ନନ୍ଦିଘୋଷ ବ୍ୟୁରୋ: ଖରାଛୁଟି ପରେ ଆସନ୍ତାକାଲିଠାରୁ ସ୍କୁଲ ଖୋଲିବାର ଥିଲେ ମଧ୍ୟ ଡାଇରିଆ ଅଞ୍ଚଳରେ ସ୍କୁଲ ଖୋଲିନପାରେ। ଏହି ସୂଚନା ଦେଇଛନ୍ତି ସ୍କୁଲ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ। ସେ କହିଛନ୍ତି, ଡାଇରିଆ ବ୍ୟାପିଥିବା ୩ ଜିଲ୍ଲାର ସ୍ଥିତି ଦେଖି ସ୍କୁଲ୍ ଖୋଲିବା ନିଷ୍ପତ୍ତି ନେବେ ଜିଲ୍ଲାପାଳ। ସ୍ଥିତି ଅଣାୟତ୍ତ ଥିଲେ ସ୍କୁଲ୍ ବନ୍ଦ ରଖିପାରିବେ। ଆକ୍ୱାଗାର୍ଡ ନ ଥିବା ସ୍କୁଲରେ ପିଲାଙ୍କୁ ଫୁଟା ପାଣି ପିଇବାକୁ ଦେବାକୁ ନିର୍ଦ୍ଦେଶ ଦିଆଯାଇଛି। ପାଚିକାମାନେ ମଧ୍ୟାହ୍ନ ଭୋଜନରେ ଗରମ ଖାଦ୍ୟ ସହ ପିଲାଙ୍କୁ ଫୁଟା ପାଣି ଦେବା ପାଇଁ କୁହାଯାଇଛି। ହଷ୍ଟେଲରେ ବି ସମାନ ପଦକ୍ଷେପ ଗ୍ରହଣ କରାଯିବ। ସ୍କୁଲ୍ ପରିବେଶ ସହ ପାଣି ଟାଙ୍କି ସଫା କରିବା ଉପରେ ଗୁରୁତ୍ଵ ଦିଆଯାଇଛି। ଏହା ସହିତ ସ୍କୁଲ ପରିସରର ସ୍ଵଚ୍ଛତା ଉପରେ ମଧ୍ୟ ଗୁରୁତ୍ଵ ଦେବାକୁ ଶିକ୍ଷାମନ୍ତ୍ରୀ ନିର୍ଦ୍ଦେଶ ଦେଇଛନ୍ତି।
ଗୋପାଳପୁର ଗଣଦୁଷ୍କର୍ମ ମାମଲା : ଅଭିଯୁକ୍ତଙ୍କ ହେବ ଡିଏନଏ ଟେଷ୍ଟ
ନନ୍ଦିଘୋଷ ବ୍ୟୁରୋ: ଗୋପାଳପୁର ଗଣଦୁଷ୍କର୍ମ ମାମଲାରେ ହେବ ଡିଏନଏ ଟେଷ୍ଟ । ୧୦ ଅଭିଯୁକ୍ତଙ୍କଠାରୁ ସାମ୍ପୁଲ ସଂଗ୍ରହ କରାଯାଇଛି। ତୃତୀୟ ଦିନରେ ପହଞ୍ଚିଛି କ୍ରାଇମବ୍ରାଞ୍ଚର ଟିମର ତଦନ୍ତ। କ୍ରାଇମବ୍ରାଞ୍ଚର ତିନି ଜଣିଆ ଟିମ୍ ଗୋପାଳପୁର ଥାନାକୁ ଆସି କାଗଜପତ୍ର ଯାଞ୍ଚ କରିଛନ୍ତି। ଗଣଦୁଷ୍କର୍ମ ଘଟଣାରେ ବିଭିନ୍ନ ଦିଗକୁ ନେଇ ଆଜି ମଧ୍ୟ ଘାଣ୍ଟିବ କ୍ରାଇମବ୍ରାଞ୍ଚ। ପୀଡ଼ିତାଙ୍କ ବୟାନ ରେକର୍ଡ କରିପାରେ କ୍ରାଇମବ୍ରାଞ୍ଚ। ଗଣଦୁଷ୍କର୍ମ ଘଟଣାର କିଛି ସାକ୍ଷୀଙ୍କୁ ପଚରାଉଚରା କରିବା ପାଇଁ କ୍ରାଇମବ୍ରାଞ୍ଚ ଟିମ ଯାଇଥିବା ସୂଚନା । ଦୁଇଟି କ୍ରାଇମବ୍ରାଞ୍ଚର ଟିମ୍ ଗୋପାଳପୁର ଅଞ୍ଚଳରେ ଡେରା ପକାଇଛି। ଗତ ରବିବାର ସଂଧ୍ୟାରେ ଜଣେ ଯୁବତୀଙ୍କୁ ଗୋପାଳପୁର ସମୁଦ୍ର ବେଳାଭୂମିରେ ଗଣଦୁଷ୍କର୍ମ କରାଯାଇଥିବାର ଅଭିଯୋଗ ହୋଇଥିଲା।
ରେକର୍ଡ ଭାଙ୍ଗିବେ କି ଅମୀର ଖାନ ? ଏହି ଫିଲ୍ମ…
ନନ୍ଦିଘୋଷ ବ୍ୟୁରୋ: ସବୁବେଳେ ନିଜର ଅଭିନୟ ସାଙ୍ଗକୁ ବକ୍ସ ଅଫିସରେ ରେକର୍ଡ ରୋଜଗାର ପାଇଁ ଚର୍ଚ୍ଚାରେ ରହିଥାନ୍ତି ଅମୀର ଖାନ୍ । ଅମୀରଙ୍କ ’ଲାଲ ସିଂ ଚଢ଼ା’ ଫ୍ଲପ୍ ହେବାପରେ ପୁଣିଥରେ ଦମଦାର କମବ୍ୟାକ୍ କରିବା ପାଇଁ ପ୍ରସ୍ତୁତ ହେଉଛନ୍ତି ବଲିଉଡର ମିଷ୍ଟର ପରଫେକ୍ଟ । ’ସିତାରେ ଜମିନ୍ ପର’ ଫିଲ୍ମ ଜରିଆରେ ଆଗାମୀ ଫିଲ୍ମରେ ନଜର ଆସିବେ । ତେବେ ଏହି ଫିଲ୍ମ ଭଲ ରୋଜଗାର କରିବା ସହ ରେକର୍ଡ ରୋଜଗାର କରିବା ଲକ୍ଷ୍ୟରେ ରହିଛି ପ୍ରଯୋଜନା ସଂସ୍ଥା । ତେବେ ତାଙ୍କର ଅପକମିଙ୍ଗ୍ ଫିଲ୍ମ ଓଟିଟିରେ ରିଲିଜ ହେବ ନାହିଁ । ଏହି ଫିଲ୍ମକୁ ଦେଖିବାକୁ ହେଲେ ଦର୍ଶକଙ୍କ କେବଳ ଥିଏଥରକୁ ଯିବାକୁ ପଡ଼ିବ । ପୂର୍ବ ଫିଲ୍ମରେ ରହିଥିବା ଦାମ ମଧ୍ୟ ଏଥିରେ ରହିଛି । ଏଣୁ କେତେ ରୋଜଗାର କରୁଛି ତାହା ଉପରେ ରହିଛି ନଜର । ୩ ବର୍ଷ ପରେ ପୁଣି କମବ୍ୟାକ୍ କରୁଥିବାବେଳେ କୁହାଯାଉଛି କି, ପ୍ରଥମ ଦିନରେ ୧୧ରୁ ୧୨ କୋଟି ଟଙ୍କାର ବ୍ୟବସାୟ କରିପାରିବ । ଲାଲ ସିଂ ଚଢ଼ା ପ୍ରଥମ ଦିନରେ ୧୧ କୋଟି ଟଙ୍କା ରୋଜଗାର କରିଥିଲା । ତେବେ ଏହି ଫିଲ୍ମ ଫ୍ଲପ ହୋଇଥିଲେ ସୁଦ୍ଧା ଭଲ ରୋଜଗାର କରିଥିଲା । ଅପକମିଙ୍ଗ ଫିଲ୍ମରେ ଅମୀର ନିଜେ ପ୍ରଯୋଜନା କରିଥିବାବେଳେ ଏହା ଅଧିକ ରୋଜଗାର କରିବ ବୋଲି ଆଶା ରହିଛି । ଆଡଭାନ୍ସ ଟିକେଟ ବୁକିଂ ଯଦି କହିବା ତାହେଲେ ଏଯାବତ ଏହା ୩ କୋଟି ଟଙ୍କା ଆୟ କରିଛି । ଆହୁରି କିଛି ଦିନ ରହିଥିବାବେଳେ ବଡ଼ କଳାକାରଙ୍କ ଫିଲ୍ମ ହୋଇଥିବାରୁ ଆଖିଦୃଷିଆ ରୋଜଗାର କରିବ ବୋଲି କୁହାଯାଉଛି ।
ଝାଡ଼ାବାନ୍ତି ସ୍ଥିତିର ଅନୁଧ୍ୟାନ, ଯାଜପୁର, କଟକ ଓ ଭଦ୍ରକ ଗସ୍ତରେ କେନ୍ଦ୍ରୀୟ ଟିମ୍ ଓ ରାଜ୍ୟ ସ୍ୱାସ୍ଥ୍ୟ ବିଭାଗର ସ୍ବତନ୍ତ୍ର ଟିମ୍
ନନ୍ଦିଘୋଷ ବ୍ୟୁରୋ: ଝାଡ଼ାବାନ୍ତି ସ୍ଥିତିର ଅନୁଧ୍ୟାନ ପାଇଁ ୩ ଜିଲ୍ଲା ଯାଜପୁର, କଟକ ଓ ଭଦ୍ରକ ଗସ୍ତରେ କେନ୍ଦ୍ରୀୟ ଟିମ୍ ଓ ରାଜ୍ୟ ସ୍ୱାସ୍ଥ୍ୟ ବିଭାଗର ସ୍ବତନ୍ତ୍ର ଟିମ୍। ଏହି ସବୁ ଜିଲ୍ଲାରେ ସ୍ଥିତିର ଅନୁଧ୍ୟାନ କରାଯିବ। ଭଦ୍ରକ ପହଞ୍ଚିଲେ କେନ୍ଦ୍ରୀୟ ଓ ରାଜ୍ୟର ସ୍ବାସ୍ଥ୍ୟ ଟିମ । ଭଣ୍ଡାରୀପୋଖରୀ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ୩ ଜଣିଆ ଟିମ ପହଞ୍ଚିଛନ୍ତି। କେନ୍ଦ୍ରୀୟ ଟିମର ୨ ଜଣ ଥିବା ବେଳେ ଜଣେ ରାଜ୍ୟରୁ ଅଛନ୍ତି। ସମୀକ୍ଷା ପରେ ଝାଡ଼ାବାନ୍ତି ଆକ୍ରାନ୍ତ ଅଞ୍ଚଳକୁ ଗସ୍ତ କରିବ ଏହି ଟିମ୍ ।
ଗତକାଲି କେନ୍ଦ୍ରୀୟ ଟିମ୍ ସହିତ ସ୍ଵାସ୍ଥ୍ୟ ବିଭାଗର ଆଲୋଚନା ହୋଇଥିଲା। ଏଥିରେ ନିଷ୍ପତ୍ତି ହୋଇଛି ପ୍ରତ୍ୟେକ ଜିଲ୍ଲାରେ ଗଠନ ହେବ କୋର୍ ଟିମ। ଏହି ଟିମର ଆବାହକ ରହିବେ CDMO। ପ୍ରତ୍ୟେକ ଦିନ ସନ୍ଧ୍ୟାରେ ତର୍ଜମା କରାଯିବ ଏବଂ ତାପର ଦିନ ପାଇଁ ଯୋଜନା ପ୍ରସ୍ତୁତ କରାଯିବ। ପ୍ରତି ୩ ଦିନରେ ବିଶୋଧନକୁ ତ୍ବରାନ୍ବିତ କରାଯିବ। ରୋଗୀଙ୍କ କେସ୍ ହିଷ୍ଟ୍ରି ଯାଞ୍ଚ କରାଯିବ। ଡାଇରିଆକୁ ନେଇ ବ୍ୟାପକ ସଚେତନ କରିବ ସ୍ବାସ୍ଥ୍ୟ ବିଭାଗ। ପଞ୍ଚାୟତିରାଜ ବିଭାଗର RWSSର କର୍ମଚାରୀ ମାନେ ଜଳ ଉତ୍ସକୁ ବୁଲି ଦେଖିବେ। ଡାଇରିଆ ସଚେତନତା କ୍ୟାମ୍ପେନରେ ଯୋଗଦେବେ ମିଶନ ଶକ୍ତି ମହିଳା। ସ୍କୁଲ ଖୋଲୁଥିବାରୁ ସବୁ ସ୍କୁଲରେ ବିଶୋଧନ ହେବ ପାଣି। ହଷ୍ଟେଲ ଓ ସ୍କୁଲରେ ସଫା ହେବ ପାଣି ଟାଙ୍କି। ସ୍କୁଲ ଖୋଲିବା ପୂର୍ବରୁ ମଧ୍ୟାହ୍ନ ଭୋଜନ ପ୍ରସ୍ତୁତିର ଗୁଣବତ୍ତା ଯାଞ୍ଚ ହେବ। ଏହାସହ ପିଲାଙ୍କ ହାତ ଧୂଆ ଉପରେ ମଧ୍ୟ ଗୁରୁତ୍ବ ଦିଆଯିବ ବୋଲି ସୂଚନା ଦେଇଛନ୍ତି ସ୍ବାସ୍ଥ୍ୟ ସଚିବ।
ପୂର୍ବତନ ସ୍ୱାସ୍ଥ୍ୟ ମନ୍ତ୍ରୀ ସ୍ବର୍ଗତ ନବ ଦାସଙ୍କ ଘରେ IT ରେଡ୍
ନନ୍ଦିଘୋଷ ବ୍ୟୁରୋ: ପୂର୍ବତନ ସ୍ୱାସ୍ଥ୍ୟ ମନ୍ତ୍ରୀ ସ୍ବର୍ଗତ ନବ ଦାସଙ୍କ ଘରେ ଆଇଟି ରେଡ l ଆଜି ସକାଳୁ ଝାରସୁଗୁଡା, ସମ୍ବଲପୁର, ଭୁବନେଶ୍ୱର ସମେତ ରାଜ୍ୟ ବାହାରେ ଥିବା ୧୯ଟି ସ୍ଥାନରେ ଆୟକର ବିଭାଗ ପକ୍ଷରୁ ଆୟକର ବିଭାଗ ରେଡ କରୁଛି। ଆୟକର ସଂପର୍କିତ ମାମଲା ନେଇ ଏହି ରେଡ୍ ହେଉଛି। ସମ୍ବଲପୁର ମୁଦିପଡ଼ାରେ ଥିବା ତାଙ୍କ ଘର, ଭାଲୁପାଲିରେ ଥିବା ଏକ ହୋଟେଲରେ ଚାଲିଛି ଛାନବିନ। ସେହିପରି ସୁନ୍ଦରଗଡ଼ରେ ଚାଲିଛି ରେଡ୍ । ସମ୍ବଲପୁର ଓ ଭୁବନେଶ୍ୱର ଟିମ୍ ଏହି ଛାନବିନ୍ କରୁଛନ୍ତି। ନବ ଦାସଙ୍କ ସହଯୋଗୀ ଟ୍ରାନ୍ସପୋର୍ଟ ବ୍ୟବସାୟୀ ସଞ୍ଜୟ ନନ୍ଦଙ୍କ ଘରେ ଓ ଅଫିସରେ ମଧ୍ୟ ଚଢ଼ଉ ଜାରି ରହିଛି। ସେ କୋଇଲା ଟ୍ରାନ୍ସପୋଟିଂ ବ୍ୟବସାୟ କରନ୍ତି। ମିଶନରୋଡ଼ରେ ଥିବା ବାସଭବନ ଓ ଅଫିସ ସହିତ ବ୍ୟାଙ୍କ ଛକରେ ଥିବା ଚାଲାନ ଅଫିସରେ ଛାନବିନ୍ ଚାଲିଛି।
ଭିଜିଲାନ୍ସ ଜାଲରେ ପୂର୍ବତନ ପିଇଓ
ନନ୍ଦିଘୋଷ ବ୍ୟୁରୋ: ଭିଜିଲାନ୍ସ ହାତରେ ଧରାପଡ଼ିଲେ ଦାରିଙ୍ଗବାଡିର ଲାଞ୍ଚୁଆ ପୂର୍ବତନ ପିଇଓ ଅକ୍ରୁର ମାଝୀ। ୬୦ ଲକ୍ଷ ସରକାରୀ ଟଙ୍କା ହଡ଼ପ କରି ଫେରାର ଥିଲେ। ଗତକାଲି ରାତିରେ ଦାରିଙ୍ଗବାଡିରୁ ଗିରଫ କରିଛି ଫୁଲବାଣୀ ଭିଜିଲାନ୍ସ ଟିମ । ଦାରିଙ୍ଗବାଡି ବ୍ଲକ ଅନ୍ତର୍ଗତ ସରାମୁଳି ପଂଚାୟତ ପିଇଓ ଥିବାବେଳେ ୫୩ ଲକ୍ଷ ସରକାରୀ ଅର୍ଥ ହଡପ କରିଥିବାବେଳେ ପୂର୍ବରୁ ଝିଙ୍ଗିରୀଗୁଡା ପଂଚାୟତରେ ଥିବାବେଳେ ମଧ୍ୟ ସରକାରୀ ଅର୍ଥ ହଡପ ଅଭିଯୋଗ ରହିଛି । ଅଙ୍କୁରକୁ ଭିଜିଲାନ୍ସ ଅଧିକ ପଚାରଉଚରା କରୁଥିବା କହିଛନ୍ତି ଭିଜିଲାନ୍ସ ଡିଏସପି ହେମନ୍ତ କୁମାର ମହାନ୍ତି ।
କଣ ଚାହୁଁଛି ଆମେରିକା ? କାହିଁକି ମୁନୀରଙ୍କୁ ଡାକିଲେ ଟ୍ରମ୍ପ ?
ନନ୍ଦିଘୋଷ ବ୍ୟୁରୋ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଭେଟିବାକୁ ଆମନ୍ତ୍ରିତ ଅତିଥି ପାକିସ୍ତାନ ସେନାମୁଖ୍ୟ ଜେନେରାଲ ଆସିମ ମୁନୀର। ହ୍ଵାଇଟ ହାଉସରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ କଲେ ମଧ୍ୟାହ୍ନ ଭୋଜନ। ବୈଦେଶିକ ସଚିବ ମାର୍କୋ ରୁବିଓ, ପ୍ରତିରକ୍ଷା ସଚିବ ପିଟି ହେଗସେଥଙ୍କ ସହ ମୁନୀର ସାକ୍ଷାତ କରିବା କାର୍ଯ୍ୟକ୍ରମ ରହିଛି । ଯାହାକୁ ନେଇ ଏବେ ସବୁଠି ଚର୍ଚ୍ଚା । ଆମେରିକା ଚାହୁଁଛି କଣ ? ପାକିସ୍ତାନୀର ସେନାମୁଖ୍ୟଙ୍କୁ ଡାକି ଭାରତକୁ କଣ ସନ୍ଦେଶ ଦେବାକୁ ଚାହୁଁଛନ୍ତି ? ଯଦିଓ କୁଟନୈତିକ ମହଲରେ ଏଭଳି ଚର୍ଚ୍ଚା ହେଉଛି ତଥାପି ଉଭୟଙ୍କ ଲଞ୍ଚ କରିବାକୁ ନେଇ ଅଧିକ ଚର୍ଚ୍ଚା ଘନେଇଛି ।
ସେପଟେ ଟ୍ରମ୍ପ କହିଛନ୍ତି କି, ଭାରତ ଏବଂ ପାକିସ୍ତାନ ମଧ୍ୟରେ ଲାଗି ରହିଥିବା ଉତ୍ତେଜନାକୁ ସମାପ୍ତ କରାଯାଇଛି । ଯୁଦ୍ଧ ବନ୍ଦ ହେବା ପରେ ଉଭୟଙ୍କ ଧନ୍ୟବାଦ ଦେବାକୁ ଚାହୁଁଛୁ । ଭାରତ ଏବଂ ପାକିସ୍ତାନ ସହ ବାଣିଜ୍ୟ ଚୁକ୍ତି ଉପରେ କାମ କରୁଛୁ । ମୁଁ ବହୁତ ଖୁସି, ମୋଦି ଏବଂ ମୁନୀର ବହୁତ ଜ୍ଞାନୀ ବ୍ୟକ୍ତି, ଉଭୟ ଯୁଦ୍ଧ ଜାରି ନରଖିବାକୁ ନିଷ୍ପତ୍ତି ନେଇଛନ୍ତି । ପୂର୍ବରୁ ମୋଦି ଆମେରିକା ଆସିଥିଲେ ଆଉ ଏବେ ମୁନୀର ଆସିଛନ୍ତି । ମୁଁ ଉଭୟଙ୍କ ଭେଟି ବେଶ ସମ୍ମାନିତ ମନେ କରୁଛି । ମୁଁ ଯୁଦ୍ଧ ବନ୍ଦ କରି ଦେଇଛି । ମୋଦିଙ୍କ ସହ କଥା ହୋଇଛି ଆମେ ବାଣିଜ୍ୟ ଚୁକ୍ତି କରିବାକୁ ଯାଉଛୁ । ସେପଟେ ଆମେରିକା ଗସ୍ତ ପୂର୍ବରୁ ମୁନୀର କହିଛନ୍ତି କି, ଆମେ ଚାହୁଁଛୁ ଯୁଦ୍ଧ ତୁରନ୍ତ ଶେଷ ହେଉ । ପାକି୍ତାନକୁ ଏକ ସଭ୍ୟ ରାଷ୍ଟ୍ରଭାବେ ଦେଖାଯାଉ ।
ଇଂଲଣ୍ଡରେ କେମିତି ରହିବ ଟିମ୍ ଇଣ୍ଡିଆର ପ୍ରଦର୍ଶନ ?
ନନ୍ଦିଘୋଷ ବ୍ୟୁରୋ: ଟିମ ଇଣ୍ଡିଆର ନୂଆ ଟେଷ୍ଟ ଅଧିନାୟ ସାଙ୍ଗକୁ ଯୁବ ଖେଳାଳି । ଇଂଲଣ୍ଡରେ କେମିତି ରହିବ ଭାରତୀୟ ଦଳର ପ୍ରଦର୍ଶନ । ଏହାକୁ ନେଇ ଏବେ ସବୁଠି ଆରମ୍ଭ ହୋଇଛି ଚର୍ଚ୍ଚା । ବିରାଟ, ରୋହିତ ଏବଂ ଅଶ୍ବିନୀଙ୍କ ଭଳି ଅଭିଜ୍ଞ ଖେଳାଳିଙ୍କ ବିନା ଇଂଲଣ୍ଡରେ ଟେଷ୍ଟ ସିରିଜ୍ ଖେଳିବାକୁ ଯାଉଛି ଭାରତ । ତେବେ ଦଳର ପ୍ରଦର୍ଶନ କିଭଳି ରହିବ ? ତେବେ ଶୁଭମନ ଗିଲଙ୍କ ଅଧିନାୟକତ୍ବରେ ଦଳ ବିଜୟ ହାସଲ କରି ନୂଆ ରେକର୍ଡ କରିବ କି ? ସେପଟେ ଇଂଲଣ୍ଡ ଭଳି ଶକ୍ତିଶାଳି ଦଳ ବିପକ୍ଷରେ ପୁଣି ଇଂଲଣ୍ଡ ମାଟିରେ ବିଜୟ ମଧ୍ୟ ଏତେ ସହଜ ନୁହେଁ ଏହାସହ ଇଂଲଣ୍ଡ ମଧ୍ୟ ଭାରତୀୟ ଦଳକୁ ସହଜରେ ନେଇ ପାରିବ ନାହିଁ । ନିକଟରେ ଆଇପିଏଲରେ ଦମଦାର ପ୍ରଦର୍ଶନ କରିଥିବା ବହୁ ପ୍ରତିଭାବାନ ଖେଳାଳିମାନେ ଏହି ଗସ୍ତରେ ରହିଛନ୍ତି ।
ସବୁଠାରୁ ଗୁରୁତ୍ବପୂର୍ଣ୍ଣ ହେଉଛି କି, ବୁମରାଙ୍କ ପ୍ରଦର୍ଶନ ଉପରେ ସମସ୍ତଙ୍କ ନଜର ରହିଛି । କାରଣ ଭାରତ ହେଉ କିମ୍ବା ବିଦେଶ ସବୁବେଳେ ଭାରତଙ୍କୁ ସଙ୍କଟରୁ ମୁକ୍ତ କରିଆସୁଥିବା ବୁମରା ଭାରତ ପାଇଁ ବେଶ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିବା ସହ ଇଂଲଣ୍ଡର ବ୍ୟାଟ୍ସମ୍ୟାନଙ୍କୁ ଅକଳରେ ପକାଇ ପାରନ୍ତି ବୋଲି କ୍ରିକେଟ ବିଶେଷଜ୍ଞମାନେ ମତ ରଖିଛନ୍ତି । ବୁମରା ଇଂଲଣ୍ଡର ଷ୍ଟାର ବ୍ୟାଟ୍ସମ୍ୟାନ ଜୋ ରୁଟଙ୍କୁ ୯ଥର ଆଉଟ କରିଥିବାବେଳେ ବିଦେଶରେ ମଧ୍ୟ ଦମଦାର ପ୍ରଦର୍ଶନ କରିଥିବାର ନଜିର ରହିଛି । ଏପରିକି ଇଂଲଣ୍ଡରେ ୩୪ ଓ୍ବିକେଟ ଅକ୍ତିଆର କରିସାରିଛନ୍ତି ବୁମରା । ଏଣୁ ଆଶା ରଖାଯାଇଛି କି, ଏହି ସିରିଜରେ ସେ ୫୦ ଓ୍ବିକେଟ ଅକ୍ତିଆର କରିବା ସହ ପ୍ରଥମ ଭାରତୀୟ ବୋଲର ଭାବେ ନୂଆ ରେକର୍ଡ କରିବେ ।
କମିବ ଏୟାରପୋର୍ଟ ପାଖରେ ଥିବା ବିଲ୍ଡିଂର ଉଚ୍ଚତା
ନନ୍ଦିଘୋଷ ବ୍ୟୁରୋ: ଅହମଦାବାଦ ଏୟାର ଇଣ୍ଡିଆ ବିମାନ ଦୁର୍ଘଟଣା ପରେ ସତର୍କତା। ବିମାନ ବନ୍ଦର ପାଖରେ ଥିବା ବିଲଡିଂର ଉଚ୍ଚତା ହ୍ରାସ କରାଯିବ। ଦରକାର ପଡ଼ିଲେ ଭଙ୍ଗାଯିବ। ଏ ସଂପର୍କିତ ଏକ ନିୟମର ବିଜ୍ଞପ୍ତି ପ୍ରକାଶ କରିଛନ୍ତି କେନ୍ଦ୍ର ସରକାର। ଏଥିରେ କୁହାଯାଇଛି ଯେ, ଏୟାରପୋର୍ଟ ପାଖରେ ବଡ଼ ବିଲଡିଂ କିମ୍ଵା ଗଛ ଥିଲେ, ମାଲିକଙ୍କୁ ନୋଟିସ୍ ଦିଆଯିବ। ନୋଟିସ୍ ର ୬୦ ଦିନରେ ସେ ଘର ଭାଙ୍ଗିବା କିମ୍ଵା ଉଚ୍ଚତା ହ୍ରାସ କରିବେ। ଯଦି ନିଜେ ନ କରିବେ, ତେବେ ବିମାନ ବନ୍ଦର କର୍ତ୍ତୃପକ୍ଷ ଏ ସଂପର୍କରେ ଜିଲ୍ଲାପାଳଙ୍କୁ ଅବଗତ କରାଯିବ। ଏହା ପ୍ରଶାସନ ନିଜେ ପଦକ୍ଷେପ ନେବ। ଅନେକ ବିମାନ ବନ୍ଦର ପାଖରେ ଉଚ୍ଚ ବିଲଡିଂ ଓ ବଡ଼ ବଡ଼ ଗଛ ଥିବାରୁ ଏହା ବିପଦ ବୋଲି କୁହାଯାଇଛି। ବିଶେଷ କରି ଅହମଦାବାଦ ଦୁର୍ଘଟଣା ପରେ ଏ ନେଇ ଚିନ୍ତା ପ୍ରକାଶ ପାଇଛି।
ମଧ୍ୟପ୍ରାଚ୍ୟ ଉତ୍ତେଜନା ମଧ୍ୟରେ ଏମିତି କହିଲେ ଖାମେନେଇଙ୍କ ପୁତୁରା
ନନ୍ଦିଘୋଷ ବ୍ୟୁରୋ: ସପ୍ତମ ଦିନରେ ମଧ୍ୟପ୍ରାଚ୍ୟ ଉତ୍ତେଜନା। ଗତକାଲି ଇସ୍ରାଏଲ ଉପରେ ଜବରଦସ୍ତ ହମଲା କରିଛି ଇରାନ। ଫତେହ -୧ ମିସାଇଲ ମାଡ଼ କରିଥିଲା ଇରାନ। ଏହାର ଜବାବରେ ଇସ୍ରାଏଲ ପକ୍ଷରୁ କଡ଼ା ଜବାବ ଦିଆଯାଇଛି। ତେବେ ଏଭଳି ଏକ ପରିସ୍ଥିତିରେ ଇରାନର ଶାସକ ବର୍ଗଙ୍କ ସର୍ବୋଚ୍ଚ ନେତା ଆୟୋଜୁଲ୍ଲା ଅଲ୍ଲୀ ଖାମେନେଇଙ୍କ ପୁତୁରା ଦେଇଥିବା ପ୍ରତିକ୍ରିୟା ବେଶ ଚର୍ଚ୍ଚାରେ ରହିଛି । ଫ୍ରାନ୍ସରେ ରହିଥିବା ତାଙ୍କ ପୁତୁରା କହିଛନ୍ତି କି, ସେ ଯୁଦ୍ଧ ସପକ୍ଷରେ ନାହାନ୍ତି । ତେବେ ସେ ବିଶ୍ବାସ କରନ୍ତି କି ଇସଲାମିକ ରାଷ୍ଟ୍ରରେ ଗଣରାଜ୍ୟର ଶେଷ ହେଉଛି ପ୍ରକୃତ ଶାନ୍ତିର ପଥ । ଏହାସହ ସେ କହିଛନ୍ତି କି, ତାଙ୍କ ଦାଦାଙ୍କ ଶାସନର ଅନ୍ତ ଘଟିବା ଜରୁରୀ । ଖାମେନେଇଙ୍କ ସ୍ବେଚ୍ଛାଚାରୀ ଶାସନ ବିରୋଧରେ ସେ ରହିଥିବା ମଧ୍ୟ ଇଣ୍ଟରଭିୟ୍ୟୁ ସମରେ କହିଛନ୍ତି । ଇସ୍ରାଏଲ ସହ ସାମରିକ ମୁକାବିଲା କରିବା ଦୁର୍ଭାଗ୍ୟଜନକ । କିନ୍ତୁ ଏପରି ଏକ ବ୍ୟବସ୍ଥା ଏହା ଅନିବାର୍ଯ୍ୟ ଯାହା ମୁଣ୍ଡ ନୁଆଁଏ କିମ୍ବା ସଂସ୍କାର ଗ୍ରହଣ କରେ ।
ସେପଟେ ପୁତୁରା ମୋରାଦଖାନି କହିଛନ୍ତି କି, ଇରାନରେ ଇସଲାମିକ ଶାସନ ଅନ୍ତ ହେବା ଉଚିତ୍ । କହିଛନ୍ତି କି, ପରିସ୍ଥିତି ଏଭଳି ସ୍ଥିତିରେ ପହଞ୍ଚିଛି ଯେ ମୁଁ ଦୁଃଖିତ । କିନ୍ତୁ ଇରାନୀ ଶାସନର ଦୁର୍ବଳତା ଦେଖି ବହୁତ ଖୁସି । ଇରାନରେ ଇଣ୍ଟରନେଟ ସେବା ବନ୍ଦ ଥିବାରୁ ମୁଁ ସେଠାକାର ଲୋକଙ୍କ ସହ କଥା ହୋଇପାରୁନାହିଁ । ତେବେ ଇସଲାମିକ ଗଣରାଜ୍ୟର ଯେତେ ଶୀଘ୍ର ଅନ୍ତ ହେବ ଏହା ବେଶ ଭଲ । ଅନ୍ୟପଟେ ଆମେରିକା ରାଷ୍ଟ୍ରପତି ଡୋଲାନ୍ଡ ଟ୍ରମ୍ପ ମଧ୍ୟ ସୋସିଆଲ ମିଡିଆରେ ଇରାନକୁ ଚେତାବନୀ ଦେଇସାରିଛନ୍ତି । ଆତ୍ମସମର୍ପଣ କରିବାକୁ କହିଛନ୍ତି ଟ୍ରମ୍ପ ।