ଭୁବନେଶ୍ୱର: ରାଜଧାନୀ ଉପକଣ୍ଠରେ ବୋମାମାଡ଼ । ଏୟାରଫିଲଡ଼ ଥାନା ପଞ୍ଚୁପଲ୍ଲୀ ଠାରେ ବୋମାମାଡ଼ । ଗତକାଲି ବିଳମ୍ବିତ ରାତିରେ ଘଟିଛି ଘଟଣା । ବୋମାମାଡ଼ରେ ୨ଜଣ ଆହତ ହୋଇଥିବା ବେଳେ ହସ୍ପିଟାଲରେ ଭର୍ତ୍ତି ହୋଇଛନ୍ତି । ବୋମାମାଡ଼ କରିଥିବା ଯୁବକର ଅକ୍ଷୟ ବୋଲି ସୂଚନା ମିଳିଛି । ଜନ୍ମାଷ୍ଟମୀ ରାତିରେ ହୋଇଥିବା ଗଣ୍ଡଗୋଳକୁ ନେଇ ହୋଇଛି ବୋମାମାଡ଼ । ଘଟଣାସ୍ଥଳରେ କମିଶନରେଟ ପୋଲିସର ଛାନଭିନ ଜାରି ହୋଇଛି । ଅଭିଯୁକ୍ତ ଅକ୍ଷୟ ଜଣେ ପେଶାଦାର ଅପରାଧୀ । ଖୁବଶୀଘ୍ର ଅଭିଯୁକ୍ତଙ୍କୁ ଗିରଫ କରାଯିବ ବୋଲି ଭୁବନେଶ୍ବର ଡିସିପି କହିଛନ୍ତି ।
ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ମୁଣ୍ଡ ଉପରେ ଝୁଲୁଛି ଗିରଫ ଖଣ୍ଡା
ଇସଲାମାବାଦ: କୌଣସି ମୁହୂର୍ତ୍ତରେ ଗିରଫ ହୋଇପାରନ୍ତି ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ । ଆତଙ୍କବାଦ ନିରୋଧ ଆଇନ ବା ଏଟିଏ ଆଧାରରେ ତାଙ୍କୁ ଗିରଫ କରାଯିବା ସମ୍ଭାବନା ରହିଛି । ଇସଲାମାବାଦରେ ଏକ ସାଧାରଣ ସଭାରେ ଉଦବୋଧନ ଦେବାବେଳେ ଜଣେ ବିଚାରପତି ଓ ଦୁଇଜଣ ବରିଷ୍ଠ ଅଧିକାରୀଙ୍କ ବିରୋଧରେ ମନ୍ତବ୍ୟ ଦେବା ପରେ ଇମ୍ରାନଙ୍କ ଅଡୁଆ ବଢ଼ିଛି ।
ଶନିବାର ସନ୍ଧ୍ୟାରେ ଇସଲାମାବାଦର ଏଫ-୯ ପାର୍କରେ ଉଦବୋଧନ ଦେବାବେଳେ ସେ ବିଭିନ୍ନ ସରକାରୀ ପ୍ରତିଷ୍ଠାନକୁ ଟାର୍ଗେଟ କରିବା ସହ ଉତ୍ତେଜକ ମନ୍ତବ୍ୟ ଦେବା ଆରମ୍ଭ କରିବାରୁ ଟେଲିଭିଜନରେ ତାଙ୍କ ଭାଷଣର ପ୍ରସାରଣ ବନ୍ଦ କରିଦିଆଯାଇଥିଲା । ପାକିସ୍ତାନ ଇଲେକ୍ଟ୍ରୋନିକ ମିଡିଆ ରେଗୁଲେଟୋରୀ ଅଥରିଟି ବା PEMRA କହିଛି- ଇମ୍ରାନଙ୍କ ଭାଷଣକୁ ମନିଟରିଂ ଓ ସମ୍ପାଦନା କରାଗଲେ ହିଁ ପ୍ରସାରଣ କରାଯିବ ।
ନିଜ ଅଭିଭାଷଣ କାଳରେ ପାକିସ୍ତାନର ବହୁ ରାଷ୍ଟ୍ରୀୟ ପ୍ରତିଷ୍ଠାନ ବିରୋଧରେ ଇମ୍ରାନ ବର୍ଷିଥିବା ବେଳେ ଏହାକୁ ନେଇ ଦେଶରେ ଆଇନଶୃଙ୍ଖଳା ପରିସ୍ଥିତି ଉପୁଜିବା ଆଶଙ୍କା ରହିଥିଲା ବୋଲି ଅଭିଯୋଗ କରିଥିଲା PEMRA । ଇମ୍ରାନ ନିଜ ଭାଷଣରେ ବରିଷ୍ଠ ପୋଲିସ ଅଫିସର, ଜଣେ ମହିଳା ମାଜିଷ୍ଟ୍ରେଟ ଓ ନିର୍ବାଚନ କମିଶନଙ୍କ ବିରୋଧରେ ମାମଲା ଦାୟର କରିବାକୁ ଧମକ ଦେଇଥିଲେ ।
ଦେଶଦ୍ରୋହ ଅଭିଯୋଗ କ୍ରମେ ସହଯୋଗୀ ସାହାବାଜ ଗିଲଙ୍କୁ ଗିରଫ କରାଯିବା ପରେ ଉତ୍ତ୍ୟକ୍ତ ହୋଇଛନ୍ତି ପୂର୍ବତନ କ୍ରିକେଟର । ସେପଟେ ପାକିସ୍ତାନ ଗୃହମନ୍ତ୍ରୀ ରାଣା ସାନାଉଲ୍ଲା କହିଛନ୍ତି- ଇମ୍ରାନ ସେନାକୁ ମଧ୍ୟ ଟାର୍ଗେଟ କରୁଛନ୍ତି । ଇମ୍ରାନଙ୍କ ଭାଷଣକୁ କେନ୍ଦ୍ର କରି ଇସଲାମବାଦ ପୋଲିସ ତାଙ୍କ ବିରୋଧରେ ଆତଙ୍କାବାଦ ବିରୋଧୀ ଆଇନ ଅନୁସାରେ ମାମଲା ରୁଜୁ କରିଥିଲା ।
ଆଜି ଇମ୍ରାନଙ୍କ ଆଇନଜୀବୀ ଟିମ୍ କୋର୍ଟରେ ଆଗୁଆ ଜାମିନ ଆବେଦନ କରିବେ । ତେଣେ ସମ୍ଭାବ୍ୟ ଗିରଫଦାରୀକୁ ନେଇ ଇମ୍ରାନଙ୍କ ପାକିସ୍ତାନ ତେହରିକ-ଇ- ଇନସାଫ ପାର୍ଟିର କର୍ମୀମାନେ ରାଜରାସ୍ତାକୁ ଓହ୍ଲାଇଛନ୍ତି । ବିଭିନ୍ନ ସହରରେ ପ୍ରତିବାଦ କରିବାକୁ ଦଳ ପକ୍ଷରୁ ନିର୍ଦ୍ଦେଶ ଦିଆଯାଇଛି ।
ଜନ୍ତର-ମନ୍ତରରେ ସଂଯୁକ୍ତ କିଷାନ ମୋର୍ଚ୍ଚାର ମହାପଞ୍ଚାୟତ
ନୂଆଦିଲ୍ଲୀ: ଆଜି ସଂଯୁକ୍ତ କିଷାନ ମୋର୍ଚ୍ଚାର ଆହ୍ୱାନ କ୍ରମେ ଦିଲ୍ଲୀର ଜନ୍ତରମନ୍ତରରେ କୃଷକ ମହାପଞ୍ଚାୟତ କାର୍ଯ୍ୟକ୍ରମ ରହିଛି । ତେବେ ଏହି ମହାପଞ୍ଚାୟତରେ ବିପୁଳ ସଂଖ୍ୟାରେ କୃଷକମାନେ ସାମିଲ ହେବେ । ବିଭିନ୍ନ ରାଜ୍ୟର କୃଷକ ଦିଲ୍ଲୀ ଅଭିମୁଖେ ବାହାରି ସାରିଛନ୍ତି । ଗୋଟିଏ ଦିନିଆ କାର୍ଯ୍ୟକ୍ରମ ରହିଛି । ଯାହାକି ସମ୍ପୂର୍ଣ୍ଣ ଭାବେ ଶାନ୍ତି ଏବଂ ଅନୁଶାନସହ ସହ ଆୟୋଜିତ ହେବ । ଜନ୍ତର-ମନ୍ତରରେ ଆଜି କୃଷକଙ୍କ ବିରୋଧ ପ୍ରଦର୍ଶନ ଆହ୍ୱାନ ପୂର୍ବରୁ ସିନ୍ଧୁ ସୀମାରେ ସୁରକ୍ଷା ବଢ଼ାଇ ଦିଆଯାଇଛି । ବିଭିନ୍ନ ସ୍ଥାନରେ 144 ଧାରା ଜାରି କରାଯାଇଛି ।
ଏହା ବ୍ୟତୀତ ରାଜଧାନୀ ଦିଲ୍ଲୀକୁ ଆସୁଥିବା ଗାଡ଼ି ଉପରେ ନଜର ରଖାଯାଇଛି । ପୋଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି । ଜନ୍ତର-ମନ୍ତରରେ ଏହି ମହାପଞ୍ଚାୟତ ସକାଳ ୧୧ଟାରୁ ସନ୍ଧ୍ୟା ୪ଟା ପର୍ଯ୍ୟନ୍ତ ଆୟୋଜିତ ହେବ । ମହାପଞ୍ଚାୟତ ସରିବା ପରେ ମହାମହିମ ରାଷ୍ଟ୍ରପତିଙ୍କୁ ଦାବିପତ୍ର ପ୍ରଦାନ କରାଯିବ । ମିଳିତ କୃଷକ ମୋର୍ଚ୍ଚା ସୂଚନା ଦେଇ କହିଛି, ଯଦି ସରକାର କାର୍ଯ୍ୟକ୍ରମରେ କୌଣସି ପ୍ରକାର ବାଧା ସୃଷ୍ଟି କରନ୍ତି ତେବେ ସରକାର ଏଥିପାଇଁ ନିଜେ ଦାୟୀ ରହିବେ ।
ପ୍ରକାଶଯୋଗ୍ୟ, କୃଷକ ପଞ୍ଚାୟତ ପକ୍ଷରୁ ଅନେକ ଦାବି କରାଯାଉଛି । ଏଥିମଧ୍ୟରେ ପ୍ରମୁଖ ଦାବି ହେଉଛି ଲକ୍ଷ୍ମିପୁର ଖେରି ନରସଂହାରର ପୀଡିତ କୃଷକ ପରିବାରକୁ ନ୍ୟାୟ ମିଳୁ । ସେହିପରି ଜେଲରେ ବନ୍ଦୀ କୃଷକଙ୍କ ମୁକ୍ତି ଏବଂ ନରସଂହାରର ମୁଖ୍ୟ ଦୋଷୀ କେନ୍ଦ୍ରମନ୍ତ୍ରୀ ଅଜୟ ମିଶ୍ରା ଟେନିଙ୍କ ଗିରଫଦାରୀ ପାଇଁ ଦାବି କରାଯାଉଛି । ସ୍ୱାମୀନାଥନ ଆୟୋଗର ସି-୨୦ ପ୍ଲସ ୫୦ ପ୍ରତିଶତ ଫର୍ମୁଲା ଅନୁସାରେ ଏମଏସପିର ଗ୍ୟାରେଣ୍ଟି ଆଇନ ଅଣାଯାଉ ଏବଂ ଦେଶର ସମସ୍ତ କୃଷକଙ୍କୁ ଋଣମୁକ୍ତ କରାଯାଉ । ବିଜୁଳି ବିଲ୍ ୨୦୨୨କୁ ରଦ୍ଦ କରାଯାଉ । ଅନ୍ୟପକ୍ଷରେ ଗତାକାଲିଠୁ କୃଷକନେତା ରାକେଶ ଟିକାୟତ ଅଟକ ରହିଛନ୍ତି ।
ନିର୍ମାଣଧୀନ ବିଏମସି ବିଲ୍ଡିଂ ଏବଂ ‘ଓ ହବ୍’ର ପରିଦର୍ଶନ କଲେ ଫାଇଭ-ଟି ସଚିବ ଭି କେ ପାଣ୍ଡିଆନ
ଭୁବନେଶ୍ୱର: ଆଇଟି ଟାୱାର ପରିଦର୍ଶନ କଲେ 5-ଟି ସଚିବ ଭିକେ ପାଣ୍ଡିଆନ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ 5-ଟି ସଚିବ ସତ୍ୟନଗରଠାରେ ନିର୍ମାଣାଧୀନ ବିଏମସିର ନୂଆ ବିଲଡ଼ିଂ ଏବଂ O’ ହବ୍ ନିର୍ମାଣ କାର୍ଯ୍ୟର ସମୀକ୍ଷା କରିଛନ୍ତି । ଏହି ୨ଟି ନୂଆ ବିଲଡ଼ିଂର ନିର୍ମାଣକାର୍ଯ୍ୟ ଶୀଘ୍ର ଶେଷ ହୋଇ କାର୍ଯ୍ୟକ୍ଷମ ହେବା ଉପରେ ଗୁରୁତ୍ବ ଦେଇଛନ୍ତି । ପ୍ରଥମ ଥର ପାଇଁ ଓଡ଼ିଶାରେ ଡେଭଲପମେଣ୍ଟ ସେଣ୍ଟର ପ୍ରତିଷ୍ଠା କରିବାକୁ ଆଇବିଏମ ଓ ଡିଲଏଟ ଭଳି ବହୁ ରାଷ୍ଟ୍ରୀୟ କମ୍ପାନୀ ଆଗ୍ରହ ପ୍ରକାଶ କରିଛନ୍ତି ।
ଏହି ଦୁଇଟି କମ୍ପାନୀ ଡେଭଲମ୍ପମେଣ୍ଟ ସେଣ୍ଟର ପ୍ରତିଷ୍ଠା କଲେ ବହୁ ଯୁବକ ଯୁବତୀଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି ହେବ । ୨୦୨୨ ଅକ୍ଟୋବର ମଧ୍ୟଭାଗ ସୁଦ୍ଧା ଦୁଇଟି ଯାକ ସେଣ୍ଟର କାର୍ଯ୍ୟକ୍ଷମ କରିବାକୁ ଲକ୍ଷ ରଖାଯାଇଛି । ଏହାସହ ସେ ଭୁବନେଶ୍ବର ସ୍ମାର୍ଟସିଟି କମାଣ୍ଡ ଓ କଣ୍ଟ୍ରୋଲ ସେଣ୍ଟର କାର୍ଯ୍ୟର ଅଗ୍ରଗତି ନେଇ ସନ୍ତୋଷ ପ୍ରକାଶ କରିଛନ୍ତି । ଏଠାରେ ସାଧାରଣ ଲୋକଙ୍କ ପାଇଁ ମିଟିଂ ହଲ୍, କ୍ୟାଣ୍ଟିନ ଓ ପାର୍କିଂ ବ୍ୟବସ୍ଥା କରିବାକୁ ସେ ଗୁରୁତ୍ବ ଦେଇଛନ୍ତି । O’ ହବ୍ରେ ଦ୍ବିତୀୟ ଟାୱାର ନିର୍ମାଣକୁ ସେ ପ୍ରାଧାନ୍ୟ ଦେଇଛନ୍ତି ।
ସେଠାରେ ଇନକ୍ୟୁବେସନ ସେଣ୍ଟର ସହ ଷ୍ଟାଟଅପ ପାଇଁ ଆବଶ୍ୟକ ଜାଗା ଯୋଗାଇବାକୁ ଗୁରୁତ୍ବ ଦେଇଛନ୍ତି । ଇନଫୋସିଟି ଅଞ୍ଚଳରେ ବହୁତଳ ବିଶିଷ୍ଟ ପାର୍କିଂ ବ୍ୟବସ୍ଥା କରିବାକୁ ଫାଇବ ଟି ସଚିବ ପରାମର୍ଶ ଦେଇଛନ୍ତି । ଏହାଦ୍ବାରା ଆଇଟି କମ୍ପାନୀ ଗୁଡ଼ିକର ପାର୍କିଂ ସମସ୍ୟା ଦୂର ହେବ ।
ଫାଇବ ଟି ସଚିବଙ୍କ ସହ ଶିଳ୍ପ ସଚିବ ହେମନ୍ତ ଶର୍ମା, ବୈଶୟିକ ଓ ପ୍ରଯୁକ୍ତବିଦ୍ୟା ସଚିବ ମନୋଜ ମିଶ୍ର, ଭୁବନେଶ୍ବର ସ୍ମାର୍ଟସିଟି ଲିମିଟଚେଡର ଅଧ୍ୟକ୍ଷ ସଞ୍ଜୟ ସିଂ, ବିଏମସି କମିଶନର ବିଜୟ ଅମୃତା କୁଲାଙ୍ଗେ ଓ ଇଡକୋର ପରିଚାଳନା ନିର୍ଦ୍ଦେଶକ ଭୂପିନ୍ଦର ସିଂ ପୁନିଆଙ୍କ ଓ ବହୁ ବରିଷ୍ଠ ଅଧିକାରୀ ଯୋଗ ଦେଇଥିଲେ ।
ଆଜି ଭାରତ-ଜିମ୍ବାୱେ ଶେଷ ଦିନିକିଆ ମ୍ୟାଚ୍: ସମ୍ମାନ ରକ୍ଷା ପାଇଁ ଲଢ଼ିବ ଜିମ୍ବାୱେ
ହରାରେ: ଆଜି ଭାରତ-ଜିମ୍ବାଓ୍ବେ ତୃତୀୟ ତଥା ଶେଷ ଦିନିକିଆ । ଦିନ ୧୨ଟା ୪୫ରୁ ହରାରେ ସ୍ପୋଟ୍ର୍ସ କ୍ଲବରେ ହେବ ମୁକାବିଲା । କେଏଲ ରାହୁଲଙ୍କ ନେତୃତ୍ବରେ ପଡ଼ିଆକୁ ଓହ୍ଲାଇବ ଟିମ୍ ଇଣ୍ଡିଆ । ୩ ମ୍ୟାଚ ବିଶିଷ୍ଟ ସିରିଜର ଦୁଇଟି ମ୍ୟାଚ ଜିତିସାରିଛି ଭାରତ । ଏହା ସହିତ ସିରିଜକୁ ଅକ୍ତିଆର କରିଛି ମେନ୍ ଇନ୍ ବ୍ଲୁ ।
ପ୍ରଥମ ଦିନିକିଆକୁ ୧୦ଓ୍ବିକେଟରେ ଜିତିଥିବାବେଳେ ଦ୍ବିତୀୟ ଦିନିକିଆକୁ ୫ ଓ୍ବିକେଟ୍ରେ ଜିତିଛି ଭ୍ରମଣକାରୀ ଦଳ । ଶେଷ ଦିନିକିଆ ଜିତି ସିରିଜ କ୍ଲିନ ସୁଇପ କରିବା ଲକ୍ଷ୍ୟରେ ରହିଛି ଭାରତ । ଏପଟେ ମ୍ୟାଚ ଜିତି ସମ୍ମାନ ରକ୍ଷା ପାଇଁ ଉଦ୍ୟମ କରିବ ଜିମ୍ବାଓ୍ବେ । ସୂଚନାଯୋଗ୍ୟ ଭାରତ ଜିମ୍ବେୱେ ବିରୋଧରେ ୯ ବର୍ଷ ହେବ କୌଣସି ଦିନିକିଆ ହାରିନାହିଁ । ଆଜି ଯଦି ଭାରତ ବିଜୟୀ ହୁଏ ତେବେ ରେକର୍ଡ ଜାରି ରହିବ ।
ବିଲକିସ୍ ବାନୋ ଗଣଦୁଷ୍କର୍ମ ମାମଲା: ଅଭିଯୁକ୍ତଙ୍କୁ ମୁକ୍ତ କରିବା ପରେ ବିବାଦ ଘେରରେ ଗୁଜୁରାଟ ସରକାର
ଗାନ୍ଧିନଗର: ବହୁଚର୍ଚ୍ଚିତ ଗୁଜରାଟ ବିଲକିସ ବାନୋ ଗଣଦୁଷ୍କର୍ମ ମାମଲା । ୧୧ ଅଭିଯୁକ୍ତଙ୍କୁ ଗୁଜରାଟ ସରକାର ମୁକ୍ତ କରିଦେବାକୁ ନେଇ ବଢିଛି ବିବାଦ । ଆଜି ଏନେଇ ଜାତୀୟ ମାନବାଧିକାର କମିଶନ ସ୍ବତନ୍ତ୍ର ଭାବେ ବିଚାର ବିମର୍ଶ କରିବେ । ମାମଲାରେ ଦୋଷୀ କେମିତି ଜେଲରୁ ମୁକୁଳିଲେ ତାକୁ ଆଲୋଚନା କରାଯିବ । ପୂର୍ବରୁ ପ୍ରାୟ ୬ ହଜାର ମାନବାଧିକାର କର୍ମୀ, ଐତିହାସିକ, ଅମଲାତନ୍ତ୍ରୀ, ଲେଖକ, ଫିଲ୍ମ ନିର୍ମାତା, ସାମ୍ବାଦିକ, ସମାଜସେବୀ ବିରୋଧ କରିଥିଲେ ।
ଅଭିଯୁକ୍ତଙ୍କ ଖଲାସ ହେବାକୁ ସେମାନେ ବିରୋଧ କରିବା ସହ ନିଷ୍ପତ୍ତିକୁ ବାତିଲ କରିବା ଲାଗି ଦାବି କରିଥିଲେ । ଗୁଜରାଟ ସରକାରଙ୍କ ଏହି ନିଷ୍ପତ୍ତି ନ୍ୟାୟ ବ୍ୟବସ୍ଥାର ବୃହତ ପରିପନ୍ଥୀ ବୋଲି ସେମାନେ ଦର୍ଶାଇଛନ୍ତି । ଏହି ମାମଲାରେ ତ ୨୦୦୮ ଜାନୁଆରୀ ୨୧ରେ ମୁମ୍ବାଇର ଏକ ସ୍ବତନ୍ତ୍ର କୋର୍ଟ ମୋଟ ୨୦ ଅଭିଯୁକ୍ତଙ୍କ ମଧ୍ୟରୁ ୧୧ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡ ଶୁଣାଇଥିଲେ । ପରେ ଏହି ରାୟକୁ ବମ୍ବେ ହାଇକୋର୍ଟ କାଏମ ରଖିଥିଲେ ।
ଫଳରେ ସମସ୍ତ ଅଭିଯୁକ୍ତ ଗୋଧ୍ରା ସବଜେଲରେ ରହିଥିଲେ । ମାତ୍ର ଗତ ଅଗଷ୍ଟ ୧୫ ତାରିଖରେ ଗୁଜରାଟ ସରକାର ସେମାନଙ୍କୁ ସ୍ବତନ୍ତ୍ର ନୀତିକୁ ଆଧାର କରି ମୁକ୍ତ କରିଦେଇଥିଲେ । ୨୦୦୨ ଗୋଧ୍ରା ଗଣହତ୍ୟା ଘଟଣା କ୍ରମେ ମାର୍ଚ୍ଚ ୩ ତାରିଖରେ ୫ ମାସର ଗର୍ଭବତୀ ବିଲକିସ ବାନୋଙ୍କୁ ଗଣଦୁଷ୍କର୍ମ କରାଯାଇଥିଲା । ଏହା ସହ ତାଙ୍କର ୩ ବର୍ଷର ଶିଶୁକନ୍ୟାଙ୍କ ସମେତ ପରିବାରର ୭ଜଣଙ୍କୁ ହତ୍ୟା କରିଥିଲେ ଦୁର୍ବୃତ୍ତ ।
ଆଜି ରାଜଘାଟରେ ପିକ୍ ଛୁଇଁବ ସୁବର୍ଣ୍ଣରେଖା
ଆଜି ରାଜଘାଟରେ ପିକ୍ ଛୁଇଁବ ସୁବର୍ଣ୍ଣରେଖା । ଏବେ ବିପଦ ସଂକେତ ଉପର ପ୍ରବାହିତ ହେଉଛି ନଦୀ । ରାଜଘାଟରେ ବିପଦ ସଂକେତ ୧୦ ଦଶମିକ ୩୬ ମିଟର ଥିବା ବେଳେ ଏବେ ଜଳସ୍ତର ରହିଛି ୧୧ ଦଶମିକ ୩୬ ମିଟର । ଝାଡ଼ଖଣ୍ଡ ସହିତ ସମନ୍ୱୟ ରକ୍ଷା କରି ଜଳ ସମ୍ପଦ ବିଭାଗ ବନ୍ୟା ନିୟନ୍ତ୍ରଣକୁ ଗୁରୁତ୍ବ ଦିଆଯାଉଥିବା କହିଛନ୍ତି ଜଳ ସମ୍ପଦ ବିଭାଗ ସର୍ବୋଚ୍ଚ ଯନ୍ତ୍ରୀ ।
ଯାଜପୁର, ଭଦ୍ରକ, ମୟୂରଭଞ୍ଜ ଓ ବାଲେଶ୍ଵରରେ ବନ୍ୟାସ୍ଥିତି ଉପରେ ନଜର ରଖାଯାଇଛି । ଭୋଗରାଇ ଓ ବାଲିଆପାଳ ଅଞ୍ଚଳରେ ପାଣି ପଶିଛି । ବୈତରଣୀ ବିପଦ ସଂକେତ ଉପରେ ଥିଲେ ମଧ୍ୟ ଖସୁଛି ଜଳସ୍ତର । ଉଦ୍ଧାର କାର୍ଯ୍ୟରେ ୫ଟି ଏନଡିଆରଏଫ୍, ୪ଟି ଓଡ୍ରାଫ୍ ଟିମ୍ ସମେତ ଅଗ୍ନିଶମ ବାହିନୀ ମୁତୟନ କରାଯାଇଛି । ଆଜି ସନ୍ଧ୍ୟା ପର୍ଯ୍ୟନ୍ତ ସ୍ଥିତି ସଙ୍ଗୀନ ରହିବ ।
ପାଣି ଘେରରୁ ଲୋକଙ୍କୁ ଉଦ୍ଧାର ଓ ରିଲିଫ କାର୍ଯ୍ୟ ତଦାରଖ ପାଇଁ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ମନ୍ତ୍ରୀ ପ୍ରତାପ ଦେବ ଜିଲ୍ଲା ଗସ୍ତ କରିଛନ୍ତି । ଏହାସହ ଜରୁରୀ ପରିସ୍ଥିତି ପରିଚାଳନା ପାଇଁ ବାଲେଶ୍ବର ଜିଲ୍ଲାପାଳଙ୍କୁ ସ୍ବତନ୍ତ୍ର ରିଲିଫ କମିଶନର କ୍ଷମତା ପ୍ରଦାନ କରିଛନ୍ତି ମୁଖ୍ୟମନ୍ତ୍ରୀ।
ବଙ୍ଗୋପସାଗରରେ ଦାନା ବାନ୍ଧୁଛି ଆଉ ଏକ ଲଘୁଚାପ
ଭୁବନେସ୍ୱର: ଦୁଇ ଦୁଇଟି ଲଘୁଚାପର ଦୁର୍ଦ୍ଦଶା ସରିନି । ଏଭଳି ସମୟରେ ଆସୁଛି ଆଉ ଏକ ଲଘୁଚାପ । ବଙ୍ଗୋପସାଗରରେ ପୁଣି ଦାନା ବାନ୍ଧୁଛି ଲଘୁଚାପ । ଆସନ୍ତାକାଲି ଘୂର୍ଣ୍ଣିବଳୟ ସୃଷ୍ଟି ହୋଇ ପରବର୍ତ୍ତି ୨୪ ଘଣ୍ଟାରେ ଏହା ଘନୀଭୂତ ହେବ । ପ୍ରଭାବରେ ୨୪ ଓ ୨୫ ତାରିଖରେ ପ୍ରବଳ ବର୍ଷା ସମ୍ଭାବନା ରହିଛି । ଉତ୍ତର, ଉପକୂଳ ଏବଂ ଦକ୍ଷିଣ ଓଡ଼ିଶାରେ ୭୦ରୁ ୧୧୦ ମିଲିମିଟର ପର୍ଯ୍ୟନ୍ତ ବର୍ଷା ହେବା ନେଇ ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର ।
୨୩ ତାରିଖରେ ବାଲେଶ୍ବର, ମୟୁରଭଞ୍ଜ ଏବଂ କେନ୍ଦୁଝରରେ ପ୍ରବଳ ବର୍ଷା ପାଇଁ ୟେଲୋ ଆଲର୍ଟ ଜାରି କରାଯାଇଛି। ୨୪ତାରିଖରେ ବର୍ଷାର ପରିମାଣ ଏବଂ ବିସ୍ତୃତି ବୃଦ୍ଧି ହେବ । ଏହିଦିନ ବାଲେଶ୍ବର, ଭଦ୍ରକ, ଯାଜପୁର, କେନ୍ଦ୍ରାପଡା ସହ ୧୭ ଜିଲ୍ଲାରେ ବଜ୍ରପାତ ଜନିତ ବର୍ଷା ନେଇ ସତର୍କତା ଜାରି କରାଯାଇଛି । ସେହିପରି ୨୫ ତାରିଖରେ ବଜ୍ରପାତ ସହିତ ପ୍ରବଳ ବର୍ଷା ନେଇ ୧୪ଜିଲ୍ଲାକୁ ସତର୍କ କରାଯାଇଛି । ଲଘୁଚାପ ନେଇ ପାଣିପାଗ କେନ୍ଦ୍ର ପକ୍ଷରୁ ସ୍ପଷ୍ଟ କରାଯାଇ ନଥିଲେ ମଧ୍ୟ ପ୍ରବଳ ବର୍ଷା ନେଇ ଆକଳନ କରାଯାଇଛି ।
ମିଆଁମାର ଏବଂ ଏହାର ଆଖପାଖରେ ମେଘ ଖଣ୍ଡ ଏକାଠି ହେଉଥିବାରୁ ଲଘୁଚାପ ସମ୍ଭାବନା ଅଧିକ ରହିଛି । ୧ ଜୁନ ୧୦୨୨ ରୁ ୨୧ ଅଗଷ୍ଟ ୨୦୨୨ ମଧ୍ୟରେ ରାଜ୍ୟରେ ୯୩୪.୨ ମିମି ବର୍ଷା ରେକର୍ଡ କରାଯାଇଛି । ଯାହାକି ଏହି ସମୟର ସ୍ୱାଭାବିକ ବର୍ଷା ୮୧୧.୯ ମିଲିମିଟର ତୁଳନାରେ ୧୫% ଅଧିକ ରହିଛି । ବୌଦ୍ଧ ୬୨%, କନ୍ଧମାଳରେ ୭୩% ସ୍ୱାଭାବିକ ଠାରୁ ଅତ୍ୟଧିକ ବର୍ଷା ରେକର୍ଡ ହୋଇଛି । ଦେବଗଡରେ ୪୦ପ୍ରତିଶତ, ଢେଙ୍କାନାଳ ୨୯%, ଜଗତସିଂହପୁର ୨୧%, ନୟାଗଡ ୨୨%, ନୂଆପଡା ୨୦%, କୋରାପୁଟ ୩୦%, ରାୟଗଡା ୩୩% ଏବଂ ଗଜପତିରେ ୨୦ପ୍ରତିଶତ ସ୍ୱାଭାବିକ ଠାରୁ ଅଧିକ ବର୍ଷା ରେକର୍ଡ ହୋଇଛି । ଅବଶିଷ୍ଟ ୨୦ ଜିଲ୍ଲାରେ ଏହି ସମୟ ମଧ୍ୟରେ ସ୍ୱାଭାବିକ ବର୍ଷା ରେକର୍ଡ ହୋଇଛି l
ଗୁଣି ଗାରେଡ଼ି ସନ୍ଦେହରେ ଭାଇକୁ ହତ୍ୟା, ଭାଉଜକୁ ଆକ୍ରମଣ
ନବରଙ୍ଗପୁର: ଅନ୍ଧ ବିଶ୍ବାସର କରୁଣ ପରିଣତି । ଗୁଣି ଗାରେଡ଼ି ସନ୍ଦେହରେ ଭାଇକୁ ହତ୍ୟା କଲା ଭାଇ । ଭାଉଜକୁ ବି ଆକ୍ରମଣ । ନବରଙ୍ଗପୁର ଜିଲ୍ଲା ଉମରକୋଟ ସହର ଦର୍ଗାଗୁଡ଼ାରେ ଘଟିଛି ଏହି ହତ୍ୟାକାଣ୍ଡ । ସମ୍ପର୍କୀୟ ଭାଈ ଓ ତିନି ପୁତୁରାଙ୍କ ଟାଙ୍ଗିଆ ଚୋଟରେ ସୋମନାଥ ପୂଜାରୀଙ୍କ ମୃତ୍ୟୁ ହୋଇଥିବା ବେଳେ ଭାଉଜ ରୁପନ୍ତି ପୂଜାରୀ ଗୁରୁତର ହୋଇଛନ୍ତି । ତାଙ୍କୁ ଉମରକୋଟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରୁ ନବରଙ୍ଗପୁର ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି ।
ହତ୍ୟାକାଣ୍ଡପରେ ଟାଙ୍ଗିଆ ସହ ହତ୍ୟାକାରୀ ଭାଇ ଅର୍ଜୁନ ପୂଜାରୀ ଓ ତିନି ପୁତୁରା ତୁଳା ପୂଜାରୀ, ଚନ୍ଦନ ପୂଜାରୀ ଓ ଦେବେନ୍ଦ୍ର ପୂଜାରୀ ଉମରକୋଟ ଥାନାରେ ଆତ୍ମ ସମର୍ପଣ କରିଛନ୍ତି । ଗୁଣି ଗାରେଡି ଘଟଣାକୁ ନେଇ ମୃତକ ଓ ହତ୍ୟାକାର ଙ୍କ ମଧ୍ୟରେ ପୂର୍ବରୁ ତିକ୍ତତା ଲାଗି ରହିଥିଲା । ଆକ୍ରମଣକାରୀଙ୍କ ପରିବାରର ୫ ଜଣଙ୍କ ମୃତ୍ୟୁ ପାଇଁ ଅର୍ଜୁନ ଦାୟୀ ବୋଲି ସନ୍ଦେହ କରି ଏହି ଆକ୍ରମଣ ହୋଇଛି ।
ଆଜି ମୃତକ ସୋମନାଥ ପୂଜାରୀ ଓ ତାଙ୍କ ସ୍ତ୍ରୀ ରୁପନ୍ତି ପୂଜାରୀ ବିଲରୁ ଫେରୁଥିବା ସମୟରେ ଏହି ଚାରି ଅଭିଯୁକ୍ତ ମାନେ ତାଙ୍କୁ ଆକ୍ରମଣ କରିଥିଲେ । ଉମରକୋଟ ଥାନାରେ ଏକ ମାମଲା ରୁଜ୍ଜୁ କରାଯାଇଛି । ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
ବାଲିପାଟଣାରେ ଯୁବକଙ୍କୁ ଅପହରଣ, ମୁଣ୍ଡ ବଦଳରେ ୩ ଲକ୍ଷ ଦାବି
ବାଲିପାଟଣା: ବାଲିପାଟଣା ଥାନା ଅନ୍ତ୍ରର୍ଗତ ସରିପୁର ଗାଁରେ ଯୁବକଙ୍କୁ ଅପହରଣ ଅଭିଯୋଗ । ଅପହରଣ ପରେ ୩ ଲକ୍ଷ ଟଙ୍କା ଦାବିକଲେ ଅପହରଣକାରୀ । ମନୋଜ କୁମାର ରାଉତରାୟଙ୍କୁ ଶନିବାର ମଧୁବନ ଛକରୁ ଅପହରଣ କରାଯାଇଥିବା ଅଭିଯୋଗ ହୋଇଛି । ମନୋଜଙ୍କ ମୁଣ୍ଡ ଜାମିନ ରଖି ଅପହରଣକାରୀ ୩ ଲକ୍ଷ ଟଙ୍କା ଦାବି କରୁଛି ।
ପରିବାର ଲୋକେ ପର୍ଯ୍ୟାୟକ୍ରମେ ୨ ଲକ୍ଷ ୬0 ହଜାର ଟଙ୍କା ଫୋନ ପେରେ ଦେଇ ସରିଲେଣି । ମନୋଜଙ୍କ ମୋବାଇଲ ବନ୍ଦ ରହିଛି । ଥାନାରେ ଏନେଇ ପରିବାର ପକ୍ଷରୁ ଏତଲା ଦିଆଯାଇଛି । ବନମାଳୀପୁର ଅଞ୍ଚଳର ପ୍ରତାପ ନାମକ ଜଣେ ବ୍ୟକ୍ତି ଅପହରଣ ଦିନ ଫୋନ କରି ମନୋଜ ଡାକିଥିଲେ । ତାହା ପରଠୁ ମନୋଜଙ୍କ ପତ୍ତା ମିଳିନଥିବା ଅଭିଯୋଗ ହୋଇଛି ।