ଆସନ୍ତାକାଲି ପୁଣି ଖୋଲିବ ହୀରାକୁଦ। ଉପର ମୁଣ୍ଡରେ ପ୍ରବଳ ବର୍ଷା ଯୋଗୁଁ ବଢୁଛି ହୀରାକୁଦ ଜଳଭଣ୍ଡାର ଜଳସ୍ତର। ପ୍ରବଳ ବର୍ଷାକୁ ନଜରରେ ରଖି ସତର୍କତା ଜାରି। ସତର୍କ ସୂଚନା ଜାରି କରିଛନ୍ତି ହୀରାକୁଦ ବନ୍ଧ କର୍ତ୍ତୃପକ୍ଷ। ମହାନଦୀ ଭିତରକୁ ନ ଯିବାପାଇଁ ସତର୍କ ସୂଚନା ଜାରି କରିଛନ୍ତି ହୀରାକୁଦ ବନ୍ଧ କର୍ତ୍ତୃପକ୍ଷ।
ଆଇନରେ ପରିଣତ ହେଲା ଅନଲାଇନ ଗେମିଂ ବିଲ୍
ଆଇନରେ ପରିଣତ ହେଲା ଅନଲାଇନ ଗେମିଂ ବିଲ୍। ରାଷ୍ଟ୍ରପତିଙ୍କ ସ୍ଵାକ୍ଷର ଓ ଗେଜେଟ୍ ନୋଟିଫିକେସନ ପରେ ଏହା ଆଇନରେ ପରିଣତ ହୋଇଛି। ଆଗରୁ ସଂସଦର ଉଭୟ ଗୃହରେ ଏହା ଗୃହୀତ ହୋଇଥିଲା । ଆଇନ ହେବା ପରେ ଡ୍ରିମ 11, ଗେମସ 24X7 ଓ ମୋବାଇଲ ପ୍ରିମିୟର ଲିଗ୍, ନଜାରା ଟେକନୋଲୋଜିସ ଲିମିଟେଡ ଦ୍ବାରା ପରିଚାଳିତ ୩.୮ ବିଲିୟନ ଡଲାରର ଗେମିଂ ଶିଳ୍ପ ପ୍ରଭାବିତ ହେବ। ଅଗଷ୍ଟ ୨୦ରେ ଲୋକସଭାରେ ଓ ୨୧ରେ ରାଜ୍ୟସଭାରେ ଏହି ବିଲ୍ ଗୃହୀତ ହୋଇଥିଲା। ଏବେ କେନ୍ଦ୍ର କ୍ରୀଡ଼ା ମନ୍ତ୍ରାଳୟ ଗାଇଡଲାଇନ ପ୍ରସ୍ତୁତ କରିବ ଏବଂ ଦେଶରେ ଇ-ସ୍ପୋର୍ଟସ ଇଭେଣ୍ଟ ଆୟୋଜନ କରିବା ଲାଗି ଗାଇଡଲାଇନ ପ୍ରସ୍ତୁତ ହେବ। ବୃହତ କ୍ରୀଡ଼ା ନୀତି ବି ପ୍ରସ୍ତୁତ ହେବ। ନୂଆ ନିୟମ ବଳରେ ଅନଲାଇନ ସୋସିଆଲ ଗେମକୁ ସରକାର ସ୍ବୀକୃତି ଦେବା ସହ ଏହାର ଶ୍ରେଣୀ ବିଭକ୍ତ ଓ ପଞ୍ଜିକରଣ କରାଯିବ। ନିରାପଦ, ବୟସ ଅନୁସାରେ ସାମାଜିକଓ ଶିକ୍ଷାଭିତ୍ତିକ ଗେମ୍ ଲାଗି ବ୍ୟବସ୍ଥା କରାଯିବ। ଭାରତୀୟ ମୂଲ୍ୟବୋଧ ସମ୍ପର୍କିତ ସାଂସ୍କୃତିକ ଓ ଶିକ୍ଷାଭିତ୍ତିକ ଗେମର ପ୍ରସାରଣ କରାଯିବ। ଅନଲାଇନ ଗେମିଂ ବିଲରେ ଅଫରିଂ, ଅପରେଟିଂ ବା ମନି ଗେମକୁ ନିଷିଦ୍ଧ କରାଯାଇଛି।
ମିଡିଆର କୌଣସି ପ୍ଲାଟଫର୍ମରେ ଅନଲାଇନ ଗେମିଂର ବିଜ୍ଞାପନ ଓ ପ୍ରମୋସନ କରାଯାଇପାରିବ ନାହିଁ। ଟଙ୍କା କାରବାର କ୍ଷେତ୍ରରେ ବ୍ୟାଙ୍କ ଓ ପେମେଣ୍ଟ ସିଷ୍ଟମ ଜରିଆରେ ଅର୍ଥ ନେଣଦେଣ ନିଷିଦ୍ଧ କରାଯାଇଛି। ଆଇଟି ଆଇନ ୨୦୦୦ ଅନୁସାରେ ଅନଲାଇନ ଗେମଗୁଡ଼ିକୁ ବ୍ଲକ କରାଯିବ। ଆଇନ ଅନୁସାରେ ଅନଲାଇନ ଗେମିଂ ଅଥରିଟି ଗଠନ କରାଯିବ। ବ୍ୟବସ୍ଥା ଅନୁସାରେ ନିୟମ ଉଲ୍ଲଂଘନ ହେଲେ ୩ ବର୍ଷ ଜେଲଦଣ୍ଡ କିମ୍ବା ୧କୋଟି ଟଙ୍କା ଜରିମାନା କିମ୍ବା ଉଭୟ ଦଣ୍ଡ ମିଳିବ। ଅନଲାଇନ ଗେମର ବିଜ୍ଞାପନ କ୍ଷେତ୍ରରେ ୫୦ ଲକ୍ଷ ଟଙ୍କା ଜରିମାନା କିମ୍ବା ୨ ବର୍ଷ ଯାଏ ଜେଲଦଣ୍ଡ ମିଳିବ। ଯଦି କୌଣସି ଆର୍ଥିକ କାରବାର ହୁଏ ତେବେ ୩ ବର୍ଷ ଯାଏ ଜେଲ କିମ୍ବା ୧ କୋଟି ଟଙ୍କା ଜରିମାନା କିମ୍ବା ଉଭୟ ଦଣ୍ଡ ମିଳିପାରେ। ଦଣ୍ଡ ପରେ ଯଦି ପୁନର୍ବାର ଅପରାଧ ଘଟାଯାଏ ତେବେ ୩ରୁ ୫ ବର୍ଷ ଜେଲଦଣ୍ଡ ଓ ୨ କୋଟି ଟଙ୍କା ଯାଏ ଜରିମାନା ବ୍ୟବସ୍ଥା ରହିଛି।
ନବୀନ ନିବାସରେ ବଡ଼ଭାଇ ପ୍ରେମ ପଟ୍ଟନାୟକ
ନବୀନ ନିବାସରେ ବଡ଼ଭାଇ ପ୍ରେମ ପଟ୍ଟନାୟକ। ନବୀନଙ୍କୁ ଭେଟିବାକୁ ପହଞ୍ଚିଲେ ବଡ଼ ଭାଇ ପ୍ରେମ। ନବୀନଙ୍କ ଅସୁସ୍ଥତା ଖବର ଶୁଣି ଭୁବନେଶ୍ଵରରେ ପହଞ୍ଚିଛନ୍ତି ବଡ଼ ଭାଇ। ନବୀନଙ୍କ ସ୍ବାସ୍ଥ୍ୟାବସ୍ଥା ନେଇ କରିଛନ୍ତି ଆଲୋଚନା। ଡିହାଇଡ୍ରେସନ ପାଇଁ ଗତ ରବିବାର ଦିନ ଘରୋଇ ହସ୍ପିଟାଲରେ ଭର୍ତ୍ତି ହୋଇଥିଲେ ନବୀନ। ମେଡିକାଲରେ ସ୍ବତନ୍ତ୍ର ଡାକ୍ତରୀ ଟିମର ଚିକିତ୍ସା ପରେ ବୁଧବାର ରାତିରେ ସୁସ୍ଥ ହୋଇ ଫେରିଥିଲେ ନବୀନ। ମେଡିକାଲରୁ ଡିସଚାର୍ଜ ହେବା ପରେ ନବୀନ ନିବାସକୁ ଯାଇ ଦଳ ସୁପ୍ରିମୋଙ୍କୁ ଭେଟୁଛନ୍ତି ବରିଷ୍ଠ ବିଜେଡି ନେତା।
ଜାତୀୟ ରାଜପଥରେ ଟ୍ରାଫିକ ଜାମ ଯନ୍ତ୍ରଣା: ବରମୁଣ୍ଡାରୁ ଆଇଗିଣିଆ ଲାଗୁଛି ଗୋଟିଏ ଘଣ୍ଟା
ଜାତୀୟ ରାଜପଥରେ ଟ୍ରାଫିକ ଜାମ ଯନ୍ତ୍ରଣା। ବରମୁଣ୍ଡାରୁ ଆଇଗିଣିଆ ଲାଗୁଛି ଗୋଟିଏ ଘଣ୍ଟା। ଜାତୀୟ ରାଜପଥରେ ଅସମ୍ଭାଳ ଭିଡ। ଗାଡ଼ିର ଲମ୍ବା ଲାଇନ, ଅସନ୍ତୋଷ ଜାହିର କଲେ ପଥଚାରୀ। ସକାଳରୁ ମଧ୍ଯରାତ୍ରି, ଯେତେବେଳେ ଯିବ ସେତେବେଳେ ଭିଡ। ଭିଡରେ ଫସିଲା ଆମ୍ବୁଲାନ୍ସ ଓ ଦମକଳ ଗାଡି। ଦିନେ କି ଦୁଇ ଦିନ ନୁହଁ, ୧୦ ଦିନ ଧରି ରାସ୍ତାରେ ହନ୍ତସନ୍ତ ହେବେ ଲୋକେ। ୧୬ ନମ୍ବର ଜାତୀୟ ରାଜପଥ। ଏହି ରାସ୍ତା ରାଜଧାନୀ ଭୁବନେଶ୍ଵରର ପ୍ରମୁଖ ପ୍ରବେଶ ପଥ ହୋଇଥିବାରୁ ପ୍ରତ୍ୟେକ ଦିନ ହଜାର ହଜାର ସଂଖ୍ୟାରେ ଗାଡ଼ି ଏହି ରାସ୍ତା ଦେଇ ଯିବା ଆସିବା କରୁଛନ୍ତି । ଖଣ୍ଡଗିରି ଫ୍ଲାଇ ଓଭରର ଗ୍ରେଡ୍ ସେପାରେଟର ଷ୍ଟ୍ରକଚର ମରାମତି ଯୋଗୁଁ ଖଣ୍ଡିଗିରିରୁ ଖୋର୍ଦ୍ଧା ପଟ ରାସ୍ତାକୁ ବନ୍ଦ କରାଯାଇ ସର୍ଭିସ ରାସ୍ତା ବ୍ୟବହାର କରାଯାଉଛି। ଫଳରେ ଭୁବନେଶ୍ଵରରୁ ଖୋର୍ଦ୍ଧା ଯାଉଥିବା ଗାଡି ଖାରବେଳ ହୋଟେଲ୍ ପାଖରୁ ରୀତା ଟିଭିଏସ୍ ଶୋରୁମ୍ ପର୍ଯ୍ୟନ୍ତ ସର୍ଭିସ ରାସ୍ତାରେ ଯାଉଛନ୍ତି। ହେଲେ କଟକଣାର ପ୍ରଥମ ଦିନରୁ ଆରମ୍ଭ ହୋଇଛି ଟ୍ରାଫିକ ବିଭ୍ରାଟ। ଦିନ କଥା ଛାଡନ୍ତୁ, ସନ୍ଧ୍ୟା ୫ଟା ହେଲେ ଆରମ୍ଭ ହେଉଛି ଅସମ୍ଭାଳ ଭିଡ। ଗଣମାଧ୍ଯମରେ ଖବର ପ୍ରସାରଣ ପରେ ରାସ୍ତାର ଗୋଟିଏ ଲେନ ଖୋଲାଯାଇ ଯାନାବାହନ ଛଡ଼ାଯାଉଛି। ତେବେ ଏନଏଚଏଆଇର ଏଭଳି କାର୍ଯ୍ୟଶୈଳୀକୁ ନେଇ ବର୍ଷିଛନ୍ତି ଲୋକେ।
ଭୁବନେଶ୍ଵର ଦେଇ ଯାଇଥିବା ୧୬ ନମ୍ବର ଜାତୀୟ ରାଜପଥ ଦେଶର ଅନ୍ୟତମ ଗୁରୁତ୍ବପୂର୍ଣ ରାଜପଥ । ତାମିଲନାଡୁ, ଅନ୍ଧ୍ରପ୍ରଦେଶ, ଓଡ଼ିଶା ଓ ପଶ୍ଚିମବଙ୍ଗ ଭଳି ରାଜ୍ୟକୁ ଯୋଗାଯୋଗ କରୁଛି। ଭୁବନେଶ୍ବର, କଟକ, ଯାଜପୁର, କେନ୍ଦ୍ରାପଡ଼ା, ଜଗତସିଂହପୁର, ଅନୁଗୁଳ, ଢେଙ୍କାନାଳ, କେନ୍ଦୁଝର ଆଦି ଜିଲ୍ଲାରୁ ଖୋର୍ଦ୍ଧା, ନୟାଗଡ଼, ଗଞ୍ଜାମ, ଫୁଲବାଣୀ ଆଦି ଜିଲ୍ଲାକୁ ଯିବାକୁ ହେଲେ ଏହା ହିଁ ପ୍ରମୁଖ ରାସ୍ତା । ଟିକେ ଭଲ କରି ଦେଖନ୍ତୁ ଏ ଦୃଶ୍ୟକୁ। ପଶ୍ଚିମବଙ୍ଗରୁ ଭୁବନେଶ୍ବର ଦେଇ ଅନ୍ଯ ରାଜ୍ଯକୁ ଯାଉଥିଲା ଏହି ଗାଡ଼ି। କିନ୍ତୁ ଭିଡରେ ଘଣ୍ଟାଏ ଫସିବା ପରେ ଗାଡି ଇଞ୍ଜିନରୁ ଧୂଆଁ ବାହାରିବା ସହିତ ମଝି ରାସ୍ତାରେ ଅଟକିବାକୁ ପଡ଼ିଛି। ଜାତୀୟ ରାଜପଥ ମରାମତି ନେଇ ୨୧ ତାରିଖରୁ ଆସନ୍ତା ୧ ତାରିଖ ପର୍ଯ୍ଯନ୍ତ ଭୁବନେଶ୍ବରରୁ ଖୋର୍ଦ୍ଧା ପଟ ରାସ୍ତା ବନ୍ଦ ରହିବ। ଏନେଇ ଲୋକଙ୍କ ଲାଗି ବିଜ୍ଞପ୍ତି ଜାରି ହୋଇଥିଲେ ମଧ୍ୟ ସମସ୍ତେ ଅବଗତ ନାହାନ୍ତି। ଯାହା ଫଳରେ ଯାତ୍ରୀ ଭିଡରେ ଫସିବା ସାଙ୍ଗକୁ ଅସୁବିଧାର ସମୁଖୀନ ହେଉଛନ୍ତି।
ରାଜ୍ୟରେ ଅବହେଳିତ ସରକାରୀ ସ୍କୁଲ: ଶିକ୍ଷକଙ୍କ ସଂଖ୍ୟା ବି ବହୁତ କମ
ରାଜ୍ୟର ସ୍କୁଲଗୁଡିକରେ ଯାହା ଭିତ୍ତିଭୂମି ଯାହା ଅଛି ତାକୁ ସଂରକ୍ଷିତ ଓ ସୁରକ୍ଷିତ କରିବାର ଆବଶ୍ୟକତା ଅଛି। ଯେଉଁଥିପାଇଁ ସରକାରୀ ସ୍କୁଲଗୁଡିକ ଅବହେଳିତ ଅବସ୍ଥାରେ ରହୁଛି । ଯତ୍ନ ନେବାକୁ କେହି ନାହିଁ ବୋଲି ଆଇସିଏସଇର ସଂଘ ଆସୋସିଏସନ ଅଫ ସ୍କୁଲସ ଫର ଦି ଇଣ୍ଡିଆନ ସ୍କୁଲ ସାର୍ଟିଫିକେଟ-ଏଏସଆଇଏସସି ପକ୍ଷରୁ କୁହାଯାଇଛି । ସେପଟେ ଦେଶର ଅନ୍ୟାନ୍ୟ ରାଜ୍ୟ ତୁଳନାରେ ଓଡ଼ିଶାରେ ବ୍ୟାପକ ଶିକ୍ଷକଙ୍କ ଅଭାବ ରହିଛି । ଯାହାକି ପୂରଣ ହେବା ନିହାତି ଆବଶ୍ୟକ ବୋଲି କୁହାଯାଇଛି । ସେପଟେ କିନ୍ତୁ ଆଇସିଏସଇ ବୋର୍ଡ ସ୍କୁଲ ଗୁଡିକରେ ଏଆଇ , ରୋବୋଟିକସ ଓ ସ୍କିଲ ଡେଭଲପମେଣ୍ଟକୁ ଗୁରୁତ୍ୱ ଦେଉଛି । ଏଥିପାଇଁ ପ୍ରଶିକ୍ଷଣ ବି ଚାଲିଛି। ଜୋନାଲ ଲେଭଲ ପ୍ରୋଗ୍ରାମ ହେଉଛି । ରାଉରକେଲା, ଭୁବନେଶ୍ୱର ପରେ ଆଗକୁ ବ୍ରହ୍ମପୁରରେ ପ୍ରୋଗ୍ରାମ ହେବ । ତେଣୁ ଜାତୀୟ ଶିକ୍ଷା ନୀତିକୁ ସଠିକ ଢଙ୍ଗରେ ଲାଗୁ କରିବାକୁ ହେଲେ ସବୁ ଦିଗକୁ ଦୃଷ୍ଟି ଦେବାକୁ ପଡିବ। ସେପଟେ ରାଜ୍ୟରେ ଜାତୀୟ ଶିକ୍ଷାନୀତି ଅଧାଖଣ୍ଡିଆ ଲାଗୁ ହୋଇଥିବା ଶିକ୍ଷାବିତମାନେ ଅଭିଯୋଗ କରିଛନ୍ତି । ତାମିଲନାଡୁ, କେରଳ ଓ କର୍ଣ୍ଣାଟକ ଭଳି ରାଜ୍ୟ ନିଜର ଶିକ୍ଷା ନୀତି କରୁଛନ୍ତି । ଓଡିଶା ସରକାର ମଧ୍ୟ ନିଜର ସ୍ଥିତିକୁ ଦେଖି ନିଜର ସ୍ୱତନ୍ତ୍ର ଶିକ୍ଷା ନୀତି କରିବାକୁ ଦାବି ହୋଇଛି।
ସେପଟେ ଉତ୍କଳ ଅଭିଭାବକ ସଙ୍ଘ ମଧ୍ୟ ସରକାରଙ୍କ ଲୁଚକାଳି ଖେଳକୁ ତୀଵ୍ର ସମାଲୋଚନା କରିଛି । ରାଜ୍ୟର ସ୍କୁଲରେ ଆବଶ୍ୟକ ଭିତ୍ତିଭୂମି ବିକାଶ ନ କରି ଶିକ୍ଷକ ନିଯୁକ୍ତି ନ କରି ସରକାର କେବଳ ଘୋଷଣାରେ ସୀମିତ ରହୁଥିବା ଅଭିଯୋଗ କରିଛି ସଂଘ। ଏପରିକି ଜାତୀୟ ଶିକ୍ଷା ନୀତି ନାଁରେ ପିଲାଙ୍କ ଉପରେ ବହୁ ଅନାବଶ୍ୟକ ପାଠ୍ୟକ୍ରମ ଲଦି ଦିଆଯାଉଛି ବୋଲି ଅଭିଯୋଗ ହୋଇଛି । ସେପଟେ ବିଦ୍ୟାଳୟ ଗଣଶିକ୍ଷା ମନ୍ତ୍ରୀଙ୍କ ଉତ୍ତର ଜାତୀୟ ଶିକ୍ଷନୀତିକୁ ଆଧାର କରି ରାଜ୍ୟରେ ନୂତନ ଶିକ୍ଷକ ପଦବୀ ପୂରଣ ହେବ। ୩ ବର୍ଷ ମଧ୍ୟରେ ପ୍ରତିବର୍ଷ ୧୫ ହଜାର ଲେଖାଏଁ ଶିକ୍ଷକ ନିଯୁକ୍ତି ହେବ ବୋଲି ସୂଚନା ଦେଇଛନ୍ତି ବିଦ୍ୟାଳୟ ଗଣଶିକ୍ଷା ମନ୍ତ୍ରୀ । ସେହିପରି ଜାତୀୟ ଶିକ୍ଷା ନୀତିରେ ଶିଶୁ ବାଟିକାରୁ ପଞ୍ଚମ ପାଇଁ ନିଜ ଭାଷାରେ ଶିକ୍ଷା ଦେବା ସହ ଶିକ୍ଷକ ନିଯୁକ୍ତିକୁ ଗୁରୁତ୍ୱ ଦିଆଯାଇଛି ବୋଲି ସେ କହିଛନ୍ତି। ସରକାରୀ ସ୍କୁଲରେ ଗୁଣାତ୍ମକ ଶିକ୍ଷା ପ୍ରଦାନ ପାଇଁ ବହୁ ଘୋଷଣା କରାଯାଉଛି । କିନ୍ତୁ ଏ ସବୁର ସଠିକ କ୍ରିୟାନ୍ଵୟନକୁ ନେଇ ବିଭିନ୍ନ ସ୍ତରରେ ପ୍ରଶ୍ନ ଉଠୁଛି।
ରାହୁଲଙ୍କ ଫୋକସରେ ଓଡିଶା କଂଗ୍ରେସ: ଦିଲ୍ଲୀରେ ବସିବ ବଡ ବୈଠକ
ଦିଲ୍ଲୀରେ ଓଡିଶା କଂଗ୍ରେସର ବସିବ ବଡ ବୈଠକ । ସାଂଗଠନିକ ସ୍ଥିତି ମଜଭୁତ ପାଇଁ ରାହୁଲ କରିବେ ସମୀକ୍ଷା । ଜିଲ୍ଲା ସଭାପତି ଚୟନ ପାଇଁ ୩୫ ଜଣ ପର୍ଯ୍ୟବେକ୍ଷକଙ୍କୁ ଦେବେ ଗୁରୁମନ୍ତ୍ର । ଏଆଇସିସି ବୈଠକ ନେଇ ଉତ୍ସାହିତ କଂଗ୍ରେସ ନେତା । ଶକ୍ତିଶାଳୀ ହେବେ ଜିଲ୍ଲା ସଭାପତି । ୨୦୨୯ ନିର୍ବାଚନ ପରିଚାଳନାରେ ଗୁରୁଦାୟିତ୍ବ ତୁଲାଇବେ ଜିଲ୍ଲା ସଭାପତି । ସାଂସଦ ଓ ବିଧାୟକ ପ୍ରାର୍ଥୀ ବି ଜିଲ୍ଲା ସଭାପତିଙ୍କ ସୁପାରିସରେ ଚୂଡାନ୍ତ ହେବ। ଦକ୍ଷ ଲୋକଙ୍କ ହାତରେ ଜିଲ୍ଲା ସଂଗଠନ ଦାୟିତ୍ବ ଦେବା ପାଇଁ ନୂଆ ଢାଞ୍ଚାରେ ଜିଲ୍ଲା ସଭାପତି ଚୟନ ପ୍ରକ୍ରିୟା ଆରମ୍ଭ ହୋଇଛି । ସଂଗଠନ ସୃଜନ ଅଭିଯାନ ଜରିଆରେ ସଭାପତି ଚୟନ କରିବା ପାଇଁ ୩୫ ଜଣ ପର୍ଯ୍ୟବେକ୍ଷକଙ୍କୁ ନିଯୁକ୍ତି ଦେଇଛି ଏଆଇସିସି । ଆସନ୍ତା ୨୫ ତାରିଖ ଦିନ କଂଗ୍ରେସ ଯୁବରାଜ ରାହୁଲ ଗାନ୍ଧୀ ୩୫ ଜଣ ପର୍ଯ୍ୟବେକ୍ଷକ, ପିସିସି ସଭାପତି,କଂଗ୍ରେସ ବିଧାୟକ ଦଳ ନେତା, ସାଂସଦଙ୍କ ସମେତ କିଛି ବରିଷ୍ଠ ନେତାମାନଙ୍କ ସହ ଓଡିଶା ସଂଗଠନ ନେଇ ଆଲୋଚନା କରିବେ । ସୁପାରିସ କି ଲବି ନୁହେଁ କଂଗ୍ରେସ ସଙ୍ଗଠନକୁ ମଜଭୁତ କରିପାରୁଥିବା ନେତାଙ୍କୁ ଜିଲ୍ଲା ସଭାପତି ଲାଗି ଗୁରୁ ଦାୟିତ୍ବ ଦେବାକୁ ବୈଠକରେ ଆଲୋଚନା ହେବ । ଓଡିଶା କଂଗ୍ରେସ ପାଇଁ ଏଆଇସିସି ଏପରି ଅଭିଯାନକୁ ନେଇ ବେଶ ଉତ୍ସାହିତ ଦଳର ବିଧାୟକ ଓ ନେତା ।
୩୫ଟି ସାଂଗଠନିକ ଜିଲ୍ଲା ସଭାପତି ଚୟନ କରିବା ନେଇ ଏଆଇସିସିର ନୂଆ ଫର୍ମୁଲାକୁ ପୂର୍ବତନ ପିସିସି ସଭାପତି ଜୟଦେବ ଜେନା ଭିନ୍ନ ଆକଳନ କରିଛନ୍ତି । ରାହୁଲ ଗାନ୍ଧୀ ଓଡିଶାରେ ସମ୍ଭାବନା ଦେଖିଥିବାରୁ ଏବେଠାରୁ ୨୦୨୯ ସାଧାରଣ ନିର୍ବାଚନ ପାଇଁ ଓଡିଶା କଂଗ୍ରେସକୁ ପ୍ରସ୍ତୁତ କରୁଛନ୍ତି । ପ୍ରଥମଥର ଲାଗି ଦଳୀୟ ନିଷ୍ପତ୍ତିରେ ଜିଲ୍ଲା ସଭାପତିଙ୍କ ଗୁରୁତ୍ବପୂର୍ଣ୍ଣ ଭୂମିକା ରହିବ । ସଂଗଠନ ଠାରୁ ବିଧାୟକ ଓ ସାଂସଦ ଟିକେଟ ବଣ୍ଟନରେ ଜିଲ୍ଲା ସଭାପତିମାନେ ପ୍ରମୁଖ ଭୂମିକା ଗ୍ରହଣ କରିବେ ବୋଲି ସେ କହିଛନ୍ତି । ୨୫ ବର୍ଷ ଧରି କ୍ଷମତା ବାହାରେ ଥିବା ଓଡିଶା କଂଗ୍ରେସକୁ ସଜାଡିବା ପାଇଁ ଏଆଇସିସି ଗୁରୁତ୍ବ ଦେଇଛି । ଓଡିଶାରୁ ଦିଲ୍ଲୀ ଯାଏ ସାଂଗଠନିକ ସ୍ଥିତିକୁ ମଜଭୁତ କରିବାକୁ ରଣନୀତି କରାଯାଉଛି । ଆଗକୁ ରାହୁଲ ଗାନ୍ଧୀ ଘନଘନ ଓଡିଶା ଗସ୍ତରେ ଆସି ତୃଣମୂଳ କର୍ମୀଙ୍କ ମନରେ ଜୋଶ ଭରିବେ ବୋଲି ପିସିସି ପକ୍ଷରୁ କୁହାଯାଇଛି ।
ବୁଲା କୁକୁରଙ୍କୁ ବନ୍ଧ୍ୟାକରଣ କରିବା ପରେ ବାହାରେ ଛଡ଼ାଯାଉ: ସୁପ୍ରିମକୋର୍ଟ
ବୁଲା କୁକୁରଙ୍କୁ ବନ୍ଧ୍ୟାକରଣ କରିବା ପରେ ବାହାରେ ଛଡ଼ାଯାଉ। ଟିକାକରଣ ଓ କୃମିନାଶକ ଔଷଧ ଦେବା ପରେ ଯେଉଁ ସ୍ଥାନରୁ ଧରାଯାଇଥିଲା ସେଠାରେ ଛଡ଼ାଯାଉ। ପାଗଳା, ଜଳାତଙ୍କରେ ପୀଡ଼ିତ ଆଗ୍ରେସିଭ୍ କୁକୁରଙ୍କୁ ଚିକିତ୍ସା କରିବା ସହ ସେମାନଙ୍କୁ ଅଲଗା ସ୍ଥାନରେ ରଖାଯାଉ। ବୁଲାକୁକୁରଙ୍କୁ ସର୍ବସାଧାରଣ ସ୍ଥାନରେ ଖାଇବାକୁ ଦିଆ ନଯାଉ ବୋଲି ରାୟ ଶୁଣାଇଛନ୍ତି ସୁପ୍ରିମକୋର୍ଟ। ବୁଲାକୁକୁର ପ୍ରସଙ୍ଗରେ ଜଷ୍ଟିସ ବିକ୍ରମ ନାଥ, ସନ୍ଦୀପ ମେହଟ୍ଟା ଓ ଏନଭି ଅଞ୍ଜାରିଆଙ୍କୁ ନେଇ ଗଠିତ ଖଣ୍ଡପୀଠ ରାୟରେ କହିଛନ୍ତି- କେବଳ ଦିଲ୍ଲୀ ଏନସିଆର ଲାଗି ନୁହେଁ ବରଂ ସାରା ଦେଶ ଲାଗି ଏହା ପ୍ରଯୁଜ୍ୟ ହେଉ। କୁକୁରଙ୍କୁ ଖାଇବାକୁ ଦେବା ଲାଗି ନିର୍ଦ୍ଦିଷ୍ଟ ସ୍ଥାନ ରଖାଯାଉ। କୁକୁରଙ୍କୁ ଯେଉଁମାନେ ପୋଷ୍ୟଭାବେ ଗ୍ରହଣ କରିବେ ସେମାନେ ଲିଖିତ ଆବେଦନ କରନ୍ତୁ। କିନ୍ତୁ ପରେ ସେମାନେ ପୋଷ୍ୟ କୁକୁରଙ୍କୁ ରାସ୍ତାକୁ ଛାଡ଼ିପାରିବେ ନାହିଁ। ଏଥିଲାଗି ବ୍ୟକ୍ତିବିଶେଷ ସ୍ତରରେ ୨୫ ହଜାର ଓ ଏନଜିଓ ସ୍ତରରେ ୨ ଲକ୍ଷ ଟଙ୍କା ଜମା କରିବାକୁ ପଡିବ। ଏହି ଅର୍ଥ ଜରିଆରେ କୁକୁରଙ୍କ ଲାଗି ଭିତ୍ତିଭୂମି ଓ ସେମାନଙ୍କ ରହିବା ଲାଗି ବ୍ୟୟ ହେବ। ବୁଲାକୁକୁର ପ୍ରସଙ୍ଗରେ ଏକ ଜାତୀୟ ନୀତି ପ୍ରସ୍ତୁତ କରିବା ଲାଗି ପରାମର୍ଶ ଦେଇଛନ୍ତି କୋର୍ଟ। ଦିଲ୍ଲୀ ଏନସିଆରରେ ୮ ଲକ୍ଷ ବୁଲାକୁକୁରଙ୍କ ନେଇ ଦେଖାଦେଇଥିବା ସମସ୍ୟା ପରିପ୍ରେକ୍ଷୀରେ ଆଗତ କେତେକ ପିଟିସନର ଶୁଣାଣି କରି ଏହି ରାୟ ଶୁଣାଇଛନ୍ତି କୋର୍ଟ। ଗତ ୨୦୨୪ରେ ଦିଲ୍ଲୀରେ ୨୫ ହଜାର ଲୋକଙ୍କୁ କୁକୁର କାମୁଡିଥିବାବେଳେ କେବଳ ଗତ ଜାନୁଆରୀରେ ପ୍ରାୟ ୩ ହଜାର ଲୋକ କୁକୁର କାମୁଡାରେ ଆହତ ହେଉଥିଲେ।
ପ୍ରାଣୀ ଅଧିକାର କର୍ମୀ ଯୁକ୍ତି ଦର୍ଶାଇଥିଲେ ଯେ ଦେଶରେ ଲକ୍ଷ ଲକ୍ଷ ବୁଲାକୁକୁର ରହିଛନ୍ତି। ସେମାନଙ୍କ ରହିବା ଲାଗି ବ୍ୟବସ୍ଥା କରିବା ସମ୍ଭବ ନୁହେଁ। ଗତ ଅଗଷ୍ଟ ୮ରେ ଜଷ୍ଟିସ ଜେ.ବି. ପାର୍ଦ୍ଦିୱାଲା ଓ ଜଷ୍ଟିସ ଆର. ମହାଦେବନ ଯେଉଁ ରାୟ ଦେଇଥିଲେ ତାହା ପ୍ରାଣୀ ପ୍ରଜନନ ନିୟନ୍ତ୍ରଣ ବା ଏବିସି ନିୟମର ଉଲ୍ଲଂଘନ କରୁଛି। କୋର୍ଟ କହିଥିଲେ- ୮ ସପ୍ତାହ ମଧ୍ୟରେ ସମସ୍ତ ବୁଲାକୁକୁରଙ୍କୁ ଧରାଯାଇ ଆଶ୍ରୟସ୍ଥଳୀରେ ରଖାଯାଉ। ଏହାକୁ ନେଇ ଦେଶବ୍ୟାପୀ ପ୍ରତିବାଦ ହେବା ପରେ ରାୟ ବଦଳାଇଥିଲେ କୋର୍ଟ।
ଭୁବନେଶ୍ବରରେ ବିଏମସି କୁକୁର ଗଣନା କରିବ। ଉଭୟ ବୁଲା କୁକୁର ଓ ପୋଷା କୁକୁରଙ୍କ ଗଣନା କରାଯିବ। କାନରେ ଟ୍ୟାଗ ଲାଗିବ। BMC ପାଖରେ ରହିବ କୁକୁରଙ୍କ ସମସ୍ତ ତଥ୍ୟ। ପୋଷା କୁକୁରର ମାଲିକ କିଏ ଓ ବୁଲା କୁକୁର କେଉଁଠୁ ଯାଇଛନ୍ତି, ଟ୍ୟାଗରେ ସେସବୁ ତଥ୍ୟ ରହିବ। ବନ୍ଧ୍ୟାକରଣ ଓ ଟିକାକରଣ ହେଇଛି କି ନାହିଁ ସମସ୍ତ ତଥ୍ୟ ରହିବ ଚିପରେ। ଏହା ଦ୍ଵାରା କୁକୁରାଙ୍କ ସ୍ଵାସ୍ଥ୍ୟାବସ୍ଥା ସମ୍ପର୍କରେ ଜାଣି ହେବ। ବନ୍ଧ୍ୟାକରଣ ପରେ କୁକୁର ସଂଖ୍ୟା ବଢୁଛି କି କମୁଛି, ନଜରରେ ରହିବ। ଭୁବନେଶ୍ଵରରେ ୮୫ ହଜାରରୁ ଅଧିକ କୁକୁର ଅଛନ୍ତି। ଟ୍ୟାଗ୍ ଲାଗିଲେ ସମସ୍ତ କୁକୁରଙ୍କର ତଥ୍ୟ ରହିବ ଓ କୁକୁର ତଥା ଲୋକେ ସୁରକ୍ଷିତ ରହିବେ ବୋଲି କହିଛନ୍ତି ମେୟର। ସେମାନେ କଥା କହିପାରନ୍ତିନି। ସେମାନେ ମଣିଷର ଅତୀବ ବିଶ୍ବାସୀ। ପ୍ରତ୍ୟେକ୍ଷ ଓ ପରୋକ୍ଷରେ ମଣିଷ ଲାଗି ଅଶେଷ ଉପକାର ସାଧନ କରିଥାନ୍ତି। ହେଲେ ସେମାନେ ସର୍ବଦା ଅବହେଳିତ। ସୁପ୍ରିମକୋର୍ଟଙ୍କ ରାୟ ପରେ ବଦଳିପାରେ ବୁଲାକୁକୁରଙ୍କ ଭାଗ୍ୟ।
ରାଜ୍ୟର ସ୍ଵାର୍ଥ ପାଇଁ ବିଜେଡିର ସ୍ଵର ଶାଣିତ: ପଲ୍ଲୀରୁ ଦିଲ୍ଲୀଯାଏ ଜୋରଦାର ଲଢ଼େଇ
ରାଜ୍ୟର ସ୍ଵାର୍ଥ ପାଇଁ ବିଜେଡିର ସ୍ଵର ଶାଣିତ । ପଲ୍ଲୀରୁ ଦିଲ୍ଲୀଯାଏ ଜୋରଦାର ଲଢ଼େଇ । ପୋଲାଭରମ, ମହାନଦୀ, କୋଟିଆ ପାଇଁ ସଂଘର୍ଷ । ନେତା କହିଲେ ଅନୁଦାନ ହକ୍ ପାଇଁ ବି ଜାରି ରହିବ ଲଢ଼େଇ । ଓଡ଼ିଶାର ସ୍ଵାର୍ଥ ରକ୍ଷା ପାଇଁ ବିଜେଡି ଜାରି ରଖିଛି ଲଢ଼େଇ। ବିଭିନ୍ନ ପ୍ରକଳ୍ପରେ ପଡ଼ୋଶୀ ରାଜ୍ୟ ଫାଇଦା ପାଇବ, ଆଉ ଓଡ଼ିଶାବାସୀ ଦୁଃଖ ଭୋଗିବେ – ଏହାକୁ ବିଜେଡି ବରଦାସ୍ତ କରିବ ନାହିଁ। ପୋଲାଭରମ ପ୍ରକଳ୍ପ ପାଇଁ କେନ୍ଦ୍ର ଅର୍ଥ ଅଜାଡ଼ି ଦେଇଥିବା ବେଳେ ଆନ୍ଧ୍ର ହେବ ଲାଭବାନ। କିନ୍ତୁ ବୁଡ଼ିଯିବ ମାଲକାନଗିରିର ଅଧା ଅଞ୍ଚଳ। ସଂପୃକ୍ତ ଅଞ୍ଚଳ ସହିତ ରାଜ୍ୟରେ ଲଢେ଼ଇ ପରେ ଦିଲ୍ଲୀରେ ବି ସ୍ଵର ଉଠାଇଛି ବିଜେଡି।କେନ୍ଦ୍ରୀୟ ଜଳ କମିଶନଙ୍କୁ ଭେଟି ବିଜେଡି ପ୍ରତିନିଧି ୧୦ଟି ଦାବି କରିଛି । ପୋଲାଭରମ ପ୍ରକଳ୍ପରେ ଓଡ଼ିଶାର ସ୍ଵାର୍ଥ ରକ୍ଷା କରିବାକୁ କେନ୍ଦ୍ରୀୟ ଜଳ କମିଶନଙ୍କ ନିକଟରେ ଦାବି କରିଛି ବିଜେଡି। କେନ୍ଦ୍ର ସମାଧାନ କରନ୍ତୁ ବୋଲି ବିଭିନ୍ନ ଫୋରମରେ ଦାବି କରାଯାଇଛି। ପ୍ରମିଳା ମଲ୍ଲିକ କହିଛନ୍ତି ବିଜେପି ସରକାରକୁ ଆସିବା ପରଠୁ ସେମାନେ ଓଡିଶାବାସୀଙ୍କ ସମସ୍ୟା ଦୂର କରିବା ପରିବର୍ତ୍ତେ ଅଧିକ ସମସ୍ୟା ସୃଷ୍ଟି କରୁଛନ୍ତି। ଏହା ବିରୋଧରେ ପଲ୍ଲୀରୁ ଦିଲ୍ଲୀ ଯାଏ ଲଢ଼େଇ ହେବ କହିଛି ବିଜେଡି। ରାଜସ୍ଵ ମନ୍ତ୍ରୀ ସୁରେଶ ପୂଜାରୀ କିନ୍ତୁ ଭିନ୍ନ ଯୁକ୍ତି କରିଛନ୍ତି। …
ଅନୁଦାନ ପ୍ରଦାନରେ ବି ଓଡ଼ିଶାକୁ ଅବହେଳା। ଉଭୟ କେନ୍ଦ୍ର ଓ ରାଜ୍ୟରେ ବିଜେପି ସରକାର ହେବା ପରେ ଅନୁଦାନ ବଢିବା ପରିବର୍ତ୍ତେ କମିବାରେ ଲାଗିଛି । ବିରୋଧୀ ଦଳ ଉପ ମୁଖ୍ୟ ସଚେତକ ପ୍ରତାପ ଦେବ କହିଛନ୍ତି, ୭ ବର୍ଷ ହେଲାଣି, କେନ୍ଦ୍ର ସରକାର ଶକ୍ତି ବିଭାଗକୁ ଟଙ୍କାଟିଏ ବି ଦେଇ ନାହାନ୍ତି। ଦିନକୁ ଦିନ କେନ୍ଦ୍ରୀୟ ଅନୁଦାନ କମୁଛି। ଏହା ବିରୋଧରେ ବିଜେଡି ଲଢ଼ୁଛି, ଏହି ଲଢ଼େଇ ଜାରି ରହିବ। ରାଜ୍ୟସଭାରେ ବିଜେଡିର ସାଂସଦମାନେ ଓଡିଶା ସ୍ଵାର୍ଥ ସମ୍ବଳିତ ବିଭିନ୍ନ ପ୍ରସଙ୍ଗ ଉଠାଇ କେନ୍ଦ୍ର ସରକାରଙ୍କ ଦୃଷ୍ଟି ଆକର୍ଷଣ କରୁଛନ୍ତି । ହକ୍ ପାଇଁ ଆଗକୁ ଲଢେଇ ଜୋରଦାର କରିବାକୁ ତୃଣମୂଳସ୍ତରୁ ରଣନୀତି ପ୍ରସ୍ତୁତ କରୁଛି ଦଳ। ଏଥିପାଇଁ ଶଙ୍ଖ ଭବନରୁ ନବୀନ ନିବାସ ଯାଏ ଘନଘନ ବୈଠକ ହେଉଛି।
ଅନଲାଇନ୍ ଗେମିଂ ବିଲକୁ ମିଳିଲା ରାଷ୍ଟ୍ରପତିଙ୍କ ମଞ୍ଜୁରୀ
ଅନଲାଇନ୍ ଗେମିଂ ବିଲକୁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ମଞ୍ଜୁରୀ ପ୍ରଦାନ କରିଛନ୍ତି । ଏବେ ଏହି ଫାଣ୍ଟାସୀ ଗେମିଂ ଉପରେ ତାଲା ପଡ଼ିବ । ରାଷ୍ଟ୍ରପତିଙ୍କ ମଞ୍ଜୁରୀ ସହ ଏବେ ଏହି ଗେମିଂ ଉପରେ ତାଲା ପଡ଼ିବାର ରାସ୍ତା ମଧ୍ୟ ପରିଷ୍କାର ହୋଇଯାଇଛି । ସଂସଦର ମୌସୁମୀ ଅଧିବେସନ ଅବସରରେ ଅନଲାଇନ୍ ଗେମିଂ ବିଲ ପାସ ହୋଇଥିଲା । ସଂସଦର ଉଭୟ ଗୃହ, ଲୋକସଭା ଓ ରାଜ୍ୟସଭାରେ ପାରିତ ହୋଇଥିବା ଅନଲାଇନ୍ ଗେମିଂ ପ୍ରମୋସନ ଓ ରେଗୁଲେସନ ବିଲକୁ ଏବେ ରାଷ୍ଟ୍ରପତିଙ୍କ ମଞ୍ଜୁରୀ ମଧ୍ୟ ମିଳିଯାଇଛି । ରାଷ୍ଟ୍ରପତିଙ୍କ ମଞ୍ଜୁରୀ ମିଳିବା ସହିତ ଏବେ ଏହା ଆଇନରେ ପରିଣତ ହୋଇଯାଇଛି ଓ ଏହାର ପ୍ରାବଧାନ ଲାଗୁ ହୋଇଯାଇଛି । ଏହି ବିଲ ଅଗଷ୍ଟ ୦ ତାରିଖରେ ଲୋକସଭା ଓ ୨୧ରେ ରାଜ୍ୟସଭାରେ ପାରିତ ହୋଇଥିଲା । ଉଭୟ ଗୃହରେ ବିଲକୁ ଆଇଟି ମନ୍ତ୍ରୀ ଅଶ୍ବିନୀ ବୈଷ୍ଣବ ଉପସ୍ଥାପନ କରିଥିଲେ ।
ରାଜ୍ୟରେ ନନଷ୍ଟପ୍ ବର୍ଷା: ୨୭ ଯାଏଁ ଭିଜିବ ସାରା ରାଜ୍ୟ
ରାଜ୍ୟରେ ନନଷ୍ଟପ୍ ବର୍ଷା । ୨୭ ଯାଏଁ ଭିଜିବ ସାରା ରାଜ୍ୟ । ଆସୁଛି ବ୍ୟାକ ଟୁ ବ୍ୟାକ ଲଘୁଚାପ । ବଙ୍ଗୋପସାଗରରେ ସୃଷ୍ଟି ହେଉଛି ଆଉଏକ ଲଘୁଚାପ । ଯାହାର ପ୍ରଭାବରେ ରାଜ୍ୟରେ ଜାରି ରହିଛି ବର୍ଷା । ଆସନ୍ତା ୨୫ ତାରିଖ ବେଳକୁ ଆଉ ଏକ ଲଘୁଚାପ କ୍ଷେତ୍ର ଉତ୍ତର-ପଶ୍ଚିମ ବଙ୍ଗୋପସାଗର ଓ ଗାଙ୍ଗେୟ ପଶ୍ଚିମବଙ୍ଗ ଅଞ୍ଚଳରେ ସୃଷ୍ଟି ହେବା ସମ୍ଭାବନା ରହିଛି । ଏହାର ପ୍ରଭାବରେ ୨୭ ତାରିଖ ଯାଏଁ ରାଜ୍ୟରେ ପ୍ରବଳରୁ ଅତି ପ୍ରବଳ ବର୍ଷା ହେବା ଆଶଙ୍କା ଥିବା କହିଛି ଭୁବନେଶ୍ୱର ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର । ସମୁଦ୍ର ଅଶାନ୍ତ ଥିବାରୁ ମତ୍ସ୍ୟଜୀବୀଙ୍କୁ ସମୁଦ୍ର ଭିତରକୁ ଯିବାକୁ ବାରଣ କରଯାଇଛି ।
ଅନ୍ୟପଟେ ଆସନ୍ତା ୨୪ ଘଣ୍ଟା ପାଇଁ ସାରା ରାଜ୍ୟରେ ପ୍ରବଳରୁ ଅତି ପ୍ରବଳ ବର୍ଷା ନେଇ ସତର୍କତା ଜାରି କରିଛି ପାଣିପାଗ କେନ୍ଦ୍ର । ସୁନ୍ଦରଗଡ ଜିଲ୍ଲାରେ ଭୀଷଣ ବର୍ଷା ନେଇ ଜାରି ହୋଇଛି ରେଡ୍ ଆଲର୍ଟ I ପୁଣି ୪ ଜିଲ୍ଲା କେଉଁଝର, ମୟୁରଭଞ୍ଜ, ସମ୍ବଲପୁର, ଝାରସୁଗୁଡ଼ା ଜିଲ୍ଲାରେ ବି ପ୍ରବଳରୁ ଅତି ପ୍ରବଳ ବର୍ଷା ନେଇ ଅରେଞ୍ଜ ଆଲର୍ଟ ଜାରି କରାଯାଇଛି । ଅନ୍ୟ ୨୫ ଜିଲ୍ଲାରେ ପାଇଁ ଜାରି ହୋଇଛି ୟେଲୋ ଓ୍ବାର୍ଣ୍ଣିଂ । ତେବେ ୨୭ ପରେ ପାଗରେ ପରିବର୍ତ୍ତନ ହେବାର ସମ୍ଭାବନା ରହିଛି । ଗୋଟିଏ ପରେ ଗୋଟିଏ ଲଘୁଚାପ ପରେ ବି ରାଜ୍ୟର କିଛି ଜିଲ୍ଲା ମାନଙ୍କରେ ଦେଖିବାକୁ ମିଳିଛି ନିଅଣ୍ଟିଆ ବର୍ଷା । ତେବେ ମୌସୁମୀ ଋତୁ ଜାରି ରହିଥିବାରୁ ନିଅଣ୍ଟିଆ ଭରଣା ହେବା ଆଶା କରାଯାଉଛି ।