ନନ୍ଦିଘୋଷ ବ୍ୟୁରୋ : କଣ୍ଠଶିଳ୍ପୀ ହ୍ୟୁମାନ ସାଗର ମୃତ୍ୟୁ ବିବାଦ। କଣ୍ଠଶିଳ୍ପୀ ଅର୍ପିତା ଚୌଧୁରୀ ଓ ସୋମେଶ ଶତପଥୀଙ୍କୁ ହାଇକୋର୍ଟରୁ ଅନ୍ତରୀଣ ସୁରକ୍ଷା। ସୋମେଶ ଓ ଅର୍ପିତାଙ୍କ ତରଫରୁ ରୁଜୁ ହୋିଥିବା ଆଗୁଆ ଜାମିନ ଆବେଦନର ହାଇକୋର୍ଟ ପ୍ରାରମ୍ଭିକ ଶୁଣାଣି କରି ରାଜ୍ୟ ସରକାରଙ୍କୁ କେସ୍ ଡାଏରି ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି। ମାମଲାର ପରବର୍ତ୍ତୀ ଶୁଣାଣି ପର୍ଯ୍ୟନ୍ତ ମର୍କତନଗର ପୋଲିସ ଆବେଦନକାରୀଙ୍କୁ ହେପାଜତକୁ ନନେବାକୁ ହାଇକୋର୍ଟ ଅନ୍ତରୀଣ ନିର୍ଦ୍ଦେଶ ଦେଇଛନ୍ତି। ହ୍ୟୁମାନଙ୍କ ମା’ ଶେଫାଳି ସୁନାଙ୍କ ଅଭିଯୋଗକୁ ଆଧାର କରି ମର୍କତନଗର ଥାନାରେ ଡିସେମ୍ବର ୨୧ରେ ସୋମେଶ, ଅର୍ପିତାଙ୍କ ସମେତ ୯ ଜଣଙ୍କ ବିରୋଧରେ ପୋଲିସ ମାମଲା ରୁଜୁ କରିଥିଲା। ଆସନ୍ତା ଫେବୃଆରୀ ୧୬ରେ ମାମଲାର ପରବର୍ତ୍ତୀ ଶୁଣାଣି ।
ଇରାନରେ ଉପରେ ହେବ କି ବଡ଼ଧରଣର ଆକ୍ସନ ; ଆଜି ଟ୍ରମ୍ପ ଡାକିଛନ୍ତି ଉଚ୍ଚସ୍ତରୀୟ ବୈଠକ
ନନ୍ଦିଘୋଷ ବ୍ୟୁରୋ : ଇରାନରେ ପ୍ରବେଶ କରିବ ଆମେରିକା ସେନା ନା ହେବ ସିକ୍ରେଟ ଅପରେସନ।ଆଜିର ବୈଠକରେ ହୋଇପାରେ ଫାଇନାଲ। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଆଜି ଡାକିଛନ୍ତି ଉଚ୍ଚସ୍ତରୀୟ ବୈଠକ। ପ୍ରମୁଖ ଅଧିକାରୀଙ୍କ ସହ ଗୁରୁତ୍ଵପୂର୍ଣ୍ଣ ପ୍ରସଙ୍ଗ ନେଇ ଆଲୋଚନା କରିବେ ରାଷ୍ଟ୍ରପତି ଟ୍ରମ୍ପ। ଇରାନର କାର୍ଯ୍ୟକଳାପ ନେଇ ପରବର୍ତ୍ତୀ କାର୍ଯ୍ୟାନୁଷ୍ଠାନ ଉପରେ ବୈଠକରେ ଆଲୋଚନା ହୋଇପାରେ। ଆନ୍ଦୋଳନକାରୀଙ୍କ ବିରୋଧରେ ଇରାନ ସରକାର ନେଉଥିବା କଠୋର ପଦକ୍ଷେପ ବିରୋଧରେ କିଛି ଗୁରୁତ୍ଵପୂର୍ଣ୍ଣ ନିଷ୍ପତ୍ତି ନେଇପାରନ୍ତି ରାଷ୍ଟ୍ରପତି ଟ୍ରମ୍ପ। ବୈଠକରେ ଆମେରିକା ବୈଦେଶିକ ମନ୍ତ୍ରୀ ମାର୍କୋ ରୁବିଓ, ପ୍ରତିରକ୍ଷା ମନ୍ତ୍ରୀ ପିଟ୍ ହେଗସେଥଙ୍କ ସହ ଜଏଣ୍ଟ ଚିଫ୍ ଅଫ୍ ଷ୍ଟାଫର ଅଧ୍ୟକ୍ଷ ଜେନେରାଲ ଡେନ କେନ୍ ସାମିଲ ହେବେ। ଏଥିରେ ଇରାନ ଉପରେ ସାଇବର ଅସ୍ତ୍ରଶସ୍ତ୍ର ବ୍ୟବହାର, ନୂତନ ପ୍ରତିବନ୍ଧକ, ସୈନ୍ୟ ଅପରେସନ କିମ୍ବା ଇରାନ ବିରୋଧରେ ସମର୍ଥନ ବଢାଇବା ନେଇ ବିକଳ୍ପ ଉପରେ ଆଲୋନଚା ହୋଇପାରେ। ପୂର୍ବରୁ ଇରାନ ଶାସନକୁ କଡ଼ା ଚେତାବନୀ ଦେଇସାରିଛନ୍ତି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଏଥିରେ ଇରାନ ବିରୋଧୀ ଶକ୍ତିଗୁଡିକୁ ମଜଭୁତ କରିବା ନେଇ ମଧ୍ୟ ପଦକ୍ଷେପ ଗ୍ରହଣ କରିପାରନ୍ତ ଟ୍ରମ୍ପ। ଏହା ପୂର୍ବରୁ ଗଣମାଧ୍ୟମକୁ ପ୍ରତିକ୍ରିୟା ଦେଇ ଟ୍ରମ୍ପ କହିଥିଲେ ଆମେ କିଛି ବଡ଼ ପଦକ୍ଷେପ ଗ୍ରହଣ କରିବା ନେଇ ଚିନ୍ତା କରୁଛି। ଯଦି ଆମେରିକା ସୈନ୍ୟ ଠିକଣାକୁ ଟାର୍ଗେଟ କରାଯାଏ ତେବେ ଏମିତି ଜବାବ ଦିଆଯିବ ଯେପରିକି ଇରାନ କେବେ ଚିନ୍ତା କରିନଥିବ ବୋଲି କହିଛନ୍ତି ରାଷ୍ଟ୍ରପତି ଟ୍ରମ୍ପ।
ଆଜି ତାମିଲନାଡୁ ଯିବେ କଂଗ୍ରେସ ନେତା ରାହୁଲ ଗାନ୍ଧୀ ; ନୀଳଗିରି ସ୍ଥିତ ଘରୋଇ ସ୍କୁଲ କାର୍ଯ୍ୟକ୍ରମରେ ହେବେ ସାମିଲ
ନନ୍ଦିଘୋଷ ବ୍ୟୁରୋ : ଆଜି ତାମିଲନାଡୁ ଗସ୍ତରେ ଯିବେ କଂଗ୍ରେସନେତା ରାହୁଲ ଗାନ୍ଧି । ନୀଳଗିରିରେ ଏକ ଘରୋଇ ସ୍କୁଲ କାର୍ଯ୍ୟକ୍ରମରେ ଯୋଗଦେବେ । ତେବେ ରାହୁଲଙ୍କ ଗସ୍ତକୁ ନେଇ ଆରମ୍ଭ ହୋଇଯାଇଛି ରାଜନୈତିକ ଚର୍ଚ୍ଚା । ଆଉ କିଛି ମାସପରେ ତାମିଲନାଡୁ ବିଧାନସଭା ନିର୍ବାଚନ । ଏହି ନିର୍ବାଚନ ପାଇଁ କଂଗ୍ରେସ ଏବଂ ଡିଏମକେ ମଧ୍ୟରେ ମେଣ୍ଟ ହେବାନେଇ ର୍ଚ୍ଚା ହେଉଛି । ଦୁଇ ଦଳ ମଧ୍ୟରେ ସମ୍ପର୍କ ଏବେ ବି ଅକ୍ଷୁର୍ଣ୍ଣ ଅଛି । କିନ୍ତୁ ଉଭୟ ପକ୍ଷର ଅନେକ ଘଟଣାକ୍ରମ ଯୋଗୁଁ ଏହା ତିକ୍ତତା ଦେଇ ଗତି କରୁଛି । ସେପ୍ଟେମ୍ବର ୨୦୨୫ରେ ତାଙ୍କ ରାଜନୈତିକ ରାଲିରେ ୪୧ ଜଣଙ୍କ ମୃତ୍ୟୁ ପରେ ବିଜୟଙ୍କ ସହ ରାହୁଲଙ୍କ ଟେଲିଫୋନ୍ ବାର୍ତ୍ତାଳାପ କଂଗ୍ରେସ ଏବଂ TVK ଏକାଠି ହେବା ବିଷୟରେ କଳ୍ପନାଜଳ୍ପନା ସୃଷ୍ଟି ହୋଇଥିଲା । ଏହାରି ଭିତରେ ଡିଏମକେ ସଭାପତି ଏମକେ ଷ୍ଟାଲିନ ରାହୁଲ ଏବଂ ଏଆଇସିସି ସଭାପତି ମଲ୍ଲିକାର୍ଜୁନ ଖଡଗେଙ୍କୁ ଭେଟି ମେଣ୍ଟ ସମ୍ପର୍କରେ ଆଲୋଚନା କରିଥିବା ସୂଚନା ରହିଛି । ଏହା ପରେ କଂଗ୍ରେସ ଡିଏମକେ ସହିତ ଆସନ ବଣ୍ଟନ ଆଲୋଚନା ଆରମ୍ଭ କରିବା ପାଇଁ ରାଜ୍ୟ ପ୍ରଭାରୀ ଗିରିଶ ଚୋଡଙ୍କ ନେତୃତ୍ୱରେ ଏକ ପାଞ୍ଚ ସଦସ୍ୟ ବିଶିଷ୍ଟ କମିଟି ଗଠନ ହୋଇଥିଲା । ସୂଚନା ଅନୁଯାଇ ୨୦୨୫ ଡିସେମ୍ବର ୩ ତାରିଖରେ ଷ୍ଟାଲିନଙ୍କ ସହ ପ୍ରଥମ ବୈଠକରେ ୭୦ ଟି ଆସନ ଡିଏମକେ ମାଗିବାରୁ କଂଗ୍ରେସ ଅସନ୍ତୁଷ୍ଟ ଥିଲା । ତେବେ ଏହି ଗସ୍ତବେଳେ ମଧ୍ୟ ଡିଏମକେ ଏବଂ କଂଗ୍ରେସ ମଧ୍ୟରେ ରାଜନୈତିକ ଗୋଟି ଚାଳନାକୁ ନେଇ ଆଲୋଚନା ହୋଇପାରେ ବୋଲି ରାଜନୈତିକ ବିଶେଷଜ୍ଞ କହିଛନ୍ତି ।
ଏଯାଏଁ ମିଳିଲାନି ମୃତ ଅଟୋ ଚାଳକ ବିଷ୍ଣୁଙ୍କ ପରିବାରକୁ ସହାୟତା
ବାପା ! କୁଆଡ଼େ ଗଲ ? ଆମେ କେମିତି ଚଳିବୁ ? ଘର ଚଳୁନି…ଆମ ପାଠ ପଢ଼ିବା କଣ ବନ୍ଦ ହୋଇଯିବ ? ତୁମେ ଗଲା ପରଠୁ ଆମେ ଏବେ ବେସାହାରା। କାନ୍ଦି କାନ୍ଦି ବୋଉ ଆଖିରୁ ଲୁହ ଶୁଖିଲାଣି।…. ୫୭ ବର୍ଷୀୟ ବିଷ୍ଣୁ ଚରଣ ପାତ୍ର। ପେଶାରେ ଥିଲେ ଅଟୋ ଚାଳକ। ଗତ ୩ ତାରିଖରେ ରୁପାଲି ଛକରେ ଆମ ବସ ଧକ୍କାରେ ଚାଲିଗଲା ଜୀବନ। ପରିବାରର ଥିଲେ ଏକମାତ୍ର ରୋଜଗାରିଆ ବ୍ଯକ୍ତି। ଘରେ ବିଧବା ପତ୍ନୀ ଓ ଦୁଇଟି ପୁଅ ଓ ଝିଅ। କେମିତି ଚାଲିବ ସଂସାର ? ଘର ଚଳିବାକୁ ଟଙ୍କାଟିଏ ନାହିଁ। ନାହିଁ କାହାରି ସହାୟତା। ବାଲିଅନ୍ତା ବ୍ଲକ ଭିଙ୍ଗାରପୁର ଗାଁର କୈବର୍ତ୍ତ ସାହିର ଅଟୋ ଚାଳକ ବିଷ୍ଣୁ ଚରଣ ପାତ୍ରଙ୍କ ଅକାଳ ମୃତ୍ଯୁରେ ଭାଙ୍ଗି ପଡ଼ିଛନ୍ତି ପରିବାର ସଦସ୍ୟ ।
ଘର ପରିବାର କହିବାକୁ ଗଲେ ବିଧବା ପତ୍ନୀ, ଦୁଇଟି ପୁଅ ଓ ଝିଅ। ଝିଅଟି ବିଜ୍ଞାନରେ ଗ୍ରାଜୁଏଟ୍ ପଢ଼ୁଥିବା ବେଳେ, ପୁଅଟି ଯୁକ୍ତ ଦୁଇ ଛାତ୍ର। ସରକାର ଘୋଷଣା କରିଥିବା ୪ ଲକ୍ଷ ଟଙ୍କାର ଅନୁକମ୍ପା ମୂଳକ ସହାୟତା ଏଯାଏଁ ମିଳିନି । ଗତ ସୋମବାର ଦିନ ମୁଖ୍ୟମନ୍ତ୍ରୀଙ୍କ ଜନ ଶୁଣାଣିରେ ମୁଖ୍ୟମନ୍ତ୍ରୀଙ୍କୁ ସାକ୍ଷାତ କରି ଦୁଃଖ ଜଣାଇଥିଲେ। ହେଲେ ଏ ପର୍ଯ୍ୟନ୍ତ ତାଙ୍କ ପରିବାରକୁ ସହାୟତା ରାଶି ବାବଦରେ ଟଙ୍କାଟିଏ ବି ମିଳିନି। ଦୁଇ ପିଲାଙ୍କ ଭବିଷ୍ୟତ ଅନ୍ଧାର ହୋଇଯାଇ ପଡ଼ିଥିବା ବେଳେ ବିଧବା ପତ୍ନୀ ଏବେ ସରକାରଙ୍କ ସହାୟତାକୁ ଚାତକ ପରି ଚାହିଁ ବସିଛନ୍ତି। ଦିନକୁ ଦିନ ବଢ଼ୁଛି ଆମ ବସ ଦୁର୍ଘଟଣା। ସ୍ଥିତି ଏମିତି ହେଲାଣି ଆମ ବସ ଏବେ ଯମ ବସ ପାଲଟିଥିବା ନେଇ ଲୋକଙ୍କ ମନରେ ଧାରଣା ହୋଇଗଲାଣି। ଦୁର୍ଘଟଣାରେ ବିଷ୍ଣୁଙ୍କ ଜୀବନ ଗଲା। ଅତିଶୀଘ୍ର ସହାୟତା ରାଶି ବିଷ୍ଣୁଙ୍କ ପରିବାରକୁ ମିଳିଲେ ବଞ୍ଚିଯିବ ୩ଟି ଜୀବନ।
ପ୍ରଶ୍ନପତ୍ର ଲିକ ରୋକିବ AI କ୍ୟାମେରା ! ଉଚ୍ଚ ମାଧ୍ୟମିକ ଶିକ୍ଷା ପରିଷଦ ବ୍ୟବହାର କରିବ ଅତ୍ୟାଧୁନିକ ଜ୍ଞାନକୌଶଳ
ପ୍ରଶ୍ନପତ୍ର ଲିକ ରୋକିବ AI କ୍ୟାମେରା ! ଉଚ୍ଚ ମାଧ୍ୟମିକ ଶିକ୍ଷା ପରିଷଦ ବ୍ୟବହାର କରିବ ଅତ୍ୟାଧୁନିକ ଜ୍ଞାନକୌଶଳ । ୨୧୧ଟି ହବରେ ଏହା ନିଜ ଆଡୁ ଲଗାଇବ ଉଚ୍ଚ ମାଧ୍ୟମିକ ଶିକ୍ଷା ପରିଷଦ । ଏଥି ପାଇଁ କଲେଜର ଇଣ୍ଟେର୍ନେଟ ଉପରେ ନିର୍ଭର କରିବାକୁ ପଡ଼ିବ ନାହିଁ । ଏହି ଏଆଇ କ୍ୟାମେରା ଗୁଡ଼ିକରେ ଲଗାଯିବ ୧୨୮ ଜିବି ସିମ କାର୍ଡ । ଏଥିପାଇଁ ହବ ଗୁଡ଼ିକୁ ୟୁପିଏସ୍ ପାୱାର ବ୍ୟାକଅପ ବି ଯୋଗାଇ ଦିଆଯିବ । ଆସନ୍ତା ଫେବୃଆରୀ ୯ ସୁଦ୍ଧା ସବୁ ହବରେ ଏଆଇ କ୍ୟାମେରା ଲଗାଇବା ପରେ ୧୦ ତାରିଖରେ ପହଞ୍ଚିବ ପ୍ରଶ୍ନପତ୍ର ।
ସେହିପରି ଉଚ୍ଚ ମାଧ୍ୟମିକ ଶିକ୍ଷା ପରିଷଦ ଅଫିସରେ ଖୋଲିଲା କଣ୍ଟ୍ରୋଲ ରୁମ । ପ୍ରଥମ ଥର ପାଇଁ ପ୍ରାକ୍ଟିକାଲ ପରୀକ୍ଷାକୁ ଏହି କଣ୍ଟ୍ରୋଲ ରୁମରୁ ମନିଟର କରାଯାଇଛି । ପୂର୍ବରୁ କେବଳ ଥିଓରୀ ପରୀକ୍ଷାକୁ କଣ୍ଟ୍ରୋଲ ରୁମରୁ ମନିଟର କରାଯାଉଥିଲା । ଏହା ଦ୍ବାରା ପିଲାମାନଙ୍କ ସମେତ ଏକ୍ସଟରନାଲମାନଙ୍କ ଗତିବିଧି ଉପରେ ବି ନଜର ରଖାଯାଉଛି । କାରଣ ଏକ୍ସଟରନାଲଙ୍କୁ ନେଇ ବିଭିନ୍ନ ସମୟରେ ଅଭିଯୋଗ ଆସୁଥିଲା । ପରିଷଦର ପ୍ରଥମ ମହଲା ସମ୍ମିଳନୀ କକ୍ଷରେ ଖୋଲାଯାଇଥିବା ଏହି ରୁମ୍ ପାଇଁ ମୋବାଇଲ୍ ନମ୍ବର ୦୬୭୪-୨୩୦୩୦୦୩ ଜାରି ହୋଇଛି। ପରୀକ୍ଷାର ସମସ୍ତ ପ୍ରକ୍ରିୟା ସୁପରିଚାଳନା ସହ ୨୪ ଘଣ୍ଟିଆ ମନିଟରିଂ ବ୍ୟବସ୍ଥା ହୋଇଛି । ପରୀକ୍ଷା କେନ୍ଦ୍ରର ସିସିଟିଭି କ୍ୟାମେରାକୁ ପରିଷଦ କାର୍ଯ୍ୟାଳୟ ସହ ସଂଯୋଗ କରାଯାଇଛି । ଏହା ଦ୍ବାରା ଅନ୍ଲାଇନ୍ ମାଧ୍ୟମରେ ପରୀକ୍ଷାର ଟିକିନିଖି ଖବର ପରିଷଦ ନିକଟରେ ରହି ପାରିବ । ଯଦି କୌଣସି ପ୍ରକାର ଅସୁବିଧା ଦେଖାଦିଏ ତେବେ ସଙ୍ଗେ ସଙ୍ଗେ କାର୍ଯ୍ୟାନୁଷ୍ଠାନ ନିଆଯିବ ।
ଏଆଇ ଏକ ପ୍ୟାଟର୍ଣ୍ଣ ବେସଡ଼ କ୍ୟାମେରା । ଏଥିରେ ପୂର୍ବରୁ ଅନେକ ଆପ୍ଲିକେସନ ଫିଡ଼ ହୋଇଥାଏ । ଯଦି ପରୀକ୍ଷା ହବକୁ କେହି ମଣିଷ ପଶିବ, ତାହା ଆଲର୍ଟ କରି ଦେବ । ଜଣେ ଲୋକ ସବୁ ଏଆଇ କ୍ୟାମେରାକୁ ମନିଟର କରି ପାରିବ । କାରଣ ଏହାର ଗତିବିଧି ଗୁଡ଼ିକ ଆଗରୁ ଫିଡ଼ ହୋଇଥିବାରୁ, ଆଲର୍ଟ ସିଗନାଲ ଆସିବ । ସିସିଟିଭି କ୍ୟାମେରା ମନିଟର କରିବାକୁ ଅଧିକ ଲୋକ ଆବଶ୍ୟକ । ହେଲେ ଏଆଇ କ୍ୟାମେରାରେ ଖର୍ଚ୍ଚ ଓ ମାନବ ସମ୍ବଳ କମ ଲାଗିବ ବୋଲି IT ବିଶେଷଜ୍ଞ ମତ ଦେଇଛନ୍ତି । ସେପଟେ ଗତ ବର୍ଷ ନଭେମ୍ବର ଶେଷ ସୁଦ୍ଧା ସମସ୍ତ ପରୀକ୍ଷା କେନ୍ଦ୍ର ଓ ହବ ଗୁଡ଼ିକରେ ସିସିଟିଭି କ୍ୟାମେରା ଲଗାଯାଇଥିଲା । ଚଳିତ ବର୍ଷ ସାରା ରାଜ୍ୟରେ ୧୩୫୮ଟି ପରୀକ୍ଷା କେନ୍ଦ୍ର ଓ ୭ଟି ଉପକେନ୍ଦ୍ରରେ କଳା, ବିଜ୍ଞାନ, ବାଣିଜ୍ୟ ଓ ଧନ୍ଦାମୂଳକ ଥିଓରି ପରୀକ୍ଷା ଅନୁଷ୍ଠିତ ହେବ । ଏଥର ପରୀକ୍ଷା ଦେବାକୁ ୪ ଲକ୍ଷ ୧ ହଜାର ୬୨୩ ଜଣ ଛାତ୍ରଛାତ୍ରୀ ଫର୍ମ ଫିଲଅପ୍ କରିଛନ୍ତି ।
ସୁଶାସନରେ ସାମିଲ ହେଲା ସଡ଼କ ସୁରକ୍ଷା: ଆରମ୍ଭ ହେଲା ମୁଖ୍ୟମନ୍ତ୍ରୀ ସଡ଼କ ସୁରକ୍ଷା ଯୋଜନା ସମ୍ମାନ
ସୁଶାସନରେ ସାମିଲ ହେଲା ସଡ଼କ ସୁରକ୍ଷା। ଆରମ୍ଭ ହେଲା ମୁଖ୍ୟମନ୍ତ୍ରୀ ସଡ଼କ ସୁରକ୍ଷା ଯୋଜନା ସମ୍ମାନ। ସଡ଼କ ପରିବହନ ନିଗମରେ ୪୬ କୋଟି ଟଙ୍କାରେ ୧୦୦ଟି ନୂତନ BS-6 ବସ୍ ସାମିଲ୍। ପୂର୍ତ୍ତ ବିଭାଗର ୬ ହଜାର ୭୦୦ କୋଟି ଟଙ୍କାର ୭୧ଟି ପ୍ରକଳ୍ପର ଶୁଭାରମ୍ଭ। ୯୫୨ କୋଟି ଟଙ୍କାରେ ଜୟଦେବ ବିହାରରୁ ନନ୍ଦନକାନନ ପର୍ଯ୍ୟନ୍ତ ନୂଆ ଏଲିଭେଟେଡ୍ କରିଡରର ଭିତ୍ତିପ୍ରସ୍ତର ସ୍ଥାପିତ। ୩ ହଜାର ୬୨୩ କୋଟି ଟଙ୍କା ଅଟକଳରେ ନୂଆ ଲୋକସେବା ଭବନ ପାଇଁ ଭିତ୍ତିପ୍ରସ୍ତର ପଡ଼ିଛି। କଳିଙ୍ଗା ଘାଟିରେ ସତର୍କ ସୂଚନା ଘଣ୍ଟି ଉଦ୍ଘାଟିତ ହୋଇଥିବା ବେଳେ, ଗୋଟେ ପଟୁ ଗାଡି ଆସୁଥିଲେ ଆରପଟୁ ବାଜିବ ସାଇରନ୍। ଭୁବନେଶ୍ବରରେ ଉଦଘାଟିତ ହୋଇଛି ୧୫ଟି ଚାର୍ଜିଙ୍ଗ ଷ୍ଟେସନ। ୧୪ଟି ନୂତନ ଅଟଳ ବସ୍ଷ୍ଟାଣ୍ଡ ଲୋକାର୍ପିତ ହୋଇଛି। ରାଜ୍ୟ ସଡକ ପରିବହନ ନିଗମର ବସ୍ ପାଇଁ ସ୍ମାର୍ଟ କାର୍ଡର ଶୁଭାରମ୍ଭ ସହ ଯାତ୍ରୀମାନେ କାଟିବେ କ୍ୟାସଲେସ୍ ଟିକେଟ୍। ସଡକ ସୁରକ୍ଷା ପାଇଁ ସରକାରଙ୍କ ପକ୍ଷରୁ ପ୍ରସ୍ତୁତ ୪ ‘E’ ନୀତି ଯଥା ଏଜୁକେସନ, ଏନ୍ଫୋର୍ସମେଣ୍ଟ, ଇଞ୍ଜିନିୟରିଂ ଏବଂ ଏମର୍ଜେନ୍ସି ସହିତ ମୁଖ୍ୟମନ୍ତ୍ରୀ ଯୋଡ଼ିଲେ ଆଉ ‘E’ ଏନ୍ଭିରନ୍ମେଣ୍ଟ ଓ ଇଭାଲ୍ୟୁଏସନ। ମୁଖ୍ୟମନ୍ତ୍ରୀ ସଡ଼କ ସୁରକ୍ଷା ଉପରେ ଗୁରୁତ୍ବ ଦେବା ସହ ସମସ୍ତଙ୍କୁ ସଡ଼କ ସୁରକ୍ଷା ନିୟମର ଅନୁପାଳନ ପାଇଁ ଅପିଲ କରିଛନ୍ତି।
ଜୟଦେବ ବିହାରରୁ ନନ୍ଦନକାନନ ଯାଏଁ ହେବ ଏଲିଭେଟେଡ୍ କରିଡର। କଳିଙ୍ଗ ହସ୍ପିଟାଲ, ଡ଼ମଣା, ପଟିଆ, କିଟ୍ ଛକରେ ହେବ ଓଭରବ୍ରିଜ୍। ପ୍ରଥମ ପର୍ଯ୍ୟାୟରେ ୯୫୨ କୋଟି ଟଙ୍କା ଖର୍ଚ୍ଚ ହେବ। ୨ ବର୍ଷରେ ସରିବ ପ୍ରକଳ୍ପ କାର୍ଯ୍ୟ। ଏହାର ଭିତ୍ତିପ୍ରସ୍ତର ସହ ନୂଆ ବିଧାନସଭା ଓ ଲୋକସେବା ଭବନ ପାଇଁ ମୂଳଦୂଆ ପକାଇଛନ୍ତି ମୁଖ୍ୟମନ୍ତ୍ରୀ। ପ୍ରଥମ ପର୍ଯ୍ୟାୟରେ ୩ ହଜାର ୬୭୩ କୋଟି ଟଙ୍କା ଦିଆଯାଇଛି। ୭୧ ଏକର ଜାଗାରେ ସମସ୍ତ ଗୁରୁତ୍ବପୂର୍ଣ୍ଣ କାର୍ଯ୍ୟାଳୟ ଗୋଟିଏ ପରିସରରେ ରହିବ। ଆଗକୁ ରାଜ୍ୟରେ ବିଧାନସଭା ଆସନ ବଢିବାର ସମ୍ଭାବନା ଥିବାରୁ ୩ଶହ ଆସନ ବିଶିଷ୍ଟ ବିଧାନସଭା ନିର୍ମାଣ ହେବ। ସେହିପରି ମହିଳାଙ୍କୁ ସଶକ୍ତ କରିବାକୁ ବିନା ସୁଧରେ ଚାରିଚକିଆ ଗାଡ଼ି ଦେଇ ଆମ ସୁବାହକ ଯୋଜନାର ମଧ୍ୟ ଶୁଭାରମ୍ଭ ହୋଇଛି। ଡ୍ରାଇଭ୍ ସେଫ୍, କମ୍ ହୋମ୍ ସେଫ୍ର ମନ୍ତ୍ର ରାଜ୍ୟବାସୀଙ୍କୁ ଦେଇଛନ୍ତି ମୁଖ୍ୟମନ୍ତ୍ରୀ।
ଲୋକସେବା ଭବନ କନଭେନସନ୍ ସେଣ୍ଟରରେ ଅନୁଷ୍ଠିତ ରାଜ୍ୟସ୍ତରୀୟ କାର୍ଯ୍ୟକ୍ରମରେ ପୂର୍ତ୍ତ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ, ବାଣିଜ୍ୟ ପରିବହନ ମନ୍ତ୍ରୀ ବିଭୂତି ଭୂଷଣ ଯେନା, ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ, ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ, ଏକାମ୍ର ବିଧାୟକ ବାବୁ ସିଂଙ୍କ ସମେତ ବିଭାଗୀୟ ସଚିବ ଉଷା ପାଢ଼ୀ, ଓଏସଆରଟିସି ସିଏମଡି ଓ ପରିବହନ କମିଶନର ଅମିତାଭ ଠାକୁର ପ୍ରମୁଖ ଉପସ୍ଥିତ ଥିଲେ।
ଭାରତ- ଜର୍ମାନୀ ମଧ୍ୟରେ ଆରମ୍ଭ ହେଲା ନୂତନ ଯୁଗ: ୮ ନିୟୁତ ଡଲାରର ଚୁକ୍ତି ସ୍ୱାକ୍ଷରିତ
ଭାରତ- ଜର୍ମାନୀ ମଧ୍ୟରେ ଆରମ୍ଭ ହେଲା ନୂତନ ଯୁଗ। ଦ୍ଵିପାକ୍ଷିକ ସମ୍ପର୍କ ନେଇ ପିଏମ ମୋଦିଙ୍କ ସହ ଆଲୋଚନା କରିଛନ୍ତି ଜର୍ମାନୀ ଚାନ୍ସେଲର ଫ୍ରେଡରିକ୍ ମର୍ଜ। ଜର୍ମାନୀ ସହ ୮ ନିୟୁତ ଡଲାରର ଚୁକ୍ତି ସ୍ୱାକ୍ଷର କରିଛି ଭାରତ। ଜର୍ମାନୀ ସହ ମିଶି ଭାରତ ପ୍ରସ୍ତୁତ କରିବ ୬ଟି ଯୁଦ୍ଧପୋତ। ଜର୍ମାନୀ ଜ୍ଞାନକୌଶଳରେ ନିର୍ମିତ ଅତ୍ୟାଧୁନିକ ଲଢୁଆ ବୁଡ଼ାଜାହାଜ ପାଇବ ଭାରତୀୟ ନୌସେନା। ମୁମ୍ବାଇ ସ୍ଥିତ ମାଜାଗନ୍ ଡକୟାର୍ଡସ୍ ଲିମିଟେଡ୍ ଏବଂ ଜର୍ମାନୀର ପ୍ରତିରକ୍ଷା କମ୍ପାନୀ ଥାଇସେନକୃପ ମେରାଇନ ସିଷ୍ଟମ୍ସ TKMS ମଧ୍ୟରେ ଏହି ଚୁକ୍ତି ସ୍ୱାକ୍ଷରିତ ହୋଇଛି। ଭାରତୀୟ ମୁଦ୍ରାରେ ପ୍ରାୟ ୭୨ ହଜାର କୋଟି ଟଙ୍କା ମୂଲ୍ୟର ଏହି ଚୁକ୍ତି ଭାରତୀୟ ନୌସେନା ଇତିହାସର ସବୁଠାରୁ ବଡ଼ ବୋଲି ବିବେଚନା କରାଯାଉଛି। ମେକ୍ ଇନ୍ ଇଣ୍ଡିଆ ଏବଂ ଆତ୍ମନିର୍ଭର ଭାରତ ଅଭିଯାନକୁ ଏହା ପ୍ରୋତ୍ସାହନ ଦେବ। ଏହି ଡିଲ ଦ୍ଵାରା ଭାରତ ମହାସାଗରରେ ଭାରତର ସାମୁଦ୍ରିକ ନିରୀକ୍ଷଣ, ପ୍ରତିରୋଧ ଏବଂ ରଣନୈତିକ ସନ୍ତୁଳନ ଆହୁରି ସୁଦୃଢ଼ ହେବ। ଏହି ଅବସରରେ ପ୍ରଧାନମନ୍ତ୍ରୀ କହିଛନ୍ତି ଯେ, ଭାରତ ଓ ଜର୍ମାନୀ କେବଳ ଆର୍ଥିକ ଅଂଶୀଦାର ନୁହଁନ୍ତି ବରଂ ବିଶ୍ୱ ଶାନ୍ତି ଏବଂ ସ୍ଥିରତା ପାଇଁ ପ୍ରତିବଦ୍ଧ ।
ଜର୍ମାନ ଚାନ୍ସଲର ଫ୍ରେଡ୍ରିକ ମର୍ଜଙ୍କ ଦୁଇ ଦିନିଆ ଗସ୍ତ ଅବସରରେ ଦୁଇ ଦେଶ ମଧ୍ୟରେ ଅନେକ ଗୁରୁତ୍ଵପୂର୍ଣ୍ଣ ଚୁକ୍ତି ସ୍ଵାକ୍ଷରିତ ହେବ। ଆଜି ଉଭୟ ନେତା ପ୍ରଥମେ ଗାନ୍ଧିନଗରରେ ସାବରମତୀ ଆଶ୍ରମ ପରିଦର୍ଶନ କରିଥିଲେ। ଏହାପରେ ଅନ୍ତର୍ଜାତୀୟ ଗୁଡ଼ି ମହୋତ୍ସବରେ ଅଂଶଗ୍ରହଣ କରିଥିଲେ। ଚାନ୍ସଲର ମର୍ଜ ପ୍ରଧାନମନ୍ତ୍ରୀ ମୋଦିଙ୍କ ସହ ମିଶି ଗୁଡ଼ି ଉଡ଼ାଇଥିଲେ। ଚାନ୍ସେଲର ଫ୍ରେଡରିକ୍ ମର୍ଜଙ୍କ ଗସ୍ତ ବର୍ତ୍ତମାନ ସମୟରେ ଅନେକ ଗୁରୁତ୍ଵ ବହନ କରୁଛି। ଦୁଇ ଦେଶ ମଧ୍ୟରେ ରଣନୈତିକ, ଅର୍ଥନୈତିକ ଏବଂ ସୁରକ୍ଷା ସହଯୋଗକୁ ଏହା ଆହୁରି ମଜଭୁତ କରିବ। ପ୍ରଧାନମନ୍ତ୍ରୀ ମୋଦି ଏବଂ ଚାନ୍ସେଲର ମର୍ଜଙ୍କ ମଧ୍ୟରେ ଶେଷ ସାକ୍ଷାତ G7 ଶିଖର ସମ୍ମିଳନୀରେ ହୋଇଥିଲା। ସେଠାରେ ପ୍ରଧାନମନ୍ତ୍ରୀ ମୋଦି ମର୍ଜଙ୍କୁ ଭାରତ ଆସିବାକୁ ନିମନ୍ତ୍ରଣ କରିଥିଲେ। ଦୁଇ ଦେଶ ମଧ୍ୟରେ ହୋଇଥିବା ଦ୍ବିପାକ୍ଷିକ ବୈଠକରେ ପ୍ରଧାନମନ୍ତ୍ରୀ ମୋଦୀଙ୍କ ସହିତ ବୈଦେଶିକ ମନ୍ତ୍ରୀ ଏସ୍ ଜୟଶଙ୍କର, ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ଓ ବୈଦେଶିକ ବ୍ୟାପାର ସଚିବ ବିକ୍ରମ ମିଶ୍ରି ଉପସ୍ଥିତ ଥିଲେ। ଭାରତ-ଜର୍ମାନୀ ମଧ୍ୟରେ କୂଟନୈତିକ ସମ୍ପର୍କର ୭୫ ବର୍ଷରେ ପଦାର୍ପଣ କରିଥିବାବେଳେ ରଣନୈତିକ ସହଭାଗିତା ୨୫ ବର୍ଷ ପୂରଣ କରିଛି ।
ମୋକିମଙ୍କ ଶକ୍ତି ପ୍ରଦର୍ଶନ: ମାର୍ଚ୍ଚରେ ନୂଆ ଦଳ ଗଠନ ପାଇଁ ପଡ଼ିଲା ମୂଳଦୂଆ
ମୋକିମଙ୍କ ଶକ୍ତି ପ୍ରଦର୍ଶନ । ସମାବେଶ କଲେ, ସାଥି ପାଇଲେନି । ବାପାଙ୍କ ମଞ୍ଚରେ ସୋଫିଆଙ୍କ ଲଢ଼େଇ ଆହ୍ବାନ । ମାର୍ଚ୍ଚରେ ନୂଆ ଦଳ ଗଠନ ପାଇଁ ପଡ଼ିଲା ମୂଳଦୂଆ । ମୋ ଓଡ଼ିଶା, ମୋ ଦାୟିତ୍ବ । ଫେରିବ ଗୌରବ, ଦରକାର ଆଉ ଏକ ବିପ୍ଳବ । ରାଜଧାନୀ ଭୁବନେଶ୍ବରରେ ଆୟୋଜିତ ଯୁବ ସମାବେଶ ମଞ୍ଚରେ ଏପରି ସ୍ଲୋଗାନ ଦେଇଛନ୍ତି କଂଗ୍ରେସରୁ ବହିଷ୍କୃତ ହୋଇଥିବା ନେତା ମହମ୍ମଦ ମୋକିମ। ଆଉ ଏବେ ନୂଆ ଆଞ୍ଚଳିକ ଦଳ ଗଠନ କରିବାକୁ ଅଣ୍ଟା ଭିଡିଛନ୍ତି। ଯୁବ ସମାବେଶ ଜରିଆରେ ଶକ୍ତି ପ୍ରଦର୍ଶନ କରି ମୋକିମ ଓଡ଼ିଶାରେ ବିକଳ୍ପ ରାଜନୈତିକ ଦଳର ମୂଳଦୂଆ ପକାଇଛନ୍ତି। ମୋକିମ ଯଦି ନୂଆ ଆଞ୍ଚଳିକ ଦଳ ଗଠନ କରନ୍ତି, ତାଙ୍କ ସହ କେଉଁ ନେତାମାନେ ସାମିଲ ହେବେ ? ତାକୁ ନେଇ ଚର୍ଚ୍ଚା ଲାଗି ରହିଥିବା ବେଳେ, ଯୁବ ସମାବେଶରେ କିନ୍ତୁ ସେପରି କିଛି ଦେଖିବାକୁ ମିଳିନି। ମୋକିମ କହିଛନ୍ତି, ଓଡ଼ିଶାରେ ବିପ୍ଳବର ଆବଶ୍ୟକତା ରହିଛି। ଏଥିଲାଗି ଏକାଠି ହେବେ ଯୁବ ଗୋଷ୍ଠୀ । ମାର୍ଚ୍ଚ ମାସରେ ସେ ନୂଆ ଆଞ୍ଚଳିକ ଦଳ ଗଠନ କରିବେ ବୋଲି କହିଛନ୍ତି।
ମୋକିମ ଫାଉଣ୍ଡେସନର ଯୁବ ସମାବେଶରେ ସାମିଲ ହୋଇ ଝିଅ ସୋଫିଆ ଫିର୍ଦୋଷ ବାପାଙ୍କୁ ମଞ୍ଚରେ ଭୂରି ଭୂରି ପ୍ରଶଂସା କରିଛନ୍ତି। ସଫା ସଫା ସୋଫିଆ ଖୋଲାମଞ୍ଚରେ କହିଥିଲେ, ବାପା ଗୋଟିଏ ମୁଦ୍ଦା ନେଇ ଆଗକୁ ବଢ଼ିଲେ କେହି ତାଙ୍କୁ ଅଟକାଇ ପାରିବେ ନାହିଁ। ତେଣୁ ବାପାଙ୍କ ଲଢ଼େଇରେ ସମସ୍ତଙ୍କୁ ସାମିଲ ହେବାକୁ ପଡିବ ବୋଲି କହିଛନ୍ତି ସୋଫିଆ। ରାଜନୀତିରେ ପାଦ ଦେବା ଆଗରୁ ବାପା କଟକବସୀଙ୍କ ସେବା କରୁଥିଲେ । ଏବେ କଟକବାସୀ ମୋତେ ବିଧାୟିକା କରିଛନ୍ତି। ତେଣୁ ଦେଶକୁ ଗଢିବା ପାଇଁ ଯୁବକଙ୍କୁ ଏକ ହେବାକୁ ପଡ଼ିବ ବୋଲି କହିଛନ୍ତି ସୋଫିଆ। ଯୁବ ସମାବେଶ ମଞ୍ଚରୁ ମହମ୍ମଦ ମୋକିମ ରାଜ୍ୟରେ ନାରୀ ଅସୁରକ୍ଷିତ ହୋଇଥିବା କହି ବିଜେପିକୁ ଟାର୍ଗେଟ କରିଥିଲେ। ସେହିପରି ଆଗକୁ ମଦମୁକ୍ତ ଓଡ଼ିଶା ଗଠନ ପାଇଁ ବିପ୍ଳବ ହେବ ବୋଲି ଯୁବ ସମାବେଶ ମଞ୍ଚରୁ ଆହ୍ବାନ ଦେଇଛନ୍ତି ମୋକିମ।
ସମ୍ବଲପୁର ଜିଲ୍ଲାରେ ଚାଷୀଙ୍କୁ ପୁଣି ଥରେ ଗିରଫ କଲା ସମ୍ବଲପୁର ପୋଲିସ
ସମ୍ବଲପୁର ଜିଲ୍ଲାରେ ଚାଷୀଙ୍କୁ ପୁଣିଥରେ ଗିରଫ କଲା ସମ୍ବଲପୁର ପୋଲିସ । ଯାହାକୁ ନେଇ ଅଞ୍ଚଳରେ ତୀବ୍ର ଅସନ୍ତୋଷ ଦେଖିବାକୁ ମିଳିଛି । ମୁଖ୍ୟମନ୍ତ୍ରୀ ସମ୍ବଲପୁର ଗସ୍ତରେ ଆସିଥିବାବେଳେ ଦାବି ଜଣାଇବାକୁ ଚାଷୀ ସଂଗଠନ ଯାଇଥିବାବେଳେ ରାସ୍ତାରୁ ଗିରଫ କରିଛି ସମ୍ବଲପୁର ପୋଲିସ । ଜେଲ୍ ଛକରେ ଆନ୍ଦୋଳନରତ ଚାଷୀଙ୍କୁ ଉଠାଇ ନେଇଛି ପୋଲିସ୍ । ଯାହାକୁ ଚାଷୀ ସଂଗଠନ ମଧ୍ୟରେ ତୀବ୍ର ଅସନ୍ତୋଷ ଦେଖିବାକୁ ମିଳିଛି । ସମ୍ବଲପୁର ଜିଲ୍ଲାରେ ଗତ ନଭେମ୍ବର ମାସ ୨୮ ତାରିଖରୁ ଧାନ କିଣା ଆରମ୍ଭ ହୋଇଛି । ମାତ୍ର ଏ ପର୍ଯ୍ୟନ୍ତ ସମସ୍ତ ଧାନ ବିକ୍ରି କରି ପାରିନାହିଁ ଚାଷୀ । ତେବେ ସରକାର ଶୁଣିବା ପରିବର୍ତ୍ତେ ଚାଷୀଙ୍କୁ ଗିରଫ କରିଥିବା କହିଛନ୍ତି ଚାଷୀନେତା । ଗତକାଲି କୃଷି ମନ୍ତ୍ରୀଙ୍କ କୁଶ ପୁତ୍ତଳିକା ଦାହ କରିବା ପାଇଁ ଆୟୋଜନ କରିଥିଲେ ଚାଷୀ ସଂଗଠନ । କିନ୍ତୁ ତା ପୂର୍ବରୁ ଯେତେବେଳେ ଚାଷୀଙ୍କୁ ଗିରଫ କରିଛି ପୋଲିସ । ଏହାର ପ୍ରତିବାଦରେ ଯୁଦ୍ଧଂଦେହୀ ଡାକରା ଦେଇଛି ଚାଷୀ ସଂଗଠନ ।
SI ମହାକେଳେଙ୍କାରୀ ମାମଲା: ଠକେଇ ପାଇଁ ପୂର୍ବରୁ ତିଆରି ହୋଇଥିଲା କି ମାଷ୍ଟର ପ୍ଲାନ୍ ?
ଠକ ସଂସ୍ଥା ସିଲିକନ୍ ଟେକ୍ କୁ କିଏ ଦେଇଥିଲା କ୍ଲିନ୍ ଚିଟ୍ ? ଠକେଇ ପାଇଁ ପୂର୍ବରୁ ତିଆରି ହୋଇଥିଲା କି ମାଷ୍ଟର ପ୍ଲାନ୍ ? ସେପଟେ ପୁଣି ଥରେ ଆଶାୟୀ ପରୀକ୍ଷାର୍ଥୀ ସିବିଆଇରେ ହାଜର । ଦିନ ଗଡ଼ିଲା, ଅଡ଼ୁଆ ବଢ଼ିଲା । ଆଶା କରାଯାଉଥିଲା ଚାର୍ଜସିଟ ଦାଖଲ ପରେ ହୁଏତ ତଦନ୍ତ ପ୍ରକ୍ରିୟା ଟିକେ ଶିଥିଳ ହୋଇଯିବ । କିନ୍ତୁ ଅତର୍କିତ ଭାବେ ସିବିଆଇ ସମନ ପାଇ ଭୁବନେଶ୍ୱର କାର୍ଯ୍ୟାଳୟରେ ହାଜର ହୋଇଛନ୍ତି ଆଶାୟୀ ପରୀକ୍ଷାର୍ଥୀ। ଦିନ ପ୍ରାୟ ୨ ଟା ୩୦ ରେ ହାଜର ପରେ ସେମାନଙ୍କୁ ଝାଳବୁହା ଜେରା କରାଯାଇଛି । ତାଙ୍କ ଠାରୁ ୨୫ ଲକ୍ଷ ଟଙ୍କା ବିନିମୟରେ ଠକେଇ ସମ୍ପର୍କରେ ଗୁରୁତ୍ୱପୂର୍ଣ୍ଣ ଇନପୁଟ ବି ପାଇଛି ସିବିଆଇ । ପ୍ରାୟ ୧୦ ରୁ ଉର୍ଦ୍ଧ୍ବ ଆଶାୟୀଙ୍କୁ ସମନ ହୋଇଥିବା ଜଣାପଡିଛି । ଶଙ୍କର ସୁରେଶ ସିଣ୍ଡିକେଟରେ କେମିତି ଫସିଥିଲେ ଆଶାୟୀ ? ପ୍ରକୃତରେ ଏ ସବୁ କଥା ଜାଣିବାକୁ ଆଶାୟୀଙ୍କୁ ମାରାଥନ ଜେରା କରାଯାଇଛି ।
ସେପଟେ ସାମ୍ନାକୁ ଆସିଥିବା ଏହି ଚିଠି ଉପରେ ଥରେ ନଜର ପକାନ୍ତୁ । ଚଞ୍ଚକତା କରି ଗିରଫ ହୋଇଥିବା ସିଲିକନ ଟେକ ପ୍ରତି କିଭଳି ଅନୁକମ୍ପା ଦେଖାଯାଇଥିଲା, ତାହା ବି ପଢି ରଖନ୍ତୁ । ସିଲିକନ୍ ଟେକ୍ ଲ୍ୟାବ ପ୍ରାଇଭେଟ ଲିମିଟେଡ STL କୁ କ୍ଲିନ୍ ଚିଟ୍ ଦେଇଥିଲା କ୍ରାଇମବ୍ରାଞ୍ଚ । କ୍ରାଇମବ୍ରାଞ୍ଚରୁ କ୍ୟାରେକ୍ଟର ସାର୍ଟିଫିକେଟ ପାଇବା ପରେ ପୋଲିସ SI ପରୀକ୍ଷା ପରିଚାଳନା କରିଥିଲା ସିଲିକନ୍ ଟେକ୍ ତଥା STL । ଏପରିକି କମ୍ପାନୀର ମୁଖ୍ୟ ସୁରେଶ ନାୟକ ଜଣେ ଭଦ୍ର ଓ ଜ୍ଞାନୀ ଲୋକ ବୋଲି ସାର୍ଟିଫିକେଟ୍ ଦେଇଥିଲା କ୍ରାଇମବ୍ରାଞ୍ଚ । ଏପରିକି ଏହି ଚିଠି ଦର୍ଶାଉଛି ଯେ, ସିଲିକନ୍ ଟେକ୍ ଲ୍ୟାବ ପୂର୍ବରୁ ଜେଲ ୱାର୍ଡର ଓ ହାଇକୋର୍ଟ ASO ପରୀକ୍ଷା ପରିଚାଳନା କରିଥିଲା । ସିବିଆଇ ଚାର୍ଜସିଟ୍ କହୁଛି ୨୦୨୫ ମାର୍ଚ୍ଚ ମାସରୁ ପୋଲିସ SI ପରୀକ୍ଷା ଜାଲିଆତି ପାଇଁ ସମସ୍ତ ପ୍ରସ୍ତୁତି ସହ ଆଶାୟୀ ପରୀକ୍ଷାର୍ଥୀଙ୍କ ଠାରୁ ୨୫ ଲକ୍ଷ ଟଙ୍କା ଆଦାୟ ହୋଇ ସାରିଥିଲା ।