ଭୁବନେଶ୍ୱର: ରାଜଧାନୀରେ ପ୍ରେମିକାକୁ ପ୍ରେମିକର ଗୁଳିମାଡ଼ ଘଟଣା । ପ୍ରେମିକ ବିରୋଧରେ ଯୁବତୀଙ୍କ ପରିବାର ଲୋକେ ଥାନାରେ ଏତଲା ଦେଇଛନ୍ତି। ଯୁବକ ଜଣକ ଜୀବନରେ ମାରିଦେବାକୁ ଉଦ୍ଦେଶ୍ୟ ରଖିଥିବା ଏତଲାରେ ଉଲ୍ଲେଖ କରାଯାଇଛି।
ଗୁଳିମାଡ଼ ପରେ ରଘୁନାଥପୁର ବ୍ରିଜ ତଳକୁ ବନ୍ଧୁକ ଫିଙ୍ଗି ଦେଇଥିବା ସୂଚନା ମିଳିଛି। ସେଠାରେ ପୋଲିସ ବନ୍ଧୁକ ଖୋଜୁଛି। ଗତକାଲି ପ୍ରେମିକର ଗୁଳିମାଡ଼ରେ ଯୁବତୀ ଜଣକ ଆହତ ହୋଇଥିଲେ।
ନୂଆଦିଲ୍ଲୀ: ବିଜୟ ପଥରେ ଆଗଉଛି ଆପ୍ । ୮ଟା ୪୫ ସୁଦ୍ଧା ଦିଲ୍ଲୀ ବିଧାନସଭା ନିର୍ବାଚନ ଫଳାଫଳର ଟ୍ରେଣ୍ଡର ଆଗରେ ରହିଛି ଆମ୍ ଆଦମୀ ପାର୍ଟି । ଦିଲ୍ଲୀର ଆମ୍ ଆଦମୀ ପାର୍ଟି କାର୍ଯ୍ୟାଳୟରେ ଆରମ୍ଭ ହେଲା ସେଲିବ୍ରେସନ୍ ।
ଦଳର ବହୁ ବରିଷ୍ଠ ନେତା ପାର୍ଟି ଅଫିସରେ ପହଞ୍ଚୁଛନ୍ତି । ପ୍ରାରମ୍ଭିକ ଟ୍ରେଣ୍ଡରେ ଆପ୍ ବର୍ତ୍ତମାନସୁଦ୍ଧା ୫୪ ଆସନରେ ଆଗୁଆ ରହିଛି ।
ନୂଆଦିଲ୍ଲୀ: ଦିଲ୍ଲୀରେ ୭୦ ବିଧାନସଭା ଆସନ ପାଇଁ ଭୋଟ୍ ଗଣତି ଆରମ୍ଭ । ପ୍ରଥମେ ପୋଷ୍ଟାଲ୍ ବାଲଟ୍ ଗଣତି ଚାଲିଛି । ୨୧ଟି କେନ୍ଦ୍ରରେ ଚାଲିଛି ଗଣତି । ପ୍ରାରମ୍ଭିକ ଟ୍ରେଣ୍ଡରେ ଦିଲ୍ଲୀ ବିଧାନସଭା ନିର୍ବାଚନରେ ଆଗରେ ରହିଛି ଆମ୍ ଆଦମୀ ପାର୍ଟି । ଦ୍ୱିତୀୟରେ ବିଜେପି ରହିଥିବା ବେଳେ ଗୋଟିଏ ଆସନରେ ଆଗୁଆ ରହିଛି କଂଗ୍ରେସ ।
ନୂଆଦିଲ୍ଲୀ ବିଧାନସଭା ଆସନରୁ ଆଗୁଆ ଚାଲିଛନ୍ତି ଆମ୍ ଆଦମୀ ପାର୍ଟି ମୁଖ୍ୟ ଅରବିନ୍ଦ କେଜରୀଓ୍ୱାଲ୍। ପଛରେ ଅଛନ୍ତି ବିଜେପିର ସୁନୀଲ ଯାଦବ ଏବଂ କଂଗ୍ରେସର ରମେଶ ଶଭରଓ୍ୱାଲ୍ ।
ପୂର୍ବାହ୍ନ ୮ଟା ୪୫ ସୁଦ୍ଧା ଦିଲ୍ଲୀ ବିଧାନସଭା ନିର୍ବାଚନ ଫଳାଫଳର ଟ୍ରେଣ୍ଡର ଆଗରେ ଆମ୍ ଆଦମୀ ପାର୍ଟି । ବର୍ତ୍ତମାନସୁଦ୍ଧା ଆପ୍ ୫୨ଟି ଆସନରେ ଆଗୁଆ ଥିବା ବେଳେ ବିଜେପି ୧୪ଟିରେ ଆଗୁଆ ରହିଛି ।
ଚାନ୍ଦିନୀ ଚୌକ ବିଧାନସଭା ଆସନରୁ କଂଗ୍ରେସର ଅଳକା ଲାମ୍ବା ଓ ମଡେଲ୍ ଟାଉନ ଆସନରୁ ବିଜେପିର କପିଲ ମିଶ୍ରା ପଛରେ ଚାଲିଛନ୍ତି ।
ଭୁବନେଶ୍ୱର: ଦୁର୍ବଳ ହେଲା ଦକ୍ଷିଣ ଆନ୍ଧ୍ରପ୍ରଦେଶ ଉପକୂଳରେ ସୃଷ୍ଟି ହୋଇଥିବା ଘୂର୍ଣ୍ଣିବଳୟ । କମିଲା ବର୍ଷା, ବଢିଲା ଶୀତ । ଦୁଇ ଦିନ ପାଇଁ କୋଲଡ ୱେଭ୍ ଆଲର୍ଟ ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଏନେଇ ଆଜି ସୁନ୍ଦରଗଡ, ବାଲେଶ୍ବର, ଅନୁଗୁଳ, କଟକ,ସୋନପୁର, ଝାରସୁଗୁଡା ଏବଂ ବଲାଙ୍ଗିରକୁ ଜାରି ହୋଇଛି ସତର୍କ ସୂଚନା । ଦୁଇ ଦିନ ପର୍ଯ୍ୟନ୍ତ ସର୍ବନିମ୍ନ ତାପମାତ୍ରା ଠାରୁ ୩ ରୁ ୫ ଡିଗ୍ରୀ ପର୍ଯ୍ୟନ୍ତ ତାପମାତ୍ରା କମିବ ବୋଲି ସ୍ପଷ୍ଟ କରିଛି ପାଣିପାଗ କେନ୍ଦ୍ର ।
ଆଜି ସକାଳୁ ପ୍ରବଳ ଜାଡ ସାଙ୍ଗକୁ ଦେଖାଦେଇଛି ଘନ କୁହୁଡି । ରାତି ଏବଂ ସକାଳର ଭିଜିବିଲିଟି ୨ଶହ ମିଟରରୁ କମିଛି । ସ୍ଥାନେ ସ୍ଥାନେ ୨୦ ମିଟର ଦୃଶ୍ୟମାନ ରହିବା ନେଇ ସତର୍କ କରିଥିଲା ପାଣିପାଗ କେନ୍ଦ୍ର । ବିଶେଷ କରି ୧୧ ଏବଂ ୧୨ ତାରିଖରେ କଳାହାଣ୍ଡି, କନ୍ଧମାଳ, ରାୟଗଡା, କୋରାପୁଟ, ଅନୁଗୁଳ ଏବଂ ବଲାଙ୍ଗିରରେ ଘନ କୁହୁଡି ପାଇଁ ୟେଲୋ ଆର୍ଲଟ ଜାରି କରାଯାଇଛି । ଅନ୍ୟ ଜିଲ୍ଲା ଗୁଡିକରେ ମଧ୍ୟମରୁ ସାମାନ୍ୟ ଧରଣର କୁହୁଡି ହେବ ବୋଲି ସୂଚନା ଦେଇଛି ଆଞ୍ଚଳିକ ପାଣିପାଗ କେନ୍ଦ୍ର ।
ଭୁବନେଶ୍ୱର: ଲୋକସେବା ଭବନରେ ଡାକ୍ତରଙ୍କୁ ଧନ୍ୟବାଦ ଜଣାଇଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଗଞ୍ଜାମର ପି.ପ୍ରିୟଙ୍କାରାଣୀଙ୍କ ମୃତ୍ୟୁ ପରେ ତାଙ୍କର ଦୁଇଟି କିଡ୍ନୀକୁ ଅନ୍ୟ ଜଣଙ୍କ ଦେହରେ ପ୍ରତିରୋପଣ କରାଯାଇଥିଲା ।
ମୃତ୍ୟୁ ସହ ସଂଗ୍ରାମ କରୁଥିବା ବରଗଡର ଫିରୋଜ ସାହୁଙ୍କ ଶରୀରରେ ପ୍ରତିରୋପଣ କରାଯାଇଥିଲା କିଡ୍ନୀ । ସଫଳତାର ସହ ଏହି ବିରଳ ଅସ୍ତ୍ରୋପ୍ରଚାର କରିଥିଲେ ଏସ୍ସିବି ମେଡିକାଲ କଲେଜ୍, କଟକ ଓ ଆପୋଲ ହସ୍ପିଟାଲର ମିଳିତ ଡାକ୍ତରୀ ଟିମ୍ ।
ଏହି ସମସ୍ତ ଡାକ୍ତରଙ୍କୁ ଆଜି ଲୋକସେବା ଭବନରେ ଧନ୍ୟବାଦ ଜଣାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏହି ପ୍ରଥମ କାଡାଭାରିକ କିଡନୀ ପ୍ରତିରୋପଣ ରାଜ୍ୟର ସ୍ୱାସ୍ଥ୍ୟ ସେବା କ୍ଷେତ୍ରରେ ଆଉ ଏକ ମାଇଲ୍ଖୁଣ୍ଟ ବୋଲି କହି ଡାକ୍ତରଙ୍କୁ ପ୍ରସଂଶା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ସ୍ୱାସ୍ଥ୍ୟମନ୍ତ୍ରୀ ନବ କିଶୋର ଦାସ ଡାକ୍ତର ମାନଙ୍କୁ ଶୁଭେଚ୍ଛା ଜଣାଇଥିଲେ । ୫-ଟି ସଚିବ ଭି.କେ ପାଣ୍ଡିଆନ ମଧ୍ୟ ସେମାନଙ୍କୁ ଶୁଭେଚ୍ଛା ଜଣାଇଥିଲେ । ଏଥିସହ ଅଙ୍ଗଦାନ ଦ୍ଵାରା ଅନ୍ୟମାନଙ୍କ ଜୀବନ ରକ୍ଷା କରାଯାଇପାରିବ ବୋଲି କହିଛନ୍ତି ।
ସେଥିପାଇଁ ଆବଶ୍ୟକ ପଡ଼ିଲେ ହେଲିକେପ୍ଟର ଯୋଗାଇ ଦିଆଯିବ ବୋଲି ମଧ୍ୟ ସେ ଗୁରୁତ୍ବାରୋପ କରିଛନ୍ତି ।
ଭୁବନେଶ୍ୱର: ଚାଲିଛି ଭାଲେଣ୍ଟାଇନ୍ସ ସପ୍ତାହ। ପ୍ରେମିକା ପାଖକୁ ଆସିଥିଲେ ପ୍ରେମିକ ଆଶିଷ ନାୟକ । ହେଲେ ଗୋଲାପ ବଦଳରେ ସାଥୀରେ ନେଇ ଆସିଥିଲେ ଗୁଳିଭର୍ତ୍ତି ବନ୍ଧୁକ । ପ୍ରେମ ଆଳାପ ଭିତରେ ଆରମ୍ଭ ହୋଇଥିଲା ବନ୍ଧୁକ ସହ ଖେଳ।
ଆଉ ଟିକେ ଅସବଧାନତା ଯୋଗୁଁ ଫୁଟିଗଲା ବନ୍ଧୁକ। ପ୍ରେମିକାର ଜଙ୍ଘରେ ବାଜିଲା ଗୁଳି । ତେବେ ଏ ବନ୍ଧୁକଧାରୀ ପ୍ରେମିକ କିଏ । କିଛି ଘଣ୍ଟା ଭିତରେ ପୋଲିସ୍ କରିଛି ପୁରା ଘଟଣାର ପର୍ଦ୍ଦାଫାଶ୍। ଗିରଫ୍ କରିଛି ପ୍ରେମିକ ଆଶିଷ ନାୟକକୁ ।
ଖୋଲିଛି ତାର ଅପରାଧିକ ପଞ୍ଜିକା । ଏ ହେଉଛି ସେହି ଆଶିଷ, ଯିଏ ନୟାପଲ୍ଲୀ ବୋମା ମାଡ଼ ଘଟଣାରେ ଗିରଫ୍ ହୋଇଥିଲା । ଏହା ବ୍ୟତୀତ ଆଶିଷ ନାଁରେ ଅଛି ଅନେକ ଅପରାଧିକ ମାମଲା । ଆହତ ଯୁବତୀ ଜଣକ ସ୍ଥାନୀୟ ଏକ କଲେଜ୍ର ଫ୍ୟାସନ ଡିଜାଇନ୍ର ଛାତ୍ରୀ । ବର୍ତ୍ତମାନ ଯୁବତୀଙ୍କ ଅବସ୍ଥା ସ୍ଥିର ରହିଥିବା ବେଳେ ପୋଲିସ୍ ପୁରା ଘଟଣାର ତଦନ୍ତ ଚଳାଇଛି।
ନବରଙ୍ଗପୁର: ପୁଣି ଚର୍ଚ୍ଚାରେ ଡାବୁଗାଁ ବିଧାୟକ । ଗର୍ଭବତୀଙ୍କୁ ୫କିଲୋମିଟର କାନ୍ଧରେ ବୋହି ଚର୍ଚ୍ଚାରେ ବିଧାୟକ ମନୋହର ରନ୍ଧାରୀ । ମଇଦଲପୁର ପଞ୍ଚାୟତ କୁସୁମୁଖୁଣ୍ଟିରେ ଜେମା ବେହେରା ପ୍ରସବ ବେଦନାରେ ଛଟପଟ ହେଉଥିଲେ । ଖବରପାଇ ବିଧାୟକ ଗାଁରେ ପହଁଚିଥିଲେ ।
ହେଲେ ଗାଁକୁ ରାସ୍ତା ନଥିବାରୁ ଆମ୍ବୁଲାନ୍ସ ପହଁଚି ପାରିନଥିଲା । ଗାଁଲୋକଙ୍କ ସହ ବିଧାୟକ ମହିଳା ଜଣଙ୍କୁ ୫କିଲୋମିଟର କାନ୍ଧରେ ବୋହି ରାସ୍ତା ଉପରକୁ ଆଣିଥିଲେ ।
ପରେ ତାଙ୍କୁ ନିଜ ଗାଡ଼ିରେ ନେଇ ମଇଦଲପୁର ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ବିଧାୟକଙ୍କ ଏଭଳି କାର୍ଯ୍ୟକୁ ସ୍ଥାନୀୟ ବାସିନ୍ଦା ପ୍ରଶଂସା କରିଛନ୍ତି ।
ଆଦିତ୍ୟ ରୟ କାପୁର ଓ ଦିଶା ପଟାନୀ ଷ୍ଟାରର୍ ଫିଲ୍ମ ‘ମଲଙ୍ଗ’ ବକ୍ସ ଅଫିସରେ ଭଲ ବ୍ୟବସାୟ କରୁଛି। ‘ମଲଙ୍ଗ’ରେ ଆଦିତ୍ୟଙ୍କୁ ପୂରା ଦମଦାର ଅନ୍ଦାଜରେ ଦେଖିବାକୁ ମିଳିଥିବା ବେଳେ ଦିଶାଙ୍କ ଅଭିନୟ ସହ ଡ୍ୟାନ୍ସ ମଧ୍ୟ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି । ଫିଲ୍ମଟି ଆଦିତ୍ୟ ଓ ଦିଶାଙ୍କ ରିଭେଞ୍ଜ ଷ୍ଟୋରୀକୁ ନେଇ ଆଧାରିତ ।
ଏଥିରେ ଅନୀଲ କପୁରଙ୍କୁ ଜଣେ ପୋଲିସ ଅଫିସର୍ ଭୂମିକାରେ ଦେଖିବାକୁ ମିଳିଛି। ହାତରେ ବନ୍ଧୁକ ଧରି ସେ ଜବରଦସ୍ତ ଆକ୍ସନ ଦେଖାଇଛନ୍ତି। ତାଙ୍କ ବ୍ୟତୀତ କୁନାଲ ଖେମୁ ମଧ୍ୟ ଏଥିରେ ଗୁରୁତ୍ୱପୂର୍ଣ୍ଣ ଭୂମିକାରେ ଅଭିନୟ କରିଛନ୍ତି। ରିଲିଜର ପ୍ରଥମ ଦିନରେ ଫିଲ୍ମଟି ୬ କୋଟି ଟଙ୍କା ଆୟ କରିଥିବାବେଳେ ଦ୍ୱିତୀୟ ଦିନରେ ୫ କୋଟି ଟଙ୍କା କମାଇଛି। ଫିଲ୍ମକୁ ଦର୍ଶକଙ୍କଠାରୁ ଭଲ ରେସ୍ପନ୍ସ ମିଳିଥିବା ବେଳେ ସିନେ ସମୀକ୍ଷକମାନେ ଫିଲ୍ମକୁ ପ୍ରଶଂସା କରିଥିଲେ।
କଳାହାଣ୍ଡି: ଜିଲ୍ଲାର ନାଁ ପଚାରିଲେ କହିପାରୁ ନାହାନ୍ତି ପିଲା । ଯାହାକୁ ନେଇ ଗଣଶିକ୍ଷା ମନ୍ତ୍ରୀଙ୍କ ଅସନ୍ତୋଷ । ଗଣଶିକ୍ଷା ମନ୍ତ୍ରୀଙ୍କ ଅଚାନକ କଳାହାଣ୍ଡି ଗସ୍ତ ସମୟରେ ଏଭଳି କିଛି ଚିତ୍ର ସାମ୍ନାକୁ ଆସିଛି । ଯାହା ପରେ କାର୍ଯ୍ୟାନୁଷ୍ଠାନ ନେଇଛନ୍ତି ମନ୍ତ୍ରୀ ସମୀର ଦାସ ।
ବିଭିନ୍ନ ସ୍କୁଲରେ ଅଚାନକ ପହଞ୍ଚି ସମୀକ୍ଷା କରିଥିଲେ ମନ୍ତ୍ରୀ । ଶିକ୍ଷାରେ ଅବହେଳା କରିଥିବାରୁ କାରଣ ଦର୍ଶାଅ ନୋଟିସ ସହ ଶିକ୍ଷକଙ୍କ ଫେବ୍ରୁଆରୀ ମାସର ବନ୍ଦ ଦରମାକୁ ବନ୍ଦ କରିଛନ୍ତି ।
ଇଂରାଜୀ ଶିକ୍ଷାରେ ସ୍କୁଲ ପଛରେ ଥିବା ଜାଣିବାକୁ ପାଇଥିଲେ ମନ୍ତ୍ରୀ । ଖରାପ ଶିକ୍ଷାଦାନ ପାଇଁ ଭବାନୀପାଟଣା ବିମ୍ବାଧର ସରକାରୀ ସ୍କୁଲର ଇଂରାଜୀ ଓ ପ୍ରଧାନଶିକ୍ଷକଙ୍କୁ କାରଣ ଦର୍ଶାଅ ନୋଟିସ ଜାରି କରିଛନ୍ତି ମନ୍ତ୍ରୀ ।
ଏହାସହ ବନ୍ଦ କରିଛନ୍ତି ଗୋଟିଏ ମାସର ଦରମା । ସେହିପରି କର୍ଲାଗୁଡ଼ା ପ୍ରାଥମିକ ବିଦ୍ୟାଳୟରେ ଶିକ୍ଷାଦାନର ମାନ କମ ଥିବାରୁ ସହକାରୀ ଶିକ୍ଷୟିତ୍ରୀଙ୍କୁ କାରଣ ଦର୍ଶାଅ ନୋଟିସ ଜାରି କରିଛନ୍ତି ମନ୍ତ୍ରୀ ।
ଗଜପତି: ଗଜପତି ଜିଲ୍ଲାର ବହୁ ଚର୍ଚ୍ଚିତ କାଳିଦାସ ମୃତ୍ୟୁ ଘଟଣା ରହସ୍ୟ ଉନ୍ମେ।ଚନ ହୋଇଛି । ଦୁର୍ଘଟଣାର ରୂପ ଦେଇ ପୋଲିସ ଆଖିରୁ ଅଭିଯୁକ୍ତ ଖସି ଯିବାକୁ ଚେଷ୍ଟା କରିଥିବା ସ୍ୱୀକାର କରିଛି । ମୁଖ୍ୟ ଅଭିଯ଼ୁକ୍ତ ସମେତ ଅନ୍ୟ ୨ଜଣଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି । ଯାଜପୁରର ଭାସ୍କର ବିଶ୍ୱାଳକୁ ପଲାସା ରେଳ ଷ୍ଟେସନରୁ ଗିରଫ କରାଯାଇଛି ଏବଂ ଅନ୍ୟ ଦୁଇ ଅଭିଯୁକ୍ତଙ୍କୁ ଯାଜପୁରରୁ ଗିରଫ କରାଯାଇଥିବା ଏସ୍ପି ସାରା ଶର୍ମା ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ଗତ ଜାନୁଆରୀ ୮ତାରିଖରେ କାଳିଦାସଙ୍କୁ ମଦ ପିଆଇ ଟ୍ରାକ୍ଟର ଦ୍ଵାରା ଧକ୍କା ଦିଆଯାଇଥିଲା । ପରେ ଟ୍ରଲି ଚଢାଇ ହତ୍ୟା କରାଯାଇଥିବା ଅଭିଯ଼ୁକ୍ତ ସ୍ୱୀକାର କରିଛି । ଏଥିରେ ବ୍ୟବହୃତ ଟ୍ରାକ୍ଟର ଓ ବାଇକକୁ ଜବତ କରିଛି ପୋଲିସ ।
