେ ପାନୀୟ ଜଳ ସଙ୍କଟ ଦେଖାଦେବା ସହ କୃଷି କ୍ଷେତ୍ର ନାନା ସମସ୍ୟାର ସମ୍ମୁଖୀନ ହେଉଛି । ଆଇଏନଏଲଡି ରାଜ୍ୟ ସଭାପତି ରାମପାଲ ମାଜରାଙ୍କ ନେତୃତ୍ବରେ ଏହି ଆନ୍ଦୋଳନ କରାଯିବ । ଏହି ଆନ୍ଦୋଳନରେ ସାମିଲ ହେବା ଲାଗ କଂଗ୍ରେସକୁ ଅନୁରୋଧ କରିଛି ଆଇଏନଏଲଡି । ଏହା ସହ ସତଲେଜ-ଯମୁନା ଲିଙ୍କ କେନାଲ ନିର୍ମାଣ ଲାଗି ଦାବି ଦୋହରାଇଛି ଆଇଏନଏଲଡି ।

ମୁମ୍ବାଇ:  ମହାରାଷ୍ଟ୍ର ଥାନେ ସମେତ ବିଭିନ୍ନ ସ୍ଥାନରେ କାୟା ମେଲାଉଛି ନୂଆ କରୋନା ଭୂତାଣୁ JN.1। ମେ ୨୪ ତାରିଖ ସୁଦ୍ଧା ଥାନେରେ କୋଭିଡ ଆକ୍ରାନ୍ତଙ୍କ ସଖ୍ୟା ୧୮ ହୋଇଥିବାବେଳେ କେରଳରେ ଏହି ସଂଖ୍ୟା ରହିଛି ୨୭୩। ସେହିପରି କର୍ଣ୍ଣାଟକର ୩୫, ଦିଲ୍ଲୀରେ ୨୩ ଜଣ ସଂକ୍ରମିତ ହୋଇଛନ୍ତି। ହାଇଦ୍ରାବାଦ ଓ ନୋଏଡାରେ ଜଣେ ଲେଖାଏ ଏଥିରେ ଆକ୍ରାନ୍ତ ହୋଇଛନ୍ତି। ସେପଟେ  JN.1 କୋଭିଡ-୧୯ ଭାରିଆଣ୍ଟ ଓ ଓମିକ୍ରନ ଲିନିଏଜ BA.2.86 ସବଭାରିଆଣ୍ଟ ଏବେ ବିଭିନ୍ନ ରାଜ୍ୟରେ କାୟା ମେଲାଇଥିବା ଦେଖାଯାଇଛି। ତେବେ ଏହାକୁ ଭାରିଆଣ୍ଟ ଅଫ କନସର୍ନ ବୋଲି କହିନାହିଁ ବିଶ୍ବ ସ୍ବାସ୍ଥ୍ୟ ସଂଗଠନ। ସିଙ୍ଗାପୁରରେ JN.1 ଭାରିଆଣ୍ଟଠାରୁ ଜାତ LF.7 ଓ NB.1.8 ବିଶେଷ ପ୍ରଭାବ ବିସ୍ତାର କରିଥିବା ଦେଖାଯାଉଛି। ସେପଟେ JN.1କୁ ଚିନ୍ତିତ ନ ହେବା ଲାଗି ପରାମର୍ଶ ଦେଉଛନ୍ତି ଡାକ୍ତର।