spot_img
Home Blog Page 5918

କରୋନାରେ ଲାଗୁନି ବ୍ରେକ: ୨୪ ଘଣ୍ଟାରେ ୧ ଲକ୍ଷ ୬୧ ହଜାରରୁ ଅଧିକ ସଂକ୍ରମିତ

ନୂଆଦିଲ୍ଲୀ: ଡରାଉଛି ଦ୍ୱିତୀୟ ଲହର। କରୋନା କହରରେ ପ୍ରତିଦିନ ସଂକ୍ରମଣ ରେକର୍ଡ଼ ଭାଙ୍ଗୁଥିବା ବେଳେ ମୃତ୍ୟୁ ହାରରେ ରୋକ ଲାଗୁନି । ଗତ ସପ୍ତାହେ ଧରି ଲକ୍ଷେ ପାର କରୁଛି ଦୈନିକ ସଂକ୍ରମଣ । ଆଜି ଦେଶରେ ୧ ଲକ୍ଷ ୬୧ହଜାର ୭୩୬ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ସଂକ୍ରମଣ ହାର ଅନୁସାରେ ସୁସ୍ଥତା ହାର ବଢୁ ନଥିବାରୁ ଚିନ୍ତା ବଢ଼ିଛି।

ଅନ୍ୟପଟେ ଗତ ୨୪ ଘଣ୍ଟାରେ ଦେଶରେ ୮୭୯ଜଣ ସଂକ୍ରମିତଙ୍କ ଜୀବନ ନେଇଛି ମହାମାରୀ। ଦେଶରେ କରୋନା ଆକ୍ଟିଭ କେସ୍ ୧୨ଲକ୍ଷ ୬୪ହଜାର ୬୯୮ ରହିଥିବା ବେଳେ ମୋଟ୍ ମୃତ୍ୟୁସଂଖ୍ୟା ୧ ଲକ୍ଷ ୭୧ହଜାର ୫୮ରେ ପହଞ୍ଚିଛି । ଗତକାଲି ୧୪ ଲକ୍ଷ ୧୨୨ ସାମ୍ପଲ ଟେଷ୍ଟ ଟେଷ୍ଟ ହୋଇଥିବା ନେଇ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟସୂଚନା ଦେଇଛି। ବିଶେଷ କରି ଦିଲ୍ଲୀ, ମହାରାଷ୍ଟ୍ର, ଗୁଜୁରାଟ, ପଞ୍ଜାବ ଆଦି ୮ଟି ରାଜ୍ୟରେ କରୋନା ଭୟଙ୍କର ସ୍ଥିତିରେ ପହଞ୍ଚିଛି।

ଗୁଜୁରାଟର ଅହମ୍ମଦାବାଦରେ କରୋନା ରୋଗୀଙ୍କ ସଂଖ୍ୟା ତୀବ୍ର ଗତିରେ ବଢୁଥିବା ବେଳେ ହସ୍ପିଟାଲରେ ବେଡ୍‌ ଫୁଲ୍‌ ହେବା ଲାଗିଛି। ସେହିଭଳି ରାଜଧାନୀ ଦିଲ୍ଲୀରେ ବି ଦିଦକୁ ଦିନ ଗମ୍ଭୀର ହେଉଛି ସ୍ଥିତି। ହସ୍ପିଟାଲରେ ବେଡ୍‌ ଅଭାବ ଦେଖାଦେଇଥିବା ବେଳେ କଟକଣା କଡ଼ାକଡ଼ି କରିଛନ୍ତି ଦିଲ୍ଲୀ ସରକାର। ସଂକ୍ରମଣ ବଢୁଥିବା କାରଣରୁ କେତେକ ମେଟ୍ରୋ ଷ୍ଟେସନରେ ଏଣ୍ଟ୍ରି ବନ୍ଦ କରିଦିଆଯାଇଛି। ଲକ୍ଷ୍ନୌରେ ବି ସ୍ଥିତି ବିଗୁଡ଼ୁଥିବାରୁ ଲକ୍‌ଡାଉନ ଲାଗୁ କରିବା ନେଇ ଆଲୋଚନା କରୁଛନ୍ତି ରାଜ୍ୟ ସରକାର।

ଗଞ୍ଜାମରେ ନୂଆ କରୋନା କଟକଣା: ୨୧ ଯାଏଁ ବନ୍ଦ ରହିବ ସମସ୍ତ ଧର୍ମାନୁଷ୍ଠାନ

ବ୍ରହ୍ମପୁର: ନୂଆ କରୋନା କଟକଣା ଜାରି କଲା ଗଞ୍ଜାମ ଜିଲ୍ଲା ପ୍ରଶାସନ । ଜିଲ୍ଲାରେ ବଢ଼ୁଥିବା ସଂକ୍ରମିତ ସଂଖ୍ୟାକୁ ଆଖି ଆଗରେ ନୂଆ ଗାଇଡଲାଇନ ଜାରି କରିଛି ଜିଲ୍ଲା ପ୍ରଶାସନ । ଜିଲ୍ଲାର ସମସ୍ତ ଧାର୍ମିକ ଅନୁଷ୍ଠାନ ଆସନ୍ତା କାଲି ଠାରୁ ୨୧ ତାରିଖ ପର୍ଯ୍ୟନ୍ତ ବନ୍ଦ ରହିବ।  ଏହି ବନ୍ଦ ସମୟରେ ଧାର୍ମିକ ଅନୁଷ୍ଠାନ ଗୁଡିକ ସାନିଟାଇଜ କରାଯିବ। ବନ୍ଦ ସମୟରେ କେବଳ ପୂଜକ ମାନେ ରୀତିନୀତିରେ ପୂଜା କରିପାରିବେ। ଜିଲ୍ଲାର ସମସ୍ତ ପାର୍କ, ସମୁଦ୍ର ବେଳାଭୂମି, ପଡିଆ, ହ୍ରଦ ଆସନ୍ତା କାଲି ଠାରୁ ୨୧ ତାରିଖ ପର୍ଯ୍ୟନ୍ତ ବନ୍ଦ ରହିବ। ଜିଲ୍ଲାରେ ପାଳନ ହେବ ନାହିଁ ମେରୁ ଯାତ୍ରା ଓ ପଣା ସଂକ୍ରାନ୍ତି। ଯେଉଁମାନେ ଏହି ନିୟମକୁ ଅବମାନନା କରିବେ ସେମାନଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ। ।ଜିଲ୍ଲା ଜରୁରୀ କାଳୀନ ବିଭାଗ ପକ୍ଷରୁ ଏ ନେଇ ସୂଚିତ କରାଯାଇଛି । ସୂଚନା ଯୋଗ୍ୟ, ଗତ ୨୪ ଘଣ୍ଟା ମଧ୍ୟରେ ଜିଲ୍ଲାରେ ୮୦ ଜଣ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ଅପରପକ୍ଷରେ ମା’ ବୁଢ଼ୀ ଠାକୁରାଣୀଙ୍କ ଅସ୍ଥାୟୀ ମଣ୍ଡପ ନିକଟରୁ କରୋନା ସଂକ୍ରମିତ ଚିହ୍ନଟ ହେବା ପରେ ଦେଶୀ ବେହେରା ସାହିକୁ ସିଲ୍ କରିଛି ପ୍ରଶାସନ  । ଏବଂ ଚତୁଃପାର୍ଶ୍ୱକୁ କଣ୍ଟେନମେଣ୍ଟ ଜୋନ ଘୋଷୋଣା କରିଛି ।

ଅଳ୍ପକେ ବର୍ତ୍ତିଲେ ଯବାନ: ସୁକ୍‌ମା ଜିଲ୍ଲାରୁ ଆଇଇଡି ଜବତ

ମାଲକାନଗିରି: ସୀମାନ୍ତ ଛତିଶଗଡ଼ ସୁକମା ଜିଲ୍ଲାରୁ ଆଇଇଡି ଜବତ । ଅଳ୍ପକେ ବର୍ତ୍ତି ଗଲେ ଯବାନ । ମୀନାପା ଏବଂ ବୁର୍କାପାଲ ଅଞ୍ଚଳରେ ଘଟିଛି ଏହି ଘଟଣା । ସର୍ଚ୍ଚ ଅପରେସନ ବେଳେ ୧୦ କିଲୋର ଆଇଇଡି ଠାବ ହୋଇଛି । ଘଟଣାସ୍ଥଳରେ ହିଁ ଯବାନମାନେ ଅତି ସତର୍କତାର ସହିତ ଆଇଡି ବୋମା ନିଷ୍କ୍ରିୟ କରିଛନ୍ତି । ସୂଚନା ଅନୁସାରେ ରାସ୍ତା ନିର୍ମାଣ ସମୟରେ ଉଦ୍ଧାର ହୋଇଥିଲା IED ପ୍ରେସର ବୋମା ।

ସୂଚନା ଯୋଗ୍ୟ, ଗତ କିଛି ଦିନ ତଳେ ଘଟିଥିବା ଛତିଶଗଡ଼ ବିଜାପୁର ନକ୍ସଲ ଆକ୍ରମଣରେ ୨୨ ଜଣ ଯବାନଙ୍କ ହୋଇଥିଲେ । ଯାହା ଥିଲା ଚଳିତ ବର୍ଷର ସବୁଠାରୁ ବଡ଼ ନକ୍ସଲ ଆକ୍ରମଣ । ଏହି ଆକ୍ରମଣରେ ୮ ଜଣ ସିଆରପିଏଫ୍ ଯବାନ ସହିଦ ହୋଇଥିବା ବେଳେ ଜଣେ ଯବାନ ନିଖୋଜ ଅଛନ୍ତି । ସେହିଭଳି ଏଥିରେ ରାଜ୍ୟ ପୋଲିସର ୧୪ ଜଣ ଯବାନ ସହିଦ ହୋଇଛନ୍ତି ।

Bijapur Naxal Attack 20 Soldier Bodies Recovered

ନକ୍ସଲ କରିଥିବା ଏହି ଆକ୍ରମଣରେ ଦେଶୀ ରକେଟ୍ ଲଞ୍ଚର୍ ଏବଂ ଲାଇଟ୍ ମେସିନ୍ ଗନର ବ୍ୟବହାର କରିଥିଲେ । ନକ୍ସଲଙ୍କ ସବୁଠୁ ମଜଭୁତ୍ ଗଡ଼ କୁହାଯାଉଥିବା ବିଜାପୁରରେ ସୁରକ୍ଷାବାହିନୀ ସର୍ଚ୍ଚ ଅପରେସନ୍ କରିଥିଲେ । ନକ୍ସଲ ବିରୋଧୀ ଅଭିଯାନ ବେଳେ ସୂଚନା ମିଳିଥିଲା ନକ୍ସଲଙ୍କ ସବୁଠୁ ବଡ଼ ପିପୁଲ୍ସ ଗ୍ରୁପ୍ ଆର୍ମି ପ୍ଲାଟୁନ୍ ବନ (PLGA 1)ର ବଡ଼ ଦୁର୍ଦ୍ଦାନ୍ତ କମାଣ୍ଡର ହିଡମା ଥିବା ଖବର ମିଳିଥିଲା । ଆକ୍ରମଣ ସ୍ଥଳରୁ ୧ କିଲୋମିଟର ଦୂର ପୋବର୍ତ୍ତି ଗାଁରେ ହିଡମା ଥିବା ଖବର ପରେ ସିଆରପିଏଫ୍ ଓ ଛତିଶଗଡ଼ ପୋଲିସର DRG ଏକ ମିଳିତ ଅପରେସନ୍ ଆରମ୍ଭ କରିଥିଲେ ।

ଏଥିସହିତ ପଢ଼ନ୍ତୁ: ରକେଟ୍ ଲଞ୍ଚର ଓ ଲାଇଟ୍ ମେସିନ୍ ଗନରୁ ଆକ୍ରମଣ କରିଥିଲା ହିଡମା ବାହିନୀ, ୨୨ ଯବାନ ସହିଦ

ସ୍କୁଲରେ ଛାତ୍ରୀ, ବାହାରୁ ତାଲା ପକାଇଲେ ଶିକ୍ଷକ: ଅଚେତ ଅବସ୍ଥାରେ ଛାତ୍ରୀ ଉଦ୍ଧାର

ଦିଗପହଣ୍ଡି: ସ୍କୁଲ କର୍ତ୍ତୃପକ୍ଷଙ୍କ ଅବହେଳା । ଛାତ୍ରୀ ଜଣଙ୍କ ସ୍କୁଲରେ ଥିବା ବେଳେ ବାହାରୁ ତାଲା ପକାଇଲେ ସ୍କୁଲ କର୍ତ୍ତୃପକ୍ଷ । ଗଞ୍ଜାମ ଜିଲ୍ଲା ସାନଖେମୁଣ୍ଡି ପାଟପୁର ବାଳିକା ଉଚ୍ଚ ବିଦ୍ୟାଳୟରେ ଛାତ୍ରୀ ଜଣଙ୍କ ସ୍କୁଲରେ ଥିବା ବେଳେ ଶିକ୍ଷକ ଜଣଙ୍କ ବାହାରୁ ତାଲା ପକାଇଛନ୍ତି । ପାଟପୁର ଥାନାରେ ଅଭିଯୋଗ ପରେ ପୋଲିସ ଉପସ୍ଥିତିରେ ସ୍କୁଲ ତାଲା ଖୋଲାଯିବାରୁ ଅଚେତ ଅବସ୍ଥାରେ ଉଦ୍ଧାର ହୋଇଛନ୍ତି ଛାତ୍ରୀ ।

ଘଟଣାନୁଯାୟୀ, ବିଦ୍ୟାଳୟର ଜଣେ ଦଶମ ଶ୍ରେଣୀ ଛାତ୍ରୀ ବିଦ୍ୟାଳୟରୁ ଘରକୁ ଫେରିନଥିଲେ । ଅଭିଭାବକଙ୍କ ବହୁ ଖୋଜାଖୋଜି ପରେ ବିଦ୍ୟାଳୟ ପରିସରରେ ଛାତ୍ରୀ ଜଣଙ୍କ ଅଚେତ ଅବସ୍ଥାରେ ସ୍କୁଲ ମୁଖ୍ୟ ଫାଟକ ନିକଟରେ ଅଚେତ ଅବସ୍ଥାରେ ପଡ଼ି ରହିଥିବା ଦେଖିବାକୁ ମିଳିଥିଲା । ପରେ ପରିବାର ଲୋକ ଓ ସ୍ଥାନୀୟ ବାସିନ୍ଦା ପୋଲିସକୁ ଖବର ଦେଇଥିଲେ। ପୋଲିସ ଆସି ବିଦ୍ୟାଳୟ ସଭାପତିଙ୍କ ଉପସ୍ଥିତିରେ ତାଲା ଖୋଲି ଛାତ୍ରୀଙ୍କୁ ଉଦ୍ଧାର କରିଥିଲା । ତେବେ ଛାତ୍ରୀ ଜଣଙ୍କ କହିବା ମୁତାବକ  ସ୍କୁଲର ପ୍ରଧାନ ଶିକ୍ଷକ ଓ ଶିକ୍ଷୟିତ୍ରୀମାନେ ଜାଣି ଶୁଣି ତାଲା ପକାଇ ଚାଲିଯାଇଛନ୍ତି । ଛାତ୍ରୀ ଜଣଙ୍କ ସ୍କୁଲ ଛୁଟି ସମୟରେ ପରିସ୍ରାଗାର ଯାଇଥିଲେ ସେ ଫେରିଲା ବେଳକୁ ଦେଖିଥିଲେ ବିଦ୍ୟାଳୟ ଫାଟକରେ ତାଲା ପକାଇ ଚାଲି ଯାଇଥିଲେ । ପରେ ଦୀର୍ଘ ସମୟ ହେବାରୁ  ଛାତ୍ରୀ ଜଣଙ୍କ ଅସୁସ୍ଥତା ଅନୁଭବ କରି ବାରଣ୍ଡାରେ ପଡି ରହିଥିଲେ । ତାଲା ଖୋଲିଲା ପରେ ଅଭିଭାବକ ଆଡ଼ପଡ଼ା ମେଡ଼ିକାଲ ନେଇଥିଲେ । ସେପଟେ ବିଦ୍ୟାଳୟ ପ୍ରଧାନ ଶିକ୍ଷକ ଦୀନବନ୍ଧୁ ବେହେରା କହିଛନ୍ତି ଯେ ତାଲା ପକାଇବା ସମୟରେ ପରିସର ମଧ୍ୟରେ କେହି ନଥିଲେ । ଛାତ୍ରୀ ଜଣଙ୍କ କିଭଳି ଆସିଲେ ଆମେ ଜାଣି ନାହୁଁ । ତେବେ ସ୍କୁଲ ସଭାପତି କହିଛନ୍ତି ସ୍କୁଲକୁ ବଦନାମ କରିବାକୁ ଏହା ଏକ ଚକ୍ରାନ୍ତ । ସେପଟେ ଅଭିଭାବକ କହିଛନ୍ତି ନ୍ୟାୟ ନମିଳିଲେ ଆମେ ଜିଲ୍ଲାପାଳଙ୍କ ଦ୍ୱାରସ୍ଥ ହେବୁ ।

ଏଥିସହିତ ପଢ଼ନ୍ତୁ: ଦିଦି ଦେଲେ ସାମ୍ପ୍ରଦାୟିକ ବୟାନ, EC ଦେଲେ ନିର୍ଦେଶ

ବାଲେଶ୍ୱରରେ ନିର୍ମାଣାଧୀନ ମେଗା ପ୍ରକଳ୍ପର ସମୀକ୍ଷା କଲେ ୫-ଟି ସଚିବ ଭି.କେ ପାଣ୍ଡିଆନ

ବାଲେଶ୍ୱର: ବିଭିନ୍ନ ନିର୍ମାଣାଧୀନ ମେଗା ପ୍ରକଳ୍ପର ସ୍ଥିତି ସମୀକ୍ଷା କରିଛନ୍ତି 5-T ସଚିବ । 5-T ସଚିବ ଭି.କେ ପାଣ୍ଡିଆନଙ୍କ ସହ ମୁଖ୍ୟ ଶାସନ ସଚିବ ସୁରେଶ ମହାପାତ୍ର, ପୂର୍ତ୍ତ ବିଭାଗ ସଚିବ କିଷନ କୁମାର ମଧ୍ୟ ତାଙ୍କ ସହ ଉପସ୍ଥିତ ଥିଲେ । ଗସ୍ତରେ 5-T ସଚିବ ଭି.କେ ପାଣ୍ଡିଆନ୍‌ । ଜିଲ୍ଲାରେ ନିର୍ମାଣାଧୀନ କେତେକ ମେଗା ପ୍ରକଳ୍ପର ସ୍ଥିତି ସମୀକ୍ଷା କରିବାକୁ ବାଲେଶ୍ବରରେ ପହଞ୍ଚିଛନ୍ତି 5-T ସଚିବ । ତାଙ୍କ ସହିତ ମୁଖ୍ୟ ଶାସନ ସଚିବ ସୁରେଶ ମହାପାତ୍ର, ପୂର୍ତ୍ତ ବିଭାଗ ସଚିବ କିଷନ କୁମାର ମଧ୍ୟ ଅଛନ୍ତି । ସହର ସୌନ୍ଦର୍ଯ୍ୟକରଣ, ନିର୍ମାଣାଧୀନ ସରକାରୀ ମେଡିକାଲ କଲେଜ, ପ୍ରସ୍ତାବିତ ପାର୍କ ନିର୍ମାଣ କାମର ସମୀକ୍ଷା କରିଛନ୍ତି ଭି.କେ ପାଣ୍ଡିଆନ ।

ଗ୍ୟାଙ୍ଗଷ୍ଟର ହାଇଦର ସହଯୋଗୀ ୟାକୁବ ଖାଁ ଗିରଫ

କଟକ: ଗ୍ୟାଙ୍ଗଷ୍ଟର ହାଇଦର ସହଯୋଗୀ ୟାକୁବକୁ ଗିରଫ କଲା ପୋଲିସ । ୟାକୁବକୁ ଗିରଫ କରିଛି ମଙ୍ଗଳାବାଗ ପୋଲିସ । ଗତକାଲି ଗ୍ୟାଙ୍ଗଷ୍ଟର ହାଇଦର ଫେରାର ମାମଲାରେ ଆତ୍ମସମର୍ପଣ କରିଥିଲା ୟାକୁବ ଖାଁ ଓରଫ୍ ସିଲ୍ଲୁ । ହାଇଦାର ମାମଲାର ତଦନ୍ତ ନେଇ ସ୍ୱତନ୍ତ୍ର ଟିମ୍ ଗଠିତ ହୋଇଥିବା ବେଳେ ଟିମ୍ ସମ୍ପୃକ୍ତ ମାମଲାରେ ୟାକୁବକୁ ଗତକାଲି ପଚରାଉଚରା ପରେ ଆଜି ଗିରଫ କରିଛି ।

ଅପରପକ୍ଷରେ SCBରୁ ଗ୍ୟାଙ୍ଗଷ୍ଟର ହାଇଦର ଉଭାନ ହେବା ଘଟଣାକୁ ତିନି ଦିନ ବିତିଛି । କିନ୍ତୁ ଏବେ ବି ହାତ ଖାଲି କରି ବସିଛି ଓଡିଶା ପୋଲିସ । ସେପଟେ ଫେରାର ଦିନ କ୍ୟାବିନଟରେ କର୍ତ୍ତବ୍ୟରତ ପୋଲିସ କର୍ମଚାରୀ ମହମ୍ମଦ୍ ମୌସିମ ଏକ ଲିଖିତ ଏତଲା ଥାନାରେ ଦାଏର କରିଛନ୍ତି । ଗତ ୧୦ତାରିଖରେ ହାଇଦର ଫେରାର ହେବା ପରେ ସେହି ଦିନ ରାତିରେ ଦିଆଯାଇଥିବା ଏତଲାରେ କର୍ମଚାରୀ ଜଣକ ଘଟଣା ସଂପର୍କରେ ଉଲ୍ଲେଖ କରିଛନ୍ତି ।

ଏତଲାରେ ଉଲ୍ଲେଖ ରହିଛି, ଫେରାର ଦିନ ହାଇଦରକୁ ଭେଟିବାକୁ ତା’ର ପରିବାର ଓ ସମ୍ପର୍କୀୟ ମାନେ ଆସିଥିଲେ । ଯଥା ପୁଅ, ଭାଇ, ପୁତୁରା,ଶଳା ଓ ସାନ ଜ୍ବାଇଁ ସେଦିନ ଭେଟିବାକୁ ଆସିଥିଲେ । ଠିକ ସେହି ସୟରେ ସଂପର୍କୀୟ ଓ ଅନ୍ୟ ଲୋକମାନେ ସୁରକ୍ଷା ଦାୟିତ୍ୱରେ ଥିବା ପୋଲିସ କନଷ୍ଟେବଳଙ୍କ ଉପରକୁ ଟକ୍ରାନ୍ତ କରି କିଛି ବିଷାକ୍ତ ଜିନିଷ ଉପରକୁ ଫିଙ୍ଗିଥିବା ଏତଲାରେ ଉଲ୍ଲେଖ କରିଛନ୍ତି ସୁରକ୍ଷାକର୍ମୀ ।

ଏଥିସହିତ ପଢ଼ନ୍ତୁ: ହାଇଦର ଫେରାର ଦିନ ଆସିଥିଲେ ପରିବାର ଲୋକ, ଏତଲାରେ ଉଲ୍ଲେଖ କଲେ ସୁରକ୍ଷାକର୍ମୀ

୭୩ ବର୍ଷରେ ପାଦ ଥାପିଲା ରାଜଧାନୀ ଭୁବନେଶ୍ୱର

ଭୁବନେଶ୍ୱର: ପାଳିତ ହୋଇଛି ରାଜଧାନୀର ପ୍ରତିଷ୍ଠା ଦିବସ। ପ୍ରତିଷ୍ଠା ଦିବସ ଅବସରରେ ପିଏମଜି ଛକରେ ଥିବା ରାଜଧାନୀ ପ୍ରତିଷ୍ଠା ଫଳକରେ ପୁଷ୍ପମାଲ୍ୟ ଅର୍ପଣ କରିଛନ୍ତି ବାଚସ୍ପତି ସୂର୍ଯ୍ୟ ନାରାୟଣ ପାତ୍ର। ବାଚସ୍ପତିଙ୍କ ସମେତ ସୂଚନା ଓ ଲୋକସଂପର୍କ ମନ୍ତ୍ରୀ ରଘୁନନ୍ଦନ ହାସ, କଂଗ୍ରେସ ବିଧାୟକ ସୁରେଶ କୁମାର ରାଉତରାୟ, ଜିଲ୍ଲାପାଳ ସନତ ମହାନ୍ତି ଏବଂ ରାଜ୍ୟ ସରକାରଙ୍କ ବରିଷ୍ଠ ଅଧିକାରୀ ମାନେ ଉପସ୍ଥିତ ରହି ପୁଷ୍ପମାଲ୍ୟ ଅର୍ପଣ କରିଛନ୍ତି। ୧୯୪୮ ମସିହା ଆଜିର ଦିନରେ ମାତ୍ର ୧୪ ହଜାର ଲୋକଙ୍କୁ ନେଇ ରାଜଧାନୀ ପ୍ରତିଷ୍ଠା ହୋଇଥିଲା। ବର୍ତ୍ତମାନ ଦେଢକୋଟି ଲୋକ ରାଜଧାନୀରେ ରହିବା ପାଇଁ ଭିତ୍ତିଭୂମି ରହିଛି। କାଳକ୍ରମେ ଲୋକସଂଖ୍ୟା ବୃଦ୍ଧି ହେବା ସହ ଭିତ୍ତିଭୂମିର ବିକାଶ ହୋଇଛି। ରାଜଧାନୀରେ ଆଇଟି ହବ ହୋଇଛି। ବଡବଡ ଅଟ୍ଟାଳିକା ଛିଡା ହୋଇଛି। ରାଜଧାନୀ ଭୁବନେଶ୍ବର ବିଶ୍ବସ୍ତରୀୟ ସହରରେ ପରିଣତ ହେବା ସହ ସ୍ବାସ୍ଥ୍ୟ ସେବାରେ ଏକ ମାଇଲଖୁଣ୍ଟ ହୋଇଥିବା ବାଚସ୍ପତି କହିଛନ୍ତି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦାୟିତ୍ୱ ନେବାପରେ ସହରର ବିକାଶ ଦୃତଗତିରେ ଆଗେଇ ଚାଲିଛି। ଯେଉଁ ଲକ୍ଷନେଇ ଭୁବନେଶ୍ୱର କୁ ରାଜଧାନୀ କରାଯାଇଥିଲା ତାହା ସାକାର ହୋଇଥିବା ସୂଚନା ଓ ଲୋକସଂପର୍କ ମନ୍ତ୍ରୀ ରଘୁନନ୍ଦନ ଦାସ କହିଛନ୍ତି।

ଏଥିସହିତ ପଢ଼ନ୍ତୁ: ସୁନିଲଙ୍କ ସ୍ଥାନରେ ସୁଶୀଲ, ମଙ୍ଗଳବାର ନେବେ CEC ଦାୟିତ୍ବ

ରାଜ୍ୟରେ ପୁଣି ଦୈନିକ କରୋନା ସଂକ୍ରମିତଙ୍କ ସଂଖ୍ୟା ୧୭ଶହ ଟପିଲା

ଭୁବନେଶ୍ୱର: ରାଜ୍ୟରେ ଆଉ ୧୭୮୪ ପଜିଟିଭ । ୩୦ଜିଲ୍ଲା ଓ ଷ୍ଟେଟପୁଲରୁ ସଂକ୍ରମିତ ଚିହ୍ନଟ ହୋଇଥିବା ବେଳେ କ୍ବାରେଣ୍ଟାଇନରୁ ୧୦୩୫, ଲୋକାଲ କେସ୍ ୭୪୯ । ୨ଜଣଙ୍କ ଜୀବନ ନେଇଛି କିଲର କରୋନା । ଭଦ୍ରକ ଓ ବଲାଙ୍ଗୀରରୁ ଜଣେ ଲେଖାଏଁ ଆକ୍ରାନ୍ତଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ସେପଟେ ନୂଆପଡାରୁ ସର୍ବାଧିକ ୩୦୩ ସଂକ୍ରମିତ ଚିହ୍ନଟ ହୋଇଛନ୍ତି । ସୁନ୍ଦରଗଡ଼ରୁ ୨୪୧, ଖୋର୍ଦ୍ଧାରୁ ୨୦୧, ସମ୍ବଲପୁରରୁ ୧୧୪ ସଂକ୍ରମିତ ଚିହ୍ନଟ ହୋଇଛନ୍ତି । ବଲାଙ୍ଗୀରରୁ ୯୧, ବରଗଡ଼ରୁ ୮୭, ଗଞ୍ଜାମରୁ ୮୦ ପଜିଟିଭ ଚିହ୍ନଟ ହୋଇଛନ୍ତି । ବାଲେଶ୍ବରରୁ ୭୨, ନବରଙ୍ଗପୁରରୁ ୬୭, କଳାହାଣ୍ଡିରୁ ୬୮, ନବରଙ୍ଗପୁରରୁ ୬୭ ସଂକ୍ରମିତ ଚିହ୍ନଟ ହୋଇଛନ୍ତି । କଟକରୁ ୫୯, କେନ୍ଦୁଝରରୁ ୫୪, ପୁରୀରୁ ୫୩, ଷ୍ଟେଟପୁଲରୁ ୪୬ ସଂକ୍ରମିତ ଚିହ୍ନଟ ହୋଇଛନ୍ତି । ରାଜ୍ୟରେ ମୋଟ୍ କରୋନା ସଂକ୍ରମିତଙ୍କ ସଂଖ୍ୟା ୩ଲକ୍ଷ ୫୩ହଦାର ୮୬ରେ ପହଞ୍ଚିଥିବା ବେଳେ ସୁସ୍ଥ ହେଲେଣି ୩ଲକ୍ଷ ୪୦ହଜାର ୬ଶହ । ଆକ୍ଟିଭ କେସ୍ ୧୦ହଜାର ୫୦୩ରେ ପହଞ୍ଚିଛି ।

ଏଥିସହିତ ପଢ଼ନ୍ତୁ: ବଢୁଛି କୋଭିଡ, ଘୁଞ୍ଚିଲା ବୋର୍ଡ ପରୀକ୍ଷା