ନନ୍ଦିଘୋଷ ବ୍ୟୁରୋ: ରାଜଧାନୀରେ ମଦ୍ୟପ ଯୁବକଙ୍କ ଉନ୍ମତ୍ତ କାଣ୍ଡ । ଟ୍ରେନ ଅଟକାଇ ଦେଲା ମଦୁଆ । ନନ୍ଦିଘୋଷ ଟିଭି ହାତରେ ଲାଗିଛି Exclusive ଭିଜୁଆଲ । ଭୁବନେଶ୍ୱର ରାଜମହଲ ଛକ ନିକଟରେ ଥିବା ରେଳ ଧାରଣାରେ ଘଟିଛି ଅଭାବନୀୟ ଘଟଣା ।
ଫାଳିକିଆ ବସ୍ତିରେ ରହୁଥିବା ଜଣେ ମଦ୍ୟପ ଏଭଳି କାଣ୍ଡ ଭିଆଇଛି । ଖବର ପାଇ ଆରପିଏଫ ଓ ଜିଆରପି ପହଞ୍ଚି ମଦ୍ୟପ ଯୁବକଙ୍କୁ କାବୁ କରିଛନ୍ତି । ଘଟଣା ପରେ ରେଳ ସୁରକ୍ଷାକୁ ନେଇ ଉଦବେଗ ପ୍ରକାଶ ପାଇଛି । ଯାତ୍ରୀଙ୍କ ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।
ନନ୍ଦିଘୋଷ ବ୍ୟୁରୋ: ଫେବ୍ରୁଆରୀ ୧ ତାରିଖରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଆଗତ କରିବେ କେନ୍ଦ୍ର ବଜେଟ l କେତେ ହେବ ମୋଟ ବଜେଟର ପରିମାଣ l କେଉଁ କ୍ଷେତ୍ରକୁ ବ୍ୟୟ ପରିମାଣ କେତେ ହେବ ତାକୁ ନେଇ ଆରମ୍ଭ ହୋଇଯାଇଛି କଳ୍ପନାଜଳ୍ପନା l ଗତବର୍ଷର ବଜେଟରେ ମୋଟ ବ୍ୟୟ ପରିମାଣ ରହିଥିଲା ୫୦.୬୫ ଲକ୍ଷ କୋଟି ଟଙ୍କା l କରଜ ବିନା ମୋଟ ଆୟ ପରିମାଣ ଥିଲା ୩୪.୯୬ ଲକ୍ଷ କୋଟି ଟଙ୍କା l କର ବାବଦରୁ ମୋଟ ଆୟ ଲକ୍ଷ୍ୟ ରହିଥିଲା ୨୮.୩୭ ଲକ୍ଷ କୋଟି l ରାଜସ୍ବ ନିଅଣ୍ଟ ପରିମାଣ ଥିଲା ଜିଡିପିର ୪.୪ ପ୍ରତିଶତ l ଚଳିତ ବଜେଟରେ କୃଷି କ୍ଷେତ୍ରକୁ ଅଧିକ ପ୍ରାଧାନ୍ୟ ଦିଆଯିବାର ସମ୍ଭାବନା ରହିଛି l ଗତବର୍ଷ ବଜେଟରେ କୃଷି ଲାଗି ବ୍ୟୟବରାଦ ପରିମାଣ ଥିଲା ୧ ଲକ୍ଷ ୩୭ ହଜାର ୭୫୭ କୋଟି ଟଙ୍କା । ଯାହା ୨୦୨୪ ଠାରୁ ୨.୫ ପ୍ରତିଶତ ଅଧିକ ଥିଲା l ୨୦୨୪ରେ ଏହି ପରିମାଣ ଥିଲା ୧ ଲକ୍ଷ ୨୨ ହଜାର ୫୩୮ କୋଟି ଟଙ୍କା l ଚଳିତବର୍ଷ ଏହି ପରିମାଣ ୨ ଲକ୍ଷ କୋଟି ଟପିବା ସମ୍ଭାବନା ରହିଛି l
କୃଷି କ୍ଷେତ୍ରରେ ଦକ୍ଷତା ବିକାଶ, ନିବେଶ, ପ୍ରଯୁକ୍ତି, ଗ୍ରାମୀଣ ଅର୍ଥନୀତିକୁ କରାଯାଇପାରେ ଫୋକସ l ଗତଥର ଛଅ ବର୍ଷିଆ ଆତ୍ମନିର୍ଭର ଡାଲି ଜାତୀୟ ଫସଲ ମିଶନ ସମ୍ପର୍କରେ ଘୋଷଣା କରାଯାଇଥିବାବେଳେ ଚଳିତ ବଜେଟରେ ଡାଲି ଜାତୀୟ ଫସଲ ଲାଗି ଯୋଜନା ଘୋଷଣା କରାଯାଇପାରେ l କୃଷକମାନଙ୍କ ଅର୍ଥନୈତିକ ବିକାଶ ଲାଗି ବି ଯୋଜନା ଘୋଷଣା କରାଯାଇପାରେ l ଅଧିକ ଅମଳକ୍ଷମ ଫସଲ ଲାଗି ଗତଥର ଜାତୀୟ ମିଶନ ଗଠନ କରାଯାଇଥିଲା l କପା ଉତ୍ପାଦନ ବୃଦ୍ଧି, କୃଷକଙ୍କ ଲାଗି ଋଣ ସୀମା ୩ରୁ ୫ ଲକ୍ଷ ଟଙ୍କାକୁ ବୃଦ୍ଧି କରାଯାଇଥିଲା l ଖାଦ୍ୟ ପ୍ରକ୍ରିୟାକରଣ, ଖାଦ୍ୟ ଉଦ୍ୟୋଗ, ଜାତୀୟ ପ୍ରସ୍ତୁତି ମିଶନ ଆଦି ଗଠିତ ହୋଇଥିଲା l ଗତ ବଜେଟରେ କୃଷି ଲାଗି ଯେଉଁ ନୂଆ ଯୋଜନା ଘୋଷଣା କରାଯାଇଥିଲା ସେଗୁଡିକ ହେଲା-ପିଏମ ଧନଧାନ୍ୟ କୃଷି ଯୋଜନା, ଡାଲି ଜାତୀୟ ଖାଦ୍ୟ ସଂକ୍ରାନ୍ତ ଆତ୍ମନିର୍ଭର ମିଶନ, ଅଧିକ ଉତ୍ପାଦନକ୍ଷମ ଶସ୍ୟ ଲାଗ ଜାତୀୟ ମିଶନ, ପ୍ରାକୃତିକ ଚାଷ ଲାଗି ଜାତୀୟ ମିଶନ, ତୈଳବୀଜ ଫସଲ ଲାଗି ଜାତୀୟ ମିଶନ ଇତ୍ୟାଦି l
ନନ୍ଦିଘୋଷ ବ୍ୟୁରୋ: ସୁନ୍ଦରଗଡ଼ ଜଲଦା ନିକଟରେ ବିମାନର ଫୋର୍ସ ଲ୍ୟାଣ୍ଡିଂ ଘଟଣା । ଆହତ ଯାତ୍ରୀ ସୁଶାନ୍ତ କୁମାର ବିଶ୍ବାଳଙ୍କ ମୃତ୍ୟୁ । ଅଧିକ ଚିକିତ୍ସା ପାଇଁ ଗତକାଲି ମୁମ୍ବାଇକୁ ଏୟାର ଲିଫ୍ଟ କରିବା ବେଳେ ହୃଦଘାତରେ ତାଙ୍କର ମୃତ୍ୟୁ ହୋଇଛି । ମୃତକଙ୍କ ପରିବାର ଲୋକଙ୍କୁ ଆର୍ଥିକ ସହାୟତା ଯୋରଗାଇ ଦେବା ସହ ତାଙ୍କ ପୁଅକୁ ଚାକିରି ଦେବାକୁ ପରିବାର ଲୋକେ ଦାବି କରିଛନ୍ତି ।
ସୁଶାନ୍ତଙ୍କ ଭଉଣୀ ଅନିତା ସାହୁ ଓ ଦୁଇଜଣ ପାଇଲଟ ହସ୍ପିଟାଲରେ ଚିକିତ୍ସିତ ହେଉଛନ୍ତି । ଅନିତାଙ୍କ ସହ ଦୁଇ ପାଇଲଟ ସୁସ୍ଥ ହେଉଥିବା ନେଇ ହସ୍ପିଟାଲ ପକ୍ଷରୁ ସୂଚନା ଦିଆଯାଇଛି । ଆହତ ୩ ଜଣଙ୍କୁ ହସ୍ପିଟାଲର ସ୍ବତନ୍ତ୍ର ଡାକ୍ତରୀ ଦଳ ଚିକିତ୍ସା ଜାରି ରଖିଛନ୍ତି । ଖୁବଶୀଘ୍ର ସୁସ୍ଥ ହୋଇ ଘରକୁ ଫେରିବେ ବୋଲି ହସ୍ପିଟାଲ ପକ୍ଷରୁ ସୂଚନା ଦିଆଯାଇଛି ।
ନନ୍ଦିଘୋଷ ବ୍ୟୁରୋ: ରାଜ୍ୟର ବିଭିନ୍ନ ସ୍ଥାନରେ ଆରମ୍ଭ ହୋଇଛି ପକ୍ଷୀ ଗଣନା । ଚିଲିକା, କୋଣାର୍କ, ଅସ୍ତରଙ୍ଗ, ହୀରାକୁଦ ଜଳଭଣ୍ଡାର ଓ ଅଂଶୁପା ହ୍ରଦରେ ପକ୍ଷୀ ଗଣନା ଆରମ୍ଭ ହୋଇଛି ।
ଚିଲିକାରେ ଆରମ୍ଭ ହୋଇଛି ପକ୍ଷୀ ଗଣନା । ସକାଳ ୬ରୁ ଆରମ୍ଭ ହୋଇଥିବା ପକ୍ଷୀ ଗଣନା ମଧ୍ୟାହ୍ନ ଗୋଟିଏ ପର୍ଯ୍ୟନ୍ତ ଚାଲିବ । ଏହି ସମୟରେ ମତ୍ସ୍ୟଜୀବୀ ଓ ଯାତ୍ରୀବାହୀ ଡଙ୍ଗା ଚଳାଚଳ ପାଇଁ ବାରଣ କରାଯାଇଛି । ଏହି ଗଣନାରେ ୧୪୫ରୁ ଊର୍ଦ୍ଧ୍ବ ବିଭାଗୀୟ କର୍ମଚାରୀ ସାମିଲ ହୋଇଛନ୍ତି l ୫ଟି ରେଞ୍ଜର ଗଣନା କାର୍ଯ୍ୟରେ ମୋଟ ୨୨ଟି ଗଣନାକାରୀ ଦଳ ନିୟୋଜିତ ହୋଇଛନ୍ତି । ୨୦ଟି ଗଣନାକାରୀ ଦଳ ଚିଲିକା ଜଳ ରାଶିରେ ଓ ୨ଟି ଗଣନାକାରୀ ଦଳ ଚିଲିକା ତଟବର୍ତ୍ତି ସ୍ଥଳ ଭାଗରେ କାର୍ଯ୍ୟରେ ନିୟୋଜିତ ଅଛନ୍ତି । ପ୍ରତି ଟିମରେ ୫ରୁ ୭ ଜଣ ଗଣନାକାରୀ ଅଛନ୍ତି ।
ଚିଲିକା ବନ୍ୟପ୍ରାଣୀ ଡିଭିଜନ ଅନ୍ତର୍ଗତ ୫ଟି ରେଞ୍ଜ ଯଥା ପୁରୀ ଜିଲ୍ଲାର ସାତପଡ଼ା, ଚିଲିକା ରେଞ୍ଜ, ଖୋର୍ଦ୍ଧା ଜିଲ୍ଲାର ବାଲୁଗାଁ, ଟାଙ୍ଗୀ ରେଞ୍ଜ ଏବଂ ଗଞ୍ଜାମ ଜିଲ୍ଲାର ରମ୍ଭା ରେଞ୍ଜରେ ଚାଲିଛି ଗଣନା । ପ୍ରତିବର୍ଷ ଭଳି ଗଣନା କାର୍ଯ୍ୟରେ ପକ୍ଷୀ ସୂଚନା ସମ୍ବନ୍ଧୟ ମାନଚିତ୍ର, ଜିପିଏସ, ବାଇନାକୁଲାର, ସ୍ପୋଟିଂ ସ୍କୋପ, ୱାକିଟକି, ନୋଟ ବୁକ ଆଦି ବ୍ୟବହାର କରାଯାଇଛି l ଏହି ଗଣନା କାର୍ଯ୍ୟରେ ବମ୍ବେ ନାଚୁରାଲ ହିଷ୍ଟ୍ରି ଅଫ ସୋସାଇଟି, ଓଡିଶା ବନ୍ୟପ୍ରାଣୀ ବିଭାଗ କର୍ମଚାରୀ, ଓୟୁଏଟି ଛାତ୍ରଛାତ୍ରୀ, ପକ୍ଷୀ ବିଶେଷଜ୍ଞ, ପକ୍ଷୀ ସୁରକ୍ଷା ସମିତିର ସଦସ୍ୟମାନେ ସାମିଲ ହୋଇଛନ୍ତି l
କୋଣାର୍କ ଓ ଅସ୍ତରଙ୍ଗ ରେଞ୍ଜରେ ମଧ୍ୟ ପକ୍ଷୀ ଗଣନା ଚାଲିଛି । ଚଳିତବର୍ଷ ଅସ୍ତରଙ୍ଗ ବନ୍ୟପ୍ରାଣୀ ଅଞ୍ଚଳକୁ ୫ଟି ବିଭାଗ ସହ କୋଣାର୍କ ରେଞ୍ଜ ଅଞ୍ଚଳକୁ ୭ଟି ବିଭାଗ ବିଭକ୍ତ କରାଯାଇଛି । ନଟରାରୁ କେଉଟଜଙ୍ଘା, ଗଙ୍ଗାଦେବୀରୁ ଦେବୀନାସି, କଣମଣରୁ ଗଙ୍ଗାଦେବୀ, ମୁହାଁଣମୁହଁରୁ ପାଟସୁନ୍ଦରପୁର, ବେଲେଶ୍ୱରରୁ କେଳୁଣୀ ମୁହାଁଣ ପର୍ଯ୍ୟନ୍ତ ଗଣନା କାର୍ଯ୍ୟ ଜାରି ରହିଛି । ପ୍ରତି ଦଳରେ ଜଣେ ପକ୍ଷୀ ବିଶାରଦଙ୍କ ସମେତ ପକ୍ଷୀ ବିଶେଷଜ୍ଞ ରହିଛନ୍ତି । ପ୍ରତି ଦଳରେ ଅସ୍ତରଙ୍ଗ ବନ୍ୟପ୍ରାଣୀ ବନାଞ୍ଚଳ ଓ କୋଣାର୍କ ବନ୍ୟପ୍ରାଣୀ ଅଞ୍ଚଳରେ କାର୍ଯ୍ୟରତ ସରକାରୀ କର୍ମଚାରୀ ରହିଛନ୍ତି । ପକ୍ଷୀ ଗଣନାକାରୀ ବାଇନାକୁଲାର, ବାର୍ଡ଼ସ ଗାଇଡି ବୁକ ଓ ବାର୍ଡ଼ ଏକ୍ସପଟଙ୍କ ସାହାଯ୍ୟରେ ପକ୍ଷୀ ଗଣନା କରୁଛନ୍ତି । ଜଳଭାଗରେ ଓ ସ୍ଥଳଭାଗରେ ଗଣନା କାର୍ଯ୍ୟରେ ନିୟୋଜିତ ଅଛନ୍ତି ।
ହୀରାକୁଦ ଜଳଭଣ୍ତାରରେ ଆଜି ଆରମ୍ଭ ହୋଇଛି ବିଦେଶାଗତ ପକ୍ଷୀଗଣନା । ହୀରାକୁଦ ଓ୍ବାଇଲ୍ଡ ଲାଇଫ ଡିଭିଜନ ପକ୍ଷରୁ ସମ୍ବଲପୁର, ଝାରସୁଗୁଡା, ବରଗଡ଼ ଓ ଛତିଶଗଡ ସଂଲଗ୍ନ ଜଳଭଣ୍ତାରରେ ପକ୍ଷୀ ଗଣନା କରାଯିବ । ହୀରାକୁଦ ଡ୍ୟାମ ଆରମ୍ଭରୁ ଛତିଶଗଡ ସୀମାନ୍ତ ପର୍ଯ୍ୟନ୍ତ ପ୍ରାୟ ୫୫୦ ବର୍ଗ କିଲୋମିଟରରେ ଗଣନା ହେଵ । ଏଥିପାଇଁ ୨୧ଟି ସେକ୍ଟର ଗଠନ କରାଯାଇଛି । ୭୦ ଜଣ ବନ ଅଧିକାରୀ ଓ ପକ୍ଷୀ ବିଶେଷଜ୍ଞ ଓ ଗଣନାକାରୀ ସାମିଲ ହୋଇଛନ୍ତି । ସକାଳ ୬ ଟାରୁ ଆରମ୍ଭ ହୋଇଥିବା ପକ୍ଷୀ ଗଣନା ସନ୍ଧ୍ୟା ୫ ପର୍ଯ୍ୟନ୍ତ ଚାଳିବ ।
ମଧୁର ହ୍ରଦ ଅଂଶୁପାରେ ମଧ୍ୟ ପକ୍ଷୀ ଗଣନା କରାଯାଉଛି । ଆଠଗଡ ବନ ବିଭାଗ ପକ୍ଷରୁ ପକ୍ଷୀ ଗଣନା କରାଯାଇଛି । ଆଠଗଡ ବନଖଣ୍ଡର ୫ଟି ରେଞ୍ଜର ଅଂଶୁପା ସମେତ ମହାନଦୀ ଅବବାହିକା, ଛତିଶାପଟା ଆଦି ୪୦ଟି ସ୍ଥାନରେ ପକ୍ଷୀ ଗଣନା ଚାଲିଛି । ଏଥିପାଇଁ ୪୦ଟି ଟିମ ଗଠନ କରାଯାଇଛି । ଓୟୁଏଟିର ଛାତ୍ରଛାତ୍ରୀଙ୍କ ସମେତ ୧୬୦ ଜଣ ବନ କର୍ମଚାରୀ ଏଥିରେ ନିୟୋଜିତ ଅଛନ୍ତି । ବିଶେଷ କରି ଅଂଶୁପା ସହିତ ମହାନଦୀ ମଧ୍ୟରେ ଥିବା ଧବଳେଶ୍ୱର ପଠା, ଅମଙ୍ଗେଇ ପଠା, ସିଂହାନାଥ ପୀଠ ଆଦି ଅଂଚଳରେ ଅଧିକାଂଶ ବିଦେଶା ଗତ ପକ୍ଷୀ ଦେଖା ଦେଇଛନ୍ତି ।
କୁଳଡିଆ ଅଭୟାରଣ୍ୟ ଓ ନୀଳଗିରିରେ ପକ୍ଷୀ ଗଣନା ଆରମ୍ଭ ହୋଇଛି । ୪ଟି ସ୍ଥାନରେ ଚାଲିଛି ଗଣନା । ନିୟୋଯିତ ଅଛନ୍ତି ବନ ବିଭାଗର ୪ଟି ଟିମ । ୪୦ ଜଣରୁ ଅଧିକ ବନ କର୍ମଚାରୀ ସମେତ ସବୁଜ ବାହିନୀ ଗଣନାରେ ସାମିଲ ହୋଇଛନ୍ତି । କୁଳଡିଆ ଅଭୟାରଣ୍ୟ ଭିତରେ ଥିବା ଖୁମକୁଟ, ବୁଗାଳିବନ୍ଧ, ରିଶିଆ ଆଦି ସ୍ଥାନରେ ଚାଲିଛି ପକ୍ଷୀ ଗଣନା । ନୀଳଗିରି ରେଞ୍ଜ ପଦ୍ମତୋଳା ହ୍ରଦରେ ମଧ୍ୟ ଚାଲିଛି ପକ୍ଷୀ ଗଣନା । ଡିଏଫଓଙ୍କ ତତ୍ବାବଧାନରେ ପକ୍ଷୀ ଗଣନା ଚାଲିଛି ।
ନନ୍ଦିଘୋଷ ବ୍ୟୁରୋ: ଗଞ୍ଜାମ ଜିଲ୍ଲା ସାନଖେମୁଣ୍ଡି ବ୍ଲକ ପୋଡ଼ାମାରି ପଞ୍ଚାୟତ ବତାଗଡ ଗାଁରେ ଅଜଣା ଜନ୍ତୁ ଆତଙ୍କ । ଗତ ଶୁକ୍ରବାର ବିଳମ୍ବିତ ରାତ୍ର ଅଜଣା ଜନ୍ତୁ ଆକ୍ରମଣରେ ୧୩ଟି ମେଣ୍ଢା ଓ ଛେଳି ଛୁଆଙ୍କ ମୃତ୍ୟୁ ହୋଇଥିବା ଅଭିଯୋଗ ।
ସନ୍ତୋଷ ଗୌଡ ଗାଁ ନିକଟରେ ଗୁହାଳ କରି ସେଠାରେ କିଛି ମେଣ୍ଢା ଓ ଛେଳି ପାଳନ କରି ପରିବାର ଭରଣ ପୋଷଣ କରି ଆସୁଥିଲେ l ଭୋରୁ ଗୁହାଳ ଘରେ ମେଣ୍ଢା ଓ ଛେଳି ଗୁଡ଼ିକ ମରି ପଡିଥିବା ଦେଖିବାକୁ ପାଇଥିଲେ l ଘଟଣାସ୍ଥଳରେ ପ୍ରାଣୀ ଚିକିତ୍ସା ଅଧିକାରୀ ଓ ଟିମ୍ ପହଞ୍ଚି ୧୩ଟି ମେଣ୍ଢା ଓ ଛେଳିଙ୍କ ମୃତଦେହ ବ୍ୟବଚ୍ଛେଦ କରିଥିବା ଜଣାପଡ଼ିଛି l ସନ୍ତୋଷଙ୍କୁ କ୍ଷତିପୂରଣ ଦେବାକୁ ଦାବି ହେଉଛି । କୌଣସି ବନ୍ୟଜନ୍ତୁ ଆକ୍ରମଣ କରିଥିବା ପ୍ରାଥମିକ ତଦନ୍ତରୁ ଜଣାପଡୁଛି ।
ଇରାନରୁ ଫେରୁଛନ୍ତି ଭାରତୀୟ। ଫେରିଛନ୍ତି ୮୦୦ରୁ ଅଧିକ ଭାରତୀୟ। ସ୍ଵତନ୍ତ୍ର ବିମାନରେ ଆସି ସେମାନେ ଦିଲ୍ଲୀରେ ପହଞ୍ଚିଛନ୍ତି। ନିଜ ଦେଶରେ ପହଞ୍ଚିବା ପରେ ସେମାନେ ଆଶ୍ଵସ୍ତ ହୋଇଛନ୍ତି। କିଏ ସେଠାରେ କାମ କରୁଥିଲା, କିଏ ପାଠ ପଢିବାକୁ ଯାଇଥିଲା। ଆଉ କିଏ ତୀର୍ଥଯାତ୍ରାରେ କିମ୍ଵା ଏମିତି ଭ୍ରମଣ ପାଇଁ ଯାଇଥିଲା। ସରକାର ବିରୋଧୀ ଆନ୍ଦୋଳନ ତେଜିବା ପରେ ଇରାନରେ ଦେଖା ଦେଇଛି ଅରାଜକତା। ପୂରା ବିପଦପୂର୍ଣ୍ଣ ସ୍ଥିତି। କେତେ ବେଳେ କଣ ହେବ କହି ହେବ ନାହିଁ। ସରକାର ମଧ୍ୟ ଦୃଢ଼ ହସ୍ତରେ ଆନ୍ଦୋଳନକୁ ଦମନ କରିବାକୁ ଚେଷ୍ଟା କରୁଛନ୍ତି। ହଜାର ହଜାର ଲୋକଙ୍କୁ ବନ୍ଦୀ କରାଯାଇଛି। କେତେକଙ୍କୁ ମୃତ୍ୟୁଦଣ୍ଡ ଦିଆଯାଇଥିବା ମଧ୍ୟ କୁହାଯାଇଛି। ଫେରିଥିବା ଭାରତୀୟଙ୍କ ମଧ୍ୟରେ କେତେକ ଏମବିବିଏସ ଛାତ୍ରଛାତ୍ରୀ ବି ରହିଛନ୍ତି। ବିନା ଇଣ୍ଟରନେଟରେ କିପରି ସେମାନେ ଭୟାବହ ପରିସ୍ଥିତିରେ ବଞ୍ଚିଥିଲେ ସେନେଇ ଅନୁଭୂତି ବଖାଣିଛନ୍ତି ଫେରନ୍ତା।
ବଲାଙ୍ଗୀର : ଫେରାର ନିଶା ମହାରଣା । ଭୁବନେଶ୍ବରରୁ ଖାଲି ହାତରେ ଫେରିଲା ବଲାଙ୍ଗୀର ପୋଲିସ । ଚନ୍ଦନଭାଟି ଗାଁରେ ଯାତ୍ରା ସମୟରେ ନିଶା ମହାରଣାଙ୍କ ଅଶ୍ଳୀଳ ନୃତ୍ୟ ପ୍ରଦର୍ଶନ ଘଟଣାରେ ବଲାଙ୍ଗୀର ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ନିଶାକୁ ଗିରଫ ପାଇ ଭୁବନେଶ୍ବର ଯାଇଥିଲା ବଲାଙ୍ଗୀର ପୋଲିସର ଏକ ସ୍ଵତନ୍ତ୍ର ଟିମ I ତେବେ ଭୁବନେଶ୍ବରରେ ଦୁଇ ଦିନ ନିଶାକୁ ଖୋଜାଖୋଜି କରିବା ପରେ ବି ନପାଇ ଖାଲି ହାତରେ ଫେରିଛି । ନିଶା ଓ ତାଙ୍କ ମ୍ୟାନେଜରଙ୍କ ଘରେ ତାଲା ପଡିଥିବା ବେଳେ ସେମାନେ ରାଜ୍ୟ ବାହାରକୁ ଚାଲି ଯାଇଥିବା ବଲାଙ୍ଗୀର ଏସପି ଅବିଳାଷ ଜୀ କହିଛନ୍ତି । ଗିରଫଦାରୀରୁ ବର୍ତ୍ତିବା ପାଇଁ ଆଗୁଆ ଜାମିନ ପାଇଁ ନିଶା ହାଇକୋର୍ଟଙ୍କ ଦ୍ୱାରସ୍ଥ ହୋଇଥିବା ଏସ୍ପି କହିଛନ୍ତି I ଏବେବି ନିଶାଙ୍କ ଉପରେ ନଜର ରଖାଯାଇଛି । ସେ କଲିକତା ଚାଲିଯାଇଥିବା ଖବର ମିଳିବା ପରେ ସେଠାକାର ପୋଲିସ ସହ ଯୋଗାଯୋଗ ଚାଲିଛି I ଅନ୍ୟପଟେ ଚନ୍ଦନଭାଟି ଫାଣ୍ଡି ଅଧିକାରୀ ରଞ୍ଜିତ ପ୍ରଧାନଙ୍କୁ ନେଇ ଏସପିଙ୍କ ସ୍ପଷ୍ଟୀକରଣ ସାଧାରଣରେ ଚର୍ଚ୍ଚାର ବିଷୟ ପାଲଟିଛି । ଫାଣ୍ଡି ଅଧିକାରୀ ରଞ୍ଜିତ ପ୍ରଧାନ ଘଟଣା ସ୍ଥଳରେ ଉପସ୍ଥିତ ଥିଲେ । ହେଲେ ସୋସିଆଲ ମିଡ଼ିଆରେ ଭାଇରାଲ ହେଉଥିବା ବ୍ୟକ୍ତି ସେ ନୁହନ୍ତି । ତାଙ୍କ ଭଳି ଅବିକଳ ଦେଖା ଯାଉଥିବା ବର୍ଘଲା ଗାଁର ନୀଳମଣି ସେଠ୍ ନାମକ ଜଣେ ବ୍ୟକ୍ତି । ଏହି ଘଟଣାକୁ ନେଇ ଅଭିଯୋଗ ହେବାପରେ ଗତକାଲି ଫାଣ୍ଡି ଅଧିକାରୀଙ୍କୁ ପୋଲିସ ମୁଖ୍ୟାଳୟକୁ ବଦଳି କରାଯାଇଛି । ଅନ୍ୟପଟେ ଆଜି ବଲାଙ୍ଗୀର ଏସପିଙ୍କ ଏଭଳି ବିବୃତ୍ତି ସାଧାରଣରେ ପ୍ରଶ୍ନ ସୃଷ୍ଟି କରିଛି ।
ଭୁବନେଶ୍ବର : ବିକଶିତ ଭାରତ ଗଠନ ପାଇଁ ଦେଶର ପ୍ରତିଟି ନାଗରିକଙ୍କ ପାଖରେ ସାମାଜିକ, ଆର୍ଥିକ ଓ ମାନସିକ ସ୍ଥିତି ସୃଦୃଢ଼ ହେଲେ ବିକଶିତ ଭାରତ ସ୍ବପ୍ନ ସାକାର ହେବ । ବର୍ତମାନ ଲୋକଙ୍କୁ ଦେଶରେ ସଠିକ୍ ଭାବେ ସ୍ବାସ୍ଥ୍ୟ ସେବା ମିଳୁ ନାହିଁ। ସରକାରୀ ମେଡ଼ିକାଲରେ ଜରୁରୀକାଳୀନ ସେବା ବି ଲୋକଙ୍କ ପାଖରେ ପହଞ୍ଚି ପାରୁନି। ଦେଶରେ ମାତ୍ର ୩୦ ରୁ ୪୦ ପ୍ରତିଶତ ଲୋକଙ୍କ ପାଖରେ ପହଞ୍ଚିଛି ସ୍ବାସ୍ଥ୍ୟ ସେବା। ପିଏସି ଓ ସିଏସି ରେ ବି ରହିଛି ସମସ୍ୟା । ଗ୍ରାମାଞ୍ଚଳରେ ଲୋକଙ୍କୁ ଭଲ ଚିକିତ୍ସା ମିଳୁ ନାହିଁ।ଭାରତ ସରକାରଙ୍କ ଏମ୍ସ ରେ ୩୦ ପ୍ରତିଶତ ଡାକ୍ତର ନାହାଁନ୍ତି ତେଣୁ ସରକାର ସରକାର ମେଡିକାଲରେ ଡାକ୍ତର ପଦବୀ ପୂରଣ ସହ ଭିତିଭୂମିର ବିକାଶ କରିବା ଜରୁରୀ । ଡାକ୍ତର, ନର୍ସ, ଆଶାକର୍ମୀ ମାନଙ୍କୁ ସମ୍ମାନ ସହ ସାମାଜିକ ସୁରକ୍ଷା ପ୍ରଦାନ କରିବାକୁ ହେବ । ହେଲଦି ଇଣ୍ଡିଆ ଗୋଟେ ସ୍ଲୋଗାନ୍ ନୁହେଁ ମିଶନ ହେବା ଦରକାର । ଆୟୁଷ୍ମାନ ଭାରତ ଭଳି କାର୍ଡ ନଦେଇ ଭାରତ ସରକାର ଦେୟମୁକ୍ତ ଚିକିତ୍ସା ଓ ମେଡ଼ିସିନ ପ୍ରଦାନ କରନ୍ତୁ ବୋଲି ଦାବି କରିଛନ୍ତି ଅଖିଳେଶ ଯାଦବ।
ବିଜେପି ମିଥ୍ୟା ପ୍ରତିଶ୍ରୁତି ଦେଇ ସରକାରକୁ ଆସିଛି । ଇଡି ଓ ସିବିଆଇ ତଦନ୍ତ ଆଳରେ ଅନେକ ରାଜନେତା ଓ ବ୍ୟବସାୟୀଙ୍କୁ ଧମକ ମିଳୁଛି । ଦେଶରେ ଭୋଟ ଜାଲିଆତି କରାଯାଉଛି । ଏହା ବିରୋଧରେ ସମାଜବାଦୀ ପାର୍ଟି ସୁପ୍ରିମକୋର୍ଟ ଯିବ । ଦେଶରେ ଚାଷୀ କାନ୍ଦୁଛି। ଓଡ଼ିଶାରେ ମଣ୍ଡି ବ୍ୟବସ୍ଥା ସୁଦୃଢ଼ ନାହିଁ। ଧାନ କିଣିବାରେ ବିଫଳ ହୋଇଛି ବିଜେପି ସରକାର। ଓଡ଼ିଶାରେ ନବୀନ ପଟ୍ଟନାୟକଙ୍କ ସରକାର ସମୟରେ ଲିଙ୍ଗରାଜ ମନ୍ଦିର ଓ ପୁରୀ ମନ୍ଦିର ପରିକ୍ରମା ପ୍ରକଳ୍ପକୁ ସୁନ୍ଦର ଭାବରେ ନିର୍ମାଣ କରାଯାଇଛି। ଦେଶର ଐତିହ୍ୟକୁ ନଷ୍ଟ କରୁଛି ବିଜେପି। ଓଡ଼ିଶାରେ PUCC ବାହାନାରେ ଲୋକଙ୍କୁ ଶୋଷଣ କରାଯାଉଛି । ଏବେ ଦେଶର ଆରାବଳି ଭଳି ପାହାଡ ଲୁଟ୍ ହେଉଛି । ଓଡ଼ିଶାରେ ବି ପାହାଡ ସୁରକ୍ଷିତ ରହିବ ନାହିଁ । ଓଡ଼ିଶାର ଲୋକ ଏବେ ପାହାଡ଼ ପର୍ବତ ନଦୀକୁ ଜଗନ୍ତୁ ନଚେତ୍ ସବୁ ଲୁଟ୍ ହେବ ।ଏନେଇ ବିଜେପି ସରକାରକୁ ହଟାଇବା ପାଇଁ ଆହ୍ବାନ ଦେଲେ ଅଖିଳେଶ ଯାଦବ। ବ୍ୟବସ୍ଥାର ପରିବର୍ତ୍ତନ ପାଇଁ ଆନ୍ଦୋଳନର ଆବଶ୍ୟକତା ଥିବା କହିଛନ୍ତି ୟୁପିର ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବ ।
ଭୁବନେଶ୍ବର ; କ୍ୟାପିଟାଲ ହସ୍ପିଟାଲ । ରାଜଧାନୀ ଭୁବନେଶ୍ବରର ହାର୍ଟରେ ଅବସ୍ଥାପିତ । ଦୈନିକ ହଜାର ହଜାର ରୋଗୀ ଏଠାକୁ ଆସନ୍ତି । ରାଜ୍ୟରେ ଡାକ୍ତର ଅଭାବ ସତ୍ତ୍ବେ, ରୋଗୀସେବାରେ ହେଳା ନାହିଁ । ବେଳେବେଳେ ରୋଗୀ ମୃତ୍ୟୁକୁ ନେଇ ଉତ୍ତେଜନା ଦେଖାଦିଏ । ହେଲେ ଗତକାଲି ଘଟଣାରେ ସବୁ ସୀମା ପାର ହୋଇଗଲା । ଡାକ୍ତରଙ୍କୁ ମାଡ଼ ମାରିଲେ ରୋଗୀଙ୍କ ସଂପର୍କୀୟ । ଯେଉଁଥିରେ ଡାକ୍ତରଙ୍କ ହାତ ଭାଙ୍ଗିଲା । ଆଉ ଜଣେ ସ୍ବାସ୍ଥ୍ୟ କର୍ମୀ ମଧ୍ୟ ଗୁରୁତର ଆହତ ହୋଇଥିଲେ । ଆଜି ଏହାର ପ୍ରତୀକାତ୍ମକ ପ୍ରତିବାଦ ଦେଖିବାକୁ ମିଳିଥିଲା । କଳା ବ୍ୟାଜ ପିନ୍ଧି ଓପିଡିରେ ରୋଗୀସେବା ଯୋଗାଇଛନ୍ତି ଜୁନିଅର ଡାକ୍ତର । ଡାକ୍ତରଙ୍କ ସୁରକ୍ଷା, ଫାଣ୍ଡି ଅପଗ୍ରେଡେସନ, ହସ୍ପିଟାଲରେ ପିସିଆର ମୁତୟନ, ସମ୍ବେଦନଶୀଳ ସ୍ଥାନରେ ପୋଲିସ ଓ ସଶସ୍ତ୍ର ବାହିନୀ ପାଇଁ ଜୁନିୟର ଡାକ୍ତର ସଂଘ ଦାବି କରିଛନ୍ତି । ପ୍ରତିବାଦ କରୁଥିବା ଡାକ୍ତରଙ୍କ ସହ କ୍ୟାପିଟାଲ ହସ୍ପିଟାଲରେ ଆଲୋଚନା କରିଥିଲେ ସ୍ବାସ୍ଥ୍ୟ ସଚିବ ଏସ୍. ଆଶ୍ବଥି । ଡାକ୍ତରଙ୍କ ସୁରକ୍ଷା ପାଇଁ ସ୍ବାସ୍ଥ୍ୟ ବିଭାଗ ଯତ୍ନବାନ ଅଛି ବୋଲି ସେ କହିଛନ୍ତି । ଏହି ଘଟଣାରେ ଜଣେ ଗିରଫ ହୋଇଛନ୍ତି । ଡାକ୍ତରଙ୍କ ସମସ୍ତ ପ୍ରକାରର ସୁରକ୍ଷା ପାଇଁ ପଦକ୍ଷେପ ନିଆଯିବ । ଅନ୍ୟ ଅଭିଯୁକ୍ତଙ୍କୁ ଗିରଫ କରିବାକୁ ପୋଲିସ ସହ ଆଲୋଚନ ହୋଇଛି । ଓପିଡି ସରିବା ପରେ ରୋଗୀ ଆସିଥିଲେ । କାଜୁଆଲଟି ଯିବାକୁ କହିବା ପରେ ରୋଗୀ ନ ଯିବା ଠିକ ନୁହେଁ । ଏହି କାରଣରୁ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିବା ନେଇ ସ୍ବାସ୍ଥ୍ୟ ସଚିବ ଉଦବେଗ ପ୍ରକାଶ କରିଛନ୍ତି । ସେପଟେ ଦାବି ପୂରଣ ନ ହେଲେ କାର୍ଯ୍ୟବନ୍ଦର ଚେତାବନୀ ଦେଇଛି ଜୁନିଅର ଡାକ୍ତର ସଂଘ ।
ସୁରକ୍ଷା ଦାବିରେ ଏକ ଘଣ୍ଟା ଧରି ଭୁବନେଶ୍ବର ଡିସିପିଙ୍କ ସହ ଆଲୋଚନା କରିଥିଲେ କ୍ୟାପିଟାଲ ହସ୍ପିଟାଲ କର୍ତ୍ତୃପକ୍ଷ ଓ ଜୁନିଅର ଡାକ୍ତର ସଂଘ । ସମସ୍ତ ଦାବି ଉପରେ ସକରାତ୍ମକ ଆଲୋଚନା ହୋଇଥିବା ସୂଚନା ମିଳିଛି । ପୋଲିସ କମିସନରଙ୍କ ସହ ଆଜି ଆଲୋଚନା କରି ଦାବି ପୂରଣ ନେଇ ପଦକ୍ଷେପ ନିଆଯିବ । ସେପଟେ ଭୁବନେଶ୍ବର ଡିସିପି କହିଛନ୍ତି ଯେ ଗତକାଲି କ୍ୟାପିଟାଲ ଥାନାରେ ଏଫଆଇଆର ହୋଇଛି । ଜଣେ ଗିରଫ ହୋଇଛନ୍ତି । କିପରି ଓ କେଉଁ ସ୍ପଟରେ ସୁରକ୍ଷା ଦରକାର, ସେ ନେଇ ଡାକ୍ତର ଓ ପିଜି ଛାତ୍ର ଆଲୋଚନା ହୋଇଛି । କ୍ୟାପିଟାଲ ହସ୍ପିଟାଲରେ ୨୫୦ ଜଣ ଘରୋଇ ସୁରକ୍ଷା କର୍ମୀ ନିୟୋଜିତ ଅଛନ୍ତି । ସେମାନଙ୍କୁ ଆହୁରି ଦକ୍ଷ କରାଯିବ । ପିସିଆର ପାଟ୍ରୋଲିଂ ସହ ଫାଣ୍ଡିକୁ ଆହୁରି ସଶକ୍ତ କରାଯିବ । ଡାକ୍ତରଙ୍କ ଉପରେ ଆକ୍ରମଣର ସାକ୍ଷୀ ଅଛନ୍ତି । ଯାହାକୁ ଆଧାର କରି ତଦନ୍ତ ଆଗକୁ ବଢିବ । ରାଜ୍ୟରେ ଡାକ୍ତର ମରୁଡ଼ି । ଉପାନ୍ତ ଓ କେବିକେ ଅଞ୍ଚଳ ଯିବାକୁ ବି ଡାକ୍ତର ଇଚ୍ଛା ପ୍ରକାଶ କରୁ ନାହାନ୍ତି । ଏପରି ସ୍ଥିତିରେ ଜୁନିଅର ଡାକ୍ତର ସୁରକ୍ଷା ଦୃଷ୍ଟି କୋଣରୁ କାର୍ଯ୍ୟ ବନ୍ଦ ଡାକରା ଦେଲେ, ଘରୋଇ ହସ୍ପିଟାଲକୁ ଯାଇ ଅଯଥା ଖର୍ଚ୍ଚାନ୍ତ ହେବେ ରୋଗୀ । ଯେଉଁଥିପାଇଁ ଡାକ୍ତରଙ୍କ ସୁରକ୍ଷା ପାଇଁ ପଦକ୍ଷେପ ନେବାର ଆବଶ୍ୟକତା ଆହୁରି ବଢିଛି ।
ଅନୁଗୁଳ : ବାୟୁ ପ୍ରଦୂଷଣରେ ଆକତାମାକତା ଅନୁଗୁଳ। ତା’ ଉପରେ ପୌରପାଳିକାର ବେପରୁଆ ନୀତି। ପ୍ରଦୂଷଣରେ ଅଣନିଃସ୍ବାଶୀ ସ୍ଥାନୀୟ ବାସିନ୍ଦା। ଭୟଙ୍କର ହେଲାଣି ସ୍ଥିତି। ହେଲେ ସ୍ଥାନୀୟ ପ୍ରଶାସନ ବେଧଡ଼କ ଭାବେ ଲୋକଙ୍କ ଜୀବନ ସହ ଖେଳୁଛି ଖେଳ। ଅନୁଗୁଳ ପୌରପାଳିକାର ଏଭଳି ନୀତି ବିରୋଧରେ ଏବେ ଜନ ଅସନ୍ତୋଷ ତୀବ୍ର ହେବାରେ ଲାଗିଛି। ଗଲା କିଛି ଦିନ ହେବ ଅନୁଗୁଳ ସହରରେ ବାୟୂର ମାନ AQI ୩୦୦ ପାର ହୋଇଥିଲା । ହେଲେ ପୌର ପ୍ରଶାସନର ଖାମଖିଆଲି ନୀତି ଏବେ ଜନଜୀବନକୁ ଆହୁରି ବିପନ୍ନ କଲାଭଳି ଅଭିଯୋଗ ହୋଇଛି। ପ୍ରତିଘରୁ ପୌରପାଳିକା ପକ୍ଷରୁ କଠିନ ବର୍ଜ୍ଯବସ୍ତୁ ସଂଗ୍ରହ ହେଉଛି। ବର୍ଜ୍ଯବସ୍ତକୁ ପୃଥକୀକରଣ କରାଯାଉଛି କି ନାହିଁ ତାହେ କେହି ଜାଣନ୍ତି ନାହିଁ। ସହରର ବର୍ଜ୍ଯବସ୍ତୁକୁ ନିଆଁ ଲଗାଇ ପୋଡ଼ି ଦିଆଯାଉଛି। ସ୍ଥିତି ଏମିତି ହୋଇଛି ପ୍ଲାଷ୍ଟିକ ଓ ଅନ୍ଯାନ୍ଯ କଠିନ ବର୍ଜ୍ଯବସ୍ତୁ ଧୂଆଁ ବାୟୁମଣ୍ଡଳକୁ ବିଷାକ୍ତ କାର୍ବନ ନିର୍ଗମନ ହେବା ସହ ପ୍ରଦୂଷଣ ମାତ୍ରାକୁ ଆହୁରି ବଢ଼ାଉଥିବା ଅଭିଯୋଗ ହୋଇଛି।
ଦିନକୁ ଦିନ ବୃଦ୍ଧି ପାଉଛି ଅନୁଗୁଳରେ ଜନସଂଖ୍ଯା। ଜନସଂଖ୍ଯାକୁ ଦେଖି ବୈଜ୍ଞାନିକ ପଦ୍ଧତିରେ କିପରି ସହରାଞ୍ଚଳ ବର୍ଜ୍ଯବସ୍ତୁ ପରିଚାଳନା ହେବ ସେ ନେଇ ପୌର ପ୍ରଶାସନର ନିଘା ନାହିଁ। ଆବର୍ଜନା ପାଇଁ ଏବେ ଅନୁଗୁଳ ସହର ସମେତ ଆଖପାଖ ଅଂଚଳରେ ବସବାସ କରୁଥିବା ଲୋକଙ୍କ ସ୍ବାସ୍ଥ୍ଯ ଉପରେ ଗଭୀର ପ୍ରଭାବ ପକାଇଲାଣି। ଅନୁଗୁଳ ପୌରାଞ୍ଚଳ ଡମ୍ପିଂୟାର୍ଡ଼କୁ ଲାଗିଛି ୬୦୦ ହେକ୍ଟର ପରିମିତ ମନ୍ଦରଗିରି ପାହାଡ଼। ଏହି ପାହାଡ଼ରେ ଅନେକ ଔଷଧୀୟ ବୃକ୍ଷଲତା ରହିଛି। ଏଠାକାର ଜଡ଼ିବୁଟି ଓ ଜୈବବିବିଧତା ପରିବେଶ ସନ୍ତୁଳନ ପାଇଁ ନିହାତି ଜରୁରୀ। କିନ୍ତୁ ସ୍ଥାନୀୟ ପ୍ରଶାସନ ପାହାଡ଼ ନିକଟରେ ଆବର୍ଜନାର ଡମ୍ପିଂୟାର୍ଡ଼ କରିଛି। ପ୍ରତିଦିନ ଟନଟନ ବର୍ଜ୍ଯବସ୍ତୁ ଏଠାରେ ଗଦା କରାଯାଇ ପୋଡ଼ାଯାଉଛି। ଯାହାକୁ ନେଇ ଚିନ୍ତାରେ ପରିବେଶବିତ ଓ ସାଧାରଣ ଲୋକେ। ଦେଶରେ ସବୁଠୁ ଦୂଷିତ ସହର ଭାବେ ଚିହ୍ନଟ ହେଲାଣି ଅନୁଗୁଳ। ହେଲେ ପୌର ପ୍ରଶାସନ ବର୍ଜ୍ଯବସ୍ତୁ ପୃଥକୀକରଣ କରିବା ପାଇଁ ପ୍ଲାଣ୍ଟ ପ୍ରତିଷ୍ଠା କରିନାହିଁ। ଡମ୍ପିଂୟାର୍ଡ଼ରେ ନିଆଁ ଆପେ ଆପେ ଲାଗୁଛି ବୋଲି କହିଛନ୍ତି କାର୍ଯ୍ଯ ନିର୍ବାହୀ ଅଧିକାରୀ।.
