ବାଲିପାଟଣା : ପାନେ ପାଇଲା ରୋଡ ରୋମିଓ । ରାଜଧାନୀ ଉପକଣ୍ଠ ବାଲିପାଟଣା ଥାନା ଅଂଚଳରେ କଲେଜ ଛାତ୍ରୀଙ୍କୁ ଅଶ୍ଳିଳ ଇଙ୍ଗିତ ସହ ଅଶାଳୀନ ବ୍ୟବହାର କରିବା ପଡିଲା ମହଙ୍ଗା। ଗଛରେ ବନ୍ଧା ହେଲା ରୋଡ ରୋମିଓ । ମାଣିକ ସାହିର କିଛି କଲେଜ ଛାତ୍ରୀ କେନାଲ ବନ୍ଧ ରାସ୍ତାରେ ନିମାପଡ଼ା ସ୍ଥିତ ଏକ ଘରୋଇ କୋଚିଙ୍ଗ ସେଣ୍ଟରକୁ ପଢିବାକୁ ଯାଉଥିଲେ । ପୂର୍ବରୁ ଜଣେ ଯୁବକ ପଦ୍ମପୁର ନିକଟରେ ଲୁଚି ରହିଥିଲା । ଛାତ୍ରୀ ମାନଙ୍କୁ ଦେଖି ଅଭିଯୁକ୍ତ ଅଶ୍ଳିଳ ଇଙ୍ଗିତ କରିବା ସହ ଦୁର୍ବ୍ୟବହାର କରିଥିଲା । ଛାତ୍ରୀ ମାନେ ଚିତ୍କାର କରିବାରୁ ସ୍ଥାନୀୟ ଲୋକ ଘଟଣାସ୍ଥଳରେ ପହଁଞ୍ଚି ଅଭିଯୁକ୍ତକୁ କାବୁ କରିଥିଲେ । ଅଭିଯୁକ୍ତ ନିମାପଡ଼ାର ହେମନ୍ତ ନାୟକକୁ ସ୍ଥାନୀୟ ଲୋକେ ଏକ ଗଛ ରେ ବାନ୍ଧି ପୋଲିସକୁ ଖବର ଦେଇଥିଲେ । ବାଲିପାଟଣା ଥାନା ପୋଲିସ ଘଟଣାସ୍ଥଳରେ ପହଁଞ୍ଚି ରୋଡ ରୋମିଓକୁ ଥାନାରେ ଅଟକ ରଖିଛି । ତେବେ ଏହି ରୋଡ ରୋମିଓ ବାରମ୍ବାର ଛାତ୍ରୀ ମାନଙ୍କୁ ଏକୁଟିଆ ଦେଖି ଅଶାଳୀନ ବ୍ୟବହାର କରୁଥିବା ଛାତ୍ରୀ ମାନେ ଅଭିଯୋଗ କରିଛନ୍ତି ।
ବାଂଲାଦେଶରେ ବେଗମ ଶାସନର ଅନ୍ତ, ତାରିକ ରେହମାନ ହୋଇପାରନ୍ତି ବାଂଲାଦେଶର ପରବର୍ତ୍ତୀ ପ୍ରଧାନମନ୍ତ୍ରୀ
ନନ୍ଦିଘୋଷ ବ୍ୟୁରୋ ; ବାଂଲାଦେଶରେ ବେଗମ ଶାସନର ଅନ୍ତ। ଏବେ ଜଣେ ପୁରୁଷ ଧରିବେ ମଙ୍ଗ। ବିଏନପି ଦଳର ତାରିକ ରେହମାନ ହୋଇପାରନ୍ତି ବାଂଲାଦେଶର ପରବର୍ତ୍ତୀ ପ୍ରଧାନମନ୍ତ୍ରୀ। ବାଂଲାଦେଶ ନିର୍ବାଚନରେ ତାଙ୍କର ଦଳ ନ୍ୟାସନାଲିଷ୍ଟ ପାର୍ଟି, ବିଏନପି ର ବୃହତ ବିଜୟ । ୨୫ ବର୍ଷ ପରେ ପୁଣି କ୍ଷମତାକୁ ଫେରିଛି ବିଏନପି। ୩୦୦ ଆସନ ମଧ୍ୟରୁ ୨୦୦ରୁ ଅଧିକ ଆସନରେ ଆଗୁଆ ଅଛି ଏହି ଦଳର ମେଣ୍ଟ। ବିଜୟ ଏକରକମର ପକ୍କା। ଏହି ଦଳ ସରକାର ଗଠନ କରିବାକୁ ଯାଉଛି। ଦଳର ମୁଖ୍ୟ ତାରିକ ରେହମାନ ଦୁଇଟି ଆସନରୁ ବିଜୟୀ ହୋଇଛନ୍ତି। କୌଣସି ବିଜୟ ଶୋଭାଯାତ୍ରା ନ କରିବାକୁ ସେ ଦଳର କର୍ମୀ ଓ ନେତାମାନଙ୍କୁ ନିର୍ଦ୍ଦେଶ ଦେଇଛନ୍ତି। ତା ବଦଳରେ ହେବ ପ୍ରାର୍ଥନା। ନାଗରିକଙ୍କ ସୁରକ୍ଷା ତାଙ୍କର ପ୍ରାଥମିକତା ହେବ ବୋଲି କହିଛନ୍ତି ତାରିକ। ୩୦୦ ଆସନ ବିଶିଷ୍ଟ ବାଂଲାଦେଶ ପାର୍ଲାମେଣ୍ଟର ୨୯୯ ଆସନରେ ଭୋଟ ହୋଇଥିଲା। ଗୋଟିଏ ଆସନରେ ଜଣେ ପ୍ରାର୍ଥୀଙ୍କ ମୃତ୍ଯୁ ହେବାରୁ ସେହି ଆସନରେ ଭୋଟ ହୋଇନାହିଁ। ଦ୍ଵିତୀୟ ସ୍ଥାନରେ ରହିଛି ଜମାତ ଇ ଇସଲାମିର ମେଣ୍ଟ। ଏହାର ଶୋଚନୀୟ ପରାଜୟ ହୋଇଛି। ଏହି ନିର୍ବାଚନରେ ଭାଗ ନେଇପାରିନାହିଁ ଆୱାମି ଲିଗ୍। କାରଣ ୟୁନୁସଙ୍କ ନେତୃତ୍ଵାଧୀନ ମଧ୍ୟବର୍ତ୍ତୀକାଳୀନ ସରକାର ଆବାମି ଲିଗ୍ କୁ ବ୍ୟାନ କରିଥିଲେ। ଏହି ନିର୍ବାଚନକୁ ବେଆଇନ କହି ଅସିଦ୍ଧ ଘୋଷଣା କରିବାକୁ ଦାବି କରିଛନ୍ତି ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନା । ୨୦୨୪ ଛାତ୍ର ଆନ୍ଦୋଳନରେ ହସିନାଙ୍କ ସରକାର ଭାଙ୍ଗିଥିଲା। ଦେଶରେ ବ୍ୟାପକ ହିଂସାକାଣ୍ଡ ହୋଇଥିଲା । ଶହ ଶହ ଲୋକଙ୍କ ମୃତ୍ଯୁ ସାଙ୍ଗକୁ ଲକ୍ଷ ଲକ୍ଷ ଲୋକ ପ୍ରଭାବିତ ହୋଇଛନ୍ତି । ହସିନା ସରକାରର ପତନ ପରେ ସେଠାରେ ସଂଖ୍ୟାଲଘଙ୍କ ଉପରେ ବଢ଼ିଥିଲା ଆକ୍ରମଣ । ତେବେ ଗତ ଡିସେମ୍ଵର ମାସରେ ଦେଶକୁ ଫେରି ନିର୍ବାଚନରେ ଭାଗ ନେଇଥିଲେ ତାରିକ ରେହମାନ । ସେ ହେଉଛନ୍ତି ପୂର୍ବତନ ପ୍ରଧାନମନ୍ତ୍ରୀ ଖାଲେଦା ଜିଆଙ୍କ ପୁଅ। ଡିସେମ୍ଵରରେ ମାଆଙ୍କ ମୃତ୍ୟୁ ପରେ ସେ ଦଳର ନେତୃତ୍ଵ ନେଉଛନ୍ତି। ଏବେ ପ୍ରଧାନମନ୍ତ୍ରୀ ହେବାକୁ ଯାଉଛନ୍ତି । ବହୁ ବର୍ଷ ଧରି ବାଂଲାଦେଶରେ ଦୁଇ ମହିଳା ନେତ୍ରୀଙ୍କ ଦବଦବା ରହିଥିଲା। ଆବାମି ଲିଗ୍ ର ଶେଖ ହସିନା ଓ ବିଏନପିର ଖାଲେଦା ଜିଆଙ୍କ ପ୍ରାଧାନ୍ଯ ରହିଥିଲା । ଖାଲେଦା ଆରପାରିକି ଚାଲି ଯାଇଥିବା ବେଳେ ଦେଶରୁ ପଳାୟନ କରି ଭାରତରେ ରହୁଛନ୍ତି ହସିନା। ବହୁ ବର୍ଷରେ ବାଂଲାଦେଶର ରାଜନୀତି ଓ ଶାସନ ଜଣେ ପୁରୁଷ ହାତକୁ ଯିବ।
ବ୍ୟାଣ୍ଡ ବଜାଉଥିବା ଜଣେ ନାବାଳକକୁ ଗୁଳିମାଡ, ହସ୍ପିଟାଲରେ ହଙ୍ଗାମା…
ନନ୍ଦିଘୋଷ ବ୍ୟୁରୋ : ମଧ୍ୟପ୍ରଦେଶର ସାଗରର ମୋତି ନଗର ଥାନା ଅଞ୍ଚଳର ଗୋଲା କୁଆଁ ନିକଟରେ ଗୁରୁବାର ବିଳମ୍ବିତ ରାତିରେ ଜଣେ ନାବାଳକକୁ ଗୁଳି କରି ହତ୍ୟା କରାଯାଇଛି । ଏହି ଘଟଣାରେ ପରେ ମୃତକଙ୍କ ପରିବାର ମୋତି ନଗର ଥାନା ସମ୍ମୁଖରେ ପ୍ରତିବାଦ କରିଛନ୍ତି। ବୁନ୍ଦେଲଖଣ୍ଡ ମେଡିକାଲ କଲେଜରେ ମଧ୍ୟ ଉତ୍ତେଜନା ପ୍ରକାଶ ପାଇଛି।
ଏକ ବିବାହ ଉତ୍ସବ ସମୟରେ, ବିବାହ ଶୋଭାଯାତ୍ରାରେ ବ୍ୟାଣ୍ଡ ବଜାଇବାକୁ ଆସିଥିବା ଷ୍ଟେସନ ଅଞ୍ଚଳର ୧୭ ବର୍ଷୀୟ ବାସିନ୍ଦା ବିବେକ ବଂଶଲଙ୍କ ଉପରେ ରାଇଫଲରୁ ଗୁଳି ବାଜିଥିଲା। ତାଙ୍କୁ ତୁରନ୍ତ ବୁନ୍ଦେଲଖଣ୍ଡ ମେଡିକାଲ କଲେଜକୁ ନିଆଯାଇଥିଲା, ଯେଉଁଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ମୃତ୍ୟୁ ପରେ, ମୃତକଙ୍କ ସମ୍ପର୍କୀୟମାନେ ମେଡିକାଲ କଲେଜରେ ହଙ୍ଗାମା କରିଥିଲେ। ପରିସ୍ଥିତି ନିୟନ୍ତ୍ରଣ କରିବା ପାଇଁ ଏକ ବଡ଼ ପୋଲିସ ଫୋର୍ସ ପହଞ୍ଚିଥିଲା। ଏହି ସମୟରେ, ମୃତକଙ୍କ ସମ୍ପର୍କୀୟମାନେ ମୋତି ନଗର ପୋଲିସ ଷ୍ଟେସନ ସମ୍ମୁଖରେ ସମସ୍ତ ବ୍ୟାଣ୍ଡ ଉପକରଣ ରାସ୍ତାରେ ରଖି ଅଭିଯୁକ୍ତଙ୍କୁ ଗିରଫ କରିବାକୁ ଦାବି କରିଥିଲେ। ଘଟଣାସ୍ଥଳରେ ପହଞ୍ଚିଥିବା ସିଏସପି ଏବଂ ଅନ୍ୟ ପୋଲିସ ଅଧିକାରୀମାନେ ପରିବାରକୁ ପରାମର୍ଶ ଦେଇଥିଲେ ଏବଂ ଅଭିଯୁକ୍ତଙ୍କୁ ଚିହ୍ନଟ କରି ତାଙ୍କୁ ହେପାଜତକୁ ନେଇଥିବା ଦାବି କରିଥିଲେ।
ମୃତକଙ୍କ ବନ୍ଧୁମାନେ କହିଛନ୍ତି ଯେ ସୋନି ପରିବାରର ବିବାହ ଶୋଭାଯାତ୍ରା ହୋଟେଲ ସାଗର ସରୋଜରେ ଥିଲାବେଳେ ହଠାତ୍ ଗୁଳି ବାଜିଲା ଏବଂ ବିବେକ ତଳେ ପଡ଼ିଗଲେ। ତାଙ୍କ ଶରୀରରୁ ରକ୍ତ ବାହାରୁଥିବା ଦେଖି ତାଙ୍କ ବନ୍ଧୁମାନେ ତୁରନ୍ତ ତାଙ୍କୁ ବଡ଼ ବଜାରର ଏକ ଘରୋଇ ହସ୍ପିଟାଲକୁ ନେଇଗଲେ, ଯେଉଁଠାରୁ ତାଙ୍କୁ ବିଏମସିକୁ ସ୍ଥାନାନ୍ତର କରାଯାଇଥିଲା। ସେଠାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ। ମୃତକଙ୍କ ବନ୍ଧୁମାନେ କହିଛନ୍ତି ଯେ ବିବେକ ପରିବାରର ଏକମାତ୍ର ପୁଅ ଥିଲେ।
ଉଲ୍ଲେଖନୀୟ ଯେ ମୋତି ନଗର ପୋଲିସ ଷ୍ଟେସନ ଅଞ୍ଚଳରେ ଚାରି ଦିନ ମଧ୍ୟରେ ଏହା ଦ୍ୱିତୀୟ ହତ୍ୟାକାଣ୍ଡ। ପୂର୍ବରୁ, ଧର୍ମଶ୍ରୀରେ ପଡ଼ୋଶୀମାନେ ସମ୍ପତ୍ତି ବିବାଦକୁ ନେଇ ଜଣେ ମଧ୍ୟବୟସ୍କ ବ୍ୟକ୍ତିଙ୍କୁ ବାଡ଼ିରେ ପିଟି ହତ୍ୟା କରିଥିଲେ। ଗୁରୁବାର ଗୁଳିକାଣ୍ଡ ପରେ, ପୋଲିସ ବିବାହ ଶୋଭାଯାତ୍ରା ସମୟରେ କାର୍ଯ୍ୟ କରୁଥିବା କ୍ୟାମେରାର ଫୁଟେଜ୍ ଯାଞ୍ଚ କରୁଛି। ଖବର ମିଳିଛି ଯେ ଶୋଭାଯାତ୍ରାରେ ଅଂଶଗ୍ରହଣକାରୀମାନେ ଅଭିଯୁକ୍ତ ଗୁଳିକାଣ୍ଡକାରୀଙ୍କୁ ଧରି ପୋଲିସକୁ ହସ୍ତାନ୍ତର କରିଛନ୍ତି
ସହି ପରିଲାନି ବିଶ୍ୱାସଘାତକତା, ପ୍ରେମିକର ଘର ଦୁଆରେ ବିଷ ପିଇଲା ପ୍ରେମିକା
ନନ୍ଦିଘୋଷ ବ୍ୟୁରୋ ; ବିଶ୍ୱାସଘାତକତା ପାଇଁ ଜୀବନ ହାରିଲେ । ପ୍ରେମ ସପ୍ତାହରେ ପ୍ରେମିକାର ମୃତ୍ୟୁ । ବିଶ୍ୱାସଘାତକତା ସହି ନ ପାରି ପ୍ରେମିକର ଘର ଦୁଆରେ ବିଷ ପିଇଲା ପ୍ରେମିକା । ଏମିତି ଘଟଣା ଦେଖିବାକୁ ମିଳିଛି । ଉତ୍ତର ପ୍ରଦେଶର ଇଟାୱା ଜିଲ୍ଲାର ଭର୍ଥନା ସହରରେ ଏକ ଚାଞ୍ଚଲ୍ୟକର ଘଟଣା ଘଟିଛି। ପ୍ରେମ ସମ୍ପର୍କ ପରେ ପ୍ରେମିକ ବିବାହ କରିବାକୁ ମନା କରିବାରୁ ଜଣେ ୨୨ ବର୍ଷୀୟା ଯୁବତୀ ବିଷ ପିଇ ଜୀବନ ହାରିବାକୁ ଚେଷ୍ଟା କରିଥିଲେ। ତାଙ୍କ ଅବସ୍ଥା ଖରାପ ହେବା ପରେ, ତାଙ୍କ ପରିବାର ତାଙ୍କୁ ତୁରନ୍ତ ଏକ ସମ୍ପ୍ରଦାୟ ସ୍ୱାସ୍ଥ୍ୟ କେନ୍ଦ୍ରକୁ ନେଇଯାଇଥିଲେ, ଯେଉଁଠାରେ ପ୍ରାଥମିକ ଚିକିତ୍ସା ପରେ ତାଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ଜିଲ୍ଲା ଡାକ୍ତରଖାନାକୁ ରେଫର କରାଯାଇଥିଲା।
ମହିଳା ଜଣକ ଯୁବକଙ୍କ ବିରୋଧରେ ବିବାହର ମିଥ୍ୟା ପ୍ରତିଶ୍ରୁତି ଦେଇ ତାଙ୍କୁ ଶୋଷଣ ଏବଂ ଧମକ ଦେଉଥିବା ଅଭିଯୋଗ କରିଛନ୍ତି। ପୀଡିତାଙ୍କ ଅଭିଯୋଗକୁ ଆଧାର କରି ପୋଲିସ ତଦନ୍ତ ଆରମ୍ଭ କରିଛି। ମୂଳତଃ ଇକଡିଲ ଅଞ୍ଚଳର ଏହି ମହିଳା ବର୍ତ୍ତମାନ ଭର୍ଥନା ସହରରେ ରୁହନ୍ତି। ପ୍ରାୟ ଦୁଇ ବର୍ଷ ପୂର୍ବେ ସେ ସୋସିଆଲ ମିଡିଆ ମାଧ୍ୟମରେ ବ୍ରଜରାଜ ନଗରର ଜଣେ ଯୁବକଙ୍କୁ ଭେଟିଥିଲେ। ପ୍ରାରମ୍ଭରେ ସେମାନଙ୍କ ମଧ୍ୟରେ ସାଧାରଣ କଥାବାର୍ତ୍ତା ହେଉଥିଲା, କିନ୍ତୁ ଧୀରେ ଧୀରେ ନିକଟତର ହୋଇଉଠିଥିଲା।
ମହିଳା ଜଣକ ଦାବି କରିଛନ୍ତି ଯେ ପୁରୁଷ ଜଣକ ତାଙ୍କୁ ବିବାହ କରିବାକୁ ପ୍ରତିଶ୍ରୁତି ଦେଇଥିଲେ। ଏହି ବିଶ୍ୱାସ ଉପରେ ସେ ସମ୍ପର୍କରେ ରହିଥିଲେ। ତାଙ୍କ ପରିବାର ଅନୁଯାୟୀ, ମହିଳାଙ୍କ ତାଙ୍କ ଉପରେ ପୂର୍ଣ୍ଣ ବିଶ୍ୱାସ ଥିଲା ଏବଂ ସେମାନେ ସେମାନଙ୍କ ଭବିଷ୍ୟତ ପ୍ରତି ଗମ୍ଭୀର ଥିଲେ। ତେଣୁ, ଯେତେବେଳେ ସେ ତାଙ୍କୁ ବିବାହ କରିବାକୁ ମନା କଲେ, ସେ ଗଭୀର ଭାବରେ ମର୍ମାହତ ହୋଇଗଲେ।
ରିପୋର୍ଟ ଅନୁଯାୟୀ ମହିଳା ଜଣକ ପୁରୁଷଙ୍କ ସହ ପୁଣି ଥରେ ବିବାହ ପ୍ରସଙ୍ଗ ଉଠାଇଥିଲେ। ଗତକାଲି ରାତିରେ ସେମାନଙ୍କର ଫୋନ୍ରେ ଲମ୍ବା କଥାବାର୍ତ୍ତା ହୋଇଥିଲା। ମହିଳା ଜଣକ ଅଭିଯୋଗ କରିଛନ୍ତି ଯେ ପାରିବାରିକ କାରଣ ଦର୍ଶାଇ ପୁରୁଷ ଜଣକ ତାଙ୍କୁ ବିବାହ କରିବାକୁ ସିଧାସଳଖ ମନା କରିଦେଇଥିଲେ।
ଯୁବତୀ ଜଣକ ସିଧା ତାଙ୍କ ଘରକୁ ଚାଲିଗଲେ। ଉଭୟ ପକ୍ଷ ମଧ୍ୟରେ ଯୁକ୍ତିତର୍କ ଏବଂ ହଙ୍ଗାମା ଆରମ୍ଭ ହୋଇଗଲା। ସ୍ଥାନୀୟ ଲୋକଙ୍କ କହିବା ଅନୁଯାୟୀ, ଏହି ସମୟ ମଧ୍ୟରେ ଯୁବତୀ ଜଣକ ଘର ବାହାରେ ଏକ ବିଷାକ୍ତ ପଦାର୍ଥ ପିଇ ଦେଇଥିଲେ। କିଛି ମିନିଟ୍ ମଧ୍ୟରେ ତାଙ୍କ ଅବସ୍ଥା ଖରାପ ହୋଇଗଲା। ସୂଚନା ପାଇବା ପରେ ତାଙ୍କ ପରିବାର ଲୋକ ତାଙ୍କୁ ତୁରନ୍ତ ଆମ୍ବୁଲାନ୍ସରେ ସାମୁଦାୟିକ ସ୍ୱାସ୍ଥ୍ୟ କେନ୍ଦ୍ରକୁ ନେଇଯାଇଥିଲେ। ପ୍ରାଥମିକ ଚିକିତ୍ସା ପରେ ଡାକ୍ତର ତାଙ୍କ ଅବସ୍ଥା ଗୁରୁତର ଘୋଷଣା କରି ଜିଲ୍ଲା ଡାକ୍ତରଖାନାକୁ ରେଫର କରିଥିଲେ।
ପୀଡିତା କହିଛନ୍ତି ଯେ ଯୁବକଙ୍କ ପରିବାର ତାଙ୍କୁ ଧମକ ଦେଉଥିଲେ, ଯେତେବେଳେ ସେ ବ୍ୟକ୍ତିଗତ ଭାବରେ ତାଙ୍କୁ ବିବାହ କରିବାକୁ ପ୍ରତିଶ୍ରୁତି ଦେଇଥିଲେ। ମହିଳା କହିଛନ୍ତି ଯେ ଫେବୃଆରୀ ୧୦ ତାରିଖରେ ସେ କାର୍ଯ୍ୟାନୁଷ୍ଠାନ ଦାବି କରି ପୋଲିସ ଷ୍ଟେସନରେ ଏକ ଆବେଦନ ଦାଖଲ କରିଥିଲେ। ସେ ଅଭିଯୋଗ କରିଛନ୍ତି ଯେ ତାଙ୍କ ଅଭିଯୋଗ ସତ୍ତ୍ୱେ, କୌଣସି ଠୋସ୍ କାର୍ଯ୍ୟାନୁଷ୍ଠାନ ନିଆଯାଇ ନଥିଲା।
ମହିଳା ଜଣକ କହିଛନ୍ତି ଯେ ସବୁ ଦିଗରୁ ନିରାଶା ଏବଂ ଯୁବକଙ୍କ ପ୍ରଚାର ପରେ ସେ ମାନସିକ ଭାଙ୍ଗିପଡ଼ିଥିଲେ। ଏହି ଚାପରେ ସେ ଏହି ବିପଦପୂର୍ଣ୍ଣ ପଦକ୍ଷେପ ନେଇଥିଲେ। ପୋଲିସ କହିଛି ଯେ ସେମାନେ ଏହି ମାମଲା ଉପରେ ନଜର ରଖିଛନ୍ତି ଏବଂ ତଦନ୍ତ ପରେ ଆବଶ୍ୟକୀୟ କାର୍ଯ୍ୟାନୁଷ୍ଠାନ ଗ୍ରହଣ କରିବେ।
ପବିତ୍ର ପଙ୍କଉଦ୍ଧାର ଏକାଦଶୀରେ ଶ୍ରୀ ଲୋକନାଥ ଦେବଙ୍କ ଦର୍ଶନ ପାଇଁ ପ୍ରବଳ ଗହଳି
ପୁରୀ : ଆଜି ପବିତ୍ର ପଙ୍କଉଦ୍ଧାର ଏକାଦଶୀରେ ପୁରୀର ଶ୍ରୀଲୋକନାଥ ଦେବଙ୍କ ଦର୍ଶନ ପାଇଁ ପ୍ରବଳ ଗହଳି। ପରମ୍ପରା ଅନୁସାରେ ଶ୍ରୀଜଗନ୍ନାଥଙ୍କ ଭଣ୍ଡାର ରକ୍ଷକ ପ୍ରଭୁ ଶ୍ରୀ ଲୋକନାଥ ଦେବଙ୍କ ପ୍ରତ୍ୟକ୍ଷ ଶିବଲିଙ୍ଗ ଦର୍ଶନର ସୌଭାଗ୍ୟ ପାଉଛନ୍ତି ଭକ୍ତ। ବର୍ଷ ତମାମ ଭକ୍ତ ମାନଙ୍କ ଦ୍ୱାରା ଅର୍ପଣ କରାଯାଇଥିବା ନୈବେଦ୍ୟ ଯଥା ବେଲପତ୍ର,ପୁଷ୍ପ ,ଫଳ, ସୁନା,ରୂପା ଆଦିର ପଙ୍କକୁ ବିଧି ଅନୁସାରେ ଆଜି କଢ଼ାଯାଇଛି। ବଡି ଭୋର ୪ଟାରୁ ନୈବେଦ୍ୟ ପଙ୍କ କଢା ଯାଇଥିଲା। ପରେ ହୋଇଥିଲା ମହାସ୍ନାନ। ତା ପରେ ଭକ୍ତ ଓ ଶ୍ରଦ୍ଧାଳୁମାନଙ୍କ ନିମିତ୍ତ ସର୍ବସାଧାରଣ ଦର୍ଶନ ଅନୁଷ୍ଠିତ ହେଉଅଛି। ବ୍ୟାରିକେଡ଼ରେ ଧାଡି ମାଧ୍ୟମରେ ଯାଇ ଭକ୍ତ ମାନେ ଶ୍ରୀଲୋକନାଥଙ୍କୁ ପ୍ରତ୍ୟକ୍ଷ ଦର୍ଶନ କରି ଆଶିଷ ଲାଭ କରୁଅଛନ୍ତି।
ରାୟଗଡାରେ ପୁଣି ମାଓ ଆତଙ୍କ, ସହରରୁ ଦେଢ କିମି ଦୁରରେ ଲାଗିଲା ମାଓ ପୋଷ୍ଟର
ରାୟଗଡା : ରାୟଗଡାରେ ପୁଣି ମାଓ ଆତଙ୍କ। ସହରରୁ ଦେଢ଼ କିଲୋମିଟର ଦୂର ଦୁମାଗୁଡା ଗାଁ ନିକଟରେ ଲାଗିଲା ମାଓ ପୋଷ୍ଟର । ଉଭୟ କେନ୍ଦ୍ର ଓ ରାଜ୍ୟ ସରକାର ମାଓ ଦମନ ପାଇଁ ରଣନୀତି ପ୍ରସ୍ତୁତ କରୁଥିବା ବେଳେ ଜିଲ୍ଲାରେ ପୁଣି ମୁଣ୍ଡ ଟେକିଛନ୍ତି ମାଓ ସଂଗଠନ। ପୋଷ୍ଟର ଲଗାଇ ଜିଲ୍ଲାରେ ନିଜର ଉପସ୍ଥିତି ଜାହିର କରିଛନ୍ତି। ମାଓବାଦୀ ରାଜ୍ଯ ସଂପାଦକ ମେଘ ଜାନି ଓ ଡମ୍ବୁରୁ ମାଝୀଙ୍କ ନାଁରେ ଲାଗିଥିବା ଏହି ପୋଷ୍ଟରରେ ମାଓନେତା ସବ୍ଯସାଚୀ ପଣ୍ଡା, ଆଜାଦ୍, ଉଦୟ ଓ ନିଖିଲ ଆଦିବାସୀ ନଥିବା ଉଲ୍ଲେଖ କରାଯାଇଛି। ଏହାସହ ଜିଲ୍ଲାରେ ଗଢିଉଠିଥିବା କମ୍ପାନୀ ମାନେ ଲୋକଙ୍କୁ ଶୋଷଣ ନକରି ନିରବ ରହିବାକୁ ଚେତାବନୀ ଦିଆଯାଇଛି। କେବିକେ ଡିଭିଜନ୍ ପକ୍ଷରୁ ଲଗାଯାଇଥିବା ପୋଷ୍ଟରରେ ସଂଗଠନ ସବୁବେଳେ ପାଇଁ ରହିଛି ବୋଲି ଉଲ୍ଲେଖ ରହିଛି। ତେବେ ମାଓ ପୋଷ୍ଟର ଲାଗିବା ପରେ ଦୁମାଗୁଡା ଅଞ୍ଚଳରେ ଆତଙ୍କ ଖେଳିଯାଇଛି। ଘଟଣା ସ୍ଥଳରେ ସିଆରପିଏଫ ଯବାନ ପହଞ୍ଚି ମାଓ ପୋଷ୍ଟରକୁ ହଟାଇଛନ୍ତି। ସିଆରପିଏଫର ସ୍ବତନ୍ତ୍ର ବମ୍ ସ୍କ୍ବାଡ ଘଟଣାସ୍ଥଳକୁ ଆସି ଯାଞ୍ଚ୍ କରିଛନ୍ତି।
ବାହାନଗା ବଜାର ଛକରେ ତୀର୍ଥ ଯାତ୍ରୀ ବସ ଦୁର୍ଘଟଣା
ସୋର : ବାଲେଶ୍ୱର ଜିଲ୍ଲା ଖନ୍ତାପଡ଼ା ଥାନା ୧୬ ନମ୍ବର ଜାତୀୟ ରାଜପଥ ବାହାନଗା ବଜାର ଛକରେ ତୀର୍ଥ ଯାତ୍ରୀ ବସ ଦୁର୍ଘଟଣା l ଆଜି ଭୋର ସମୟରେ ଆନ୍ଧ୍ରର ତୀର୍ଥଯାତ୍ରୀ ବସ୍ ପଶ୍ଚିମବଙ୍ଗରୁ ଫେରୁଥିଲା। ବୋଧହୁଏ ଡ୍ରାଇଭରଙ୍କୁ ନିଦ ଲାଗିଯିବାରୁ ଡିଭାଇଡର ଉପରକୁ ଚଢ଼ି ଯାଇଥିଲା ବସ୍ । ଡ୍ରାଇଭର ଜଣକ ବ୍ରିଜରୁ ତଳକୁ ଖସିପଡ଼ିଥିଲେ l ଘଟଣା ସ୍ଥଳରେ ତାଙ୍କର ମୃତ୍ୟୁ ହୋଇଯାଇଛି। ବସରେ ୫୦ ଜଣ ଯାତ୍ରୀ ଥିଲେ। ୧୪ ଜଣ ଗୁରୁତର ଆହତ ହୋଇ ଏବେ ଖନ୍ତାପଡ଼ା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଚିକିତ୍ସା ହେଉଛନ୍ତି l ଏବେ ବସଟି ପୋଲ ଉପରେ ଝୁଲି ରହିଛି l
ଆଜିଠୁ ପରୀକ୍ଷା ହବକୁ ପଠାଯାଉଛି ଯୁକ୍ତ ଦୁଇ ପ୍ରଶ୍ନପତ୍ର
ଭୁବନେଶ୍ବର : ଆଜିଠୁ ପରୀକ୍ଷା ହବ୍ କୁ ପଠାଯାଉଛି ଯୁକ୍ତ ଦୁଇ ପ୍ରଶ୍ନପତ୍ର। ପ୍ରଥମେ ପୂଜା କରାଯିବା ପରେ ୨୧୧ ପରୀକ୍ଷା ହବକୁ ପ୍ରଶ୍ନପତ୍ର ପଠାଯାଇଛି। ଗତକାଲି ଭାରତ ବନ୍ଦ ଯୋଗୁ ବିଭ୍ରାଟ ଆଶଙ୍କାରେ ପଠାଯାଇ ନଥିଲେ ପ୍ରଶ୍ନପତ୍ର । ୨୭ଟି ଟ୍ରକ ୨୭ଟି ରୁଟ ଦେଇ ଉଚ୍ଚ ମାଧ୍ୟମିକ ଶିକ୍ଷା ପରିଷଦ ଅଫିସରୁ ବାହାରିଛି ପ୍ରଶ୍ନପତ୍ର । ଫେବୃଆରୀ ୧୬ ସନ୍ଧ୍ୟା ସୁଦ୍ଧା ରାଜ୍ୟର ସମସ୍ତ ହବରେ ପ୍ରଶ୍ନପତ୍ର ପହଞ୍ଚାଇବାକୁ ଲକ୍ଷ୍ୟ ରଖିଛି ସିଏଚଏସଇ । ମାଲକାନଗିରି, କୋରାପୁଟ, ରାୟଗଡ଼ା, ବଣାଇଗଡ଼, ରାଉରକେଲା ପରି ଦୂର ସ୍ଥାନକୁ ଯିବ ପ୍ରଶ୍ନପତ୍ର । ପର୍ଯ୍ୟବେକ୍ଷକଙ୍କଠାରୁ ପ୍ରଶ୍ନପତ୍ର ପ୍ୟାକେଟଗୁଡ଼ିକ ସେଣ୍ଟର ସୁପରିନଟେଣ୍ଡ, ନିରୀକ୍ଷକ ଓ ଜିଲ୍ଲା ପ୍ରଶାସନର ପ୍ରତିନିଧିଙ୍କ ଉପସ୍ଥିତିରେ ଖୋଲାଯିବ । ପ୍ରଥମ ଥର ପାଇଁ ସବୁ ହବରେ ଏଆଇ କ୍ୟାମେରା ଲଗାଯାଇଛି । ଏଆଇ କ୍ୟାମେରାର କମାଣ୍ଡ କଣ୍ଟ୍ରୋଲ ରୁମ୍ ସିଏଚଏସଇ ଅଫିସରେ ଖୋଲାଯାଇଛି ।
ବିଶିଷ୍ଟ କଂଗ୍ରେସ ନେତା ତଥା ପୂର୍ବତନ କେନ୍ଦ୍ର ମନ୍ତ୍ରୀ କାହ୍ନୁଚରଣ ଲେଙ୍କାଙ୍କ ବିୟୋଗ
ଭୁବନେଶ୍ବର : ବିଶିଷ୍ଟ କଂଗ୍ରେସ ନେତା ତଥା ପୂର୍ବତନ କେନ୍ଦ୍ର ମନ୍ତ୍ରୀ କାହ୍ନୁଚରଣ ଲେଙ୍କାଙ୍କ ବିୟୋଗ। ଭୁବନେଶ୍ଵରର ଏକ ଘରୋଇ ହସପିଟାଲରେ ଚିକିତ୍ସିତ ହେବା ବେଳେ ତାଙ୍କର ବିୟୋଗ ହୋଇଛି। ମୃତ୍ୟୁ ବେଳକୁ ତାଙ୍କୁ ହେଉଥିଲା ୮୬ ବର୍ଷ। ୧୯୮୮ରୁ ୧୯୯୪ ଯାଏ ସେ ରାଜ୍ୟସଭା ସଦସ୍ୟ ଥିଲେ। ଦିଲ୍ଲୀରେ ନରସିଂହ ରାଓଙ୍କ ସରକାରରେ କାହ୍ନୁ ଲେଙ୍କା ଥିଲେ ରେଳ ରାଷ୍ଟ୍ରମନ୍ତ୍ରୀ। ସେ କୃଷି ରାଷ୍ଟ୍ରମନ୍ତ୍ରୀ ଦାୟିତ୍ଵ ମଧ୍ୟ ତୁଳାଇଥିଲେ। କାହ୍ନୁ ଲେଙ୍କା ଥିଲେ ରାଜ୍ୟର ଜଣେ ବିଶିଷ୍ଟ କଂଗ୍ରେସ ନେତା। ସେ ଅନେକ ପଦପଦବୀରେ ଥିଲେ। ୧୯୯୫ରୁ ୨୦୦୦ ଯାଏ ଚୌଦ୍ଵାରରୁ ବିଧାୟକ ଭାବେ ନିର୍ବାଚିତ ହୋଇଥିଲେ।
ଶ୍ରୀମନ୍ଦିର ଚାରିପାଖେ ଡ୍ରୋନ୍ ଉଡାଇବାକୁ ଉଦ୍ୟମ, ଯୁବକଙ୍କୁ ଧରିଲା ପୋଲିସ
ପୁରୀ : ଶ୍ରୀମନ୍ଦିର ଚାରିପାଖରେ ଡ୍ରୋନ ଉଡାଣ ଉପରେ କଟକଣା ଜାରି ରହିଛି । ହେଲେ ଆଜି ସନ୍ଧ୍ୟାରେ ଜଣେ ଯୁବକ ଡ୍ରୋନ ଉଡାଇବାକୁ ଚେଷ୍ଟା କରୁଥିବା ବେଳେ ପୁରୀ ପୋଲିସ ଦ୍ୱାରା ଧରାପଡ଼ିଛନ୍ତି । ଯୁବକ ଜଣଙ୍କ ହେଲେ କର୍ଣ୍ଣାଟକର ଅଭ୍ୟୁଦୟ ସିହ୍ନା । ଶ୍ରୀମନ୍ଦିର ଉପରେ ଡ୍ରୋନ ଉଡାଇବାକୁ ଚେଷ୍ଟା କରୁଥିବା ବିଷୟରେ ପୁରୀ ଏସପି ପ୍ରତୀକ ସିଂହଙ୍କ ନିକଟକୁ ଖବର ପହଞ୍ଚିଥିଲା। ଏହା ପରେ ଏସପିଙ୍କ ନିର୍ଦ୍ଦେଶକ୍ରମେ ସିଂହଦ୍ୱାର ଥାନାକୁ ଖବର ଦିଆଯାଇଥିଲା । ଦୁଇଟି ପୋଲିସ ଟିମ ଡ୍ରୋନ ଗତିବିଧିକୁ ଟ୍ରାକ୍ କରି ପିଛା କରିଥିଲେ। ପରବର୍ତ୍ତୀ ତଦନ୍ତରେ ଡ୍ରୋନଟି ଉତ୍ତର ଦ୍ୱାର ସମ୍ମୁଖରେ ପଣ୍ଡା ଗଳି ଅଞ୍ଚଳରେ ଥିବା ଚିହ୍ନଟ ହୋଇଥିଲା। ସେଠାରେ ଚଢ଼ାଉ କରି ପୋଲିସ ଡ୍ରୋନ ଚାଳକ ଅଭ୍ୟୁଦୟ ସିହ୍ନାଙ୍କୁ ଧରିଥିଲା । ତାଙ୍କ ନିକଟରୁ ଡ୍ରୋନ ଜବତ କରାଯାଇଛି। ଘଟଣା ସମ୍ପର୍କରେ ସିଂହଦ୍ୱାର ଥାନାରେ ମାମଲା ରୁଜୁ କରାଯାଇ ତଦନ୍ତ ଜାରି ରହିବ ବୋଲି ପୁରୀ ପୋଲିସ ପକ୍ଷରୁ ସୂଚନା ପ୍ରଦାନ କରାଯାଇଅଛି।