ମାଲକାନଗିରି: ଥାନାରେ ଛେଳି ଅଟକ। କଥାଟି ଆଶ୍ଚର୍ଯ୍ୟ ଲାଗୁଥିଲେ ବି କଥାଟି ସତ । ମାଲକାନଗିରି ସଦର ଥାନାରେ ଅଟକ ରହିଛି ଛେଳି।
ସୂଚନା ଅନୁଯାୟୀ, ଗଉଡ଼ଗୁଡ଼ାରେ କୁକୁଡ଼ା ଲଢ଼େଇ ଓ ଜୁଆ ଖେଳ ଚାଲିଥିଲା। ଏହି ସମୟରେ ପୋଲିସ ରେଡ୍ କରିବାରୁ ସମସ୍ତେ ଫେରାର ମାରିଥିଲେ। କୁକୁଡ଼ା ଲଢ଼େଇରେ ପୁରସ୍କାର ଥିଲା ଛେଳି। ଅର୍ଥାତ ଯାହାର କୁକୁଡ଼ା ଜିତିଥାନ୍ତା, ସେ ପୁରସ୍କାର ହିସାବରେ ଛେଳି ପାଇଥାନ୍ତା। କିନ୍ତୁ ପୋଲିସ ରେଡ୍ କରିବାରୁ ସମସ୍ତେ ପଳାଇଥିଲେ। କେବଳ ଘଟଣାସ୍ଥଳରେ ରହିଯାଇଥିଲା ନିରୀହ ଛେଳି। ପୋଲିସ ସେହି ଛେଳିକୁ ଆଣି ଥାନାରେ ଅଟକ ରଖିଛି। ଏହା ସହିତ ୭ଟି ମୋଟର ସାଇକଲ ବି ଜବତ କରିଛି ପୋଲିସ।
ପୁରୀ: ଶ୍ରୀମନ୍ଦିରରେ ଆଜି ଅନୁଷ୍ଠିତ ହେବ ରୁକ୍ମିଣୀ ହରଣ ନୀତି । ଆଜି ପବିତ୍ର ଜେଷ୍ଠ ଶୁକ୍ଳ ପକ୍ଷ ଏକାଦଶୀ ଅବସରରେ ଶ୍ରୀମନ୍ଦିରରେ ସକାଳ ଧୁପ ନୀତି ପରେ ଏହି ସ୍ୱତନ୍ତ୍ର ନୀତି ଅନୁଷ୍ଠିତ ହେବ । ରୁକ୍ମିଣୀ ହରଣ ଏକାଦଶୀ ପୂର୍ବରୁ ଗତକାଲି ମହାପ୍ରଭୁଙ୍କର ସ୍ୱତନ୍ତ୍ର ରାଜେନ୍ଦ୍ର ଅଭିଷେକ ନୀତି କରାଯାଇଥିଲା । ପରମ୍ପରା ଅନୁସାରେ ଆଜି ମହାଲକ୍ଷ୍ମୀ ଲଷ୍ମୀ ମନ୍ଦିରରୁ ବିଜେ କରି ବିମଳା ମନ୍ଦିର ନିକଟକୁ ଯିବେ । ଭୋଗ ମଣ୍ଡପ ନୀତି ଶେଷ ପରେ ସେଠାରେ ବଚନିକା ଆଦି ଵିଧି ଅନୁଷ୍ଠିତ ହେବ। ଏଥି ସହ ସେଠାରେ ହରଣ ନୀତି ମଧ୍ୟ କରାଯିବ। ଆଜି ଏହି ସବୁ ବିଶେଷ ନୀତି ରହିଥିବା ହେତୁ ଶ୍ରୀମନ୍ଦିରରେ ପ୍ରବଳ ଭିଡ଼ ପରିଲକ୍ଷିତ ହୋଇଅଛି।
ସୁନ୍ଦରଗଡ଼: ସୁନ୍ଦରଗଡ଼ ବିସ୍ଫୋରକ ଲୁଟ୍ ଘଟଣାରେ ଗୋଦାମ ମାଲିକଙ୍କୁ ଜେରା। ସେ ଏବେ ଦୁଇ ଦିନିଆ ରିମାଣ୍ଡ ଅଛନ୍ତି। ଗୋଦାମ ମାଲିକ ଶ୍ରଵଣ କୁମାର ଅଗ୍ରୱାଲଙ୍କୁ ରଘୁନାଥପାଲ୍ଲି ଥାନାରେ ପୋଲିସ ପକ୍ଷରୁ ପଚରାଉଚରା ଜାରି ରହିଛି। ରିମାଣ୍ଡର ଶେଷ ଦିନରେ ଆଜି ଵି ପଚରାଉଚରା ଜାରି ରହିଛି। ରଘୁନାଥପାଲ୍ଲି ଥାନା ପୋଲିସ ସହ ଆଡିସନାଲ ଏସପିଙ୍କ ନେତୃତ୍ବରେ ସ୍ଵତନ୍ତ୍ର SIT ଟିମ ପଚରାଉଚରା ଜାରି ରଖିଛନ୍ତି। ଶ୍ରଵଣ କୁମାର ଅଗ୍ରୱାଲଙ୍କ ପତ୍ନୀ ନିକିତା ଅଗ୍ରୱାଲଙ୍କୁ ପୋଲିସ ପକ୍ଷରୁ ମଧ୍ୟ ପଚରା ଉଚରା କରାଯାଉଛି। ପତ୍ନୀ ଓ ପତିଙ୍କ ବିସ୍ପୋରକ ବ୍ୟଵସାୟରେ କଣ ଭୂମିକା ରହିଛି। ବିସ୍ଫୋରକ ସାମଗ୍ରୀ କେଉଁଠୁ କିଣୁଥିଲେ, କେଉଁ କେଉଁ ଅଞ୍ଚଳକୁ ବିସ୍ପୋରକ ସାମଗ୍ରୀ ଯୋଗାଣ କରୁଥିଲେ ଓ SOP କାହିଁକି ପାଳନ କରାଯାଉନଥିଲା ସେ ନେଇ ପଚରାଉଚରା କରାଯାଉଛି। ପୋଲିସ ପକ୍ଷରୁ ଅନେକ ତଥ୍ୟ ହାସଲ କରାଯାଇଥିବା ସୂଚନା ମିଳିଛି।
ନନ୍ଦିଘୋଷ ବ୍ୟୁରୋ: ବେଙ୍ଗଳୁରୁ ଦଳାଚକଟା ଘଟଣାରେ RCB ମାର୍କେଟିଂ ହେଡ୍ ଗିରଫ। CB ମାର୍କେଟିଂ ହେଡ୍ ନିଖିଲ ସୋସାଲେଙ୍କୁ ଗିରଫ କରିଛି ପୋଲିସ। ବେଙ୍ଗଳୁରୁ ଏୟାରପୋର୍ଟରୁ ତାଙ୍କୁ ଗିରଫ କରାଯାଇଛି। ମୁମ୍ଵାଇକୁ ଯିବା ବେଳେ ତାଙ୍କୁ ବାନ୍ଧିଛି ପୋଲିସ। ଏହା ସହିତ RCB ଭିକଟ୍ରି ସେଲିବ୍ରେସନର ଇଭେଣ୍ଟ ମ୍ୟାନେଜମେଣ୍ଟ କମ୍ପାନିର ୩ ଜଣଙ୍କୁ ମଧ୍ୟ ଅଟକ ରଖିଛି ପୋଲିସ। ସେମାନଙ୍କୁ ପଚରା ଉଚରା କରାଯାଉଛି। ଏହା ଆଗରୁ ଏହି ଦଳାଚକଟା ଘଟଣାରେ ବେଙ୍ଗାଲୁରୁ ପୋଲିସ କମିଶନରଙ୍କ ସମେତ ଅନେକ ଅଧିକାରୀଙ୍କୁ ନିଲମ୍ବିତ କରିଥିଲେ ମୁଖ୍ୟମନ୍ତ୍ରୀ ସିଦ୍ଧରମୈୟା।
ଏହା ପରେ, ମୁଖ୍ୟମନ୍ତ୍ରୀ ଏହି ଘଟଣାର ତଦନ୍ତ ପାଇଁ ଏକ ସଦସ୍ୟ ବିଶିଷ୍ଟ କମିଶନ ଗଠନ କରିବାକୁ ମଧ୍ୟ ଘୋଷଣା କରିଛନ୍ତି। ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର IPL ଟ୍ରଫି ଜିତିବା ପରେ ବେଙ୍ଗାଳୁରୁର ଚିନ୍ନାସ୍ୱାମୀ ଷ୍ଟାଡିୟମରେ ଏକ ସ୍ୱାଗତ କାର୍ଯ୍ୟକ୍ରମ ଆୟୋଜନ କରାଯାଇଥିଲା। ଷ୍ଟାଡିୟମରେ ପ୍ରବେଶ କରିବା ପାଇଁ ବାହାରେ ପ୍ରଶଂସକଙ୍କ ଏକ ବଡ଼ ଭିଡ଼ ଜମା ହୋଇଥିଲା। ଏହା ପରେ, ଷ୍ଟାଡିୟମ ବାହାରେ ଦଳାଚକଟା ହୋଇଥିଲା। ଏଥିରେ ୧୧ ଜଣଙ୍କର ମୃତ୍ୟୁ ହୋଇଥିଲା ଏବଂ ୭୦ ଜଣ ଆହତ ହୋଇଥିଲେ।
ଗଂଜାମ: ଗଂଜାମ ଜିଲ୍ଲା ଗୋଳନ୍ଥରା ଥାନା ଅଞ୍ଚଳରେ ଦୁଇ ନାବାଳିକାଙ୍କୁ ଗଣ ଦୁଷ୍କର୍ମ ଅଭିଯୋଗ। ଦୁଇ ନାବାଳିକାଙ୍କ ଘରେ ଏକ ଶୁଭ କାର୍ଯ୍ୟ ଚାଲିଥିଲା।
ସେହି ଗାଁର ୪ଜଣ ଯୁବକ ନାବାଳିକାଙ୍କୁ ଡାକି ନେଇ ଗାଆଁ ବାହାରେ ଦୁଷ୍କର୍ମ କରିଥିବା ଅଭିଯୋଗ ହୋଇଛି। ଗୋଟିଏ ପରିତ୍ୟକ୍ତ ଘରେ ରାତି ସାରା ରଖି ଦୁଷ୍କର୍ମ କରିଥିଲେ। ପରିବାର ଲୋକେ ଥାନାରେ ଅଭିଯୋଗ କରିଛନ୍ତି।
ଏହି ଘଟଣା ଗତ ୩ ତାରିଖରେ ଘଟିଥିବାର ସୂଚନା ମିଳିଛି। ଗୋଲନ୍ଥରା ଥାନାରେ ପରିବାର ଲୋକେ ଅଭିଯୋଗ କରିବା ପରେ ପୋଲିସ ତନାଘନା ଆରମ୍ଭ କରିଛି। ଅଭିଯୁକ୍ତଙ୍କୁ ଧରିବା ପାଇଁ ଧରପଗଡ଼ ଚାଲିଛି।
ଭୁବନେଶ୍ୱର: ସିଏମ୍ ଅଫିସ କର୍ମଚାରୀ ପରିଚୟ ଦେଇ ଭୁବନେଶ୍ଵରରେ ଟଙ୍କା ଆଦାୟ। ବଦଳିର ଧମକ ଦେଇ ଟଙ୍କା ଆଦାୟ । ‘ମୁଁ ସିଏମ ଅଫିସରୁ କହୁଥିଲି, ଦୁଇ ଲକ୍ଷ ଟଙ୍କା ନ ଦେଲେ ମାଲକାନଗିରି ପଠାଇଦେବି’। ଜଣେ ଅଧିକ୍ଷଣ ଯନ୍ତ୍ରୀଙ୍କୁ ଏଭଳି ଢଙ୍ଗରେ ଧମକ ଦେଇ ୨ ଲକ୍ଷ ଟଙ୍କା ଠକି ନେଇଛି ଧୂର୍ତ୍ତ। ଦୁଇ ଲକ୍ଷ ନେବା ପରେ ମଧ୍ୟ ଡରାଇ ଧମକାଇ ଆହୁରି ୫ ଲକ୍ଷ ଟଙ୍କା ମାଗୁଛି। ଏପରି ଠକେଇର ଶିକାର ହେବା ପରେ ଅଧୀକ୍ଷଣ ଯନ୍ତ୍ରୀ ପ୍ରତାପ କୁମାର ହରିପାଲ ଭୁବନେଶ୍ଵର ଏୟାରଫିଲ୍ଡ ଥାନାର ଦ୍ୱାରସ୍ଥ ହୋଇଛନ୍ତି।
ପ୍ରତାପ କୁମାର ହରିପାଲ ଅନୁଗୁଳ ରାସ୍ତା ଓ କୋଠାବାଡ଼ି ଡିଭିଜନର ଅଧିକ୍ଷଣ ଯନ୍ତ୍ରୀ ଭାବେ କାମ କରୁଛନ୍ତି। ପ୍ରାୟ ଏକମାସ ପୂର୍ବେ ଜାନକୀବଲ୍ଲଭ ମହାପାତ୍ର ନାମକ ଜଣେ ବ୍ୟକ୍ତି ତାଙ୍କୁ କଲ୍ କରିଥିଲା। ନିଜକୁ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟର କର୍ମଚାରୀ ବୋଲି ପରିଚୟ ଦେବା ସହିତ ମାଲକାନଗିରି ବଦଳି କରିଦେବ ବୋଲି ଧମକ ଦେଇଥିଲା। ବଦଳି ରୋକିବାକୁ ହେଲେ ଦୁଇ ଲକ୍ଷ ଟଙ୍କା ଦେବାକୁ ପଡ଼ିବ ବୋଲି କହିଥିଲା। ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ଫୋନ୍ ବୋଲି କହିଥିବାରୁ ପ୍ରତାପ ଭୟରେ ଆଉ କୌଣସି ଉପାୟ ନପାଇ ତା’ କଥାରେ ରାଜି ହୋଇ ଯାଇଥିଲେ।
ଜାନକୀ କହିବା ମୁତାବକ ପ୍ରତାପ ତା’ର ଭିମଟାଙ୍ଗୀ ସ୍ଥିତ ଘରକୁ ଆସି ୨ ଲକ୍ଷ ଟଙ୍କା ଦେଇଥିଲେ। ହେଲେ ଏହାପରେ ମଧ୍ୟ ଜାନକୀର ଆତଙ୍କ ଥମି ନଥିଲା। ସେ ପୁଣି ଥରେ ଫୋନ୍ କରି ଆହୁରି ୫ ଲକ୍ଷ ଟଙ୍କା ମାଗିଥିଲା। ପ୍ରତାର ଅରାଜି ହେବାରୁ ଜାନକୀ ଗାଳିଗୁଲଜ କରିବା ସହିତ ଜୀବନରେ ମାରିଦେବାକୁ ଧମକ ଦେଇଥିଲା। ଶେଷରେ ପ୍ରତାପ କୈାଣସି ଉପାୟ ନପାଇ ଏୟାରଫିଲ୍ଡ ଥାନାରେ ଲିଖିତ ଅଭିଯୋଗ କରିଛନ୍ତି। ପୋଲିସ ମଧ୍ୟ ତାଙ୍କ ଅଭିଯୋଗ ଆଧାରରେ କେସ୍ ନଂ – ୨୦୧/୨୫ ରେ ଏକ ମାମଲା ରୁଜୁ କରି ତଦନ୍ତ କରୁଛି।
ନନ୍ଦିଘୋଷ ବ୍ୟୁରୋ: ମାତ୍ର ଅଳ୍ପ ଦିନ ଭିତରେ ଘନିଷ୍ଠ ବନ୍ଧୁତାରୁ ଚରମ ଶତ୍ରୁତା। ଜଣେ କେମିତି ଘନିଷ୍ଠ ବନ୍ଧୁରୁ ଚରମ ଶତ୍ରୁ ପାଲଟି ଯାଏ, ତାର ଉଦାହରଣ ହୋଇଛନ୍ତି ଆମେରିକାର ରାଷ୍ଟ୍ରପତି ଡୋନାଲଡ ଟ୍ରମ୍ପ ଓ ବିଶ୍ଵର ସବୁଠାରୁ ବଡ଼ ଧନୀ ଏଲନ ମସ୍କ। ଉଭୟଙ୍କ ମଧ୍ୟରେ ବିବାଦ ଏତେ ତୀବ୍ର ହୋଇଛି ଯେ, ଟ୍ରମ୍ପଙ୍କୁ ଆମେରିକାର ରାଷ୍ଟ୍ରପତି ପଦରୁ ବହିଷ୍କାର କରାଯାଉ ବୋଲି ମଧ୍ଯ ଦାବି କରିଛନ୍ତି ମସ୍କ। ମହାଭିଯୋଗ ଆଣିବାକୁ ସେ ପ୍ରସ୍ତାବ ଦେଇଛନ୍ତି।
ଏପରିକି ପୁରୁଣା କଥାକୁ ଉଖାରି କେବଳ ତାଙ୍କ ପାଇଁ ଟ୍ରମ୍ପ ରାଷ୍ଟ୍ରପତି ନିର୍ବାଚନ ଜିତିଲେ, ନ ହେଲେ ହାରି ଯାଇଥାନ୍ତେ ବୋଲି କହିଛନ୍ତି ଏଲନ ମସ୍କ। ସେ କହିଛନ୍ତି, ଏପଷ୍ଟାଇନ ଫାଇଲରେ ଅଛି ଟ୍ରମ୍ପଙ୍କ ନାଁ। ତେଣୁ ଦେଶର ରାଷ୍ଟ୍ରପତି ପଦରେ ରହିବାର ତାଙ୍କର ଅଧିକାର ନାହିଁ। ଏଲନ ମସ୍କ ଥିଲେ ଟ୍ରମ୍ପଙ୍କ ଘନିଷ୍ଠ ସହଯୋଗୀ। ନିର୍ବାଚନ ବେଳେ ପ୍ରାୟ ୨୦୦ କୋଟି ଡଲାରର ଚାନ୍ଦା ଟ୍ରମ୍ପଙ୍କୁ ଦେଇଥିଲେ ମସ୍କ। ଏହା ସତ ଯେ, ଟ୍ରମ୍ପଙ୍କ ବିଜୟରେ ମସ୍କଙ୍କ ବଡ଼ ହାତ ଥିଲା। ଏପରିକି ଟ୍ରମ୍ପ ଦ୍ଵିତୀୟ ଥର ରାଷ୍ଟ୍ରପତି ହେବା ପରେ ଖର୍ଚ୍ଚ ବିଭାଗ DOGE ର ମୁଖ୍ୟ ପଦରେ ମସ୍କଙ୍କୁ ନିଯୁକ୍ତ କରିଥିଲେ। କିନ୍ତୁ ଟ୍ରମ୍ପଙ୍କ ତଥାକଥିତ ବିଗ୍ ଆଣ୍ଡ ବିୟୁଟିଫୁଲ୍ ବିଲ୍ ଯୋଗୁଁ ଉଭୟଙ୍କ ମଧ୍ୟରେ ବିବାଦ ସୃଷ୍ଟି ହୋଇଥିଲା ଏବଂ କିଛି ଦିନ ତଳେ DOGE ମୁଖ୍ୟ ପଦରୁ ଇସ୍ତଫା ଦେଇଥିଲେ ମସ୍କ। ଏଲନଙ୍କ କମ୍ପାନୀଗୁଡ଼ିକ ସହିତ ସରକାରୀ ଚୁକ୍ତି ବାତିଲ କରିବାକୁ ଧମକ ଦେଇଥିଲେ ଟ୍ରମ୍ପ। ଏହା ପରେ ଟେସଲା ଏବଂ ସ୍ପେସଏକ୍ସର ସିଇଓ ସ୍ପେସଏକ୍ସର ଡ୍ରାଗନ୍ ମହାକାଶଯାନ ପ୍ରକଳ୍ପକୁ ବନ୍ଦ କରିବାର ଘୋଷଣା କରିଥିଲେ। ଟ୍ରମ୍ପଙ୍କ ” One Big Beautiful Bill ” ଉପରେ ମସ୍କଙ୍କ ସମାଲୋଚନାକୁ ନେଇ ଏହି ଫାଟ ସୃଷ୍ଟି ହୋଇଥିଲା। ଟ୍ରମ୍ପଙ୍କ ବ୍ୟାପକ ଟିକସ କାଟ ଏବଂ ଖର୍ଚ୍ଚ ବିଲ୍ କୁ ନିନ୍ଦା ମସ୍କ ନିନ୍ଦା କରିଥିଲେ। ଏହାକୁ ନେଇ ଟ୍ରମ୍ପ ଅସନ୍ତୋଷ ପ୍ରକାଶ କରିଥିଲେ। ଏଲନ ନିରାଶ କରିଛନ୍ତି ବୋଲି କହିଥିଲେ। EV ଟିକସ ପ୍ରୋତ୍ସାହନ ହଟାଇ ଦିଆଯାଇଥିବାରୁ ମସ୍କ ଅସନ୍ତୋଷ ପ୍ରକାଶ କରିଥିଲେ।
ଏହା ପରେ ଟ୍ରମ୍ପ କହିଥିଲେ, ମସ୍କଙ୍କ କମ୍ପାନିକୁ ଦିଆଯାଇଥିବା କଣ୍ଟ୍ରାକ୍ଟ ଓ ସବସିଡିକୁ ବନ୍ଦ କରିଦେଲେ ତ ବହୁତ ସଞ୍ଚୟ ହୋଇପାରିବ। ଏହାକୁ ନେଇ ରାଗି ଯାଇଛନ୍ତି ମସ୍କ ଏବଂ ଏପଷ୍ଟାଇନ୍ ପ୍ରସଙ୍ଗ ଉଠାଇ ଟ୍ରମ୍ପଙ୍କୁ ବହିଷ୍କାର କରିବାକୁ ମଧ୍ୟ ଦାବି କରିଛନ୍ତି। ତେବେ ଏହି ବିବାଦ ପରେ ଟେସଲାର ସେୟାର ଖସିଛି। ଦିନକରେ କ୍ଷତି ହୋଇଛି ୧୫୨ ବିଲିୟନ ଡଲାର।
ନନ୍ଦିଘୋଷ ବ୍ୟୁରୋ: ଶସ୍ତା ହେବ ଗାଡି ଓ ଗୃହ ଋଣ । ଭାରତୀୟ ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ରେପୋ ରେଟରେ ୫୦ ବେସିସ୍ ପଏଣ୍ଟ ହ୍ରାସ କରିପାରେ । ତିନି ଦିନିଆ ମୁଦ୍ରା ନୀତି କମିଟି ବୈଠକରେ ଏପରି ନିଷ୍ପତ୍ତି ହୋଇଥିବା ସୂଚନା ରହିଛି । ଆଜି ଦିନ ୧୦ ଟାରେ ନୂଆ ରେପୋ ରେଟ୍ ନେଇ ଘୋଷଣା କରିବେ ଆରବିଆଇ ଗଭର୍ଣ୍ଣର ସଞ୍ଜୟ ମାଲହୋତ୍ରା । ଦେଶରେ ଜିନିସ ପତ୍ରର ଦରଦାମ କମିଛି।
ଗତ ଏପ୍ରିଲରେ ଖୁଚୁରା ମୁଦ୍ରା ସ୍ପିତି ୩.୩୪ ପ୍ରତିଶତରୁ ଖସି ୩.୧୬ ପ୍ରତିଶତ ହୋଇଛି । ଯାହାକି ୬ ବର୍ଷ ମଧ୍ୟରେ ସର୍ବକାଳୀନ ରେକର୍ଡ । ଲୋକଙ୍କ ହାତକୁ ଅଧିକ କ୍ରୟ ଶକ୍ତି କ୍ଷମତା ଦେବା ପାଇଁ ଆରବିଆଇ ରେପୋ ରେଟ୍ ହ୍ରାସ କରିପାରେ । ଏବେ ରେପୋ ରେଟ୍ ୬ ପ୍ରତିଶତ ରହିଛି । ୫୦ ବେସିସ୍ ପଏଣ୍ଟ କମିଲେ ୫.୫ ପ୍ରତିଶତକୁ ଖସିବ । ଫଳରେ ବ୍ୟାଙ୍କ ଗୁଡିକ ଗ୍ରାହକଙ୍କୁ କମ ସୁଧରେ ଋଣ ଦେଇପାରିବେ । ପୂର୍ବରୁ ଗତ ଫେବୃଆରୀ ଓ ଏପ୍ରିଲ ମାସରେ ଆରବିଆଇ ରେପୋ ଦରରେ ୨୫ ବେସିସ୍ ପଏଣ୍ଟ ଲେଖାଏଁ ହ୍ରାସ କରିଥିଲେ ।
ନନ୍ଦିଘୋଷ ବ୍ୟୁରୋ: ବେଙ୍ଗାଳୁରୁ ଚିନ୍ନାସ୍ୱାମୀ ଷ୍ଟାଡିୟମ ବାହାରେ ଦଳାଚକଟା ଘଟଣାରେ ରାଜ୍ୟ ସରକାରଙ୍କ ବଡ଼ କାର୍ଯ୍ୟାନୁଷ୍ଠାନ। ବେଙ୍ଗାଲୁରୁ ପୋଲିସ କମିଶନରଙ୍କ ସମେତ ଅନେକ ଅଧିକାରୀଙ୍କୁ ନିଲମ୍ବିତ କରିଛନ୍ତି ମୁଖ୍ୟମନ୍ତ୍ରୀ ସିଦ୍ଧରମୈୟା । ଏହା ପରେ, ମୁଖ୍ୟମନ୍ତ୍ରୀ ଏହି ଘଟଣାର ତଦନ୍ତ ପାଇଁ ଏକ ସଦସ୍ୟ ବିଶିଷ୍ଟ କମିଶନ ଗଠନ କରିବାକୁ ମଧ୍ୟ ଘୋଷଣା କରିଛନ୍ତି। ପୂର୍ବରୁ, ସରକାର କର୍ଣ୍ଣାଟକ ହାଇକୋର୍ଟକୁ କହିଥିଲେ ଯେ CID ଏହି ଘଟଣାର ତଦନ୍ତ କରିବ। ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର IPL ଟ୍ରଫି ଜିତିବା ପରେ ବେଙ୍ଗାଳୁରୁର ଚିନ୍ନାସ୍ୱାମୀ ଷ୍ଟାଡିୟମରେ ଏକ ସ୍ୱାଗତ କାର୍ଯ୍ୟକ୍ରମ ଆୟୋଜନ କରାଯାଇଥିଲା। ଷ୍ଟାଡିୟମରେ ପ୍ରବେଶ କରିବା ପାଇଁ ବାହାରେ ପ୍ରଶଂସକଙ୍କ ଏକ ବଡ଼ ଭିଡ଼ ଜମା ହୋଇଥିଲା। ଏହା ପରେ, ଷ୍ଟାଡିୟମ ବାହାରେ ଦଳାଚକଟା ହୋଇଥିଲା। ଏଥିରେ ୧୧ ଜଣଙ୍କର ମୃତ୍ୟୁ ହୋଇଥିଲା ଏବଂ ୭୦ ଜଣ ଆହତ ହୋଇଥିଲେ।
ଗୁରୁବାର ବେଙ୍ଗାଲୁରୁ ଦଳାଚକଟା ଘଟଣାରେ କର୍ଣ୍ଣାଟକ ହାଇକୋର୍ଟ ସ୍ୱତଃପ୍ରବୃତ୍ତ ଭାବେ ଅବଗତ ହେବା ପରେ, ବିଳମ୍ବିତ ସନ୍ଧ୍ୟାରେ ମୁଖ୍ୟମନ୍ତ୍ରୀ ସିଦ୍ଧାରମେୟା ତଦନ୍ତକୁ CID କୁ ହସ୍ତାନ୍ତର କରିବା ଘୋଷଣା କରିଥିଲେ। ଏହା ସହିତ, ମୁଖ୍ୟମନ୍ତ୍ରୀ ୧୧ ଜଣଙ୍କ ଜୀବନ ନେଇଥିବା ମାରାତ୍ମକ ଦଳାଚକଟାର କାରଣ ତଦନ୍ତ ପାଇଁ ଏକ ସଦସ୍ୟ ବିଶିଷ୍ଟ କମିଶନ ଗଠନ କରିବାକୁ ମଧ୍ୟ ଘୋଷଣା କରିଥିଲେ। ମୁଖ୍ୟମନ୍ତ୍ରୀ ଦାୟୀ ପୋଲିସ ଅଧିକାରୀଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ ଏବଂ ସହରର ପୋଲିସ କମିଶନରଙ୍କ ସମେତ ଅନେକ ଉଚ୍ଚପଦସ୍ଥ ଅଧିକାରୀଙ୍କୁ ନିଲମ୍ବିତ କରିଥିଲେ। ମୁଖ୍ୟମନ୍ତ୍ରୀ ସିଦ୍ଧାରମେୟା କହିଛନ୍ତି ଯେ କ୍ୟୁବନ ପାର୍କ ପୋଲିସ ଷ୍ଟେସନର ପୋଲିସ ଇନ୍ସପେକ୍ଟର, ଷ୍ଟେସନ ହାଉସ ମାଷ୍ଟର, ଷ୍ଟେସନ ହାଉସ ଅଫିସର, ଏସିପି, ସେଣ୍ଟ୍ରାଲ ଡିଭିଜନର ଡିସିପି, କ୍ରିକେଟ ଷ୍ଟାଡିୟମର ଇନଚାର୍ଜ, ଅତିରିକ୍ତ ପୋଲିସ କମିଶନର, ପୋଲିସ କମିଶନରଙ୍କୁ ନିଲମ୍ବିତ କରାଯାଇଛି।
ନନ୍ଦିଘୋଷ ବ୍ୟୁରୋ: ଟ୍ରକ ଚାପାରେ ଚାଲିଗଲା ନାବାଳକର ଜୀବନ । ଗଞ୍ଜାମ ଜିଲ୍ଲା କୋଦଳା ଥାନା ମଠ ବ୍ରହ୍ମପୁର ମୁଖ୍ୟ ରାସ୍ତାରେ ଆଜି ସଂଧ୍ୟାରେ ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି। ଟ୍ୟୁସନରୁ ୨ ଜଣ ଛାତ୍ର ସାଇକେଲରେ ଘରକୁ ଫେରୁଥିବା ବେଳେ ମୁଖ୍ଯ ରାସ୍ତାରେ ଟ୍ରକ୍ ଚାପି ଦେଇଥିବା ସୂଚନା ମିଳିଛି। ଜଣେ ଛାତ୍ର ଟ୍ରକ ଚକା ତଳେ ଚାପି ହୋଇ ଯାଇଥିବା ବେଳେ, ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା। ମୃତ ଛାତ୍ର ଜଣକ ଅଷ୍ଟମ ଶ୍ରେଣୀର ଶୁଭଙ୍କର ନାହାକ ବୋଲି ଜଣାପଡିଛି। ଅନ୍ଯ ଜଣେ ଛାତ୍ର ଛିଟିକି ପଡିଥିବାରୁ ଆହତ ହୋଇଛନ୍ତି। ଏହାକୁ ନେଇ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଛି। କୋଦଳା ପୋଲିସ, ଅଗ୍ନିଶମ ବାହିନୀ, ଆମ୍ବୁଲାନ୍ସ ପହଞ୍ଚି ଟ୍ରକ ଚକା ତଳୁ ମୃତ ଛାତ୍ରଙ୍କ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି। ଟ୍ରକ୍ ଡ୍ରାଇଭରକୁ ଅଟକ ରଖି ପୋଲିସ ତଦନ୍ତ କରୁଛି।
