ଟି-୨୦ ବିଶ୍ବକପ୍: ହୋଇପାରେ ଭାରତ-ପାକ୍ ମ୍ୟାଚ୍, ୨୪ ଘଣ୍ଟାରେ ପାକିସ୍ତାନ ବଦଳାଇବ ନିଷ୍ପତ୍ତି

ନନ୍ଦଘୋଷ ବ୍ୟୁରୋ: ଟି-୨୦ ବିଶ୍ବପକରେ ଭାରତ ସହ ଖେଳିବାକୁ ପାକିସ୍ତାନ ମନା କରିଛି । ପାକିସ୍ତାନର ଏହି ନିଷ୍ପତ୍ତି ପରେ କ୍ରିକେଟ ଜଗତରେ ଚର୍ଚ୍ଚା ଆରମ୍ଭ ହୋଇଯାଇଛି । ଆଇସିସି ପାକିସ୍ତାନ କ୍ରିକେଟ କଣ୍ଟ୍ରୋଲ ବୋର୍ଡକୁ ଚେତାବନୀ ଦେଇ ଏମିତି କଲେ ଗମ୍ଭୀର ପରିଣାମ ଭୋଗିବାକୁ ପଡ଼ିବ ବୋଲି ଚେତାବନୀ ଦେଇଛି । ଆଉ ଏହାରି ଭିତରେ ପାକିସ୍ତାନର ପୂର୍ବତନ ଅଧିନାୟକ ରାଶିଦ ଲତିଫଙ୍କ ଏକ ବୟାନ ଆସିଛି । ସେ ଦାବି କରିଛନ୍ତି, ଭାରତ ବିପକ୍ଷରେ ନଖେଳିବାର ନିଷ୍ପତ୍ତି ପାକିସ୍ତାନ ବଦଳାଇ ପାରେ । ଭାରତୀୟ ଗଣମାଧ୍ୟମ ସହ ସାକ୍ଷାତକାର ବେଳେ ସେ ଏମିତି କହିବା ସହ ୟୁ-ଟର୍ଣ୍ଣ ନେବାର ଅଭ୍ୟାସ ପାକିସ୍ତାନର ରହିଛି ବୋଲି କହିଛନ୍ତି ।

ପାକିସ୍ତାନ ବଦଳାଇ ପାରେ ନିଷ୍ପତ୍ତି

ଟାଇମ୍ସ ଅଫ ଇଣ୍ଡିଆ ସହ ଆଲୋଚନା ବେଳେ ରାଶିଦ ଲତିଫ କହିଛନ୍ତି, ପାକିସ୍ତାନ ନିଜ ନିଷ୍ପତ୍ତି ଫେରାଇ ନେଇପାରେ । ସେ କହିଛନ୍ତି, ‘ଆମର ଏଠାରେ ଏମିତି ହୋଇଥାଏ । ଏଠାରେ ତ ସମସ୍ୟା ରହିଛି । ହୋଇପାରେ ପରଦା ପଛରେ ଏନେଇ ଆଲୋଚନା ଚାଲିଥିବ । ଦୁଇ ଦେଶର ସରକାର ହୁଏତ ଏନେଇ ଆଲୋଚନା କରୁଥିବେ । ଏହା ଆମକୁ ଦେଖାଯାଉନି । ହେଲେ, ଏମିତି ହୋଇଥାଏ । ଆଗାମୀ ୨୪ ଘଣ୍ଟାରେ କିଛି ବି ହୋଇପାରେ ।’

ରାଶିଦଙ୍କ ଏପରି ବୟାନରୁ ଗୋଟିଏ କଥା ଜଣାପଡୁଛି, ପାକିସ୍ତାନ ଟି-୨୦ ବିଶ୍ବକପ୍ ପୂର୍ବରୁ ଜାଣିଶୁଣି ଏମିତି ସ୍ଥିତି ସୃଷ୍ଟଇ କରୁଛି । ପିସିବି ମୁଖ୍ୟ ମୋହସିନ ନକଓ୍ବି ଟି-୨୦ ବିଶ୍ବକପ ବାହାନାରେ ନିଜର ରାଜନୈତିକ ରୁଟଇ ସେକୁଛନ୍ତି । ଏମିତି ନିଷ୍ପତ୍ତି ପାଇଁ ତାଙ୍କୁ ପାକିସ୍ତାନରେ ଲୋକପ୍ରିୟତା ମିଳୁଛି ।

ପାକିସ୍ତାନର କ’ଣ କ୍ଷତି ହେବ ?

ଯଦି ପାକିସ୍ତାନ ଭାରତ ବିପକ୍ଷ ମ୍ୟାଚ୍ ବୟକଟ କରେ ତେବେ ତାକୁ ବଡ଼ ଧରଣର କ୍ଷତି ହୋଇପାରେ । ପ୍ରଥମେ ତ ପାକିସ୍ତାନକୁ କୋଟଇ କୋଟି ଟଙ୍କାର କ୍ଷତି ହେବ । ଯାହା ତାକୁ ଆଇସିସି ଇଭେଣ୍ଟରେ ସାମିଲ ହେବା ପାଇଁ ମିଳିଥାନ୍ତା । ଏହାବାଦ ଆଇସିସିରୁ ପାକିସ୍ତାନକୁ ମିଳୁଥିବା ବାର୍ଷିକ ରେଭିନ୍ୟୁ ବି ମିଳିବ ନାହିଁ । ସେତିକି ନୁହେଁ ଦ୍ବିପେକ୍ଷିକ ଟୁର୍ଣ୍ଣାମେଣ୍ଟରୁ ପାକିସ୍ତାନକୁ ସସପେଣ୍ଡ କରାଯାଇପାରେ । ଏସିଆ କପରୁ ବି ପାକିସ୍ତାନକୁ ବାହାର କରାଯାଇପାରେ । ୨୦୨୮ ଟି-୨୦ ବିଶ୍ବକପ୍ ଆୟୋଜନ ପାକିସ୍ତାନ ପାଖରୁ ଫେରାଇ ନିଆଯାଇପାରେ । ଏତିକିରେ କଥା ସରିନି, ବିଦେଶୀ ବୋର୍ଡ ସେମାନଙ୍କ ଖେଳାଳିଙ୍କୁ ପିଏସଏଲରେ ଖେଳିବାକୁ ଏନଓସି ଦେବେ ନାହିଁ । ଏବେ ଦେଖିବାକୁ ବାକି ରହିଲା ଏତେଗୁଡିଏ ଆକ୍ସନର ଆଶଙ୍କା ଥାଇ କ’ଣ ପାକିସ୍ତାନ, ଭାରତ ବିପକ୍ଷ ମ୍ୟାଚ୍ ବୟକଟ କରିବ ।