ତେଲେଙ୍ଗାନା: କରୋନା ଦୋହଲାଇ ଦେଇଛି ଆର୍ଥିକ ମେରୁଦଣ୍ଡ । ବନ୍ଦ ହୋଇଛି ଦୋକାନ ବଜାର, ଗୋଟିଏ ପ୍ରକାର ଠପ୍‌ ହୋଇଯାଇଛି ବ୍ୟବସାୟ । ଅତ୍ୟାବଶ୍ୟକୀୟ ସାମଗ୍ରୀ ଦୋକାନ ବ୍ୟତୀତ ଅନ୍ୟ କିଛି ଖୋଲିନାହିଁ । ଯାହାର ପ୍ରଭାବ ଦେଖିବାକୁ ମିଳିଛି ରାଜସ୍ୱ ଆଦାୟ ଉପରେ । ପୂର୍ବାପେକ୍ଷା କମିଛି ରାଜସ୍ୱ ଆଦାୟ । ଏଭଳି ପରିସ୍ଥିତିର ମୁକାବିଲା ନେଇ ତେଲେଙ୍ଗାନା ସରକାର ଆପଣାଇଛନ୍ତି ଭିନ୍ନ ଉପାୟ । ସରକାରୀ କର୍ମଚାରୀଙ୍କ ଦରମାର ପ୍ରାୟ ୧୦%ରୁ ୭୫% ପର୍ଯ୍ୟନ୍ତ ଟଙ୍କା କାଟିବା ନେଇ ନିଷ୍ପତ୍ତି ନେଇଛନ୍ତି ତେଲେଙ୍ଗାନା ମୁଖ୍ୟମନ୍ତ୍ରୀ ଚନ୍ଦ୍ରଶେଖର ରାଓ ।

ଖୋଦ୍‌ ମୁଖ୍ୟମନ୍ତ୍ରୀ, ମନ୍ତ୍ରିମଣ୍ଡଳର ସଦସ୍ୟ, ଆଇଏଏସ୍‌, ଆଇପିଏସ୍‌, ଆଇଏଫ୍‌ଏସ୍‌ ସମେତ ସମସ୍ତ ବର୍ଗର ଅଧିକାରୀ ଏବଂ କର୍ମଚାରୀଙ୍କ ଦରମା ବଡ଼ ଅଂଶ କଟାଯିବ । ଏଭଳି କି ଅବସରପ୍ରାପ୍ତ କର୍ମଚାରୀଙ୍କ ପେନସନ୍‌ର ଟଙ୍କାର ମଧ୍ୟ କିଛି ଅଂଶ କଟାଯିବ ।

ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ ସୋମବାର ଅର୍ଥ ବିଭାଗର ଅଧିକାରୀଙ୍କ ସହିତ କରୋନା ନେଇ ରାଜ୍ୟରେ ଉପୁଜିଥିବା ପରିସ୍ଥିତି ସମ୍ପର୍କରେ ସମୀକ୍ଷା କରିଛନ୍ତି । ବୈଠକରେ ଦୀର୍ଘ ସମୟର ଆଲୋଚନା ପରେ ରାଜ୍ୟ ସରକାର ଦରମା କାଟିବା ନେଇ ନିଷ୍ପତ୍ତି ନେଇଛନ୍ତି । କରୋନା ପ୍ରଭାବରେ ରାଜ୍ୟର ରାଜସ୍ୱ ଆଦାୟ କମିବାରୁ ଏଭଳି ନିଷ୍ପତ୍ତି ନେଇଛନ୍ତି ତେଲେଙ୍ଗାନା ସରକାର ।

ମୁଖ୍ୟମନ୍ତ୍ରୀ କାର୍ଯ୍ୟାଳୟ ସୂଚନା ଅନୁଯାୟୀ ମୁଖ୍ୟମନ୍ତ୍ରୀ, ରାଜ୍ୟର ମନ୍ତ୍ରୀ, ବିଧାନ ପରିଷଦର ସଦସ୍ୟ, ବିଧାନସଭାର ସଦସ୍ୟ, ନିଗମ ଅଧ୍ୟକ୍ଷ, ସ୍ଥାନୀୟ ନିଗମର ଦରମା ୭୫%, ଆଇଏଏସ୍‌, ଆଇପିଏସ୍‌ ଏବଂ ଆଇଏଫ୍‌ଏସ୍‌ ଭଳି ସେବାରେ ନିୟୋଜିତ ଅଫିସରଙ୍କ ଦରମାର ୬୦%, ଅନ୍ୟ ସବୁ ଶ୍ରେଣୀର କର୍ମଚାରୀଙ୍କ ଦରମାର ୫୦%, ଚତୁର୍ଥ ଶ୍ରେଣୀ କର୍ମଚାରୀଙ୍କ ଦରମାର ୧୦% ଟଙ୍କା କଟାଯିବ । ସମସ୍ତ ଅବସରପ୍ରାପ୍ତ କର୍ମଚାରୀଙ୍କ ୫୦% କଟାଯିବ । ଚତୁର୍ଥ ଶ୍ରେଣୀ ଅବସରପ୍ରାପ୍ତ କର୍ମଚାରୀଙ୍କ ୧୦% ଟଙ୍କା କଟାଯିବ । ତେଲେଙ୍ଗାନାରେ କୋଭିଡ ୧୯ ଦ୍ୱାରା ସଂକ୍ରମିତ ମାମଲା ଲଗାତାର ବଢ଼ିବାରେ ଲାଗିଛି । ଏଭଳି ସମୟରେ ରାଜ୍ୟର ଆର୍ଥିକ ସ୍ଥିତି ଖରାବ ହେବା ଆଶଙ୍କା କରିଛନ୍ତି ରାଜ୍ୟ ସରକାର ।

ରାମପୁର: ଲକ୍‌ଡାଉନ୍‌ କାରଣରୁ ଲୋକଙ୍କୁ ଘରୁ ବାହାରିବା ପାଇଁ ବାରଣ କରାଯାଇଛି । ଲୋକ ମାନଙ୍କର ଆବଶ୍ୟକତାକୁ ପୁରଣ କରିବା ପାଇଁ  ଜିଲ୍ଲାଗୁଡ଼ିକରେ କଣ୍ଟ୍ରୋଲ ରୂମ ସବୁ ଖୋଲାଯାଇଛି । ଜିଲ୍ଲାରେ ଦିଆଯାଇଥିବା ହେଲ୍ପଲାଇନ ନମ୍ବରରେ ଲୋକମାନେ ସାହାଯ୍ୟ ପାଇଁ କଲ କରୁଛନ୍ତି । କିନ୍ତୁ ଏତେ ଆତଙ୍କ ଭିତରେ ବି କିଛି ଲୋକ ନିଜ ପ୍ରକୃତି ଛାଡୁ ନାହାନ୍ତି । ପୋଲିସକୁ ହଇରାଣ କରିବାକୁ କିଛି ବ୍ୟକ୍ତି ହେଲ୍ପ ଲାଇନକୁ କଲ କରି ଅଜବ ଗଜବ ଅନୁରୋଧ କରୁଛନ୍ତି । କିଏ ପାନ ବିଡି ମାଗିଲାଣି ତ’ କିଏ କହୁଛି ମୋ କୁକୁରକୁ ଟିକେ ବାହାରେ ବୁଲାଇ ଦିଏ । ସେହିଭଳି ଗୋଟିଏ ଘଟଣାରେ ରାମପୁର ଡିଏମ୍ ସିଙ୍ଗଡା ସହ ଚଟଣୀ ମାଗିଥିବା ଜଣେ ବ୍ୟକ୍ତିଙ୍କ ଦ୍ୱାରା ନାଳ ସଫା କରାଇଛନ୍ତି । ଆସନ୍ତୁ ଜାଣିବା ପୂରା ଘଟଣାକ୍ରମ କଣ ଥିଲା ।

ସୂଚନା ଅନୁଯାୟୀ, ରାମପୁରରେ ଜଣେ ବ୍ୟକ୍ତି କରୋନା ହେଲ୍ପଲାଇନ ନମ୍ବରକୁ ଫୋନ୍ କରି ଚାରିଟି ସିଙ୍ଗଡ଼ା ଏବଂ ତା ସହିତ ଚଟଣି ପଠାଇବାକୁ କହିଥିଲେ। ପ୍ରଥମେ ତାଙ୍କୁ ଏପରି କଲ କରିବା ପାଇଁ ମନା କରାଯାଇଥିଲା । କିନ୍ତୁ ସେ କଲ କରିବା ବନ୍ଦ କରିନଥିଲେ । ଶେଷକୁ ଖବର ଡିଏମଙ୍କ ପାଖରେ ପହଂଚିଥିଲା ।  ତାଙ୍କୁ ଧରିବା ପାଇଁ ପୋଲିସ ସଂପୃକ୍ତ ବ୍ୟକ୍ତିଙ୍କ ଘରକୁ ସିଙ୍ଗଡା ଓ ଚଟଣି ପଠାଇଥିଲା । ସେହି ବ୍ୟକ୍ତିଙ୍କୁ ଧରିବା ପାଇଁ ପୋଲିସ ଏହି ଜାଲ ବିଛାଇଥିଲା । ସିଙ୍ଗଡା ଲୋଭରେ ବ୍ୟକ୍ତି ଜଣକ ପୋଲିସ ହାତରେ ଧରା ପଡିଥିଲା । ପରେ ପୋଲିସ ତଙ୍କୁ ନାଳ ସଫା କରିବାକୁ କହିଥିଲା ।

ସେହିପରି ଅନ୍ୟ ଜଣେ ବ୍ୟକ୍ତି ଜିଲ୍ଲା ପ୍ରଶାସନର ହେଲ୍ପଲାଇନ ନମ୍ବରକୁ କଲକରି ପାନ ଆଣିବାକୁ କହିଥିଲେ।  ପ୍ରଥମେ ତାଙ୍କୁ ଏଭଳି କଲ କରିବାକୁ ମନା କରାଯାଇଥିଲା । କିନ୍ତୁ ବ୍ୟକ୍ତି ଜଣକ ରାଗି ଯାଇ ଉତ୍ତର ଦେଇଥିଲେ ଯେ, ତମ ପାନ ଆଣି ଦେୂବ କି ନାହିଁ ? ଯଦି ସାହାଯ୍ୟ କରି ପାରିବ ନାହିଁ ତେବେ କେଉଁଥିପାଇଁ ହେଲ୍ଫ ଲାଇନ୍ ଖୋଲିଛ ବୋଲି ସେହି ବ୍ୟକ୍ତି ପ୍ରଶ୍ନ କରିଥିଲେ । ପରେ ପୋଲିସ ସେହି ବ୍ୟକ୍ତିଙ୍କ ଘରକୁ ପାନ ପଠାଇ ତାଙ୍କୁ ଧରିଥିଲା ।

ତେବେ ରାଜ୍ୟର ସବୁଠାରୁ ଅଧିକ ପ୍ରାଙ୍କ୍  ଫୋନ୍ କଲ୍‌ ରାମପୁର ଜିଲ୍ଲାରୁ ଆସୁଛି । ଡିଏମ ଅଞ୍ଜାନୀ କୁମାର ସିଂ କହିଛନ୍ତି ଏପରି ମଜାକ ନକରିବା ପାଇଁ କହିଲେ ମଧ୍ୟ ଯେଉଁମାନେ ଶୁଣନ୍ତି ନାହିଁ ସେମାନଙ୍କୁ ଲଜ୍ଜିତ କରିବାକୁ ନିଷ୍ପତ୍ତି ନିଆଯାଇଛି । ଏପରି ବ୍ୟକ୍ତିଙ୍କ ଦ୍ୱାରା ରାସ୍ତା ଓ ଡ୍ରେନ୍ ସଫା କରାଯାଉଛି  । ପୋଲିସର ଏହି ପଦକ୍ଷେପ କାରଣରୁ ପ୍ରାଙ୍କ୍ କଲ ସଂଖ୍ୟା ପ୍ରାୟ କମିଯାଇଥିବା ସେ ଦାବି କରିଛନ୍ତି । ନାଳ,ରାସ୍ତା ସଫା କରିବା ପରେ ବି ଯଦି ଲୋକ ନସୁଧୁରିବେ ତେବେ ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଡିଏମ୍ କହିଛନ୍ତି । ।