ନନ୍ଦିଘୋଷ ବ୍ୟୁରୋ : ପୁଣି ମୈଦାନକୁ ଓଲ୍ହାଇବେ ସୁର । ଜଟଣୀରୁ ନିର୍ବାଚନ ଲଢ଼ିବା ନେଇ ବରିଷ୍ଠ କଂଗ୍ରେସ ନେତା ସୁରେଶ କୁମାର ରାଉତରାୟ ସଂକେତ ଦେଇଛନ୍ତି । କଂଗ୍ରେସ ଟିକେଟରୁ ଜଟଣୀରୁ ସେ ଲଢିବେ ବୋଲି କହିଥିବାବେଳେ ଲୋକ ଚାହିଁଲେ ଲଢ଼ିବି ବୋଲି କହିଛନ୍ତି । ମୁଁ ଛାଡି ଦେଇଥିଲି ବୋଲି ଏଥର କଂଗ୍ରେସ ଜଟଣୀରେ ହାରିଲା । ୨୦୨୯ରେ ଏଥର ଜଟଣୀରେ କଂଗ୍ରେସ ଆସିବ । ଲୋକଙ୍କ ସହ ଆମେ ମିଶୁଛୁ । ବିଭିନ୍ନ କାର୍ଯ୍ୟକ୍ରମରେ ଯୋଗଦେଉଛି । ଆମ ପାଖରେ ଶକ୍ତି, ସଂଗଠନ, ପଇସା ଅଛି । ତେଣୁ ଲଢ଼ିବୁ ଆଉ ଜିତିବୁ ବୋଲି ଦମ୍ଭୋକ୍ତି ଦେଖାଇଛନ୍ତି ସୁର ।
ନନ୍ଦିଘୋଷ ବ୍ୟୁରୋ : ଯୁକ୍ତ ଦୁଇ ପରୀକ୍ଷାକୁ ଆଉ ମାତ୍ର ୭ ଦିନ ବାକି ଅଛି । ହେଲେ ପ୍ରଶ୍ନପତ୍ର ଲିକକୁ ନେଇ ଏବେଠାରୁ ସନ୍ଦେହ ଉପୁଜିଲାଣି । ପ୍ରଶ୍ନପତ୍ର ହବ ଭାବେ ଚିହ୍ନଟ ବିଜେବି ଜୁନିଅର କଲେଜ ଅଧ୍ୟକ୍ଷ ଏନେଇ ସନ୍ଦେହ ପ୍ରକଟ କରିଛନ୍ତି । ଯେଉଁ ସିସିଟିଭିକୁ ଆଧାର କରି କପି ରୋକିବାର ଦାବି କରୁଛି ଉଚ୍ଚ ମାଧ୍ୟମିକ ଶିକ୍ଷା ପରିଷଦ, ସେହି ସିସିଟିଭି ଯୋଗୁଁ ପ୍ରଶ୍ନପତ୍ର ଲିକ୍ ହେବା ନେଇ ଆଶଂକା ରହିଛି । ସେପଟେ ଏପରି ଘଟଣା ହେଲେ, କାର୍ଯ୍ୟାନୁଷ୍ଠାନର ପ୍ରତିଶୃତି ଦେଇଛି ମାଧ୍ୟମିକ ଶିକ୍ଷା ପରିଷଦ ।
ସିସିଟିଭି କପି ଧରିବ ନା ପ୍ରଶ୍ନପତ୍ର ଲିକ୍ କରିବ ? ୨୧୧ଟି ପରୀକ୍ଷା ପରିଚାଳନା ହବରେ ଏଆଇ କ୍ୟାମେରା ଓ ୧୩୫୭ ପରୀକ୍ଷା କେନ୍ଦ୍ରରେ ସିସିଟିଭି ଲଗାଇ ପରୀକ୍ଷା ଅନିୟମିତତା ରୋକିବାକୁ ଲକ୍ଷ୍ୟ ରଖିଛନ୍ତି ସରକାର । ହେଲେ ଏହି ସିସିଟିଭି ପ୍ରଶ୍ନପତ୍ର ଲିକର ମାଧ୍ୟମ ପାଲଟିବା ନେଇ ଆଶଂକା ଦେଖା ଦେଇଛି । ପରୀକ୍ଷା ହବର ମୁଖ୍ୟମାନେ ଏପରି ସନ୍ଦେହ କରିଛନ୍ତି । ରାଜ୍ୟର ସବୁଠାରୁ ପ୍ରମୁଖ ହବ ବିଜେବି ଜୁନିଅର କଲେଜର ଅଧ୍ୟକ୍ଷ ଡକ୍ଟର ରଞ୍ଜନ ବଳ ସିସିଟିଭିକୁ ନେଇ ଚଞ୍ଚକତାର ଗନ୍ଧ ବାରିଛନ୍ତି । ସିସିଟିଭିରେ ଜଗିବାକୁ କୁହାଯାଇଛି । ହେଲେ କେହି ଚିନ୍ତା କରୁ ନାହାନ୍ତି ଯେ ସିସିଟିଭି ପ୍ରଶ୍ନ କ୍ୟାପଚର କରିଦେବ । ମୁଖ୍ୟ ମନିଟରିଂ ରୁମରେ କେହି ତାକୁ ଦେଖି ବାହାରେ କାହିଁକି ପ୍ରଘଟ କରି ପାରିବେନି ? ସଫ୍ଟୱେରରେ ସବୁ ହୋଇ ପାରିବ । ଏପରି କହି ପରୀକ୍ଷା ଦାୟିତ୍ବରେ ଥିବା ବ୍ୟକ୍ତି ବିଶେଷମାନେ ବି ଟାର୍ଗେଟକୁ ଆସିଛନ୍ତି । ସୁପରିଟେଣ୍ଡେଣ୍ଟଙ୍କ ପାଖରେ ତାଲା ଚାବି ରହିବା ଦରକାର । ସେପଟେ ସିଏଚଏସଇକୁ ଏଆଇ କ୍ୟାମେରା ଉପରେ ଭରସା ରହିଛି । ଏହାର ବ୍ୟତିକ୍ରମ ହେଲେ ଆଇନଗତ କାର୍ଯ୍ୟାନୁଷ୍ଠାନର ଚେତାବନୀ ଦିଆଯାଇଛି ।
ଚଳିତ ଥର ନିର୍ଦ୍ଧାରିତ ତାରିଖ ବଦଳରେ ବିଳମ୍ବରେ ପହଞ୍ଚି ପାରେ ପ୍ରଶ୍ନପତ୍ର । ଆସନ୍ତା ଫେବୃଆରୀରେ ଟ୍ରେଡ ୟୁନିଅନ ଦେଇଥିବା ଭାରତ ବନ୍ଦ ଡାକରା ଯୋଗୁ ଏହା ୧୨ ତାରିଖରୁ ଯାଇ ପାରିବ ନାହିଁ । ଏଥିପାଇଁ ଦିନକ ବିଳମ୍ବ ହେବ । ପିଲାମାନେ ଯଦି ତିନି ଘଣ୍ଟା ପୂର୍ବରୁ ପରୀକ୍ଷା ହଲ ଛାଡ଼ିବେ, ସେମାନେ ନିଜ ସହ ପ୍ରଶ୍ନପତ୍ର ବାହାରକୁ ନେଇ ପାରିବେ ନାହିଁ । ସେଥିରେ ରୋଲ ନମ୍ବର ଲେଖା ହୋଇଥିବ । ଆଗୁଆ ଗଲେ ପ୍ରଶ୍ନପତ୍ର ଡିପୋଜିଟ କରି ଯିବାକୁ ପଡ଼ିବ । ପରୀକ୍ଷା ସରିବା ପରେ ସେମାନେ ଏହା ନେଇ ପାରିବେ । ଅନଲାଇନ ଖାତା ଦେଖା ହେଉଥିବାରୁ, ବିଜ୍ଞାନ ଓ ବାଣିଜ୍ୟ ପିଲା କେବଳ ବ୍ଲାକ ବଲ ପଏଣ୍ଟ ପେନ ବ୍ୟବହାର କରିବେ । କଳା ଓ ଧନ୍ଦାମୂଳକ ପିଲା ବ୍ଲୁ କିମ୍ବା ବ୍ଲାକ ପେନ ବ୍ୟବହାର କରି ପାରିବେ । ଡ୍ରେସ, ଜୋତା ଓ ଜ୍ଯାମିତି ବାକ୍ସ କଡ଼ାକଡି ଚେକିଂ ହେବ । ପୁଅ ଓ ଝିଅଙ୍କ ପାଇଁ ଅଲଗା ଅଲଗା ଏଣ୍ଟ୍ରି ପଏଣ୍ଟ ରହିବ । ଏସବୁ ଠିକ ଭାବେ ପାଳନ କରିବାକୁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଛନ୍ତି । ଆସନ୍ତା ଫେବୃଆରୀ ୧୮ରୁ ମାର୍ଚ୍ଚ ୨୮ ଯାଏ ଯୁକ୍ତ ଦୁଇ ପରୀକ୍ଷା ଅନୁଷ୍ଠିତ ହେବ । ଏହା ୨୩ଟି ସିଟିଂରେ ଚାଲିବ । ଚଳିତ ବର୍ଷ ୪ ଲକ୍ଷ ୧ ହଜାର ୬୩୨ ଜଣ ଛାତ୍ରଛାତ୍ରୀ ଫର୍ମ ଫିଲ ଅପ୍ କରିଛନ୍ତି ।
ନନ୍ଦିଘୋଷ ବ୍ୟୁରୋ : ବିଜେପି ସରକାରରେ ଦିନ ପରେ ଦିନ ଗଡ଼ି ଚାଲିଛି । ହେଲେ ଚାଷୀଙ୍କ ସମସ୍ୟାରେ ସୁଧାର ଆସୁନି । ଧାନ ସଂଗ୍ରହରେ ଅନିୟମିତତା ହେଉଥିବାରୁ ଅନ୍ନଦାତା ଏବେ ରାଜରାସ୍ତାକୁ ଆସିବାକୁ ବାଧ୍ୟ ହେଉଛନ୍ତି । ହେଲେ ସରକାର ନିରବଦ୍ରଷ୍ଟା ସାଜିଥିବା ଅଭିଯୋଗ ହୋଇଛି । ଆଜି ପୁଣି ଥରେ ଚାଷୀଙ୍କ ପାଇଁ ସ୍ବର ଉଠାଇ ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ଚିଠି ଲେଖିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ । ମଣ୍ଡି ଅବ୍ୟବସ୍ଥା ବିରୋଧରେ ନବୀନ ଏହି ଚିଠି ଲେଖି ୭୨ ଘଣ୍ଟା ଭିତରେ ସବୁ ବ୍ୟବସ୍ଥିତ କରିବାକୁ ଦାବି କରିଛନ୍ତି ।
ମଣ୍ଡିରେ ଘାଣ୍ଟି ହେଉଛି ଚାଷୀ । ହେଲେ ଧାନ ସଂଗ୍ରହ ନେଇ ନିର୍ବାଚନୀ ପ୍ରତିଶୃତିକୁ ପାଳନ କରିବା କ୍ଷେତ୍ରରେ ବିଜେପି ଚରମ ବିଫଳତା ଦେଖାଇଚାଲିଛି । ଧାନ ସଂଗ୍ରହ ସମୟରେ ରାଜ୍ୟର ଅନ୍ନଦାତାମାନେ କିପରି ବ୍ୟବସ୍ଥାଗତ ଶୋଷଣ ଓ କଷଣର ସମ୍ମୁଖୀନ ହେଉଛନ୍ତି । ସରକାର ଦୃଷ୍ଟି ଦେବାକୁ ପୁଣି ଥରେ ଧ୍ୟାନ ଆକର୍ଷଣ କରିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ । ମଣ୍ଡିରେ ଅବ୍ୟବସ୍ଥା ଓ ଚାଷୀଙ୍କ ସମସ୍ୟା ନେଇ ସେ ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ଚିଠି ଲେଖିଛନ୍ତି । କୃଷି କ୍ଷେତ୍ରକୁ ମିଳିଛି ପ୍ରଶାସନିକ ଉଦାସୀନତା । ଲୋକଙ୍କୁ ଦେଇଥିବା ନିର୍ବାଚନ ପ୍ରତିଶ୍ରୁତି ପାଳନରେ ବିଫଳତା ଯୋଗୁଁ ଚଳିତ ଖରିଫ୍ ଧାନ ସଂଗ୍ରହ ପ୍ରକ୍ରିୟା ବାଧାପ୍ରାପ୍ତ ହୋଇଛି । ଯାହା ଚାଷୀମାନଙ୍କ ପାଇଁ ଏକ ସଂଘର୍ଷମୟ ସ୍ଥିତି ସୃଷ୍ଟି କରିଛି । ୨୦୨୪ ନିର୍ବାଚନ ସମୟରେ ବିଜେପିର ନିର୍ବାଚନୀ ଇସ୍ତାହାରର ଦୁଇ ନମ୍ବର ପଏଣ୍ଟରେ ଧାନର ସର୍ବାଧିକ ସହାୟକ ମୂଲ୍ୟ ବୃଦ୍ଧି ଓ କଟନୀ-ଛଟନୀ ସମ୍ପୂର୍ଣ୍ଣ ବନ୍ଦ କରିବା ସମ୍ପର୍କରେ ପ୍ରତିଶୃତି ଦିଆଯାଇଥିଲା । ହେଲେ ମଣ୍ଡି ଗୁଡ଼ିକ ନିର୍ଯାତନାର କେନ୍ଦ୍ର ପାଲଟିଥିବା ନେଇ ନବୀନ କଟାକ୍ଷ କରିଛନ୍ତି । ରାଜ୍ୟରେ ଥିବା ମଣ୍ଡି ଗୁଡିକ ଏବେ ନିର୍ଯାତନାର କେନ୍ଦ୍ର ପାଲଟି ଯାଇଛି । ମିଲର ଓ ପ୍ରଶାସନିକ ଅଧିକାରୀମାନଙ୍କ ମଧ୍ୟରେ ମଧୁଚନ୍ଦ୍ରିକା ଯୋଗୁଁ ଚାଷୀମାନେ ସେମାନଙ୍କ କଠିନ ପରିଶ୍ରମର ମୂଲ୍ୟ ପାଉନାହାନ୍ତି । ନିର୍ବାଚନ ସମୟରେ ବିଜେପି ଦେଇଥିବା ମିଥ୍ୟା ପ୍ରତିଶ୍ରୁତିର ଏହା ଏକ ଉଦାହରଣ ନୁହେଁ କି ବୋଲି ନବୀନ ପ୍ରଶ୍ନ କରିଛନ୍ତି । ଇନପୁଟ ସବ୍ସିଡି ପ୍ରଦାନ ପାଇଁ ୧୫୦ କ୍ୱିଣ୍ଟାଲ ସିଲିଙ୍ଗ୍ ଆଉ ଏକ ପ୍ରତାରଣାର ଉଦାହରଣ । ଏଥିସହ ନିକଟରେ କେନ୍ଦ୍ର ସରକାର ଧାନର ସଂଗ୍ରହ ମୂଲ୍ୟରେ ୬୯ ଟଙ୍କା ବୃଦ୍ଧି କରିଛନ୍ତି । ହେଲେ ଓଡ଼ିଶାର ଚାଷୀଙ୍କୁ ଏହି ବର୍ଦ୍ଧିତ ୬୯ ଟଙ୍କା ମିଳୁ ନାହିଁ ।
ଧାନ ମଣ୍ଡି ମାନଙ୍କରେ ସଂଗ୍ରହ ପ୍ରକ୍ରିୟା ମନ୍ଥର ଗତିରେ ଚାଲିଥିବା ଅଭିଯୋଗ ହୋଇଛି । । ବାଧ୍ୟ ହୋଇ ଧାନକୁ କାକର ଓ ଚୋରିରୁ ରକ୍ଷା କରିବା ପାଇଁ ଚାଷୀ ମାନଙ୍କୁ ରାତିସାରା ଜଗି ରହିବାକୁ ପଡୁଛି । ମଣ୍ଡି ଗୁଡିକରେ ସର୍ବନିମ୍ନ ସୁବିଧାର ଅଭାବ, ଟୋକନ ବ୍ୟବସ୍ଥାରେ ବିଫଳତା ଏବଂ ପ୍ରାପ୍ୟ ପ୍ରଦାନରେ ଅହେତୁକ ବିଳମ୍ବ ଆଦି ସମସ୍ୟା ଚାଷୀ ମାନଙ୍କୁ ଆନ୍ଦୋଳନାତ୍ମକ ମାର୍ଗ ବାଛିବାକୁ ବାଧ୍ୟ କରୁଛି । ଏପରିକି ଡିବିଟି ବାବଦରେ ପ୍ରାପ୍ୟ ବି ଭେଳିକି ହେଉଛି । ଚାଷୀ ସ୍ବାର୍ଥ ରକ୍ଷା ପାଇଁ ୭୨ ଘଣ୍ଟାର ସମୟ ଦେଇଛନ୍ତି ବିରୋଧୀ ଦଳ ନେତା । ଏଥିସହ ବ୍ୟବସ୍ଥିତ ଧାନ ସଂଗ୍ରହ ପ୍ରକ୍ରିୟା ପାଇଁ ୪ ସୂତ୍ରୀ ପରାମର୍ଶ ଦେଇଛନ୍ତି ନବୀନ । ପ୍ରଥମେ କଟନୀ ଛଟନୀ ବନ୍ଦ କରିବା ପାଇଁ ତୁରନ୍ତ ମଣ୍ଡି ଗୁଡିକରେ ସ୍ପେଶାଲ ସ୍କ୍ୱାଡ ନିୟୋଜିତ କରାଯାଉ ଏବଂ ଦୋଷୀ ମିଲ୍ ମାଲିକ ଓ ସରକାରୀ ଅଫିସରଙ୍କ ବିରୁଦ୍ଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ । ଦ୍ବିତୀୟରେ ଇନପୁଟ୍ ସବ୍ସିଡି ପ୍ରଦାନ ପାଇଁ ରଖାଯାଇଥିବା ଚାଷୀ ପିଛା ସର୍ବାଧିକ ୧୫୦ କ୍ୱିଣ୍ଟାଲ ସିଲିଙ୍ଗ ସର୍ତ୍ତ ତୁରନ୍ତ ପ୍ରତ୍ୟାହାର କରାଯାଉ ଏବଂ ରେଜେଷ୍ଟ୍ରିଭୁକ୍ତ ସବୁ ଚାଷୀଙ୍କ ଠାରୁ ସବୁ ଧାନ କିଣାଯାଉ। ତୃତୀୟରେ, ବିଜେପିର ନିର୍ବାଚନ ପ୍ରତିଶୃତି ଅନୁଯାୟୀ ସବୁ ଚାଷୀଙ୍କୁ ଧାନ ସଂଗ୍ରହର ୪୮ ଘଣ୍ଟା ମଧ୍ୟରେ DBT ଜରିଆରେ ସେମାନଙ୍କ ପ୍ରାପ୍ୟ ପ୍ରଦାନ କରାଯାଉ । ଚତୁର୍ଥରେ, ୭୨ ଘଣ୍ଟା ମଧ୍ୟରେ ମଣ୍ଡି ଗୁଡିକରେ ଖୋଲାରେ ପଡିଥିବା ସବୁ ଧାନ ଗୁଡିକୁ ଶତ ପ୍ରତିଶତ ଉଠାଯିବାକୁ ନବୀନ ଦାବି କରିଛନ୍ତି ।
ଦୟା ନୁହେଁ ଅନ୍ନଦାତା ହେଉଛନ୍ତି ସମ୍ମାନର ପାତ୍ର । ହେଲେ ସେମାନଙ୍କ ସ୍ବାର୍ଥ ବିରୋଧୀ କାର୍ଯ୍ୟକ୍ରମ ଯୋଗୁଁ ରାଜ୍ୟବ୍ୟାପୀ ଚାଷୀ ଆନ୍ଦୋଳନ ବ୍ୟାପୁଛି । ହେଲେ ସରକାରଙ୍କ ବିଭିନ୍ନ ମନ୍ତ୍ରୀ ଆନ୍ଦୋଳନରତ ଚାଷୀଙ୍କୁ ବାରମ୍ବାର ନକଲି ଚାଷୀର ଆଖ୍ୟା ଦେଇ ସେମାନଙ୍କୁ ଅପମାନିତ କରୁଥିବା ଅଭିଯୋଗ ହେଉଛି ।
ନନ୍ଦିଘୋଷ ବ୍ୟୁରୋ : ଫ୍ଲାଏ ଆସରୁ ତିଆରି ହେବ ଜୈବିକ ଖତ । କଳକାରଖାନାରୁ ବାହାରୁଥିବା ପାଉଁଶର ହେବ ସଠିକ ବିନିଯୋଗ । ପୂର୍ବରୁ ଏଥିରେ କେବଳ ଇଟା ତିଆରି କରାଯାଉଥିବାବେଳେ ଏବେ ଜୈବିକ ଖତ ପ୍ରସ୍ତୁତ କରିବାକୁ ଯୋଜନା କରାଯାଇଛି । ଏନେଇ ସମ୍ବଲପୁର ବିଶ୍ବବିଦ୍ୟାଳୟ ନେତୃତ୍ବରେ ଏନେଇ ଗବେଷଣା ଆରମ୍ଭ କରିଛନ୍ତି ୩ ସଂସ୍ଥା । ଏହାଦ୍ବାରା ଚାଷରେ ଏହାକୁ ଉପଯୋଗ ସହ ପ୍ରଦୂଷଣରୁ ମୁକ୍ତି ମିଳିବ ବୋଲି ଆଶା କରାଯାଉଛି ।
ପାଉଁଶ ପ୍ରଦୂଷଣରୁ ମିଳିବ ମୁକ୍ତି । ଚାଷକାମରେ ବ୍ଯବହାର ହେବ କଳକାରଖାନାର ବର୍ଜ୍ୟ । ଫ୍ଲାଏ ଆସରୁ ତିଆରି ହେବ ଜୈବିକ ଖତ । ସମ୍ବଲପୁର ବିଶ୍ବବିଦ୍ୟାଳୟ ପକ୍ଷରୁ ଆରମ୍ଭ ହେଲା ଗବେଷଣା । ବିଭିନ୍ନ କଳକାରଖାନାରୁ ବାହାରୁଛି ଲକ୍ଷ ଲକ୍ଷ ଟନ ପାଉଁଶ । ଏହାଦ୍ବାରା ବାୟୁମଣ୍ଡଳ ପ୍ରଦୂଷିତ ହେବା ସହ ବିଭିନ୍ନ ସମୟରେ ପାଣି ଓ ଜମିରେ ମିଶି ସମସ୍ଯା ସୃଷ୍ଟି କରୁଛି । ଏହାକୁ ଦୃଷ୍ଟିରେ ରଖି ସମ୍ବଲପୁର ବିଶ୍ବ ବିଦ୍ୟାଳୟ ପକ୍ଷରୁ ଆରମ୍ଭ ହୋଇଛି ଗବେଷଣା । ଏହି ବର୍ଜ୍ଯକୁ ଜୈବିକ ଖତ କରିବାକୁ ବିଶ୍ବବିଦ୍ୟାଳୟ ଜୈବ ପ୍ରଯୁକ୍ତି ଓ ଜୈବ ସୂଚନା ବିଜ୍ଞାନ ବିଭାଗ ପକ୍ଷରୁ ଗବେଷଣା କରାଯାଉଛି । ଏପରି ହେଲେ ପ୍ରଦୂଷଣ ନିୟନ୍ତ୍ରଣ ସହ ଏହା ଚାଷ କାମରେ ଉପଯୋଗୀ ହୋଇପାରିବ ବୋଲି ଆଶା କରାଯାଉଛି ।
ପୂର୍ବରୁ ଏହି ପାଉଁଶରେ କେବଳ ଇଟା ତିଆରି କରାଯାଉଥିଲା । ଏହା ପର୍ଯ୍ଯାପ୍ତ ନଥିବାରୁ ରାସ୍ତାକଡ଼ରେ ପ୍ରତିଦିନ ଗଦା ହେଉ ରହୁଛି । ଖରାଦିନେ ପବନରେ ଉଡ଼ି ପ୍ରଦୂଷିତ କରୁଛି । ତେଣୁ ସମ୍ବଲପୁର ବିଶ୍ଵବିଦ୍ୟାଳୟ ନେତୃତ୍ୱରେ ୪ ସଂସ୍ଥା ଓ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ଏହି ପ୍ରକଳ୍ପ ଉପରେ ଗବେଷଣା ଆରମ୍ଭ କରିଛନ୍ତି l କଳକାରଖାନା ବିଷାକ୍ତ ପାଉଁଶରେ ଥିବା ବିଷାକ୍ତ ଧାତବକୁ ଅଲଗା କରି ଖତ ତିଆରି କରାଯାଉଛି । ଖୁବଶୀଘ୍ର ଏହି ପ୍ରକଳ୍ପ କାମ ଶେଷ ହୋଇ ଚାଷ ଜମିରେ ବ୍ୟବହାର କରାଯିବ ବୋଲି କହିଛନ୍ତି ଗବେଷଣା ରତ ଟିମ୍ । ଗବେଷଣା ସଫଳ ହେଲେ ପ୍ରଦୂଷଣର ମୁକ୍ତି ମିଳିବା ସହ କାରଖାନାର ଏହି ବର୍ଜ୍ୟ ପରିଚାଳନାରୁ ମୁକ୍ତି ମିଳି ପାରିବ ।
ନନ୍ଦିଘୋଷ ବ୍ୟୁରୋ : ପ୍ରେମ ସପ୍ତାହରେ ପ୍ରେମିକଙ୍କ ନାରକୀୟ କାଣ୍ଡ । ପ୍ରପୋଜ ଡେ ରେ କିଲର ସାଜିଲା ପ୍ରେମିକା । ତ୍ରିକୋଣୀୟ ପ୍ରେମରୁ ରାଜଧାନୀରେ ଗଡ଼ିଲା ମୁଣ୍ଡ, ପଡିଲା ରକ୍ତର ଛିଟା । ସତ୍ୟବ୍ରତ ପ୍ରଧାନଙ୍କୁ ୪ ଜଣ ହତ୍ୟା କରିଥିବା ସନ୍ଦେହ । ସେପଟେ ଶିଶୁଭବନ ଦୁର୍ଘଟଣା ସହ ମର୍ଡର କେସ ଲିଙ୍କ ।
ରିଲ୍ ରେ ନାୟିକା, ରିୟଲରେ ଖଳନାୟିକା । ପ୍ରପୋଜ ଡେ’ ରେ ପ୍ରେମିକା ଖେଳିଲା ରକ୍ତର ହୋଲି । ତଣ୍ଟି କାଟିବା ପରେ ଟ୍ରାଇଙ୍ଗୁଲାର ଲଭ୍ ଷ୍ଟୋରୀର ଦି ଏଣ୍ଡ । କ୍ରାଇମ ସ୍ପଟରୁ କାର୍ ଫେରାର ବେଳେ ଶିଶୁଭବନ ଛକରେ ଦୁର୍ଘଟଣା । ଇଏ ହେଉଛନ୍ତି ମୃତକ ସତ୍ୟବ୍ରତ ପ୍ରଧାନ । ଘର ବ୍ରହ୍ମଗିରିର ହାସିନାପୁର । ପେଶାରେ ଡ୍ରାଇଭର । ଲିଜା ନାମ୍ନୀ ଜଣେ ଯୁବତୀଙ୍କ ସହ ପ୍ରେମ ସମ୍ପର୍କରେ ଥିଲେ । ଲିଜା ଏକ ପାର୍ଲରରେ କାମ କରୁଥିଲେ । କିନ୍ତୁ ଲିଜା ସତ୍ୟବ୍ରତଙ୍କ ସହ ପ୍ରେମର ନାଟକ କରୁଥିବା ବେଳେ ପ୍ରକୃତରେ ଭଲ ପାଉଥିଲା ଦିନେଶ ନାମକ ଆଉ ଜଣେ ଯୁବକକୁ । ଏ କଥା ବୋଧ ହୁଏ ସତ୍ୟବ୍ରତ ଆଭାସ ପାଇସାରିଥିଲା । ତେଣୁ ଭାଲେଣ୍ଟାଇନ୍ସ ସପ୍ତାହରେ ଏସବୁର ରଫାଦଫା ପାଇଁ ନିଳାଦ୍ରୀ ବିହାର ସେକ୍ଟର ୨ରେ ଲିଜା ରହୁଥିବା ଭଡ଼ା ଘରେ ପହଞ୍ଚି ଥିଲା ସତ୍ୟବ୍ରତ। ପୂର୍ବ ପ୍ରସ୍ତୁତି ମୁତାବକ ଭଡାଘରେ ଉପସ୍ଥିତ ଥିଲେ ଲିଜା, ଦିନେଶ ଓ ୪ ସହଯୋଗୀ । ଉଭୟ ପକ୍ଷ ଭିତରେ କିଛି ସମୟର ଯୁକ୍ତିତର୍କ ପରେ ସତ୍ୟବ୍ରତଙ୍କ ତଣ୍ଟି କାଟି ଦେଇଥିଲା ଅଭିଯୁକ୍ତ । ରକ୍ତାକ୍ତ ଅବସ୍ଥାରେ କ୍ୟାପିଟାଲରେ ଭର୍ତ୍ତି ପରେ ବଡ଼ି ଭୋରରୁ ତାଙ୍କର ମୃତ୍ୟୁ ଘଟିଛି ।
ମୃତ ସତ୍ୟବ୍ରତ ଟ୍ୟାକ୍ସି ଡ୍ରାଇଭର ଭାବେ କାମ କରୁଥିଲେ । ସତ୍ୟବ୍ରତ ଚଳାଉଥିବା ଗାଡିର ମାଲିକ ହତ୍ୟାକାଣ୍ଡ ସମ୍ପର୍କରେ ଆଜି ଭୋରରୁ ଜାଣିବାକୁ ପାଇଥିଲେ । ଡବଲ ଚାବି ସାହାଯ୍ୟରେ ଆଉ ଜଣେ ଡ୍ରାଇଭରଙ୍କୁ ଧରି ଗାଡି ନେଇ ଯାଉଥିବା ବେଳେ ଶିଶୁଭବନ ଛକରେ ହୋଇଥିଲା ଦୁର୍ଘଟଣା । କ୍ୟାପିଟାଲ ଥାନା ପୋଲିସ ଏହି ଘଟଣାରେ ସଂପୃକ୍ତ ଡ୍ରାଇଭରକୁ ଅଟକ ରଖିଥିବା ବେଳେ ଗାଡି ମାଲିକଙ୍କୁ ହତ୍ୟାକାଣ୍ଡର ପ୍ରତ୍ୟକ୍ଷଦର୍ଶୀ ଭାବେ ଗ୍ରହଣ କରିଛି ଚନ୍ଦ୍ରଶେଖରପୁର ଥାନା ପୋଲିସ । ସେପଟେ ରାତି ସାଢ଼େ ୪ ଟାରେ ମର୍ଡର ମିଷ୍ଟ୍ରିର ମାଷ୍ଟରମାଇଣ୍ଡ ଲିଜା ଇନଷ୍ଟାଗ୍ରାମରେ ନିଜ ଷ୍ଟାଟସ ଅପଡେଟ କରିଛି । ପରିବାର ଲୋକଙ୍କୁ ମଧ୍ୟ ଫୋନ ଯୋଗେ ବିଭ୍ରାନ୍ତ କରୁଥିବା ରେକର୍ଡ଼ିଂ ମଧ୍ୟ ପୋଲିସର ଟେକ୍ନିକାଲ ଟିମ ହାତରେ ଲାଗିଛି । ଘର ମାଲିକଙ୍କ କହିବା ମୁତାବକ ଅଭିଯୁକ୍ତ ଦିନେଶ ଓ ଲିଜା ସ୍ୱାମୀ ସ୍ତ୍ରୀର ପରିଚୟ ଦେଇ ଦୀର୍ଘ ୮ ମାସ ହେଲା ଘର ଭଡ଼ା ନେଇ ରହୁଥିଲେ । ହେଲେ ଘରେ ଘରେ ଏଭଳି କାଣ୍ଡ ଚାଲୁଥିବା ନେଇ ସେ ଆଦୌ ଜାଣିନଥିଲେ । ପ୍ରେମ ପାଇଁ ବାଜିରେ ଲାଗୁଛି ଜୀବନ । ଗଡୁଛି ଗୋଟିଏ ପରେ ଗୋଟିଏ ମୁଣ୍ଡ । ତେଣୁ ଏ ପୁରା ଘଟଣାରେ ଆଉ କିଏ କିଏ ସମ୍ପୃକ୍ତ ସେମାନଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି ସ୍ପେଶାଲ ଟିମ ।
ନନ୍ଦିଘୋଷ ବ୍ୟୁରୋ : ଭଦ୍ରକ ଜିଲ୍ଲା ବାସୁଦେବପୁରରେ ଆଣ୍ଠେଇ ପଡି଼ଲାଣି ଶିକ୍ଷା ବ୍ୟବସ୍ଥା । ବ୍ଲକର ବିଭିନ୍ନ ସ୍କୁଲରେ ଆବଶ୍ୟକୀୟ ଶ୍ରେଣୀ ଗୃହ ନାହିଁ । ଫଳରେ ଖରା, ବର୍ଷା ଓ ଶୀତକୁ ଖାତିର ନକରି ପିଲା ବାରଣ୍ଡାରେ ବସି ପାଠ ପଢୁଛନ୍ତି । ହେଲେ ସ୍ଥାନୀୟ ପ୍ରଶାସନ ଦୃଷ୍ଟି ଦେଉନଥିବା ଅଭିଯୋଗ ହୋଇଛି ।
କାନ୍ଥରୁ ଝଡ଼ି ପଡିଲାଣି ଇଟା । ପଦାକୁ ରଡ଼ ଜଳଜଳ ହୋଇ ଦେଖାଗଲାଣି । ଏ ହେଉଛି ଭଦ୍ରକ ବାସୁଦେବପୁର ବ୍ଲକ ବିନୋବାନଗର ଉଚ୍ଚ ପ୍ରାଥମିକ ବିଦ୍ୟାଳୟର ଅବସ୍ଥା । ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ୨୧୬ ଜଣ ଛାତ୍ରଛାତ୍ରୀ ପାଠ ପଢୁଛନ୍ତି । ହେଲେ ସ୍କୁଲରେ ଆବଶ୍ୟକୀୟ ଶ୍ରେଣୀ ଗୃହ ନାହିଁ । ତିନୋଟି ଶ୍ରେଣୀ ଗୃହରେ ଛଅଟି ଶ୍ରେଣୀର ଛାତ୍ରଛାତ୍ରୀ ପାଠ ପଢୁଛନ୍ତି । ବାକି ପ୍ରଥମ ଓ ଦ୍ବିତୀୟ ଶ୍ରେଣୀର ଛାତ୍ରଛାତ୍ରୀ ଖରା, ବର୍ଷା ଓ ଶୀତକୁ ଖାତିର ନକରି ବାରଣ୍ଡାରେ ବସୁଛନ୍ତି । ଅଢୁଆଁ ପଞ୍ଚାୟତ ନନ୍ଦପୁର ପ୍ରାଥମିକ ବିଦ୍ୟାଳୟରେ ବି ଦେଖିବାକୁ ମିଳିଛି ସମାନ ଅବସ୍ଥା । ଶ୍ରେଣୀ ଗୃହ ଅଭାବରୁ କୁନିକୁନି ଛାତ୍ରଛାତ୍ରୀ ମାନେ ବାରଣ୍ଡାରେ ପାଠ ପଢୁଛନ୍ତି ।
ସେହିଭଳି ମନ୍ଦାରୀ ପ୍ରାଥମିକ ବିଦ୍ୟାଳୟରେ ଗୋଟିଏ ଘରେ ପାଠପଢୁଛନ୍ତି ଛଅ ଗୋଟି ଶ୍ରେଣୀ ପିଲା । ବାସୁଦେବପୁର ବ୍ଲକରେ ୨୭୭ ସରକାରୀ ପ୍ରାଥମିକ ବିଦ୍ୟାଳୟ ରହିଛି । ହେଲେ ଅନେକ ସ୍କୁଲରେ ଲାଗି ରହିଛି ଭିତ୍ତିଭୂମି ସମସ୍ୟା । ଅନ୍ୟପଟେ ଖୁବଶୀଘ୍ର ସମସ୍ୟାର ସମାଧାନ କରାଯିବ ବୋଲି ପ୍ରତିଶୃତି ଦେଇଛନ୍ତି BEO । ବିଦ୍ୟାଳୟ ସମସ୍ୟା ପ୍ରତି ସରକାର ଦୃଷ୍ଟି ଦେଇ ଆବଶ୍ୟକୀୟ ଶ୍ରେଣୀ ଗୃହ ଯୋଗାଇ ଦେବାକୁ ଦାବି ହୋଇଛି ।
ନନ୍ଦିଘୋଷ ବ୍ୟୁରୋ : କେନ୍ଦୁଝର ଜିଲ୍ଲାରେ ନୂତନ ବଗିଚା ଚାରା ରୋପଣ କାର୍ଯ୍ୟରେ ବ୍ୟାପକ ଦୁର୍ନୀତି ଅଭିଯୋଗ । ପଚାଶ ଲକ୍ଷରୁ ଉର୍ଦ୍ଧ୍ଵ ଟଙ୍କା ଖର୍ଚ୍ଚ ପରେ ବି ବଗିଚାରେ ନାହିଁ ଗଛ । ମାତ୍ର ରକ୍ଷଣାବେକ୍ଷଣା ପାଇଁ ଶ୍ରମିକଙ୍କ ନାଁରେ ଦୈନିକ ଉଠୁଛି ଟଙ୍କା । ଯାହାକୁ ନେଇ ଚାଷୀଙ୍କ ମହଲରେ ତୀବ୍ର ଅସନ୍ତୋଷ ଦେଖାଦେଇଛି ।
ନୂତନ ବଗିଚା ଚାରା ରୋପଣ କାର୍ଯ୍ୟରେ ଦୁର୍ନୀତିର ଗନ୍ଧ । ପଚାଶ ଲକ୍ଷରୁ ଉର୍ଦ୍ଧ୍ଵ ଟଙ୍କା ଖର୍ଚ୍ଚ ପରେ ବି ବଗିଚାରେ ନାହିଁ ଗଛ । ମାତ୍ର ରକ୍ଷଣାବେକ୍ଷଣା ପାଇଁ ଶ୍ରମିକଙ୍କ ନାଁରେ ଦୈନିକ ଉଠୁଛି ଟଙ୍କା । ଖୋଦ ମୁଖ୍ୟମନ୍ତ୍ରୀଙ୍କ ଜିଲ୍ଲାରୁ ଆସିଛି ଏଭଳି ସଙ୍ଗୀନ ଅଭିଯୋଗ । ଚମ୍ପୁଆ ବ୍ଲକ ଜଜପଶି ପଞ୍ଚାୟତ ବଳା ଗାଁରେ ନୂତନ ବଗିଚା ଚାରା ରୋପଣ ପାଇଁ ଟେଣ୍ଡରେ ଆହ୍ଵାନ ହୋଇଥିଲା । ମନରେଗା ପାଣ୍ଠିରୁ ୧୯ ଲକ୍ଷ ଓ ଜିଲ୍ଲା ଖଣିଜ ପାଣ୍ଠିରୁ ୩୭ ଲକ୍ଷରୁ ଉର୍ଦ୍ଧ ଟଙ୍କା ଉଦ୍ୟାନ ବିଭାଗ ତତ୍ତ୍ବାବଧାନରେ BAIF ନାମକ ଏକ ସ୍ବେଚ୍ଛାସେବୀ ଅନୁଷ୍ଠାନକୁ ଯୋଗାଇ ଦିଆଯାଇଥିଲା । ଗାଁର ୧୮ ଜଣ ଚାଷୀଙ୍କ ୭.୨୯ ହେକ୍ଟର ଜମିରେ କାଜୁ ଚାରା ଲଗାଇ ବଗିଚା ସୃଷ୍ଟି ପାଇଁ ଏହି ଅନୁଦାନ ଯୋଗାଇ ଦିଆଯାଇଥିଲା । ଚାରା ରୋପଣ କରି ତିନି ବର୍ଷ ଧରି ରକ୍ଷଣାବେକ୍ଷଣ ପରେ ଚାଷୀଙ୍କୁ ବଗିଚା ହସ୍ତାନ୍ତର କରାଯାଇଥାନ୍ତା । ହେଲେ ଚଞ୍ଚକତା କରି ପ୍ରଥମ ବର୍ଷ ବିନା ବାଡ଼ରେ ଗଛ ଲଗାଇ ସଂପୃକ୍ତ ଠିକା ସଂସ୍ଥା ଫେରାର ମାରିଛି । ଯାହାର ଫଳ ସ୍ଵରୂପ ଗଛ ଗୁଡ଼ିକ ଛେଳି ଖାଇ ନଷ୍ଟ କରିଦେଇଛନ୍ତି ।
ବର୍ତ୍ତମାନ ବଗିଚାରେ ଗଛ ନାହିଁ । ଯେଉଁଆଡେ ଦେଖିବେ ଖାଲି ପଡିଆ । ଗଛରେ ପାଣି ଦେବା ପାଇଁ ଖୋଳା ଯାଇଥିବା ବୋରିଙ୍ଗ ଗୁଡ଼ିକରେ ନା ମଟର ବସିଛି ନା ଗଛରେ ପାଣି ଦିଆଯାଉଛି । ହେଲେ ଗଛ ଗୁଡ଼ିକର ରକ୍ଷଣାବେକ୍ଷଣ ପାଇଁ ଶ୍ରମିକଙ୍କ ନାଁରେ ଟଙ୍କା ହରିଲୁଟ୍ ହେଉଛି । ଯାହାକୁ ନେଇ ଚାଷୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଯିବା ସହ ତଦନ୍ତ ଦାବି ହୋଇଛି । ଅନ୍ୟପଟେ ଘଟଣାକୁ ସ୍ଵୀକାର କରିଛନ୍ତି ସହକାରୀ ଉଦ୍ୟାନ କୃଷି ନିର୍ଦ୍ଦେଶକ ।
ନନ୍ଦିଘୋଷ ବ୍ୟୁରୋ : କେନ୍ଦ୍ରାପଡ଼ା ଜିଲ୍ଲା ରାଜନଗରରେ ଚାଷୀଙ୍କୁ ଶୋଷଣ ଚରମ ସୀମାରେ ପହଞ୍ଚିଛି । ଖୁଲମଖୁଲା ମଣ୍ଡି ଓ ମିଲରେ ଚାଷୀଙ୍କୁ ଶୋଷଣ କରାଯାଉଛି । କୁଇଣ୍ଟାଲ ପିଛା ୫ କେଜି ଧାନ କାଟିଦେଉଛନ୍ତି ଖୋଦ ପ୍ୟାକ୍ସ ସଂପାଦକ । କେହି ପ୍ରତିବାଦ କଲେ ଟାର୍ଗେଟ ନାହିଁ ବୋଲି କହି ହଇରାଣ କରାଯାଉଥିବା ଅଭିଯୋଗ ହୋଇଛି । ଚାଷୀଙ୍କ ସମସ୍ୟା ବୁଝିବାକୁ ଜିଲ୍ଲା ପ୍ରଶାସନ କମିଟି ଗଠନ କରିଥିଲେ ସୁଦ୍ଧା ଗ୍ରାଉଣ୍ଡରେ ପହଞ୍ଚିନାହାନ୍ତି କୌଣସି ଅଧିକାରୀ ।
ଚରମ ସୀମାରେ ଚାଷୀ ଶୋଷଣ । ମଣ୍ଡିରୁ ଉଠୁନି ଧାନ । ବେଧଡ଼କ ଚାଲିଛି କଟନୀ ଛଟନୀ । ବେଫିକର ମିଲର ଓ ସମବାୟ ସମ୍ପାଦକ । କେନ୍ଦ୍ରାପଡ଼ା ଜିଲ୍ଲା ରାଜନଗର ବ୍ଲକର ବିଭିନ୍ନ ମଣ୍ଡି ଓ ମିଲରେ ଖୁଲମଖୁଲା ଚାଷୀଙ୍କୁ ଶୋଷଣ କରାଯାଉଛି । ପ୍ୟାକ୍ସ ସଂପାଦକ ଚାଷୀଙ୍କୁ ଜୁଲମ କରି କୁଇଣ୍ଟାଲ ପିଛା ୫ କେଜି ଧାନ କାଟି ଦେଉଛନ୍ତି । କେହି ଅଭିଯୋଗ କଲେ ଟାର୍ଗେଟ ନାହିଁ ବୋଲି କହି ହଇରାଣ କରାଯାଉଥିବା ଅଭିଯୋଗ ହୋଇଛି । ରାଜନଗର ବ୍ଲକର ୧୩ଟି ସେବା ସମବାୟ ସମିତିରେ ଚଳିତ ଥର ଖରିଫ ଧାନ ବିକ୍ରି କରିବା ପାଇଁ ୭ ହଜାର ୧୬୮ ଜଣ ଚାଷୀ ପଞ୍ଜୀକରଣ କରିଛନ୍ତି । ସମସ୍ତ ମଣ୍ଡିକୁ ପ୍ରଥମ ପର୍ଯ୍ୟାୟରେ ୮୦ ହଜାର ୧୯୫ କୁଇଣ୍ଟାଲ ଧାନ କିଣିବାକୁ ଟାର୍ଗେଟ ମିଳିଛି । ମାତ୍ର ଅଧିକାଂଶ ମଣ୍ଡି ନାଁକୁ ମାତ୍ର ଖୋଲିଥିବା ବେଳେ ମିଲର୍ସ ମାନେ ମଣ୍ଡିରୁ ଧାନ ଉଠାଉନାହାନ୍ତି । ଚାଷୀ ସିଧାସଳଖ ନିଜ ଖର୍ଚ୍ଚରେ ଧାନ ମିଲକୁ ନେଇ ମିଲର୍ସଙ୍କ ମନମାନିର ଶିକାର ହେଉଛନ୍ତି ।
ରାଜନଗର ବ୍ଲକର ରାଜନଗର, ନୋଧାବସନ୍ତ, ନାଉକଣା, ଡାଙ୍ଗମାଳ, କୋଇଲିପୁର, ବାଲିସାହିପାଟଣା, ତାଳଚୁଆ ଭାଟପଡା, ଚାନ୍ଦିବାଉଁଶମୂଳ ପ୍ରଭୁତି ମଣ୍ଡିରେ ଚାଷୀଙ୍କୁ ଶୋଷଣ କରାଯାଉଛି । ମିଲର ଓ ମଣ୍ଡି ଜଞ୍ଜାଳ ଭିତରେ ଯୁଝି ହୋଇ ଅନେକ ଚାଷୀ ଶାଗମାଛ ଦରରେ ବାହାର ରାଜ୍ୟକୁ ଧାନ ବିକ୍ରି କରୁଥିବା ଦେଖିବାକୁ ମିଳିଛି । ଅନ୍ୟପଟେ କଟନୀ ଛଟନୀ କଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ଯୋଗାଣ ମନ୍ତ୍ରୀ । ସରକାର ସ୍ଵଚ୍ଛତାର ସହ ମଣ୍ଡିରେ ଧାନ କିଣା ହେବ ବୋଲି ଡିଣ୍ଡିମ ପିଟୁଥିବା ବେଳେ ତାହା ଗ୍ରାଉଣ୍ଡରେ ସ୍ଥିତି ସଂପୂର୍ଣ୍ଣ ଓଲଟା । କେବେ ଚାଷୀଙ୍କ ଠାରୁ ସୁରୁଖୁରୁରେ ଧାନ କିଣା ଯାଉଛି ତାକୁ ହିଁ ଅପେକ୍ଷା ।
ନନ୍ଦିଘୋଷ ବ୍ୟୁରୋ : ଓଡ଼ିଶାରେ ୟୁ-ଟର୍ଣ୍ଣ ସରକାର ଚାଲିଛି ବୋଲି ଅଭିଯୋଗ କରିଛି କଂଗ୍ରେସ । ଗତ ୧୯ ମାସରେ ୧୯ ନିଷ୍ପତ୍ତି ନେଇ ସରକାର ପୁଣି ୟୁ-ଟର୍ଣ୍ଣ ମାରିଛନ୍ତି l ନିର୍ବାଚନ ପ୍ରତିଶ୍ରୁତି ଦେଇ ଓଡିଶାବାସୀଙ୍କୁ ପ୍ରତାରଣା ଦେଇଛନ୍ତି l ଚିଟଫଣ୍ଡ ଟଙ୍କା ଫେରସ୍ତ, ମାଗଣା ଅବଢା ଦେବା, ୩ଶହ ୟୁନିଟ ମାଗଣା ବିଜୁଳି, ଧାଡ଼ି ଦର୍ଶନ, ସୁଭଦ୍ରା ଯୋଜନାରେ ଏକା ଥରକେ ୫୦ ହଜାର ଘୋଷଣା କରିଥିଲେ, ସ୍କୁଲ ଛାତ୍ର ଛାତ୍ରୀ ମାଗଣା ଡ୍ରେସ ଦେବା ଏପରି ଅନେକ ନିର୍ବାଚନ ପୂର୍ବରୁ ଘୋଷଣା କରିଥିଲେ l ହେଲେ ସରକାରକୁ ଆସିଲା ପରେ ତାହା ଦେଲେ ନାହିଁ ବୋଲି ଅଭିଯୋଗ କରି ବର୍ଷିଛି କଂଗ୍ରେସ । ଗୁଟୁଖା, ପ୍ରଦୂଷଣ, ପଂଚାୟତ ନିର୍ବାଚନ, ଛାତ୍ର ସାଂସଦ ନିର୍ବାଚନ ଠାରୁ ଆରମ୍ଭ ଅନେକ ନିଷ୍ପତ୍ତି ନେଇ ତାକୁ ସରକାର ପୁଣି ପ୍ରତ୍ୟାହାର କରିଛନ୍ତି l ବିଜେପି ସରକାର ରିମୋଟରେ ଚାଲିଛି l ଯାହା ଫଳରେ ନିଷ୍ପତ୍ତି ନେଇ ପାରୁନାହାନ୍ତି l ଥରେ ଓଡିଶାବାସୀ ଭୁଲରେ ବିଜେପିକୁ ଶାସନକୁ ଆଣିଛନ୍ତି । ତେଣୁ ବିଜେପି ଓଡିଶାକୁ ଲୁଟୁଛି l ବିଜେପି ଜାଣି ସାରିଛି ଆଉ କେବେ ସରକାରକୁ ଆସିବେନି l ତେଣୁ ଦଳ ଓଡ଼ିଶାବାସୀଙ୍କ ପାଇଁ କୌଣସି କାମ କରୁନାହିଁ ବୋଲି ଅଭିଯୋଗ କରିଛନ୍ତି କଂଗ୍ରେସ ମୁଖପାତ୍ର ସୋନାଲି ସାହୁ ।
ନନ୍ଦିଘୋଷ ବ୍ୟୁରୋ : ଓଲିଉଡର ଜଣାଶୁଣା ଅଭିନେତା ସାତ୍ୟକି ମିଶ୍ରଙ୍କୁ ଜୀବନରୁ ମାରିଦେବାକୁ ଧମକ। ପୈତୃକ ସମ୍ପତ୍ତି ଓ ବ୍ୟବସାୟିକ ପ୍ରତିଷ୍ଠାନର ମାଲିକାନାକୁ ନେଇ ସୃଷ୍ଟି ହୋଇଥିବା ବିବାଦ ଏବେ ଉଗ୍ର ରୂପ ଧାରଣ କରିଛି । ଏହି ଘଟଣାରେ ପୋଲିସର କାର୍ଯ୍ୟାନୁଷ୍ଠାନ ଦାବି କରି ଆଜି ଅଭିନେତା ସାତ୍ୟକି ମିଶ୍ର କଟକ ଡିସିପିଙ୍କୁ ଭେଟି ନିଜ ପରିବାରର ସୁରକ୍ଷା ଓ ନ୍ୟାୟ ପାଇଁ ଗୁହାରି କରିଛନ୍ତି। କଟକର ପ୍ରତିଷ୍ଠିତ ପୁସ୍ତକ ପ୍ରକାଶନ ସଂସ୍ଥା ‘କଟକ ଷ୍ଟୁଡେଣ୍ଟ ଷ୍ଟୋର’ ର ମାଲିକାନାକୁ ନେଇ ଦୀର୍ଘ ଦିନ ହେବ ପାରିବାରିକ କଳହ ଲାଗି ରହିଛି। ସତ୍ୟକି ମିଶ୍ରଙ୍କ ଦୁଇ ବଡ଼ବାପାଙ୍କ ପୁଅ ସବ୍ୟସାଚୀ ମିଶ୍ର ଓ ସୌମିତ୍ରୀ ମିଶ୍ର ଏହି ସଂସ୍ଥାକୁ ବେଆଇନ ଭାବେ ଅକ୍ତିଆର ଚେଷ୍ଟା କରୁଥିବା ସାତ୍ୟକି ଅଭିଯୋଗ କରିଛନ୍ତି । ଗତ ୬ ତାରିଖ ସନ୍ଧ୍ୟାରେ ଅଭିଯୁକ୍ତମାନେ ସତ୍ୟକିଙ୍କ ଘରେ ପଶି ତାଙ୍କର ୮୪ ବର୍ଷୀୟ ବୃଦ୍ଧ ପିତା ନୃସିଂହ ପ୍ରସାଦ ମିଶ୍ରଙ୍କୁ ଗାଳିଗୁଲଜ କରିବା ସହ ଜୀବନରୁ ମାରିଦେବାକୁ ଧମକ ଦେଇଥିଲେ ।ଏନେଇ ସେ ପୁରୀଘାଟ ଥାନାରେ ଲିଖିତ ଏତଲା ଦେଇଥିଲେ। ଅଭିଯୁକ୍ତଙ୍କ ବିରୋଧରେ କୌଣସି ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନଥିବାରୁ, ଆଜି ସତ୍ୟକି ମିଶ୍ର କଟକ ଡିସିପିଙ୍କ କାର୍ଯ୍ୟାଳୟରେ ପହଞ୍ଚି ଅଭିଯୋଗ କରିଛନ୍ତି ।
