ପବିତ୍ର ମକର ସଂକ୍ରାନ୍ତିରେ ଚଳ ଚଞ୍ଚଳ ବାବା ସିଂହନାଥ ପୀଠ। ବିଜେଡି ବରିଷ୍ଠ ଉପ ସଭାପତି ଦେବୀ ପ୍ରସାଦ ମିଶ୍ର ବାବା ସିଂହନାଥଙ୍କର ଦର୍ଶନ କରିବା ସହ ଆଶୀର୍ବାଦ ଭିକ୍ଷା କରିଛନ୍ତି। ପ୍ରତ୍ୟେକ ବର୍ଷ ଭଳି ଚଳିତ ବର୍ଷ ଉପବାସର ସହ ମନ୍ଦିର ବେଢା ପରିକ୍ରମା କରି ବାବା ସିଂହନାଥଙ୍କର ଦର୍ଶନ କରିଛନ୍ତି। ଏନେଇ ସେଠାରେ ତାଙ୍କ ସହ ଆଲୋଚନା କରିଛନ୍ତି ଆମ ପ୍ରତିନିଧି ବିନୋଦ କୁମାର ନନ୍ଦ।
ବିଜେଡି କର୍ମୀଙ୍କ ଦେଶ ପ୍ରେମ ଭିଡିଓ ଭାଇରାଲ
ବିଜେଡି କର୍ମୀଙ୍କ ଦେଶ ପ୍ରେମ ଭିଡିଓ ଭାଇରାଲ । ଗତକାଲି ନବରଙ୍ଗପୁର ଜିଲ୍ଲାରେ ବିଜୁ ଜନତା ଦଳ ପକ୍ଷରୁ ୧୨ ଘଣ୍ଟିଆ ଚକଅଖ ବନ୍ଦ ଡାକରା ଦିଆଯାଇଥିଲା। ସେହି ସମୟରେ ବିଜୁ ଜନତା ଦଳର କର୍ମୀଙ୍କ ଦେଶ ପ୍ରେମ ଓ ଯବାନଙ୍କ ପ୍ରତି ଥିବା ଭଲ ପାଇବା ଦେଖିବାକୁ ମିଳିଥିଲା। ନବରଙ୍ଗପୁର ଜିଲ୍ଲାରେ ନୂତନ ଭାବରେ BSF-7 ବାଟାଲିଅନ ସ୍ଥାପନ ହେଉଥିବା ବେଳେ କାଲି ବାଟାଲିଅନର ଗାଡି ଓ ଯବାନମାନେ ଆସିଲାବେଳେ ବିଜେଡିର କର୍ମୀମାନେ ସେମାନଙ୍କ ଗାଡିକୁ ସମ୍ମାନର ସହ ଛାଡି ଥିଲେ । ଜୟ ଯବାନ ଜୟ କିଷାନ ନାରା ଦେଇ ସେମାନଙ୍କୁ ସମ୍ମାନ ଜଣାଇଥିଲେ । ତାହାର ଭିଡିଓ ବର୍ତ୍ତମାନ ସୋସିଆଲ ମିଡିଆରେ ଭାଇରାଲ ହେବା ସହ ବିଜେଡି କର୍ମୀଙ୍କ ଏହିଭଳି କାର୍ଯ୍ୟକୁ ପ୍ରଶଂସା କରିଛନ୍ତି ବୁଦ୍ଧିଜୀବୀ।
ବଢ଼ିବାରେ ଲାଗିଛି ଇରାନ ହିଂସା: ପ୍ରାଣ ହରାଇଲେଣି ୨୪ଶହରୁ ଅଧିକ ଲୋକ
ବଢ଼ିବାରେ ଲାଗିଛି ଇରାନ ହିଂସା। ଆୟାତୋଲ୍ଲା ଖାମେନେଇ ବିରୋଧୀ ହିଂସାରେ ପ୍ରାଣ ହରାଇଲେଣି ୨୪ଶହରୁ ଅଧିକ ଲୋକ। ସେପଟେ ଯଦି ଆନ୍ଦୋଳନକାରୀଙ୍କୁ ହତ୍ୟା କରାଯାଏ ତେବେ ଆମେରିକା କଡ଼ା କାର୍ଯ୍ୟାନୁଷ୍ଠାନ ନେବ ବୋଲି କହିଛନ୍ତି ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ। ତେଣେ ଟ୍ରମ୍ପ ଓ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତନ୍ୟାହୁ ହିଁ ମୁଖ୍ୟ ହତ୍ୟାକାରୀ ବୋଲି କହିଛି ଇରାନ। ସରକାରୀ ପ୍ରତିଷ୍ଠାନଗୁଡିକୁ ଅକ୍ତିଆର କରିବା ଲାଗି ଆନ୍ଦୋଳନକାରୀଙ୍କୁ ଟ୍ରମ୍ପ ଆହ୍ବାନ ଦେବା ପରେ ଉତକ୍ଷିପ୍ତ ହୋଇଛି ଇରାନ। ଇରାନର ସୁପ୍ରିମ ନ୍ୟାସନାଲ ସିକ୍ୟୁରିଟି କାଉନସିଲ ମହାସଚିବ ଅଲି ଲାରିଜାନୀ ଏନେଇ ଆମେରିକା ଓ ଇସ୍ରାଏଳକୁ ସମାଲୋଚନା କରିଛନ୍ତି। ଇସ୍ରାଏଲ ଓ ଆମେରିକା ଯୋଗୁ ଇରାନରେ ଅସ୍ଥିରତା ସୃଷ୍ଟି ହେଉଛି ବୋଲି କହିଛନ୍ତି ଲାରିଜାନୀ। ସେହିପରି ଇରାନର ଜାତିସଂଘ ରାଷ୍ଟ୍ରଦୂତ ଅମିର ସୟିଦ ଇରାଭାନୀ ବି ଟ୍ରମ୍ପଙ୍କ ଆଭିମୁଖ୍ୟକୁ ସମାଲୋଚନା କରିଛନ୍ତି। ସେପଟେ ଇରାନର ଆଭ୍ୟନ୍ତରୀଣ ବ୍ୟାପାରରେ ଅଯଥା ବାହ୍ୟ ହସ୍ତକ୍ଷେପ ହେଉଛି ବୋଲି କହିଛି ରୁଷ। ଏକ ଦେଶ ବିରୋଧରେ ସାମିରକ କାର୍ଯ୍ୟାନୁଷ୍ଠାନ ଗ୍ରହଣ କରିବା ଲାଗି ଧମକ ଅଗ୍ରହଣୀୟ ବୋଲି କହିଛି ରୁଷ। ବର୍ତ୍ତମାନ ସୁଦ୍ଧା ଇରାନରେ ୧୮ ହଜାର ୧୩୭ ଲୋକଙ୍କୁ ଗିରଫ କରାଯାଇଥିବା ଜଣାଯାଇଛି।
ତେଲଙ୍ଗାନାରେ ଅଭାବନୀୟ ଘଟଣା: ଏକ ସପ୍ତାହରରେ ୫୦୦ରୁ ଅଧିକ କୁକୁରଙ୍କୁ ବିଷ ଦେଇ ହତ୍ୟା
ତେଲଙ୍ଗାନାରେ ଅଭାବନୀୟ ଘଟଣା। ଗତ ଏକ ସପ୍ତାହରରେ ବିଭିନ୍ନ ଗ୍ରାମରେ ୫୦୦ରୁ ଅଧିକ କୁକୁରଙ୍କୁ ବିଷ ଦେଇ ହତ୍ୟା। ଗ୍ରାମ ପଞ୍ଚାୟତ ନିର୍ବାଚନରେ ଦିଆଯାଇଥିବା ପ୍ରତିଶ୍ରୁତି ଅନୁସାରେ ଏହି ସମୂହ କୁକୁର ହତ୍ୟା କରାଯାଇଛି। କାମାରେଡ୍ଡୀ ଜିଲ୍ଲାର ଭବାନୀପେଟ, ପୁଲୱାଞ୍ଚା, ଫରିଦପେଟ, ୱାଦି, ବନ୍ଦାରାମେଶ୍ବରପଲ୍ଲୀରେ ଏହି କୁକୁରଙ୍କୁ ହତ୍ୟା କରାଯାଇଛି ବୋଲି ଅଭିଯୋଗ କରିଛନ୍ତି ପ୍ରାଣୀ କଲ୍ୟାଣ କର୍ମୀ ଅଦୁଲପୁରମ ଗୌତମ। ବିଶେଷ କରି ସରପଞ୍ଚମାନଙ୍କ ଜରିଆରେ ଏହି ହତ୍ୟା କରାଯାଉଥିବା ଜଣାଯାଇଛି।
ଏହି ଘଟଣାରେ ୫ଜଣ ସରପଞ୍ଚ ଓ ୬ ଜଣ ସାଧାରଣ ଲୋକଙ୍କ ନାମରେ ମାମଲା ରୁଜୁ ହୋଇଛି। ଏହି ଅଭିଯାନ କ୍ରମେ କୁକୁରମାନଙ୍କୁ ବିଷାକ୍ତ ଇଞ୍ଜେକସନ ଦେଇ ହତ୍ୟା କରାଯାଇଥିଲା। ଏହି ହତ୍ୟାକାଣ୍ଡ ନିଷ୍ଠୁରତାର ଏକ ନିଦର୍ଶନ ବୋଲି କୁହାଯାଇଛି। ପୋଲିସ ମାମଲା ରୁଜୁ କରି ତଦନ୍ତ ଜାରି ରଖିଥିବାବେଳେ ମୃତ କୁକୁରଗୁଡିକର ପୋଷ୍ଟମର୍ଟମ ଲାଗି ପୋତାଯାଇଥିବା ମୃତଦେହଗୁଡିକୁ ପୁଣି ମାଟିରୁ ବାହାର କରାଯାଇଛି। ଭିସେରା ନମୁନାକୁ ଫରେନସିକ ସାଇନ୍ସ ଲାବରେଟୋରୀକୁ ପଠାଯାଇଛି। ଗତ ଡିସେମ୍ବରରେ ହୋଇଥିବା ନିର୍ବାଚନରେ କିଛି ପ୍ରାର୍ଥୀ ସ୍ଥାନୀୟ ଅଞ୍ଚଳରେ କୁକୁର ଓ ମାଙ୍କଡ଼ଙ୍କ ଦୌରାତ୍ମ୍ୟ ରୋକିବା ଦିଗରେ ପଦକ୍ଷେପ ନେବା ଲାଗି ପ୍ରତିଶ୍ରୁତି ଦେଇଥିଲେ। କିଛିଦିନ ତଳେ ଶ୍ୟାମପେଟରେ ୩୦୦କୁକୁରଙ୍କୁ ବିଷ ଦେବା ଘଟଣାରେ ୨ ମହିଳାଙ୍କ ସମେତ ୯ଜଣଙ୍କୁ ଗିରଫ କରିଥିଲା ପୋଲିସ। ଗତ ମଙ୍ଗଳବାର ବୁଲାକୁକୁର ମାମଲାରେ ସୁପ୍ରିମକୋର୍ଟ କହିଥିଲେ- କୁକୁର କାମୁଡା କ୍ଷଟଣାରେ ଉଚ୍ଚ ପରିମାଣର କ୍ଷତିପୂରଣ ଦେବାକୁ ରାଜ୍ୟଗୁଡିକୁ କେନ୍ଦ୍ର ସରକାର ନିର୍ଦ୍ଦେଶ ଦେଇଥିଲେ।
ଥାଇଲାଣ୍ଡରେ ବଡ଼ଧରଣର ଟ୍ରେନ ଦୁର୍ଘଟଣା: ୨୨ରୁ ଅଧିକ ଲୋକଙ୍କ ମୃତ୍ୟୁ ଘଟିଥିବା ବେଳେ ୮୦ରୁ ଅଧିକ ଆହତ
ଥାଇଲାଣ୍ଡରେ ବଡ଼ଧରଣର ଟ୍ରେନ ଦୁର୍ଘଟଣା। ଏକ କ୍ରେନ ଧସିଯିବା ସହ ଟ୍ରେନ ଉପରେ ପଡ଼ିଯିବା କାରଣରୁ ଘଟିଛି ଦୁର୍ଘଟଣା। ଏଥିରେ ୨୨ରୁ ଅଧିକ ଲୋକଙ୍କ ମୃତ୍ୟୁ ଘଟିଥିବାବେଳେ ୮୦ରୁ ଅଧିକ ଆହତ ହୋଇଛନ୍ତି। ଥାଇଲାଣ୍ଡ ରାଜଧାନୀ ବ୍ୟାଙ୍ଗକକରୁ ଯାଉଥିବାବେଳେ ଏହି ଅଘଟଣ ଘଟିଛି। ମୃତ୍ଯୁସଂଖ୍ୟା ଆହୁରି ଅଧିକ ହେବ ବୋଲି ଆଶଙ୍କା ପ୍ରକାଶ ପାଇଛି। ଥାଇଲାଣ୍ଡର ନାଖୋମ ରାଚେସିମା ପ୍ରଜାତନ୍ତ୍ର ଅନ୍ତର୍ଗତ ସିଖିଓ ଜିଲ୍ଲାରେ ଏହି ଅଘଟଣ ଘଟିଛି। ବ୍ୟାଙ୍ଗକକରୁ ୨୩୦ କିଲୋମିଟର ଦୂରରେ ଏହି ଦୁର୍ଗଟଣା ଘଟିଥିଲା। ଟ୍ରେନଟି ଉବୋନ ରାଚେସିମାକୁ ଯାଉଥିଲା। ଏକ ହାଇସ୍ପିଡ ରେଲ ପ୍ରକଳ୍ପରେ ନିୟୋଜିତ କ୍ରେନଟି ଧସି ଯିବାରୁ ଏହି ଅଘଟଣ ଘଟିଥିଲା। ଦୁର୍ଘଟଣାର ତୀବ୍ରତା ଏତେ ଅଧିକ ଥିଲା ଯେ ଦୁର୍ଘଟଣା ପରେ କୋଚରେ ନିଆଁ ଲାଗିଯାଇଥିଲା। ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଜାରି ରହିଛି। ଟ୍ରେନରେ ୧୯୫ରୁ ଅଧିକ ଲୋକ ଥିବା କୁହାଯାଇଛି।
ମା’ ମଙ୍ଗଳାଙ୍କ ପୀଠ ସମେତ ବିଭିନ୍ନ ପୀଠରେ ମକର ସଂକ୍ରାନ୍ତି ବେଶ ଧୂମଧାମରେ ପାଳିତ
ଆଜି ପବିତ୍ର ମକର ସଂକ୍ରାନ୍ତି । ପୁରୀ ଜିଲ୍ଲା କାକଟପୁର ର ଅଧିଷ୍ଟାତ୍ରୀ ଦେବୀ ମା ମଙ୍ଗଳାଙ୍କ ପୀଠ ସମେତ ବିଭିନ୍ନ ପୀଠରେ ମକର ସଙ୍କ୍ରାନ୍ତି ବେଶ ଧୂମ ଧାମରେ ପାଳିତ ହୋଇଯାଇଛି । କାକଟପୁର ବଲରାରେ ଅବସ୍ଥିତ ବାବା ମାଧବାନନ୍ଦ ମନ୍ଦିରରେ ଆଜି ଭୋରରୁ ସ୍ନାନ, ମାର୍ଜଣ।, ସୁର୍ଜ୍ୟପୂଜା ଓ ବିଭିନ୍ନ ନୀତିକାନ୍ତି, ସକାଳ ଧୂପ ପରେ ସହ ସହ ସଂଖ୍ୟାରେ ଶ୍ରଦ୍ଧାଳୁ ମାନେ ମହାପ୍ରଭୁଙ୍କ ଦର୍ଶନ କରିଛନ୍ତି । ବିଶ୍ଵାସ ରହିଛି ଆଜିର ଦିନରେ ମହାପ୍ରଭୁଙ୍କ ପୂଜାର୍ଚନା ସହ ମହାପ୍ରଭୁଙ୍କୁ ଆରାଧନା କରି ନଡିଆ ଗୁଆ ବସାଇଲେ ପରିବାରକୁ ଥଣ୍ଡା ଓ କଫ ଜନିତ ରୋଗରୁ ମୁକ୍ତି ମିଳିଥାଏ । ଏହି ବିଶ୍ଵାସ ରଖି ଶହ ଶହ ସଂଖ୍ୟାରେ ଶ୍ରଦ୍ଧାଳୁ ଲମ୍ବା ଧାଡିରେ ଆସି ମହାପ୍ରଭୁଙ୍କୁ ପୂଜାର୍ଚନା କରି ଭୋଗରାଗ କରିଛନ୍ତି ।
ଗଣପର୍ବ ମକର ସଂକ୍ରାନ୍ତି ପାଇଁ ଚଳଚଞ୍ଚଳ କେନ୍ଦୁଝର ଚମ୍ପୁଆ ବ୍ଲକର କେଶରୀ କୁଣ୍ଡ
ଗଣପର୍ବ ମକର ସଂକ୍ରାନ୍ତି ପାଇଁ ଚଳଚଞ୍ଚଳ କେନ୍ଦୁଝର ଚମ୍ପୁଆ ବ୍ଲକର କେଶରୀ କୁଣ୍ଡ । କେଶରୀ କୁଣ୍ଡ ରେ ଆଜି ମକର ବୁଡ ଦେବାକୁ ଲକ୍ଷାଧିକ ଶ୍ରଦ୍ଧାଳୁ ଙ୍କ ଭିଡ ଜମିଛି । ବୈତରଣୀ ନଦୀ ସହିତ ନଦୀ ପଠାରେ ପଥର ଚଟାଣରେ ଥିବା କୁଣ୍ଡରେ ବୁଡ଼ ପକାଇ ନୂତନ ବସ୍ତ୍ର ପରିଧାନ କରି ପିଠା ପଣା ଖାଇ ମକର ପର୍ବ ପାଳିଛନ୍ତି ହଜାର ହଜାର ଶ୍ରଦ୍ଧାଳୁ। ମକର ପର୍ବ ଅବସରରେ ବୈତରଣୀ ନଦୀ କେଶରୀ କୁଣ୍ଡରେ ବୁଡ଼ ପକାଇଲେ ପୁଣ୍ୟ ଅର୍ଜନ ସହ ପାପ କ୍ଷୟ ହେବାର ବିଶ୍ୱାସ ରହିଛି । ଏହାସହ ମକର ମେଳାର ମଜା ଉଠାଉଛନ୍ତି। ମେଳାରେ ବୁଲି ବିଭିନ୍ନ ସାମଗ୍ରୀ କିଣିବାର ମଧ୍ୟ ମଜା ନେଉଛନ୍ତି ଲୋକେ ।
ମକର ସଂକ୍ରାନ୍ତି ଉପଲକ୍ଷେ ବାବା ଧବଳେଶ୍ଵରଙ୍କ ପୀଠରେ ପ୍ରବଳ ଗହଳି
ମକର ସଂକ୍ରାନ୍ତି ଉପଲକ୍ଷେ କଟକ ଜିଲ୍ଲାର ଅନ୍ୟତମ ଶୈବ ପୀଠ ବାବା ଧବଳେଶ୍ଵରଙ୍କ ପୀଠରେ ପ୍ରବଳ ଗହଳି ଦେଖିବାକୁ ମିଳିଛି। ଭୋର 4ଟାରେ ପହଡ ଖୋଲାଯାଇ 108 ଗରା ଜଳରେ ବାବା ଙ୍କୁ ସ୍ନାନ କରାଯାଇ ମଙ୍ଗଳା ଆଳତୀ କରାଯିବା ପରେ ଖେଚୁଡି ଭୋଗ ଲାଗି କରାଯାଇଥିଲା। ବାବାଙ୍କୁ ବିଭିନ୍ନ ଫୁଲରେ ସଜ୍ଜିତ କରାଯିବା ପରେ ସର୍ବସାଧାରଣଙ୍କ ଦର୍ଶନ ଜାରି ରହିଛି। । ମଧ୍ୟାହ୍ନରେ ଧବଳେଶ୍ଵରଙ୍କ ନିକଟରେ ମକର ଚାଉଳ ଲାଗି କରାଯିବ। ସୁରକ୍ଷା ଦୃଷ୍ଟିରୁ ୧ପ୍ଲାଟୁନ ପୋଲିସ ଫୋର୍ସ ସହ ଡିଏସପି , ଗୁରୁଡିଝାଟିଆ ଆଇଆଇସି ଉପସ୍ଥିତ ରହି ଭିଡକୁ ନିୟନ୍ତ୍ରଣ କରିଛନ୍ତି।
ମକର ସଂକ୍ରାନ୍ତିକୁ ନେଇ ବ୍ରହ୍ମପୁର ଉତ୍ସବମୁଖର
ମକର ସଂକ୍ରାନ୍ତି ପର୍ବ ତେଲୁଗୁ ସଂପ୍ରଦାୟର ଲୋକଙ୍କ ସବୁଠୁ ବଡ଼ ପର୍ବ। ଚାରିଦିନ ଧରି ଉତ୍ସବ ବେଶ୍ ଧୁମ୍ ଧାମରେ ପାଳନ ହେବାକୁ ଥିବା ବେଳେ ବ୍ରହ୍ମପୁରରେ ଗତକାଲି ମଧ୍ୟରାତ୍ରରୁ ଭୋଗି ଉତ୍ସବ ପାଳନ ହୋଇଯାଇଛି। ଏହାକୁ ନେଇ ରେଶମ ସହର ବ୍ରହ୍ମପୁର ବେଶ ଉତ୍ସବମୁଖର । ଭୋଗି ଜାଳି ନାଚ ଗୀତରେ ବେଶ ମସଗୁଲ ହୋଇଛନ୍ତି ତେଲୁଗୁ ସଂପ୍ରଦାୟର ଲୋକେ । ମକର ସଂକ୍ରାନ୍ତିକୁ ତେଲୁଗୁ ନୂଆବର୍ଷ ଭାବେ ପାଳନ କରାଯାଉଥିବାରୁ ପୁରୁଣା ବର୍ଷକୁ ବିଦାୟ ଦେବା ସହ ନୂଆବର୍ଷକୁ ସ୍ୱାଗତ କରିଛନ୍ତି । ଏହି ଭୋଗୀ ପର୍ବ ପାଳନଙ୍କୁ ନେଇ ବେଶ ଉତ୍ସାହିତ ସମସ୍ତେ ।
ରାଜ୍ୟର ସମସ୍ତ ସରକାରୀ କାର୍ଯ୍ୟାଳୟମାନଙ୍କରେ ହେବ ଓଡ଼ିଆ ଭାଷାରେ ସରକାରୀ କାର୍ଯ୍ୟ
ରାଜ୍ୟର ସମସ୍ତ ସରକାରୀ କାର୍ଯ୍ୟାଳୟମାନଙ୍କରେ ହେବ ଓଡ଼ିଆ ଭାଷାରେ ସରକାରୀ କାର୍ଯ୍ୟ। ସମସ୍ତ ବ୍ଲକ, ଜିଲ୍ଲା ସ୍ତରରୁ ଆରମ୍ଭ କରି ରାଜ୍ୟସ୍ତର ପର୍ଯ୍ୟନ୍ତ ଏଣିକି ଓଡିଆ ଭାଷାରେ ସରକାରୀ କାର୍ଯ୍ୟ ସମ୍ପାଦନ କରାଯିବ। ସରକାରୀ କାର୍ଯ୍ୟାଳୟରୁ ପ୍ରକାଶ ପାଉଥିବା ସମସ୍ତ ନୋଟିସ, ବିଜ୍ଞପ୍ତି, ପତ୍ର ବିନିମୟ ଇତ୍ୟାଦି ଓଡିଆ ଭାଷାରେ ହେବ। ଯେଉଁ ଅଧିକାରୀ ଏହାର ଖିଲାପ କରିବେ ତାଙ୍କୁ ଏହି ବିଷୟରେ ତାଗିଦ କରାଯିବ। ଆବଶ୍ୟକ ହେଲେ କାରଣ ଦର୍ଶାଅ ନୋଟିସ ଜାରି କରାଯିବ। ସମସ୍ତ ବିଭାଗ, ବିଭାଗୀୟ ମୁଖ୍ୟ ଦପ୍ତର, ଜିଲ୍ଲାପାଳଙ୍କ କାର୍ଯ୍ୟାଳୟ, ସମସ୍ତ ଅଧସ୍ତନ କାର୍ଯ୍ୟାଳୟ, ସରକାରଙ୍କ ଦ୍ବାରା ପରିଚାଳିତ ସମସ୍ତ ଅନୁଷ୍ଠାନ ଯେପରିକି ବିଭିନ୍ନ ନିଗମ, ପୌର ସଂସ୍ଥା ଓ ସ୍ବୟଂ ଚାଳିତ ସଂସ୍ଥା ଇତ୍ୟାଦି ଏହି ନିର୍ଦ୍ଦେଶକୁ ପାଳନ କରିବେ। ପ୍ରଶାସନିକ ଭାଷାକୋଷକୁ ନିରନ୍ତର ଭାବେ ଅଦ୍ୟତନ କରାଯିବ। ସରକାରୀ କାର୍ଯ୍ୟାଳୟମାନଙ୍କରେ ଏହାକୁ ଉପଲବ୍ଧ କରାଇବା ନିମନ୍ତେ ଓଡିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ପକ୍ଷରୁ ଆବଶ୍ୟକ ପଦକ୍ଷେପ ଗ୍ରହଣ କରାଯିବ। ଏନେଇ ରାଜ୍ୟର ସମସ୍ତ ବିଭାଗ, ସମସ୍ତ ବିଭାଗୀୟ ମୁଖ୍ୟ ଦପ୍ତର, ସମସ୍ତ ଜିଲ୍ଲାପାଳଙ୍କୁ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗ ସ୍ୱତନ୍ତ୍ର ଶାସନ ସଚିବଙ୍କ ପକ୍ଷରୁ ଚିଠି କରାଯାଇଛି।