ନନ୍ଦିଘୋଷ ବ୍ୟୁରୋ ; ସଂସଦର ଉଭୟ ଗୃହରେ ଗୃହୀତ ହୋଇଛି ଅନଲାଇନ ଗେମିଂ ବିଲ୍। ଫଳରେ ଡ୍ରିମ 11, ଗେମସ 24X7 ଓ ମୋବାଇଲ ପ୍ରିମିୟର ଲିଗ୍, ନଜାରା ଟେକନୋଲୋଜିସ ଲିମିଟେଡ ଦ୍ବାରା ପରିଚାଳିତ ୩.୮ ବିଲିୟନ ଡଲାରର ଗେମିଂ ଶିଳ୍ପ ପ୍ରଭାବିତ ହେବା ଆଶଙ୍କା ସୃଷ୍ଟି ହୋଇଛି। ଅଗଷ୍ଟ ୨୦ରେ ଲୋକସଭାରେ ଓ ୨୧ରେ ରାଜ୍ୟସଭାରେ ଏହି ବିଲ୍ ଗୃହୀତ ହେବା ପରେ ରାଷ୍ଟ୍ରପତିଙ୍କ ସମ୍ମତି ମିଳିଲେ ତାହା ଆଇନରେ ପରିଣତ ହେବ। ଏହି ବିଲ୍ ଯୋଗୁ କେନ୍ଦ୍ର କ୍ରୀଡ଼ା ମନ୍ତ୍ରାଳୟ ଗାଇଡଲାଇନ ପ୍ରସ୍ତୁତ କରିବ ଏବଂ ଦେଶରେ ଇ-ସ୍ପୋର୍ଟସ ଇଭେଣ୍ଟ ଆୟୋଜନ କରିବା ଲାଗି ଗାଇଡଲାଇନ ପ୍ରସ୍ତୁତ କରିବ। ଏହା ସହ ବୃହତ କ୍ରୀଡ଼ା ନୀତି ବି ପ୍ରସ୍ତୁତ ହେବ। ନୂଆ ନିୟମ ବଳରେ ଅନଲାଇନ ସୋସିଆଲ ଗେମକୁ ସରକାର ସ୍ବୀକୃତି ଦେବା ସହ ଏହାର ଶ୍ରେଣୀ ବିଭକ୍ତ ଓ ପଞ୍ଜିକରଣ କରାଯିବ। ନିରାପଦ, ବୟସ ଅନୁସାରେ ସାମାଜିକଓ ଶିକ୍ଷାଭିତ୍ତିକ ଗେମ୍ ଲାଗି ବ୍ୟବସ୍ଥା କରାଯିବ। ଭାରତୀୟ ମୂଲ୍ୟବୋଧ ସମ୍ପର୍କିତ ସାଂସ୍କୃତିକ ଓ ଶିକ୍ଷାଭିତ୍ତିକ ଗେମର ପ୍ରସାରଣ କରାଯିବ। ଅନଲାଇନ ଗେମିଂ ବିଲରେ ଅଫରିଂ, ଅପରେଟିଂ ବା ମନି ଗେମକୁ ନିଷିଦ୍ଧ କରାଯାଇଛି। ମିଡିଆର କୌଣସି ପ୍ଲାଟଫର୍ମରେ ଅନଲାଇନ ଗେମିଂର ବିଜ୍ଞାପନ ଓ ପ୍ରମୋସନ କରାଯାଇପାରିବ ନାହିଁ। ଟଙ୍କା କାରବାର କ୍ଷେତ୍ରରେ ବ୍ୟାଙ୍କ ଓ ପେମେଣ୍ଟ ସିଷ୍ଟମ ଜରିଆରେ ଅର୍ଥ ନେଣଦେଣ ନିଷିଦ୍ଧ କରାଯାଇଛି। ଆଇଟି ଆଇନ ୨୦୦୦ ଅନୁସାରେ ଅନଲାଇନ ଗେମଗୁଡ଼ିକୁ ବ୍ଲକ କରାଯିବ। ବିଲ୍ ଅନୁସାରେ ଦେଶରେ ଅନଲାଇନ ଗେମିଂ ଅଥରିଟି ଗଠନ କରାଯିବ। ବିଲର ବ୍ୟବସ୍ଥା ଅନୁସାରେ ନିୟମ ଉଲ୍ଲଂଘନ ହେଲେ ୩ ବର୍ଷ ଜେଲଦଣ୍ଡ କିମ୍ବା ୧କୋଟି ଟଙ୍କା ଜରିମାନା କିମ୍ବା ଉଭୟ ଦଣ୍ଡ ମିଳିବ। ଅନଲାଇନ ଗେମର ବିଜ୍ଞାପନ କ୍ଷେତ୍ରରେ ୫୦ ଲକ୍ଷ ଟଙ୍କା ଜରିମାନା କିମ୍ବା ୨ ବର୍ଷ ଯାଏ ଜେଲଦଣ୍ଡ ମିଳିବ। ଯଦି କୌଣସି ଆର୍ଥିକ କାରବାର ହୁଏ ତେବେ ୩ ବର୍ଷ ଯାଏ ଜେଲ କିମ୍ବା ୧ କୋଟି ଟଙ୍କା ଜରିମାନା କିମ୍ବା ଉଭୟ ଦଣ୍ଡ ମିଳିପାରେ। ଦଣ୍ଡ ପରେ ଯଦି ପୁନର୍ବାର ଅପରାଧ ଘଟାଯାଏ ତେବେ ୩ରୁ ୫ ବର୍ଷ ଜେଲଦଣ୍ଡ ଓ ୨ କୋଟି ଟଙ୍କା ଯାଏ ଜରିମାନା ବ୍ୟବସ୍ଥା ରହିଛି।
ସେପ୍ଟେମ୍ବର ୧୮ରୁ ବିଧାନସଭାର ମୌସୁମୀ ଅଧିବେଶନ
ଭୁବନେଶ୍ବର : ସେପ୍ଟେମ୍ବର ୧୮ରେ ମୌସୁମୀ ଅଧିବେଶନ । ୭ଟି କାର୍ଯ୍ୟଦିବସରେ ଆସିବ ବିଲ ଓ ଉଠିବ ବହୁ ଗୁରୁତ୍ବପୂର୍ଣ୍ଣ ପ୍ରସଙ୍ଗ । ନାରୀ ନିର୍ଯାତନା, ଚାଷୀ ଓ ରାଜ୍ୟ ସ୍ବାର୍ଥ ପ୍ରସଙ୍ଗ ବିଜେଡିର ଅସ୍ତ୍ର । ଅନାସ୍ଥା ଆଣି ସରକାରଙ୍କୁ ଘେରିବ କଂଗ୍ରେସ । କାଉଣ୍ଟର ପାଇଁ ପ୍ରସ୍ତୁତ ହେବ ଶାସକ ଦଳ । ବିଳମ୍ବ ଘଟିଲା, ଭୟ ଦୂର ହେଲା। ସେପ୍ଟେମ୍ବର ୧୮ ତାରିଖରୁ ଆରମ୍ଭ ହେବ ବିଧାନସଭାର ମୌସୁମୀ ଅଧିବେଶନ । ୭ଟି କାର୍ଯ୍ୟଦିବସ ସହ ୨୫ ତାରିଖ ଯାଏ ଚାଲିବ ଅଧିବେଶନ । ସ୍ବଳ୍ପକାଳୀନ ଅଧିବେଶନରେ ସରକାରଙ୍କୁ ଘେରିବାକୁ ଫୁଲ ଦମରେ ତୟାର ମୁଖ୍ୟ ବିରୋଧୀ ବିଜେଡି । ନାରୀ ନିର୍ଯାତନା, ବିପର୍ଯ୍ୟସ୍ତ ଆଇନ ଶୃଙ୍ଖଳା, ଚାଷୀ ସମସ୍ୟା, ପୋଲାଭରମ, ମହାନଦୀ, କୋଟିଆ ଠାରୁ ଆରମ୍ଭ କରି ରାଜ୍ୟ ସ୍ବାର୍ଥ ସମ୍ବଳିତ ବହୁ ପ୍ରସଙ୍ଗକୁ ଗୃହରେ ଉଠାଇ ସରକାରଙ୍କୁ ଜବାବ ମାଗିବ ବିଜେଡି । ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ କହିଛନ୍ତି ୧୪ ମାସରେ ବିଜେପି ସରକାର ବିଫଳତାକୁ ବିଧାନସଭାରେ ଉଠାଇ ବିଜେଡି ଜବାବ ମାଗିବ । କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ ଅଭିଯୋଗ ସରକାର ବିଳମ୍ବରେ ଡାକିଛନ୍ତି ମୌସୁମୀ ଅଧିବେଶନ । ସ୍ଵଳ୍ପ ସମୟର ଅଧିବେଶନ ବସିବ । ଗୃହରେ କଂଗ୍ରେସ ରାଜ୍ୟବାସୀଙ୍କ କଥା ଉଠାଇବ । ଦଳ ଅଭିଯୋଗ କରିଛି ସରକାରଙ୍କ ନିୟନ୍ତ୍ରଣ ବାହାରେ ପ୍ରଶାସନ । ନାରୀ ନିର୍ଯାତନା, ଛାତ୍ରୀ ପୋଡ଼ି, ଚାଷୀ ସମସ୍ୟା , ସୀମା ଓ ଜଳ ସମସ୍ୟାର ଜବାବ ମାଗିବୁ । ଏନେଇ ଆସନ୍ତା ୧୭ ତାରିଖରେ କଂଗ୍ରେସ ବିଧାୟକ ଦଳ ବୈଠକ ବସି ରଣନୀତି ପ୍ରସ୍ତୁତ କରାଯିବ ।
ମୌସୁମୀ ଅଧିବେଶନ ନେଇ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇବା ପରେ ଶାସକ ଓ ବିରୋଧୀ ମୁହାମୁହିଁ ହୋଇଛନ୍ତି । ମୌସୁମୀ ଅଧିବେଶନରେ କଂଗ୍ରେସ ସରକାରଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆଣିବ । ରାଜ୍ୟବାସୀଙ୍କୁ ସୁଶାସନ ଦେବାରେ ବିଜେପି ସରକାର ବିଫଳ ବୋଲି ବରିଷ୍ଠ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି କହିଛନ୍ତି । ବିଜେଡି ବିଧାୟକ ସାରଦା ଜେନା କହିଛନ୍ତି ବିଜେପି ସରକାର ସବୁ କ୍ଷେତ୍ରରେ ବିଫଳ ହୋଇଛି । ଓଡିଶା ଆଗେଇବା ପରିବର୍ତ୍ତେ ପଛେଇ ଯାଇଛି । ଦୁଇ ବିରୋଧୀ ସରକାରଙ୍କୁ ଘେରିବାକୁ ରଣନୀତି କରିବା ପରେ ଜବାବ ଦେଇଛି ଶାସକ ଦଳ । ବିରୋଧୀ ଯେଉଁ ପ୍ରସଙ୍ଗ ଉଠାଇବେ ତାହାକୁ ମୁକାବିଲା କରିବାକୁ ସରକାର ପ୍ରସ୍ତୁତ ବୋଲି କହିଛନ୍ତି ସଂସଦୀୟ ବ୍ଯାପାର ମନ୍ତ୍ରୀ ମୁକେଶ ମହାଲିଙ୍ଗ । ମୌସୁମୀ ସରିଲା ବେଳକୁ ମୌସୁମୀ ଅଧିବେଶନ ପାଇଁ ବିଜ୍ଞପ୍ତି ପ୍ରକାଶ ପାଇଛି । ଯାହାକୁ ନେଇ ଶାସକ ଓ ବିରୋଧୀ ମୁହାମୁହିଁ ହୋଇଛନ୍ତି ।
କାଲି ୫ ଜିଲ୍ଲାରେ ପ୍ରବଳ ବର୍ଷା, ଅରେଞ୍ଜ ଆଲର୍ଟ ଜାରି
ଭୁବନେଶ୍ବର ; ଶ୍ରାବଣ ସରି ଅଧା ହେଲାଣି ଭାଦ୍ରବ । ଲଗାତାର ଦୁଇ ଦୁଇଟି ଲଘୁଚାପ ବି ହେଲା । ହେଲେ ରାଜ୍ୟରେ ବର୍ଷାର ଅଭାବ ଦେଖା ଦେଇଛି । ୭ ଜିଲ୍ଲାରେ ସ୍ଥିତି ଉତ୍କଟ । ଜୁନ୍ ପହିଲାରୁ ଏବେ ସୁଦ୍ଧା ରାଜ୍ୟରେ ହାରାହାରି ୭୬୪.୦ ମିଲିମିଟର ବର୍ଷା ହୋଇଛି ଯାହାକି ସ୍ବାଭାବିକ ବର୍ଷା । ମାତ୍ର ୭ଟି ଜିଲ୍ଲାରେ ବର୍ଷା ପରିମାଣ ନିଅଣ୍ଟିଆ ରହିଛି । କଳାହାଣ୍ଡି ଓ ରାୟଗଡାରେ ସର୍ବାଧିକ ୩୦ ପ୍ରତିଶତ ବର୍ଷା କମ୍ ହୋଇଥିବା ବେଳେ ଗଜପତିରେ ୨୧ ପ୍ରତିଶତ କମ, ବଲାଙ୍ଗୀରରେ ୨୮ ପ୍ରତିଶତ, ପୁରୀରେ ୨୮ ପ୍ରତିଶତ, ଖୋର୍ଦ୍ଧାରେ ୨୧ ପ୍ରତିଶତ ଓ ଯାଜପୁରରେ ୨୧ ପ୍ରତିଶତ କମ୍ ବର୍ଷା ହୋଇଛି । ସାରା ରାଜ୍ୟରେ ଏଯାଏଁ ୬ ପ୍ରତିଶତ କମ୍ ବର୍ଷା ହୋଇଥିବା ପାଣିପାଗ କେନ୍ଦ୍ର ସ୍ବୀକାର କରିଛି । ଏଥିସହ ୨ଟି ଜିଲ୍ଲାରେ ସ୍ବାଭାବିକଠାରୁ ଅଧିକ ଓ ୨୧ ଜିଲ୍ଲାରେ ବର୍ଷା ସ୍ବାଭାବିକ ରେକର୍ଡ ହୋଇଛି । ତେବେ ପାଣିପାଗ ବିଜ୍ଞାନି ଡ. ସୁରେନ୍ଦ୍ର ନାଥ ପଶୁପାଳକ ଏହାର ବୈଜ୍ଞାନିକ କାରଣ ସମ୍ପର୍କରେ କହିଛନ୍ତି । ସୃଷ୍ଟି ହୋଇଥିବା ଦୁଇଟିଯାକ ଲଘୁଚାପ ବ୍ୟାପକ ଅଞ୍ଚଳରେ ବର୍ଷା କରିପାରିନି । ପ୍ରଥମ ଲଘୁଚାପ ଉତ୍ତର ବଙ୍ଗୋପସାଗରରେ ସୃଷ୍ଟି ହୋଇ ଝାଡ଼ଖଣ୍ଡ ଆଡ଼କୁ ଚାଲିଗଲା । ଯେଉଁଥିପାଇଁ ଉତ୍ତର ଓଡ଼ିଶାରେ ଭଲ ବର୍ଷା ହୋଇଛି । ଦ୍ବିତୀୟ ଲଘୁଚାପ ଦକ୍ଷିଣ ବଙ୍ଗୋପସାଗର ହୋଇଥିବାରୁ ଦକ୍ଷିଣ ଓଡ଼ିଶାରେ ପ୍ରବଳ ବର୍ଷା ହେଲା । ଜଳବାୟୁ ପରିବର୍ତ୍ତନ ବି ସ୍ବଳ୍ପ ବୃଷ୍ଟିପାତ ଏକ ବଡ଼ କାରଣ । ମଧ୍ୟପ୍ରାଚ୍ୟ ଓ ଆରବ ସାଗରରେ ତାପମାତ୍ରା ବୃଦ୍ଧି ପାଉଥିବାରୁ ଆର୍ଦ୍ରତା ବଢୁଛି । ବଗତ କିଛି ବର୍ଷ ହେବ ଠିକ୍ ସମୟରେ ବି ମୌସୁମୀ ଆସୁନି । ଯେଉଁଥି ପାଇଁ ଚାଷ ସମୟ, ପଦ୍ଧତି ଓ କିସମରେ ପରିବର୍ତ୍ତନ ଆଣିବାକୁ ସେ ପରାମର୍ଶ ଦେଇଛନ୍ତି ।
ଏପଟେ ଆଜି ବି ରାଜ୍ୟର ବିଭିନ୍ନ ସ୍ଥାନରେ ପ୍ରବଳ ବର୍ଷା ନେଇ ପୂର୍ବାନୁମାନ କରିଛି ପାଣିପାଗ କେନ୍ଦ୍ର । ବରଗଡ଼, ଝାରସୁଗୁଡା, ସମ୍ବଲପୁର,ସୁନ୍ଦରଗଡ଼, କେନ୍ଦୁଝର, ମୟୂରଭଞ୍ଜ, ପୁରୀ, ଖୋର୍ଦ୍ଧା, ନୟାଗଡ଼, ଜଗତସିଂପୁର ଜିଲ୍ଲାରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ଏଥିସହ ଅନ୍ୟ କିଛି ଜିଲ୍ଲାରେ ମଧ୍ୟ ବର୍ଷା ପାଇଁ ୟେଲୋ ୱାର୍ଣ୍ଣିଂ ଜାରି ହୋଇଛି । ସେହିପରି ଆସନ୍ତାକାଲି ପାଇଁ ୫ ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ନେଇ ଅରେଞ୍ଜ ଆଲର୍ଟ ଜାରି ହୋଇଥିବା ବେଳେ ବାକି ୨୫ ଜିଲ୍ଲାରେ ପ୍ରବଳ ବର୍ଷା ସହ ବିଜୁଳି ଘଡ଼ଘଡ଼ି ହେବାର ସମ୍ଭାବନା ନେଇ ୟେଲୋ ୱାର୍ଣ୍ଣିଂ ଜାରି କରାଯାଇଛି । ଆସନ୍ତା ୨୭ ତାରିଖ ପର୍ଯ୍ୟନ୍ତ ରାଜ୍ୟର ବିଭିନ୍ନ ସ୍ଥାନରେ ବର୍ଷା ଲାଗି ରହିବ । ଏହା ପରେ ପାଗରେ ପରିବର୍ତ୍ତନ ହୋଇପାରେ । ସ୍ବଳ୍ପ ବୃଷ୍ଟିପାତ ହୋଇଥିବା ୭ ଜିଲ୍ଲାର ତାଲିକାରେ କୃଷି ପ୍ରଧାନ କଳାହାଣ୍ଡି ଓ ବଲାଙ୍ଗୀର ବି ରହିଛି । ବର୍ଷାର ଲୁଚକାଳି ଯୋଗୁଁ ସେସବୁ ଜିଲ୍ଲାର ଚାଷୀ ପ୍ରଭାବିତ ହେବାର ଆଶଂକା ରହିଛି ।
ବାଟବଣା ଶିଶୁବାଟିକା ଯୋଜନା, ନାହିଁ ଭିତ୍ତିଭୂମି ଓ ଆବଶ୍ୟକ ମାନବସମ୍ବଳ
ଭୁବନେଶ୍ୱର : ବିଶେଷଜ୍ଞଙ୍କ ସହ ଆଲୋଚନା ନ କରି ସ୍କୁଲଗୁଡିକରେ ଖୋଲିଚାଲିଲେ ଶିଶୁ ବାଟିକା। ପ୍ରାଥମିକ ଶିକ୍ଷକମାନେ ଶିଶୁ ବାଟିକା ପିଲାଙ୍କୁ ପଢ଼ାଇ ପାରିବେ ନାହିଁ ବୋଲି କହିବା ପରେ ଏବେ ଶିଶୁ ସେବିକା ନିଯୁକ୍ତି ହେଉଛନ୍ତି। ଏହାକୁ ଜୋରଦାର ବିରୋଧ କରିଛି ପ୍ରାକ ପ୍ରାଥମିକ ଆଶାୟୀ ଶିକ୍ଷକ ସଂଘ। ଜାତୀୟ ଶିକ୍ଷା ନୀତି ଅନୁଯାୟୀ ଶିଶୁ ବାଟିକାରେ ପଢ଼ାଇବା ପାଇଁ ଡିଇସିଇ, ଇସିସିଇ ବା ଏନଟିଟି ଭଳି ସ୍ୱତନ୍ତ୍ର ତାଲିମପ୍ରାପ୍ତ ଶିକ୍ଷା ଆବଶ୍ୟକ। ଏହି ଶିକ୍ଷା ଗ୍ରହଣ କରି ଓଡ଼ିଶାରେ ହଜାର ହଜାର ତାଲିମପ୍ରାପ୍ତ ପ୍ରାକ ପ୍ରାଥମିକ ଶିକ୍ଷକ ବେକାର ବସିଛନ୍ତି। କିନ୍ତୁ ସେମାନଙ୍କୁ ଶିଶୁ ବାଟିକା ପାଇଁ ନିଯୁକ୍ତି ନ ଦେଇ ଶିଶୁ ସେବିକା ନିଯୁକ୍ତି ଦେଲେ ଲାଭ କଣ ବୋଲି ପ୍ରଶ୍ନ କରିଛନ୍ତି ଆଶାୟୀ। ଏହା ସରକାରଙ୍କ କି ପ୍ରକାର ନୀତି ବୋଲି ପ୍ରଶ୍ନ କରିବା ସହ ରାଜ୍ୟର ଶିକ୍ଷାକୁ ଏହା କେଉଁ ସ୍ତରକୁ ନେବ ତାହା ଜଣାପଡୁଛି ବୋଲି ସେମାନେ କହିଛନ୍ତି।
ଓଡିଶା ଅଭିଭାବକ ମହାସଂଘ ରାଜ୍ୟ ସରକାରଙ୍କ ଏଭଳି ଦିଶାହୀନ ନୀତିକୁ କଡା ସମାଲୋଚନା କରିଛି। ପ୍ରାକ ପ୍ରାଥମିକ ପିଲାଙ୍କୁ ଯେଉଁମାନେ ଶିକ୍ଷା ଦେବା ପାଇଁ ତାଲିମପ୍ରାପ୍ତ ସେମାନଙ୍କୁ ନିଯୁକ୍ତି ଦିଆଯାଉନି। ତେଣେ ଯେଉଁମାନେ ସହଯୋଗୀ ହେବା କଥା ତାଙ୍କୁ ନିଯୁକ୍ତି ଦେଲେ କଣ ଲାଭ ହେବ ବୋଲି ପ୍ରଶ୍ନ କରିଛି ମହାସଂଘ। କେବଳ ଜାତୀୟ ଶିକ୍ଷା ନୀତି ଲାଗୁ ନ କରି ସେଥିରେ ଥିବା ନିୟମାବଳୀକୁ ପାଳନ କରିବାକୁ ଦାବି ହୋଇଛି। ସେପଟେ ଶାସକ ଦଳ ଏ କଥାକୁ ଗ୍ରହଣ କରିଛି। ପ୍ରଥମେ ପଢ଼ାଇବା ପାଇଁ ଶିକ୍ଷକ ନିଯୁକ୍ତି ଓ ପରେ ଶିଶୁ ସେବିକା ନିଯୁକ୍ତ ହେବା କଥା ବୋଲି ସ୍ୱୀକାର କରିଛି ଶାସକ ଦଳ।ରାଜ୍ୟରେ ଭିତ୍ତିଭୂମି ଓ ଆବଶ୍ୟକ ମାନବସମ୍ବଳ ନାହିଁ। ହେଲେ ମନଇଚ୍ଛା ଲାଗୁ ହୋଇଛି ଜାତୀୟ ଶିକ୍ଷାନୀତି। ଏହାକୁ ନେଇ ଜାରି ରହିଛି ଅସନ୍ତୋଷ।
ସତ ମାନିଲେ ସରକାର, ଏଫସିଆଇରେ ଅଛି ସମସ୍ୟା
ଭୁବନେଶ୍ବର : ସତ ମାନିଲେ ସରକାର। ବିରୋଧୀ ଦଳରେ ଥିବା ବେଳେ ଯେଉଁ ସମସ୍ୟାକୁ ମାନୁନଥିଲେ, କ୍ଷମତାକୁ ଆସିବା ପରେ ତାହାକୁ ମାନିନେଲେ। ଚାଉଳ ଉଠାଉନାହିଁ ଏଫସିଆଇ। ଗୋଦାମରେ ଧାନ ପଡ଼ିବା ସହ ଖରିଫ ଫସଲ ପାଇଁ ସମସ୍ୟା ସୃଷ୍ଟି ହେଉଛି। କେନ୍ଦ୍ରମନ୍ତ୍ରୀଙ୍କୁ ରାଜସ୍ବ ମନ୍ତ୍ରୀ ସୁରେଶ ପୂଜାରୀ ଦିଲ୍ଲୀରେ ଭେଟି ଆଲୋଚନା କରିବା ପରେ ଏଫସିଆଇ ସମସ୍ୟା କଥାକୁ ମାନିଛନ୍ତି। ମନ୍ତ୍ରୀ କହିଛନ୍ତି, ଖରିଫ ଋତୁରେ ଧାନ ମିଲ ଗୋଦାମ ଖାଲି ନହେଲେ ଅସୁବିଧା ହେବ। ଏଫସିଆଇ ପାଇଁ ଧାନ ଉଠାଣରେ ସମସ୍ୟା ଦେଖାଦେବ। ଓଡ଼ିଶାରୁ କିପରି ଏଫସିଆଇ ଚାଉଳ ନେବ ତାହା ଉପରେ କରାଯାଇଛି ଆଲୋଚନା। ସେପଟେ ବିଜେଡି ବିଧାୟକ ପ୍ରତାପ ଦେବ କହିଛନ୍ତି, ଯେଉଁମାନେ ବିରୋଧୀରେ ଥିଲେ ସେମାନେ ଏବେ ସରକାରରେ। କ୍ଷମତାକୁ ଆସିବା ପରେ ଏଫସିଆଇରେ ସମସ୍ୟା ଅଛି ବୋଲି ମାନୁଛନ୍ତି। ୧ କୋଟି ଲକ୍ଷ ମେଟ୍ରିକ ଟନ ଚାଉଳ କିଣିବା ପାଇଁ ଚୁକ୍ତି ହୋଇଥିଲା। କିନ୍ତୁ ଚାଉଳ ଉଠାଇଲା ବେଳକୁ ଟାଳଟୁଳ ନୀତି ଅବଲମ୍ବନ ହେଉଛି। ଯାହାକୁ ନିଜେ ମାନିଛନ୍ତି ମନ୍ତ୍ରୀ। ଏହାସହ ଗୋଦାମ ଫୁଲ ରହୁଥିବାରୁ ଅଧିକାଂଶ ମିଲରେ ପଡି ରହୁଛି ଚାଉଳ। ସେହିପରି ଇନପୁଟ ସବସିଡି ବଢ଼ାଇବା ପରେ ଅନ୍ୟ ଫସଲ ପ୍ରତି ଚାଷୀଙ୍କର ଆଗ୍ରହ କମୁଛି ବୋଲି କହିଛନ୍ତି ରାଜସ୍ବ ମନ୍ତ୍ରୀ। ଯାହା ସରକାରଙ୍କୁ ଅଡୁଆରେ ପକାଇଛି।
ଏଫସିଆଇରେ ସମସ୍ୟା ଥିବା କଥା ରାଜସ୍ବ ମନ୍ତ୍ରୀ ମାନିବା ପରେ କଂଗ୍ରେସ ମଧ୍ୟ ସରକାରଙ୍କୁ ଟାର୍ଗେଟ କରିଛି। ବରିଷ୍ଠ କଂଗ୍ରେସ ବିଧାୟକ ତାରା ପ୍ରସାଦ ବାହୀନିପତି କହିଛନ୍ତି, ଏଫସିଆଇ ଚାଉଳ ଉଠାଉନଥିବା କଥାକୁ ମନ୍ତ୍ରୀ ସ୍ବୀକାର କରିଥିବାରୁ ଧନ୍ୟବାଦ। ଚାଉଳ ଉଠା ଯାଉନଥିବାରୁ ମିଲରେ ଚାଉଳ ପଡ଼ି ରହିଛି। ଅନ୍ୟପଟେ ସମସ୍ୟାର ତୁରନ୍ତ ସମାଧାନ କରିବାକୁ ଦାବି କରିଛି ବିଜେଡି। ଧାନରେ ସରକାର ସବସିଡି ଦେବା ପରେ ତେଜିଛି ରାଜନୀତି । ଇନପୁଟ ସହାୟତା ପାଇଁ ଚାଷୀମାନେ କେବଳ ଧାନ ଚାଷ ସହ ଅନ୍ୟ ଚାଷ ପ୍ରତି ଆଗ୍ରହ ପ୍ରକାଶ କରୁନାହାନ୍ତି। ଯାହା ଏବେ ରାଜ୍ୟ ସରକାରଙ୍କ ପାଇଁ ନୂଆ ସମସ୍ୟା ସୃଷ୍ଟି କରିଛି।
ତୃଟିପୂର୍ଣ୍ଣ ବ୍ୟବସ୍ଥା ବଢାଉଛି ହାତୀ ମଣିଷ ଲଢେଇ, ସଂଘର୍ଷରେ ଯାଉଛି ଉଭୟଙ୍କ ଜୀବନ
ଭୁବନେଶ୍ୱର ; ତୃଟିପୂର୍ଣ୍ଣ ବ୍ୟବସ୍ଥା ବଢାଉଛି ହାତୀ ମଣିଷ ଲଢେଇ । ସଂଘର୍ଷରେ ଟଳିପଡୁଛନ୍ତି ହାତୀ, ବର୍ତ୍ତି ପାରୁନାହାନ୍ତି ଲୋକ । ଡ୍ରାଇଭିଂ ଆଉଟ ଅପରେସନ ଦ୍ୱାରା ହିଂସ୍ର ହେଉଛନ୍ତି ଗଜରାଜ । ହାତୀ ଯେତିକି ବିଶାଳକାୟ ସେତିକି ବୁଦ୍ଧିଆ । ମଣିଷର ବ୍ୟବହାର ବି ହାତୀ ଜାଣେ । ଫଳରେ ହାତୀର ମାନସିକତାକୁ ପ୍ରଭାବିତ କରଯାଉଥିବାରୁ ହାତୀ ଆକ୍ରମଣରେ ମଣିଷଙ୍କ ଜୀବନ ଯାଉଛି ବୋଲି କହିଛନ୍ତି ବିଶେଷଜ୍ଞ। ହାତୀ ପଲଙ୍କୁ ଘଉଡ଼ାଇବାକୁ ଯେଉଁ ପଦ୍ଧତି ଜଙ୍ଗଲ ବିଭାଗ ପକ୍ଷରୁ ଗ୍ରହଣ କରାଯାଉଛି ତାହା ହିଁ ହାତୀ-ମଣିଷ ଯୁଦ୍ଧର କାରଣ ସାଜୁଛି । ତେଣୁ ଏହି ନୀତିରେ ତୁରନ୍ତ ପରିବର୍ତ୍ତନ ଆବଶ୍ୟକ ବୋଲି କୁହାଯାଇଛି। ଏଥିସହିତ ହାତୀ କରିଡର ମଧ୍ୟ ଆଉ ଏକ ପ୍ରମୁଖ କାରଣ । ବିଭିନ୍ନ ସ୍ଥାନକୁ ମାଇଗ୍ରେଟ କରନ୍ତି ହାତୀପଲ। ତେଣୁ ସରକାର ଅଞ୍ଚଳ ଚିହ୍ନଟ କରି କରିଡର ସୁରକ୍ଷିତ ରଖନ୍ତୁ । ଏଥିସହିତ ସରକାରଙ୍କ ବିଭିନ୍ନ ବିଭାଗ ମଧ୍ୟରେ ସମନ୍ୱୟ ରହୁନି । ଯେଉଁଥିପାଇଁ ହାତୀ ମୃତ୍ୟୁ ବଢୁଛି । ସେଥିପାଇଁ ଗୁରୁତ୍ବପୂର୍ଣ୍ଣ ପଦକ୍ଷେପ ନେବା ଆବଶ୍ୟକ ହୋଇପଡିଛି । ଭୁବନେଶ୍ୱରରେ ଅନୁଷ୍ଠିତ ମଣିଷ-ହାତୀ ସହାବସ୍ଥାନ, ଆହ୍ୱାନ ଓ ଭବିଷ୍ୟତ ପନ୍ଥାକୁ ନେଇ ଅନ୍ତର୍ଜାତୀୟ କର୍ମଶାଳାରେ ଚିନ୍ତା ପ୍ରକଟ କରିଛନ୍ତି ବିଶେଷଜ୍ଞ । ଅନ୍ତର୍ଜାତୀୟ ସ୍ତରର ବିଶେଷଜ୍ଞ ମଧ୍ୟ ହାତୀ ମଣିଷ ମଧ୍ୟରେ ସମ୍ପର୍କକୁ ନେଇ ଭିନ୍ନ ଭିନ୍ନ ମଡେଲ ଉପସ୍ଥାପନ କରିଛନ୍ତି।
ହାତୀଙ୍କ ରହଣିସ୍ଥଳ ଜଙ୍ଗଲକୁ ଅତି ନିଷ୍ଠୁର ଭାବେ କଟାଯାଉଛି । ତେଣୁ ହାତୀ ମଣିଷ ଲଢେଇ ବଢୁଥିବା କହିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ହାତୀର ସୁରକ୍ଷା ଜରୁରୀ ବୋଲି କହିବା ସହ ଶିମିଳିପାଳ, ଢେଙ୍କାନାଳ, କେନ୍ଦୁଝରରେ ଓ ଅନ୍ୟ ଅଞ୍ଚଳରେ ଡେଡିକେଟେଡ କରିଡର ଓ ଜଳାଶୟ କରାଯିବ । ଜଙ୍ଗଲରୁ ହାତୀ କିଭଳି ଆସିବେ ନାହିଁ ସେଥିପାଇଁ ଜଙ୍ଗଲରେ ଖାଦ୍ୟ ଓ ପାଣିର ବ୍ୟବସ୍ଥା ହେବ। ଜଙ୍ଗଲ ଭିତରେ ଧାନ ଚାଷ ହେବ । ଯାହାକୁ ହାତୀ ସହଜରେ ଖାଇପାରିବେ । ଖୁବ ଶୀଘ୍ର ରିପୋର୍ଟ ପ୍ରସ୍ତୁତ କରି ପଲିସି ଅଣାଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି । ସେପଟେ ଜଙ୍ଗଲ ପରିବେଶ ମନ୍ତ୍ରୀଙ୍କ କହିବା କଥା କଟିଙ୍ଗ ଏଜ ଟେକ୍ନୋଲୋଜି ବ୍ୟବହାର କରାଯାଉଛି । ଏହି ଆଧାରରେ ହାତୀ ମୃତ୍ୟୁ ପାଇଁ ବ୍ୟକ୍ତି କିମ୍ବା ବିଭାଗ ଦାୟୀ ରହିଲେ କଡ଼ା କାର୍ଯ୍ୟାନୁଷ୍ଠାନ ନିଆଯିବ । ମଣିଷ ହାତୀ ଲଢେଇ ବନ୍ଦ ପାଇଁ ଆଞ୍ଚଳିକ ଡିପିଆର ପ୍ରସ୍ତୁତ ହେବ । ବିଭିନ୍ନ ଅଞ୍ଚଳର ଭୌଗୋଳିକ ସ୍ଥିତି ସମ୍ପର୍କରେ ଆଲୋଚନା ହେବା ସହ ସମାଧାନ ବାଟ କଢାଯିବ । ଢେଙ୍କାନାଳ, ଅନୁଗୁଳ, କେନ୍ଦୁଝର ଅଂଚଳରେ ହାତୀ ଅଧିକ କ୍ଷତି କରୁଛନ୍ତି। ତେଣୁ ସହାବସ୍ଥାନକୁ ନେଇ ଅନ୍ତର୍ଜାତୀୟ ଓ ଜାତୀୟ ସ୍ତରର ବିଶେଷଜ୍ଞ ତଥା ଅନ୍ୟାନ୍ୟ ଅଂଶୀଦାରଙ୍କ ମିଳିତ ଆଲୋଚନା ପରେ ରାଜ୍ୟରେ ଏକ ବଡ଼ ପଲିସି ଆସିବ ବୋଲି କୁହାଯାଇଛି।
କଟକ ସହରରେ ଗଣେଶ ପୂଜା ଓ ଦୁର୍ଗା ପୂଜା ପାଇଁ ଆରମ୍ଭ ହୋଇ ଗଲାଣି ପ୍ରସ୍ତୁତି
କଟକ ; ଆଦ୍ୟପୂଜ୍ୟଙ୍କ ଆବାହନ ପରେ ଉତ୍ସବମୁଖର ହେବ ସହର । କଟକ ସହରରେ ଗଣେଶ ପୂଜା ଓ ଦୁର୍ଗା ପୂଜା ପାଇଁ ଆରମ୍ଭ ହୋଇ ଗଲାଣି ପ୍ରସ୍ତୁତି । ବିଭିନ୍ନ ମଣ୍ଡପରେ ମୂର୍ତ୍ତି ସହ ମେଢ ନିର୍ମାଣ ଜୋରସୋର ଆଗେଇ ଚାଲିଛି । ସେପଟେ ପୂଜା ପୂର୍ବରୁ ପ୍ରଶାସନିକ ସ୍ତରରେ ମଧ୍ଯ କରାଯାଇଛି ପ୍ରସ୍ତୁତି । ପୂଜା ପରେ ମୂର୍ତ୍ତି ସବୁ କାଠଯୋଡ଼ିରେ ବିସର୍ଜନ କରାଯିବ । ଏଥିପାଇଁ କଟକ ମେୟର ସୁବାସ ସିଂ, ପୂଜା କମିଟି ସଭାପତି, ସଂପାଦକ ଓ ସଦସ୍ଯମାନେ ଅନ୍ୟ ବିଭାଗୀୟ ଅଧିକାରୀଙ୍କୁ ଧରି କାଠଯୋଡି ନଦୀର ଦେବୀ ଗଡା ପରିଦର୍ଶନ କରି ସ୍ଥିତି ସମୀକ୍ଷା କରିଛନ୍ତି । ଦେବୀ ଗଡାରେ ଦୁଇଟି ଅସ୍ଥାୟୀ ପୁଷ୍କରିଣୀ ସହ ଦୁଇଟି ସ୍ଥାୟୀ ପୁଷ୍କରଣୀ ନିର୍ମାଣ କରିବାକୁ ମେୟର ପ୍ରସ୍ତାବ ଦେଇଛନ୍ତି । ଏହାସହ ପୁଷ୍କରଣୀକୁ ଅନବରତ ପାଣି ଯୋଗାଇବା ପାଇଁ ସ୍ଥାୟୀ ବ୍ୟବସ୍ଥା କରିବାକୁ ପ୍ରସ୍ତାବ ମଧ୍ଯ ଦିଆ ଯାଇଛି ।
ଦେବୀଗଡାର ରାସ୍ତାକୁ ମରାମତି କରିବା ଓ ଅଳିଆ ସଫାର ସବୁ ବ୍ୟବସ୍ଥା କରାଯିବ ବୋଲି ମେୟର କହିଛନ୍ତି । ସେହିପରି ଏଠାରେ ଅଳିଆ ପକାଉଥିବା ଲୋକଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ମେୟର କହିଛନ୍ତି । ଅନ୍ଯ ପକ୍ଷରେ ପିଇବା ପାଣି ଓ ଆଲୋକର ସମସ୍ତ ବ୍ୟବସ୍ଥା କରିବାକୁ ବିଭାଗୀୟ ଅଧିକାରୀଙ୍କୁ ପରାମର୍ଶ ଦେଇଛନ୍ତି ମେୟର । ଆସନ୍ତା ବୁଧବାର ଗଣେଶ ପୂଜା । ଅଗଷ୍ଟ ୩୦ ସେପ୍ଟେମ୍ବର ୭ ଓ ୧୪ ତାରିଖରେ ହେବ ଭସାଣ । ଅକ୍ଟୋବର ୩ ତାରିଖରେ ଦୁର୍ଗା ପୂଜା ଭସାଣ ଅନୁଷ୍ଠିତ ହେବ । ଏହାକୁ ଦୃଷ୍ଟିରେ ରଖି ପ୍ରସ୍ତୁତି ଜୋରଦାର କରାଯାଇଛି ।
NAC ଘୋଷଣା ତାଲିକାରେ ଉପେକ୍ଷା, ଯୋଗ୍ୟତା ଥାଇ ତାଲିକାରୁ ବାଦ ଦେଇଥିବାରୁ ତେଜିଲା ଆନ୍ଦୋଳନ
ନନ୍ଦିଘୋଷ ବ୍ୟୁରୋ ; NAC ଘୋଷଣା ତାଲିକାରେ ଉପେକ୍ଷା । ଯୋଗ୍ଯତା ଥାଇ ସୁଦ୍ଧା କରାଯାଉଛି ଅଣଦେଖା । ପ୍ରତିବାଦରେ ଆନ୍ଦୋଳନକୁ ଓହ୍ଲାଇଲେ ଲୋକେ । ଆଜି ବଲାଙ୍ଗୀର ଜିଲ୍ଲା ପାଟଣାଗଡ଼ ନିର୍ବାଚନମଣ୍ଡଳୀ ଅନ୍ତର୍ଗତ ବେଲପଡ଼ାକୁ NAC ଘୋଷଣା ଦାବିରେ ୧୨ ଘଣ୍ଟିଆ ବନ୍ଦ ପାଳନ କରାଯାଇଛି । ଫଳରେ ସହର ଦୋକାନ ବଜାର, ଅଖ ଚକ, ସରକାରୀ ଓ ବେସରକାରୀ ଅନୁଷ୍ଠାନ ବନ୍ଦ ରହିଥିଲା । ଲୋକେ ସ୍ବତଃ ଏହି ବନ୍ଦକୁ ନିଜର ସମର୍ଥନ ଜଣାଇଥିଲେ । ସେପଟେ ରେଢାଖୋଲରେ ବିଭିନ୍ନ ସମସ୍ଯା ନେଇ ଆସନ୍ତାକାଲି ବନ୍ଦ ଡାକରା ଦେଇଛି ରେଢାଖୋଲ ବିଜେଡି । ଏହି ବନ୍ଦ ଡାକରାରେ ଜରୁରୀକାଳୀନ ସେବାକୁ ଛାଡି ଦେଲେ ସମ୍ପୂର୍ଣ୍ଣ ବନ୍ଦ ହେବ ବୋଲି ରେଢ଼ାଖୋଲ ବିଜେଡି ବିଧାୟକ ପ୍ରସନ୍ନ ଆଚାର୍ଯ୍ଯ ପ୍ରେସମିଟ କରି ସୂଚନା ଦେଇଛନ୍ତି ।
କୋରାପୁଟ ଜିଲ୍ଲା ବୋରିଗୁମ୍ମାକୁ NAC ଘୋଷଣାରେ ଉପେକ୍ଷା କରାଯାଇଥିବା ଅଭିଯୋଗ ହୋଇଛି । ଅବିଭକ୍ତ କୋରାପୁଟ ଜିଲ୍ଲାର କେନ୍ଦ୍ର ବୋରିଗୁମ୍ମା । ବୋରିଗୁମ୍ମା ସଂଯୋଗ କଲେ ହିଁ ଜାତୀୟ ରାଜପତ ଦେଇ ପଡୋଶୀ ଛତିଶଗଡ ଓ ଆନ୍ଧ୍ର ସହିତ ପଶ୍ଚିମ ଓଡିଶା ଯୋଗାଯୋଗ ହୋଇପାରିବ । ସହରର ଜନ ସଂଖ୍ଯା ୨୫ ହଜାରରୁ ଅଧିକ । ଭୋଟରଙ୍କ ସଂଖ୍ଯା ପ୍ରାୟ ୨୦ ହଜାର । ଏନଏସି ପାଇଁ ସମସ୍ତ ଯୋଗ୍ୟତା ଥିଲେ ବି ଏହାକୁ ଅଣଦେଖା କରାଯାଇଥିବା ପ୍ରତିବାଦରେ ଆସନ୍ତାକାଲି ୧୨ଘଣ୍ଟିଆ ବନ୍ଦ ପାଳନ କରାଯିବ ବୋଲି ଘୋଷଣା କରାଯାଇଛି । ସେପଟେ ଚଣ୍ଡୀଖୋଲକୁ NAC ଦାବିରେ ଆନ୍ଦୋଳନକୁ ଓହ୍ଲାଇବ ବଡ଼ଚଣା ବିଜେଡି । ବଡ଼ଚଣା ବିଜେଡି ପକ୍ଷରୁ ଚଣ୍ଡୀଖୋଲ ଛକରେ ଗଣଧାରଣା ଓ ପ୍ରତିବାଦ କରାଯିବ। ଏ ନେଇ ସାମ୍ବାଦିକ ସମ୍ମିଳନୀରେ ବଡ଼ଚଣା ବିଜେଡି ପକ୍ଷରୁ ସୂଚନା ଦିଆଯାଇଛି। ରାଜ୍ୟରେ ନୂଆ ୧୨ଟି NAC ନେଇ ସରକାର ଘୋଷଣା କରିଥିବାବେଳେ ଏହି ତାଲିକାରୁ ଯୋଗ୍ଯ ଜିଲ୍ଲା ବାଦ ପଡ଼ିଥିବା ଅଭିଯୋଗ ହୋଇଛି ।
ଦିନକୁ ଦିନ ଯୁବପୀଢିଙ୍କ ଭିତରେ ବଢୁଛି ଆତ୍ମହତ୍ୟା ପ୍ରବଣତା, କେଉଁ ପରିସ୍ଥିତିରେ ନେଉଛନ୍ତି ଚରମ ପଦକ୍ଷେପ ?
ଭୁବନେଶ୍ବର : କାହିଁକି ବଢୁଛି ଆତ୍ମହତ୍ଯା ପ୍ରବଣତା ? କେଉଁ ପରିସ୍ଥିତିରେ ଚରମ ପଦକ୍ଷେପ ନେଉଛନ୍ତି ଯୁବପୀଢି ? ମାନସିକ ଦୁଶ୍ଚିନ୍ତା ନା ସୋସିଆଲ ମିଡ଼ିଆ ପ୍ରଭାବ ? ଏପରି ବିଭିନ୍ନ ପ୍ରସଙ୍ଗକୁ ନେଇ ଆରମ୍ଭ ହୋଇଛି ମାନସମନ୍ଥନ । ଦିନକୁ ଦିନ ବଢି ଚାଲିଛି ଆତ୍ମହତ୍ୟା । କେଉଁଠି କଲେଜରେ ଶିକ୍ଷକଙ୍କ ଠାରୁ ଶୋଷିତ ହୋଇ ଛାତ୍ରୀ ଆତ୍ମହତ୍ୟା କରୁଛି ତ ପୁଣି କେଉଁଠି ପୋଲିସ ଠାରୁ ନ୍ୟାୟ ନପାଇ ଜୀବନ ଦେଉଛି । ପୁଣି କିଏ ମାନସିକ ଦୁଶ୍ଚିନ୍ତାର ଶିକାର ହୋଇ ନେଉଛି ଚରମ ପଦକ୍ଷେପ । ସୋସିଆଲ ମିଡ଼ିଆରେ ନିଜ ଶାଢିରେ ନିଆଁ ଲଗାଇ କରୁଛନ୍ତି ରିଲ୍ସ । ଯାହାକୁ ନେଇ ଉଦବେଗ ପ୍ରକାଶ କରିଛନ୍ତି ବିଭିନ୍ନ ସମାଜସେବୀ । କେମିତି ଏଭଳି ଘଟଣାକୁ ରୋକା ଯାଇପାରିବ, ପରିବାର, ଓ ସରକାରଙ୍କ କଣ ରହିଛି ଦାୟିତ୍ଵ, ଏନେଇ ହୋଇଛି ବିସ୍ତୃତ ଆଲୋଚନା । ପୂର୍ବତନ ପ୍ରାଶାସନିକ ଅଧିକାରୀ, ପୂର୍ବତନ ପୋଲିସ ଅଧିକାରୀମାନଙ୍କ ସହିତ ବିଭିନ୍ନ ସାମାଜିକ ସଂଗଠନ ଯୋଗ ଦେଇ କରିଛନ୍ତି ମାନସ ମନ୍ଥନ ।
ଏଭଳି ସମ୍ବେଦନଶୀଳ ଘଟଣାକୁ ଯେଉଁଭଳି ଭାବରେ ସୋସିଆଲ ମିଡିଆରେ ଦେଖାଯାଉଛି ତାହା ଅନ୍ଯମାନଙ୍କୁ ପ୍ରଭାବିତ କରୁଛି । କିପରେ ଏହାକୁ ଆଗାମୀ ଦିନରେ ରୋକ ଯାଇ ପାରିବ, ସେଦିଗରେ କାହାର କେଉଁଭଳି ଭବରେ ଭୂମିକା ରହିବା ଆବଶ୍ୟକତା ରହିଛି ସେ ଦିଗରେ ଆଲୋଚନା କରାଯାଇଛି । ଏନେଇ ବ୍ଯାପକ ସଚେତନ ସହ ସାମାଜିକ ଗଣମାଧ୍ୟମରେ ଅଙ୍କୁଶ ଲଗାଇବାର ଆବଶ୍ଯକତା ରହିଛି । ଏନେଇ ସରକାର ମଧ୍ଯ ଠୋସ ପଦକ୍ଷେପ ନେବା ଉଚିତ ବୋଲି କହିଛନ୍ତି ସମାଜସେବୀ । ଆଲୋଚନାଚକ୍ରରେ ବିଭିନ୍ନ ସଂଗଠନ ସହ ରାଜ୍ଯ ମବରିଷ୍ଠ ନାଗରିକ, ଅବସରପ୍ରାପ୍ତ କର୍ମଚାରୀ, ଅଭିଭାବକମାନେ ସାମିଲ ହୋଇଥିଲେ ।
ବ୍ରହ୍ମପୁର ବିଶ୍ବବିଦ୍ୟାଳୟ କ୍ୟାମ୍ପସରେ ଅଣଛାତ୍ରଙ୍କ ଗୁଣ୍ଡାରାଜ
ବ୍ରହ୍ମପୁର : ଛାତ୍ରସଂସଦ ନିର୍ବାଚନ ପୂର୍ବରୁ ପତିଆରା ଜାହିର ପାଇଁ ଉଦ୍ଯମ । ଭଞ୍ଜବିହାର କ୍ୟାମ୍ପସରେ ଅଣଛାତ୍ରଙ୍କ ଗୁଣ୍ଡାରାଜ । ଅଣଛାତ୍ରଙ୍କ ଆକ୍ରମଣରେ ବିଶ୍ବବିଦ୍ୟାଳୟର ଜଣେ ଛାତ୍ର ଲହୁଲୁହାଣ । ଆହତ ଛାତ୍ର ବ୍ରହ୍ମପୁର ସିଟି ହସ୍ପିଟାଲରେ ଭର୍ତ୍ତି । ବ୍ୟାପକ ପୋଲିସ ମୁତୟନ । କୁଳପତି ଡାକିଲେ ଶୃଙ୍ଖଳାଗତ ବୈଠକ । ନୂଆଖାଇ ପାଇଁ ଗତକାଲି ଭଞ୍ଜବିହାର ପରିସରରେ ବିଦ୍ୟାର୍ଥୀଙ୍କ ପକ୍ଷରୁ ଏକ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଇଥିଲା । କ୍ୟାମ୍ପସ୍ ଭିତରେ କିଛି ନିର୍ଦ୍ଦିଷ୍ଟ ରାଜନୈତିକ ଦଳର ଅଣଛାତ୍ର ବିନା ଅନୁମତିରେ ପ୍ରବେଶ କରିବା ସହ ଅପ୍ରୀତିକର ପରିସ୍ଥିତି ସୃଷ୍ଟି କରିଥିଲେ । ଛାତ୍ରମାନେ ଏହାକୁ ବିରୋଧ କରିବାରୁ ସୃଷ୍ଟି ହୋଇଥିଲା ଗଣ୍ଡଗୋଳ । ଅଣଛାତ୍ରଙ୍କ ଆକ୍ରମଣରେ ସାମ୍ବାଦିକତା ଓ ଗଣଯୋଗାଯୋଗ ବିଭାଗର ଦ୍ବିତୀୟ ବର୍ଷର ଛାତ୍ର ଅଭିଳାଷ ମିଶ୍ର ଆହତ ହୋଇଛନ୍ତି । ୧୦ରୁ ୧୨ ଜଣ ଅଣଛାତ୍ର ବିଭିନ୍ନ ମାରଣାସ୍ତ୍ରରେ ଆକ୍ରମଣ କରିଥିବା ଅଭିଯୋଗ ହୋଇଛି ।
କିଛି ଛାତ୍ର ରାତିରେ ଗୋପାଳପୁର ଥାନାରେ ଅଭିଯୋଗ ଦେବାକୁ ଯାଇଥିବା ବେଳେ ଥାନାରେ ସେମାନଙ୍କୁ କିଛି ଯୁବକ ଧମକ ଚମକ ଦେଇଥିଲେ । ପ୍ରତିବାଦରେ ସାନଖେମୁଣ୍ଡି ବିଧାୟକ ରମେଶ ଜେନାଙ୍କ ସମେତ ଶହ ଶହ ସମର୍ଥକ ଥାନା ଆଗରେ ଧାରଣା ଦେଇଥିଲେ । ତୁରନ୍ତ ଅଭିଯୁକ୍ତଙ୍କୁ ଗିରଫ କରିବାକୁ ଦାବି କରିଥିଲେ । ସ୍ଥିତି ଉତ୍ତେଜନପୂର୍ଣ୍ଣ ଥିବାରୁ ବିଶ୍ୱବିଦ୍ୟାଳୟରେ ଦୁଇ ପ୍ଲାଟୁନ ପୋଲିସ ମୁତୟନ କରାଯାଇଛି । ସେପଟେ ସ୍ଥିତିକୁ ନିୟନ୍ତ୍ରଣକୁ ଆଣିବାକୁ ବିଶ୍ୱବିଦ୍ୟାଳୟ କୁଳପତିଙ୍କ ଅଧ୍ୟକ୍ଷତାରେ ବିଭିନ୍ନ ବିଭାଗୀୟ ମୁଖ୍ୟଙ୍କ ସହ ଶୃଙ୍ଖଳାଗତ ବୈଠକ କରି ପଦକ୍ଷେପ ନିଆଯାଇଛି । ସବୁ ହଷ୍ଟେଲରେ ଆଜିଠାରୁ ହେବ କଡା ଦଦାରଖ କରାଯିବ ବୋଲି କହିଛନ୍ତି କୁଳପତି । କୌଣସି ଅପ୍ରିତିକର ପରିସ୍ଥିତିକୁ ନଜରେ ରଖି ବିଶ୍ବବିଦ୍ୟାଳୟ ପରିସରରେ କଡ଼ା ନଜର ରଖାଯାଇଛି ।