ଖୋର୍ଦ୍ଧା ବାଘମାରୀ ନାବାଳିକାଙ୍କୁ ଅପହରଣ ଓ ଦୁଷ୍କର୍ମ ଘଟଣାରେ ବିଜେଡି ସଭାପତି ନବୀନ ପଟ୍ଟନାୟକଙ୍କ ଚିନ୍ତା ପ୍ରକଟ। ଖୋର୍ଦ୍ଧା ବାଘମାରୀରେ ନାବାଳିକାଙ୍କୁ ଅପହରଣ ଏବଂ ଗଣଦୁଷ୍କର୍ମ ଘଟଣା ଅତ୍ୟନ୍ତ ସ୍ପର୍ଶକାତର ଏବଂ ହୃଦୟ ବିଦାରକ ବୋଲି କହିଛନ୍ତି ନବୀନ। ସେହିଭଳି ଭଦ୍ରକ ଅରଂଜିରେ ମା’ର ମୃତ୍ୟୁପରେ କିସ୍ତି ଟଙ୍କା ପାଇଁ ଜଣେ ଯୁବତୀଙ୍କୁ ଗାଁ ଦାଣ୍ଡରେ ଏସଏଚଜି ମହିଳାମାନେ ନିସ୍ତୁକ ମାଡ଼ ମାରବା ପରି ଘଟଣା ସଭ୍ୟ ସମାଜରେ କଦାପି ଗ୍ରହଣନୀୟ ନୁହେଁ ବୋଲି କହଛନ୍ତି ବିଜେଡି ସଭାପତି ନବୀନ ପଟ୍ଟନାୟକ। ବିଜୁ ଜନତା ଦଳର ସରକାର ସମୟରେ ମିଶନ ଶକ୍ତି ଜରିଆରେ ମା ମାନେ ସଫଳତାର ସିଡି ଚଢୁଥିଲେ। ନିଜର ପରିଚୟ ସୃଷ୍ଟି କରୁଥିଲେ। ହେଲେ ବିଜେପି ସରକାରରେ ମାମାନେ ସବୁଠୁ ଅସୁରକ୍ଷିତ ହୋଇ ପଡିଛନ୍ତି। ବିକାଶ ଠପ ହୋଇଛି। ଦିନକୁ ଦିନ ଓଡ଼ିଶାରେ ମହିଳାମାନଙ୍କ ଉପରେ ବଢୁଥିବା ଅତ୍ୟାଚାର ଓ ଦୁଷ୍କର୍ମ ପରି ଘଟଣା ସମସ୍ତଙ୍କୁ ବିଚଳିତ କରିଦେଉଛି। ସରକାର ନିଦରୁ ଉଠନ୍ତୁ, ଦୋଷୀଙ୍କ ବିରୋଧରେ ତୁରନ୍ତ କଠୋରରୁ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ
କରୁଣା କଲେ କରୁଣା ନିଧାନ: କୋମାରୁ ଉଠିଲା ୬ ବର୍ଷୀୟ ଅସୁସ୍ଥ ପୁଅ
କରୁଣା କଲେ କରୁଣା ନିଧାନ । କୋମାରୁ ଉଠିଲା ୬ ବର୍ଷୀୟ ରୋଗଣା ପୁଅ । ବର୍ଷେ ହେଲା ନିଶ୍ଚଳ ହୋଇଯାଇଥିଲା ଶରୀର । ହେଲେ ମହାପ୍ରଭୁ ଦେଲେ ନୂଆ ଜୀବନ । ଡାକ୍ତରଙ୍କ ଠାରୁ ନିରାସ ହେବା ପରେ ରାଜସ୍ଥାନରୁ ପୁଅକୁ ଧରି ପୁରୀ ଦୌଡ଼ି ଆସିଥିଲେ ରାଜସ୍ଥାକ ବାନ୍ସୱାଡ଼ାର ପ୍ରକାଶ କୁମାର ଭୋଇ । ଶ୍ରୀମନ୍ଦିର ଆଗରେ ପୁଅକୁ ରଖି ଲୋତକ ଭରା ଆଖିରେ ମହାପ୍ରଭୁଙ୍କୁ ମାଗିଥିଲେ ନିଜ ପୁଅ ନିଖିଳର ଜୀବନ । ଆଉ ଠିକ ୧୪ ଦିନ ପରେ ହେଲା ଚମତ୍କାର । ଆଶା ଛାଡ଼ି ଦେଇଥିବା ଶରୀରରେ ପୁଣି ହୋଇଛି ଆଶାର ସଞ୍ଚାର । କୋମାରୁ ଧୀରେ ଧୀରେ ସୁସ୍ଥ ହେଉଛି ନିତିନ । ଦିନ ମଜୁରିଆ ବାପା ଦୌଡ଼ି ଆସି ମହାପ୍ରଙ୍କୁ କୃତଜ୍ଞତା ଜଣାଇଛି । ତେବେ ଶ୍ରୀଜନ୍ନାଥ ଚମତ୍କାର ସମସ୍ତଙ୍କୁ ଜଣା । ଆଉ ଭଗବାନଙ୍କ ପାଖରେ ଗୁହାରୀ କରି ତାଙ୍କୁ ସମର୍ପଣ କରିବା ଭଲ ହେଲେ ତା’ ସାଙ୍ଗରେ ଡ଼ାକ୍ତରୀ ପରାମର୍ଶ କରିବା ନିହାତି ଜରୁରୀ ବୋଲି କହିଛନ୍ତି ଶିଶୁ ରୋଗ ବିଶେଷଜ୍ଞ ।
ବିଶ୍ୱାସ ଆଉ ଭକ୍ତି ବଳରେ ଅସାଧ୍ଯ ବି ସାଧନ ହୁଏ । ଯେଉଁଠି ଔଷଧ ଉପରୁ ମଣିଷର ଭରସା ତୁଟିଯାଏ । ସେତେବେଳେ ମଣିଷ ଭଗବାନଙ୍କ ଶରଣ ପଶେ । ଡାକ୍ତର ମାନେ ବି ଅପରେସନ ପୂର୍ବରୁ ଭଗବାନଙ୍କୁ ଡାକନ୍ତି । ହେଲେ ଭଗବତ ଭକ୍ତି ଯେତିକି ଜରୁରି ଡାକ୍ତରୀ ଚିକିତ୍ସା ବି ସେତିକି ଜରୁରୀ । ଆଜି ପୁଣି ସିଂହଦ୍ଵାର ଫିଟିବା ପରେ ବଡ଼ି ଭୋରରୁ ଜଣେ ମହିଳା ଓ ଜଣେ ପୁରୁଷ ଛୁଆକୁ ସିଂହଦ୍ଵାର ନିକଟକୁ ଆସିଛନ୍ତି । ମହାପ୍ରଭୁଙ୍କୁ ଛୁଆର ସୁସ୍ଥତା ପାଇଁ ପ୍ରାର୍ଥନା କରିଛନ୍ତି । ତେବେ ଭଗବାନ ବି କହିଛନ୍ତି ଭକ୍ତି ସହ କର୍ମ ବି ଜରୁରୀ । ତେଣୁ ଭଗବାନଙ୍କୁ ଡାକିବା ସହ ରୋଗୀଙ୍କୁ ଡାକ୍ତରୀ ଚିକିତ୍ସା ନିତାନ୍ତ ଆବଶ୍ୟକ ବୋଲି କହିଛନ୍ତି ମାନସିକ ରୋଗ ବିଶେଷଜ୍ଞ ।
ଋଷିୟ ତେଲ ଉପରେ ଆମେରିକା ବ୍ୟାନ ବଢ଼ାଇଲା ଟେନସ୍, ଦୋହଲି ଯିବ କି ଭାରତର ତେଲ ସପ୍ଲାଏ ?
ଋଷିୟ ତେଲ ଉପରେ ଆମେରିକା ବ୍ୟାନ ବଢ଼ାଇଲା ଟେନସ୍, ଦୋହଲି ଯିବ କି ଭାରତର ତେଲ ସପ୍ଲାଏ ?
ନନ୍ଦିଘୋଷ ବ୍ୟୁରୋ: ଋଷର ପ୍ରମୁଖ ଅଶୋଧିତ ତେଲ କମ୍ପାନୀଙ୍କ ଉପରେ ଆମେରିକାର ନୂଆ ପ୍ରତିବନ୍ଧକ ଲାଗୁ ହେବା ପରେ ଏନର୍ଜି ମାର୍କେଟରେ ହଲଚଲ ଦେଖିବାକୁ ମିଳୁଛି । ବିଶେଷ କରି ଏହି ପ୍ରତିବନ୍ଧକ ଭାରତ ପାଇଁ ଚିନ୍ତା କାରଣ ପାଲଟିବାକୁ ଯାଉଛି । ବିଶ୍ଲେଷକଙ୍କ ମତରେ, ନିକଟ ଭବିଷ୍ୟତରେ ଭାରତକୁ ଋଷ ତେଲର ଆମଦାନୀ ଦ୍ରୁତଗତିରେ ହ୍ରାସ ପାଇବ । ହେଲେ ଏହା ସମ୍ପୂର୍ଣ୍ଣ ବନ୍ଦ ହେବ ନାହିଁ । ରୋସନେଫ୍ଟ ଓ ଲୁକୋଇଲ ତଥା ଏମାନଙ୍କ ସହାୟକ କମ୍ପାନୀ ଉପରେ ୨୧ ନଭେମ୍ବରରୁ ଆମେରିକାର ପ୍ରତିବନ୍ଧକ ଲାଗୁ ହୋଇଛି । ଏମିତି ସ୍ଥିତିରେ ଏହି କମ୍ପାନୀଙ୍କ ପାଖରୁ ଅଶୋଧିତ ତେଲ କିଣିବା କି ବିକ୍ରି କରିବା ପ୍ରାୟତଃ ଅସମ୍ଭବ ହୋଇଯିବ ।
ଭାରତ ଚଳିତବର୍ଷ ପ୍ରତିଦିନ ହାରାହାରି ୧୭ ଲକ୍ଷ ବ୍ୟାରେଲ ତେଲ ଋଷରୁ ଆମଦାନୀ କରିଛି ଓ ପ୍ରତିବନ୍ଧକ ପୂର୍ବରୁ ଏହା ଦୃଢ଼ ସ୍ଥିତିରେ ରହିଥିଲା । ନଭେମ୍ବରରେ ଆମଦାନୀ ୧୮୧୯ ଲକ୍ଷ ବ୍ୟାରେଲ ପ୍ରତିଦିନ ରହିବା ଅନୁମାନ କରାଯାଉଛି । କାରଣ ରିଫାଇନାରୀ ଶସ୍ତା ତେଲ କିଣିବା ଉପରେ ଅଧିକ ଗୁରୁତ୍ବ ଦେଉଛନ୍ତି । ଆଗକୁ ଡିସେମ୍ବର ଓ ଜାନୁଆରୀରେ ଏହି ଆମଦାନୀ ନିଶ୍ଚିତ ଭାବେ ହ୍ରାସ ପାଇବ । ବିଶେଷଜ୍ଞଙ୍କ ଅନୁସାରେ, ଏହା ହ୍ରାସ ପାଇ ପ୍ରାୟ ୪ ଲକ୍ଷ ବ୍ୟାରେଲ ରହିପାରେ ।
ସୂଚନାଯୋଗ୍ୟ, ପଶ୍ଚିମ ଏସିଆ ତେଲ ଉପରେ ନର୍ଭର କରୁଥିବା ଭାରତ ୨୦୨୨ ଫେବୃଆରୀ ୟୁକ୍ରେନ୍ ଯୁଦ୍ଧ ପରଠାରୁ ଋଷରୁ ତେଲ ଆମଦାନୀ କରିବା ବହୁତ ବଢ଼ାଇ ଦେଇଛି । ୟୁକ୍ରେନ ଯୁଦ୍ଧ ଆରମ୍ଭ ପରେ ପଶ୍ଚିମ ଦେଶଙ୍କ ପ୍ରତିବନ୍ଧକ ଓ ୟୁରୋପୀୟ ଆମଦାନୀ କମ ହେବା ପରେ ଋଷୀ ତେଲ କମ ଦାମରେ ମିଳିବା ଆରମ୍ଭ ହୋଇଥିଲା । ଯାହାର ଫାଇଦା ଭାରତ ଉଠାଇ ଥିଲା । ଏହି ସମୟରେ ଭାରତ ଋଷ ପାଖରୁ ଏକ ପ୍ରତିଶତ ଅଶୋଧିତ ତେଲ ଆମଦାନୀ କରୁଥିବା ବେଳେ ଏହା ବୃଦ୍ଧି ପାଇ ୪୦ ପ୍ରତିଶତରେ ପହଞ୍ଚିଗଲା । ଏହାସହ ଭାରତ ଋଷର ସବୁଠାରୁ ବଡ଼ ସପ୍ଲାୟର ବନି ଯାଇଥିଲା ।
ଋଷରୁ ତେଲ ଆମଦାନୀ ହେବ କମ
କେପ୍ଲରର ରିଫାଇନାରୀ ଓ ମାଣ୍ଡଲିଙ୍ଗର ମୁଖ୍ୟ ଅନୁସନ୍ଧାନ ବିଶ୍ଲେଷକ ସୁମିତ ରେତୋଲିଆ କହିଛନ୍ତି, ନିକଟ ଭବିଷ୍ୟତରେ ବିଶେଷ କରି ଡିସେମ୍ବର ଓ ଜାନୁଆରୀରେ ଋଷରୁ ଭାରତର ଅଶୋଧିତ ତେଲ ଆମଦାନୀ ହ୍ରାସ ପାଇବା ନେଇ ଆଶା କରୁଛୁ । ଅକ୍ଟୋବର ୨୧ରୁ ସପ୍ଲାଇ ଧିମା ହୋଇଛି । ହେଲେ ଆଗକୁ କ’ଣ ହେବ ଏବେଠାରୁ କହିବା ଠିକ ହେବନାହିଁ । ପ୍ରତିବନ୍ଧକ ଲାଗୁ ହେବା କାରଣରୁ ରିଲାୟନ୍ସ ଇଣ୍ଡଷ୍ଟ୍ରୀ, ଏଚପିସିଏଲ ମିତଲ ଏନର୍ଜି ଓ ମେଙ୍ଗାଲୁରୁ ରିଫାଇନାରୀ ପରି କମ୍ପାନୀ ଋଷରୁ ତେଲ ଆମଦାନୀ ବନ୍ଦ କରି ଦେଇଛନ୍ତି । କେବଳ ନାୟାରା ଏନର୍ଜି ଋଷରୁ ତେଲ ଆମଦାନୀ କରୁଛି । ଯାହା ରୋସନେଫ୍ଟ ସମର୍ଥିତ ଓ ୟୁରୋପୀୟ ସଙ୍ଘ ଦ୍ବାରା ଲଗାଯାଇଥିବା ପ୍ରତିବନ୍ଧକ ପରେ ଅନ୍ୟ ସର୍ତ୍ତରେ ଆପୂର୍ତ୍ତି କାଟିବା କାରଣରୁ ଋଷ ତେଲ ଉପରେ ବହୁ ମାତ୍ରାରେ ନିର୍ଭରଶୀଳ ।
ରିତୋଲିଆ କହିଛନ୍ତି, ନାୟାରାର ବାଦିନେର ପ୍ଲାଣ୍ଟକୁ ଛାଡି ଅନ୍ୟ କୌଣସି ଭାରତୀୟ ରିଫାଇନାରୀ ରିକ୍ସ ନେବାକୁ ଚାହୁଁନାହାନ୍ତି । କମ୍ପାନୀମାନଙ୍କୁ ସେମାନଙ୍କ କଣ୍ଟାକ୍ଟ, ସପ୍ଲାଇ ରୁଟ୍, ମାଲିକାନା ଓ ଗୁଣବତ୍ତା ଚ୍ୟାନେଲକୁ ପୁନଃ ବ୍ୟବସ୍ଥିତ କରିବାକୁ ସମୟ ଲାଗିବ ।
ଋଷୀ ତେଲ ଭାରତକୁ କରିଛି ମାଲାମାଲ
ବିଶେଷଜ୍ଞଙ୍କ ମତରେ ଗତ ଦୁଇବର୍ଷ ମଧ୍ୟରେ ଶସ୍ତା ଋଷୀ ତେଲ ପାଇଁ ଭାରତୀୟ ରିଫାଇନାରୀ କମ୍ପାନୀ ବହୁତ ଲାଭ ଉଠାଇଛନ୍ତି । ଏହାସହ ଇଣ୍ଟରନ୍ୟାସନାଲ ମାର୍କେଟରେ ଅସ୍ଥିରତା ପରେ ବି ପେଟ୍ରୋଲ ଓ ଡିଜେଲର ଖୁଚୁରା ଦରକୁ ସ୍ଥିର ରଖିପାରିଛନ୍ତି । ଭାରତର ନିଜର ୮୮ ପ୍ରତିଶତ ତେଲ ଆବଶ୍ୟକତା ଆମଦାନୀରୁ ହିଁ ପୂରା କରିଥାଏ । ଆମେରିକାର ନୂଆ କଟକଣା ଲାଗୁ ପରେ ଭାରତର ଆମଦାନୀ ଅସ୍ଥିର ହେବା ସହ ଅନିଶ୍ଚିତତା ମଧ୍ୟକୁ ଚାଲିଯାଇଛି ।
ପରିବାରରେ ଖୁସିର ଲହରୀ: ଦୀର୍ଘ ୪୫ ବର୍ଷ ପରେ ଘରକୁ ଫେରିଲେ ପୁଅ
ପରିବାରରେ ଖୁସିର ଲହରୀ । ବର୍ଷେ ନୁହେଁ କି ଦି ବର୍ଷ । ଦୀର୍ଘ ୪୫ ବର୍ଷ ପରେ ଘରକୁ ଫେରିଛନ୍ତି ପୁଅ । ପୁଅକୁ ମିଠା ଖୁଆଇ କୋଳେଇ ନେଉଛି ବୃଦ୍ଧା ମା ଓ ପୂରା ପରିବାର। ବାଲେଶ୍ୱର ସିମୁଳିଆ ଥାନା କୁଣ୍ଡି ଗାଁରେ ଖୁସିର ମାହୋଲ। ଗାଁର ରବୀନ୍ଦ୍ର ଜେନାଙ୍କ ବଡ଼ ପୁଅ ବସନ୍ତ ଦୀର୍ଘ ୪ ଦଶନ୍ଧି ପରେ ଘର ବାହୁଡ଼ା ହୋଇଛନ୍ତି। ୧୯ ବର୍ଷ ବୟସରେ ବାପାଙ୍କ ସହ ଝଗଡ଼ା କରି ଘରୁ ଚାଲିଯାଇଥିଲେ ଯେ ଆଉ ଫେରି ନଥେଲେ। ବଡ଼ ପୁଅକୁ ଝୁରିଝୁରି ବାପା ଆର ପାରିକୁ ଚାଲିଗଲେଣି l ବୁଢ଼ୀ ମା ବି ପୁଅ ବାଟକୁ ଚାହିଁ ଦିନରାତି ବିତାଉଥିଲେ। ଶେଷରେ ପୁଅ ଘରକୁ ଫେରିବା ପରେ ସବୁ କିଛି ଦୁଃଖ ଭୁଲିଯାଇଛନ୍ତି ମା।
୧୯ ବର୍ଷ ବୟସରେ ଘର ଛାଡ଼ି କୋଲକାତାରେ ଏକ ଘରୋଇ କମ୍ପାନୀରେ କାମ କରିଥିଲେ ବସନ୍ତ l ଦୀର୍ଘ ୧୧ ବର୍ଷ କାମ କରିବା ପରେ ସେହି କାରଖାନାରେ କାର୍ଯ୍ୟରତ ଜଣେ ଯୁବତୀଙ୍କୁ ବିବାହ କରିଥିଲେ l ତାଙ୍କର ଏକମାତ୍ର ଝିଅର ବିବାହ ସରିଯାଇଛି l ମାସେ ତଳେ ଘର କଥା ମନେ ପଡିବାରୁ ସେ ଘରକୁ ଫେରିଥିଲେ। ପରିବାର ଗହଣରେ କାଳ କାଟିବା ଲାଗି ଘରକୁ ଫେରିଲେ ବସନ୍ତ। ହେଲେ ଖୁସିର ଝଲକ ଦେଖିବା ଲାଗି ଇହଜଗତରେ ନଥିଲେ ବାପା। ଏହାକୁ ନେଇ ଆଖିରୁ ଲୁହ ଗଡାଇଛନ୍ତି ବସନ୍ତ।
ବିଜେପି ସରକାର ଆସିବା ପରେ ଲକ୍ଷ୍ମୀ ବସ ସେବାରୁ ବଞ୍ଚିତ ଲୋକେ
୫ଟଙ୍କାରେ ଗାଁରୁ ସହର। ଦୁର୍ଗମ ଅଞ୍ଚଳରେ ରାସ୍ତା ସୁବିଧା ସହ ଲକ୍ଷ୍ମୀ ବସ ସେବା। ମହିଳାଙ୍କୁ ମିଳୁଥିଲା ଅଧିକ ସୁବିଧା। ଏ ଥିଲା ପୂର୍ବ ନବୀନ ସରକାରଙ୍କ ଅବଦାନ। ହେଲେ ବିଜେପି ସରକାର ଆସିବା ପରେ ଏହି ବସ ସେବାର ନାମ ବଦଳାଇ କଲେ ମୁଖ୍ୟମନ୍ତ୍ରୀ ବସ ସେବା। ବସର ରଙ୍ଗ ବି ବଦଳାଇଲେ। ହେଲେ ଲୋକଙ୍କୁ ଯେପରି ସୁବିଧା ମିଳୁଥିଲା ସେଥିରେ ଅଧିକ ଉନ୍ନତି ଆସିବ କଣ ଉପାନ୍ତ ଅଞ୍ଚଳର ଲୋକେ ଏବେ ବସ ସେବାରୁ ବଞ୍ଚିତ ହେଉଛନ୍ତି। ଗଞ୍ଜାମ ଧରାକୋଟ ଅଞ୍ଚଳର ଲୋକଙ୍କୁ ଏବେ ସାତ ସପନ ହେଲାଣି ମୁଖ୍ୟମନ୍ତ୍ରୀ ବସ ସେବା। ମାଇଲ ମାଇଲ ବାଟ ଲୋକଙ୍କୁ ଚାଲିବାକୁ ପଡ଼ୁଛି। କଣ ଏଇଥିପାଇଁ ଲୋକଙ୍କ ସରକାରଙ୍କୁ ଭୋଟ ଦେଇଥିଲେ ଲୋକେ? ଏବେ ଖୋଦ ସ୍ଥାନୀୟ ଅଞ୍ଚଳର ଲୋକଙ୍କ ତୁଣ୍ଡରେ ଏହି ପ୍ରଶ୍ନ। ଜିଲ୍ଲାର ମୋଟ ୨୨ଟି ବ୍ଳକର ବିଭିନ୍ନ ପଞ୍ଚାୟତ ଓ ଗାଁକୁ ଲୋକଙ୍କ ଗମନାଗମନର ସୁବିଧା ପାଇଁ ଆରମ୍ଭ ହୋଇଥିଲା ଲକ୍ଷ୍ମୀ ବସ ସେବା । ଗାଁରୁ ବ୍ଲକ, ବ୍ଲକରୁ ଜିଲ୍ଲାକୁ ଲୋକେ ସହଜ ଓ ଶସ୍ତାରେ ଯିବାଆସିବା କରି ପାରୁଥିଲେ l ଏବେ ଲୋକଙ୍କ ଅସନ୍ତୋଷ କହିଲେ ନ ସରେ।
ପୂର୍ବ ସରକାର ସମୟରେ ଲକ୍ଷ୍ମୀବସ ସେବା ଉପାନ୍ତ ଗ୍ରାମ ଗୁଡିକ ପାଇଁ ବରଦାନ ପାଲଟିଥିଲା। । ଧରାକୋଟ ବ୍ଲକର ଅନେକ ଉପାନ୍ତ ଗାଁ ଓ ପଞ୍ଚାୟତର ଲୋକେ ଲାଭବାନ ହେଉଥିଲେ । ହେଲେ ଏବେ ମାସେ ହେବ ସାଆବାର, ଧରାକୋଟର ଝାଡ଼ବନ୍ଧ,ଝରପାରି ପଂଚାୟତର ଅନେକ ଗାଁକୁ ଯାଉନି ବସ୍ । ଅନ୍ୟପଟେ ଅନେକ ସ୍ଥାନରେ ରାସ୍ତାକଡ଼ରେ ଏହି ବସ୍ ଅଚଳ ଅବସ୍ଥାରେ ପଡି଼ ରହିଛି । ଏ ନେଇ ବ୍ଲକ ବିଡିଓଙ୍କୁ ଅବଗତ କରାଗଲା। ବିଡିଓଙ୍କ ଉତ୍ତର ହେଉଛି ଖୁବଶୀଘ୍ର ଚାଲୁ କରାଯିବ।
ଆସନ୍ତା କାଲି ଦେଶର ୫୩ତମ ପ୍ରଧାନ ବିଚାରପତି ଭାବେ ଶପଥ ନେବେ ଜଷ୍ଟିସ ସୂର୍ଯ୍ୟ କାନ୍ତ
ଆସନ୍ତା କାଲି ଦେଶର ୫୩ତମ ପ୍ରଧାନ ବିଚାରପତି ଭାବେ ଶପଥ ନେବେ ଜଷ୍ଟିସ ସୂର୍ଯ୍ୟ କାନ୍ତ। ବହୁ ଗୁରୁତ୍ବପୂର୍ଣ୍ଣ ସାମ୍ବିଧାନିକ ତଥା ନାଗରିକ ଅଧିକାର ସଂକ୍ରାନ୍ତ ରାୟ ଦେଇ ଚର୍ଚ୍ଚାରେ ଅଛନ୍ତି ଜଷ୍ଟିସ ସୂର୍ଯ୍ଯ କାନ୍ତ। ଜଷ୍ଟିସ ବି.ଆର. ଗଭାଇଙ୍କ ପରେ ଦାୟିତ୍ବ ନେବେ ଜଷ୍ଟିସ ସୂର୍ଯ୍ୟ କାନ୍ତ। ପରବର୍ତ୍ତୀ ସିଜେଆଇ ହେବା ଲାଗି ଗତ ଅକ୍ଟୋବର ୩୦ରେ ତାଙ୍କ ନାଁ ଘୋଷଣା କରାଯାଇଥିଲା। ଆସନ୍ତା ୧୫ ମାସ ଅର୍ଥାତ ୨୦୨୭ ଫେବ୍ରୁଆରୀ ୯ ଯାଏ ସେ ଦାୟିତ୍ବରେ ରହିବେ।
ହରିଆଣାର ହିସାର ଜିଲ୍ଲାରେ ଗତ ୧୯୬୨ ଫେବ୍ରୁଆରୀ ୧୦ରେ ଜନ୍ମଗ୍ରହଣ କରିଥିଲେ ଜଷ୍ଟିସ ସୂର୍ଯ୍ଯ କାନ୍ତ। ଏକ ସାଧାରଣ ପରିବାରରୁ ଦେଶର ସର୍ବୋଚ୍ଚ ବିଚାର ବିଭାଗୀୟ ସ୍ତରକୁ ଯିବାରେ ଦୀର୍ଘ ସଂଗ୍ରାମ କରିଛନ୍ତି ଜଷ୍ଟିସ ସୂର୍ଯ୍ଯ କାନ୍ତ। ପ୍ରଥମେ ସେ ହିସାରରେ ଜଣେ ଆଇନଜୀବୀ ଭାବେ କାର୍ଯ୍ଯ କରିଥିଲେ। ପରେ ସେ ପଞ୍ଜାବ ଓ ହରିଆଣା ହାଇକୋର୍ଟରେ ଯୋଗଦେଇଥିଲେ। ୨୦୧୮ରେ ସେ ହୋଇଥିଲେ ହିମାଚଳ ପ୍ରଦେଶ ହାଇକୋର୍ଟର ମୁଖ୍ୟ ବିଚାରପତି।
ଇତିହାସ ରଚିଲା ଭାରତ: ଦୃଷ୍ଟିବାଧିତ ମହିଳା T20 ବିଶ୍ୱକପ୍ ହାତେଇଲା ଟିମ ଇଣ୍ଡିଆ
ଇତିହାସ ରଚିଲା ଭାରତ। ଦୃଷ୍ଟିବାଧିତ ମହିଳା T20 ବିଶ୍ୱକପ୍ ହାତେଇଲା ଟିମ ଇଣ୍ଡିଆ। ପ୍ରଥମ ଥର ପାଇଁ ଦୃଷ୍ଟିବାଧିତ ମହିଳା T20 ବିଶ୍ୱକପ୍ ଜିତି ଇତିହାସ ରଚିଛି ଭାରତ। ଫାଇନାଲରେ ନେପାଳକୁ ସାତ ୱିକେଟରେ ପରାସ୍ତ କରିଛି। ଶୃଙ୍ଖଳିତ ବୋଲିଂ ପ୍ରଦର୍ଶନ ସହ ଫୁଲା ସରେନଙ୍କ ନେତୃତ୍ୱରେ ଟିମ ଏହି ବିଜୟ ହାସଲ କରଛି। କଲମ୍ବୋରେ ଅନୁଷ୍ଠିତ ରୋମାଞ୍ଚକର ଫାଇନାଲରେ ନେପାଳକୁ ୭ ୱିକେଟରେ ପରାସ୍ତ କରି ପ୍ରଥମ ଥର ପାଇଁ ଦୃଷ୍ଟିବାଧିତ ମହିଳା ଟି-୨୦ ବିଶ୍ୱକପ୍ ଜିତିଛି ଭାରତ। ଟସ୍ ଜିତି କ୍ଷେତ୍ରରକ୍ଷଣ ନିଷ୍ପତ୍ତି ନେବା ପରେ ଭାରତର ବୋଲରମାନେ ଶୃଙ୍ଖଳା ଏବଂ ସଠିକତା ସହିତ ନେପାଳକୁ 20 ଓଭରରେ ପାଞ୍ଚ ୱିକେଟରେ 114 ରନରେ ସୀମିତ ରଖିଥିଲେ। ଏହା ପରେ ଭାରତୀୟ ବ୍ୟାଟରମାନେ ପ୍ରାଧାନ୍ୟ ବିସ୍ତାର କରି ମାତ୍ର ୧୦ ଓଭରରେ ୧୦୦ ରନ ସଂଗ୍ରହ କରିଥିଲେ। ଓପନର ଫୁଲା ସରେନ ମ୍ୟାଚ୍ ବିଜୟୀ ପ୍ରଦର୍ଶନ କରିଥିଲେ। ୧୬୨.୯୬ ଷ୍ଟ୍ରାଇକ୍ ରେଟ୍ ସହିତ ୨୭ ବଲ୍ ରୁ ୪୪ ରନ୍ କରିଥିଲେ ଫୁଲା ସରନ। ଯେଉଁଥିରେ ୪ଟି ଷ୍ଟାଇଲିସ୍ ଚୌକା ମଧ୍ୟ ସାମିଲ ଥିଲା।
ବ୍ୟାଟିଂ ବ୍ୟତୀତ ସରେନ ୨୦ ରନ୍ ଦେଇ ତିନି ଓଭର ବୋଲିଂ କରିଥିଲେ। ଉତ୍କୃଷ୍ଟ ପ୍ରଦର୍ଶନ ଲାଗି ତାଙ୍କୁ ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ପ୍ରଦାନ କରିଛି। ଦୃଷ୍ଟିହୀନ ଟି-୨୦ ବିଶ୍ୱକପରେ ଭାରତ ଅପରାଜିତ ରହି ଟାଇଟଲ ହାସଲ କରିଥିଲା। ସେମାନଙ୍କର ପ୍ରଥମ ମ୍ୟାଚ୍ରେ, ସେମାନେ ଶ୍ରୀଲଙ୍କାକୁ ମାତ୍ର ୪୧ ରନ୍ରେ ଅଲଆଉଟ୍ କରି ମାତ୍ର ତିନି ଓଭରରେ ଲକ୍ଷ୍ୟ ହାସଲ କରିଥିଲେ, ଯାହାର ସହାୟତାରେ ସାତଟି ରନ୍ଆଉଟ୍ ହୋଇଥିଲା। ସେମିଫାଇନାଲରେ, ଭାରତ ଅଷ୍ଟ୍ରେଲିଆକୁ ନଅ ୱିକେଟ୍ ରେ ପରାସ୍ତ କରିଥିଲା ଏବଂ ନେପାଳ ବିପକ୍ଷରେ ଏକ କମାଣ୍ଡିଂ ପ୍ରଦର୍ଶନ ସହିତ ଫାଇନାଲରେ ଟ୍ରଫି ଜିତିଛି।
ଦୈନିକ ଖବରକାଗଜ ସକାଳ ଏବଂ ନନ୍ଦିଘୋଷ ଟିଭି ପକ୍ଷରୁ ବିଭିନ୍ନ ସ୍ଥାନରେ ବିତର୍କ ପ୍ରତିଯୋଗିତା ଅନୁଷ୍ଠିତ
ଦୈନିକ ଖବର କାଗଜ ସକାଳ ଏବଂ ନନ୍ଦିଘୋଷ ଟିଭି ତରଫରୁ ରାଜ୍ୟର ବିଭିନ୍ନ ସ୍ଥାନରେ ବିତର୍କ ପ୍ରତିଯୋଗିତା ଅନୁଷ୍ଠିତ ହୋଇଯାଇଛି । ଏହି ଅବସରରେ ନୟାଗଡରେ ଦୈନିକ ଖବରକାଗଜ ସକାଳ ଏବଂ ନନ୍ଦିଘୋଷ ଟିଭି ପକ୍ଷରୁ ବିତର୍କ ପ୍ରତିଯୋଗିତା ଅନୁଷ୍ଠିତ । ସିନିୟର୍ ଓ ଜୁନିୟର ଦୁଇଟି ବର୍ଗରେ ପ୍ରତିଯୋଗିତା ଅନୁଷ୍ଠିତ ହୋଇଛି । ଜିଲ୍ଲାର ବିଭିନ୍ନ ସ୍କୁଲ ଓ କଲେଜର ଛାତ୍ରଛାତ୍ରୀମାନେ ଏହି ପ୍ରତିଯୋଗିତା ରେ ଅଂଶଗ୍ରହଣ କରିଥିଲେ। ଶେଷରେ ପ୍ରଥମ, ଦ୍ବିତୀୟ ଓ ତୃତୀୟ ସ୍ଥାନ ଅଧିକାର କରିଥିବା ଛାତ୍ରଛାତ୍ରୀମାନଙ୍କୁ ପୁରସ୍କୃତ କରାଯାଇଥିଲା। ବରିଷ୍ଠ ବିଭାଗର ଛାତ୍ର ସାଗର ବେହେରା ଓ କନିଷ୍ଠ ବିଭାଗର ଛାତ୍ରୀ ପ୍ରୀତି ମୟୀ ସାହୁକୁ ରାଜ୍ୟସ୍ତରୀୟ ବିତର୍କ ପ୍ରତିଯୋଗିତାରେ ସାମିଲ ହେବା ପାଇଁ ମନୋନୀତ କରାଯାଇଛି ।
ସେହିପରି ଖୋର୍ଦ୍ଧା ସିଗମା ପବ୍ଲିକ ସ୍କୁଲରେ ଆୟୋଜିତ ହୋଇଛି ବିତର୍କ ପ୍ରତିଯୋଗିତା। ଜିଲ୍ଲାର ବିଭିନ୍ନ ହାଇସ୍କୁଲ ଏବଂ କଲେଜର ଶତାଧିକ ଛାତ୍ରଛାତ୍ରୀ ଏହି ବିତର୍କ ପ୍ରତିଯୋଗିତାରେ ଅଂଶ ଗ୍ରହଣ କରିଥିଲେ। ଖୋର୍ଦ୍ଧା ଜିଲ୍ଲା ନନ୍ଦିଘୋଷ ପ୍ରତିନିଧି ଶୁଭ୍ରାଂଶୁ ରଂଜନ ସାମନ୍ତରାୟ କାର୍ଯ୍ୟକ୍ରମରେ ସଂଯୋଜନା କରିଥିଲେ। ସକାଳ ର ପ୍ରତିନିଧି ରଞ୍ଜିତ ସାମନ୍ତରାୟଙ୍କ ପୌରୋହିତ୍ୟରେ ଆୟୋଜିତ କାର୍ଯ୍ୟକ୍ରମରେ ପ୍ରଫେସର ପ୍ରମୋଦ କୁମାର ଦାସ, ସ୍କୁଲ ଅଧ୍ୟକ୍ଷା ମମତାଞ୍ଜଳି ପଟ୍ଟନାୟକ, ଭାଟପଡ଼ା ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ଅଗାଧୁ ସେଠୀ, ସମାଜସେବୀ ଗୌତମ ମହାରଣା ପ୍ରମୁଖ ଯୋଗ ଦେଇଥିଲେ।
ନୂଆପଡା ନ୍ୟାସନାଲ ହାଇସ୍କୁଲ ଠାରେ ସକାଳ ଖବର କାଗଜ ଓ ନନ୍ଦିଘୋଷ ଟିଭି ପକ୍ଷରୁ ବିତର୍କ ପ୍ରତିଯୋଗିତା ଅନୁଷ୍ଠିତ ହୋଇଯାଇଛି। ଏହି କାର୍ଯକ୍ରମରେ ମୁଖ୍ୟ ଅତିଥି ଭାବରେ ଅତିରିକ୍ତ ଜିଲ୍ଲାଶିକ୍ଷା ଅଧିକାରୀ ରେଶମ ଲାଲ ନାୟକ ଯୋଗ ଦେଇଥିବା ବେଳେ ଶିକ୍ଷାବିତ କିଶୋର ପ୍ରଧାନ, କିଶୋର ପରିଡ଼ା ପ୍ରମୁଖ ଯୋଗ ଦେଇଥିଲେ। ଏହି କାର୍ଯ୍ୟ କ୍ରମରେ ଜିଲ୍ଲାର ବିଭିନ୍ନ ହାଇସ୍କୁଲ ଓ କଲେଜର ଛାତ୍ରଛାତ୍ରୀ ଯୋଗ ଦେଇ ବିତର୍କ ପ୍ରତିଯୋଗିତାରେ ଭାଗ ନେଇଥିଲେ । କୃତି ଛାତ୍ର ଛାତ୍ରୀ ଶହ ବିତର୍କରେ ଭାଗ ନେଇଥିବା ସମସ୍ତ ଛାତ୍ର ଛାତ୍ରୀଙ୍କୁ ଅତିଥିଙ୍କ ଦ୍ୱାରା ପୁରସ୍କୃତ କରାଯାଇଥିଲା। ଏହି କାର୍ଯ୍ୟ କ୍ରମକୁ ସକାଳ କୋମନା ପ୍ରତିନିଧି ପରିଚାଳନା କରିଥିଲେ। ରାଜ୍ୟର ଅନ୍ୟ ବହୁ ସ୍ଥାନରେ ମଧ୍ୟ ବିତର୍କ ପ୍ରତିଯୋଗିତା ଅନୁଷ୍ଠିତ ହୋଇଥିଲା ଓ ସେଥିରେ ଅଂଶଗ୍ରହଣ କରିଥିବା ଛାତ୍ରଛାତ୍ରୀଙ୍କୁ ଅତିଥିଙ୍କ ଦ୍ବାରା ପୁରସ୍କାର ପ୍ରଦାନ କରାଯାଇଥିଲା ।
ଦ୍ବିତୀୟ ଟେଷ୍ଟ: ପ୍ରଥମ ଇନିଂସରେ ଦକ୍ଷିଣ ଆଫ୍ରିକାର ୪୮୯ ରନ, ସେନୁରନ ମୁଥୁସାମୀଙ୍କ ଶତକ
ଭାରତୀୟ ଟିମକୁ ଗୁଆହାଟୀ ଟେଷ୍ଟ ମ୍ୟାଚରେ ଜିତିବା ଜରୁରୀ ହୋଇଥିବା ବେଳେ ଏପରି ସ୍ଥିତିରେ ଦକ୍ଷିଣ ଆଫ୍ରିକା ରନର ପାହାଡ଼ ଛିଡ଼ା କରିଛି । ପ୍ରଥମ ଇନିଂସରେ ଦକ୍ଷିଣ ଆଫ୍ରିକା ୪୮୯ ରନ୍ ସଂଗ୍ରହ କରିଛି । ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିବା ଦକ୍ଷିଣ ଆଫ୍ରିକା ପକ୍ଷରୁ ସେନୁରନ ମୁଥୁସାମୀ ଶତକ ଅର୍ଜନ କରିଛନ୍ତି । ସେହିପରି ମାର୍କୋ ଜନସେନ ୯୩ ରନ୍ ସଂଗ୍ରହ କରିଛନ୍ତି । ଅନ୍ୟମାନଙ୍କ ମଧ୍ୟରେ ଏଡେନ ମର୍କରାମ ୩୮, ରୟାନ ରିକେଲଟନ ୩୫, ଟ୍ରିଷ୍ଟନ ଷ୍ଟବସ ୪୯, ଟେମ୍ବା ବାଭୁମା ୪୧, କାଇଲ ଭେରେୟିନେ ୪୫ ରନ୍ ସଂଗ୍ରହ କରିଥିଲେ । ଆଜିର ମ୍ୟାଚରେ ସମସ୍ତ ଦକ୍ଷିଣ ଆଫ୍ରିକା ଖେଳାଳି ରନ୍ ସଂଗ୍ରହ କରିବା ଫଳରେ ଦଳର ସ୍ଥିତି ସୁଦୃଢ଼ ହୋଇପାରିଥିଲା ।
ଅନ୍ୟପକ୍ଷରେ ଭାରତ ପକ୍ଷରୁ କୁଲଦୀପ ଯାଦବ ସର୍ବାଧକ ୪ଟି ଓ୍ବିକେଟ ହାସଲ କରିଥିଲେ । ଯଶପ୍ରୀତ ବୁମ୍ରା ୨ଟି, ମହମ୍ମଦ ସିରାଜ ୨ଟି ଓ ରବିନ୍ଦ୍ର ଜାଡ଼େଜା ୨ଟି ଓ୍ବିକେଟ ନେଇଥିଲେ । ଆଜି ମ୍ୟାଚର ଦ୍ବିତୀୟ ଦିନ ହୋଇଥିବା ବେଳେ ମ୍ୟାଚର ଫଳାଫଳ ଉପରେ ସଭିଙ୍କ ନଜର ରହିଛି । ପ୍ରଥମ ଟେଷ୍ଟରେ ଭାରତ ୩୦ ରନରେ ପରାଜୟବରଣ କରିଥିବା ବେଳେ ଏବେ ଦକ୍ଷିଣ ଆଫ୍ରିକା ସିରିଜରେ ୧-୦ରେ ଆଗୁଆ ରହିଛି । ଭାରତ ପକ୍ଷରୁ ଦୁଇ ଓପନର କେଏଲ ରାହୁଲ (୨) ଓ ଯଶସ୍ବୀ ଜୟସ୍ବାଲ (୭) ବ୍ୟାଟିଂ ଜାରି ରଖିଛନ୍ତି ।
ହ୍ୟୁମାନ ସାଗରଙ୍କ ପରଲୋକରେ ସଂଗୀତ ଜଗତ ସ୍ତବ୍ଧ: କଣ୍ଠଶିଳ୍ପୀଙ୍କୁ ମନେପକାଇଛନ୍ତି କଟକର ଝିଅ ଆଦ୍ୟାଶା ସାହୁ
କଣ୍ଠଶିଳ୍ପୀ ହ୍ୟୁମାନ ସାଗରଙ୍କ ପରଲୋକରେ ସଂଗୀତ ଜଗତ ସ୍ତବ୍ଧ । ହ୍ୟୁମାନଙ୍କୁ ମନେପକାଇଛନ୍ତି କଟକର ଝିଅ ଆଦ୍ୟାଶା ସାହୁ । ଆଦ୍ୟାଶା ବିଭିନ୍ନ ରିୟଲିଟି ସୋରେ ଭାଗ ନେଉଥିବା ବେଳେ କିଛି ମାସ ତଳେ କଟକ ଏମ.ଆର ଷ୍ଟୁଡିଓରେ ହ୍ୟୁମାନଙ୍କ କୋ ଆର୍ଟିଷ୍ଟ ଭାବେ ଏକ ଗୀତ ଗାଇଥିଲେ । ଆଉ ସେ ସମୟର ଅନୁଭୂତିକୁ ବଖାଣିଛନ୍ତି ଆଦ୍ୟାଶା । ତାଙ୍କୁ ଭେଟିଛନ୍ତି ଆମ ପ୍ରତିନିଧି ଅଜୟ ଦାସ।