ଭୁବନେଶ୍ୱର: କେତେ ବୟସରେ ଝିଅଟିଏ ବାହା ହେବା କଥା ? ବିବାହ ବୟସ ପାଇଁ ଆଇନ୍‌ ପରିବର୍ତ୍ତନର ଆବଶ୍ୟକତା ରହିଛି କି ? ଏହାକୁ ନେଇ ଆରମ୍ଭ ହୋଇଯାଇଛି ବିତର୍କ । ଆମ ଦେଶରେ ୧୮ ବର୍ଷ ପରେ ଝିଅ ଓ ୨୧ ବର୍ଷ ପରେ ପୁଅଙ୍କୁ ବିବାହ ପାଇଁ ଅନୁମତି ମିଳି ଥାଏ । ତେବେ କମ୍ ବୟସରେ ମହିଳାମାନେ ମା’ ହେଲେ ଅପପୁଷ୍ଟି ଓ ରକ୍ତହୀନତା ସମସ୍ୟାକୁ ସାମ୍ନା କରୁଛନ୍ତି । ଏହାକୁ ଏଡାଇବାକୁ କେନ୍ଦ୍ର ସରକାର ଚିନ୍ତା କରୁଛନ୍ତି । କମ୍ ବୟରେ ମାତୃତ୍ୱ ଯୋଗୁଁ ମାତୃ ମୃତ୍ୟୁହାର ମଧ୍ୟ ହ୍ରାସ କରି ହେଉ ନାହିଁ ।

ଏହି ପ୍ରସଙ୍ଗରେ ଅଧିକ ଅନୁଧ୍ୟାନ ଓ ବିଚାରବିମର୍ଶ କରିବା ପାଇଁ ଏକ ଟାସ୍କ ଫୋର୍ସ ଗଠନ କରାଯାଇଛି । ଯାହାର ନେତୃତ୍ୱ ନେଉଛନ୍ତି ସମାଜସେବୀ ଜୟା ଜେଟ୍‌ଲୀ । ପୂର୍ବରୁ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ମଧ୍ୟ ଏନେଇ ଘୋଷଣା କରିଥିଲେ । ବିକାଶଶୀଳ ଦେଶରେ ଝିଅମାନଙ୍କ ବିବାହ ବୟସକୁ ବୃଦ୍ଧି କରିବା ଆବଶ୍ୟକ ବୋଲି ସୀତାରମଣ କହିଥିଲେ ।

ଶେଷ ଥର ପାଇଁ ୧୯୭୮ ମସିହାରେ ଆଇନ୍ ପରିବର୍ତ୍ତନ କରି ଝିଅମାନଙ୍କର ସର୍ବନିମ୍ନ ବିବାହ ବୟସ ୧୮ ବର୍ଷ ଧାର୍ଯ୍ୟ କରାଯାଇଥିଲା । ଝିଅମାନେ କମ୍ ବୟସରେ ବିବାହ କରୁଥିବାରୁ ସେମାନଙ୍କର ଶିକ୍ଷା ଅଧିକାର ବା ସୁଯୋଗ ହାତଛଡା ହେଉଛି ବୋଲି କୁହାଯାଇଥିଲା । ୨୦୧୧ ଜନଗଣନା ରେକର୍ଡ ଅନୁସାରେ ଭାରତରେ ୫୬ ପ୍ରତିଶତ ଝିଅ ୧୮ରୁ ୨୧ ବର୍ଷ ଭିତରେ ବିବାହ କରୁଛନ୍ତି । ଭାତର ସମେତ ବିଶ୍ୱର ୧୪୩ଟି ଦେଶରେ ଝିଅଙ୍କ ବିବାହ ବୟସ ୧୮ ରହିଛି ।

ତେବେ ନାଇଜେରିଆ, ଇଣ୍ଡୋନେସିଆ ଓ ମାଲେସିଆ ଭଳି ୨୦ ଦେଶରେ ସର୍ବନିମ୍ନ ବୟସ ରହିଛି ୨୧ । ଧିରେ ଧିରେ ଦେଶରୁ ନାବାଳିକା ବିବାହ ହାର କମିବାରେ ଲାଗିଛି । ତେବେ ୧୫ରୁ ୧୯ ବୟସ ବର୍ଗରେ ବିବାହ କରୁଥିବା ଝିଅମାନେ ମାତୃତ୍ୱ ଲାଭ କରିବା ପରେ ସ୍ୱାସ୍ଥ୍ୟ ସମସ୍ୟାର ସମ୍ମୁଖୀନ ହେଉଛନ୍ତି ।

କଟକ: କ୍ରୀଡାର ଏନ୍ତୁଡିଶାଳ ହେଉଛି କ୍ରୀଡା ଛାତ୍ରାବାସ । ଏହାକୁ କାଣ୍ଟଛାଣ୍ଟ କଲେ ପଡ଼ିବ ପ୍ରଭାବ । ଅଧିକ ଛାତ୍ରଛାତ୍ରୀ ପ୍ରଶିକ୍ଷଣ ହେବା ଉଚିତ୍ । ପ୍ରଶିକ୍ଷଣ ବଢିଲେ ରାଜ୍ୟରେ କ୍ରୀଡାର ହେବ ଉନ୍ନତି । ରାଜ୍ୟ ସରକାର କ୍ରୀଡା ଛାତ୍ରାବାସ ପୂନର୍ଗଠନ ଯୋଜାନାରେ ସଂଶୋଧନ ଆଣିବାକୁ ଯାଉଥିବାବେଳେ ଏମିତି କିଛି ମତ ରଖିଛନ୍ତି ବରିଷ୍ଠ କ୍ରୀଡାବିତ୍ ।

କ୍ରୀଡ ଓ ଯୁବସେବା ବିଭାଗ ପକ୍ଷରୁ କିଛି ଜିଲ୍ଲାରେ ଛାତ୍ରାବାସ ବନ୍ଦ କରିବା ସହ କିଛି ସଂସ୍କାର ଆଣିବାକୁ ସ୍ଥିର କରାଯାଇଛି । ୧୮ ବର୍ଷରୁ ଉର୍ଦ୍ଧ୍ୱ ଖେଳାଳିଙ୍କୁ ଆଉ ହଷ୍ଟେଲରେ ନ ରଖିବାକୁ ନିଷ୍ପତ୍ତି ନିଆଯାଇଛି । ଏହାକୁ ସଂଶୋଧନ କରିବାକୁ ପୂର୍ବରୁ ରାଜ୍ୟର ୧୬ କ୍ରୀଡା ସଂଘ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଥିଲେ । ଆଉ ଏବେ କିଛି ବରିଷ୍ଠ କ୍ରୀଡାବିତ୍ ଏହାକୁ କାଣ୍ଟଛାଣ୍ଟ ନକରି ବରଂ ବଢାଯାଉ ବୋଲି ମତ ଦେଇଛନ୍ତି ।

ଭେଟରାନ ଆଥଲେଟଙ୍କ କହିବା କଥା, ୧୪ ବର୍ଷରେ ପିଲାମାନେ କ୍ରୀଡା ଛାତ୍ରାବାସକୁ ଆସନ୍ତି । ୨୧ ବର୍ଷ ପର୍ଯ୍ୟନ୍ତ ଜୁନିୟର ଓ ୟୁଥ ଅନ୍ତର୍ଜାତୀୟ ଖେଳାଳି ହେବା ପାଇଁ ସ୍ୱପ୍ନ ଦେଖିଥାନ୍ତି । ତେଣୁ କ୍ୟାରିୟରର ଉତଥାନ ସମୟରେ ସେମାନଙ୍କୁ ହଷ୍ଟେଲରୁ କାଢିଦେବା ଠିକ ହେବନି । ସରକାରଙ୍କ କ୍ରୀଡା ବିଭାଗ ଏ ସମ୍ପର୍କରେ କ୍ରୀଡା ସଂଘ ଓ ବରିଷ୍ଠ କ୍ରୀଡାବିତଙ୍କ ମତ ନେଇ ଖୁବଶୀଘ୍ର ଏକ ଭଲ ନିଷ୍ପତ୍ତି ନେବେ ବୋଲି ସମସ୍ତେ ଆଶା ରଖିଛନ୍ତି ।

ଗଜପତି: ଗଜପତି ଜିଲ୍ଲାରେ ସାର ଅଭାବ । ସୋସାଇଟିରେ ମିଳୁନି ସାର । ହତାସ ଜିଲ୍ଲାର ଚାଷୀ । ଫାଇଦା ଉଠାଉଛନ୍ତି ବ୍ୟବସାୟୀ । ଜିଲ୍ଲାରେ ପ୍ରାୟ ୪୨ ହଜାର ହେକ୍ଟର ଜମିରେ ଧାନ ଚାଷ ହେଉଛି । ଲକଡାଉନ, ସଟଡାଉନ୍ ଓ ଅନିୟମିତ ବର୍ଷା ଯୋଗୁଁ ଚାଷ ବିଳମ୍ବ ହୋଇଛି । ଏବେ ଲଘୁଚାପ ଯୋଗୁଁ ବର୍ଷା ହୋଇଛି । ଫଳରେ ଚାଷୀ ମନରେ ଉତ୍ସାହ ଖେଳିଛି । ଜିଲ୍ଲାରେ ଧାନରୁଆ ପ୍ରାୟ ସରିଥିଲେ ସୁଦ୍ଧା ସାରର କୁତ୍ରିମ ଅଭାବ ଯୋଗୁଁ ଚିନ୍ତାରେ ପଡ଼ିଛନ୍ତି ଚାଷୀ । ଉଚିତ ସମୟରେ ସାର ଓ ଔଷଧ ନମିଳିଲେ ଚାଷକାର୍ଯ୍ୟ କ୍ଷତିଗ୍ରସ୍ତ ହେବା ଆଶଙ୍କା ସୃଷ୍ଟି ହୋଇଛି ।

ସୋସାଇଟି କର୍ମଚାରୀ ଓ ବ୍ୟବସାୟୀ ଜାଣିଶୁଣି ସାର କଳାବଜାରୀ କରୁଥିବା ଅଭିଯୋଗ କରିଛନ୍ତି ଚାଷୀ । ତେବେ ଜିଲ୍ଲା କୃଷି ଅଧିକାରୀଙ୍କ କହିବା କଥା, ଅଭିଯୋଗ ଆସିବା ପରେ କାର୍ଯ୍ୟାନୁଷ୍ଠାନ ନିଆଯାଉଛି । ଆବଶ୍ୟକ ପରିମାଣର ସାର ସମସ୍ତ ସୋସାଇଟିକୁ ଯୋଗାଇ ଦେବାର ବ୍ୟବସ୍ଥା କରାଯାଇଛି ।

ସୋସାଇଟିରେ ସାର ନମିଳିବାରୁ ଏହାର ଫାଇଦା ଉଠାଉଛନ୍ତି ଅସାଧୁ ବ୍ୟବସାୟୀ । ବିଭିନ୍ନ ସ୍ଥାନରୁ ଚଢା ଦରରେ ସାର କିଣିବାକୁ ବାଧ୍ୟ ହେଉଛନ୍ତି ଚାଷୀ ।

କଳାହାଣ୍ଡି:  ମନରେଗା ଯୋଜନାରେ ଶ୍ରମିକଙ୍କୁ ରୋଜଗାରକ୍ଷମ କରିବା ପାଇଁ ବିଭିନ୍ନ କାମ ହାତକୁ ନିଆଯାଉଛି । ହେଲେ ଅନେକ ସମୟରେ ଏଥିରେ ଅନିୟମିତତା ହେଉଥିବା ଅଭିଯୋଗ ଆସୁଛି । ଏଭଳି କିଛି ଅଭିଯୋଗ ଆସିଛି କଳାହାଣ୍ଡି ଜିଲ୍ଲାରୁ । ଅଭିଯୋଗ ଅନୁଯାୟୀ କାମ ନହୋଇ ଉଠାଯାଉଛି ଟଙ୍କା । କଳାହାଣ୍ଡି ଜିଲ୍ଲା ଏମ୍.ରାମପୁର ବ୍ଳକ ସାଲେପାଲି ପଞ୍ଚାୟତର ଭଏରମୁଣ୍ଡାରୁ କାର୍ଣ୍ଣିମାଳ ପର୍ଯ୍ୟନ୍ତ ରାସ୍ତାକାମ ସଂପୂର୍ଣ୍ଣ ହୋଇଥିବା ଦର୍ଶାଇ ୪ଲକ୍ଷ ୨୨ହଜାର ୨୦୬ଟଙ୍କା ଉଠାଯାଇଥିବା ହୋଇଛି ଅଭିଯୋଗ ହୋଇଛି ।

ଖାଲି ସେତିକି ନୁହେଁ, ଏଠାରେ ଅନିୟମିତତାର ତାଲିକା ବହୁତ ଲମ୍ବା ରହିଛି । ବିଭିନ୍ନ କ୍ଷେତ୍ରରେ ଅନିୟମିତତା ଦେଖିବାକୁ ମିଳିଛି । ଚେକ୍‌ଡ୍ୟାମ୍‌ ଓ ଅନ୍ୟରାସ୍ତା କାମରେ ମଧ୍ୟ ଅନିୟମିତତା ହୋଇଥିବା ଭିଜିଲାନ୍ସରେ ଗ୍ରାମବାସୀ ଅଭିଯୋଗ କରିଛନ୍ତି ।

ଅଭିଯୋଗକୁ ସାଲେପାଲି ସରପଞ୍ଚ ଖଣ୍ଡନ କରିବା ସହ କାମ ସମ୍ପୂର୍ଣ୍ଣ ହୋଇନଥିବା କହିଛନ୍ତି । କନିଷ୍ଠ ଯନ୍ତ୍ରୀ କହିଛନ୍ତି, ଯେତିକି କାମ ହୋଇଛି, ସେତିକି ବିଲ୍‌ ହୋଇ ଟଙ୍କା ଉଠାଯାଇଛି । ଅନ୍ୟପଟେ ଭିଜିଲାନ୍ସ ଡିଏସପିଙ୍କ ନେତୃତ୍ୱରେ ଏକ ଟିମ ଏହାର ତଦନ୍ତ କରୁଛି । ସଂପୂର୍ଣ୍ଣ ବିଲ ହୋଇନଥିବା ଓ ତଦନ୍ତ ଚାଲିଛି ବୋଲି ଭିଜିଲାନ୍‌ସ ଡିଏସ୍‌ପି କହିଛନ୍ତି  । ସେପଟେ ତଦନ୍ତ ପରେ ହିଁ ସ୍ପଷ୍ଟ ହେବ କିଏ ସତ କହୁଛନ୍ତି, ଗ୍ରାମବାସୀ ନା ସରକାରୀ ଅଧିକାରୀ  ।