ନୂଆଦିଲ୍ଲୀ: କୋଭିଡ୍ କଟକଣା ପାଇଁ ୫ ମାସ ବନ୍ଦ ରହିବା ପରେ ସ୍କୁଲ ଖୋଲିବା ପାଇଁ ସର୍ତ୍ତମୂଳକ ଅନୁମତି ଦେଇଛନ୍ତି କେନ୍ଦ୍ର ସରକାର । ଏଥିପାଇଁ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର ଜାରି କରିଛି କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟ । ଅନଲକ-୪ରେ ଧୀରେଧୀରେ ବିଭିନ୍ନ ସଂସ୍ଥା ସବୁ ଖୋଲିବାରେ ଲାଗିଛି ।
ତେଣୁ, ଏହି ପର୍ଯ୍ୟାୟରେ ସେପ୍ଟେମ୍ବର ୨୧ଠାରୁ ନବମରୁ ଦ୍ୱାଦଶ ଶ୍ରେଣୀ ଯାଏଁ ସ୍କୁଲକୁ ଖୋଲିବା ପାଇଁ ଏସଓପି ଜାରି କରି କରିଛି କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟ । ତେବେ ଏଥିପାଇଁ ଛାତ୍ରଛାତ୍ରୀଙ୍କ ଅଭିଭାବକଙ୍କ ଅନୁମତି ନେବାକୁ କୁହାଯାଇଛି । ତେବେ ସ୍କୁଲକୁ ଆସିବା ସମୟରେ ମାସ୍କ ପିନ୍ଧିବା, ସାମାଜିକ ଦୂରତା ରକ୍ଷା କରିବା ବାଧ୍ୟତାମୂଳକ ରହିବ ।
ସେହିପରି ନିୟମିତ ବ୍ୟବଧାନରେ ହାତ ଧୋଇବା ଓ ସାନିଟାଇଜ କରାଯିବାକୁ କୁହାଯାଇଛି । ତେବେ ଛେପ ପକାଇବା ଉପରେ କଡ଼ା ପ୍ରତିବନ୍ଧକ ଲାଗୁ ରହିବ । ସ୍କୁଲ ଖୋଲିଥିଲେ ସୁଦ୍ଧା ଅନଲାଇନ୍ ପାଠପଢା ଜାରି ରହିବ । ଯେଉଁମାନେ ସ୍କୁଲକୁ ନିୟମିତ ନ ଆସି କେବଳ କୌଣସି ବିଷୟରେ ଶିକ୍ଷକଙ୍କ ପରାମର୍ଶ ନେବାକୁ ଚାହିଁବେ ସେମାନେ ସମୟ ସମୟରେ ଆସିପାରିବେ ବୋଲି କୁହାଯାଇଛି । ଏଥିପାଇଁ ତାଙ୍କୁ ଶିକ୍ଷକମାନେ ସେମାନଙ୍କ ପାଇଁ ସମୟ ବାହାର କରିବେ ।
