ନବରଙ୍ଗପୁର : ଝିଅ ହେଲା ବୋଝ । ୩ ଲକ୍ଷ ଟଙ୍କାରେ ଝିଅକୁ ବିକିଦେଲେ ବାପାମାଆ। ନବରଙ୍ଗପୁର ଜିଲ୍ଲାରୁ ଏଭଳି ସଙ୍ଗୀନ ଅଭିଯୋଗ ଆସିଛି । ଶେଷରେ ହରିୟାଣାରୁ ଯ଼ୁବତୀଙ୍କୁ ଉଦ୍ଧାର କରିଛି ପୋଲିସ । ସୂଚନା ଅନୁସାରେ, ନବରଙ୍ଗପୁର ଜିଲ୍ଲା ପାପଡ଼ାହାଣ୍ଡି ବ୍ଲକ୍‌ ସେମଳା ଗାଁର ଜଣେ ଯ଼ୁବତୀଙ୍କୁ ତାଙ୍କ ପରିବାର ଲୋକ ହରିଆଣାର ଜଣେ ଯ଼ୁବକଙ୍କ ସହ ଜୋବରଦସ୍ତ ବିବାହା କରାଇ ଦେଇଥିଲେ ।

ହରିୟାଣା ଯିବା ପରେ ଯ଼ୁବତୀଙ୍କୁ ଶାରୀରିକ ଓ ମାନସିକ ନିର୍ଯାତନା ଦେଇଥିଲା ଉକ୍ତ ଯୁବକ । ମାଡ଼ ଗାଳି ଅସହ୍ୟ ହେବାରୁ ଯୁବତୀ ଘରକୁ ଫେରିଆସିବା ପାଇଁ କହିବାରୁ ତାଙ୍କ ବାପାମାଆ ତାଙ୍କୁ ୩ ଲକ୍ଷ ଟଙ୍କାରେ ବିକି ଦେଇଥିବା ଯ଼ୁବକ କହିଥିଲେ । ଏହାପରେ ଯ଼ୁବତୀ ତାଙ୍କ ଗାଁର କିଛି ଲୋକଙ୍କୁ ଜଣାଇବା ପରେ ପରେ ପୋଲିସ ସହ ଯୋଗାଯୋଗ କରିଥିଲା । ହରିୟାଣା ପୋଲିସ ସହ ଯୋଗାଯୋଗ କରି ନବରଙ୍ଗପୁର ପୋଲିସ ଯ଼ୁବତୀଙ୍କୁ ଉଦ୍ଧାର କରିଛି । ଯ଼ୁବତୀ ଏବେ ନବରଙ୍ଗପୁର ସୁଧାର ଗୃହରେ ଅଛନ୍ତି ।

ଜଳେଶ୍ୱର: ବାଲେଶ୍ୱର ଜିଲ୍ଲା ବସ୍ତା ଥାନା ୬୦ନଂ ଜାତୀୟ ରାଜପଥ ଗୋଡ଼ିଖାଳ ନିକଟରେ ଗାଡ଼ି ଦୁର୍ଘଟଣା । ଶ୍ରମିକ ନେଇ ଯାଉଥିବା ଟାଟା ଏସି ଗାଡି ଓଲଟି ୧୦ ଜଣ ଆହତ ହୋଇଛନ୍ତି । ଆହତ ମାନେ ସମସ୍ତେ ଜଳେଶ୍ଵର ଅଞ୍ଚଳର ବୋଲି ଜଣାପଡିଛି ।

ସୂଚନା ଅନୁଯାୟୀ, ଜଳେଶ୍ଵର ଥାନା ପଞ୍ଚୁଘଣ୍ଟା ରୁ ଏକ ଟାଟା ଏସିରେ ୨୦ଜଣ ଶ୍ରମିକ ମିକ୍ସଚର ମେସିନ ଲୋଡକରି ଦୃତ ଗତିରେ ଅମର୍ଦାରୋଡରେ ଆସୁଥିଲେ । ଯାହାଫଳରେ ଅଧା ରାସ୍ତାରେ ଭାରସାମ୍ୟ ହରାଇ ଓଲଟି ପଡିଥିଲା  ।

ଫଳରେ ଗାଡ଼ିରେ ଥିବା ୨୦ଜଣଙ୍କ ମଧ୍ୟରୁ  ୧୦ ଜଣ ଆହତ ହୋଇଛନ୍ତି । ସମସ୍ତଙ୍କୁ ବସ୍ତା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି  । ୮ଜଣଙ୍କ ଅବସ୍ଥା ଗୁରୁତର ହେବାରୁ ବାଲେଶ୍ଵର ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି ।

ଭବାନୀପାଟଣା: ମୋବାଇଲ କ୍ୟାମେରାରେ କଏଦ ହେଲା ଜୁନାଗଡ଼ ଲାଇଭ ଲୁଟର ଚିତ୍ର । ଆକ୍ରମଣ ଏବଂ ଲୁଟ ବେଳର ଫଟୋ ଉଠାଇଥିଲେ ଆକ୍ରମଣରେ ମୃତ୍ୟୁ ହୋଇଥିବା ଯୁବକ ବଳଭଦ୍ର ନାୟକ । ନନ୍ଦିଘୋଷ ଟିଭି ହାତରେ ଲାଗିଛି ଏହି ଏକ୍ସକ୍ଲୁସିଭ ଫଟୋ ।

କଳାହାଣ୍ଡି ଜିଲ୍ଲାରେ ଘଟିଛି ଏଭଳି ନୃଶଂସ ଘଟଣା । ଜୁନାଗଡ ବୋରଗୁଡା ଜଙ୍ଗଲ ରାସ୍ତାରେ ହୋଇଥିଲା ଏହି ଲୁଟ । ଲୁଟେରାଙ୍କ ଆକ୍ରମଣରେ ବଳଭଦ୍ର ନାୟକଙ୍କ ମୃତ୍ୟୁ ହୋଇଥିବା ବେଳେ ତାଙ୍କ ବାପା କ୍ଷୀତି ନାୟକ ଗୁରୁତର  ହୋଇଛନ୍ତି । ଭବାନୀପାଟଣା ମେଡିକାଲାରେ ତାଙ୍କ ଚିକିତ୍ସା ଚାଲିଛି ।

ଘଟଣା ଅନୁଯାଇ ବରଗୁଡା ଗାଁର କ୍ଷିତ ନାୟକ ଏବଂ ତାଙ୍କ ପୁଅ ବଳଭଦ୍ର ନାୟକ କପା ବିକ୍ରୀର ୬ ଲକ୍ଷ ଟଙ୍କା କାଢିବା ପାଇଁ  ଭବାନୀପାଟଣା  ଏଚ୍‌ଡିଏଫ୍‌ସି ବ୍ୟାଙ୍କରୁ ଯାଇଥିଲେ । ବ୍ୟାଙ୍କରୁ ଟଙ୍କା ଉଠାଇ ଘରକୁ ଫେରିବା ବେଳେ ତାଙ୍କୁ ୩ ଦୁର୍ବୃତ୍ତ ପିଛା କରିଥିଲେ । ବୋରଗୁଡା ନିକଟ ଜଙ୍ଗଲ ରାସ୍ତାର ଅନ୍ଧାରର ସୁଯ଼ୋଗ ନେଇ ଦୁର୍ବୃତ୍ତ ମାନେ ବନ୍ଧୁକ ଏବଂ ଧାରୁଆ ଅସ୍ତ୍ରରେ ଉଭୟ ବାପା ପୁଅଙ୍କ ଉପରେ ଅକ୍ରମଣ କରିଥିଲେ ।

ଏବଂ ଦୁହିଁଙ୍କ ୬ ଲକ୍ଷ ଲୁଟ କରି ଚମ୍ପଟ ମାରିଥିଲେ । ସ୍ଥାନୀୟ ଲୋକେ ଦୁହିଁଙ୍କୁ ଉଦ୍ଧାର କରି ଜୁନାଗଡ଼ ମେଡିକାଲରେ ଭର୍ତ୍ତି କରାଇଥିଲେ । ହେଲେ ଅବସ୍ଥା ଗରୁତର ହେବାରୁ କ୍ଷିତ ଏବଂ ବଳଭଦ୍ରଙ୍କୁ ଭବାନୀପାଟଣା ସ୍ଥାନାନ୍ତର କରାଯାଇଥିଲା । ହେଲେ ସେଠାରେ ଚିକିତ୍ସାଧିନ ଅବସ୍ଥାରେ ବଳଭଦ୍ରର ମୃତ୍ୟୁ ହୋଇଥିଲା । ସେପଟେ ଘଟଣା ସ୍ଥଳରେ ଜୁନାଗଡ଼ ପୋଲିସ ପହଞ୍ଚି ତଦନ୍ତ ଜାରି ରଖିଛି । ଘଟଣା ସ୍ଥଳରୁ ଗୋଟିଏ ଦେଶୀ ବନ୍ଧୁକ ଜବତ କରିଛି ପୋଲିସ  ।

ପୁରୀ: ଆଜି ପବିତ୍ର ପୌଷ ପୂର୍ଣ୍ଣିମା ଅବସରରେ ଶ୍ରୀମନ୍ଦିରରେ ମହାପ୍ରଭୁଙ୍କ ପୁଷ୍ୟାଭିଷେକ ନୀତି ଅନୁଷ୍ଠିତ  ହେବ | ରତ୍ନସିଂହାସନରେ ବିରାଜିତ ଦାରୁବିଗ୍ରହ ସୁନାବେଶରେ ସଜ୍ଜିତ ହୋଇ ଭକ୍ତଙ୍କୁ ଦର୍ଶନ ଦେବେ |

ପୌରାଣିକ ତଥ୍ୟ ଅନୁଯାୟୀ ପ୍ରଭୁ ରାମଚନ୍ଦ୍ର ୧୪ ବର୍ଷ ବନବାସ ପରେ ଅଯୋଧ୍ୟାକୁ ପ୍ରତ୍ୟାବର୍ତନ କରି ପୌଷ ପୂର୍ଣ୍ଣମୀ ତିଥିରେ ସିଂହାସନରେ ଅଭିଷିକ୍ତ ହୋଇଥିଲେ | ସେହି ସ୍ମୃତିରେ ଶ୍ରୀମନ୍ଦିରରେ ପ୍ରତିବର୍ଷ ଆଜିର ଏହି ପବିତ୍ର ତିଥିରେ ମହାପ୍ରଭୁଙ୍କ ଅଭିଷେକ ଉତ୍ସବ ଅନୁଷ୍ଠିତ ହୋଇଥାଏ |

ଅନ୍ୟପଟେ ଆଜି ପୌଷ ପୂର୍ଣ୍ଣମୀ ତିଥିରେ ସମୁଦ୍ର ଆଳତୀ କରାଯିବ | ଜଗତଗୁରୁ ଶଙ୍କରାଚାର୍ଯ୍ୟ ଜଗତରେ ବା ସାରା ବିଶ୍ୱରେ ଶାନ୍ତି ଓ ମୈତ୍ରୀ ପ୍ରତିଷ୍ଠା ନିମନ୍ତେ  ଆଜି ସନ୍ଧ୍ୟାରେ ସମୁଦ୍ର ଆଳତୀ ମଧ୍ୟ କରିବେ |

ପାରାଦୀପ: ପାରାଦୀପ ବନ୍ଦରର ୫ ନମ୍ବର ଗେଟ୍ ପିଆଇସିଟି ବର୍ଥରେ ଶ୍ରମିକ ଅଶାନ୍ତି । ପିଆଇସିଟି କମ୍ପାନୀ ପକ୍ଷରୁ ଏଠାରେ ଶ୍ରମିକ ମାନଙ୍କୁ ଶୋଷଣ କରାଯାଉଥିବା ଅଭିଯୋଗ ହୋଇଛି । ୨ରୁ ୩ ମାସରେ ଥରେ ଦରମା ମିଳୁଥିବା ବେଳେ ସେମାନଙ୍କ ଇପିଏଫ୍ ଓ ଇଏସ୍ଆଇ କଟୁଥିଲେ ମଧ୍ୟ ସେମାନଙ୍କୁ ଏହାର ରେକର୍ଡ ପତ୍ର ପ୍ରଦାନ କରାଯାଉନାହିଁ ।

ଫଳରେ ଶ୍ରମିକ ମାନେ ମେଡିକାଲ ସୁବିଧା ପାଇବାରୁ ବଞ୍ଚିତ ହେଉଛନ୍ତି । ଖାଲି ସେତିକି ନୁହେଁ ଯଦି କୌଣସି ଶ୍ରମିକ ଏହାର ପ୍ରତିବାଦ କରୁଛି, ତେବେ ତାଙ୍କୁ ଚାକିରୀରୁ ବାହାର କରିଦିଆଯାଉଥିବା ଅଭିଯୋଗ ହୋଇଛି ।

ଏପରିକି ଶ୍ରମିକ ମାନଙ୍କୁ ସେଫ୍ଟି ସାମଗ୍ରୀ ମଧ୍ୟ ଦିଆଯାଉନାହିଁ । ଯାହାକୁ ନେଇ ଶ୍ରମିକ ମାନେ ଆଜି ସକାଳୁ ଗେଟ ସମ୍ମୁଖରେ ଧାରଣା ଦେବା ସହିତ ପିଆଇସିଟି ବର୍ଥକୁ ସମ୍ପୂର୍ଣ୍ଣ ଅଚଳ କରିଦେଇଛନ୍ତି । ଯେପର୍ଯ୍ୟନ୍ତ ଦାବି ପୂରଣ ହୋଇନି ଧାରଣା ଜାରି ରହିବ ବୋଲି ଶ୍ରମିକ ମାନେ ପ୍ରକାଶ କରିଛନ୍ତି।