ନନ୍ଦିଘୋଷ ବ୍ୟୁରୋ: ବରିଷ୍ଠ କଂଗ୍ରେସ ନେତ୍ରୀ ସୋନିଆ ଗାନ୍ଧି ଅସୁସ୍ଥ । ସିମଲାରେ ଅସୁସ୍ଥ ହେଲେ କଂଗ୍ରେସ ସଂସଦୀୟ ଦଳ ଅଧ୍ୟକ୍ଷା ସୋନିଆ ଗାନ୍ଧି । ତାଙ୍କୁ ସିମଲାସ୍ଥିତ ଆଇଜିଏମସି ହସ୍ପିଟାଲରେ ଭର୍ତ୍ତି କରାଯାଇଛି । ସେଠାରେ ତାଙ୍କର MRI କରାଯାଇଛି ।
ସୋନିଆଙ୍କ ସ୍ଵାସ୍ଥ୍ୟାବସ୍ଥା ସ୍ଥିର ଥିବା ସୂଚନା ମିଳିଛି । ଗତ ଫେବୃଆରୀରେ ହସ୍ପିଟାଲରେ ଭର୍ତ୍ତି ହୋଇଥିଲେ ସୋନିଆ । ଦିଲ୍ଲୀର ସାର୍ ଗଙ୍ଗାରାମ ହସ୍ପିଟାଲରେ ହୋଇଥିଲା ତାଙ୍କ ଚିକିତ୍ସା ।
ନନ୍ଦିଘୋଷ ବ୍ୟୁରୋ: ପାର୍ଟ ପ୍ଲଟ କିଣାବିକା ନେଇ ସରକାରଙ୍କ ନିର୍ଦ୍ଦେଶକୁ ଅଧିକାରୀଙ୍କ ଅଣଦେଖା । ତିନି ଶହ ଅଧିକାରୀଙ୍କୁ କାରଣ ଦର୍ଶାଅ ନୋଟିସ, ହେଲେ କାର୍ଯ୍ୟାନୁଷ୍ଠାନ ହୋଇନି । ଫଳରେ ସହରରେ ଆପାର୍ଟମେଣ୍ଟ କିଣାବିକା ୨ ବର୍ଷ ହେଲା ବନ୍ଦ । ମାମଲା ଅଦାଲତରେ ଥିବା ବେଳେ ସରକାର କେବଳ ସମୟ ଗଡ଼େଇ ଚାଲିଛନ୍ତି । ପାର୍ଟ ପ୍ଲଟ ରେଜିଷ୍ଟ୍ରେସନ ନେଇ ମଧ୍ୟ ବାଟ ଫିଟୁନାହିଁ । ଯାହାକୁ ନେଇ ପ୍ରଶ୍ନ ଉଠାଇଛନ୍ତି ରିଅଲ ଇଷ୍ଟେଟ ଆକ୍ଟିଭିଷ୍ଟ ।
ସରକାରଙ୍କ ନିର୍ଦ୍ଦେଶକୁ ଫୁ କରିଦେଉଛନ୍ତି ବାବୁ । ବିନା ଲେ-ଆଉଟ ଅନୁମୋଦନରେ ପାର୍ଟ ପ୍ଲଟ ରେଜିଷ୍ଟ୍ରେସନ ହେବନି । ହେଲେ ଏହି ନିୟମକୁ ମାନୁନାହାନ୍ତି ଅଧିକାରୀ । ୨ ବର୍ଷରେ ୩ ଲକ୍ଷ ବେଆଇନ ପାର୍ଟ ପ୍ଲଟ ରେଜିଷ୍ଟ୍ରେସନ ହୋଇଛି । ସରକାରଙ୍କ ନିର୍ଦ୍ଦେଶକୁ ବେଖାତିର କରି ଏପରି କରିଥିବା ୩ ଶହ ପଞ୍ଜୀକରଣ ଅଧିକାରୀଙ୍କୁ କାରଣ ଦର୍ଶାଅ ନୋଟିସ ଜାରି କରିଛନ୍ତି ସରକାର । ହେଲେ ଦାୟୀ ଅଧିକାରୀଙ୍କ ବିରୋଧରେ କାହିଁକି କାର୍ଯ୍ୟାନୁଷ୍ଠାନ ହେଉନି ତାକୁ ନେଇ ପ୍ରଶ୍ନ ଉଠାଇଛନ୍ତି ରିୟଲ ଇଷ୍ଟେଟ ଆକ୍ଟିଭିଷ୍ଟ । ସେପଟେ ୨ ବର୍ଷ ହେଲାଣି ବନ୍ଦ ପଡ଼ିଛି ପାର୍ଟ ପ୍ଲଟ ପଞ୍ଜୀକରଣ । ଅକୁପ୍ଯାନସି ସାର୍ଟିଫିକେଟ ଓ କମ୍ପ୍ଲିସନ ସାର୍ଟିଫିକେଟ ଦ୍ବନ୍ଦ୍ବ ହଟୁ ନଥିବାରୁ ଅଦାଲରେ ମାମଲା ଗଡ଼ି ଚାଲିଛି । ଏଭଳି ସ୍ଥିତିରେ ସହରୀ ବିକାଶ ଯୋଜନାରେ ସ୍ବଚ୍ଛତା ନେଇ ବିଭାଗୀୟ ମନ୍ତ୍ରୀଙ୍କ ଦାବି ଖାଲି ଘୋଷଣାରେ ରହିଯିବ ବୋଲି ଆଶଙ୍କା ପ୍ରକାଶ ପାଇଛି ।
ପାର୍ଟ ପ୍ଲଟ ରେଜିଷ୍ଟ୍ରେସନ ହେଉନାହିଁ । ଲେ-ଆଉଟ ଅନୁମୋଦନ ସରଳ ଓ ସହଜ କରିବାକୁ ବାଟ ବାହାରୁନି । ଆପାର୍ଟମେଣ୍ଟ କିଣାବିକା ବନ୍ଦ ହୋଇଥିବାରୁ ରିଏଲ ଇଷ୍ଟେଟ ସେକ୍ଟରର ଭବିଷ୍ୟତ ବି ସନ୍ଦେହରେ । ଟାଉନ ପ୍ଲାନିଂ ସ୍କିମ ଜୋରଦାର କରିବାକୁ ସରକାର ଅଣ୍ଟା ଭିଡ଼ିଥିବା ବେଳେ ଜମି ମାଲିକ ବିଭିନ୍ନ ଜାଗାରେ ଏହାକୁ ବିରୋଧ କରୁଛନ୍ତି । ଭୁବନେଶ୍ବର ସହିତ କଟକର ପ୍ରଥମ ଟାଉନ ପ୍ଲାନିଂ ଯୋଜନାକୁ ଗ୍ରାମବାସୀ ବିରୋଧ କରିଛନ୍ତି । ପାର୍ଟ ପ୍ଲଟ ଓ ଆପାର୍ଟମେଣ୍ଟ କିଣାବିକା ନେଇ ଏକମାସ ଭିତରେ ବାଟ ବାହାର କରିବାକୁ ଗତ ଜାନୁଆରୀରେ ରାଜସ୍ବ ମନ୍ତ୍ରୀ ପ୍ରତିଶ୍ରୁତି ଦେଇଥିଲେ । ହେଲେ ତାହା ଏ ପର୍ଯ୍ୟନ୍ତ ଦେଖିବାକୁ ମିଳିନି ।
ସ୍ବଚ୍ଛ ସୁନ୍ଦର ଓ ଯୋଜନାବଦ୍ଧ ସହର ପାଇଁ ଡେଭଲପମେଣ୍ଟ ଆକ୍ଟ ଓ ରେରା ଆଇନ ପାଳନ ଜରୁରୀ । ଦ୍ବନ୍ଦ୍ବ ଦୂର କରିବାକୁ ଆଇଜିଆର୍ ଦୀର୍ଘ ଦିନରୁ ସରକାରଙ୍କୁ କୈଫିୟତ ମାଗିଥିଲେ ବି ରାଜସ୍ବ ବିଭାଗ ଚୁପ୍ ବସିଛି ।
ନନ୍ଦିଘୋଷ ବ୍ୟୁରୋ: ରାଜଧାନୀରେ ରାଜ୍ୟ ବିଜେପି ସରକାର ବିରୋଧରେ ବିଜେଡିର ରଣ ହୁଙ୍କାର । ଚାଷୀଙ୍କ ପାଇଁ ରାଜ ରାସ୍ତାକୁ ଆସିଲା ବିଜେଡି । ସରକାରଙ୍କୁ ଦେଲା ୨୪ ଘଣ୍ଟାର ମହଲତ । ଏହି ୨୪ ଘଣ୍ଟା ମଧ୍ୟରେ ଚାଷୀଙ୍କୁ ସେମାନଙ୍କ ଧାନ ବିକ୍ରି ଟଙ୍କା ପ୍ରଦାନ କରିବା ସହ ଦୋଷୀଙ୍କ ବିରୋଧରେ ଅପରାଧିକ ମାମଲା ରୁଜୁ କରିବାକୁ କଲା ଦାବି । ଭୁବନେଶ୍ୱରରେ ନବରଙ୍ଗପୁର ରାଇଘର ବ୍ଲକ ଚାଷୀ ଆନ୍ଦୋଳନରେ ଯୋଗ ଦେଇ ବିଜେଡି ଏପରି ଦାବି କରିଛି । ଏହାସହ ମୁଖ୍ୟମନ୍ତ୍ରୀ ନିଜେ ଘଟଣାରେ ହସ୍ତକ୍ଷେପ କରିବାକୁ ଦଳ ଦାବି କରିଛି । ସେପଟେ ଧାନ କିଣାରେ କିଛି କାଗଜପତ୍ର ଭୁଲ ଥିବାରୁ ଚାଷୀ ଟଙ୍କା ପାଇ ନଥିବା କହିଛନ୍ତି ସମବାୟ ମନ୍ତ୍ରୀ । ୪ ମାସ ହେବ ଧାନ ବିକ୍ରି କରି ଟଙ୍କା ପାଇ ନଥିବାରୁ ରାଜଧାନୀରେ ଅହୋରାତ୍ର ଧାରଣା ଦେଇଛନ୍ତି ଚାଷୀ ।
ସରକାରଙ୍କୁ ଧାନ ବିକି ଚାଷୀ ହତାଶ । ଧାନ ମୂଲ୍ୟ ପାଇବାକୁ ରାଜାଧାନୀରେ ଦେବାକୁ ପଡ଼ିଛି ଅହୋରାତ୍ର ଧାରଣା । ଧାନ ବିକିବାର ୪୮ ଘଣ୍ଟାରେ ଟଙ୍କା ଆକାଉଣ୍ଟକୁ ଆସିବା କଥା । ହେଲେ ନବରଙ୍ଗପୁର ଜିଲ୍ଲା ରାଇଘରର ୩୪୪ ଜଣ ଚାଷୀ ପାଇନାହାନ୍ତି ୪ କୋଟି ୪୧ ଲକ୍ଷ ୮୨ ହଜାର ୮୨୨ ଟଙ୍କା । କେବେ ପାଇବେ ? କାହିଁକି ବିଳମ୍ବ ହେଲା ? ଏଥିପାଇଁ ଦାୟୀ କିଏ ? ଏମିତି ପ୍ରଶ୍ନ ଛିଡ଼ା ହୋଇଛି । ୪ ମାସ ହେଲା ପ୍ରତିଶ୍ରୁତି ପରେ ପ୍ରତିଶ୍ରୁତି ମିଳୁଛି । ହେଲେ ବିକ୍ରି ଧାନର ଟଙ୍କା ମିଳୁନାହିଁ । ବ୍ଲକରୁ ଜିଲ୍ଲାପାଳଙ୍କ ଅଫିସ ଯାଏଁ ଦୌଡ଼ି ନୟାନ୍ତ ହେବା ପରେ ଚାଷୀ ରାଜଧାନୀକୁ ଆସିଛନ୍ତି । ଆଉ ଚାଷୀଙ୍କ ଦୁଃଖକୁ ସମର୍ଥନ କରିଆସୁଛି ବିଜେଡି । ଆଜି ଧାରଣା ସ୍ଥଳକୁ ଆସି ଚାଷୀଙ୍କୁ ୨୪ ଘଣ୍ଟାରେ ଟଙ୍କା ଦେବାକୁ ଦାବି କରିଛି ଦଳ । ଟଙ୍କା ଦେଇ ନଥିବା ଅଧିକାରୀଙ୍କ ବିରୋଧରେ ଅପରାଧିକ ମାମଲା ଋଜୁ କରିବାକୁ ଦଳର ବରିଷ୍ଠ ନେତା ଦାବି କରିଛନ୍ତି । ଟଙ୍କା ନଦେଲେ ଆନ୍ଦୋଳନରୁ ହଟିବୁ ନାହିଁ ବୋଲି କହିଛନ୍ତି ଚାଷୀ । ସରକାର ଚାଷୀଙ୍କ ପାଖରୁ ୧୪ ହଜାର ୨୫୨ କୁଇଣ୍ଟାଲ ଧାନ କିଣିଥିଲେ ।
ରାଇଘର ବ୍ଲକ ଚାଷୀଙ୍କ ଆନ୍ଦୋଳନ ସ୍ଥଳରେ ପହଞ୍ଚିଥିଲେ ବିଜେଡିର ବରିଷ୍ଠ ନେତା । ଚାଷୀଙ୍କ ପ୍ରାପ୍ୟ ତୁରନ୍ତ ପ୍ରଦାନ କରିବାକୁ ସରକାରଙ୍କୁ ଅପିଲ କରିଛନ୍ତି । ସେପଟେ ସମବାୟ ମନ୍ତ୍ରୀଙ୍କ କଥାରେ ଭରସା ନାହିଁ । ଏହି ଘଟଣାରେ ମୁଖ୍ୟମନ୍ତ୍ରୀ ତୁରନ୍ତୁ ହସ୍ତକ୍ଷେପ କରିବାକୁ ଦାବି କରିଛି ବିଜେଡି । ଅନ୍ୟପଟେ ସମବାୟ ମନ୍ତ୍ରୀ ପ୍ରଦୀପ ବଳସାମନ୍ତ କହିବା କଥା କାଗଜରେ କିଛି ଭୂଲ ଥିବାରୁ ସମ୍ପୃକ୍ତ ଚାଷୀଙ୍କୁ ଟଙ୍କା ମିଳିପାରିନାହିଁ ।
ନନ୍ଦିଘୋଷ ବ୍ୟୁରୋ: କମିଲା ଅନ୍ତ୍ୟୋଦୟ ଓ ପ୍ରଧାନମନ୍ତ୍ରୀ ଆବାସ ଯୋଜନାରେ ନୂତନ ଗୃହ ନିର୍ମାଣରେ ଦିଆଯାଉଥିବା ଆର୍ଥିକ ସହାୟତା । ଗରିବଙ୍କୁ ନୂଆ ଘର ଯୋଗାଇ ଦେବାକୁ ଯେଉଁ ସହାୟତା ରାଶି ଦିଆଯାଇଥିଲା ସେଥିରେ ୧୦ ହଜାର ଟଙ୍କା ହ୍ରାସ କରାଯାଇଛି । ଯାହାକୁ ନେଇ ପ୍ରଶ୍ନ ଉଠାଇଛି ବିଜେଡି । ବର୍ଷ ବର୍ଷ ଧରି ଦିଆଯାଉଥିବା ଅନ୍ତ୍ୟୋଦୟ ଓ ଆବାସ ଯୋଜନାର ଟଙ୍କାକୁ କାହିଁକି ହ୍ରାସ କରାଗଲା ବିଜେଡି ବିଧାୟକ ରମେଶ ବେହେରା ସରକାରଙ୍କୁ ପ୍ରଶ୍ନ କରିଛନ୍ତି । କଂଗ୍ରେସ କହିଛି, ସରକାର ଲୋକଙ୍କ କ୍ଷତି କରୁଛନ୍ତି ।
ଏଣିକି ଅନ୍ତ୍ୟୋଦୟ ଓ ପ୍ରଧାନମନ୍ତ୍ରୀ ଆବାସ ଯୋଜନାରେ ନୂତନ ଗୃହ ନିର୍ମାଣ କଲେ ହିତାଧିକାରୀଙ୍କୁ ମିଳିବନି ପୂର୍ବ ପରି ଆର୍ଥିକ ସହାୟତା । ପୂର୍ବରୁ ଅନ୍ତ୍ୟୋଦୟ ଯୋଜନାରେ ନୂତନ ଗୃହ ନିର୍ମାଣ ପାଇଁ ୧ ଲକ୍ଷ ୩୦ ହଜାର ଟଙ୍କା ଆର୍ଥିକ ସହାୟତା ହିତାଧିକାରୀଙ୍କୁ ମିଳୁଥିଲା । ଏବେ ଏଥିରେ ୧୦ ହଜାର ଟଙ୍କା ହ୍ରାସ କରାଯାଇଛି । ଫଳରେ ଗରିବ ଲୋକଟି କିପରି ସ୍ବପ୍ନର ଘର ନିର୍ମାଣ କରିବ ତାହାକୁ ନେଇ ଚିନ୍ତାରେ ପଡ଼ିଛି । ଦିନକୁ ଦିନ ସବୁ ଜିନିଷର ଦର ବୃଦ୍ଧି ଘଟି ଚାଲିଛି । ଗରିବ ଲୋକଙ୍କ ଘର ନିର୍ମାଣ କରିବାରେ ଆର୍ଥିକ ସହାୟତା ବଢାଇବା ପରିବର୍ତ୍ତେ ସରକାର କମାଇଥିବା ବିଜେଡି ବିଧାୟକ ରମେଶ ବେହେରା ଅଭିଯୋଗ କରିଛନ୍ତି । କାହିଁକି ଓ କେଉଁ କାରଣରୁ ବିଜେପି ସରକାର ଗରିବଙ୍କ ଘର ନିର୍ମାଣ ଟଙ୍କା କାଟିଲା ତାକୁ ନେଇ ଶାସକ ଦଳକୁ ଘେରିଛି ବିଜେଡି । ତୁରନ୍ତ ପୂର୍ବପରି ଅନ୍ତ୍ୟୋଦୟ ଯୋଜନାରେ ଗୃହ ନିର୍ମାଣ ପାଇଁ ୟୁନିଟ କଷ୍ଟ ୧ ଲକ୍ଷ ୩୦ ହଜାର ଟଙ୍କା ଦେବାକୁ ଦାବି କରିଛି ବିଜେଡି । ବିଧାୟକ ରମେଶ ବେହେରା କହିଛନ୍ତି, ଟଙ୍କା ହ୍ରାସ ଯୋଗୁଁ ହିତାଧିକାରୀ ଘର ସମ୍ପୂର୍ଣ୍ଣ କରିବାରେ ସଫଳ ହୋଇପାରୁନାହାଁନ୍ତି ।
ସମସ୍ତଙ୍କୁ ପକ୍କା ଘର ଯୋଗାଇ ଦେବାକୁ ପୂର୍ବ ସରକାର ଅନ୍ତ୍ୟୋଦୟ ଯୋଜନା ମାଧ୍ୟମରେ ଗରିବ ଲୋକଙ୍କୁ ଘର ଯୋଗାଇ ଦେଇଥିଲେ । ଅନ୍ତ୍ୟୋଦୟ ଯୋଜନାରେ ଭିନ୍ନକ୍ଷମ, ବିଧବା, ସହିଦ, ପଦ୍ମଶ୍ରୀ ପୁରସ୍କାର ପାଇଥିବା ପରିବାର, ଅଗ୍ନିକାଣ୍ଡ କ୍ଷତିଗସ୍ତ ଲୋକଙ୍କୁ ପକ୍କାଘର ଯୋଗାଇ ଦିଆଯାଇଛି । ଏପରି ସ୍ଥିତିରେ ରାଜ୍ୟ ସରକାରଙ୍କ ଆଭିମୁଖ୍ୟକୁ ସମାଲୋଚନା କରିଛି କଂଗ୍ରେସ । ବିଜେପି କାହିଁକି ଲୋକଙ୍କ ମୁଣ୍ଡ ଉପରୁ ଛାତ ଘର ଛଡ଼ାଇ ନେବାକୁ ବ୍ୟବସ୍ଥା କରୁଛି ବୋଲି କଂଗ୍ରେସ ପ୍ରଶ୍ନ କରିଛି । ତେଣେ ବିଜେପି ବିଧାୟକ ଈରାଶିଷ ଆଚାର୍ଯ୍ୟ କହିଛନ୍ତି, ଗରିବ ଲୋକଙ୍କୁ ବିଭିନ୍ନ ଯୋଜନାରେ ରାଜ୍ୟ ସରକାର ଘର ଯୋଗାଇ ଦେଉଛନ୍ତି ।
ନନ୍ଦିଘୋଷ ବ୍ୟୁରୋ: ଗୋଳନ୍ଥରାରେ ଦୁଇ ନାବାଳିକା ଗଣଦୁଷ୍କର୍ମ ମାମଲାରେ ଗିରଫ ହେଲେ ୪ ଅଭିଯୁକ୍ତ । ଗତ ୩ ତାରିଖରେ ଗଣ ଦୁଷ୍କର୍ମ କରି ଫେରାର ହୋଇଯାଇଥିଲେ । ଗତକାଲି ଆନ୍ଧ୍ରପ୍ରଦେଶର ଏକ ହୋଟେଲରୁ ସେମାନଙ୍କୁ ଗିରଫ କରିଛି ପୋଲିସ । ସେପଟେ ଗଞ୍ଜାମ ଜିଲ୍ଲାରେ ଦିନକୁ ଦିନ ଅପରାଧିକ କାର୍ଯ୍ୟକଳାପ ବଢିବା ଓ ଗଣ ଦୁଷ୍କର୍ମରେ ପୀଡ଼ିତ ନାବାଳିକାଙ୍କୁ ଉପଯୁକ୍ତ ନ୍ୟାୟ ଦେବା ଦାବିରେ ବିଜେଡିର ଏକ ଫ୍ୟାକ୍ଟ ଫାଇଣ୍ଡିଂ ଟିମ୍ ବ୍ରହ୍ମପୁର ଏସପିଙ୍କୁ ସାକ୍ଷାତ କରି ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରିଛନ୍ତି ।
ଗଞ୍ଜାମ ଜିଲ୍ଲାର ଗୋଳନ୍ଥରାରେ ଘଟିଥିଲା ଲଜ୍ଜ୍ୟାଜନକ ଘଟଣା । ଦୁଇଜଣ ନାବାଳିକା ଏକ ଶୁଭକାର୍ଯ୍ୟରେ ଯାଇଥିବା ବେଳେ ୪ ଜଣ ଯୁବକ ଦୁଇଟି ବାଇକରେ ସେମାନଙ୍କୁ ଉଠାଇ ନେଇଥିଲେ । ଦୁଇ ଦିନ ଅଟକ ରଖି ଅଭିଯୁକ୍ତମାନେ ତାଙ୍କୁ ଗଣ ଦୁଷ୍କର୍ମ କରିଥିଲେ । ଏନେଇ ପରିବାର ଲୋକଙ୍କ ଗୋଳନ୍ଥରା ଥାନାରେ ଲିଖିତ ଏତଲା ପରେଅଭିଯୁକ୍ତମାନେ ଫେରାର ହୋଇ ଆନ୍ଧ୍ର ପ୍ରଦେଶର ଏକ ହୋଟେଲରେ ଲୁଚି ଥିଲେ । ୪ ଦିନର ଲୁଚକାଳି ଖେଳ ପରେ ଆନ୍ଧ୍ରପ୍ରଦେଶରୁ ସେମାନଙ୍କୁ ପୋଲିସ ଧରିଛି । ସେପଟେ ଦୁଇ ନାବାଳିକାଙ୍କ ଏମକେସିଜି ମେଡିକାଲରେ ଡାକ୍ତରୀ ପରୀକ୍ଷା କରାଯାଇଥିବା ବେଳେ ପୀଡ଼ିତାଙ୍କ ବୟାନ ରେକର୍ଡ କରାଯାଇଛି l
ସୂଚନାଯୋଗ୍ୟ, ଦିନକୁ ଦିନ ଅଶାନ୍ତ ହେବାରେ ଲାଗିଛି ଗଞ୍ଜାମ । ଲୋକେ ନିଜକୁ ସୁରକ୍ଷିତ ମଣୁ ନାହାନ୍ତି । ପ୍ରତିଦିନ ଜିଲ୍ଲାର କେଉଁଠୁ ନା କେଉଁଠୁ ହତ୍ୟା, ଦୁଷ୍କର୍ମ ଅଭିଯୋଗ ଆସୁଛି । ଚୋରି, ଡକାୟତି ଓ ଛିନତାଇ ତ ସାଧାରଣ ଘଟଣା ହୋଇଗଲାଣି । ବାରମ୍ବାର ଏପରି ଘଟଣା ଘଟିବାକୁ ନେଇ ମୁଖ୍ୟ ବିରୋଧୀ ଦଳ ବିଜେଡି ଆଜି ଜିଲ୍ଲା ପୋଲିସ ପ୍ରଶାସନକୁ ଫେରାଦ ହୋଇଛି । ବିଜେଡି ସଭାପତିଙ୍କ ନିର୍ଦ୍ଦେଶରେ ଏକ ପ୍ରତିନିଧି ଦଳ ବ୍ରହ୍ମପୁର ଏସପିଙ୍କୁ ସାକ୍ଷାତ କରିଛି । ମହିଳାଙ୍କ ସୁରକ୍ଷା ନେଇ ସରକାର ଯେଉଁ ପ୍ରତିଶ୍ରୁତି ଦେଇଥିଲେ ତାହା ବାସ୍ତବରେ ପ୍ରତିଫଳନ ହେଉନି । ଥାନାଗୁଡ଼ିକରେ ପେଟ୍ରୋଲିଂ ଜାରଦାର କରିବା ସହ ମହିଳା ଓ ଶିଶୁ ଡେକ୍ସକୁ ଅଧିକ କ୍ରିୟାଶୀଳ କରିବାକୁ ଦଳ ପରାମର୍ଶ ଦେଇଛି । ସେହିପରି ପୀଡିତା ଓ ସେମାନଙ୍କ ପରିବାରକୁ ଉପଯୁକ୍ତ ନ୍ୟାୟ ଦାବି କରିଛି ଦଳ ।
ନନ୍ଦିଘୋଷ ବ୍ୟୁରୋ: ଦେଶରେ କୋଭିଟ ସଂକ୍ରମଣ ବଢ଼ିବାରେ ଲାଗିଛି । ପ୍ରତିଦିନ ନୂଆ ନୂଆ ସଂକ୍ରମିତ ଚିହ୍ନଟ ହେଉଛନ୍ତି । ଏମିତି ସ୍ଥିତିରେ ଓଡ଼ିଶା ମଧ୍ୟ କୋଭିଡକୁ ନେଇ ସଜାଗ ରହିଛି । ଏହି କ୍ରମରେ କ୍ୟାପିଟାଲ ହସ୍ପିଟାଲ ପାଇଁ ଆସିଛି କୋଭିଡ ମାର୍ଗଦର୍ଶିକା ।
ଏନେଇ ସୂଚନା ଦେଇଛନ୍ତି କ୍ୟାପିଟାଲ ହସପିଟାଲ ଡେପୁଟି ସୁପରିଟେଣ୍ଡେଣ୍ଟ ଡାକ୍ତର ଧନଞ୍ଜୟ ଦାସ । ସେ କହିଛନ୍ତି, କ୍ୟାପିଟାଲ ହସ୍ପିଟାଲ ପାଇଁ କେଭିଡ ମାର୍ଗଦର୍ଶିକା ଆସିଛି । ଅକ୍ସିଜେନ ମକ ଡ୍ରିଲ ହୋଇଛି । ସ୍ୱତନ୍ତ୍ର ବେଡ ମହଜୁଦ ରଖାଯାଇଛି । ଟେଷ୍ଟିଙ୍ଗ ବ୍ୟବସ୍ଥା ବି ଚାଲିଛି । ଯାହା ପୁରୁଣା ନିୟମ ଥିଲା ତାହା ଅନୁପାଳନ କରିବାକୁ ଲୋକଙ୍କୁ ପରାମର୍ଶ ଦେଇଛନ୍ତି ଡାକ୍ତର ଧନଞ୍ଜୟ ଦାସ ।
ସେ କହିଛନ୍ତି, ଆବଶ୍ୟକ ପଡିଲେ ମାସ୍କ ପିନ୍ଧନ୍ତୁ । ଏହି ଭୂତାଣୁ ଏତେ ମାରାତ୍ମକ ନୁହେଁ, ହେଲେ ସୁସ୍ଥ ହେବାକୁ ଟିକେ ବିଳମ୍ବ ହେଉଛି । ତେଣୁ ସତର୍କ ରହିବାକୁ ପରାମର୍ଶ ଦେଇଛନ୍ତି ଡାକ୍ତର ଦାସ ।
ନନ୍ଦିଘୋଷ ବ୍ୟୁରୋ: ଜୁନ ୧୨ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଓଡ଼ିଶା ଗସ୍ତ କାର୍ଯ୍ୟକ୍ରମରେ ହୋଇଛି ପରିବର୍ତ୍ତନ । ଏବେ ଜୁନ ୧୨ ତାରିଖ ନୁହେଁ, ଜୁନ ୨୦ ତାରିଖରେ ଓଡ଼ିଶା ଗସ୍ତରେ ଆସିବେ ପ୍ରଧାନମନ୍ତ୍ରୀ ।
ରାଜ୍ୟ ସରକାରଙ୍କ ବର୍ଷପୂର୍ତ୍ତି ପାଳନ ଉତ୍ସବରେ ଯୋଗ ଦେବାକୁ ସେ ୨୦ ତାରିଖରେ ଓଡ଼ିଶା ଆସିବେ । ତେଣୁ ୧୨ ତାରିଖର ମୂଳ କାର୍ଯ୍ୟକ୍ରମ ୨୦ତାରିଖକୁ ଘୁଞ୍ଚାଇ ଦିଆଯାଇଛି । ଏ ନେଇ ଆଜି ଚୂଡାନ୍ତ କାର୍ଯ୍ୟସୂଚୀ ଆସିବ ବୋଲି କହିଲେ ରାଜସ୍ବ ମନ୍ତ୍ରୀ ସୁରେଶ ପୂଜାରୀ ।
ଅନ୍ୟପଟେ ଯୋଗାଣ ମନ୍ତ୍ରୀ କହିଛନ୍ତି, ୧୨ ତାରିଖରେ ସମୟ ମଗାଯାଇଥିଲା । ହେଲେ ପ୍ରଧାନମନ୍ତ୍ରୀ ୨୦ ତାରିଖରେ ଆସିବେ । ସେପଟେ କେଉଁଠାରେ କାର୍ଯ୍ୟକ୍ରମ ହେବ ସ୍ଥାନ ଚିହ୍ନଟ ହୋଇନାହିଁ ବୋଲି କହିଛନ୍ତି ଯୋଗାଣ ମନ୍ତ୍ରୀ ।
ନନ୍ଦିଘୋଷ ବ୍ୟୁରୋ: ଆଇପିଏଲ ୨୦୨୫ ବିଜେତା ବେଙ୍ଗାଲୁରୁର ବିଜୟ ଉତ୍ସବ ବେଳେ ଦଳାଚକଟା ଘଟଣାର ବିଧିବଦ୍ଧ ତଦନ୍ତ ଦାୟିତ୍ବ ନେଲା ସିଆଇଡି । ଦଳାଚକଟାରେ ୧୧ ଜଣଙ୍କ ମୃତ୍ୟୁ ଘଟିଥିବା ବେଳେ ୫୦ରୁ ଅଧିକ ଆହତ ହୋଇଚନ୍ତି । ଚିନ୍ନାସ୍ବାମୀ ଷ୍ଟାଡିୟମରେ ଆରସିବିର ବିଜୟ ଉତ୍ସବ ପାଳନ ବେଳେ ଏହି ଘଟଣା ଘଟିଥିଲା ।
ତଦନ୍ତର ନେତୃତ୍ବ ନେଉଛନ୍ତି ସିଆଇଡି ଏସପି ଶୁଭନ୍ବିତା । ଟିମରେ ସଦସ୍ୟ ଅଛନ୍ତି ଡିଏସପି ଗୌତମ ଏବଂ ତଦନ୍ତକାରୀ ଅଧିକାରୀ ପୁରୁଷୋତ୍ତମ । ସିଆଇଡି ପକ୍ଷରୁ ଚିନ୍ନାସ୍ବାମୀ ଷ୍ଟାଡିୟମକୁ ନିଜ ନିୟନ୍ତ୍ରଣକୁ ନିଆଟାଇଛି । ପୂର୍ବରୁ ଏହି ଦଳାଚକଟା ଘଟଣାକୁ ନେଇ କୁବୋନ ପାର୍କ ପୋଲିସ ପକ୍ଷରୁ ଏକ ମାମଲା ରୁଜୁ କରାଯାଇଥିଲା । ପରେ ଘଟଣାର ତଦନ୍ତ ଭାର ସିଆଇଡିକୁ ଦିଆଯାଇଛି ।
ଷ୍ଟାଡିୟମର ଗେଟ ନମ୍ବର ୭, ୧୭, ୧୮, ୧୯ ଓ ୨୧ରେ ଘଟିଥିବା ଘଟଣା ସମ୍ପର୍କରେ ସିଆଇଡି ତଦନ୍ତ କରୁଛି । ଆସନ୍ତା ସୋମବାର ଆଉ କିଛି ବ୍ୟକ୍ତିଙ୍କୁ ଗିରଫ କରାଯିବ ବୋଲି ସୂଚନା ମିଳିଛି ।
ନନ୍ଦିଘୋଷ ବ୍ୟୁରୋ: ଜୁନ ୧୦ ଓ ୧୧ ତାରିଖକୁ ଅପେକ୍ଷା । ମହାକାଶରେ ଇତିହାସ ଲେଖିବାକୁ ଯାଉଛନ୍ତି ଜଣେ ଭାରତୀୟ ମହାକାଶଚାରୀ । ସେ ହେଉଛନ୍ତି ଭାରତର ମହାକାଶ ଯାତ୍ରୀ ଗ୍ରୁପର କ୍ୟାପଟେନ୍ ଶୁଭାଶୁଂ ଶୁକ୍ଲା । ଜୁନ ୧୧ ତାରିଖ ଅପରାହ୍ନ ୧୨ଟା ୩୦ରେ ସେ ଅନ୍ତରାଷ୍ଟ୍ରିୟ ମହାକାଶ ଷ୍ଟେସନ (ଆଇଏସଏସ)ରେ ପହଞ୍ଚିବେ । ଭାରତ ଓ ଆମେରିକାର ସହଯୋଗରେ ଚାଲିଥିବା ମିଶନ ଏକ୍ସ-୪ର ଏହା ଏକ ଅଂଶ । ଆସନ୍ତୁ ଜାଣିବା ଶୁଭାଶୁଂଙ୍କ ଏହି ଯାତ୍ରାକୁ ନେଇ ଟିକନିକ ଖବର ।
ସୂଚନାଯୋଗ୍ୟ, ଜୁନ ୮ ତାରିଖରେ ଏହି ମିଶନ ଆରମ୍ଭ ହେବାର ଥିଲା । ପାଗ ଖରାପ ଓ ମହାକାଶ ଯାନର ଅନ୍ତିମ ପ୍ରସ୍ତୁତିକୁ ନେଇ ଏହାର ସମୟ ବଦଳାଯାଇ ଜୁନ ୧୦ ତାରିଖ ରଖାଯାଇଛି । ନାଶା ଓ ସ୍ପେସ ଏକ୍ସ ଟିମ୍ ପକ୍ଷରୁ କୁହାଯାଇଛି ପାଗରେ ପରିବର୍ତ୍ତନ ଓ ଫାଲକନ-୯ ରକେଟ ଏବଂ ଡ୍ରାଗନ ଯାନର ପରିବହନ ପ୍ରକ୍ରିୟାକୁ ଧ୍ୟାନରେ ରଖି ଏହି ପରିବର୍ତ୍ତନ କରାଯାଇଛି । ଏବେ ଏହା ଜୁନ ୧୦ ତାରିଖରେ ଲଞ୍ଚ ହେବ ଓ ୧୧ ତାରିଖରେ ଆଇଏସଏସରେ ପହଞ୍ଚିବ ।
ଏକ୍ସ-୪ ମିଶନ ସ୍ପେସ ଏକ୍ସର ୫୩ତମ ଡ୍ରାଗନ ମିଶନ । ଏହା ୧୫ତମ ମାନବ ମହାକାଶ ମିଶନ ଓ ୪୮ତମ ଆଇଏସଏସ ଯାତ୍ରା ହେବାକୁ ଯାଉଛି । ସୂଚନାଯୋଗ୍ୟ, ଭାରତର ମହତ୍ବାକାଂକ୍ଷୀ ଗଗନଯାନ କାର୍ଯ୍ୟକ୍ରମର ଯାତ୍ରୀଙ୍କ ମଧ୍ୟରେ ଶୁଭାଶୁଂ ଶୁକ୍ଲା ଜଣେ । ଭାରତ ଏହି ମିଶନରେ ବର୍ତ୍ତମାନ ପର୍ଯ୍ୟନ୍ତ ୫୪୮ କୋଟି ଟଙ୍କା ଖର୍ଚ୍ଚ କରିସାରିଛି । ଏଥିରେ ମହାକାଶ ଯାନ ଲଞ୍ଚ ସହ ଶୁଭାଶୁଂ ଏବଂ ତାଙ୍କ ବ୍ୟାକଅପ୍ ଗ୍ରୁପ୍ କ୍ୟାପଟେନ ପ୍ରଶାନ୍ତ ନାୟରଙ୍କ ଟ୍ରେନିଂ ମଧ୍ୟ ରହିଛି । ପ୍ରଶାନ୍ତ ନାୟର ମଧ୍ୟ ଗଗନଯାନ କାର୍ଯ୍ୟକ୍ରମର ଏକ ଅଂଶ । ଶୁଭାଶୁଂ ସ୍ପେସ ଏକ୍ସ ଓ ଏକ୍ସିଓମ ସ୍ପେସରୁ ବିଶେଷ ଟ୍ରେନିଂ ନେଇଛନ୍ତି ।
ଆଇଏସଏସ ପହଞ୍ଚିବା ପରେ ଶୁଭାଶୁଂ ୭ଟି ପ୍ରୟୋଗ କରିବାକୁ ଯାଉଛନ୍ତି । ଯାହା ଭାରତ ଦ୍ବାରା ପ୍ରସ୍ତୁତ କରାଯାଇଛି । ଏଥିରେ ଅଧିକାଂଶ ଜୈବିକ ପ୍ରୟୋଗ ରହିଛି । ଯେମିତି କି ଗଛର ମଞ୍ଜିକୁ ଗଜା କରିବା ଓ ମଣିଷ ଶରୀରର ସୁକ୍ଷ୍ମ ଗୁରୁତ୍ବାକର୍ଷଣର ପ୍ରଭାବ । ଏହାବାଦ ନାଶା ସହ ମିଶି ୫ଟି ପ୍ରୟୋଗ କରିବେ ଶୁଭାଶୁଂ । ଯାହା ମାନବ ଅନୁସନ୍ଧାନ ସହ ଜଡ଼ିତ । ଇସ୍ରୋର ପ୍ରୋଜେକ୍ଟ ଡାଇରେକ୍ଟର ସୁଦୀଶ ବଲନ କହିଛନ୍ତି, ଭାରତୀୟ ବୈଜ୍ଞାନିକ ଏହି ପ୍ରୟୋଗକୁ ପ୍ରସ୍ତାବିତ କରିଛନ୍ତି । ନାଶା ସହ ମିଶା ୫ଟି ପ୍ରୟୋଗ କରାଯିବ ।
ସୂଚନାଯୋଗ୍ୟ, ଏକ୍ସ-୪ ମିଶନରେ ବ୍ୟବହାର ହେବାକୁ ଯାଉଥିବା ଡ୍ରାଗନ ମହାକାଶ ଯାନ ସମ୍ପୂର୍ଣ୍ଣ ନୂଆ । ସ୍ପେସ ଏକ୍ସର ଡ୍ରାଗନ ମିଶନ ମ୍ୟାନେଜମେଣ୍ଟ ଡାଇରେକ୍ଟର ସାରା ଓ୍ବାକର କହିଛନ୍ତି, କ୍ରୁ ମେମ୍ବରର ଦ୍ବାରା ଏହି ଯାନକୁ ଏକ ନାମ ଦିଆଯିବ । କମାଣ୍ଡର ପେଗି ହ୍ବିଟସନ ଗତ ସପ୍ତାହରେ କହିଥିଲେ ଶୀଘ୍ର ନୂଆ ନାଁ ଘୋଷଣା କରାଯିବ ।
ତେବେ ସ୍ପେସ ଏକ୍ସ ମାଲିକ ଏଲନ ମସ୍କ ଏବଂ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମଧ୍ୟରେ ଦେଖା ଦେଇଥିବା ବିବାଦର ପ୍ରଭାବ ଏହି ମିଶନ ଉପରେ ପଡ଼ିବ ବୋଲି ଆଶଙ୍କା କରାଯାଉଥିଲା । ତେବେ ନାଶା ଓ ଏକ୍ସିଓମ ପକ୍ଷରୁ ସ୍ପଷ୍ଟ କରାଯାଇଛି ଯେ, ବିବାଦର ପ୍ରଭାବ ମିଶନ ଉପରେ ପଡ଼ିବ ନାହିଁ । ମିଶନ ପୂର୍ବ ନିର୍ଦ୍ଧାରିତ ସମୟରେ କାର୍ଯ୍ୟକାରୀ ହେବ ।
ଶୁଭାଶୁଂ ଶୁକ୍ଲାଙ୍କ ଏହି ମିଶନ ଭାରତୀୟ ମହାକାଶ କାର୍ଯ୍ୟକ୍ରମ ପାଇଁ ବହୁତ ଗୁରୁତ୍ବପୂର୍ଣ୍ଣ । ଗଗନଯାନ ମିଶନ ପାଇଁ ତାଙ୍କର ଏହି ଅଭିଜ୍ଞତା ବହୁତ କାମରେ ଲାଗିବ । ୧୧ ଜୁନରେ ସେ ଯେବେ ଆଇଏସଏସ ସହ ଯୋଡ଼ି ହେବେ, ସେ ସମୟରେ ପୂରା ଭାରତ ତାଙ୍କ ସହ ଥିବ । ଏହି ମିଶନ ନା କେବଳ ବୈଜ୍ଞାନିକ ପ୍ରୟୋଗ ଆଣିବ ତାହା ନୁହେଁ ଭାରତୀୟ ମହାକାଶ ବିଜ୍ଞାନ ପାଇଁ ଏକ ମାଇଲଖୁଣ୍ଟ ସାବ୍ୟସ୍ତ ହେବ ।
ପୁଣି ଚର୍ଚ୍ଚାରେ ଦୀପଶିଖା ନାଗପାଲ । ‘ବାଦଶାହା’ ଏବଂ ‘ସିର୍ଫ ତୁମ୍’ ଭଳି ଫିଲ୍ମ ମାଧ୍ୟମରେ ଲୋକପ୍ରିୟତା ହାସଲ କରିଥିବା ଦୀପିକା ବଲିଉଡରେ ନିଜର ଛାପ ଛାଡି ପାରିନଥିଲେ ମଧ୍ୟ ଛୋଟପରଦାରେ ବହୁ ସଫଳତା ହାସଲ କରିଛନ୍ତି । ତେବେ ନିକଟରେ ଏକ ସାକ୍ଷାତକାରରେ ସେ ତାଙ୍କର ଦୁଇଟି ବିଫଳ ବିବାହ ବିଷୟରେ ଉଲ୍ଲେଖ କରିଛନ୍ତି ଯାହା ଚର୍ଚ୍ଚା ହେଉଛି । ସେ କହିଛନ୍ତି ଯଦି ସବୁକିଛି ଠିକ୍ ହୁଏ, ତେବେ ସେ ପୁଣି ଏକ ନୂତନ ସମ୍ପର୍କ ଗଢ଼ିବେ। ଦୀପଶିଖା ଏହା ମଧ୍ୟ କହିଥିଲେ ଯେ ତାଙ୍କ ପୂର୍ବତନ ସାଥୀଙ୍କୁ ଦୋଷ ଦେବାର ନାହିଁ କାରଣ ଅସଫଳ ବିବାହ ପାଇଁ ତାଙ୍କ ଭାଗ୍ୟ ଦାୟୀ ।
ମୁଁ ତିନିରୁ ଚାରିଥର ବିବାହ କରିପାରିବି
ଏକ ସାକ୍ଷାତକାରରେ ଦୀପଶିଖାଙ୍କୁ ପଚରାଯାଇଥିଲା ଯେ ସେ ପୁଣି ବିବାହ କରିବାକୁ ଚିନ୍ତା କରୁଛନ୍ତି କି ? ଏହାର ଉତ୍ତରରେ, ଅଭିନେତ୍ରୀ କହିଥିଲେ ଯେ ଥରେରୁ ଅଧିକ ବିବାହ କରିବାରେ କିଛି ଭୁଲ ନାହିଁ, କାରଣ ସେ ପୂର୍ବରୁ ଦୁଇଟି ଛାଡପତ୍ର ଦେଇସାରିଛନ୍ତି। ଦୀପଶିଖା କହିଥିଲେ, “ମୁଁ ତିନିଥର, ଚାରିଥର ବିବାହ କରିପାରିବି – ଏଥିରେ ମୋର କୌଣସି ଲଜ୍ଜା ନାହିଁ। ଅତି କମରେ ମୁଁ ମୋର ଜୀବନ ବଞ୍ଚୁଛି।
ସାଥୀ ରୂପରେ ଉପଯୁକ୍ତ ବ୍ୟକ୍ତି ନଥିଲେ
ସେ ଏହା ମଧ୍ୟ ସ୍ୱୀକାର କରିଥିଲେ ଯେ ତାଙ୍କ ପାଇଁ ପୂର୍ବତନ ସାଥୀ ଉପଯୁକ୍ତ ବ୍ୟକ୍ତି ନଥିଲେ। ଅଭିନେତ୍ରୀ କହିଛନ୍ତି, “ମୁଁ ସବୁବେଳେ ଭୁଲ କାରଣ ପାଇଁ ବିବାହ କରିଥିଲି। ତୁମେ ସବୁବେଳେ ସଠିକ କାରଣ ପାଇଁ ବିବାହ କରିବା ଉଚିତ । ତେଣୁ ମୁଁ ସବୁକିଛି ପାଇଁ ସେହି ପୁରୁଷକୁ ଦୋଷ ଦେଇପାରିବି ନାହିଁ। ମୁଁ ଭାବୁଛି ମୁଁ ବହୁତ ରୋମାଣ୍ଟିକ। ମୁଁ ପ୍ରେମରେ ବିଶ୍ୱାସ କରେ, ମୁଁ ବିବାହରେ ବିଶ୍ୱାସ କରେ, ଦୁଇଜଣ ଲୋକ ଏକାଠି ରହିପାରିବେ କିନ୍ତୁ ଯଦି ଏହା କାମ କରୁନାହିଁ ତେବେ ଦୁଇଜଣ ନିଜ ଜୀବନ ନଷ୍ଟ କରିବା ଅପେକ୍ଷା ନିଜ ଜୀବନ ବଞ୍ଚିବା ଭଲ। ’’
ସମ୍ପର୍କରୁ ବାହାରିବା ପାଇଁ ସମୟ ଲାଗିଥିଲା
ସେ କହିଥିଲେ ଯେ ତାଙ୍କର ପ୍ରଥମ ବିବାହରୁ ଆଗକୁ ବଢ଼ି ପୁନଃବିବାହ କରିବା ପରେ ମଧ୍ୟ ସବୁକିଛି ଠିକ୍ ହୋଇନଥିଲା। ଅଭିନେତ୍ରୀ କହିଛନ୍ତି, “ମୋତେ ପାଞ୍ଚରୁ ଛଅ ବର୍ଷ ଲାଗିଥିଲା ସେସବୁକୁ ଭୁଲି ଆଗକୁ ବଢିବା ପାଇଁ। ମୁଁ ନିଜକୁ ଦୋଷୀ ମନେ କରୁଥିଲି, କିନ୍ତୁ ତା’ପରେ ମୁଁ ଅନୁଭବ କଲି ଯେ ମୋତେ ନିଜକୁ ବଦଳାଇବାକୁ ପଡିବ। ତେଣୁ ମୁଁ ବୌଦ୍ଧ ଧର୍ମର ସାହାଯ୍ୟ ନେଇଥିଲି। ନୂତନ ଉପାୟ ଅନୁସନ୍ଧାନ କରିବା ପରେ, ବୁଝିପାରିଲି ଯେ ଏସବୁ କାହିଁକି ଘଟୁଛି।”ମୁଁ ମୋର ମାନଦଣ୍ଡ ଏବଂ ମୋର ଶକ୍ତିକୁ ବୃଦ୍ଧି କରିଛି ଯାହା ଦ୍ଵାରା ମୁଁ ପୁଣି ଥରେ ସେହି ଭୁଲ ନିଷ୍ପତ୍ତି ନନେଇପାରେ। ମୁଁ ନିଜ ଉପରେ କାମ କରିଛି। ଏବେ ଯଦିଓ ମୁଁ ସାତ ବର୍ଷ ଧରି ଅବିବାହିତ ଅଛି ମୁଁ ଏପରି ଅନୁଭବ କରୁନାହିଁ ଯେ, ‘ହେ ଭଗବାନ, କେହି ନାହାନ୍ତି.. ଠିକ୍ ଅଛି ଉଚିତ ସମୟ ଆସିଲେ ସଠିକ୍ ବ୍ୟକ୍ତି ଆସିବେ। ଏବେ ମୁଁ ଜାଣିଛି ମୁଁ କ’ଣ ଚାହୁଁଛି।”
ଦୀପଶିଖାଙ୍କ ଦୁଇଟି ବିବାହ ଭାଙ୍ଗି ସାରିଛି
ଆପଣଙ୍କୁ କହି ରଖୁଛୁ ଯେ ଦୀପଶିଖାଙ୍କ ପ୍ରଥମ ବିବାହ ଜିତ ଉପେନ୍ଦ୍ରଙ୍କ ସହିତ ହୋଇଥିଲା ଏବଂ ସେମାନେ ୨୦୦୭ ମସିହାରେ ଅଲଗା ହୋଇଯାଇଥିଲେ। ଏହା ପରେ ସେ ୨୦୧୨ ମସିହାରେ କେଶବ ଆରୋରାଙ୍କୁ ବିବାହ କରିଥିଲେ ଏବଂ ୨୦୧୬ ମସିହାରେ ସେମାନଙ୍କର ଛାଡପତ୍ର ହୋଇଥିଲା।
