କେନ୍ଦ୍ରାପଡା: ମହାକାଳପଡାରେ ହେଲମଟ ଯାଞ୍ଚ ବେଳେ ମାଡମରା ଘଟଣା । ଅବସରପ୍ରାପ୍ତ ସେନା କର୍ମଚାରୀଙ୍କୁ ମାଡ ମାରିଥିବା ଅଭିଯୋଗରେ ୬ ପୋଲିସ କର୍ମଚାରୀ ନିଲମ୍ବିତ ହୋଇଛନ୍ତି । ଏହି ଘଟଣାରେ ଜଣେ ହାବିଲଦାର, ଦୁଇ ଜଣ ମହିଳା କନେଷ୍ଟବଳଙ୍କ ସମେତ ୬ଜଣ ପୋଲିସ କର୍ମଚାରୀ ସଂଶ୍ଳିଷ୍ଟ ରହିଥିଲେ । ଏନେଇ କେନ୍ଦ୍ରାପଡା ଏସ୍ସପି ସମ୍ବିତ ସମ୍ପଦ ସମସ୍ତଙ୍କୁ ନିଲମ୍ବିତ କରିଥିବା ସୂଚନା ଦେଇଛନ୍ତି ।
ବୁଷ୍ଟର ଡୋଜ ନଦେବାକୁ ବିଭିନ୍ନ ରାଷ୍ଟ୍ରକୁ ପରାମର୍ଶ ଦେଲା ବିଶ୍ୱ ସ୍ୱାସ୍ଥ୍ୟ ସଂଗଠନ
ନୂଆଦିଲ୍ଲୀ: କୋଭିଡ ନିରାକରଣ ଲାଗି ବୁଷ୍ଟର ଡୋଜ ନଦେବାକୁ ବିଭିନ୍ନ ରାଷ୍ଟ୍ରକୁ ପରାମର୍ଶ ଦେଇଛି ବିଶ୍ୱ ସ୍ୱାସ୍ଥ୍ୟ ସଂଗଠନ। ଏବେ ବି କୋଟି କୋଟି ଲୋକ ଟିକା ପାଇପାରିନାହାଁନ୍ତି। ସେମାନଙ୍କ ସ୍ୱାର୍ଥକୁ ବିଚାରକୁ ନେଇ ଚଳିତ ବର୍ଷ ଶେଷ ଯାଏଁ କୌଣସି ଦେଶ ବୁଷ୍ଟର ଡୋଜ ବ୍ୟବହାର ନକରିବାକୁ ପରାମର୍ଶ ଦେଇଛନ୍ତି ସଂଗଠନର ମୁଖ୍ୟ ଟେଡ୍ରସ ଅଧନମ। ବିଶ୍ୱକୁ ଟିକା ଯୋଗାଉ ଥିବା ବିଭିନ୍ନ କମ୍ପାନୀ ଓ ରାଷ୍ଟ୍ର ଏଥିପ୍ରତି ମାନବିକ ଆଧାରରେ ଦୃଷ୍ଟି ଦେବାକୁ ସେ ପରାମର୍ଶ ଦେଇଛନ୍ତି।
ଗରିବ ରାଷ୍ଟ୍ରଗୁଡିକରେ କାର୍ଯ୍ୟରତ ସ୍ୱାସ୍ଥ୍ୟ କର୍ମୀ, ଦୁର୍ବଳ ବର୍ଗଙ୍କୁ ଯେପରି ତ୍ୱରିତ ଟିକା ଦିଆଯାଇପାରିବ ସେଥିପ୍ରତି ଦୃଷ୍ଟି ଦେବା ଲାଗି ସେ ଧନୀ ରାଷ୍ଟ୍ର ଓ ଟିକାପ୍ରସ୍ତୁତକାରୀ କମ୍ପାନିଙ୍କୁ ଅନୁରୋଧ କରିଛନ୍ତି। ଗତ ମାସରେ ସ୍ୱାସ୍ଥ୍ୟ ସଂଗଠନ ମୁଖ୍ୟ ସେପ୍ଟେମ୍ବର ଶେଷ ସୁଦ୍ଧା ବୁଷ୍ଟର ଡୋଜ ବନ୍ଦ ଲାଗି ପରାମର୍ଶ ଦେଇଥିଲେ। ପୁଣି ଥରେ ଏହି ସମୟ ସୀମା ବର୍ଷ ଶେଷ ଯାଏଁ ବଢାଇବା ଲାଗି ସେ ପରାମର୍ଶ ଦେଇଛନ୍ତି। ଗରିବ ରାଷ୍ଟ୍ରଗୁଡିକୁ ବିଭିନ୍ନ ଧନୀ ରାଷ୍ଟ୍ର ୧୦୦ କୋଟି ଟିକା ଡୋଜ ଦେବା ଲାଗି ପ୍ରତିଶ୍ରୁତି ଦେଇଛନ୍ତି।
ଓପିଆଇଡି କୋର୍ଟରେ EOWର ଆବେଦନ ପରେ ୩ ଦିନିଆ ରିମାଣ୍ଡରେ ଆସିବେ ଏମ. ଭି ପ୍ରସାଦ
ଭୁବନେଶ୍ୱର: ୱେଲ ଫେୟାର ଚିଟପଣ୍ଡ ଠକେଇ ମାମଲା। ୩ ଦିନିଆ ରିମାଣ୍ଡରେ ଆସିବେ ଆନ୍ଧ୍ରର ପୂର୍ବତନ ବିଧାୟକ ଏମ. ଭି ପ୍ରସାଦ। ଏନେଇ ଓପିଆଇଡି କୋର୍ଟରେ ଆବେଦନ କରିବ ଇଓଡବ୍ଲ୍ୟ। ରିମାଣ୍ଡ ସମୟରେ ଏମ.ଭି ପ୍ରସାଦଙ୍କ ବେଆଇନ ଅର୍ଥ କାରବାର ଓ ଗ୍ଲାମର ଲିଙ୍କ ନେଇ ଖୋଲତାଡ କରାଯିବ। କେଉଁଠି କେତେ ଟଙ୍କା ଇନଭେଷ୍ଟ କରିଛନ୍ତି ? ଅନ୍ୟ କୌଣସି ଆକାଉଣ୍ଟକୁ ଟଙ୍କା ଯାଇଛି କି ନାହିଁ ? ଅନ୍ୟ କୌଣସି ସଂସ୍ଥାରେ କେତେ ଟଙ୍କା ବିନିଯୋଗ ହୋଇଛି ? ଠକେଇର ପରିମାଣ କେତେ ? କେତୋଟି ଗ୍ରୁପ୍ ଅଫ୍ କମ୍ପାନୀ ଅଛି ? କମ୍ପାନୀରେ କିଏ କିଏ ନିର୍ଦ୍ଦେଶକ ଥିଲେ ? ଏଥିସହ ପାରିବାରିକ ଲିଙ୍କ ଏବଂ ଓଡ଼ିଶାରେ ଲିଙ୍କ୍ ନେଇ ମଧ୍ୟ ତନଘନା କରାଯିବ। ସେହିପରି ଓଡ଼ିଶାରେ ମୋଟ ସ୍ଥାବର ଓ ଅସ୍ଥାବର ସମ୍ପତ୍ତିର ଯାଞ୍ଚ କରିବ ଇଓଡବ୍ଲ୍ୟୁ। ସମ୍ପତି ଯାଞ୍ଚ ପାଇଁ ବୋର୍ଡ ଅଫ୍ ରେଭନ୍ୟୁକୁ ଚିଠି ଲେଖିବ ଇଓଡବ୍ଲ୍ୟୁ।
ଆଫଗାନିସ୍ତାନରେ ତାଲିବାନର ସରକାରର ନୂଆ ନିୟମ, କୌଣସି କ୍ରୀଡାରେ ସାମିଲ ହୋଇପାରିବେ ନାହିଁ ମହିଳା
କାବୁଲ: ଆଫଗାନିସ୍ତାନରେ ଆରମ୍ଭ ହୋଇଛି ଆତଙ୍କବାଦୀ ସରକାରର। ସରକାର ଆରମ୍ଭ ହେବା ପରେ ବାହାରୁଛି ଗୋଟିଏ ପରେ ଗୋଟିଏ ଭିନ୍ନ ଭିନ୍ନ ନିୟମ। ମହିଳାଙ୍କୁ ନେଇ ବିଭିନ୍ନ କ୍ଷେତ୍ରରେ କଟକଣା ଲଗାଉଛି ତାଲିବାନ ସରକାର। ଆଗକୁ ଆଫଗାନିସ୍ତାନରେ କୌଣସି କ୍ରୀଡାରେ ସାମିଲ ହୋଇପାରିବେ ନାହିଁ ମହିଳାମାନେ।
ତାଲିବାନର ନୂଆ ସରକାର ଆସିବା ପରେ ଏଭଳି ନିୟମ ହୋଇଛି। ଯାହାକୁ ନେଇ ଚିନ୍ତାରେ ପଡିଛନ୍ତି ଆଫଗାନିସ୍ତାନରେ ଥିବା ମହିଳା କ୍ରିଡାବିତ୍। ସେପଟେ ତାଲିବାନ ସରକାରଙ୍କ ଏହି ନିଷ୍ପତ୍ତିର ପ୍ରଭାବ ପଡିଛି କ୍ରିକେଟ୍ ଟିମ୍ ଉପରେ।
ଯଦି ମହିଳାମାନଙ୍କୁ ଖେଳିବାକୁ ସୁଯୋଗ ନ ଦିଆଯାଏ, ତେବେ ଆସନ୍ତା ନଭେମ୍ବର ମାସରେ ଆଫଗାନ୍ ଟିମ୍ ଅଷ୍ଟ୍ରେଲିଆ ବିପକ୍ଷରେ ଖେଳିବାକୁ ଥିବା ମ୍ୟାଚ୍ ରଦ୍ଦ କରିବା ପାଇଁ ନିଷ୍ପତ୍ତି ନେଇଥିବା ଜଣାପଡିଛି। ଆଫଗାନିସ୍ତାନରେ ତାଲିବାନ୍ ଶାସନ ଆରମ୍ଭ ହେବା ପରେ ଏବେ ମହିଳାଙ୍କ ସ୍ୱର ଦବାଇବା ପାଇଁ ପ୍ରୟାସ ଆରମ୍ଭ ହୋଇଛି।
ପାକିସ୍ତାନ ସୀମାକୁ ଲାଗିଥିବା ନ୍ୟାସନାଲ ହାଇଓ୍ୱେ ଉପରେ ଓହ୍ଲାଇଲା ଯୁଦ୍ଧ ବିମାନ
ନୂଆଦିଲ୍ଲୀ: ନ୍ୟାସନାଲ ହାଇଓ୍ୱେ ଉପରେ ଏୟାରଷ୍ଟ୍ରିପ। ପାକିସ୍ତାନ ସୀମାରେ ଥିବା ରାଜସ୍ଥାନର ଜାଲୋନ ଦେଇ ଯାଇଥିବା ହାଇୱେ ଉପରେ ଓହ୍ଲାଇଛି ଯୁଦ୍ଧ ବିମାନ । ରାଜସ୍ଥାନର ଜାଲୋରଠାରେ ହାଇଓ୍ୱେ ଉପରେ ସ୍ୱତନ୍ତ୍ର ଏୟାରଷ୍ଟ୍ରିପର ଶୁଭାରମ୍ଭ ହୋଇଛି। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଏହି ଏୟାରଷ୍ଟ୍ରିପ ଉଦଘାଟନ କରିଛନ୍ତି। ଏହି ସମୟରେ କେନ୍ଦ୍ରମନ୍ତ୍ରୀ ନୀତିନ ଗଡ଼କରୀ, ଏୟାର ଚିଫ୍ ମାର୍ଶାଲ ଆର କେ ଏସ ଭଦୋରିଆ, ସିଡିଏସ ଜେନେରାଲ ବିପିନ ରାଓ୍ୱତ ପ୍ରମୁଖ ଉପସ୍ଥିତ ଥିଲେ।

ପାକିସ୍ତାନ ସୀମାଠାରୁ ମାତ୍ର କିଛିଦୂରରେ ଏହି ୫କିଲୋମିଟର ଲମ୍ବ ଏୟାରଷ୍ଟ୍ରିପର ଶୁଭାରମ୍ଭ ହୋଇଛି। ଏହି ଏୟାରଷ୍ଟ୍ରିପରେ ବାୟୁସେନାର ଯୁଦ୍ଧ ବିମାନ ଅବତରଣ କରିପାରିବ। ରନ ଓ୍ୱେର ଉଦଘାଟନ ପରେ ଭାରତୀୟ ବାୟୁସେନାର ଯୁଦ୍ଧ ବିମାନ ସୁଖୋଇ ଓ ଜାଗୁଆର ଏଠାରେ ଅବତରଣ କରି ଦମ୍ ଦେଖାଇଥିଲେ।

ଭବିଷ୍ୟତରେ ଯୁଦ୍ଧ ସ୍ଥିତି ଉପୁଜିଲେ ଭାରତ ସାମରିକ କ୍ଷେତ୍ରରେ ଏହି ରନ ଓ୍ୱେ ଗୁରୁତ୍ୱପୂର୍ଣ୍ଣ ଭୂମିକା ନେବ। ଏହି ଏୟାରଷ୍ଟ୍ରିପରେ ୪ଟି ଏୟାରକ୍ରାଫ୍ଟ ପାର୍କିଂ କରିବା ସୁବିଧା ରହିଛି। ଏହା ଦେଶର ପ୍ରଥମ ଜାତୀୟ ରାଜପଥ, ଯାହା ଉପରେ ଏୟାରଷ୍ଟ୍ରିପ ନିର୍ମାଣ କରାଯାଇଛି। ପୂର୍ବରୁ ଉତ୍ତରପ୍ରଦେଶର ଆଗ୍ରା-ଲକ୍ଷ୍ନୌ ଏକ୍ସପ୍ରେସ ଓ୍ୱେ ଉପରେ ଯୁଦ୍ଧ ବିମାନ ସୁଖୋଇ ଅବତରଣ କରିଥିଲା।





