ଭୁବନେଶ୍ୱର:  ତୃତୀୟ ଲହରକୁ ମାତ୍ ଦେବାକୁ କେତେ ପ୍ରସ୍ତୁତ ରାଜଧାନୀବାସୀ। ଭୁବନେଶ୍ୱରବାସୀଙ୍କ ଶରୀରରେ କେତେ ବଢିଛି ଆଣ୍ଟିବଡି। ଆଜିଠୁ ୨ଦିନ ଧରି ଭୁବନେଶ୍ୱରରେ ହେବ ସେରୋ ସର୍ଭେ। ବିଏମସିର ୫ଟି ଓ୍ୱାର୍ଡରେ ସେରୋ ସର୍ଭେ କରାଯିବ। ଏନେଇ ଆଇସିଏମଆରରେ ଅନୁରୋଧ କ୍ରମେ ପ୍ରସ୍ତୁତ ହୋଇଛି ବିଏମସି। ବିଏମସିର ୩ଟି ଜୋନର ୮ନମ୍ବର ,୧୫ ନମ୍ବର, ୩୩୨ ନମ୍ବର, ୪୧ ନମ୍ବର ଓ ୬୩ ନମ୍ବର ଓ୍ୱାର୍ଡରେ ସର୍ଭେ କରାଯିବ।

ଏଥିପାଇଁ ୫ଟି ସ୍ୱତନ୍ତ୍ର ଟିମ୍ ଗଠନ ହୋଇଛ। ଶିଶୁଙ୍କ ସମେତ ବିଭିନ୍ନ ବର୍ଗର ବ୍ୟକ୍ତିଙ୍କର ସାମ୍ପୁଲ ସଂଗ୍ରହ କରାଯିବ। ପ୍ରତି ଓ୍ୱାର୍ଡରେ ୨୦୦ ଜଣଙ୍କ ନମୁନା ସଂଗ୍ରହ କରାଯିବାକୁ ଲକ୍ଷ୍ୟ ରଖାଯାଇଛି। ସେପଟେ ଗତ ୨୯ତାରିଖରେ ୧୨ଟି ଜିଲ୍ଲାରେ ସେରୋ ସର୍ଭେ ଆରମ୍ଭ ହୋଇଛି। ବିଶେଷକରି ଗ୍ରାମାଞ୍ଚଳ ଲୋକମାନଙ୍କ ଶରୀରରେ ରୋଗପ୍ରତିରୋଧକ ଶକ୍ତି କେତେ ବଢିଛି ତାହା ଜାଣିବା ପାଇଁ ପ୍ରାୟ ଅଧା ଓଡ଼ିଶାରେ ସର୍ଭେ କରାଯାଉଛି।

ପାରାଦୀପ: ପାରାଦୀପ ଆଇଓସିଏଲ ସମ୍ମୁଖରେ୧୦ ଦଫା ଦାବି ନେଇ କଳାପତାକା ପ୍ରଦର୍ଶନ ସହିତ ଶ୍ରମିକଙ୍କ ବିକ୍ଷୋଭ ପ୍ରଦର୍ଶନ। ପାରାଦୀପ-ଏରସମା ଶିଳ୍ପାଞ୍ଚଳ ଶ୍ରମିକ ସଂଘ ପକ୍ଷରୁ ଆୟୋଜିତ ପ୍ରତିବାଦ କାର୍ଯ୍ୟକ୍ରମରେ ୧୫ ହଜାରରୁ ଉର୍ଦ୍ଧ୍ୱ ଶ୍ରମିକ ଯୋଗଦେଇଥିଲେ। ଆଇଓସିଏଲ କର୍ତ୍ତୃପକ୍ଷ ଶ୍ରମିକମାନଙ୍କୁ ଅଣଦେଖା କରୁଥିବା ଅଭିଯୋଗ କରି ବିରୋଧ କରିଛନ୍ତି ଶ୍ରମିକମାନେ।

ପୁରୁଣା ଶ୍ରମିକମାନଙ୍କୁ ପୂର୍ଣ୍ଣ ଗେଟ୍ ପାସ ପ୍ରଦାନ, ପ୍ରତି ମାସର ୭ ତାରିଖ ମଧ୍ୟରେ ଦରମା, ଆଇଓସିଏଲ ଟାଉନସିପରେ ବିଶ୍ରାମାଗାର, କରୋନାରେ ମୃତ୍ୟୁ ହେଲେ ତାଙ୍କ ପରିବାରକୁ ୫୦ ଲକ୍ଷ ଟଙ୍କା ସହାୟତା, ଆଇଓସିଏଲ ପରିସରରେ ଶ୍ରମିକମାନଙ୍କୁ କ୍ୟାଣ୍ଟିନର ସୁବିଧା, ମାଗଣା ଗାଡ଼ି ପାର୍କିଂ ସହ ୧୦ ଦଫା ଦାବି ପୂରଣ କରିବାକୁ ଦାବି କରାଯାଇଛି। ତୁରନ୍ତ ଏହି ଦାବି ପୂରଣ ନହେଲେ ସମସ୍ତ ଶ୍ରମିକ ବଡ଼ ଧରଣର ଆନ୍ଦୋଳନକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।

ଭୁବନେଶ୍ୱର: ନକଲି ସ୍କୁଲ ଶିକ୍ଷକଙ୍କୁ ଧରିବା ଅଭିଯାନ ଆରମ୍ଭ। ଏଥିପାଇଁ ଯାଞ୍ଚ କରି ଏଫ୍‌ଆଇଆର ଦେବାକୁ ଜିଲ୍ଲା ଓ ବ୍ଲକ ଶିକ୍ଷାଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଥିଲା। ଅନେକ ଏଫ୍‌ଆଇଆର ବି ହୋଇଛି ଓ ଅନୁଶାସନମୂଳକ କାର୍ଯ୍ୟାନୁଷ୍ଠାନ ବି ନିଆଯାଇଛି। କିଛି ନକଲି ଶିକ୍ଷକ ବହିଷ୍କାର ହୋଇଛନ୍ତି। ହାଇକୋର୍ଟରେ ପିଆଇଏଲ୍‌ ହୋଇଛି। ଏଫ୍‌ଆଇଆର ଷ୍ଟାଟସ୍ ଜଣାଇବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି । ତଥ୍ୟ ମଗାଯାଇଛି । ଶିକ୍ଷକ ନିଯୁକ୍ତି ବେଳେ ଜାଲ ଦସ୍ତାବିଜ ଦେଇଥିବା ଅଭିଯୋଗ ଆସିଥିଲା। ବିଇଓ ଓ ଡିଇଓଙ୍କୁ କାର୍ଯ୍ୟାନୁଷ୍ଠାନ ନେବାକୁ କୁହାଯାଇଥିବା ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ ନିର୍ଦ୍ଦେଶକ ରଘୁରାମ ଆର.ଆୟର କହିଛନ୍ତି।