ଭୁବନେଶ୍ୱର: ୪ କରୋନା ଆକ୍ରାନ୍ତ ଯାତ୍ରା ବିବରଣୀ ଜାରି କଲା ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ । ୮୪ ନମ୍ୱର ଠାରୁ ୮୭ ନମ୍ୱର ପର୍ଯ୍ୟନ୍ତ ରୋଗୀଙ୍କ ଯାତ୍ରା ବିବରଣୀ ପ୍ରକାଶ ।

୮୪ ନମ୍ୱର ଆକ୍ରାନ୍ତ : ପ୍ରଦତ୍ତ ସୂଚନା ଅନୁଯାୟୀ, ଲକ୍‌ଡାଉନ୍ ଲାଗୁ ହେବା ପରେ ୭୦ ବର୍ଷୀୟା ଦଶରଥପୁରର ମହିଳା ଜଣଙ୍କ ମାର୍ଚ୍ଚ ୨୨ଠାରୁ ଏପ୍ରିଲ ୨୦ ଯାଏଁ ଘରେ ରହିଥିଲେ । ପରେ ତାଙ୍କ ନିକଟ ସମ୍ପର୍କୀୟ ଅର୍ଥାତ ୭୪ ନମ୍ୱର ରୋଗୀ କରୋନା ପଜିଟିଭ ଚିହ୍ନଟ ହେବା ପରେ ତାଙ୍କୁ କ୍ୱାରେଣ୍ଟାଇନ୍‌ରେ ରଖାଯାଇଥିଲା । କୌଣସି ଲକ୍ଷଣ ନଥିବା ସତ୍ତ୍ୱେ ତାଙ୍କ ସମ୍ପର୍କୀୟ ପଜିଟିଭ ଚିହ୍ନଟ ହୋଇଥିବାରୁ ତାଙ୍କ ନମୁନା ପରୀକ୍ଷା ହୋଇଥିଲା । ରିପୋର୍ଟ ପଜିଟିଭ୍‌ ଆସିବା ପରେ ତାଙ୍କୁ ଏପ୍ରିଲ ୨୩ ତାରିଖରେ କଳିଙ୍ଗ ନଗରସ୍ଥିତ ଟାଟା କୋଭିଡ ହସ୍ପିଟାଲରେ ଭର୍ତ୍ତି କରାଯାଇଥିଲା ।

୮୫ ନମ୍ୱର ଆକ୍ରାନ୍ତ: ୨୧ ବର୍ଷୀୟ ଏହି ପଜିଟିଭ ଯୁବକ ଜଣଙ୍କ ଭଦ୍ରକ ବାସୁଦେବପୁର ଅଞ୍ଚଳର, ସେ ମଧ୍ୟ ଜଣେ ପଶ୍ଚିମବଙ୍ଗ ଫେରନ୍ତା । ସେ ୭୩ ନମ୍ୱର ସଂକ୍ରମିତଙ୍କ ସମ୍ପର୍କରେ ମଧ୍ୟ ଆସିଥଲେ । ସେ ୨୯ ମାର୍ଚ୍ଚ ତାରିଖରେ କୋଲକାତା ବଡ଼ବଜାରରୁ ନିଜ ବାପା ଓ ଅନ୍ୟ ଜଣେ ଯାତ୍ରୀଙ୍କ ସହ ଗାଡ଼ି ଭଡ଼ା କରି ଆସିଥିଲେ । ଏହାପରେ ସେ ଏପ୍ରିଲ ୨୦ ଯାଏ ବାସୁଦେବପୁର ଠାରେ ରହିଥିଲେ । ଏହାପରେ ଏପ୍ରିଲ ୨୧ଠାରୁ ୨୩ ଯାଏଁ ସେ ଯାଜପୁର ଏନସି କଲେଜରେ କ୍ୱାରେଣ୍ଟାଇନ୍‌ରେ ରହିଥିଲେ । ପଶ୍ଚିମବଙ୍ଗ ଫେରନ୍ତା ହୋଇଥିବାରୁ କୌଣସି ଲକ୍ଷଣ ନଥିବା ସତ୍ତ୍ୱେ ଏପ୍ରିଲ ୨୩ ରେ ନମୁନା ସଂଗ୍ରହ ହୋଇଥିଲା ଏବଂ ରିପୋର୍ଟ ପଜିଟିଭ ଆସିଥିଲା । ଏଥିସହିତ ତାଙ୍କୁ ସେହିଦିନ କଳିଙ୍ଗ ନଗର ସ୍ଥିତ ଟାଟା କୋଭିଡ ହସ୍ପିଟାଲରେ ଭର୍ତ୍ତି କରାଯାଇଥିଲା ।  

୮୬ ନମ୍ୱର ଆକ୍ରାନ୍ତ: ରୋଗୀ ଜଣଙ୍କ ୪୮ ବର୍ଷିୟ ମହିଳା । ସେ ୭୩ ନମ୍ୱର ଆକ୍ରାନ୍ତଙ୍କ ନିକଟ ସମ୍ପର୍କୀୟ । ମାର୍ଚ୍ଚ ୨୨ ତାରିଖରୁ ଏପ୍ରିଲ ୨୦ ଯାଏଁ ଲକ୍‌ଡାଉନ୍‌ ଯୋଗୁଁ ଘରେ ରହିଥିଲେ । ନିକଟ ସମ୍ପର୍କୀୟ ପଜିଟିଭ ଚିହ୍ନଟ ହେବା ପରେ ଏପ୍ରିଲ ୨୧ଠାରୁ ୨୩ ତାରିଖ ଯାଏଁ କ୍ୱାରେଣ୍ଟାଇନ୍‌ରେ ରହିଥିଲେ । ପରେ ୨୩ ତାରିଖରେ ଟେଷ୍ଟ କରାଯାଇଥିଲା ରିପୋର୍ଟ ପଜିଟିଭ ଆସିବା ପରେ ତାଙ୍କୁ କଳିଙ୍ଗ ନଗର ସ୍ଥିତ ଟାଟା କୋଭିଡ ହସ୍ପିଟାଲରେ ଭର୍ତ୍ତି କରାଯାଇଥିଲା ।

୮୭ ନମ୍ୱର ଆକ୍ରାନ୍ତ:  ୮୦ ବର୍ଷୀୟା ଏହି ମହିଳା ଜଣଙ୍କ ବାସୁଦେବପୁର ଯାଜପୁର ଅଞ୍ଚଳର । ସେ ମଧ୍ୟ ୭୩ ନମ୍ୱର ଆକ୍ରାନ୍ତଙ୍କ ସଂସ୍ପର୍ଶରେ ଆସିଥିଲେ । ମାର୍ଚ୍ଚ ୨୨ ଠାରୁ ଏପ୍ରିଲ ୨୦ ଯାଏଁ ଲକଡାଉନ୍‌ରେ ରହିଥିଲେ । ସେ ମଧ୍ୟ ଏପ୍ରିଲ ୨୧ଠାରୁ ୨୩ ଯାଏଁ କ୍ୱାରେଣ୍ଟାଇନ୍‌ରେ ରହିଥିଲେ । କୌଣସି ଲକ୍ଷଣ ନଥିବା ସତ୍ତ୍ୱେ ଆକ୍ରାନ୍ତଙ୍କ ସଂସ୍ପର୍ଶରେ ଆସିଥିବାରୁ ତାଙ୍କ ନମୁନା ସଂଗ୍ରହ କରାଯାଇଥିଲା ଏବଂ ରିପୋର୍ଟ ପଜିଟିଭ ଆସିଥିଲା ।  ପରେ ତାଙ୍କୁ ସେହି ଦିନ କଳିଙ୍ଗନଗର ସ୍ଥିତ ଟାଟା କୋଭିଡ ହସ୍ପିଟାଲରେ ଭର୍ତ୍ତି କରାଯାଇଥିଲା ।                        

ଭୁବନେଶ୍ୱର: ସରକାରଙ୍କ ପାଇଁ ପ୍ରତିଟି ଜୀବନ ମୂଲ୍ୟବାନ । ତେଣୁ ଓଡିଶା ବାହାରେ ଥିବା ପ୍ରବାସୀ ଓଡିଆ ଏବେ ଫେରିଆସିବା ଉଚିତ କି ନୁହେଁ, ସେ ପ୍ରଶ୍ନ ଅପ୍ରାସଙ୍ଗିକ । ସେମାନଙ୍କୁ ସୁରକ୍ଷିତ ଭାବେ ଘରକୁ ଫେରାଇଆଣି ପ୍ରିୟଜନଙ୍କୁ ଏକାଠି କରିବା ପାଇଁ ଆହ୍ଵାନ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏଥିପାଇଁ ସମ୍ପୁର୍ଣ୍ଣ ସମାଜ ଏକାଠି ହେବା ସହ ସାମାଜିକ ଚିନ୍ତାଧାରା ସୃଷ୍ଟି ହେବାର ଆବଶ୍ୟକତା ରହିଛି ।

ଘର ଲେଉଟିବାକୁ ଥିବା ସବୁ ଓଡିଆଙ୍କୁ ସହଯୋଗ କରିବା ପାଇଁ ଆଇନ କାନୁନକୁ ସମ୍ମାନ ଦିଅନ୍ତୁ ଓ ପ୍ରଶାସନକୁ ସହଯୋଗ କରିବାକୁ ପରାମର୍ଶ ଦେଇଛନ୍ତି ମୁଖ୍ୟମନ୍ତ୍ରୀ । ଆଜିର କରୋନା ସମ୍ପର୍କିତ ସାମ୍ବାଦିକ ସମ୍ମିଳନୀରେ ଏହା କହିଛନ୍ତି ମୁଖ୍ୟ ମୁଖପାତ୍ର ସୁବ୍ରତ ବାଗଚୀ । ରାଜ୍ୟର ମାଟି, ପାଣି, ପବନ ଉପରେ ସହରାଞ୍ଚଳର ଲୋକଙ୍କ ଯେତିକି ଅଧିକାର ସୁରଟ କି ଅନ୍ୟ ସ୍ଥାନରେ ଫସିଥିବା ପ୍ରବାସୀ ଓଡିଆଙ୍କ ଅଧିକାରୀ ବି ସେତିକି । ତେଣୁ ବିପର୍ଯ୍ୟୟ ଟଳିବା ଯାଏଁ ସରକାର ଓ ସମାଜକୁ ସମନ୍ୱିତ ହେବାକୁ ପଡିବ ।

ଭୁବନେଶ୍ୱର:  ଲକ୍‌ଡାଉନ୍‌ ପରେ ଯେଉଁମାନେ ଆସିବାକୁ ଚାହୁଁଛନ୍ତି ସେମାନଙ୍କୁ ପ୍ରଥମେ ପଞ୍ଜୀକରଣ କରିବାକୁ ପଡ଼ିବେ । ସହରାଞ୍ଚଳ ହେଉ କି ଗ୍ରାମାଞ୍ଚଳ ହେଉ ଯିଏ ମଧ୍ୟ ଓଡ଼ିଶା ଫେରିବେ ତାଙ୍କୁ ସରକାରଙ୍କ ପୋର୍ଟାଲରେ ନାମ ପଞ୍ଜୀକରଣ କରିବାକୁ ପଡ଼ିବ । ପୋର୍ଟାଲରେ ମୋବାଇଲ ଦ୍ୱାରା ମଧ୍ୟ ନାମ ପଞ୍ଜୀକରଣ କରାଯାଇ  ପାରିବ । ଗତକାଲିଠାରୁ ପଞ୍ଜୀକରଣ ଆରମ୍ଭ ହୋଇଯାଇଛି । ତେବେ ଯେଉଁମାନେ ଓଡ଼ିଶା ଫେରିବେ ସେମାନେ ପ୍ରଥମ ୧୪ ଦିନ କ୍ୱାରେଣ୍ଟାଇନରେ ରହିବେ । ତା’ପରେ ସ୍ୱାସ୍ଥ୍ୟ ପରୀକ୍ଷା କରାଯିବ ସୁସ୍ଥ ଥିଲେ ଘରକୁ ଯାଇପାରିବେ । ଓଡ଼ିଶା ଫେରିବାକୁ ଚାହୁଁଥିବା ଲୋକ କେମିତି ନାମ ପଞ୍ଜୀକରଣ କରିବେ ସେନେଇ ଆଜି ସୂଚନା ଦେଇଛନ୍ତି  ପଞ୍ଜାୟତିରାଜ ବିଭାଗର ପ୍ରମୁଖ ଶାସନ ସଚିବ ଦେବରଞ୍ଜନ କୁମାର ସିଂ ।

ପଞ୍ଜୀକରଣ ପାଇଁ କଣ ଜରୁରୀ ?

ପଞ୍ଜୀକରଣ ପାଇଁ ମୋବାଇଲ ଓ ଆଧାର ନମ୍ବର ଜରୁରୀ । ବାହାରେ ରହୁଥିବା ବ୍ୟକ୍ତି ନାମ ପଂଜିକରଣ ବେଳେ ନିଜ ମୋବାଇଲ ନମ୍ବର ଓ ଆଧାର ନମ୍ବର ଦେବା ବାଧ୍ୟତାମୁଳକ ।

କେମିତି କରିବେ ?

covid19.odisha.gov.in ପୋର୍ଟାଲକୁ ଯାଆନ୍ତୁ । ସେଠାରେ  ଫିଲଅଫ୍ ରେଜିଷ୍ଟ୍ରେସନ୍ ରେ କ୍ଲିକ୍ କରନ୍ତୁ । ଏହାପରେ ନିଜ ବିସ୍ତୃତ ବିବରଣୀ ଦିଅନ୍ତୁ । କେଉଁଠୁ ଓଡ଼ିଶାକୁ ଫେରିବେ ସେ ଅଂଚଳ ବାବଦରେ ଆପଣଙ୍କୁ ତଥ୍ୟ ଦେବାକୁ ପଡିବ ।

କିଏ ଫର୍ମ ପୁରଣ କରିପାରିବେ ?

ଫର୍ମକୁ ଆପଣ ନିଜେ ପୁରଣ କରିପାରିବେ କିମ୍ବା ଆପଣଙ୍କ ପାଇଁ ଅନ୍ୟ କେହି ଏହାକୁ ପୁରଣ କରିପାରିବେ । ଆପଣଙ୍କ ସଂପର୍କୀୟ ମଧ୍ୟ ଆପଣଙ୍କ ପାଇଁ ଫର୍ମ ପୁରଣ କରିପାରିବେ । କିମ୍ବା ଆପଣଙ୍କ ପରିବାର ଲୋକ ଚାହିଁଲେ ଫର୍ମ ପୁରଣ କରି ଗ୍ରାମପଂଚାୟତର ନୋଡାଲ ଅଫିସରଙ୍କୁ ଦେଇପାରିବେ । ନୋଡାଲ ଅଫିସର ଆପଣଙ୍କ ପଂଜୀକରଣ କରିବେ ।