ସ୍କୁଲ ଫାଟକରେ ତାଲା ପକାଇବା ସହିତ ଧାରଣାରେ ବସିଲେ ଛାତ୍ରଛାତ୍ରୀ। ଶିକ୍ଷକ ବଦଳି ଆଦେଶ ବାତିଲ ଦାବିରେ ଛାତ୍ରଛାତ୍ରୀ ଓ ଅଭିଭାବକଙ୍କ ଧାରଣା। ବାରିପଦା କୁଳିଅଣା ବ୍ଲକ ଭାଲିଆଡିହା ମୁକୁନ୍ଦରାମ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ଫାଟକ ଆଗରେ ଦେଇଛନ୍ତି ଧାରଣା । ବିଦ୍ୟାଳୟରେ ୧୦୬ ଛାତ୍ର ଛାତ୍ରୀଙ୍କୁ ୮ଜଣ ଶିକ୍ଷକ ରହିଥିବା ବେଳେ ଜଣେ ଶିକ୍ଷକଙ୍କୁ ଗତ ୩୦ ତାରିଖ ଦିନ ବଦଳି କରାଯାଇଥିଲା। ତେବେ ବାଙ୍ଗିରିପୋଷି ବିଧାୟିକା ସଞ୍ଜଳି ମୁର୍ମୁଙ୍କ ସୁପାରିଶରେ ବଦଳି ହୋଇଥିବା ଅଭିଯୋଗ ହୋଇଛି। ତେବେ ବଦଳିକୁ ବିରୋଧ କରି ଧାରଣାରେ ବସିଛନ୍ତି ଶତାଧିକ ଛାତ୍ର ଛାତ୍ରୀଙ୍କ ସହ ଅଭିଭାବକ।
କୁଲଗାଓଁରେ ଅପରେସନ ଅଖଲ: ଜଣେ ଆତଙ୍କବାଦୀ ନିପାତ
ଜାମ୍ମୁ ଓ କାଶ୍ମୀରର କୁଲଗାଓଁରେ ଅପରେସନ ଅଖଲ। ଅପରେସନରେ ଜଣେ ଆତଙ୍କବାଦୀ ନିପାତ ହୋଇଥିବା ସୂଚନା ମିଳିଛି। ସେଠାରେ ୨ ଜଣ ଆତଙ୍କୀଙ୍କୁ ଘେରାବନ୍ଦୀ କରାଯାଇଛି। ଜଙ୍ଗଲରେ ଯବାନ-ଆତଙ୍କୀ ଗୁଳିବିନିମୟ ଜାରି ରହିଛି। ଅଖଲ ଜଙ୍ଗଲରେ ସର୍ଚ୍ଚ ଅପରେସନରେ ଜାରି ରହିଛି। ଲସ୍କର-ଏ-ତଏବାର ସହଯୋଗୀ ସଂଗଠନ ଦି ରେଜିଷ୍ଟାନ୍ସ ଫ୍ରଣ୍ଟ ବା ଟିଆରଏଫର ଆତଙ୍କୀ ନିପାତ ହୋଇଥିବା ସୂଚନା ମିଳିଛି। ମୃତ ଆତଙ୍କୀମାନେ ପହଲଗାଓଁ ହମଲା ସହ ସମ୍ପୃକ୍ତ ଥିବା ସୂଚନା ମିଳିଛି।
ହିନ୍ଦୋଳରେ ପୁଣି ଜଣେ ଚାଷୀଙ୍କୁ କଚାଡି ମାରିଲା ଦନ୍ତା
ଢେଙ୍କାନାଳ ହିନ୍ଦୋଳରେ ପୁଣି ଜଣେ ଚାଷୀଙ୍କୁ କଚାଡି ମାରିଲା ଦନ୍ତା। ମହାଲୁଣ୍ଡା ପଞ୍ଚାୟତ ଟାଙ୍ଗୀଶାଳ ଗାଁରେ ଜଣେ ଚାଷୀ ଧାନବିଲ ଦେଖିବାକୁ ଗତକାଲି ସନ୍ଧ୍ୟା ବେଳେ ଯାଇଥିଲେ। ସେ ଘରକୁ ନଫେରିବାରୁ ଆଜି ସକାଳୁ ଘର ଲୋକେ ଖୋଜା ଖୋଜି କରିବା ପରେ ଗାଁ ପୋଖରୀ ନିକଟରେ ତାଙ୍କ ମୃତଦେହ ଠାବ କରିଥିଲେ। ହାତୀଟି ତାଙ୍କୁ ଆକ୍ରମଣ କରିବା ଯୋଗୁ ତାଙ୍କ ମୁଣ୍ଡଗଣ୍ଡି ଅଲଗା ହୋଇଯାଇଥିବା ଦେଖିବାକୁ ମିଳିଥିଲା। ଆଉ ଏକ ମଇଁଷିକୁ ମଧ୍ୟ ମାରିଦେଇଛି ଦନ୍ତା। ହିନ୍ଦୋଳରେ ଚଳିତ ସପ୍ତାହରେ ଚାରି ଜଣଙ୍କୁ ମାରିଦେଲାଣି ଦନ୍ତା। ମୃତକ ହେଉଛନ୍ତି ସୁଧାକର ସାମଲ। ଏହାକୁ ନେଇ ଉତ୍ତେଜନା ପ୍ରକାଶ ପାଇଛି। ପୋଲିସ ଓ ବନ ବିଭାଗ ଅଧିକାରୀ ପହଂଚି ଶବକୁ ପୋଷ୍ଟ ମଟମ ପାଇଁ ପଠାଇଛନ୍ତି। ଦୁଇ ଦିନ ତଳେ ହାତୀ ୩ ଜଣଙ୍କୁ ମାରିବା ଘଟଣାରେ ଜଣେ ଫରେଷ୍ଟର ଏବଂ ହିନ୍ଦୋଳ ରେଞ୍ଜରଙ୍କୁ ନିଲମ୍ବନ କରାଯାଇଥିଲା।
ଚୋରା ମଦ ଭାଟି ଉପରେ ବୁଲିଲା ବୁଲଡୋଜର
ଚୋରା ମଦ ଭାଟି ଉପରେ ବୁଲିଲା ବୁଲଡୋଜର । ଆଠଗଡ଼ ଥାନା କୋରଙ୍ଗା ଗାଁରେ ଚୋରା ଦେଶୀ ମଦଭାଟି ଉପରେ ଅବକାରୀ ବିଭାଗ ପକ୍ଷରୁ ବଡ଼ ଧରଣର ଚଢାଉ କରାଯାଇଛି। ଘଟଣାସ୍ଥଳରୁ ଭାଟି ଛାଡ଼ି ମଦ ମାଫିଆ ଫେରାର୍ ହୋଇଯାଇଛି। ଆଠଗଡ଼ ଉପଜିଲ୍ଲାପାଳଙ୍କ ନେତୃତ୍ବରେ ଆଠଗଡ଼ ଡିଏସପି, ଆଇଆଇସି, ଆଠଗଡ଼ ଅବକାରୀ ଉପଅଧୀକ୍ଷକ ସମେତ ଏକ ପ୍ଲାଟୁନ ଫୋର୍ସ ଚଢ଼ାଉରେ ସାମିଲ ଅଛନ୍ତି । ଦୀର୍ଘ ଦିନ ଧରି ଏହି ଗାଁରେ ଚୋରା ଦେଶୀ ମଦ ପ୍ରସ୍ତୁତ ହୋଇ ଓଡିଶାର ବିଭିନ୍ନ ସ୍ଥାନକୁ ଚାଲାଣ ହେଉଥିବା ଅଭିଯୋଗ ହୋଇଥିଲା।
ଜଗତସିଂହପୁର ଜିଲ୍ଲାରେ ପୁଣି ଲଜ୍ଜା: ସିଡବ୍ଲୁସି କାର୍ଯ୍ୟାଳୟର ସଭ୍ୟଙ୍କ ନାମରେ ସାଙ୍ଘାତିକ ଅଭିଯୋଗ
ଜଗତସିଂହପୁର ଜିଲ୍ଲାରେ ପୁଣି ଲଜ୍ଜା । ସିଡବ୍ଲୁସି କାର୍ଯ୍ୟାଳୟର ସଭ୍ୟ ବିବେକାନନ୍ଦ ବଳଙ୍କ ନାମରେ ଆସିଛି ସାଙ୍ଘାତିକ ଅଭିଯୋଗ। ଅଭିଯୋଗ ଆଣିଛନ୍ତି ସେହି କାର୍ଯ୍ୟାଳୟର ସାମାଜିକ କୋଅର୍ଡିନେଟର ମହିଳା। ଯୁବତୀ ଜଣକ ଭୁବନେଶ୍ୱର ରୁଚିକା ସମାଜ ମଙ୍ଗଳ ସଂଗଠନ ତରଫରୁ ଏଠାରେ ଶିଶୁ ଶ୍ରମିକ, ଶିଶୁ ଶ୍ରମିକ ଚାଲାଣ, ବାଲ୍ୟ ବିବାହ ରୋକିବା ନିମନ୍ତେ ଜଗତସିଂହପୁର ଜିଲ୍ଲାରେ କୋଅର୍ଡିନେଟର ଭାବେ କାର୍ଯ୍ୟ ସମ୍ପାଦନ କରି ଆସୁଥିଲେ। ସେ ଏହି କାର୍ଯ୍ୟାଳୟ ପରିସରରେ ଏକ କ୍ଵାର୍ଟର୍ସରେ ରୁହନ୍ତି। ଯୁବତୀ ଜଣକ ଏକୁଟିଆ ରହୁଥିବାର ସୁଯୋଗ ନେଇ ସିଡବ୍ଲୁସି ସଭ୍ୟ ବିବେକାନନ୍ଦ ତାଙ୍କ ପ୍ରତି ଅଶାଳୀନ ବ୍ୟବହାର ପ୍ରଦର୍ଶନ କରିବା ଅଭିଯୋଗ ହୋଇଛି। ଏନେଇ ପୀଡ଼ିତାଙ୍କ ପକ୍ଷରୁ ଜଗତସିଂହପୁର ଥାନାରେ ଏତଲା ଦାଏର କରାଯାଇଛି। ଅଭିଯୁକ୍ତକୁ ଜଗତସିଂହପୁର ପୋଲିସ ନିଜ ହେପାଜତରେ ରଖିଛି। ସିଡବ୍ଲୁସି ସଭ୍ୟ ବିବେକାନନ୍ଦଙ୍କ ନାମରେ ପୂର୍ବରୁ ଶିଶୁ ସୁରକ୍ଷା କମିଟି ଅଧ୍ୟକ୍ଷଙ୍କ ନିକଟରେ ଫେବୁଆରୀରୁ ପୀଡିତା ଅଭିଯୋଗ କରିଥିଲେ ସୁଦ୍ଧା କଣ ପାଇଁ ଶିଶୁ ସୁରକ୍ଷା କମିଟି ଅଧ୍ୟକ୍ଷ ଏହି ଘଟଣାକୁ ଚାପି ରଖୁଥିଲେ ତାହା ତଦନ୍ତ ସାପେକ୍ଷ।
ବଢ଼ିଲା ରୁଷ-ଆମେରିକା ଉତ୍ତେଜନା: ରୁଷ ନିକଟରେ ମୁତୟନ ହେବ ଦୁଇଟି ଆମେରିକୀୟ ଆଣବିକ ବୁଡ଼ାଜାହାଜ
ରୁଷ ନିକଟରେ ମୁତୟନ ହେବ ଦୁଇଟି ଆମେରିକୀୟ ଆଣବିକ ବୁଡ଼ାଜାହାଜ। ରୁଷର ପୂର୍ବତନ ରାଷ୍ଟ୍ରପତି ଦିମିତ୍ରି ମେଦଭେଦେବଙ୍କ ଧମକ ପରେ ଏହି ପଦକ୍ଷେପ ନେଇଛନ୍ତି ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ। ଯଦି ଆକ୍ରମଣ କରାଯାଏ ତେବେ ଜବାବରେର ରୁଷ ଆଣବିକ ହମଲା କରିବାକୁ ପଛାଇବ ନାହିଁ ବୋଲି ରୁଷର ନିରାପତ୍ତା ପରିଷଦ ଉପାଧ୍ୟକ୍ଷ ମେଦଭେଦେବ କହିବା ପରେ ଟ୍ରମ୍ପ ନେଇଛନ୍ତି ପଦକ୍ଷେପ। ଶୀତଳ ଯୁଦ୍ଧ ସମୟରେ ରୁଷ ଯେଉଁ ଭୂମିକା ନିର୍ବାହ କରୁଥିଲା ଠିକ୍ ସେହି ନୀତି ଆପଣାଇବ ବୋଲି ସେ କହିବା ପରେ ଟ୍ରମ୍ପ ହୋଇଛନ୍ତି। ରୁଷଠାରୁ ଭାରତ ତୈଳ ଓ ଶକ୍ତି କ୍ରୟ କରୁଥିବାରୁ ଭାରତ ବିରୋଧରେ ଆମେରିକା ୨୫ ପ୍ରତିଶତ ଟାରିଫ ଲାଗୁ କରିବା ପରଠାରୁ କ୍ଷୁବ୍ଧ ହୋଇଛି ରୁଷ। ସେପଟେ ୟୁକ୍ରେନ ସହ ଅସ୍ତ୍ରବିରତି ସମୟସୀମା ୫୦ ଦିନରୁ ୧୨ ଦିନକୁ ଆମେରିକା ହ୍ରାସ କରିବା ଘଟଣାକୁ ନେଇ ଉତକ୍ଷିପ୍ତ ଅଛି ରୁଷ।
ବିଳମ୍ବିତ ରାତିରେ ଟ୍ରକ ପଛରେ ପିଟି ହେଲା ଟ୍ରାଭେଲର: ୧୩ ଜଣ ଯବାନ ଆହତ
ଅନୁଗୁଳ ଜାତୀୟ ରାଜପଥ-୫୫ ମୁଣ୍ଡାସାହି ଛକରେ ଦୁର୍ଘଟଣା । ବିଳମ୍ବିତ ରାତିରେ ଟ୍ରକ ପଛରେ ପିଟି ହେଲା ଟ୍ରାଭେଲର । ଟ୍ରାଭେଲରରେ ଥିବା ୧୩ ଜଣ ଯବାନ ଆହତ। ସେମାନଙ୍କ ମଧ୍ୟରୁ ୭ ଜଣ ଗୁରୁତର ହୋଇଥିବା ସୂଚନା। ସମସ୍ତ ଯବାନ ଦ୍ବିତୀୟ ବାଟାଲିୟନର ହୋଇଥିବା ସୂଚନା। ଆହତମାନଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଝାରସୁଗୁଡ଼ାରୁ ଭୁବନେଶ୍ବର ଯାଉଥିବା ବେଳେ ଦୁର୍ଘଟଣା। ୨ଜଣଙ୍କୁ କଟକ ସ୍ଥାନାନ୍ତର କରାଯାଇଛି।
ଉଦଳା ମାର୍କେଟରେ ଭୟାବହ ଅଗ୍ନିକାଣ୍ଡ: ୭୦ ଲକ୍ଷରୁ ଊର୍ଦ୍ଧ୍ବ ଟଙ୍କାର ଶାଢ଼ୀ ଜଳିଗଲା
ମୟୂରଭଞ୍ଜ ଉଦଳା ମାର୍କେଟରେ ଭୟାବହ ଅଗ୍ନିକାଣ୍ଡ। ବିଳମ୍ବିତ ରାତିରେ ଶାଢ଼ୀ ସୋରୁମରେ ଲାଗିଲା ନିଆଁ। ହୁ ହୁ ହୋଇ ଜଳିଲା ଦୋକାନ ଘର। ଜଳି ନଷ୍ଟ ପୋଡି ହୋଇଗଲା ୭୦ ଲକ୍ଷ ରୁ ଊର୍ଦ୍ଧ୍ବ ଟଙ୍କାର ଶାଢ଼ୀ ସହିତ ଅନ୍ୟ ସାମଗ୍ରୀ। ୩ ଘଣ୍ଟାର ପରିଶ୍ରମ ପରେ ଅଗ୍ନିଶମ ବାହିନୀ ଦ୍ବାରା ନିଆଁ ଆୟତ୍ତ ହୋଇଛି। ମାର୍କେଟରେ ଥିବା ଶାଢ଼ୀ ମହଲରେ ଅଚାନକ ନିଆଁ ଲାଗିଥିଲା। ଦୋକାନ ଭିତରେ ନିଆଁ ଲାଗିବା ପରେ ସଟର ଦେଇ ଧୂଆଁ ବାହାରିବା ରାତ୍ର ଜଗୁଆଳି ଏହା ଦେଖି ଦୋକାନ ମାଲିକଙ୍କ ଫୋନ କରିଥିଲେ। ଖବର ପାଇ ଉଦଳା ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଦୀର୍ଘ ୩ ଘଣ୍ଟାର ପରିଶ୍ରମ ପରେ ନିଆଁ କୁ ଆୟତ୍ତ କରିବାରେ ସକ୍ଷମ ହୋଇଥିଲେ। ଅଗ୍ନିକାଣ୍ଡରେ ୭୦ ଲକ୍ଷ ରୁ ଉର୍ଦ୍ଧ ଟଙ୍କାର ସାମଗ୍ରୀ ପୋଡି ନଷ୍ଟ ହୋଇଥିବା ବେଳେ ସର୍ଟ ସର୍କିଟ କୁ ଅଗ୍ନିକାଣ୍ଡ ହୋଇଥିବା ସନ୍ଦେହ କରାଯାଉଛି।
ଦୁର୍ଦ୍ଦାନ୍ତ ଅପରାଧୀ ସୁନିଲ ନାହାକକୁ ଏନକାଉଣ୍ଟର: ସୁନିଲର ବାମ ଗୋଡ଼ରେ ବାଜିଛି ଗୁଳି
ଦୁର୍ଦ୍ଦାନ୍ତ ଅପରାଧୀ ସୁନିଲ ନାହାକକୁ ଏନକାଉଣ୍ଟର। ବ୍ରହ୍ମପୁର ପୋଲିସ ଜିଲ୍ଲା ଗୋଳନ୍ଥରା ଥାନା ପକ୍ଷରୁ ଦୁର୍ଦ୍ଦାନ୍ତ ଅପରାଧୀକୁ ଏନକାଉଣ୍ଟର କରାଯାଇଛି । ବ୍ରହ୍ମପୁର ଏସପିଙ୍କ ନିର୍ଦ୍ଦେଶ କ୍ରମେ ଥାନା ଅଧିକାରୀ ବିବେକାନନ୍ଦ ଓ ତାଙ୍କ ଟିମ ଏନକାଉଣ୍ଟର କରିଛନ୍ତି। ସୁନିଲ ନିମଖଣ୍ଡି ଥାନା ଲୁଟ୍ ଘଟଣା ସମେତ ଅନ୍ୟାନ୍ୟ ମାମଲାରେ ସମ୍ପୃକ୍ତ ରହି ଫେରାର ରହିଥିଲା । ଗୋଳନ୍ଥରା ଥାନା ପୋଲିସ ଓ ସ୍ୱତନ୍ତ୍ର ଟିମ ଚଢ଼ାଉ ବେଳେ ସୁନିଲ ନାହାକ ପୋଲିସ ଉପରକୁ ଦୁଇ ରାଉଣ୍ଡ ଗୁଳି କରିଥିବା ଜଣାପଡ଼ିଛି । ସୁନିଲର ବାମ ଗୋଡ଼ରେ ଗୁଳି ବାଜିଥିବା ସୂଚନା ରହିଛି ।
ଜାତୀୟ ଚଳଚ୍ଚିତ୍ର ପୁରସ୍କାର ନାଁ ଘୋଷଣା: କଥଲ ଶ୍ରେଷ୍ଠ ହିନ୍ଦି ଫିଲ୍ମ, ପୁଷ୍କରାକୁ ଶ୍ରେଷ୍ଠ ଓଡ଼ିଆ ଚଳଚ୍ଚିତ୍ର ପୁରସ୍କାର
ନନ୍ଦିଘୋଷ ବ୍ୟୁରୋ: ୭୧ତମ ଜାତୀୟ ଚଳଚ୍ଚିତ୍ର ପୁରସ୍କାର ବିଜେତାଙ୍କ ନାଁ ଘୋଷଣା କରାଯାଇଛି । ଏଥର ଏହି ପୁରସ୍କାରଗୁଡ଼ିକ ୨୦୨୩ ମସିହାରେ ମୁକ୍ତିଲାଭ କରିଥିବା ଚଳଚ୍ଚିତ୍ର ପାଇଁ ଦିଆଯାଇଛି । ଏଥର ଜାତୀୟ ପୁରସ୍କାରରେ ସର୍ବୋତ୍ତମ ହିନ୍ଦୀ ଚଳଚ୍ଚିତ୍ର ପାଇଁ ‘କଥଲ’କୁ ପୁରସ୍କାର ଦିଆଯାଇଛି । ଏହି ଚଳଚ୍ଚିତ୍ରଟି ୧୯ ମଇ ୨୦୨୩ରେ ନେଟଫ୍ଲିକ୍ସରେ ମୁକ୍ତିଲାଭ କରିଥିଲା । ‘କଥଲ’ରେ ସାନ୍ୟା ମାଲହୋତ୍ରା, ଅନନ୍ତ ଭି ଜୋଶୀ, ବିଜୟ ରାଜ, ରାଜପାଲ ଯାଦବ, ବ୍ରିଜେନ୍ଦ୍ର କାଲା ଏବଂ ନେହା ସରାଫଙ୍କ ଭଳି କଳାକାର ମୁଖ୍ୟ ଭୂମିକାରେ ଅଭିନୟ କରିଥିଲେ ।
ଫିଲ୍ମ ‘ଜବାନ’ ପାଇଁ ଶାହରୁଖ ଖାନ ଏବଂ ଫିଲ୍ମ ‘ଟ୍ବେଲଥ ଫେଲ୍’ ପାଇଁ ବିକ୍ରାନ୍ତ ମାସେଙ୍କୁ ଶ୍ରେଷ୍ଠ ଅଭିନେତା ପୁରସ୍କାର ଦିଆଯାଇଛି । ଏହି ପରିପ୍ରେକ୍ଷୀରେ ଫିଲ୍ମ ‘ମିସେସ୍ ଚାଟାର୍ଜୀ ଭର୍ସେସ୍ ନରୱେ’ ପାଇଁ ରାଣୀ ମୁଖାର୍ଜୀଙ୍କୁ ଶ୍ରେଷ୍ଠ ଅଭିନେତ୍ରୀ ପୁରସ୍କାର ଦିଆଯାଇଛି । କେରଳ ଫାଇଲ୍ସ ସିନେମା ଶ୍ରେଷ୍ଠ ସିନେମାଟୋଗ୍ରାଫି ପାଇଁ ପୁରସ୍କାର ଜିତିଛି ।
ଶ୍ରେଷ୍ଠ ନୃତ୍ୟ ନିର୍ଦ୍ଦେଶିକଙ୍କ କଥା କହିବା, ତେବେ ବୈଭବୀ ମର୍ଚାଣ୍ଟଙ୍କୁ ‘ରକି ରାନୀ କି ପ୍ରେମ କାହାନି’ ଚଳଚ୍ଚିତ୍ରର “ଢ଼ିଣ୍ଡୋରା ବାଜେ”ରେ ଗୀତ ପାଇଁ ପୁରସ୍କାର ମିଳିଛି । ଜାତୀୟ ଚଳଚ୍ଚିତ୍ର ପୁରସ୍କାରରେ “ଆନିମଲ୍” ଚଳଚ୍ଚିତ୍ରକୁ ଏକ ସ୍ୱତନ୍ତ୍ର ଉଲ୍ଲେଖ ମିଳିଛି । ଶ୍ରେଷ୍ଠ ତେଲୁଗୁ ଚଳଚ୍ଚିତ୍ର ‘ବାଗୱନ୍ତ କେଶରୀ’ ସମ୍ନାନିତ ହୋଇଛି । ଶ୍ରେଷ୍ଠ ଅଣ ଫିଚର ଫିଲ୍ମ ପୁରସ୍କାର “ଦି ସାଇଲେଣ୍ଟ ଏପିଡେମିକ୍”କୁ ଦିଆଯାଇଛି । ଶ୍ରେଷ୍ଠ ଚଳଚ୍ଚିତ୍ର ସ୍କ୍ରିପ୍ଟ ପାଇଁ “ସନଫ୍ଲାୱାର୍ ୱେର୍ ଦି ଫାଷ୍ଟ ୱନ୍ସ ଟୁ ନୋ” ଚଳଚ୍ଚିତ୍ରକୁ ଚୟନ କରାଯାଇଛି । ଶ୍ରେଷ୍ଠ ଚଳଚ୍ଚିତ୍ର କ୍ରିଟିକ୍ ପୁରସ୍କାର ଉତ୍ପଲ୍ ଦତ୍ତଙ୍କୁ ଦିଆଯାଇଛି ।
ଏହି ଅବସରରେ ଓଡ଼ିଆ ସିନେ ଜଗତକୁ ମିଳିଛି ବଡ଼ ଉପହାର । ଓଲିଉଡ୍ ଇଣ୍ଡଷ୍ଟ୍ରି ପାଇଁ ଆସିଛି ଖୁସିର ଖବର । ସବ୍ୟସାଚୀ ମିଶ୍ର ଅଭିନୀତ ‘ପୁଷ୍କରା’କୁ ମିଳିଛି ଶ୍ରେଷ୍ଠ ଓଡ଼ିଆ ଚଳଚ୍ଚିତ୍ର ପୁରସ୍କାର । ୨୦୨୩ରେ ମୁକ୍ତିଲାଭ କରିଥିବା ଓଡ଼ିଆ ଚଳଚ୍ଚିତ୍ର ‘ପୁଷ୍କରା’ ବହୁ ପ୍ରଶଂସା ସାଉଁଟିଥିଲା । ଏହି ଚଳଚ୍ଚିତ୍ରରେ ସବ୍ୟସାଚୀ ମିଶ୍ର ଏବଂ ସୁପ୍ରିୟା ନାୟକ ଜୀବନ୍ତ ଅଭିନୟ କରି ଦର୍ଶକଙ୍କ ହୃଦୟ ଜିଣିବାରେ ସଫଳ ହୋଇଥିଲେ । ‘ପୁଷ୍କରା’ ଚଳଚ୍ଚିତ୍ରର ପ୍ରଯୋଜନା କରିଥିଲେ ରମେଶ ବାରିକ । ଶଙ୍କର ତ୍ରିପାଠୀ ଏହାର କାହାଣୀ ଏବଂ ସଂଳାପ ଲେଖିଥିଲେ ।