ନନ୍ଦିଘୋଷ ବ୍ୟୁରୋ : ଦୀର୍ଘ ଏକମାସ ଧରି ଜୟପୁର ରେଳ ଷ୍ଟେସନକୁ ଯାତ୍ରୀବାହୀ ଟ୍ରେନ ଆସୁନାହିଁ । ତେଣୁ ଯାତ୍ରୀ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । କୋରାପୁଟ ଠାରୁ ଜୟପୁର ମଧ୍ୟରେ ଜରଟି ଷ୍ଟେସନ ନିକଟରେ ରେଳ ଧାରଣାରେ ମାଟି ଅତଡ଼ା ଖସିଥିବା ଯୋଗୁଁ ରେଳ ଚଳାଚଳ ବନ୍ଦ ରହିଥିଲା । ଏହାରି ଭିତରେ ପ୍ରାୟ ଏକ ମାସ ବିତିଗଲାଣି । ରେଳ ଧାରଣାକୁ ସଫା କରାଯାଇଥିବା ବେଳେ ଏବେ କେବଳ ମାଲ ବୋଝେଇ ରେଳ ଯିବା ଆସିବା କରୁଛି । କିନ୍ତୁ ଯାତ୍ରୀବାହୀ ରେଳ ଜୟପୁର ଆସୁନଥିବାରୁ ଆଜି ଜିଲ୍ଲା ବିଜେଡି ପକ୍ଷରୁ ଜୟପୁର ରେଳ ଷ୍ଟେସନରେ ଧାରଣା ଦେବା ସହ ବିକ୍ଷୋଭ ପ୍ରଦର୍ଶନ କରିବାକୁ ନିଷ୍ପତି ନିଆଯାଇଥିଲା ପୂର୍ବତନ ମନ୍ତ୍ରୀ ତଥା ବିଜେଡି ନେତା ରବି ନନ୍ଦ ସୂଚନା ଦେଇଛନ୍ତି । ଯଦି ମାଲ ବୋଝୋଇ ରେଳ ଆସିପାରୁଛି ତେବେ ଯାତ୍ରୀବାହୀ ରେଳ କାହିଁକି ଆସିପାରିବ ନାହିଁ ବୋଲି ପ୍ରଶ୍ନ କରିଛି ଦଳ ।
ବିହାରରେ ସ୍ବତନ୍ତ୍ର ଭୋଟର ତାଲିକା ସଂଶୋଧନ ପ୍ରସଙ୍ଗ । ଆଜି ମାମଲାର ଶୁଣାଣି କରିବେ ସୁପ୍ରିମକୋର୍ଟ।
ନନ୍ଦିଘୋଷ ବ୍ୟୁରୋ : ବିହାରରେ ସ୍ବତନ୍ତ୍ର ଭୋଟର ତାଲିକା ସଂଶୋଧନ ପ୍ରସଙ୍ଗ । ଆଜି ମାମଲାର ଶୁଣାଣି କରିବେ ସୁପ୍ରିମକୋର୍ଟ। ଏହି ପ୍ରସଙ୍ଗରେ କାଉଣ୍ଟର ଆଫିଡେଭିଟ ଦାଖଲ ଲାଗି ଇସିଆଇଙ୍କୁ ନିର୍ଦ୍ଦେଶ ଦେଇଥିଲେ ସର୍ବୋଚ୍ଚ ଅଦାଲତ। ବିବାଦୀୟ ଏସଆଇଆର ପ୍ରସଙ୍ଗରେ ନିର୍ବାଚନ କମିଶନଙ୍କ ଉପରେ ବର୍ଷିଥିଲେ ସୁପ୍ରିମକୋର୍ଟ। ଆସନ୍ତା ନଭେମ୍ବରରେ ବିଧାନସଭା ନିର୍ବାଚନ ହେବାକୁ ଯାଉଥିବାବେଳେ ବର୍ତ୍ତମାନ କାହିଁକି ଏହି ପ୍ରକ୍ରିୟା ବୋଲି ପ୍ରଶ୍ନ କରିଥିଲେ ସର୍ବୋଚ୍ଚ ଅଦାଲତ। ଏହା ସହ ଭୋଟର ତାଲିକା ସଂଶୋଧନରେ ଆଧାର କାର୍ଡ, ଭୋଟର କାର୍ଡ ଓ ରାସନ କାର୍ଡକୁ ବିଚାରକୁ ନେବାକୁ ଇସିଆଇଙ୍କୁ ପରାମର୍ଶ ଦେଇଥିଲେ କୋର୍ଟ। ତେବେ ଏହା ଏକ ସାମ୍ବିଧାନିକ ପ୍ରକ୍ରିୟା ଏବଂ ଏହି ପ୍ରକ୍ରିୟା ବନ୍ଦ ହେବ ନାହିଁ ବୋଲି କହିଥିଲେ ଅଦାଲତ। ନିର୍ବାଚନ କମିଶନଙ୍କ ଏହି ପ୍ରକ୍ରିୟା ମୂଳରେ ଯୁକ୍ତିସମ୍ମତ କାରଣ ରହିଛି ବୋଲି କୋର୍ଟ କହିଥିଲେ। ଜଷ୍ଟିସ ସୁଧାଂଶୁ ଧୁଲିଆ ଓ ଜଷ୍ଟିସ ଜୟମାଲ୍ଯା ବାଗଚୀଙ୍କୁ ନେଇ ଗଠିତ ଖଣ୍ଡପୀଠ କହିଥିଲେ- ଏସଆଇଆର ନେଇ ଇସିଆଇଙ୍କ କୌଣସି ସମସ୍ୟା ନାହିଁ। ତେବେ ଏହାର ସମୟ ନେଇ ପ୍ରଶ୍ନ ଉଠୁଛି। ବିହାର ବିଧାନସଭା ନିର୍ବାଚନ ସହ ଏସଆଇଆରଙ୍କୁ ଯୋଡ଼ାଯାଉଛି ବୋଲି ପ୍ରଶ୍ନ କରିଥିଲେ ଅଦାଲତ। ଦୀର୍ଘ ୨୦ ବର୍ଷ ଧରି ଭୋଟର ତାଲିକାରେ ହୋଇଥିବା ଯୋଗ ଓ ବିଯୋଗ ଯୋଗୁ ବହୁ ଜାଲ୍ ନାମ ସାମିଲ ହୋଇଥାଇପାରେ ଆଶଙ୍କା କରି ଏସଆଇଆର ଲାଗି ନିର୍ଦ୍ଦେଶ ଦେଇଥିଲେ ଇସିଆଇ।
ଆଜିଠାରୁ ସୁରୁଖୁରୁରେ ଚାଲିପାରେ ସଂସଦ ଅଧିବେଶନ।
ନନ୍ଦିଘୋଷ ବ୍ୟୁରୋ : ଆଜିଠାରୁ ସୁରୁଖୁରୁରେ ଚାଲିପାରେ ସଂସଦ ଅଧିବେଶନ। ବିହାର ଭୋଟର ତାଲିକା ସଂଶୋଧନ, ଅପରେସନ ସିନ୍ଦୂର, ଉପରାଷ୍ଟ୍ରପତି ପଦରୁ ଜଗଦୀପ ଧନଖଡ଼ଙ୍କ ଇସ୍ତଫା ସମେତ ଅନ୍ୟାନ୍ୟ ପ୍ରସଙ୍ଗରେ ବିରୋଧୀ ଅଟଳ ରହିବା ଯୋଗୁ ସଂସଦ ଅଧିବେଶନରେ ବାଧା ଉପୁଜିଥିଲା। ତେବେ ଗତ ୨୫ ତାରିଖରେ ଲୋକସଭା ବାଚସ୍ପତିଙ୍କ ଅଧ୍ୟକ୍ଷତାରେ ବସିଥିବା ସର୍ବଦଳୀୟ ବୈଠକରେ ନିଷ୍ପତ୍ତି ଅନୁସାରେ ଗୃହ ସୁରୁଖୁରୁରେ ଚାଲିବା ସମ୍ଭାବନା ରହିଛି। ସେପଟେ ଗୃହରେ ତିନି ଦିନ ରହିବା ଲାଗି ଦଳୀୟ ଲୋକସଭା ସାଂସଦମାନଙ୍କୁ ହୁଇପ ଜାରି କରିଛି କଂଗ୍ରେସ। ଗତ ଶୁକ୍ରବାର ବିରୋଧୀ ସାଂସଦମାନେ ଡଷ୍ଟବିନ ପ୍ରୋଟେଷ୍ଟ କରି ଦେଶବାସୀଙ୍କ ଦୃଷ୍ଟି ଆକର୍ଷଣ କରିଥିଲେ। ସେପଟେ ଆଜି ଓ ଆସନ୍ତାକାଲି ସଂସଦର ଉଭୟ ଗୃହରେ ଅପରେସନ ସିନ୍ଦୂର ପ୍ରସଙ୍ଗରେ ୧୬ ଘଣ୍ଟା ଧରି ହେବ ସ୍ବତନ୍ତ୍ର ଆଲୋଚନା। ଏଥିରେ ସରକାର ରଖିବେ ବିବୃତି। ଅପରେସନ ସିନ୍ଦୂର ପ୍ରସଙ୍ଗରେ ସରକାରଙ୍କ ଉତ୍ତର ଦାବିରେ ଅଟଳ ରହିଥିଲେ ବିରୋଧୀ। ଆଜି ଲୋକସଭାରେ ଏବଂ ଆସନ୍ତାକାଲି ରାଜ୍ୟସଭାରେ ଏହି ପ୍ରସଙ୍ଗରେ ହେବ ଆଲୋଚନା। ପହଲଗାଓଁ ହମଲା ପରେ ଭାରତ ଓ ପାକିସ୍ତାନ ମଧ୍ୟରେ ଚାଲିଥିବା ଯୁଦ୍ଧକୁ ବନ୍ଦ କରିବାରେ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ ଯେଉଁ ଯୁକ୍ତି ଦର୍ଶାଉଛନ୍ତି ତାହାକୁ ବିରୋଧ କରୁଛନ୍ତି ବିରୋଧୀ ଦଳ। କେବଳ ଅପରେସନ ସିନ୍ଦୂର ନୁହଁ, ବିହାର ସ୍ପେସାଲ ଇଣ୍ଟେନସିଭ ରିଭିଜନ ପ୍ରସଙ୍ଗରେ ସରକାର ଉତ୍ତର ଦିଅନ୍ତୁ ବୋଲି ବିରୋଧୀ ଦଳ ଦାବି କରୁଛନ୍ତି।
ଜାଣନ୍ତୁ ନବମ ଶତାବ୍ଦୀରୁ ପ୍ରତିଷ୍ଠା ହୋଇଥିବା କୁଶଳେଶ୍ୱର ମହାଦେବଙ୍କ ପୀଠ ସମ୍ପର୍କରେ କିଛି ଅଜଣା କଥା
ନନ୍ଦିଘୋଷ ବ୍ୟୁରୋ: ସମସ୍ତଙ୍କ ମନବାଞ୍ଚା ପୁରଣ କରି ସର୍ବ କୁଶଳରେ ରହିବା ପାଇଁ ଆଶୀର୍ବାଦ ପ୍ରଦାନ କରୁଥିବା ମହାଦେବ ହେଉଛନ୍ତି କୁଶଳେଶ୍ୱର । ଶହ ଶହ ବର୍ଷରୁ ଭକ୍ତଙ୍କ ଡାକ ଶୁଣି ସେମାନଙ୍କ ଦୁଃଖ ହରଣ କରୁଥିବା କୁଶଳେଶ୍ୱର ମହାଦେବଙ୍କ ମନ୍ଦିରର କଣ ରହିଛ ସଂସ୍କୃତି , କଣ ରହିଛି ଏହାର ଇତିହାସ, କାହିଁକି ଏଠାକୁ ଭକ୍ତଙ୍କ ଧାଡି ଛୁଟେ ।
ନବମ ଶତାବ୍ଦୀର ପ୍ରତିଷ୍ଠା କୁଶଳେଶ୍ୱର ମହାଦେବଙ୍କ ପୀଠ। ଭକ୍ତି ଓ ବିଶ୍ବାସର ସହ ଆରାଧନା କରୁଛନ୍ତି ଭକ୍ତ। ଆନନ୍ଦପୁର ଉପଖଣ୍ଡ ଶୈଲଙ୍ଗ ଛକ ଠାରୁ ଦକ୍ଷିଣକୁ ୮ କିଲୋମିଟର ଗଲେ ପଡିଥାଏ ଦେଓଗାଁ। ଦେଓଗାଁରେ ପ୍ରତିଷ୍ଠା ହୋଇଛନ୍ତି କୁଶଳେଶ୍ୱର ମହାଦେବ । ଲୋକ କଥା ଅନୁଯାୟୀ ନିକଟସ୍ଥ ଯାଜପୁର ଜିଲ୍ଲାର ଗୌଡ଼ବାହାଳି ନାମକ ଏକ ଗୋଉଡ଼ ବସ୍ତିରୁ ପ୍ରତ୍ୟେକ ଦିନ ଏକ କଳା ଗାଈ ଆସି କୁଷେଇ ନଦୀ ନିକଟରେ ଥିବା କୁଶବଣରେ କ୍ଷୀର ଦେଇଥାଏ । ସ୍ଥାନୀୟ ଲୋକେ ଏହି ଅଲୌକିକ ଘଟଣା ବିଷୟରେ ସେତେବେଳର କୋଶଳ ରାଜ୍ୟର ରାଜା ଯଯାତି କେଶରୀଙ୍କୁ ଜଣାଇବା ପରେ ରାଜା ନିଜେ କୁଶଳେଶ୍ୱର ମଦିରର ନିର୍ମାଣ କରାଇଥିଲେ।
ସେତେବେଳେ ମହାଦେବଙ୍କ ପୂଜାର୍ଚନା ନିମନ୍ତେ ଯାଜପୁର ଅଞ୍ଚଳର କିଛି ବ୍ରାହ୍ମଣ ପରିବାରଙ୍କୁ ଏଇଠାରେ ରଖାଇ ଦେବଗ୍ରାମ ଭାବେ ଗାଁକୁ ନାମିତ କରିଥିଲେ। ଚାଳିଶ ଫୁଟ ଉଚ୍ଚତା ବିଶିଷ୍ଟ ଏହି ପଞ୍ଚମୁଖୀ ମନ୍ଦିରର ମୁଖ୍ୟ ଦେଉଳ ଉତ୍କଳୀୟ ରେଖ ଶୈଳୀରେ ନିର୍ମିତ ହୋଇଥିବା ବେଳେ ଜଗମୋହନ ପୀଢ଼ ମନ୍ଦିର ଶୈଳୀ ରେ ନିର୍ମିତ। ଏଥିରେ ଚାରି ଦିଗରେ ଥିବା ଚାରୋଟି ଦୁଆର ମଧ୍ୟରୁ ପୂର୍ବ ଦ୍ୱାରରେ ରହିଛି ଦୁଇଟି ସିଂହମୂର୍ତ୍ତି । ଏଠାରେ ଥିବା ଅନେକ ବୃକ୍ଷ ମଧ୍ୟରେ ଶିବଶକ୍ତି ବୃକ୍ଷ ଅତ୍ୟନ୍ତ ।
ବାବା କୁଶଳେଶ୍ୱରଙ୍କ ବାମ ପାର୍ଶ୍ଵରେ ଶକ୍ତି ସ୍ୱରୂପା ମାଆ ପାର୍ବତୀ ପୂଜା ପାଇଥାନ୍ତି। ମନ୍ଦିର ବେଢାରେ ଏକପାଦ ବିଶିଷ୍ଟ ଘଣ୍ଟାକର୍ଣ୍ଣ ନାମରେ ନାମିତ ଭୈରବ ମୂର୍ତ୍ତି, ଦକ୍ଷିଣ ପାର୍ଶ୍ୱରେ ଅଷ୍ଟଭୁଜ ଗଣେଶ, ଚାରି ଫୁଟ ଉଚ୍ଚତା ବିଶିଷ୍ଟ ପଦ୍ମପାଣି ଅବଲୋକୀ୍ତେଶ୍ୱର ମୂର୍ତ୍ତି, ପଶ୍ଚିମ ଦିଗକୁ ମୁହଁ କରି ରହିଛନ୍ତି ଏକାନନ ଓ ଚତୁର୍ଭୁଜ କାର୍ତ୍ତିକ । ଅନେକ ପର୍ବପର୍ବାଣି ମଧ୍ୟରେ ବାବାଙ୍କର ପ୍ରିୟ ପର୍ଵ ଜାଗର ବହୁ ଆଡମ୍ବର ସହକାରେ ୧୫ ଦିନ ଧରି ଏଠାରେ ପାଳନ କରାଯାଏ।
ବାବାଙ୍କର ଏହି ମନ୍ଦିର ରାଜ୍ୟସରକାର ଙ୍କର ଦେବୋତ୍ତରବିଭାଗ ଅଧୀନରେ ପରିଚାଳିତ ହେଉଥିବା ବେଳେ ମନ୍ଦିରରେ ସମୟେ ସମୟେ କିଛି ସମସ୍ୟା ମଧ୍ୟ ଦେଖାଦେଇଥାଏ। ମୁଖ୍ୟତଃ ସଠିକ ଭାବେ ପ୍ରଚାର ପ୍ରସାର ର ଅଭାବ ଯୋଗୁ ଏତେ ପୁରାତନ ମନ୍ଦିର ଲୋକଲୋଚନ ର ଆଢୁଆଳରେ ରହିଯାଉଥିବା ଅଭିଯୋଗ ହୁଏ।
ଗାଁକୁ ନାହିଁ ପକ୍କା ରାସ୍ତା, ପାଦେ ପାଦେରେ ଛକିଛି ମୃତ୍ୟୁ!
ନନ୍ଦିଘୋଷ ବ୍ୟୁରୋ: ସ୍ୱାଧୀନତାର 78 ବର୍ଷ ପରେ ବି ଗାଁକୁ ନାହିଁ ପକ୍କା ରାସ୍ତାଟିଏ। ଆଜି ବି ଆବୁଡ଼ା ଖାବୁଡା କଚ୍ଚା ରାସ୍ତା ଗ୍ରାମବାସୀଙ୍କ ପାଇଁ ଯାତାୟାତର ମାଧ୍ୟମ ପାଲଟିଛି। ପ୍ରଶାସନିକ ଅଧିକାରୀଠାରୁ ଆରମ୍ଭ କରି ନେତାମନ୍ତ୍ରୀଙ୍କୁ ବାରମ୍ବାର ଗୁହାରି ଜଣାଇଲେ ମଧ୍ୟ ଶୁଣିବାକୁ କେହିନାହିଁ। ଯାହାକୁ ନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଥିବା ବେଳେ ଖୁବଶିଘ୍ର ପକ୍କା ରାସ୍ତା ନିର୍ମାଣର ପ୍ରତିଶ୍ରୁତି ଦେଇଛନ୍ତି ବ୍ଲକ ଉନ୍ନୟନ ଅଧିକାରୀ।
ରାସ୍ତାର ପାଦେ ପାଦେ ଛକିଛି ମୃତ୍ୟୁ । ଖାଲ ଖମାରେ ଭର୍ତ୍ତି ଯାତାୟତର ଏହି ମାଧ୍ୟମ । ଗାଁକୁ ଆମ୍ବୁଲାନ୍ସ ଟିଏ ଆସିବା ବି ଅସମ୍ଭବ । ବର୍ଷା ଦିନେ ନାହିଁ ନଥିବା ସମସ୍ୟାର ସମ୍ମୁଖୀନ ହେଉଛନ୍ତି ଲୋକ । ଭଦ୍ରକ ସାହାପୁର ପଂଚାୟତର ସାନଲହୁଣୀପାଳ ଗାଁ ରାସ୍ତାର ଏହି ଅବସ୍ଥା । ଏଠି ବସବାସ କରନ୍ତି ଶହେରୁ ଅଧିକ ଦଳିତ ପରିବାର। ଆଜିବି ସରକାରୀ ମୌଳିକ ସୁବିଧାରୁ ବଞ୍ଚିତ ଏହି ଗାଁ। ଗାଁକୁ ଯୋଡି ପାରି ନାହିଁ ପକ୍କା ରାସ୍ତାଟିଏ । ଭଦ୍ରକ ଚାନ୍ଦବାଲି ମୁଖ୍ୟ ରାସ୍ତାରୁ ଗାଁକୁ ଲମ୍ବିଥିବା 2 କିଲୋମିଟରରୁ ଉର୍ଦ୍ଧ ରାସ୍ତାର ଅବସ୍ଥା ଶୋଚନୀୟ । ଗାଁକୁ ପକ୍କା ରାସ୍ତା ନିର୍ମାଣ କରିବାକୁ ବିଭିନ୍ନ ମହଲରେ ଗ୍ରାମବାସୀ ଅଭିଯୋଗ କରିଆସୁଥିଲେ ମଧ୍ୟ କେହି କର୍ଣ୍ଣପାତ କରୁନଥିବା ଅଭିଯୋଗ ହୋଇଛି ।
ପୂର୍ବ ସରକାର ସମୟରେ ରାସ୍ତାରେ ମୋରମ କରାଯାଇଥିଲା। ମାତ୍ର ଏହି କାର୍ଯ୍ୟକୁ ଦୀର୍ଘ ବର୍ଷ ବିତି ଯାଇଥିବା ବେଳେ ରାସ୍ତାର ଅବସ୍ଥା ଶୋଚନୀୟ ହୋଇପଡିଛି । ଗାଁକୁ ଗାଡି ଆମ୍ବୁଲାନ୍ସ ଟିଏ ଆସିବ ସମ୍ଭବ ହେଉନାହିଁ । ଫଳରେ ବର୍ଷ ବର୍ଷ ହେବ ନାହିଁ ନଥିବା ଅସୁବିଧାରେ ସମ୍ମୁଖୀନ ହେଉଛନ୍ତି ଗ୍ରାମବାସୀ । ସମସ୍ୟାର ସ୍ଥାୟୀ ସମାଧାନ ନହେଲେ ଆଗାମୀ ଦିନରେ ଗ୍ରାମବାସୀ ମାନେ ଆନ୍ଦୋଳନର ଚେତାବନୀ ଦେଇଛନ୍ତି। କେବେ ଏହି ରାସ୍ତା ର୍ନିମାଣ ହେବ, କେବେ ଲୋକ ଦୀର୍ଘ ଦିନର ସମସ୍ୟାରୁ ମୁକୁଳିବେ ତାହା ଦେଖିବାକୁ ବାକି ରହିଥିଲା ।
୭ ଜଣଙ୍କୁ ଅଙ୍ଗଦାନ କରି ନୂଆ ଜୀବନ ଦେଲେ ସୁରେଶ
ନନ୍ଦିଘୋଷ ବ୍ୟୁରୋ: ଦାରିଦ୍ରର କସା ଘାତରେ ଋଣଗ୍ରସ୍ତ ହୋଇ ଥିବା ପରିବାର ମୁଣ୍ଡରୁ ଚିନ୍ତା ଦୂର କରିବା ପାଇଁ ବାଙ୍ଗଲୋର ଯାଇଥିଲେ ପୁଅ । ହେଲେ ଏବେ ଗାଁକୁ ଫେରିଛି ମୃତଦେହ । ନିଜେ ଆରପାରିକୁ ଚାଲିଯାଇଛନ୍ତି, କିନ୍ତୁ ଦେଇଯାଇଛନ୍ତି ୭ ଜଣଙ୍କୁ ଜୀବନ ଦାନ । ଗଞ୍ଜାମ ଜିଲ୍ଲା ଆସିକା ବ୍ଲକ ସାନ ଖୋଲି ଗାଁର ୨୦ ବର୍ଷୀୟ ଯୁବକ ସୁରେଶ ପଟ୍ଟନାୟକ ବାଙ୍ଗଲୋରେ ଗାଡି ଦୁର୍ଘଟଣାରେ ମୃତ୍ୟୁବରଣ କରିଥିଲେ । ଏଥିରେ ସେ କୋମାକୁ ଚାଲିଯାଇଥିଲେ । ଡାକ୍ତର ତାଙ୍କ ବ୍ରେନ୍ ଡେଡ୍ ଘୋଷଣା କରିଥିଲେ । ହେଲେ ତାଙ୍କ ଶେଷ ଇଛା ଅନୁଯାୟୀ ତାଙ୍କ ଶରୀରର ୭ଟି ଅଙ୍ଗକୁ ୭ ଜଣ ରୋଗୀଙ୍କୁ ଦାନ କରାଯାଇଛି । ସାନ ଖୋଲି ଗାଁର ଅଶୋକ ପଟ୍ଟନାୟକଙ୍କ ଦୁଇ ଯାଆଁଳା ସନ୍ତାନ ରିତେଶ ପଟ୍ଟନାୟକ ଓ ସୁରେଶ । ସ୍ତ୍ରୀକୁ ମିଶାଇ ଚାରି ପ୍ରାଣୀ କୁଟୁମ୍ବ । ଗରିବ ଖଟି ଖିଆ ଅଶୋକ ଦିନ ମଜୁରିଆ ଭାବେ କାମ କରନ୍ତି । ଦୁଇ ପୁଅ ବଡ଼ ହେବା ସାଙ୍ଗକୁ ସେମାନଙ୍କ ପାଠ ପଢା ଓ ଘର ଚଳିବା ପାଇଁ ଖର୍ଚ୍ଚ ଅଶୋକଙ୍କ ପାଇଁ ଚିନ୍ତା ବଢାଇଥିଲା ।
ଦୁଇ ପୁଅ ବାପାଙ୍କ ଏ ଅସହାୟ ପାଇଁ ପାଠ ଛାଡି କାମ କରିବାକୁ ବାଙ୍ଗାଳୁରୁ ଯିବାକୁ ବାଧ୍ୟ ହୋଇ ଥିଲେ । ବଡ଼ ପୁଅ ବମ୍ବେରେ ଘରୋଇ କମ୍ପାନୀରେ କାମ କରୁଥିବା ବେଳେ ସାନ ପୁଅ ସୁରେଶ ଏକ କମ୍ପାନୀ ରେ କାମ କରୁଥିଲେ । ବାପା ମଧ୍ୟ ସୁରଥ ରେ ଉପାର୍ଜନ କରିବା କୁ ଯାଇଥିଲେ । କିନ୍ତୁ ଦୁଭାଗ୍ୟର ବିଷୟ ଏହି ପରିବାର ଉପରେ ବିପଦ ର କଳା ବାଦଲ ଘୋଟି ଆସିଥିଲା । ଏକ ସଡ଼କ ଦୁର୍ଘଟଣାରେ ସୁରେଶ ଗୁରୁତର ହୋଇ ମେଡିକାଲରେ ଭର୍ତି ହୋଇଥିଲେ । ପରେ ପରେ ଦୁଇଟି ହସ୍ପିଟାଲ ଚେଞ୍ଜ ପରେ ବ୍ରେନ ଡେଡ ଘୋଷଣା କରିଥିଲେ ଡାକ୍ତର । ବେଙ୍ଗାଳୁରୁ ଏସ.କେ.ନାମକ ସ୍ୱଛାସେବୀ ସଂଗଠନ ସୁରେଶଙ୍କ ହସ୍ପିଟାଲରେ ଦେଖାଶୁଣା କରୁଥିଲେ । ସେଠାରେ ସୁରେଶଙ୍କ ଶେଷଇଚ୍ଛା ଅନୁଯାଇ କିଡ଼ନୀ, ଲିଭର, ଲନ୍ସ, ହାର୍ଟ ଭଳି ଗୁରୁତ୍ୱ ପୂର୍ଣ୍ଣ ଅଙ୍ଗ ଦାନ କରାଯାଇଥିଲା । ତାଙ୍କ ଲିଭର ଟି ସଙ୍ଗେ ସଙ୍ଗେ ଜଣେ ଦଶ ବର୍ଷ ବାଳକର ଅଙ୍ଗରେ ପ୍ରତି ରୋପଣ କରାଯାଇଥିଲା । ଏଭଳି ମହାନ କାର୍ଯ୍ୟ ପାଇଁ ମୁର୍ତ୍ତୃ ସୁରେଶ ଲୋକଙ୍କ ମନରେ କେବଳ ମହାନ ନୁହେଁ ଅମର ହୋଇ ରହିଯାଇଛନ୍ତି ।
ବାଲେଶ୍ବର ଜିଲ୍ଲାରେ ବନ୍ୟାସ୍ଥିତି, ସୁବର୍ଣ୍ଣରେଖା ଓ ଜଳକାର ବନ୍ୟାଜଳ ପ୍ରଭାବିତ
ନନ୍ଦିଘୋଷ ବ୍ୟୁରୋ: ଉପର ମୁଣ୍ଡରେ ଲଗାଣ ବର୍ଷା ଫଳରେ ବୈତରଣୀ ନଦୀରେ ତୃତୀୟ ବନ୍ୟା। ଆଖୁଆପଦା ଓ ଯାଜପୁର ଏବଂ ଦଶରଥପୁରରେ ବିପଦ ସଂକେତ ଉପରେ ପ୍ରବାହିତ ହେଉଛି ବନ୍ୟାଜଳ। ଯାଜପୁର ବ୍ଲକ ସିମିଳିଆ ମୁଖ୍ୟ ରାସ୍ତା ଉପରେ ଚାଲିଛି ୩ଫୁଟ ବନ୍ୟାଜଳ। ୮ଟି ଗାଁକୁ ଯୋଗାଯୋଗ ବିଚ୍ଛିନ୍ନ ହୋଇଛି। ଦଶରଥପୁର ବ୍ଲକରେ ବୈତରଣୀ ଓ କାଣୀ ନଦୀରେ ଜଳସ୍ତର ବଢିବା ଯୋଗୁ ଦଶରଥପୁର ଅଞ୍ଚଳରେ ସ୍ଥିତି ସଙ୍କଟାପନ୍ନ ହୋଇଛି ।
ବନ୍ୟା ଆଣିଲା ଉପର ମୁଣ୍ଡରେ ପ୍ରବଳ ବର୍ଷା । ଉଛୁଳିଲା ବୈତରଣୀ । ଆଖୁଆପଦା ଓ ଯାଜପୁର ଏବଂ ଦଶରଥପୁରରେ ବିପଦ ସଂକେତ ଉପରେ ପ୍ରବାହିତ ହେଉଛି ବନ୍ୟାଜଳ । ବୈତରଣୀ ନଦୀର ଆଖୁଆପଦାଠାରେ ବିପଦ ସଂକେତ ୧୮.୩୩ ମିଟର ଥିବା ବେଳେ ବର୍ତ୍ତମାନ ୧୮.୩୭ ମିଟର ଉପରେ ପ୍ରବାହିତ ହେଉଛି ବନ୍ୟାଜଳ। ସେହିଭଳି ବଲ୍ଲଭୀଘାଟରେ ବିପଦ ସଂକେତ ୧୩.୩୪ ମିଟର ଥିବାବେଳେ ବର୍ତ୍ତମାନ ୧୩.୯୭ମିଟର ଉପରେ ବନ୍ୟାଜଳ ପ୍ରବାହିତ ହେଉଛି। ଅନ୍ୟପଟେ ଯାଜପୁର ବ୍ଲକ ସିମିଳିଆ ମୁଖ୍ୟ ରାସ୍ତା ଉପରେ ଚାଲିଛି ୩ଫୁଟ ବନ୍ୟାଜଳ। ୮ଟି ଗାଁକୁ ଯୋଗାଯୋଗ ବିଚ୍ଛିନ୍ନ ହୋଇଛି। ପ୍ରଶାସନ ଏଯାଏ ପହଞ୍ଚି ନଥିବାରୁ ଲୋକଙ୍କ ମଧ୍ୟରେ କ୍ଷୋଭ ପ୍ରକାଶ ପାଇଛି। ଦଶରଥପୁରରେ ବନ୍ୟା ସ୍ଥିତି ଗମ୍ଭୀର ହେବାରେ ଲାଗିଛି। ବନ୍ୟାଜଳ ବଢିବା ଯୋଗୁ କସପା ଅଞ୍ଚଳର ବିଭିନ୍ନ ସ୍ଥାନରେ ଘଳିଆ ପଡ଼ି ଗାଁକୁ ପସିଛି ପାଣି। ପ୍ରଶାସନର ଅବହେଳା ଯୋଗୁ ଏଭଳି ସ୍ଥିତି ଉପୁଜିଥିବା ଅଭିଯୋଗ କରିଛନ୍ତି ସ୍ଥାନୀୟ ଲୋକେ ।
ବନ୍ୟାଞ୍ଚଳ ପରିଦର୍ଶନ କଲେ ବିଜେଡି ଉପସଭାପତି ତଥା ଯାଜପୁରର ପୂର୍ବତନ ବିଧାୟକ ପ୍ରଣବ ପ୍ରକାଶ ଦାଶ । ଅସୁସ୍ଥ ଥିବା ସତ୍ତ୍ବେ ବନ୍ୟା ବିପନ୍ନଙ୍କ ନିକଟରେ ପହଞ୍ଚି ଦୁଃଖସୁଖ ବୁଝିଲେ। ଯାଜପୁର ଜିଲ୍ଲା ଦଶରଥପୁର ବ୍ଲକରେ ବୈତରଣୀ ଓ କାଣୀ ନଦୀରେ ଜଳସ୍ତର ବଢିବା ଯୋଗୁ ଦଶରଥପୁର ଅଞ୍ଚଳରେ ସ୍ଥିତି ସଙ୍କଟାପନ୍ନ ହୋଇଛି । ଜଇଁନ୍ତରା, କଣ୍ଟାପଡା, ଦତ୍ତପୁର, କସପା, ମାରଡ଼ିହି ଆଦି ଅଞ୍ଚଳରେ ସ୍ଥିତି ସଂଗୀନ ରହିଛି । ସ୍ଥାନୀୟ ପ୍ରଶାସନ ଓ ଜିଲ୍ଲା ପ୍ରଶାସନ ଲୋକଙ୍କ ସୁରକ୍ଷା ପାଇଁ ଆବଶକୀୟ ପଦକ୍ଷେପ ଗ୍ରହଣ କରିବାକୁ ଦାବି କରିଛନ୍ତି ପ୍ରଣବ। ବନ୍ୟା ବିପନ୍ନଙ୍କୁ ତୁରନ୍ତ ଉଦ୍ଧାର ସହ କ୍ଷତିପୂରଣ ଦେବରକୁ ପ୍ରଶାସନ ନିକଟରେ ଦାବି କରିଛନ୍ତି ସ୍ଥାନୀୟ ବାସିନ୍ଦା। ଆସନ୍ତା କାଲିଠୁ ବର୍ଷା କମିବା ନେଇ ସୂଚନା ଦେଇଛି ପାଣିପାଗ କେନ୍ଦ୍ର ।
ପୁଣି ଇଂଲଣ୍ଡରେ ଇତିହାସ ରଚିଲେ ଗିଲ୍, ଭାଙ୍ଗିଲେ ୩୫ ବର୍ଷର ରେକର୍ଡ
ନନ୍ଦିଘୋଷ ବ୍ୟୁରୋ: ଇଂଲଣ୍ଡ ବିପକ୍ଷରେ ଚତୁର୍ଥ ଟେଷ୍ଟ ଖେଳୁଛି ଭାରତ । ଦ୍ବିତୀୟ ପାଳିରେ ଭାରତ ପକ୍ଷରୁ ଶତକୀୟ ପାଳି ଖେଳିଛନ୍ତି ଅଧିନାୟକ ଶୁଭମନ ଗିଲ୍ । ସେ ଇଂଲଣ୍ଡରେ ଚତୁର୍ଥ ଶତକ ହାସଲ କରିଛନ୍ତି । ୩୫ ବର୍ଷ ପରେ ପ୍ରଥମ ଭାରତୀୟ ଅଧିନାୟକ ଭାବେ ମାଞ୍ଚେଷ୍ଟରର ଏହି ଗ୍ରାଉଣ୍ଡରେ ଶତକ ହାସଲ କରିବାର ରେକର୍ଡ ନିଜ ନାମରେ କରିଛନ୍ତି । ତେନ୍ଦୁଲକରଙ୍କ ପରେ ଦ୍ବିତୀୟ ଭାରତୀୟ ଖେଳାଳି ଭାବେ ଏହି ଗ୍ରାଉଣ୍ଡରେ ଶତକ ହାସଲ କରିଛନ୍ତି ।
ଦ୍ବିତୀୟ ପାଳିରେ ଭାରତ କଷ୍ଟକର ସ୍ଥିତିରେ ରହିଥିବାବେଳେ ୨୨୮ ବଲରୁ ସେ ଶତକ ହାସଲ କରିଛନ୍ତି । ଭାରତକୁ ଏହି ମ୍ୟାଚ ଡ୍ର କରିବାକୁ ହେଲେ ଆଜିର ଦିନ ଖେଳିବାକୁ ପଡ଼ିବ । ଶେଷ ଖବର ସୁଦ୍ଧା ଭାରତ ୨୨୩ ରନରେ ୪ ଓ୍ବିକେଟ ହରାଇଛି । ଭାରତ ପକ୍ଷରୁ ଓ୍ବାଶିଂଟନ ସୁନ୍ଦର ଏବଂ ରବିନ୍ଦ୍ର ଜାଡେଜା ବ୍ୟାଟିଂ ଜାରି ରଖିଛନ୍ତି । ଏବେ ଲଞ୍ଚ ବ୍ରେକ୍ ହୋଇଥିବାବେଳେ ଦଳକୁ ମ୍ୟାଚ୍ ଡ୍ର ରଖିବାକୁ ହେଲେ ଆଜି ଦିନ ତମାମ ଖେଳିବାକୁ ପଡ଼ିବ । କାରଣ ଭାରତ ଏବେ ୮୮ ରନ ପଛରେ ରହିଛି ।
ହରିଦ୍ବାର ମନସା ଦେବୀ ମନ୍ଦିରରେ କାହିଁକି ହେଲା ଦଳଚକଟା, ସାମ୍ନାକୁ ଆସିଲା ସତ..
ନନ୍ଦିଘୋଷ ବ୍ୟୁରୋ: ଉତ୍ତରାଖଣ୍ଡ ହରିଦ୍ବାର ମନସା ଦେବୀଙ୍କ ମନ୍ଦିରରେ ଦଳଚକଟା ଘଟଣାରେ ୬ ଜଣଙ୍କ ମୃତ୍ୟୁ ଏବଂ ୩୫ ଜଣ ଆହତ ହେବା ଘଟଣା ଏବେ ଖବରର ଶିରୋନାମା ପାଲଟିଛି । ତେବେ ଏଠାରେ କାହିଁକି ଏଭଳି ପରିସ୍ଥିତି ହେଲା ଏହାକୁ ନେଇ ବିଭିନ୍ନ ପ୍ରକାର ଚର୍ଚ୍ଚାମାନ ଶୁଣିବାକୁ ମିଳୁଛି । ଦଳାଚକଟା ପଛରେ କଣ ରହିଛି ପ୍ରମୁଖ କାରଣ । ବିଭିନ୍ନ ଗୁଜବମାନ ଶୁଣାଯାଉଥିବାବେଳେ ସାମ୍ନାକୁ ଆସିଛି ସତ । ତେବେ କହି ରଖୁଛୁ କି, ଏହି ମନ୍ଦିରକୁ ଯିବା ପାଇଁ ତିନୋଟି ରାସ୍ତା ରହିଛି । ଗୋଟିଏ ସିଡି, ଅନ୍ୟପଟେ ରୋପଓ୍ବେ ଏବଂ ଚଲାପଥ । ଏବେ ଏହି ତିନୋଟି ଯାକ ପଥକୁ ବନ୍ଦ କରାଯାଇଛି । ଦର୍ଶନ ମଧ୍ୟ ବନ୍ଦ ରହିଛି ।
ପ୍ରଥମେ ଏକ ଗୁଜବ ପ୍ରଚାର ହୋଇଥିଲା କି, କରେଣ୍ଟ ଲାଗିଯିବା କାରଣରୁ ଯାତ୍ରୀମାନେ ଦୌଡ଼ିଥିଲେ ଏବଂ ଏଭଳି ଅଘଟଣ ଘଟିଥିଲା । ଏବେ ଭାରତୀୟ ଆଖଡ଼ା ପରିଷଦର ଅଧ୍ୟକ୍ଷ ତଥା ମନ୍ଦିର ଟ୍ରଷ୍ଟର ଅଧ୍ୟକ୍ଷ ମହନ୍ତ ରବିନ୍ଦ୍ର ପୁରୀ ମହାରାଜ ଘଟଣାସ୍ଥଳ ପରିଦର୍ଶନ କରିଛନ୍ତି । ସେ କହିଛନ୍ତି କି, ସିଡ଼ିରେ ଅଧିକ ଭକ୍ତ ଯାତାୟତ କରୁଥିଲେ । ଯିବା ଆସିବା ବାଟରେ ପ୍ରବଳ ଭକ୍ତଙ୍କ ଭିଡ଼ ଜମିଥିବାବେଳେ ଜଣେ ଭକ୍ତ ପଡ଼ିଯିବା ପରେ ଏଭଳି ପରିସ୍ଥିତି ସୃଷ୍ଟି ହୋଇଥିଲା ।
ମାଟିତଳେ ନକ୍ସଲ ଲୁଚାଇ ରଖିଥିଲେ ୩୫ ଲକ୍ଷ ଟଙ୍କା
ନନ୍ଦିଘୋଷ ବ୍ୟୁରୋ: ମାଟି ତଳେ ଟଙ୍କା ଲୁଚାଇ ରଖିଥିଲେ ନକ୍ସଲ। ହଜାର କିମ୍ଵା ଏକ ଲକ୍ଷ ନୁହେଁ। ପୁରା ୩୫ ଲକ୍ଷ ଟଙ୍କା। ସୁନ୍ଦରଗଡ଼ – ଝାଡ଼ଖଣ୍ଡ ସୀମା ଚାଇଁବସାର ସରଣ୍ଡା ଜଙ୍ଗଲରେ ଏହି ଟଙ୍କା ସେମାନେ ଲୁଚାଇ ରଖିଥିଲେ। ସନ୍ଦେହ କରାଯାଉଛି କୌଣସି ବଡ଼ ଅଘଟଣ ଘଟାଇବାକୁ ସେମାନେ ଏହି ଟଙ୍କା ଯୋଗାଡ଼ କରି ଲୁଚାଇ ରଖିଥିଲେ। ଜଙ୍ଗଲରେ ସୁରକ୍ଷା କର୍ମୀ ଚଢାଉ କରି ଏହି ଟଙ୍କା ଜବତ କରିଛନ୍ତି।