ବୌଦ୍ଧ: ପାରିବାରିକ କଳହର କରୁଣ ଚିତ୍ର । ସମ୍ପର୍କୀୟ ଭାଇକୁ ହାଣିଲା ଭାଇ। ବୌଦ୍ଧ ଜିଲ୍ଲାର ହରଭଙ୍ଗା କୁଳସାହିରେ ଏଭଳି ଅଭାବନୀୟ ଘଟଣା ସାମ୍ନାକୁ ଆସିଛି। ମୃତକ ହେଉଛନ୍ତି କବିରାଜ ପ୍ରଧାନ। ଘଟଣାରେ ପୋଲିସ ୩ଜଣଙ୍କୁ ଅଟକ ରଖିଥିବା ବେଳେ ଜଣେ ଫେରାର ହୋଇଯାଇଛି ।

ଅଭିଯ଼ୁକ୍ତମାନେ ହେଉଛନ୍ତି ଜଗବନ୍ଧୁ ପ୍ରଧାନ, ତପନ ପ୍ରଧାନ, ଚତୁର୍ଭୁଜ ପ୍ରଧାନ । କବିରାଜ ଓ ଜଗବନ୍ଧୁଙ୍କ ପରିବାର ମଧ୍ୟରେ ଦୀର୍ଘବର୍ଷ ହେଲା କଳହ ଲାଗିରହିଥିଲା । ଗତକାଲି ବିଳମ୍ବିତ ରାତିରେ ଏହି କଳହ ହତ୍ୟାକାଣ୍ଡର ରୂପ ନେଇଥିଲା। ଘଟଣାସ୍ଥଳରେ ହରଭଙ୍ଗା ପୋଲିସ ତଦନ୍ତ କରୁଛି।

ଭବାନୀପାଟଣା: ପୁଣି ମିଳିଲାନି ଶବବାହକ ଆମ୍ବୁଲାନ୍ସ । ମୃତଦେହକୁ କାନ୍ଧରେ ବୋହିଲେ ସଂପର୍କୀୟ । ଏଭଳି ଘଟଣାକୁ ନେଇ ଭବାନୀପାଟଣା ଜିଲ୍ଲା ମୁଖ୍ୟ ଡାକ୍ତରଖାନାରେ ଉତ୍ତେଜନା । ଏପରିକି ଘଟଣାସ୍ଥଳରେ ପୋଲିସକୁ ମଧ୍ୟ ପହଞ୍ଚିବାକୁ ପଡ଼ିଥିଲା ।

କିନ୍ତୁ ତଥାପି ବି ଆସି ନ ଥିଲା ମହାପ୍ରୟାଣ ଗାଡ଼ି । ମୃତକ ହେଲେ ଲାଞ୍ଜିଗଡ଼ ସୁକନାଭଟା ଗାଁର କୁନି ନାୟକ । ସେ ଜରରେ ପୀଡ଼ିତ ହୋଇ ଗତ ୬ ଦିନ ହେବ ଚିକିତ୍ସିତ ହେଉଥିଲେ । ତେବେ ବୁଧବାର ସନ୍ଧ୍ୟାରେ ତାଙ୍କର ମୃତ୍ୟୁ  ହୋଇଥିଲା । ଦୀର୍ଘ ସମୟ ଧରି ଅପେକ୍ଷା ପରେ ବି ଆମ୍ବୁଲାନ୍ସ  ଆସି ନ ଥିବା ଅଭିଯୋଗ ହୋଇଛି ।

ନବରଙ୍ଗପୁର: ବିଦ୍ୟୁତ ସର୍ଟ ସର୍କିଟ ଯୋଗୁଁ ଲାଗିଲା ନିଆଁ । ୮ ଏକର ଆଖୁ ଫସଲ ପୋଡ଼ି ପାଉଁଶ । ନବରଙ୍ଗପୁର କୋଷାଗୁମୁଡ଼ା ବ୍ଲକ ଦୁରଗାଁରେ ଅଘଟଣ । ଗତକାଲି ଗାଁର ସଦନ ମାଳି ଓ ଖଗପତି ମାଳିଙ୍କ ଜମିରେ ଲାଗିଥିଲା ନିଆଁ । ଅପରାହ୍ନରେ ହଠାତ୍‌ ସର୍ଟସର୍କିଟ ଯୋଗୁଁ ଫସଲ ନଷ୍ଟ ହୋଇଯାଇଛି ।

ତେବେ ବଡ଼ କଥା ହେଉଛି, ଅଗ୍ନିଶମ ବିଭାଗକୁ ବାରମ୍ବାର ଫୋନ ଲଗାଇବା ପରେ ବି ଫୋନ ଉଠାଇ ନ ଥିବା ଅଭିଯୋଗ କରିଛନ୍ତି ଗ୍ରାମବାସୀ । ଜିଲ୍ଲା ପ୍ରଶାସନ ପକ୍ଷରୁ କ୍ଷତିଗ୍ରସ୍ତ ଚାଷୀଙ୍କୁ ସହାୟତା ଦେବାକୁ ଦାବି କରାଯାଇଛି। ସେପଟେ ଅବହେଳା ପାଇଁ ଅଗ୍ନିଶମ ବିଭାଗ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ଗ୍ରାମବାସୀ।

କୋରାପୁଟ: କୋରାପୁଟ ସୁନାବେଡ଼ାରେ ଅଭାବନୀୟ ଘଟଣା । ଲୁଗା ଶୁଖାଇବା ହେଲା କାଳ । ସ୍ୱାମୀକୁ ବଞ୍ଚାଇବାକୁ ଯାଇ ପତ୍ନୀଙ୍କର ବି ମୃତ୍ୟୁ । ବିଦ୍ୟୁତ୍ ଆଘାତରେ ସ୍ୱାମୀ,ସ୍ତ୍ରୀଙ୍କର ମୃତ ହୋଇଛି  । ଲୁହା ତାରରେ ଲୁଗା ଶୁଖାଇଲା ବେଳେ ଗଲା ଦୁଇ ଜଣଙ୍କ ଜୀବନ ଗଲା । ମୃତକ ହେଲେ ସୁଧାକର ବିଶ୍ୱାଳ ଓ ତାଙ୍କର ପତ୍ନୀ ।

ସୂଚନା ଅନୁସାରେ ସକାଳୁ ଗାଧୋଇ ସାରି ଛାତରେ ସୁଧାକର ଲୁଗା ଶୁଖାଇବା ବେଳେ ବିଦ୍ୟୁତ୍ ସଂସ୍ପର୍ଷ ଆସିଥିଲେ ସ୍ୱାମୀଙ୍କ ଏଭଳି ଅବସ୍ଥା ଦେଖି ତାଙ୍କୁ ବଞ୍ଚେଇବାକୁ ସ୍ତ୍ରୀ ଧାଇଁ ଯାଇଥିଲେ । ତେବେ ଘଟଣା ସ୍ଥଳରେ ହିଁ ୨ଜଣଙ୍କ ମୃତ୍ୟୁ ଘଟିଛି । ସୁଧାକର ସୁନାବେଡ଼ା ମ୍ୟୁନିସିପାଲିଟିରେ କାମ କରୁଥିଲେ । ତେବେ ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।