ମୁମ୍ବାଇ: ବାତ୍ୟା ନିସର୍ଗ ମହାରାଷ୍ଟ୍ର ଅଲ୍ଲିବାଗ ନିକଟରେ ଲ୍ୟାଣ୍ଡଫଲ କରିବା ପରେ କିଛି ସ୍ଥାନରେ ଅନେକ କ୍ଷୟକ୍ଷତି ହୋଇଛି । କିଛି ସ୍ଥାନରେ ନିସର୍ଗ ଏପରି ହଇଚଇ ସୃଷ୍ଟି କରିଛି ଯେ ଲୋକମାନେ ବିଦ୍ୟୁତ୍ ଏବଂ ଜଳ ଭଳି ସୁବିଧା ପାଇଁ ମଧ୍ୟ ହନ୍ତସନ୍ତ ହୋଇଛନ୍ତି । ଏହି ଝଡ ଯୋଗୁଁ ସଲମାନ ଖାନଙ୍କ ପାନଭେଲ ଫାର୍ମହାଉସରେ ମଧ୍ୟ ବିପୁଳ କ୍ଷୟକ୍ଷତି ଦେଖିବାକୁ ମିଳିଛି । ସଲମାନଙ୍କ ଫାର୍ମହାଉସର କିଛି ଫଟୋ ଏବଂ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
ବାତ୍ୟ ନିସର୍ଗ ପରେ ସଲମାନଙ୍କ ଫାର୍ମ ହାଉସର କିଛି ଚିତ୍ର ଲୁଲିଆ ଭାଣ୍ଟୁର ସେୟାର କରିଛନ୍ତି । ସେ ନିଜ ଅଫିସିଆଲ୍ ଇନଷ୍ଟାଗ୍ରାମ ଆକାଉଣ୍ଟରେ କିଛି ଚିତ୍ର ଏବଂ ଭିଡିଓ ସେୟାର କରିଛନ୍ତି । ଯେଉଁଥିରେ ଝଡ଼ ପୂର୍ବରୁ ଏବଂ ପରର ସ୍ପଷ୍ଟ ଦୃଶ୍ୟ ଦେଖିବାକୁ ମିଳିଛି । ଲୁଲିଆ ଭାଣ୍ଟୁର ସେୟାର କରିଥିବା ଚିତ୍ର ଏବଂ ଭିଡିଓଗୁଡିକରେ ପ୍ରବଳ ପବନ ଓ ବର୍ଷା ହେଉଥିବା ନଜର ଆସିଛି । ଏହା ସହ ଭଙ୍ଗା ଗଛର ମଧ୍ୟ ଫଟୋ ପୋଷ୍ଟ କରିଛନ୍ତି ଲୁଲିୟା । ବାତ୍ୟା ପାଇଁ ସଲମାନଙ୍କ ଫାର୍ମହାଉସର ଅନେକ କ୍ଷୟକ୍ଷତି ଦେଖିବାକୁ ମିଳିଛି ।
ସୂଚନାଯୋଗ୍ୟ ଯେ, ଲୁଲିଆ ଲକଡାଉନ୍ ସମୟରେ ସଲମାନ ଖାନଙ୍କ ଫାର୍ମ ହାଉସରେ ରହିଥିଲେ । ସଲମାନଙ୍କ ସହ ଅଭିନେତ୍ରୀ ଜ୍ୟାକଲିନ୍ ଫର୍ଣ୍ଣାଣ୍ଡିସ୍ ଏବଂ ସଲମାନ ଖାନଙ୍କ ଭଉଣୀ ଅର୍ପିତା ଖାନ ସେମାନଙ୍କ ପରିବାର ସହିତ ରହିଛନ୍ତି । ସମସ୍ତେ ଲକଡାଉନ୍ ନିୟମକୁ ସଂପୂର୍ଣ୍ଣ ଭାବରେ ପାଳନ କରୁଥିବା ମଧ୍ୟ ନଜର ଆସିଛି । ଏହି ସମୟ ମଧ୍ୟରେ ସଲମାନ ତାଙ୍କ ପିତା ସଲିମ ଖାନଙ୍କୁ ମଧ୍ୟ ଦେଖା କରିନଥିଲେ।
ଅନ୍ୟ ତାରକାଙ୍କ ଭଳି ଲକଡାଉନ୍ ଦିନରେ ସଲମାନ ନିଜ ଘରେ ସମୟ ବିତାଉଛନ୍ତି । କିନ୍ତୁ ଏହି ସମୟ ମଧ୍ୟରେ ସେ ସୋସିଆଲ ମିଡିଆରେ ନିଜ ପ୍ରଶଂସକଙ୍କ ସହ ଜଡିତ ଅଛନ୍ତି । ନିଜ ଫାର୍ମ ହାଉସରେ ଥିବାବେଳେ ସଲମାନ ପ୍ରଶଂସକଙ୍କ ପାଇଁ ଏପର୍ଯ୍ୟନ୍ତ ଦୁଇଟି ମ୍ୟୁଜିକ୍ ଭିଡିଓ ରିଲିଜ୍ କରି ସାରିଛନ୍ତି।
