ନନ୍ଦିଘୋଷ ବ୍ୟୁରୋ : ଆସନ୍ତା ୧୮ ତାରିଖ ଭିତରେ ସୁଭଦ୍ରା ଟଙ୍କା ମିଳିବ | ଗତକାଲି ମୁଖ୍ୟମନ୍ତ୍ରୀ ଏହା କହି ସାରିଛନ୍ତି । ୪ ଲକ୍ଷ ୫୭ ହଜାର ୬୮୧ ମହିଳାଙ୍କୁ ସୁଭଦ୍ରା ଟଙ୍କା ମିଳିବା ନେଇ ଘୋଷଣା କରିଛନ୍ତି ଉପମୁଖ୍ୟମନ୍ତ୍ରୀ | ନୂଆ ୧ ଲକ୍ଷ ୭୮ ହଜାର ୩୯୮ ଜଣଙ୍କୁ ସାମିଲ କରାଯାଇଥିବାରୁ ସେମାନେ ପାଇବେ ପ୍ରଥମ କିସ୍ତି | ପ୍ରଥମ ଓ ଦ୍ୱତୀୟ କିସ୍ତିରୁ ବାଦ ପଡ଼ିଥିବା ୨ ଲକ୍ଷ ୫୫ ହଜାର ୨୬୫ ଜଣଙ୍କୁ ସାମିଲ କରାଯାଇଛି | ସେମାନେ ବି ଏକା ବେଳକେ ଦୁଇଟି କିସ୍ତି ପାଇବେ । ସେହିପରି ଅଭିଯୋଗ ଶୁଣାଣିରେ ୨୪ ହଜାର ୧୮ଜଣ ହିତାଧିକାରୀଙ୍କୁ ସୁଭଦ୍ରାରେ ସାମିଲ କରାଯାଇଛି | ଏପରି ଭାବେ ୨୫୦ କୋଟି ଟଙ୍କାର ସହାୟତା ରାଶି ଖାତାକୁ ଯିବ ବୋଲି କହିଛନ୍ତି ଉପମୁଖ୍ୟମନ୍ତ୍ରୀ ।
ପକ୍ଷପାତ କରୁଛନ୍ତି ଗୌତମ ଗମ୍ଭୀର ? ODIରେ ଆୟୁଷ ବଦୋନୀଙ୍କ ଚୟନକୁ ନେଇ ଉଠିଲା ପ୍ରଶ୍ନ
ଯୁବ ଅଲରାଉଣ୍ଡର ଆୟୁଷ ବଦୋନୀଙ୍କୁ ନ୍ୟୁଜିଲାଣ୍ଡ ବିପକ୍ଷ ଦିନିକିଆ ମ୍ୟାଚ ପାଇଁ ଟିମ୍ ଇଣ୍ଡିଆରେ ପ୍ରଥମ ଥର ପାଇଁ ସାମିଲ କରାଯାଇଛି । ଏହି ଚୟନ କାରଣରୁ ମୁଖ୍ୟ କୋଚ ଗୌତମ ଗମ୍ଭୀରକୁ ନେଇ ଆଲୋଚନା ଜାରି ରହିଛି ଓ ଫ୍ୟାନ୍ସ ତାଙ୍କ ଉପରେ ଫେଭରେଟିଜର ଅଭିଯୋଗ ଆଣିଛନ୍ତି । ଏହାକୁ ନେଇ ସୋସିଆଲ ମିଡ଼ିଆରେ ଫ୍ୟାନ୍ସ ପ୍ରଶ୍ନ କରୁଛନ୍ତି କି, ବାସ୍ତବରେ କ’ଣ ବଦୋନୀ ଏହି ଚୟନ ପାଇଁ ହକଦାର ଥିଲେ କି ଗମ୍ଭୀର ନିଜ ପସନ୍ଦର ଖେଳାଳିଙ୍କୁ ଚୟନ କରିଛନ୍ତି ?
ଅଲରାଉଣ୍ଡର ଓ୍ବାଶିଂଟନ ସୁନ୍ଦର ପ୍ରଥମ ଦିନିକିଆରେ ବୋଲିଂ ସମୟରେ ଆଘାତ କାରଣରୁ ସିରିଜରୁ ବାଦ ପଡ଼ିଥିଲେ । ତାଙ୍କ ସ୍ଥାନରେ ଟିମ୍ ମ୍ୟାନେଜେମଣ୍ଟ ବଦୋନୀଙ୍କୁ ସ୍କ୍ବାଡରେ ସାମିଲ କରିଥିଲେ । ତା’ପରେ ସିଲେକ୍ସନକୁ ନେଇ ଯୁକ୍ତି ଦେଖିବାକୁ ମିଳିଥିଲା । ଲିଷ୍ଟ ଏ’ରେ ବଦୋନୀଙ୍କ ପ୍ରସର୍ଶନ ଖାସ୍ ରହିନାହିଁ । ସେ ୨୨ଟି ପାଳିରେ ୬୯୩ ରନ୍ ସଂଗ୍ରହ କରିଛନ୍ତି । ତାଙ୍କର ଆଭରେଜ ୩୬.୪୭ ରହିଛି । ସେଥିମଧ୍ୟରେ ଗୋଟିଏ ଶତକ ଓ ୫ଟି ଅର୍ଦ୍ଧଶତକ ସାମିଲ ରହିଛି । ଟିମ୍ ଇଣ୍ଡିଆରେ ସ୍ଥାନ ପାଇବା ପାଇଁ ବଦୋନୀ ହକଦାର ନୁହନ୍ତି ବୋଲି କୁହାଯାଇଛି । ଲିଷ୍ଟ ଏ’ରେ ବଦୋନୀ ୧୮ଟି ଓ୍ବିକେଟ ନେଇଛନ୍ତି ।
ଚଳିତ ବଜୟ ହଜାରେ ଟ୍ରଫି ୨୦୨୫-୨୬ରେ ୨୬ ବର୍ଷୀୟ ବଦୋନୀଙ୍କ ପ୍ରଦର୍ଶନ ନୈରାଶ୍ୟଜନକ ରହିଛି । ସେ ୩ଟି ପାଳିରେ ମାତ୍ର ୧୬ ରନ୍ ସଂଗ୍ରହ କରିଛନ୍ତି । ତାଙ୍କର ଆଭରେଜ ମାତ୍ର ୮ ରହିଛି । ଏହି କାରଣରୁ ଫ୍ୟାନ୍ସ ବଦୋନୀଙ୍କ ଚୟନକୁ ବିରୋଧ କରୁଛନ୍ତି । ଋଷଭ ପନ୍ତ ଓ ଋତୁରାଜ ଗାଏକ୍ବାଡଙ୍କୁ କାହିଁକି ସାମିଲ କରାଗଲାନି । ସୁନ୍ଦର ଜଣେ ପ୍ରପର ଅଲରାଉଣ୍ଡର । ମାତ୍ର ବଦୋନୀ ଜଣେ ବ୍ୟାଟ୍ସମ୍ୟାନ ଓ ପାର୍ଟଟାଇମ ବୋଲର । ବଦୋନୀଙ୍କ ଉପରେ ଗମ୍ଭୀରଙ୍କ କୃପା ଆଇପିଏଲ ସମୟରୁ ରହିଥିଲା ବୋଲି କିଛି ଫ୍ୟାନ୍ସ ଲେଖିଛନ୍ତି ।
ତେବେ ବଦୋନୀ ଆଇପିଲଏଲ ୨୦୨୫ରେ ଶାନଦାର ପ୍ରଦର୍ଶନ କରିଛନ୍ତି । ସେ ୧୧ଟି ପାଳିରେ ୩୨୯ ରନ୍ ସଂଗ୍ରହ କରିଛନ୍ତି । ତାଙ୍କର ଷ୍ଟ୍ରାଇକ ରେଟ ୧୪୮.୧୯ ରହିଛି ଓ ୨ଟି ଓ୍ବିକେଟ ନେଇଛନ୍ତି । ରଣଜୀ ଟ୍ରଫିରେ ସେ ୫ଟି ପାଳିରେ ୨୧୮ ରନ୍ ସଂଗ୍ରହ କରିଛନ୍ତି । ସୟଦ ମୁସ୍ତାକ ଅଲୀ ଟ୍ରଫି ୨୦୨୫-୨୬ରେ ବଦୋନୀ ୭ଟି ପାଳିରେ ୨୦୬ ରନ୍ ସଂଗ୍ରହ କରିଛନ୍ତି । ଏହା ପୂର୍ବରୁ ମଧ୍ୟ ହର୍ଷିତ ରାଣାଙ୍କ ଉପରେ ଗମ୍ଭୀରଙ୍କ କୃପା ରହିଛି ବୋଲି ଚର୍ଚ୍ଚା ହୋଇଥିଲା । ମାତ୍ର ହର୍ଷିତ ଭଲ ପ୍ରଦର୍ଶନ କରି ନିଜକୁ ପ୍ରମାଣିତ କରିଥିଲେ । ଗମ୍ଭୀର ଆଇପିଏଲ ସହ ଜଡ଼ିତ କିଛି ଖେଳାଳିଙ୍କୁ ଟିମ୍ ଇଣ୍ଡିଆରେ ସାମିଲ କରୁଥିବା ଅଭିଯୋଗ ହୋଇଛି ।
ପ୍ରଶାନ୍ତ ତମାଙ୍ଗଙ୍କ ମୃତ୍ୟୁ ପଛର କାରଣ କଣ, ନିଦ୍ରା ସମୟରେ କାହିଁକି ହାର୍ଟ ପ୍ରତି ବିପଦ ବଢ଼ୁଛି ?
ଇଣ୍ଡିଆନ ଆଇଡଲ-୩ର ବିଜେତା ପ୍ରଶାନ୍ତ ତମାଙ୍ଗଙ୍କର ୪୩ ବର୍ଷ ବୟସରେ ନିଦ୍ରା ଅବସ୍ଥାରେ ମୃତ୍ୟୁ ଘଟଣା ତାଙ୍କର ଅଗଣିତ ଫ୍ୟାନ୍ସଙ୍କୁ ସ୍ତମ୍ଭୀଭୂତ କରିଦେଇଛି । ରାତିରେ ଶୋଇଥିବା ସମୟରେ ପ୍ରଶାନ୍ତଙ୍କ ମୃତ୍ୟୁ ଘଟିଥିଲା । କେବଳ ପ୍ରଶାନ୍ତ ନୁହନ୍ତି, ଏପରି ଅନେକ ବ୍ୟକ୍ତି ରାତିରେ ଶୋଇଥିବା ସମୟରେ ହିଁ ଦୁନିଆକୁ ଅଲବିଦା କରିଥିବାର ଦେଖିବାକୁ ମିଳିଛି । ତେବେ ଶୋଇଥିବା ଅବସ୍ଥାରେ ମୃତ୍ୟୁ ପଛର ମେଡିକାଲ କାରଣ କଣ ? ଜାନୁଆରୀ ୧୧ ତାରିଖରେ ବିଶିଷ୍ଟ ଗାୟକ-ଅଭିନେତା ପ୍ରଶାନ୍ତ ଏ ଦୁନିଆ ଛାଡ଼ି ଆରପାରିକୁ ଚାଲିଯାଇଥିଲେ । ତାଙ୍କର ମୃତ୍ୟୁରେ ସଙ୍ଗୀତ ଜଗତକୁ ଏକ ବଡ଼ ଝଟକା ଲାଗିଥିଲା । ପ୍ରଶାନ୍ତଙ୍କ ମୃତ୍ୟ ରହସ୍ୟକୁ ନେଇ ଏବେ ଚାରିଆଡ଼େ ଚର୍ଚ୍ଚା ଚାଲିଛି । ଗାୟକଙ୍କ ମୃତ୍ୟୁ ସମ୍ପୂର୍ଣ୍ଣ ଭାବେ ସ୍ବାଭାବିକ ଥିଲା ବୋଲି ତାଙ୍କ ପତ୍ନୀ ସ୍ପଷ୍ଟ କରିଛନ୍ତି ।
ତେବେ ନିଦ୍ରା ଅବସ୍ଥାରେ ମୃତ୍ୟୁବରଣ କରିବା ଏକ ନୂଆ କଥା ନୁହେଁ । ପୂର୍ବରୁ ଏପରି ଅନେକ ମାମଲା ସାମ୍ନାକୁ ଆସିଛି । ତେବେ ମଣିଷ ଶୋଇଥିବା ଅବସ୍ଥାରେ କାହିଁକି ଓ କିପରି ମୃତ୍ୟୁବରଣ କରିଥାଏ, ସେନେଇ ଏବେ ପ୍ରଶ୍ନ ଉଠିଛି । କିଛି ଲୋକ ରାତିରେ ଶୋଇଥିଲେ, ମାତ୍ର ସକାଳୁ ଆଉ ଉଠିନଥିଲେ । ହେଲଥ ଏକ୍ସପର୍ଟଙ୍କ ମତରେ, ମଣିଷ ତା’ର ଜୀବନର ଏକ-ତୃତୀୟାଂଶ ଅଂଶ ଶୋଇକରି ବିତାଇଥାଏ । ଏହି ସମୟରେ ମୃତ୍ୟୁ ହେବା କିଛି ବଡ଼ କଥା ନୁହେଁ । ବୟସ୍କ ଓ ବିମାରଗ୍ରସ୍ତ ଲୋକଙ୍କ ମୃତ୍ୟୁକୁ ନେଇ ପ୍ରଶ୍ନ ଉଠିନଥାଏ । ମାତ୍ର ୪୦-୪୫ ବର୍ଷୀୟ ଲୋକଙ୍କ ମୃତ୍ୟୁକୁ ନେଇ ଆଲୋଚନା ହୋଇଥାଏ । ଅନେକ ସମୟରେ ମେଡିକାଲ ଯାଞ୍ଚରେ ମୃତ୍ୟୁକୁ ନେଇ କୌଣସି ସ୍ପଷ୍ଟ କାରଣ ସାମ୍ନାକୁ ଆସିପାରି ନଥାଏ ।
ଡାକ୍ତରଙ୍କ ରିସର୍ଚ୍ଚ ମୁତାବକ, ନିଦ୍ରାର ଏପରି ଏକ ଅବସ୍ଥା ରହିଛି ଯେଉଁ ସମୟରେ କି ବ୍ରେନ ସକ୍ରିୟ ରହିଥାଏ ଓ ସ୍ବପ୍ନ ଆସିଥାଏ । ସେହି ଅବସରରେ ଆଖି ଦ୍ରୁତ ଭାବେ ହଲିଥାଏ ମାତ୍ର ଶରୀରର ମାଂସପେଶୀ ରିଲାକ୍ସ ରହିଥାଏ । ଦିଲ ଉପରେ ଅଧିକ ଚାପ ପଡ଼ିପାରେ । ସେହି ସମୟରେ ହାର୍ଟ ରେଟ ଓ ବ୍ଲଡ ପ୍ରେସରରେ ପରିବର୍ତ୍ତନ ଆସିଥାଏ । ଅନେକ ସମୟରେ ହୃଦ ସ୍ପନ୍ଦନ ଅଚାନକ ଗଡ଼ବଡ଼ ହୋଇଯାଇଥାଏ । ତାହାକୁ ସମ୍ଭାଳିବାକୁ ମଣିଷକୁ ସୁଯୋଗ ମିଳିନଥାଏ ଓ ଅଚାନକ ମୃତ୍ୟୁ ଘଟିଥାଏ ।
ଷ୍ଟଡି ମୁତାବକ, ସକାଳ ୩-୪ ସମୟରେ ଶରୀର ପାଇଁ ସବୁଠାରୁ କୋମଳ ହୋଇଥାଏ । ଏହି ସମୟରେ ଅନେକ ଜରୁରୀ ହରମୋନ ସବୁଠାରୁ କମ୍ ସ୍ତରରେ ରହିଥାଏ ଓ ଦିଲ ବା ଶ୍ବାସ ସହ ଜଡ଼ିତ ସମସ୍ୟାର ବିପଦ ବଢ଼ିଥାଏ । ଏହି କାରଣରୁ ମଣିଷ ଆରପାରିକୁ ଚାଲିଯାଇଥାଏ । ଅନେକ ସମୟରେ ପୋଷ୍ଟମର୍ଟମ ପରେ ବି ମୃତ୍ୟୁର କାରଣ ସ୍ପଷ୍ଟ ହୋଇନଥାଏ । ତେଣୁ ଡେଥ ସାର୍ଟିଫିକେଟରେ ‘ନ୍ୟାଚୁରାଲ ଡେଥ’ ବା ’କାର୍ଡିଓ-ରିସ୍ପିରେଟରୀ ଫେଲିୟର’ ପରି ଶବ୍ଦ ଲେଖା ଯାଇଥାଏ । ଅନେକ ସମୟରେ ହୃଦ ସ୍ପନ୍ଦନରେ ଗଡ଼ବଡ଼, ହାର୍ଟ ଫେଲୁଅର, ଷ୍ଟ୍ରୋକ, ଶ୍ବାସ ସମସ୍ୟା, ଟାଇପ-୧ ଡାଇବେଟିରେ ‘ଡଡ ଇନ ବେଡ ସିଣ୍ଡ୍ରୋମ’, କାର୍ବନ ମନୋଅକ୍ସାଇଡ, ମେଡିସିନ ଓ ନିଶାର ଓଭରଡୋଜ, ମୁଣ୍ଡରେ ଆଘାତ, ସ୍ପିପ ଏପନିଆ, ମିର୍ଗୀ ଆଦି କାରଣରୁ ମୃତ୍ୟୁ ଘଟିଥାଏ ।
T-20 ବିଶ୍ବକପ ୨୦୨୬: ଭାରତରେ ମ୍ୟାଚ ଖେଳିବ ବାଂଲାଦେଶ, ଭେନ୍ୟୁ ପରିବର୍ତ୍ତନକୁ ICCର ଅଗ୍ରାହ୍ୟ
ଭେନ୍ୟୁ ପରିବର୍ତ୍ତନ ପାଇଁ ବାଂଲାଦେଶ ବାରମ୍ବାର ଅପିଲ କରିଥିଲେ ହେଁ ସେନେଇ କୌଣସି ଫାଇଦା ହୋଇନାହିଁ । କାରଣ ଅନ୍ତର୍ଜାତୀୟ କ୍ରିକେଟ ପରିଷଦ (ICC) ସୁରକ୍ଷାର ମାପଦଣ୍ଡକୁ ପରଖିବା ପରେ ବାଂଲାଦେଶର ଭେନ୍ୟୁ ବଦଳାଇବାକୁ ଅଗ୍ରାହ୍ୟ କରିଦେଇଛି । ଏହାଫଳରେ ବାଂଲାଦେଶକୁ ଏକ ବଡ଼ ଝଟକା ଲାଗିଛି । ୨୦୨୬ ଟି-୨୦ ବିଶ୍ବକପର ମ୍ୟାଚ ଖେଳିବାକୁ ବାଂଲାଦେଶ ଭାରତ ଆସିବ ବୋଲି ଏକ ରିପୋର୍ଟରୁ ସ୍ପଷ୍ଟ ହୋଇଛି ।
ଏକ ସୂତ୍ର ମୁତାବକ, ଆଇସିସି ନିଜର ଯାଞ୍ଚରେ ସୁରକ୍ଷା ସହ ଜଡ଼ିତ କାରଣକୁ ପରଖିଥିଲା । ଟୁର୍ଣ୍ଣାମେଣ୍ଟ ସମୟରେ ବାଂଲାଦେଶୀ ଖେଳାଳିଙ୍କ ପ୍ରତି କୌଣସି ବିପଦ ନଥିବା ଜଣାପଡ଼ିଥିଲା । ସେଥିପାଇଁ ଆଇସିସି ବାଂଲାଦେଶର ଅପିଲକୁ ଅଗ୍ରାହ୍ୟ କରିଦେଇଛି । ଆସନ୍ତା ଫେବୃଆରୀ ମାସ ୭ ତାରିଖରୁ ଟ-୨୦ ବିଶ୍ବକପର ଶୁଭାରମ୍ଭ ହେବ । ବିଶ୍ବକପର ପ୍ରଥମ ମ୍ୟାଚ ଖେଳି ବାଂଲାଦେଶର ନିଜର ଯାତ୍ରା ଆରମ୍ଭ କରିବ ।
ଏହିକ୍ରମରେ ବାଂଲାଦେଶର କ୍ରୀଡ଼ା ମନ୍ତ୍ରଣାଳୟର ପରାମର୍ଶଦାତା ଆସିଫ ନଜରୁଲଙ୍କ ଦାବିକୁ ମଧ୍ୟ ଆଇସିସି ଅଗ୍ରାହ୍ୟ କରିଦେଇଛି । ମୁସ୍ତାଫିଜୁର ରହମାନଙ୍କୁ ଟିମରେ ସାମିଲ କଲେ ବିପଦ ବଢ଼ିଯିବ ବୋଲି କୁହାଯାଇଥିଲା । ମାତ୍ର ଏବେ ଆଇସିସି ତାହାକୁ ଖଣ୍ଡନ କରିଥିବା ଜଣାପଡ଼ିଛି । ବାଂଲାଦେଶ ପାଇଁ ଭାରତରେ କୌଣସି ବିପଦ ନଥିବା ଆଇସିସି ତରଫରୁ କୁହାଯାଇଛି ।
ଜମିବାଡି ବିବାଦକୁ କେନ୍ଦ୍ରକରି ମା’ ପୁଅଙ୍କ ଉପରେ ଏସିଡ୍ ମାଡ଼
ନନ୍ଦିଘୋଷ ବ୍ୟୁରୋ : ମା’ ପୁଅଙ୍କ ଉପରେ ଏସିଡ ମାଡ଼ । କେନ୍ଦ୍ରାପଡ ଜିଲ୍ଲା ପଟ୍ଟାମୁଣ୍ଡାଇ ଆଦର୍ଶ ଥାନା ଅଧୀନ ବାଛରା ଗ୍ରାମରେ ଜମିବାଡି ବିବାଦକୁ କେନ୍ଦ୍ରକରି ମା’ ପୁଅଙ୍କ ଉପରେ ଏସିଡ୍ ମାଡ଼ ହୋଇଛି । ଏହି ଗାଁର ବିଜୟ ସାହୁ ଓ ରବୀନ୍ଦ୍ର ସାହୁ ପଡ଼ୋଶୀ । ବିଜୟ ପୂର୍ବରୁ ରବୀନ୍ଦ୍ରଙ୍କ ଜାଗାରେ କାର ରଖୁଥିଲେ । ନିକଟରେ ରବୀନ୍ଦ୍ରଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଏକ ଘର ମିଳିବାରୁ ବିଜୟ କାର ରଖୁଥିବା ସ୍ଥାନରେ ସେ ଏହାକୁ ନିର୍ମାଣ କରିଥିଲେ। ଏଥିପାଇଁ ସେ ବିଜୟଙ୍କୁ ଉକ୍ତ ସ୍ଥାନରେ ଗାଡ଼ି ରଖିବାକୁ ବାରଣ କରିଥିଲେ। ହେଲେ ବିଜୟ ରବୀନ୍ଦ୍ରଙ୍କ କଥା ଶୁଣିବାକୁ ପ୍ରସ୍ତୁତ ନଥିଲେ । ବହୁ ବାଦବିବାଦ ପରେ ଅନ୍ୟତ୍ର କାର ରଖିଥିଲେ ମଧ୍ୟ ସେ ରବୀନ୍ଦ୍ରଙ୍କ ଉପରେ ରାଗ ରଖିଥିଲେ। ପୂର୍ଵ ରାଗକୁ କେନ୍ଦ୍ର କରି ଆଜି ବିଜୟ ରବୀନ୍ଦ୍ରଙ୍କ ଉପରକୁ ଏସିଡ ପକାଇ ଥିଲେ l ସେହି ସ୍ଥାନରେ ରବୀନ୍ଦ୍ରଙ୍କ ମା’ ଥିବାରୁ ସେ ମଧ୍ୟ ଗୁରୁତର ଆହତ ହୋଇଛନ୍ତି l ଉଭୟ ମା’ ଓ ପୁଅ ପ୍ରଥମେ କେନ୍ଦ୍ରାପଡ଼ାରେ ଭର୍ତ୍ତି ହୋଇଥିଲେ । ଅବସ୍ଥା ଗୁରୁତର ହେବାରୁ କଟକ ମେଡିକାଲକୁ ସ୍ଥାନାନ୍ତର ହୋଇଛନ୍ତି ।
ଇରାନ ସହ ବ୍ୟବସାୟ କରୁଥିବା ଦେଶଗୁଡ଼ିକୁ ପୁଣି ଥରେ ଟ୍ରମ୍ପ ଦେଲେ ଟାରିଫ୍ ଧମକ
ନନ୍ଦିଘୋଷ ବ୍ୟୁରୋ : ଇରାନ ସହ ବିବାଦ ଭିତରେ ପୁଣି ଥରେ ଟ୍ରମ୍ପ ଦେଲେ ଟାରିଫ୍ ଧମକ। ଇରାନ ସହ ବ୍ୟବସାୟ କରୁଥିବା ଦେଶଗୁଡ଼ିକୁ ଏହି ଧମକ ଦେଇଛନ୍ତି ଆମେରିକା ରାଷ୍ଟ୍ରପତି। ଇରାନ ସହ ବ୍ୟବସାୟ କଲେ ଦେବାକୁ ପଡ଼ିବ ଅତିରିକ୍ତ ୨୫ ପ୍ରତିଶତ ଶୁଳ୍କ।ନିଜ ସୋସିଆଲ ମିଡିଆରେ ଏଭଳି ଏକ ପୋଷ୍ଟ କରି ପୁଣିଥରେ ଟାରିଫ ଧମକ ଦେଇଛନ୍ତି ଡୋନାଲ୍ଡ ଟ୍ରମ୍ପ। ତୁରନ୍ତ ତାଙ୍କର ଏହି ନିର୍ଦ୍ଦେଶ ଲାଗୁ କରିବାକୁ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି ଆମେରିକା ରାଷ୍ଟ୍ରପତି । ଏବେ ଯେଉଁ ଦେଶ ଇରାନ ସହ ବ୍ୟାପାର କରିବା ସହ ଆମେରିକା ସହ ବ୍ୟାପାର କଲେ ଦେବାକୁ ପଡିବ ଅତିରିକ୍ତ ୨୫ ପ୍ରତିଶତ ଶୁଳ୍କ। ସେପଟେ ଇରାନରେ ଜାରି ରହିଛି ଜନଆନ୍ଦୋଳନ। ଇରାନ୍ର ସୁପ୍ରିମ୍ ଲିଡର୍ ଖାମେମେଇ ସରକାର ବିରୋଧରେ ରାଜରାସ୍ତାରେ ଇରାନ୍ ବାସିନ୍ଦା। ଆନ୍ଦୋଳନ ତୃତୀୟ ସପ୍ତାହରେ ପହଞ୍ଚିଥିବାବେଳେ ସୁରକ୍ଷାକର୍ମୀ ଓ ପ୍ରଦର୍ଶନକାରୀଙ୍କ ମଧ୍ୟରେ ହିଂସାତ୍ମକ ସଂଘର୍ଷ ଉଗ୍ରରୂପ ନେବାରେ ଲାଗିଛି। ଇରାନ୍ରେ ବର୍ତ୍ତମାନ ସୁଦ୍ଧା ୬୪୦ରୁ ଅଧିକ ଲୋକଙ୍କ ମୃତ୍ୟୁ ହୋଇସାରିଛି। ପ୍ରଦର୍ଶନକାରୀଙ୍କ ଉପରେ ବଳପ୍ରୟୋଗ ନକରିବାକୁ ଟ୍ରମ୍ପ ଇରାନକୁ ଧମକ ଦେଇଛନ୍ତି। ସାଧାରଣ ଜନତାଙ୍କୁ ହତ୍ୟା କରାଗଲେ ଆମେରିକା ଚୁପ୍ ବସିବ ନାହିଁ ବୋଲି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଧମକ ଦେଇଛନ୍ତି
ବାଂଲାଦେଶରେ ପୁଣି ଜଣେ ହିନ୍ଦୁଙ୍କୁ ନିର୍ମମ ହତ୍ୟା ; ୨୮ ବର୍ଷୀୟ ସମୀର ଦାସ ନାମକ ଯୁବକଙ୍କୁ ପିଟି ପିଟି ସଂଘବଦ୍ଧ ହତ୍ୟା
ନନ୍ଦିଘୋଷ ବ୍ୟୁରୋ : ବାଂଲାଦେଶରେ ପୁଣି ଜଣେ ହିନ୍ଦୁଙ୍କୁ ନିର୍ମମ ହତ୍ୟା। ୨୮ ବର୍ଷୀୟ ସମୀର ଦାସ ନାମକ ଯୁବକଙ୍କୁ ପିଟି ପିଟି ସଂଘବଦ୍ଧ ହତ୍ୟା କରାଯାଇଛି। ଅଟୋ ଚଳାଇ ଗୁଜୁରାଣ ମେଣ୍ଟାଉଥିଲେ ସମୀର ଦାସ। ଚିଟାଗଙ୍ଗ ଅଂଚଳରେ ଘଟିଛି ଏ ଜଘନ୍ୟ କାଣ୍ଡ। ଗତକାଲି ରାତିରେ ଚିଟାଗଙ୍ଗର ଦାଗାନଭୂଇଁଆନରେ ଅଟୋ ଚାଳକଙ୍କ ଉପରେ ନିର୍ମମ ଆକ୍ରମଣ ଘଟିଥିଲା।ଆକ୍ରମଣକାରୀମାନେ ଅଟୋ-ରିକ୍ସା ଡ୍ରାଇଭରଙ୍କୁ ପିଟି ପିଟି ହତ୍ୟା କରିଥିଲେ। ହତ୍ୟା ପରେ, ଅପରାଧୀମାନେ ବ୍ୟାଟେରୀ ଚାଳିତ ଅଟୋ-ରିକ୍ସା ଚୋରି କରି ଘଟଣାସ୍ଥଳରୁ ପଳାଇ ଯାଇଥିଲେ। ସମୀରଙ୍କୁ ଦେଶୀ ଅସ୍ତ୍ରଶସ୍ତ୍ରରେ ହତ୍ୟା କରାଯାଇଥିଲା ଏବଂ ପିଟି ପିଟି ହତ୍ୟା କରାଯାଇଥିଲା। ପ୍ରାଥମିକ ତଦନ୍ତ ରିପୋର୍ଟରୁ ଏହା ଏକ ପୂର୍ବ ଯୋଜନାବଦ୍ଧ ହତ୍ୟାକାଣ୍ଡ ବୋଲି ମନେ ହେଉଛି।ହତ୍ୟା ପରେ ଅପରାଧୀମାନେ ଏକ ଅଟୋ-ରିକ୍ସା ମଧ୍ୟ ଲୁଟି ନେଇଥିଲେ। ପୀଡିତାଙ୍କ ପରିବାର ପକ୍ଷରୁ ଏତଲା ପରେ ପୋଲିସ ଅପରାଧୀଙ୍କୁ ଚିହ୍ନଟ ଏବଂ ଗିରଫ କରିବା ପାଇଁ ଚଢାଉ ଆରମ୍ଭ କରିଛି। ୧୭ କୋଟି ସଂଖ୍ୟାଗରିଷ୍ଠ ମୁସଲିମ ସମ୍ପ୍ରଦାୟର ଦେଶ ୨୦୨୪ ବିଦ୍ରୋହ ପରଠାରୁ ଅଶାନ୍ତିରେ ରହିଛି। ଇସଲାମିକ ଶକ୍ତିର ପୁନରୁତ୍ଥାନ ଧାର୍ମିକ ସଂଖ୍ୟାଲଘୁଙ୍କ ମଧ୍ୟରେ ଚିନ୍ତା ସୃଷ୍ଟି କରିଛି। ଯେଉଁଥିରେ ସୁଫି ମୁସଲିମ ଏବଂ ହିନ୍ଦୁ ମଧ୍ୟ ସାମିଲ ଅଛନ୍ତି। ଏହି ସଂଖ୍ୟାଲଘୁ ଗୋଷ୍ଠୀଙ୍କ ସଂଖ୍ୟା ମୋଟ ଜନସଂଖ୍ୟାର ୧୦ ପ୍ରତିଶତରୁ କମ୍।ଧାର୍ମିକ ଭେଦଭାବ ବିରୋଧରେ ହିଂସାକୁ ନେଇ ବାଂଲାଦେଶ ହିନ୍ଦୁ ବୌଦ୍ଧ ଖ୍ରୀଷ୍ଟିଆନ ୟୁନିଟି କାଉନସିଲ ଗମ୍ଭୀର ଚିନ୍ତା ପ୍ରକାଶ କରିଛି।ବାଂଲାଦେଶରେ ଫେବୃଆରୀରେ ହେବାକୁ ଥିବା ଜାତୀୟ ନିର୍ବାଚନ ପାଖେଇ ଆସୁଥିବାରୁ ସାମ୍ପ୍ରଦାୟିକ ହିଂସା ଚିନ୍ତାଜନକ ହାରରେ ବୃଦ୍ଧି ପାଉଛି ବୋଲି ସଂଗଠନ କହିଛି।
ଆଜି ୧୨ ଘଣ୍ଟିଆ ନବରଙ୍ଗପୁର ବନ୍ଦ; ଜିଲ୍ଲାରେ ମଣ୍ଡି ଅଚଳାବସ୍ତାକୁ ନେଇ ଜିଲ୍ଲା ବିଜେଡି ପକ୍ଷରୁ ବନ୍ଦ ଡାକରା
ନନ୍ଦିଘୋଷ ବ୍ୟୁରୋ : ମଣ୍ଡି ସମସ୍ୟା ନେଇ ନବରଙ୍ଗପୁରର ସାତଟି ବ୍ଲକରେ ବିଜେଡିର ଚକା ଜାମ । ମଣ୍ଡିରେ ଧାନ ନ ଉଠିବା ଚାଷୀ ଧାନ ବିକ୍ରି ନ କରି ହଇରାଣ ହେଉଥିବା ଅଭିଯୋଗ କରି ପ୍ରତିବାଦରେ ରାଜରାସ୍ତାକୁ ଓହ୍ଲାଇଛି ନବରଙ୍ଗପୁର ଜିଲ୍ଲା ବିଜେଡି । ଜିଲ୍ଲା ବିଜେଡି ତରଫରୁ ନବରଙ୍ଗପୁର ଜିଲ୍ଲାର ସାତ ଗୋଟି ବ୍ଲକ ରେ ଚକ ଅଖ ଜାମ କରାଯାଇଛି । ଚାଉଁରିଆଗୁଡା ଓ ମାଝୀଗୁଡା ଛକ ଠାରେ ରାସ୍ତା ଅବରୋଧ କରାଯାଇଛି। ଫଳରେ ଗାଡି ଗୁଡିକ ଅଟକି ରହିଛି । ଦୋକାନ ବଜାର ଖୋଲା ରହିବା ସହିତ ଜରୁରୀ କାଳୀନ ସେବା ବନ୍ଦରୁ ବାଦ ଦିଆଯାଇଛି
ରାଜ୍ୟ ସରକାର ମିଛ ପ୍ରତିଶୃତି କ୍ଷମତା କୁ ଆସିଥିବାବେଳେ ବର୍ତ୍ତମାନ ଚାଷୀ ଙ୍କୁ ସମସ୍ୟା ଭିତର କୁ ଠେଲି ଦେଇଥିବା ଅଭିଯୋଗ ହୋଇଛି। ଜିଲ୍ଲାରେ ଧାନମଣ୍ଡିରେ ଅଚଳାବସ୍ଥା, ଚାଷୀଙ୍କ ଧାନ ବିକିବାକୁ ନେଇ ବିଭିନ୍ନ ପ୍ରକାର ସମସ୍ୟା ହେଉଛି। ମଣ୍ଡି ଆରମ୍ଭରୁ ବିଭ୍ରାଟ ଦେଖାଯାଇଛି। ସବୁ ମଣ୍ଡିରେ ପଡ଼ିରହିଛି ହଜାର ହଜାର ବସ୍ତା ଧାନ। କଟନି ଛଟନିରେ ଅତିଷ୍ଠ ଚାଷୀ। ସରକାରଙ୍କ ଚାଷୀ ମାରଣ ନୀତି ବିରୋଧରେ ଜିଲ୍ଲାପାଳଙ୍କ କାର୍ଯ୍ୟାଳୟ ଘେରାଉ କରିବେ ବୋଲି ବିଜେଡି ନେତା କହିଛନ୍ତି।
ହାତୀ ପାଇଁ ରାତି ଉଜାଗର; ଅଧରାତିରେ ଗାଁ ଭିତରକୁ ପଶି ଆସିଲା ଗୋଠଛଡା ଦନ୍ତା
ନନ୍ଦିଘୋଷ ବ୍ୟୁରୋ : ହାତୀ ପାଇଁ ରାତି ଉଜାଗର । ଅଧ ରାତିରେ ଗାଁ ଭିତରକୁ ପଶି ଆସିଲା ଗୋଠଛଡା ଦନ୍ତା । କେନ୍ଦୁଝର ଚମ୍ପୁଆ ଅଞ୍ଚଳରେ ଖେଳାଇଲା ଆତଙ୍କ। ଦୁଇଦିନ ତଳେ ଝାଡ଼ଖଣ୍ଡରେ ତିନିଜଣଙ୍କୁ ଆକ୍ରମଣ କରି ମାରିଥିବା ଦନ୍ତା ଗତ ରାତିରେ ବୈତରଣୀ ନଦୀ ପାର ହୋଇ ଚମ୍ପୁଆ ରେଞ୍ଜର ରରୁଆଁଗୋଡା ଗାଁ ମଧ୍ୟ ଦେଇ ବାଙ୍କିଆ ଗାଁ କୁ ପଶି ଆସିଥିଲି । ରରୁଆଁଗୋଡା ଗାଁରେ ଜଣଙ୍କ ଘର ଝରକା ତାଡ଼ି ଘର ଭିତରୁ ଧାନ ଚାଉଳ ଖାଇବାକୁ ଉଦ୍ୟମ କରିଥିବା ବେଳେ ଜଣଙ୍କ ଘର ଭାଙ୍ଗିବାକୁ ଉଦ୍ୟମ କରିଥିଲା। ରାତି ସାରା ହାତୀଟି ଗାଁରେ ଉତ୍ପାତ ଚଳାଇଥିବାବେଳେ ସାରାରାତି ଉଜାଗର ରହି ବନ ବିଭାଗ ଓ ଗ୍ରାମବାସୀ ହାତୀ ଘଉଡାଇବାକୁ ଉଦ୍ୟମ କରିଥିଲେ । ବ୍ୟାପକ ପନିପରିବା ନଷ୍ଟ ସହ ରାତିସାରା ଗାଁରେ ବ୍ୟାପକ ଉପଦ୍ରବ କରିବା ପରେ ପୁଣି ବୈତରଣୀ ପାର ହୋଇ ସକାଳୁ ହାତୀଟି ମୟୁରଭଞ୍ଜ କେଶରୀ ଗାଁ ଜଙ୍ଗଲକୁ ଚାଲି ଯାଇଛି ।
ଶ୍ୱଶୁର ଘରେ ଜ୍ୱାଇଁଙ୍କୁ ହତ୍ୟା ଅଭିଯୋଗ ; ମୃତକ ହେଲେ କଟକ ଚାଉଳିଆଗଂଜର ସରୋଜ କୁମାର ଜେନା
ନନ୍ଦିଘୋଷ ବ୍ୟୁରୋ : ଶ୍ୱଶୁର ଘରେ ଜ୍ୱାଇଁଙ୍କୁ ହତ୍ୟା ଅଭିଯୋଗ । ଅଭିଯୋଗ ଆଣିଲେ ମୃତକଙ୍କ ପରିବାର । ମୃତକ ହେଲେ କଟକ ଚାଉଳିଆଗଞ୍ଜ ଥାନା ଶିଖରପୁର, ଗଣ୍ଡରପୁର ଅଞ୍ଚଳର ସରୋଜ କୁମାର ଜେନା । ଜଗତସିଂହପୁର ବିରିଡ଼ି ଥାନା ୨୨ମୌଜା କଂସାରି ସାହି ସ୍ଥିତ ଶ୍ଵଶୁର ଘରେ ସନ୍ଦେହଜନକ ମୃତ୍ୟୁ ହୋଇଛି। ପତ୍ନୀ ସମେତ ଶ୍ବଶୁର ଘର ଲୋକଙ୍କ ନାଁରେ ବିରିଡ଼ି ଥାନାରେ ଅଭିଯୋଗ ଆଣିଛନ୍ତି ମୃତକଙ୍କ ପରିବାର। ୧୩ବର୍ଷ ତଳେ କଂସାରି ସାହିର ସାଗରିକା ଜେନାଙ୍କୁ ବିବାହ କରିଥିଲେ ସରୋଜ । ସେମାନଙ୍କର ୧୨ବର୍ଷର ପୁଅ ମଧ୍ୟ ଅଛି । ପାରିବାରିକ କଳହରୁ ମାସେ ହେବ ବାପଘରେ ରହୁଥିଲେ ପତ୍ନୀ। ଗତ ରବିବାର ଶ୍ବଶୁର ଘରକୁ ଯାଇଥିବାବେଳେ ତାଙ୍କର ମୃତ୍ୟୁକୁ ନେଇ ସନ୍ଦେହ ବଢ଼ିଛି। ବିରିଡି ମେଡିକାଲରେ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରିଛି ପୋଲିସ।