ନନ୍ଦିଘୋଷ ବ୍ୟୁରୋ: ଆଜି ବିରୋଧୀ ଦଳ ନେତା ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ଜନ୍ମଦିନ। ଏହି ଅବସରରେ ବିଜେଡି ପଦଯାତ୍ରାରେ ଯୋଗଦେବେ ନବୀନ ପଟ୍ଟନାୟକ । ଏକାମ୍ର ଭୁବନେଶ୍ୱରର ଗଙ୍ଗନଗରରେ ଥିବା ବିଜୁ ଆଦର୍ଶ କଲୋନୀରୁ ପଦଯାତ୍ରା ଆରମ୍ଭ ହେବ। ସେଠାରେ ପିଲାଙ୍କ ସହ ସମୟ ବିତାଇବା ସହ ମିଷ୍ଟାନ ବଣ୍ଟନ କରିବେ ନବୀନ । ଏହା ପରେ ନବୀନ ଏସଓଏସ ଭିଲେଜ ଯିବେ । ସେଠି ଅନ୍ତେବାସୀଙ୍କ ସହ ମିଷ୍ଟାନ ବଣ୍ଟନ କରିବେ। ସାରା ରାଜ୍ୟରେ ବିଜେଡି ପକ୍ଷରୁ ନିରାଡ଼ମ୍ବର ଭାବେ ପାଳନ ହେବ ନବୀନଙ୍କ ଜନ୍ମଦିନ।
ଆଜି ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ୭୯ ତମ ଜନ୍ମଦିବସ
ନନ୍ଦିଘୋଷ ବ୍ୟୁରୋ: ଆଜି ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ୭୯ ତମ ଜନ୍ମଦିବସ। ଝଡ଼ର ଇଗଲ, ସାଢେ ଚାରିକୋଟି ଓଡ଼ିଆଙ୍କ ପ୍ରିୟ ନେତା ତଥା ଜନସେବାରେ ନିରନ୍ତର ନିଜକୁ ନିୟୋଜିତ ରଖୁଥିବା ନବୀନଙ୍କ ଜନ୍ମଦିବସ। ୧୯୪୬ ମସିହା ଆଜିର ଦିନରେ କଟକରେ ଜନ୍ମଗ୍ରହଣ କରିଥିଲେ ବିଜେଡି ସୁପ୍ରିମୋ। ନିଜର ଲୋକାଭିମୁଖୀ ଯୋଜନା, ସମାଜର ବହୁଳ ଭାଗ ଲୋକଙ୍କ ଲାଗି ଦରଦ, ରାଜ୍ୟର ପ୍ରଗତିର ଲାଗି ନିରବଚ୍ଛିନ୍ନ ସଂଗ୍ରାମ ଯୋଗୁ ସେ କ୍ରମାଗତ ପାଞ୍ଚ ଥର ଅର୍ଥାତ ୨୦୦୦ ମାର୍ଚ୍ଚ ୫ ତାରିଖରୁ ୨୦୨୪ ଜୁନ ୫ ଯାଏ ମୁଖ୍ୟମନ୍ତ୍ରୀ ଭାବେ ଦାୟିତ୍ବ ତୁଲାଇ ଦେଶରେ ସୃଷ୍ଟି କରିଛନ୍ତି ଇତିହାସ। ସ୍ବାସ୍ଥ୍ୟ ହେଉ ବା ଶିକ୍ଷା, କ୍ରୀଡ଼ା ହେଉ ବା ଗ୍ରାମୀଣ ବିକାଶ, ନାରୀ ସଶକ୍ତିକରଣ ହେଉ ବା ନିଷ୍ପେସିତ ବର୍ଗର ଉତଥାନ- ସବୁ କ୍ଷେତ୍ରରେ ନବୀନ ତୁଲାଇଥିଲେ ଦାୟିତ୍ବବାନ ଇନିଂସ। କେବଳ ରାଜନୀତି ନୁହେଁ ସାହିତ୍ୟ ରଚନା କରି ବିଶ୍ବରେ ଅର୍ଜନ କରିଛନ୍ତି ଖ୍ୟାତି।
ଏସଏଚଜି ଜରିଆରେ ଲକ୍ଷ ଲକ୍ଷ ମହିଳାଙ୍କୁ ସ୍ବାବଲମ୍ବୀ କରିବା କ୍ଷେତ୍ରରେ ଦିଗଦର୍ଶକ ସାଜିଥିଲେ ନବୀନ। ନବଜାତ ହେଉ କି କିଶୋର, ଯୁବକ ହୁଅନ୍ତୁ ବା ବୟସ୍କ, ନାରୀ ହୁଅନ୍ତୁ ବା ପୁରୁଷ- ସମସ୍ତଙ୍କ ଲାଗି ଆଶାର ଆଶ୍ରା ପାଲଟିଥିଲେ ନବୀନ। ପ୍ରାକୃତିକ ବିପର୍ଯ୍ୟୟ ବିରୋଧରେ ସଫଳ ମୁକାବିଲା କରିବା ସହ ସାରା ଦେଶରେ ରୋଲ ମଡେଲ ସେ ପାଲଟିଥିଲେ। ଜାତୀୟ ରାଜନୀତିରେ ବି ସେ ରଖିଯାଇଛନ୍ତି ଓଡ଼ିଶାର ମାନ। ରାଷ୍ଟ୍ରପତି ନିର୍ବାଚନ ହେଉ କି ସଂସଦରେ ଗୁରୁତ୍ବପୂର୍ଣ୍ଣ ଆଲୋଚନା- ସବୁଠି ସ୍ବତନ୍ତ୍ର ପ୍ରାଧାନ୍ୟ ପାଏ ନବୀନଙ୍କ ନୀତି । ଷ୍ଟେଟ୍ସମ୍ୟାନ ନବୀନଙ୍କ ନିଷ୍ପତ୍ତି ସବୁ ଦଳ ପାଇଁ ସର୍ବମାନ୍ୟ ସାଜି ଆସିଛି । ସଂଘୀୟ ବ୍ୟବସ୍ଥାରେ ତାଙ୍କ ଓଡ଼ିଶା ମଡ଼େଲ ବିଭିନ୍ନ ସ୍ତରରେ ହୋଇଛି ପ୍ରଶଂସିତ। ରାଜ୍ୟରେ ସ୍ଥିର ଅର୍ଥନୀତି, ଅର୍ଥନୈତିକ ଅଭିବୃଦ୍ଧି, କୃଷିର ବିକାଶ କ୍ଷେତ୍ରରେ ତାଙ୍କର ଭୂମିକା ବି ଅବିସ୍ମରଣୀୟ।…
୨୦ ନା ୨୧: କେଉଁଦିନ ଲୋକେ ପାଳିବେ ଦୀପାବଳି ଓ ପୟାଶ୍ରାଦ୍ଧ ?
୨୦ ନା ୨୧ । କେଉଁଦିନ ଲୋକେ ପାଳିବେ ଦୀପାବଳି ଓ ପୟାଶ୍ରାଦ୍ଧ । ଶ୍ରୀମନ୍ଦିର ମୁକ୍ତିମଣ୍ଡପ ପଣ୍ଡିତ ଓ ଜ୍ୟୋତିର୍ବିଦଙ୍କ ମତକୁ ନେଇ ସୁବିଠି ଦ୍ବନ୍ଦ୍ବ । ଯାହାକୁ ନେଇ ଦେଖାଦେଇଛି ବିବାଦ । ଦୀପାବଳୀ ତିଥିରେ ପିତୃପୁରୁଷଙ୍କୁ ଶ୍ରାଦ୍ଧ ପ୍ରଦାନ କରି ଆଲୋକ ଦେଖାଇଲେ ପିତୃପୁରୁଷ ସ୍ବର୍ଗଲୋକ ଗମନ କରିଥାନ୍ତି । ସେଥିପାଇଁ ପରିବାର ସ୍ବଜନ ମାନେ ପୟାଶ୍ରାଦ୍ଧ କରି କାଉଁରିଆ କାଠି ଜାଳିଥାନ୍ତି । ଗତ ବର୍ଷ ଭଳି ଏଥର ମଧ୍ୟ ବିଭିନ୍ନ ପଞ୍ଜିକାରେ ଦୁଇଦିନ ଦୀପାବଳୀ, ଦୀପଦାନ ପୟାଶ୍ରାଦ୍ଧ ରହିଛି । ଶ୍ରୀମନ୍ଦିର ସ୍ବୀକୃତି ପ୍ରାପ୍ତ ରାଧାରମଣ, କୋହୀନୂର, ଅରୁଣଦ୍ଵୟ, ଭାଗ୍ୟଜୋତି ଓ ଜି ଏନ୍ ତ୍ରିପାଠୀ ପଞ୍ଜିକାରେ ୨୦ତାରିଖରେ ଶ୍ୟାମାପୂଜା, ଦୀପଦାନ ଓ ପୟାଶ୍ରାଦ୍ଧ ଲେଖାଯାଇଛି । ସେହିଦିନ ଦିନ ଠାରୁ ରାତି ପର୍ଯ୍ୟନ୍ତ ତା ପରଦିନ ସନ୍ଧ୍ୟା ପର୍ଯ୍ୟନ୍ତ ଅମାବାସ୍ୟା ତିଥି ରହୁଥିବାରୁ ଦୀପଦାନ ଓ ପୟାଶ୍ରାଦ୍ଧ କରିବା ନେଇ ମୁକ୍ତିମଣ୍ଡପ ପଣ୍ଡିତ ସଭା ସାମ୍ବାଦିକ ସମ୍ମଳନୀରେ କହିଛନ୍ତି। ବିଶେଷକରି ଦୀପଦାନ ସାୟଂ କାଳୀନ ପର୍ବ। ତେଣୁ ୨୦ତାରିଖରେ ଏହା ଧର୍ମଶାସ୍ତ୍ର ବିଧିସମତ ବୋଲି କହିବା ସହ ସରକାର ୨୧ ତାରିଖର ଛୁଟିକୁ ପରିବର୍ତ୍ତନ କରି ୨୦ତାରିଖ କରିବାକୁ ଦାବି କରିଥିଲେ। ଯେଉଁ ମାନେ ସ୍ବୀକୃତି ପ୍ରାପ୍ତ ପଞ୍ଜିକାକୁ ବିରୋଧ କରୁଛନ୍ତି ତାଙ୍କ ବିରୋଧରେ କାର୍ଯ୍ୟନୁଷ୍ଠାନ ଦାବି ନେଇ ମୁକ୍ତିମଣ୍ଡପ ପଣ୍ଡିତ ସଭାର କାର୍ଯ୍ୟକାରୀ ସଭାପତି ଓ ଧର୍ମଶାସ୍ତ୍ରଜ୍ଞ ମାନେ ମତ ରଖିଥିବା ନେଇ ଯୁକ୍ତି ବାଢିଛନ୍ତି।
ଅନ୍ୟ ପକ୍ଷରେ ଜ୍ୟୋତିର୍ବିଦ ହରିଶଙ୍କର ମିଶ୍ର ଏହାକୁ ଖଣ୍ଡନ କରିଛନ୍ତି। ୨୦ ତାରିଖରେ ଚତୁର୍ଦ୍ଦଶୀ ଯୁକ୍ତ ଅମାବାସ୍ୟା ରହିଥିବା ବେଳେ ରିକ୍ତା ତିଥି ହେତୁ ସେହି ଦିନ ପୟାଶ୍ରାଦ୍ଧ ଓ ଦୀପଦାନ ନକରି ୨୧ରେ କରିବାକୁ ମତ ରଖିଛନ୍ତି। ସେହିପରି ଅନେକ ପାଞ୍ଜୀକାରେ ୨୦ ତାରିଖରେ ଶ୍ୟାମା ପୂଜା ରହିଥିବା ବେଳେ ୨୧ ତାରିଖରେ ଦୀପଦାନ ପୟାଶ୍ରାଦ୍ଧ କରିବେ। ସେପଟେ ଶ୍ରୀମନ୍ଦିର ରେ ନୀତିକୁ ଆଗାମୀ ୨୧ ତାରିଖରେ ଅମାବାସ୍ୟା ତିଥି ରହିଥିବାରୁ ନାରାୟଣ ଠାକୁରଙ୍କର ସାଗର ବିଜେ ନୀତି ୨୧ ତାରିଖ ଦିନ କରାଯିବ। ପଞ୍ଜିକାରେ ସମନ୍ବୟ ରଖାଯାଇ ଶ୍ରୀମନ୍ଦିର ପକ୍ଷରୁ ବିବାଦକୁ ଏଡାଇବା ନେଇ ପ୍ରଚେଷ୍ଟା କରାଯାଇଥିବା ଜଣାପଡ଼ିଛି । ଦୀପଦାନ ଓ ପୟାଶ୍ରାଦ୍ଧର ହିନ୍ଦୁ ଧାର୍ମିକ ବିଧି ବ୍ୟବସ୍ଥା ମଧ୍ୟରେ ସ୍ୱତନ୍ତ୍ରତା ରହିଥିବା ବେଳେ ଏହାକୁ ପାଳନ ନେଇ ଦ୍ୱନ୍ଦ୍ୱ ରହିବା ଠିକ ନୁହେଁ ବୋଲି ମତ ପ୍ରକାଶ ପାଇଛି ।
କାଳୀପୂଜା ଓ ଦୀପାବଳି ପାଇଁ ଏବେଠୁ ଉତ୍ସବମୁଖର କଟକ, ଶେଷ ପର୍ଯ୍ୟାୟରେ ପ୍ରସ୍ତୁତି
କାଳୀପୂଜା ଓ ଦୀପାବଳି ପାଇଁ ଏବେଠୁ ଉତ୍ସବମୁଖର କଟକ । ଶେଷ ପର୍ଯ୍ୟାୟରେ ପ୍ରସ୍ତୁତି । ଶତାଧିକ ମଣ୍ଡପରେ ଏବେ ମାଆଙ୍କ ମୃଣ୍ମୟୀ ମୂର୍ତ୍ତିରେ ଖଡିଚଢା କାମ ଚାଲିଛି । କାରିଗରମାନେ ଖଡିଚଢା କାମ ସାରିବା ପରେ ଦୁଇ ଦିନ ପରେ ମାଆଙ୍କ ରଙ୍ଗକାମ ଆରମ୍ଭ ହେବ। ଏହା ପରେ ଶନିବାର ସୁଦ୍ଧା ମାଆଙ୍କ ସାଜସଜା କାମ ଶେଷ ହେବ । ତେବେ ମଣ୍ଡପ ତିଆରିରେ ଲାଗି ପଡିଛନ୍ତି କାରିଗର । ଏଥର ବି ଉଚ୍ଚ ତୋରଣରେ ପୂଜା ପାଇବେ ମାଆ ।
ସେପଟେ କାଳିପୂଜା ଓ ଦୀପାବଳି ବାଣ ଫୁଟା ପାଇଁ କମିଶନରେଟ ପୋଲିସ ପକ୍ଷରୁ ବ୍ୟାପକ ପୋଲିସ ମୁତୟନ କରାଯିବ ବୋଲି କହିଛନ୍ତି ଡିସିପି । ସହରରେ ବିଭିନ୍ନ ଖୋଲା ସ୍ଥାନରେ ବାଣ ବିକ୍ରି ପାଇଁ ଅନୁମତି ଦିଆଯିବ। ଏହା ପରେ ଲୋକମାନେ ସୁରକ୍ଷିତ ଭାବେ ଧାର୍ଯ୍ୟ ସମୟରେ ଦୀପାବଳି ରାତିରେ ବାଣ ଫୁଟାଇବେ । ଏ ନେଇ ଡିସିପି କହିଛନ୍ତି ଯେ ବାଣଫୁଟାରେ ଅଭିଭାବକ ମାନେ ନିଜ ପିଲାମାନଙ୍କ ସୁରକ୍ଷା ପ୍ରତି ଧ୍ୟାନ ଦେଇ ବାଣ ଫୁଟାନ୍ତୁ। କଟକ ସହରରେ ଦୁର୍ଗା ପୂଜା ଭସାଣ ବେଳେ ଗଣ୍ଡଗୋଳ ଘଟଣାକୁ ଦୃଷ୍ଟିରେ ରଖି କମିଶନରେଟ ପୋଲିସ କଳିପୂଜାରେ ଅଧିକ ସୁରକ୍ଷା ବଳ ମୁତୟନ କରାଯିବ।
ସମ୍ବଲପୁରବାସୀଙ୍କ ପାଇଁ କାଳ ସାଜିଛି ଫ୍ଲାଏଓଭର ନିର୍ମାଣ
ସମ୍ବଲପୁରବାସୀଙ୍କ ପାଇଁ କାଳ ସାଜିଛି ଫ୍ଲାଏଓଭର ନିର୍ମାଣ । ପାଦେ ପାଦେ କେ ବିପଦ । ସଡ଼କ ଦୁର୍ଘଟଣା କମାଇବା ପାଇଁ ଏନଏଚଆଇର ପଦକ୍ଷେପ ପାଲଟିଛି ବୁମେରାଂ । କମିବ କଣ ବଢୁଛି ଦୁର୍ଘଟଣା । ସମ୍ବଲପୁର ସହରର ବିଶେଷ କରି ରେମେଡ୍ ଛକରୁ ଅଇଁଠାପାଲି ପର୍ଯ୍ୟନ୍ତ ନିର୍ମାଣ ଚାଲିଛି ଫ୍ଲାଇଓଭର । ଫଳରେ ପ୍ରଦିନ ଦୁର୍ଘଟଣା ଘଟୁଥିବା ଅଭିଯୋଗ ହୋଇଛି । ଏନେଇ ଚିନ୍ତା ପ୍ରକଟ କରିଛନ୍ତି ସମ୍ବଲପୁର ସହରବାସୀ । କାରଣ ଯେତେବେଳେ ରାସ୍ତା ନିର୍ମାଣ କରାଯାଏ ସେହି ସମୟରେ ଏକ ବ୍ୟବସ୍ଥିତ ସର୍ଭିସ ରୋଡର ଆବଶ୍ୟକତା ଥାଏ । କିନ୍ତୁ ଏଠାରେ ତାହା ଦେଖିବାକୁ ମିଳୁନାହିଁ । କାହିଁକି ଜାତୀୟ ରାଜପଥ ପ୍ରାଧିକରଣ ଏଭଳି ଖାମ ଖିଆଲି କାମ କରୁଛି ତାକୁ ନେଇ ପ୍ରଶ୍ନ ଉଠିଛି l
ଏହି ରାସ୍ତାରେ ବିଶେଷ କରି ଚାରି ଜିଲ୍ଲାର ଯାତ୍ରୀ ଯିବା ଆସିବା କରିଥାନ୍ତି । ଗୋଟିଏ ପଟେ ଝାରସୁଗୁଡ଼ା ରୋଡ ଆସି ମିଶୁଥିବା ବେଳେ ଅନ୍ୟପଟେ ବରଗଡ ରୋଡ ଆସି ମିଶିଛି । ସେହିପରି ସୁବର୍ଣ୍ଣପୁର ଓ ଦେବଗଡ଼ ଜିଲ୍ଲାର ମଧ୍ୟ ଏହା ହେଉଛି ମୁଖ୍ୟ ରାସ୍ତା । ତେଣୁ ସବୁବେଳେ ଏହି ରାସ୍ତା ଭିଡ ରହୁଥିବାରୁ ଖୁବ୍ ଶୀଘ୍ର ଏକ ବ୍ୟବସ୍ଥିତ ସର୍ଭିସ ରୋଡ ନିର୍ମାଣ କରିବାକୁ ଦାବି କରିଛନ୍ତି ଲୋକେ । ଏଭଳି ଅବ୍ୟବସ୍ଥାକୁ ନେଇ ଜିଲ୍ଲା ପ୍ରଶାସନ ମଧ୍ୟ କାହିଁକି ଚୁପ୍ ବୋଲି ପ୍ରଶ୍ନ ଉଠିଛି ।
ଗଛରେ ବସିଛନ୍ତି ହଜାର ହଜାର ପକ୍ଷୀ: କିଚିରିମିଚିରି ଶବ୍ଦରେ ଫାଟି ପଡୁଛି ଗାଁ ଦାଣ୍ଡ
ଗଛରେ ବସିଛନ୍ତି ହଜାର ହଜାର ପକ୍ଷୀ । କିଚିରିମିଚିରି ଶବ୍ଦରେ ଫାଟି ପଡୁଛି ଗାଁ ଦାଣ୍ଡ । କଳାହାଣ୍ଡି ଜିଲ୍ଲା ଭବାନୀପାଟାଣା ବ୍ଲକ କାମଠଣା ପଞ୍ଚାୟତ ବୋରଭଟା ଗାଁରେ ବିଦେଶୀ ପକ୍ଷୀଙ୍କ ସମ୍ଭାର । ଗାଁର ଶେଷ ମୁଣ୍ଡରେ ଥିବା ଗ୍ରାମଦେବୀ ମାଆ ମାଉଲିଙ୍କ ପୀଠରେ ଥିବା ଗଛରେ ବସା ବାନ୍ଧିଛନ୍ତି ହଜାର ହଜାର ପକ୍ଷୀ । ଦୂରଦୂରାନ୍ତରୁ ପକ୍ଷୀମାନେ ଏଠାକୁ ବର୍ଷା ଋତୁ ଆରମ୍ଭରୁ ଛୁଟିଆସିଥିବା ବେଳେ ସେମାନଙ୍କୁ ସୁରକ୍ଷା ଦେଉଛନ୍ତି ଗ୍ରାମବାସୀ ।
ବୋରଭଟା ଗାଁକୁ ପ୍ରତିବର୍ଷ ଶ୍ରାବଣ ମାସରୁ ବିଦେଶୀ ପକ୍ଷୀ ଆସିଥାନ୍ତି । ଗାଁ ଶେଷ ମୁଣ୍ଡରେ ଥିବା ପୁରୁଣା ଗଛରେ ବସା ବାନ୍ଧି ଅଣ୍ଡା ଦିଅନ୍ତି । ଆଖପାଖ ଜମି ଓ ପାଖରୀରୁ ଖାଦ୍ୟ ସଂଗ୍ରହ କରି ଖାଇଥାନ୍ତି । ପକ୍ଷୀଙ୍କୁ ଶିକାରୀଙ୍କ ଲୋଲୁପ ଦୃଷ୍ଟିରୁ ରକ୍ଷା କରିଥାନ୍ତି ଗ୍ରାମବାସୀ । ଫେବୃୟାରୀ ମାସ ପରେ ପକ୍ଷୀ ମାନେ ଦ୍ଵିତୀୟ ଘର ଛାଡି ନିଜ ଅଞ୍ଚଳକୁ ଫେରି ଯାଆନ୍ତି । ବନବିଭାଗ ପକ୍ଷରୁ ବିଦେଶୀ ପକ୍ଷୀଙ୍କ ପାଇଁ ରହିବା ବ୍ୟବସ୍ଥା କରିବାକୁ ସାଧାରଣରେ ଦାବି ଜୋର ଧରିଛି ।
ପଞ୍ଚାୟତରେ ମହାଦୁର୍ନୀତି: ଭୂତ ବିଲ୍ କରି କରାଯାଇଛି ଟଙ୍କା ହଡ଼ପ, RTI ତଥ୍ୟରୁ ଖୁଲାସା
ବଲାଙ୍ଗୀର ଜିଲ୍ଲା ସଇଁତଳା ବ୍ଲକ ଯୁରାବନ୍ଧ ପଞ୍ଚାୟତରେ ମହାଦୁର୍ନୀତି । ଭୂତ ବିଲ କରି କରାଯାଇଛି ଟଙ୍କା ହଡ଼ପ । RTI ତଥ୍ୟରୁ ଖୁଲାସା । ଯୁରାବନ୍ଧ ପରି ଉପାନ୍ତ ଅଞ୍ଚଳରେ ଦୁର୍ନୀତିର ଗନ୍ଧ ପାଇ କିଛି ଯୁବକ RTIକୁ ତଥ୍ୟ ମାଗିଥିଲେ । ତଥ୍ୟ ମୁତାବକ ଯୁରାବନ୍ଧ ପଞ୍ଚାୟତର କେଉମାଲ ଗାଁରେ ଖଲିଆମୁଡା ନାଁରେ କୌଣସି ବନ୍ଦ ନଥିଲେ ମଧ୍ୟ ସେହି ନାଁରେ ଲକ୍ଷଲକ୍ଷ ଟଙ୍କା ଉଠାଣ ହୋଇଛି । ସେଭଳି ଚର୍ଚ୍ଚ ଘରକୁ କମ୍ୟୁନିଟି ସେଣ୍ଟର ଓ ଅନେକ ଉନ୍ନୟନ କାମ ଦର୍ଶାଇ ଲକ୍ଷାଧିକ ଟଙ୍କା ହଡପ ହୋଇଛି । ସେ ସମସ୍ତ ଟଙ୍କା ସରପଞ୍ଚଙ୍କ ବାପାଙ୍କ ଆକାଉଣ୍ଟକୁ ଯାଇଛି ବୋଲି ସ୍ଥାନୀୟ ଲୋକେ ଅଭିଯୋଗ କରିଛନ୍ତି । ସରପଞ୍ଚଙ୍କ ବାପାଙ୍କ ଭେଣ୍ଡର ଆଇଡି ନଥିବା ବେଳେ କେମିତି ତାଙ୍କୁ ଏତେ ଟଙ୍କା ଦିଆଯାଇଛି ତାକୁ ନେଇ ଉଠିଛି ପ୍ରଶ୍ନ ।
ଯୁରାବନ୍ଧ ପଞ୍ଚାୟତରେ ଦୁର୍ନୀତି ହୋଇଥିବା ଖବର ପାଇ ବିଡିଓ ତଦନ୍ତ କରି ବଲାଙ୍ଗୀର ପିଡିଙ୍କୁ ରିପୋର୍ଟ ପ୍ରଦାନ କରିଥିଲେ । ଯେଉଁଥିରେ ଆଶ୍ଚର୍ଯ୍ୟକର ତଥ୍ୟ ସାମ୍ନାକୁ ଆସିଛି । ପଞ୍ଚାୟତ ତରଫରୁ ହୋଇଥିବା ସମସ୍ତ ଉନ୍ନୟନମୂଳକ କାମରେ ସରପଞ୍ଚଙ୍କ ବାପାଙ୍କ ପାଖରେ ଥିବା ଦୁଇଟି ଟ୍ରାକ୍ଟର ବ୍ୟବହାର ହୋଇଛି । ୨ଟି ଟ୍ରାକ୍ଟରର ନମ୍ବର OD 03Q 1510 ଓ OD 02G 5840 । ହେଲେ RTO ରେଜିଷ୍ଟ୍ରେସନ ଅନୁସାରେ ସେହି ଦୁଇଟି ଗାଡି ମୋଟର ସାଇକଲ ଓ ପ୍ଲେଜରର ବୋଲି ଜଣାପଡିଛି । ତେବେ କିପରି ମୋଟର ସାଇକେଲ ଉନ୍ନୟନମୂଳକ କାମରେ ସାମିଲ ହେଲା ? ଏସମସ୍ତ ତଥ୍ୟ ପଞ୍ଚାୟତରେ ହୋଇଥିବା ଦୁର୍ନୀତିକୁ ପର୍ଦ୍ଦାଫାସ କରିଛି । ସ୍ଥାନୀୟ ଲୋକେ ଘଟଣାର ଭିଜିଲାନ୍ସ ସ୍ତରୀୟ ତଦନ୍ତ ଦାବି କରିଥିବା ବେଳେ BDO ଏହାକୁ ପ୍ରିଣ୍ଟିଂ ଏରର କହୁଛନ୍ତି । ଦୁର୍ନୀତିକାରୀ ଅଧିକାରୀଙ୍କ ବିରୋଧରେ କେବେ କାର୍ଯ୍ୟାନୁଷ୍ଠାନ ନିଆଯାଉଛି ତାକୁ ହିଁ ଅପେକ୍ଷା ।
ଦୁଃଖ ଆଣିଛି ଋଷିକୂଲ୍ୟା ବନ୍ୟା: ଉଜାଡିଦେଲା ସୁନାର ଫସଲ, ଚିନ୍ତାରେ ଚଷା ପୁଅ
ଦୁଃଖ ଆଣିଛି ଋଷିକୂଲ୍ୟା ବନ୍ୟା । ଉଜାଡିଦେଲା ସୁନାର ଫସଲ । ଚିନ୍ତାରେ ଚଷା ପୁଅ । ଗତ ଲଗାଣ ବର୍ଷାରେ ଋଷିକୂଲ୍ୟା ନଦୀରେ ବନ୍ୟା ଆସିବାରୁ ଗଞ୍ଜାମର ନଦୀ ତଟବର୍ତ୍ତୀ ଗାଁ ଗୁଡିକରେ ବ୍ୟାପକ ଫସଲ ନଷ୍ଟ ହୋଇଛି । କେଉଁଠି ଜମିରେ ବାଲି ଚରିଯାଇଛି ତ ଆଉ କେଉଁଠି ଭୂଇଁରେ ଲୋଟିଛି ଧାନ ଗଛ । ଅନେକ ଜମିରେ ଏବେବି ପାଣି ଜମି ରହିଥିବା ବେଳେ ଉଜୁଡା ଚାଷକୁ ମାଟିରୁ ସାଉଁଟୁଛନ୍ତି ଚାଷୀ । ଧରାକୋଟ ବ୍ଳକ କୁଶପଡା ଗାଁରେ ବନ୍ୟା ପାଣି ମାଡିଯିବାରୁ ଶହ ଶହ ହେକ୍ଟର ଜମିରେ ଧାନ ଫସଲ ସହ ପନିପରିବା ଚାଷ ନଷ୍ଟ ହୋଇଯାଇଛି । ଧାର କରଜ କରି ଚାଷ କରିଥିବା ଚାଷୀ କିପରି ଋଣ ସୁଝିବେ ? କିପରି ପରିବାର ଚଳାଇବା ? ଚିନ୍ତାରେ ମୁଣ୍ଡରେ ହାତ ଦେଇ ବସିଛନ୍ତି ।
ଋଷିକୂଲ୍ୟା ନଦୀ ଓ ବଡ଼ ନଦୀ କୂଳରେ ଥିବା ବହୁ ଗାଁ ଲୋକଙ୍କ ଫସଲ ନଷ୍ଟ ହୋଇଛି । ବିଶେଷ କରି ସିଙ୍ଗିପୁର, ବ୍ରାହ୍ମଣ ଦେଇ, ନୂଆଗଡ଼, ଯାହାଡା ଆଦି ଗାଁରେ ବହୁ ଫସଲ ନଷ୍ଟ ହୋଇଛି । ଗ୍ରାଉଣ୍ଡକୁ ଜିଲ୍ଲାପାଳ ଯାଇ କ୍ଷୟକ୍ଷତି ଅନୁଧ୍ୟାନ କରିବା ସହ ସ୍ଥାନୀୟ ତହସିଲଦାର, କୃଷି ବିଭାଗ ଅଧିକାରୀ, ଉଦ୍ୟାନ ବିଭାଗ ଓ ଅନ୍ୟ କର୍ମଚାରୀଙ୍କୁ କ୍ଷୟକ୍ଷତି ଆକଳନ କରି ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି । ତଥାପି କ୍ଷତିଗ୍ରସ୍ତ ଚାଷୀ ଏବେବି ଆଶଙ୍କା ଭିତରେ ଅଛନ୍ତି । ଉଜୁଡିଯାଇଥିବା ଫସଲର ଉପଯୁକ୍ତ ଭରଣା ମିଳିବ ତ ? ନା ପ୍ରଶାସନର ପ୍ରତିଶୃତି ପାଣିର ଗାର ପାଲଟିବ ? କ୍ଷୟକ୍ଷତିର ସମ୍ମୁଖୀନ ହେଇଥିବା ଚାଷୀଙ୍କୁ ଜିଲ୍ଲା ପ୍ରଶାସନ ପକ୍ଷରୁ ଶୀଘ୍ର ସହାୟତା ଯୋଗାଇ ଦେବା ଜରୁରୀ ହୋଇପଡିଛି ।
ବିହାର ବିଧାନସଭା ନିର୍ବାଚନ: ବିଜେପି ଜାରି କଲା ଦ୍ବିତୀୟ ଲିଷ୍ଟ, ମୈଥିଲୀ ଠାକୁରଙ୍କୁ ମିଳିଲା ଟିକେଟ
ବିହାର ବିଧାନସଭା ନିର୍ବାଚନ ପାଇଁ ବିଜେପି ତା’ର ଦ୍ବିତୀୟ ଲିଷ୍ଟ ଜାରି କରିଛି । ସବୁଠାରୁ ବଡ଼ କଥା ହେଉଛି ଏଥିରେ ଭୋଜପୁରୀ ଗାୟିକା ମୈଥିଲୀ ଠାକୁରଙ୍କୁ ଟିକେଟ ମିଳିଛି । ମୈଥିଲୀ ଅଲୀନଗର ଆସନରୁ ନିର୍ବାଚନ ଲଢ଼ିବେ । ଦ୍ବିତୀୟ ପର୍ଯ୍ୟାୟରେ ମୋଟ ୧୨ ଜଣ ପ୍ରାର୍ଥୀଙ୍କ ନାମ ଘୋଷଣା କରାଯାଇଛି ।
ଗତକାଲି ଏନଡିଏ ମେଣ୍ଟ ପକ୍ଷରୁ ବିଜେପି ତା’ର ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ଘୋଷଣା କରିଥିଲା । ପ୍ରଥମ ପର୍ଯ୍ୟାୟରେ ବିଜେପି ୭୧ ଆସନ ପାଇଁ ପ୍ରାର୍ଥୀଙ୍କ ନାଁ ଘୋଷଣା କରିଥିଲା । ପ୍ରଥମ ସୂଚୀରେ ଦଳ ଅଧିକାଂଶ ବିଧାୟକ ଓ ମନ୍ତ୍ରୀଙ୍କ ଉପରେ ଭରସା କରିଥିଲା । କୁହ୍ମରାରରୁ ଅରୁଣ ସିହ୍ନା ଓ ପାଟନା ସାହିବରୁ ନନ୍ଦକିଶୋର ଯାଦବଙ୍କ ଟିକେଟ କଟିଥିଲା । ପ୍ରଥମ ପର୍ଯ୍ୟାୟରେ ବିଜେପି ୯ ବିଧାୟକଙ୍କୁ ଟିକେଟ୍ ଦେଇନଥିଲା । ପ୍ରଥମ ତାଲିକାରେ ଦଳ ଉପମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀଙ୍କୁ ତାରାପୁର, ମଙ୍ଗଳ ପାଣ୍ଡେଙ୍କୁ ସିବାନ, ସଞ୍ଜୀବ ଚୌରସିଆଙ୍କୁ ଦୀଘା ଓ ରଜନିଶ କୁମାରଙ୍କୁ ତୋଘଡାରୁ ପ୍ରାର୍ଥୀ କରିବାକୁ ଘୋଷଣା କରିଥିଲା । ଉକ୍ତ ୭୧ ଜଣ ପ୍ରାର୍ଥୀଙ୍କ ତାଲିକାରେ ୯ ଜଣ ମହିଳା ଓ ୫ ଜଣ ଅନୁସୂଚିତ ଜାତି ଓ ଜଣେ ଅନୁସୂଚିତ ଜନଜାତି ନେତାଙ୍କ ନାଁ ଘୋଷଣା କରାଯାଇଥିଲା ।
ଏସିଆ କପରେ ପାକିସ୍ତାନୀ କ୍ରିକେଟରଙ୍କ ହାତ ନମିଳାଇବା ପ୍ରସଙ୍ଗ : ଏମିତି ଭିଡିଓ କରି ଭାରତୀୟ ଖେଳାଳୀଙ୍କ ମଜାକ ଉଡ଼ାଇଲେ ଅଷ୍ଟ୍ରେଲୀୟ ଖେଳାଳି..
ନନ୍ଦିଘୋଷ ବ୍ୟୁରୋ : ଓ୍ବେଷ୍ଟଇଣ୍ଡିଜ୍ ବିପକ୍ଷ ଟେଷ୍ଟ ସିରିଜ୍ ସରିବା ପରେ ଏବେ ଅଷ୍ଟ୍ରେଲିଆରେ ଘରୋଇ ଦଳକୁ ଭେଟିବ ଭାରତ । ଟିମ ଇଣ୍ଡିଆ ଅଷ୍ଟ୍ରେଲିଆରେ ପହଞ୍ଚିବା ପୂର୍ବରୁ ଏକ ଭିଡିଓ ଏବେ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ଯେଉଁଥିରେ ଅଷ୍ଟ୍ରେଲିଆ କ୍ରିକେଟ ଦଳର କିଛି ପୁରୁଷ ଖେଳାଳି ଏବଂ ମହିଳା ଖେଳାଳି ଭାରତୀୟ କ୍ରିକେଟ ଦଳର ଏକପ୍ରକାର ମଜାକ୍ ଉଡ଼ାଉଛନ୍ତି । ଏସିଆ କପରେ ପାକିସ୍ତାନ ଖେଳାଳିଙ୍କ ସହ ଭାରତୀୟ ଖେଳାଳି ହାତ ନମିଳାଇବା ପ୍ରସଙ୍ଗକୁ ଏପରି ଏକ ଭିଡିଓ କରାଯାଇଛି । ଅଷ୍ଟ୍ରେଲିଆର ସ୍ପୋର୍ଟ୍ସ ଷ୍ଟ୍ରିମିଂ ପ୍ଲଟଫର୍ମ କାୟୋ ପକ୍ଷରୁ ଏକ ପ୍ରୋମୋ ଭିଡିଓ ପୋଷ୍ଟ କରାଯାଇଛି । ଯେଉଁଥିରେ ହାତ ନମିଳାଇବା ପ୍ରସଙ୍ଗକୁ ନେଇ ଉପହାସ କଲା ଭଳି ଜଣାପଡ଼ୁଛି । ସେମାନଙ୍କ କଥା ସହ ଇଙ୍ଗିତ ମଧ୍ୟ ସେଭଳି ରହିଛି । ତେବେ ଏହି ଭିଡିଓଟି ଏବେ ହଟାଯାଇଛି । ମାତ୍ର ସେହି ଭିଡିଓଟି ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ଯାହାକୁ ନେଇ ଅଷ୍ଟ୍ରେଲିୟ ଖେଳାଳିଙ୍କୁ ମଧ୍ୟ ଟ୍ରୋଲ କରୁଛନ୍ତି କିଛି କ୍ରିକେଟପ୍ରେମୀ । ଯଦିଓ କୁହାଯାଇଛି କି, ଏହି ଭିଡିଓଟି କେବଳ ମନୋରଞ୍ଜନ ପାଇଁ କରାଯାଇଥିଲା ମାତ୍ର ଏହାକୁ ନେଇ ବେଶ ଚର୍ଚ୍ଚା ହୋଇଥିବା ବେଳେ କୁହାଯାଇଥିଲା କି, ଏହା ଭାରତୀୟ ଖେଳାଳିଙ୍କ ମଜାକ୍ ଉଡ଼ାଇଛି । ଶେଷରେ ଏହାକୁ ମଧ୍ୟ ହଟାଯାଇଛି ।
AUS players pre-India clip mocks India no-handshake theatre vs Pak. Why Aussie media & players laughing at stance sold as national pride? @BCCI @JayShah @GautamGambhir @narendramodi @ICC @MithunManhas @vikrantgupta73 @rawatrahul9 @mufaddal_vohra @PadmajaJoshi @ShivAroor pic.twitter.com/lSbuyhEcui
— Maham Fazal (@MahamFazal_) October 14, 2025