ନନ୍ଦିଘୋଷ ବ୍ୟୁରୋ : ସନ୍ଦିଗ୍ଧ ବାଂଲାଦେଶୀ ସନ୍ଦେହରେ ପ୍ରଶାସନର ରେଡ୍। ଜଗତସିଂହପୁର ଥାନା ତରିକୁନ୍ଦ ହାଇସ୍କୁଲ ପଛ ପଟ ଖେଳପଡ଼ିଆରେ ରହୁଥିବା ଦୁଇ ପରିବାରକୁ ଉଠାଇ ନେଇଛି ପୋଲିସ। ସେଠାରେ ପ୍ରାୟ ୧୦ ଜଣ ରହୁଥିଲେ। ୬ ଜଣ ମହିଳଆ, ୩ ଜଣ ଶିଶୁ ଓ ଜଣେ ବୃଦ୍ଧ। ସମସ୍ତଙ୍କୁ ବିରିଡି ବ୍ଲକ ବାଗଲପୁର ବହୁ ମୁଖୀ ବନ୍ୟା ଆଶ୍ରୟସ୍ଥଳୀରେ ରଖାଯାଇଛି। ସେମାନଙ୍କର କାଗଜପତ୍ର ଯାଞ୍ଚ କରାଯାଉଛି। ଯାହା ସୂଚନା ମିଳିଛି ଏମାନଙ୍କ ଘର ଏରସମା ବ୍ଲକ କଳାବେଦୀ ଅଞ୍ଚଳର । ଏମାନେ ଏଠାରେ ଘର ଦ୍ୱାର କରି ରହୁଛନ୍ତି । ଏହା ଆଗରୁ 37 ଜଣଙ୍କୁ ପୋଲିସ ସଂଧିଗ୍ଧ ବାଂଲାଦେଶୀ ଭାବେ ଉଠେଇ ନେଇଥିଲା। ସେମାନଙ୍କ ମଧ୍ୟରୁ ୧୩ ଜଣ ବାଂଲାଦେଶୀ ବୋଲି ଜଣାପଡ଼ିଥିଲା। ସେମାନଙ୍କୁ ବାଂଲାଦେଶ ପଠାଇ ଦିଆଯିବ। ଜଗତସିଂହପୁର ତରିକୁନ୍ଦ ବେହେରାମପୁରରେ ବାଂଲାଦେଶୀଙ୍କୁ ଘର ଭଡ଼ା ଦେଇଥିବା ସିକନ୍ଦର ଆଲାମ ଓ ତାର ସାନ ଭାଇ ଅବଦୁଲ ମୁଲତିପି ଖାଁକୁ ପୋଲିସ ଗିରଫ କରି ଆଗରୁ ଜେଲ ପଠାଇ ଦେଇଛି।
ଆଜି ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଦ୍ବିତୀୟ ଦିନିକିଆ ; ରାୟପୁରରେ ଅପରାହ୍ଣ ଗୋଟାଏ ୩୦ରେ ଖେଳାଯିବ ମ୍ୟାଚ
ନନ୍ଦିଘୋଷ ବ୍ୟୁରୋ : ଆଜି ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଦ୍ବିତୀୟ ଦିନିକିଆ । ରାୟପୁରରେ ଅପରାହ୍ଣ ଗୋଟାଏ ୩୦ରେ ଖେଳାଯିବ ମ୍ୟାଚ । ବିରାଟ କୋହଲି ଫର୍ମକୁ ଫେରିଥିବାରୁ ଏହି ମ୍ୟାଚ ଜିତି ସିରିଜ କବଜା କରିବାକୁ ଉଦ୍ୟମ କରିବ ଟିମ ଇଣ୍ଡିଆ । ପ୍ରଥମ ଦିନିକିଆରେ ଦକ୍ଷିଣ ଆଫ୍ରିକାକୁ ୧୭ ରନରେ ହରାଇ ୩ଟିକିଆ ସିରିଜରେ ୧-୦ରେ ଆଗୁଆ ରହିଛି ଭାରତ । ରାଞ୍ଚିରେ ଖେଳାଯାଇଥିବା ପ୍ରଥମ ଦିନିକିଆରେ ଶତକ ହାସଲ ସହ ଫର୍ମକୁ ଫେରିଛନ୍ତି ବିରାଟ କୋହଲି । ରୋହିତ ଶର୍ମାଙ୍କ ୫୭ ଓ ଅଧିନାୟକ କେ.ଏଲ ରାହୁଲଙ୍କ ୬୦ ରନ ବଳରେ ୩୪୯ ରନ କରିଥିଲା ଟିମ ଇଣ୍ଡିଆ । ଦକ୍ଷିଣ ଆଫ୍ରିକା ଲଢୁଆ ବ୍ୟାଟିଂ କରିବା ସତ୍ତ୍ବେ ୩୩୨ ରନ କରିବାରେ ସକ୍ଷମ ହୋଇପାରିଥିଲା । ଆହତ କାରଣରୁ ଅଧିନାୟକ ଶୁବମନ ଗିଲ ଓ ଉପ ଅଧିନାୟକ ଶ୍ରେୟସ ଆୟାରଙ୍କୁ ବିଶ୍ରାମ ଦିଆଯାଇଛି । କେଏଲ ରାହୁଲଙ୍କ ନେତୃତ୍ବରେ ଖେଳୁଛି ଭାରତ । ସିରିଜର ତୃତୀୟ ମ୍ୟାଚ ୬ ତାରିଖରେ ବିଶାଖପାଟଣାରେ ଖେଳାଯିବ । ଏହାପରେ ଟି-ଟ୍ବେଣ୍ଟି ସିରିଜର ପ୍ରଥମ ମ୍ୟାଚ ୯ ତାରିଖ ଦିନ କଟକରେ ଖେଳାଯିବ ।
ଆଜି ବି ବେଶ ସରଗରମ ହେବ ବିଧାନସଭା
ନନ୍ଦିଘୋଷ ବ୍ୟୁରୋ: ଆଜି ବି ବିଧାନସଭା ବେଶ ସରଗରମ ହେବ। ବିଭିନ୍ନ ପ୍ରସଙ୍ଗକୁ ନେଇ ଗୃହରେ ଶାସକ ଓ ବିରୋଧୀ ମୁହାଁମୁହିଁ ହେବେ । ଶକ୍ତି , କୃଷି ଓ କୃଷକ,ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ, ମତ୍ସ୍ୟ ଓ ପ୍ରାଣୀ ସମ୍ପଦ, ସମବାୟ, ବୟନ ଶିଳ୍ପ, ସୂକ୍ଷ୍ମ କ୍ଷୁଦ୍ର ଓ ମଧ୍ୟମ ଉଦ୍ୟୋଗୀ ଏବଂ ବିଜ୍ଞାନ ଓ କାରିଗରୀ ବିଭାଗର ରହିଛି ପ୍ରଶ୍ନକାଳ । ବିଧାୟକ ଚାହିଁଲେ ଭିନ୍ନ ପ୍ରଶ୍ନ ପଚାରିବେ। ଶୂନ୍ୟକାଳରେ ଉଭୟ ବିରୋଧୀ ଓ ଶାସକ ବହୁ ଗୁରୁତ୍ବପୂର୍ଣ୍ଣ ରାଜ୍ୟ ସ୍ବାର୍ଥ ସମ୍ବଳିତ ପ୍ରସଙ୍ଗ ଉଠାଇବେ । ମୁଖ୍ୟ ବିରୋଧୀ ବିଜେଡି ପକ୍ଷରୁ ଧାନ ମଣ୍ଡି ସମସ୍ୟା ନେଇ ମୁଲତବୀ ପ୍ରସ୍ତାବ ଦିଆଯିବ । ପ୍ରଶ୍ନକାଳରେ ବିଭିନ୍ନ ବିଭାଗ ଉପରେ ଘମାଘୋଟ ଆଲୋଚନା ହେବାର ସମ୍ଭାବନା ରହିଛି। ସେହିପରି ଦ୍ବିତୀୟ ଅଧ୍ୟାୟରେ ବାଣିଜ୍ୟ ଓ ପ୍ରତିଷ୍ଠାନ ଆଇନ ସଂଶୋଧନ ପ୍ରସ୍ତାବ ଉପରେ ଆଲୋଚନା ହେବ।
ଭୁଲ ମାନିଲେ ସୋସିଆଲ ମିଡିଆ ଇନଫ୍ଲୁଏନସର ଶୁଭଙ୍କର ମିଶ୍ରା
ନନ୍ଦିଘୋଷ ବ୍ୟୁରୋ : ଭୁଲ ମାନିଲେ ସୋସିଆଲ ମିଡିଆ ଇନଫ୍ଲୁଏନସର ଶୁଭଙ୍କର ମିଶ୍ରା । ନିଜର ୟୁଟ୍ୟୁବ ଚ୍ଯାନଲରେ ଶ୍ରୀମନ୍ଦିରକୁ ନେଇ ଦେଇଥିବା ବିବାଦୀୟ ମନ୍ତବ୍ଯ ପାଇଁ ଭୁଲ ମାଗିବା ସହ ବିବାଦୀୟ ପୋଷ୍ଟକୁ ହଟାଇଛନ୍ତି ଶୁଭଙ୍କର । ତେବେ ଏହା ତାଙ୍କର ନିଜସ୍ବ ମନ୍ତବ୍ଯ ନଥିଲା ବୋଲି କହିଛନ୍ତି ଶୁଭଙ୍କର ମିଶ୍ରା । ଆଧ୍ଯାତ୍ମିକ ମାର୍ଗରେ ସେ ଅନେକ ସାଧୁ ସନ୍ଥଙ୍କ ସଂସ୍ପର୍ଶରେ ଆସିଛନ୍ତି । ସେମାନଙ୍କ ଠାରୁ ବହୁ ଜଣା ଅଜଣା ଜ୍ଞାନ ପ୍ରାପ୍ତି କରିଛନ୍ତି । ତେବେ ଶ୍ରୀମନ୍ଦିର ପରି ଧାର୍ମିକ ଅନୁଷ୍ଠାନକୁ ସେ ସମ୍ମାନ ଜଣାନ୍ତି ।
ଏଠାର ଆଧ୍ଯାତ୍ମିକ ପରିବେଶ ତାଙ୍କୁ ସବୁବେଳେ ଆକର୍ଷିତ କରି ଆସିଛି । ଏହି ଆକର୍ଷଣ ଯୋଗୁଁ ସେ ଜଗତଗୁରୁ ଶଙ୍କରାଚାର୍ଯ୍ଯଙ୍କ ସଂସ୍ପର୍ଷରେ ମଧ୍ଯ ଆସିଥିଲେ । ତେବେ କିଛି ଲୋକ ତାଙ୍କୁ ତାଙ୍କର ଏହି ମନ୍ତବ୍ଯ ନେଇ ସିଧାସଳଖ ପ୍ରଶ୍ନ କରିଥିବାରୁ ସେ ଧନ୍ଯବାଦ ଜଣାଇଛନ୍ତି । ପ୍ରେମୀଯୁଗଳ ଶ୍ରୀମନ୍ଦିରକୁ ଯିବା ଦ୍ବାରା ପ୍ରେମ ସଫଳ ହୁଏନି ବୋଲି ନିଜ ସୋସିଆଲ ମିଡ଼ିଆରେ ମନ୍ତବ୍ଯ ଦେଇଥିଲେ ଶୁଭଙ୍କର ।
ଶ୍ରୀମନ୍ଦିର ଉପରେ ରାଧାରାଣୀଙ୍କ ଅଭିଶାପ ରହିଛି । ରାଧାରାଣୀ ଶ୍ରୀକୃଷ୍ଣଙ୍କୁ ଜଗନ୍ନାଥଙ୍କ ରୂପରେ ଦର୍ଶନ କରିବାକୁ ଯାଉଥିବା ବେଳେ ସେବାୟତ ମାନେ ତାଙ୍କୁ ଅଟକାଇଥିଲେ । ଏହା ମଧ୍ୟ କହିଥିଲେ, ଶ୍ରୀମନ୍ଦିର ଭିତରକୁ ଭଗବାନଙ୍କ ଧର୍ମପତ୍ନୀଙ୍କ ପ୍ରବେଶ ଉପରେ ବାରଣ ରହିଛି । ଆପଣ କିଭଳି ଭିତରକୁ ଆସିଲେ । ଏକଥା ଶୁଣି ରାଧାରାଣୀ ରାଗିଯାଇ ଶ୍ରୀମନ୍ଦିରକୁ ଅଭିଶାପ ଦେଇଥିଲେ ବୋଲି କହିଥିଲେ । ପ୍ରେମୀ ଯୁଗଳ ଶ୍ରୀମନ୍ଦିରକୁ ଯିବାଦ୍ବାରା ସେମାନେ ଭବିଷ୍ଯତରେ ବିବାହ କରିବାରେ ସଫଳ ହେବେ ନାହିଁ ବୋଲି କହିଥିଲେ ଶୁଭଙ୍କର । ଶୁଭଙ୍କର ମିଶ୍ରାଙ୍କ ଶ୍ରୀମନ୍ଦିର ଓ ମହାପ୍ରଭୁଙ୍କ ପ୍ରତି ଏଭଳି ଭୁଲ୍ ଉପସ୍ଥାପନକୁ ନେଇ ଜଗନ୍ନାଥ ପ୍ରେମୀ, ଗବେଷକ ଓ ସେବାୟତଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା । ସିଂହଦ୍ବାର ଥାନାରେ ଏତଲା ମଧ୍ଯ ଦିଆଯାଇଥିଲା । ଏହାପରେ ନିଜ ପୋଷ୍ଟଙ୍କୁ ନେଇ କ୍ଷମା ମାଗିଛନ୍ତି ଶୁଭଙ୍କର ମିଶ୍ରା।
ବିଜୟ ହଜାରେ ଟ୍ରଫି ଖେଳିବାକୁ ମନା କଲେ ବିରାଟ, ଏବେ ବିସିସିଆଇ କରିବ କ’ଣ ?
ବିଜୟ ହଜାରେ ଟ୍ରଫି ଖେଳିବାକୁ ମନା କଲେ ବିରାଟ, ଏବେ ବିସିସିଆଇ କରିବ କ’ଣ ?
ନନ୍ଦିଘୋଷ ବ୍ୟୁରୋ: ଟିମ୍ ଇଣ୍ଡିଆର ଷ୍ଟାର ବ୍ୟାଟର କିଙ୍ଗ କୋହଲିଙ୍କୁ ନେଇ ଆସିଛି ବଡ଼ ଖବର । ଦକ୍ଷିଣ ଆଫ୍ରିକା ବିପକ୍ଷ ପ୍ରଥମ ଦିନିକିଆରେ ଶତକ ଲଗାଇ ତାଙ୍କ ଅବସରକୁ ନେଇ ସମାଲୋଚନା କରୁଥିବା ଲୋକଙ୍କ ମୁହଁ ବନ୍ଦ କରି ଦେଇଥିବା କୋହଲି ଏବେ ବିଜୟ ହଜାରେ ଟ୍ରଫିକୁ ନେଇ ମୁହଁ ଖୋଲିଛନ୍ତି । ଡିସେମ୍ବର ୨୪ ତାରିଖରୁ ଆରମ୍ଭ ହେଉଥିବା ବିଜୟ ହଜାରେ ଟ୍ରଫିରେ ଖେଳିବାକୁ ମନା କରି ଦେଇଛନ୍ତି କିଙ୍ଗ କୋହଲି । ଏହି ଟୁର୍ଣ୍ଣାମେଣ୍ଟରେ ଖେଳିବାକୁ ତାଙ୍କୁ ଏବଂ ହିଟ୍ ମ୍ୟାନ ରୋହିତ ଶର୍ମାଙ୍କୁ କୁହାଯାଇଥିଲା । ଶୁଣିବାକୁ ମିଳୁଥିଲା ୧୬ ବର୍ଷ ପରେ କୋହଲି ଘରୋଇ ଟୁର୍ଣ୍ଣାମେଣ୍ଟକୁ ଫେରିବା ସହ କିଛି ମ୍ୟାଚ୍ ଖଳି ପାରନ୍ତି ।
କୋହଲିଙ୍କ ନିଷ୍ପତ୍ତି, ବିସିସିଆଇ ପାଇଁ ଚ୍ୟାଲେଞ୍ଜ
ଘରୋଇ କ୍ରିକେଟକୁ ନେଇ କୋହଲିଙ୍କ ଷ୍ଟାଣ୍ଡ ବିସିସିଆଇ ପାଇଁ ନୂଆ ଚ୍ୟାଲେଞ୍ଜ ସୃଷ୍ଟି କରିଛି । ରିପୋର୍ଟ ଅନୁସାରେ, ବିଜୟ ହଜାରେ ଟ୍ରଫି ଖେଳିବା ମୁଡ଼ରେ ନାହାନ୍ତି ବିରାଟ । ଏହି ଟୁର୍ଣ୍ଣାମେଣ୍ଟ ସମସ୍ତ ଭାରତୀୟ ଖେଳାଳିଙ୍କୁ ଖେଳିବା ଅନିବାର୍ଯ୍ୟ । ହେଲେ କୋହଲି ଏଥିରେ ଅଂଶଗ୍ରହଣ କରିବାକୁ ମନା କରିଦେଇଛନ୍ତି । ବିସିସିଆଇ ଚାହୁଁଛି, ବିରାଟ ଓ ରୋହିତ ଏହି ଟୁର୍ଣ୍ଣାମେଣ୍ଟ ଖଳନ୍ତୁ ।
ରୋହିତ ଏଥିରେ ଖେଳିବାକୁ ପୂର୍ବରୁ ହଁ ଭରି ସାରିଛନ୍ତି । ଏମିତି ସ୍ଥିତିରେ କୋହଲି ଖେଳିବାକୁ ମନା କରିବା ପରେ ତାଙ୍କୁ ବିଶେଷ କରି ଏଥିରୁ ବାଦ ଦେବା ବିସିସିଆଇ ପାଇଁ ଆହୁରି ଚ୍ୟାଲେଞ୍ଜ ଭରା ହୋଇଯାଇଛି । ମିଳିଥିବା ତଥ୍ୟ ଅନୁସାରେ, ବିରାଟ ଏହି ଟୁର୍ଣ୍ଣାମେଣ୍ଟ ଖେଳିବାକୁ ହିଁ ଚାହୁଁ ନାହାନ୍ତି । ରୋହିତ ଖେଳିବାକୁ ସହମତି ଦେବା ଓ ବିରାଟ ମନା କରିବା ସ୍ଥିତିକୁ ଜଟିଳ କରିଦେଇଛି । ଏବେ ବିସିସିଆଇ ଅନ୍ୟ ଖେଳାଳିଙ୍କୁ କି ଜବାବ ଦେବ ତାକୁ ନେଇ ଚିନ୍ତାରେ ପଡ଼ିଛି ।
୧୬ ବର୍ଷ ପୂର୍ବେ ଖେଳିଥିଲେ ଘରୋଇ ମ୍ୟାଚ୍
ବିରାଟ ଶେଷ ବିଜୟ ହଜାରେ ଟ୍ରଫି ୧୬ ବର୍ଷ ପୂର୍ବେ ୨୦୧୦ରେ ଖେଳିଥିଲେ । ୨୦୦୮ରୁ ୨୦୧୦ ପର୍ଯ୍ୟନ୍ତ ଦିଲ୍ଲୀ ପାଇଁ ବିଜୟ ହଜାରେ ଟ୍ରଫି ଖେଳିଥିଲେ ବିରାଟ । ଏହି ସମୟରେ ସେ ୧୩ ମ୍ୟାଚ୍ ଖେଳି ୮୧୯ ରନ୍ କରିଛନ୍ତି । ଏଥିରେ ୪ଟି ଶତକ ରହିଛି । ତେବେ ଗତବର୍ଷ ତାଙ୍କୁ ରଣଜୀ ଟ୍ରଫିରେ ଦେଖିବାକୁ ମିଳିଥିଲା । ଦିଲ୍ଲୀ ପାଇଁ ସେ ଗୋଟିଏ ମ୍ୟାଚ୍ ଖେଳିଥିଲେ ।
ରାଜସ୍ଥାନର ଶ୍ରୀଗଙ୍ଗା ନଗରରୁ ଧରାପଡ଼ିଲା ପାକିସ୍ତାନୀ ଗୁପ୍ତଚର
ନନ୍ଦିଘୋଷ ବ୍ୟୁରୋ : ରାଜସ୍ଥାନର ଶ୍ରୀଗଙ୍ଗା ନଗରରୁ ଧରାପଡ଼ିଛି ଜଣେ ପାକିସ୍ତାନୀ ଗୁପ୍ତଚର । ତା ନାଁ ହେଲା ପ୍ରକାଶ ସିଂହ ଓରଫ ବାଦଲ। ରାଜସ୍ଥାନ ସିଆଇଡି ତାକୁ ଗିରଫ କରିଛି। ତାକୁ ଜୟପୁରର ସିନିୟର ସିଭିଲ ଜଜ୍ ଓ ଚିଫ୍ ଜୁଡ଼ିସିଆଲ ମାଜିଷ୍ଟ୍ରେଟଙ୍କ କୋର୍ଟରେ ହାଜର କରାଯାଇଥିଲା। ପ୍ରକାଶ ନାଁରେ ଲାଗିଛି ଦେଶଦ୍ରୋହ ପରି ସଂଗୀନ ମାମଲା। ସେ ଏୟାରଟେଲ୍ ପେମେଣ୍ଟ ବ୍ୟାଙ୍କରେ କାମ କରୁଥିଲା। ସେନା, ଟ୍ୟାଙ୍କ, ଗାଡ଼ି ସଂପର୍କିତ ତଥ୍ୟ ତା ଫୋନରୁ ମିଳିଛି। ଆଉ କେତେକ ଗୁରୁତ୍ଵପୂର୍ଣ୍ଣ ତଥ୍ୟ ମଧ୍ୟ ମିଳିଛି। ପାକିସ୍ତାନକୁ ସେ କେଉଁ ତଥ୍ୟ ଦେଇଛି, ତାର ଖୋଳତାଡ଼ ଚାଲିଛି। ଅଧିକ ପଚରା ଉଚରା ପାଇଁ ସିଆଇଡି ୧୦ ଦିନିଆ ରିମାଣ୍ଡରେ ନେଇଛି । ୧୧ ତାରିଖରେ ରିମାଣ୍ଡ ସରିବ। ସେତେ ଦିନ ଯାଏ ତାକୁ ଘନ ଘନ ଜେରା କରି ତଥ୍ୟ ବାହାର କରିବ ସିଆଇଡି।
ବିରୋଧୀଙ୍କ ଚାପରେ ମୁଣ୍ଡ ନୋଇଁଲେ କେନ୍ଦ୍ର ସରକାର ; ୯ରେ SIR ଆଲୋଚନା
ନନ୍ଦିଘୋଷ ବ୍ୟୁରୋ : ବିରୋଧୀ ଦଳର ଚାପରେ ମୁଣ୍ଡ ନୋଇଁଲେ କେନ୍ଦ୍ର ସରକାର। ଆସନ୍ତା ୯ରେ ଲୋକସଭାରେ ହେବ ଏସଆଇଆର ପ୍ରସଙ୍ଗରେ ଆଲୋଚନା। ଅନୁଷ୍ଠିତ ସର୍ବଦଳୀୟ ବୈଠକରେ ଏନେଇ ହୋଇଛି ନିଷ୍ପତ୍ତି। ଲୋକସଭାରେ ୧୦ ଘଣ୍ଟା ଧରି ଚାଲିବ ଆଲୋଚନା। ହରିଆଣା, ବିହାର ସମେତ ବିଭିନ୍ନ ରାଜ୍ୟରେ ବିଧାନସଭା ନିର୍ବାଚନ ଭୋଟ ଗଡ଼ବଡ଼ି ନେଇ ବିରୋଧୀ ଅଭିଯୋଗ ଆଣୁଛନ୍ତି। ଏସଆଇଆର ପ୍ରସଙ୍ଗରେ ସଂସଦରେ ତୀବ୍ର ହଟ୍ଟଗୋଳ ସୃଷ୍ଟି ହେଉଛି। ଯଦି ବିରୋଧୀ ଦଳ ହଟ୍ଟଗୋଳ ଜାରି ରଖିବେ ତେବେ ଆଲୋଚନା ସମ୍ଭବ ନୁହେଁ ବୋଲି କହିଛନ୍ତି ସରକାର। ସେପଟେ ଆସନ୍ତା ୮ରେ ବନ୍ଦେ ମାତରଂ ସଂଗୀତର ୧୫୦ତମ ବାର୍ଷିକୀ ପାଳନ ପରେ ଏସଆଇଆର ପ୍ରସଙ୍ଗରେ ଆଲୋଚନା ହେବ। ଏହା ସହ ବିଏଲଓ ଆତ୍ମହତ୍ଯା ପ୍ରସଙ୍ଗକୁ ବି ବିରୋଧୀ ଉଠାଇବେ ବୋଲି ସୂଚନା ମିଳିଛି।
୧ରୁ ସଂସଦ ଅଧିବେଶନ ଆରମ୍ଭ ଦିନଠାରୁ ଏସଆଇଆର ପ୍ରସଙ୍ଗରେ ଉଭୟ ଲୋକସଭା ଓ ରାଜ୍ୟସଭାରେ ହଙ୍ଗାମା ଜାରି ରହିଛି। ଏହି ପ୍ରସଙ୍ଗରେ ସରକାରଙ୍କୁ ଘେରିଛନ୍ତି ବିରୋଧୀ। ଆଣ୍ଡାମାନ ନିକୋବର ଦ୍ବୀପପୁଞ୍ଜ, ଛତିଶଗଡ଼, ଗୋଆ, ଗୁଜରାଟ, କେରଳ, ଲାକ୍ଷାଦ୍ବୀପ, ମଧ୍ୟପ୍ରଦେଶ, ପୁଡୁଚେରୀ, ରାଜସ୍ଥାନ, ତାମିଲନାଡୁ, ଉତ୍ତରପ୍ରଦେଶ ଓ ପଶ୍ଚିମବଙ୍ଗରେ ଏସଆଇଆର ପ୍ରକ୍ରିୟା ଜାରି ରହିଛି। ଏହି ପ୍ରକ୍ରିୟାରେ ସ୍ବଚ୍ଛତା ଆଣିବା ସହ ସ୍ବତନ୍ତ୍ର ଆଲୋଚନା ଲାଗି ଦାବି କରିଆସୁଛନ୍ତି ବିରୋଧୀ।
ଇମ୍ରାନଙ୍କୁ ନେଇ ବଡ଼ ଖବର: ଜେଲରେ ଭେଟିଲେ ଭଉଣୀ, କହିଲେ- ସୁସ୍ଥ ଅଛନ୍ତି
ଇମ୍ରାନଙ୍କୁ ନେଇ ବଡ଼ ଖବର: ଜେଲରେ ଭେଟିଲେ ଭଉଣୀ, କହିଲେ- ସୁସ୍ଥ ଅଛନ୍ତି
ନନ୍ଦିଘୋଷ ବ୍ୟୁରୋ: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ନେଇ ଆସିଛି ବଡ଼ ଖବର । ଆଦିୟାଲା ଜେଲରେ ଇମ୍ରାନ ସୁସ୍ଥ ଥିବା ଜଣାପଡିଛି । ଜେଲରେ ତାଙ୍କୁ ଆଜି ଭଉଣୀ ଉଜମା ଭେଟିବା ପରେ ଏହା କହିଛନ୍ତି । ତେବେ ତାଙ୍କୁ ଜେଲରେ ମାନସିକ ସ୍ତରରେ ନିର୍ଯାତନା ଦିଆଯାଉଥିବା ସେ କହିଛନ୍ତି । ଏହାସହ ପାକିସ୍ତାନ ସେନା ମୁଖ୍ୟ ଅସୀମ ମୁନିରଙ୍କ ନିର୍ଦ୍ଦେଶରେ ତାଙ୍କୁ ନିର୍ଯାତନା ଦିଆଯାଉଥିବା ସେ ଅଭିଯୋଗ କରିଛନ୍ତି ।
ସୂଚନାଯୋଗ୍ୟ, ଜେଲରେ ଇମ୍ରାନଙ୍କୁ ହତ୍ୟା କରାଯାଇଥିବା ନେଇ ଆଫଗାନିସ୍ତାନ ମିଡ଼ିଆ ଦାବି କରିବା ପରେ ପାକିସ୍ତାନରେ ଭୟଙ୍କର ପରିସ୍ଥିତି ସୃଷ୍ଟି ହୋଇଥିଲା । ସାରା ବିଶ୍ବର ନଜର ପାକିସ୍ତାନ ଉପରେ ଥିଲା । ଇମ୍ରାନଙ୍କ ସମର୍ଥକ ତଥା ପିଟିଆଇ ସଦସ୍ୟମାନେ ରାସ୍ତାକୁ ଓହ୍ଲାଇ ଥିଲେ । ସେମାନଙ୍କ ସହ ଇମ୍ରାନଙ୍କ ତିନି ଭଉଣୀ ମଧ୍ୟ ସାମିଲ ହୋଇଥିଲେ । ଆଦିୟାଲା ଜେଲ ଆଗରେ ଇମ୍ରାନଙ୍କୁ ଭେଟିବା ଦାବିରେ ଆନ୍ଦୋଳନ ବେଳେ ତାଙ୍କ ଉଭଣୀ ଓ ସମର୍ଥକ ଆକ୍ରମଣର ବି ଶିକାର ହୋଇଥିଲେ । ଏପରିକି ବିଦେଶରେ ଥିବା ଇମ୍ରାନଙ୍କ ସାନ ପୁଅ ବାପା ଜୀବିତ ଥିବାର ପ୍ରମାଣ ମାଗିବା ସହ ଅନ୍ୟ ଦେଶର ରାଷ୍ଟ୍ରନେତାଙ୍କୁ ଏଥିରେ ହସ୍ତକ୍ଷେପ ପାଇଁ ଅନୁରୋଧ କରିଥିଲେ ।
ଇମ୍ରାନଙ୍କ ସ୍ବାସ୍ଥ୍ୟ ଠିକ୍ ଅଛି
ଜେଲରେ ଉଜମା ଇମ୍ରାନଙ୍କୁ ଭେଟିବା ସହ ତାଙ୍କ ସହ ପ୍ରାୟ ୨୦ ମିନିଟ କଥା ହୋଇଥିଲେ । ଏହାପରେ ସେ ବାହାରକୁ ଆସି ଇମ୍ରାନଙ୍କୁ ନେଇ ସୂଚନା ଦେଇଥିଲେ । ସେ କହିଥିଲେ, ଇମ୍ରାନଙ୍କ ସ୍ବାସ୍ଥ୍ୟ ଠିକ୍ ଅଛି । ହେଲେ ତାଙ୍କୁ ଏକୁଟିଆ ରଖାଯାଇଛି । ଜେଲରେ ତାଙ୍କୁ ମାନସିକ ସ୍ତରରେ ହଇରାଣ କରାଯାଉଛି । ସୂଚନାଯୋଗ୍ୟ, ଶେଷ ଥର ଇମ୍ରାନଙ୍କୁ ନେଇ ୪ ନଭେମ୍ବରରେ ସୂଚନା ଆସିଥିଲା । ସେତେବେଳେ ତାଙ୍କୁ ତାଙ୍କ ଭଉଣୀ ଅଲିମା ଭେଟିଥିଲେ । ଏହାପରେ ତାଙ୍କ ସ୍ବାସ୍ଥ୍ୟକୁ ନେଇ ନାନା କଥା ଶୁଣିବାକୁ ମିଳୁଥିଲା ।
ମାନସିକ ନିର୍ଯାତନା ଦିଆଯାଉଛି
ଉଜମା କହିଛନ୍ତି, ଇମ୍ରାନ ବହୁତ ରାଗରେ ଥିଲେ । ତାଙ୍କୁ ଜେଲରେ ମାନସିକ ନିର୍ଯାତନା ଦିଆଯାଉଛି । ପୂରା ଦିନ ଗୋଟିଏ କୋଠରୀରେ ତାଙ୍କୁ ବନ୍ଦ କରି ରଖାଯାଉଛି । ତାଙ୍କ ସହ କାହାରିଙ୍କୁ କଥା ହେବାକୁ ଦିଆଯାଉନି । ଏ ସବୁ ସେନା ମୁଖ୍ୟ ମୁନିର ନିର୍ଦ୍ଦେଶରେ ହେଉଥିବା ସେ ଅଭିଯୋଗ କରିଛନ୍ତି ।
ରୋଗୀଙ୍କ ଜୀବନ ସହିତ ଖେଳ , ଔଷଧ ନାଁରେ ବିକ୍ରି ହେଉଛି ବିଷ !
ନନ୍ଦିଘୋଷ ବ୍ୟୁରୋ : ଔଷଧ ନାଁରେ ଆପଣ ବିଷ ଖାଉ ନାହାନ୍ତି ତ। ରୋଗ ବଇରାଗ ଭଲ ହେବ ବୋଲି ଆଶା କରି ଯେଉଁ ଔଷଧ ଖାଉଛନ୍ତି ତାହା ଅସଲି ଔଷଧ ନୁହେଁ, ତାହା ହେଉଛି ପୁରା ନକଲି। ସେଥିରେ ଦେହ କଣ ଭଲ ହେବ, ବରଂ ଆହୁରି ଖରାପ ହୋଇପାରେ। କାରଣ ମାର୍କେଟରେ ମିଳିଛି ଏପରି ନକଲି ଔଷଧ। ବିଧାନସଭାରୁ ମିଳିଛି ଏହି ସାଂଘାତିକ ତଥ୍ୟ। ବିଜେଡି ବିଧାୟକ ରଣେନ୍ଦ୍ର ପ୍ରତାପ ସ୍ଵାଇଁଙ୍କ ପ୍ରଶ୍ନରେ ସ୍ଵାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ଦେଇଛନ୍ତି ଏହି ଲିଖିତ ଉତ୍ତର, ଯାହା ସମସ୍ତଙ୍କ ହୋସ୍ ଉଡ଼ାଇ ଦେଇଛି। ପେଣ୍ଟାପ୍ରାଜଲ୍, ଲିଭୋ ସେଟ୍ରିଜିନ, ଟେଲମାଷ୍ଟ୍ରିନ, ପାରାସିଟାମଲ ପରି ୮୦ଟି ନକଲି ଔଷଧ ମାର୍କେଟରୁ ମିଳିଥିବା ବେଳେ ୪ ବର୍ଷରେ ଚିହ୍ନଟ ହୋଇଛି ୧୬୮ ନକଲି ମେଡିସିନ। କେବଳ ସେତିକି ନୁହେଁ, ୩୮୮ ଟି ନିମ୍ନମାନର ମେଡିସିନ ମଧ୍ୟ ଚିହ୍ନଟ ହୋଇଛି। ୪ ବର୍ଷରେ ଅଢେଇ କୋଟିରୁ ଅଧିକ ଟଙ୍କାର ନକଲି ଔଷଧ ଜବତ ହୋଇଛି। ଏହାକୁ ନେଇ ବିଧାନସଭାରେ ଉଦବେଗ ପ୍ରକାଶ ପାଇଛି। ବିଜେଡି ଓ କଂଗ୍ରେସ ରାଜ୍ୟ ସରକାରଙ୍କୁ କଡ଼ା ସମାଲୋଚନା କରିଥିବା ବେଳେ ସ୍ଵାସ୍ଥ୍ୟମନ୍ତ୍ରୀ କହିଛନ୍ତି, ନକଲି ମେଡିସିନ ବିକ୍ରିର ଖୋଳତାଡ଼ ହେଉଛି।
ବଜାରରେ ନକଲି ମେଡିସିନ ବିକ୍ରି ନେଇ ସ୍ଵାସ୍ଥ୍ୟ ବିଶେଷଜ୍ଞ ବି ଉଦବେଗ ପ୍ରକାଶ କରିଛନ୍ତି। ସେମାନେ ସତର୍କ କରାଇ ଦେଇଛନ୍ତି ନକଲି ଓ ନିମ୍ନମାନର ମେଡିସିନ ଖାଇଲେ ଦେହ ଭଲ ହେବା ବଦଳରେ ଅଧିକ ଖରାପ ହେବ। ଏହାକୁ ରୋକିବାକୁ ବ୍ୟାପକ ସଚେତନତା ସହିତ କଡ଼ା ଆଇନ ଆଣିବାର ଆବଶ୍ୟକତା ରହିଛି। ପ୍ରସ୍ତୁତକର୍ତ୍ତାଙ୍କଠାରୁ ଆରମ୍ଭ କରି ଷ୍ଟକିଷ୍ଟ, ରିଟେଲର, ସବୁଠି ଚଢାଉ ହେବା ଦରକାର। କଡ଼ା କାର୍ଯ୍ୟାନୁଷ୍ଠାନ ହେଲେ ଡର ପଶିବ। ଭେଷଜ ନିୟନ୍ତ୍ରକ ମାମିନା ପଟ୍ଟନାୟକ କହିଛନ୍ତି, ନକଲି ମେଡିସିନ କାରବାରକୁ ରୋକିବାକୁ ଲଗାତର ଚଢାଉ ହେଉଛି।
ତଥ୍ୟ ଅନୁସାରେ କୋଭିଡ ସମୟରେ ସର୍ବାଧିକ ନକଲି ମେଡିସିନ କାରବାର ଚାଲିଥିଲା। ନିକଟରେ କଟକରୁ ଜବତ ହୋଇଥିବା ନକଲି ମେଡିସିନର ଚେର ବାହାରିଥିଲା ହିମାଚଳ ପ୍ରଦେଶରୁ। ଏବେ ପୁଣି ଅନଲାଇନରେ ବି ମେଡିସିନ କାରବାର ବଢିଛି। ଏଥିପାଇଁ ନକଲି ମେଡିସିନ ମାର୍କେଟରେ ପଶିବା ସହଜ ହୋଇଛି। ଅନଲାଇନରେ ଅଧିକ ରିହାତି ମିଳୁଥିବାରୁ ଲୋଭରେ ଲୋକେ ଅନଲାଇନକୁ ପସନ୍ଦ କରୁଛନ୍ତି। ଏହା ବି ନକଲି ମେଡିସିନ କାରବାର ଏକ କାରଣ ବୋଲି କୁହାଯାଉଛି।
ବଦଳିବ ନାଁ: ପିଏମଓ ହେବ ‘ସେବା ତୀର୍ଥ’ ଓ ରାଜଭବନ ହେବ ‘ଲୋକ ଭବନ’
ବଦଳିବ ନାଁ: ପିଏମଓ ହେବ ‘ସେବା ତୀର୍ଥ’ ଓ ରାଜଭବନ ହେବ ‘ଲୋକ ଭବନ’
ନନ୍ଦିଘୋଷ ବ୍ୟୁରୋ: ମୋଦି ସରକାର ପ୍ରଶାସନିକ ଅନୁଷ୍ଠାନକୁ ନୂଆ ପରିଚୟ ଦେବାରେ ଲାଗିଛନ୍ତି । ଆଉ ଏହାର ମୁଖ୍ୟ ଉଦ୍ଦେଶ୍ୟ କ୍ଷମତା ବଦଳରେ ସେବା ଓ ଅଧିକାର ବଦଳରେ ଦାୟିତ୍ବକୁ ଗୁରୁତ୍ବ ଦିଆଯିବା । ଏହି କ୍ରମରେ ସେଣ୍ଟ୍ରାଲ ଓ୍ବେଷ୍ଟା ପ୍ରୋଜେକ୍ଟରେ ନିର୍ମାଣ ହେଉଥିବା ନୂଆ ପିଏମ୍ କାର୍ଯ୍ୟାଳୟର ନାଁ ‘ସେବା ତୀର୍ଥ’ ରଖାଯାଇଛି । ସେହିପରି ରାଜଭବନର ନାଁ ବି ବଦଳା ଯାଇଛି । ଏବେ ରାଜଭବନ ଲୋକ ଭବନ ନାଁରେ ପରିଚିତ ହେବ । ଏହିପରି ଦେଶରେ ସରକାରୀ ସଂସ୍ଥାରେ ବ୍ୟାପକ ପରିବର୍ତ୍ତନ କରାଯାଉଛି । ଏବେ ପ୍ରତି ନାଁ, ପ୍ରତି ବିଲ୍ଡିଂ ଓ ପ୍ରତିଟି ଚିହ୍ନ ଏକ ନୂଆ ଧାରଣା ସୃଷ୍ଟି କରୁଛି । ଏହା ପୂର୍ବରୁ ରାଜପଥର ନାଁ ବଦଳା ଯାଇ କର୍ତ୍ତବ୍ୟ ପଥ କରାଯାଇଥିଲା । ଏହା ଦର୍ଶାଉଛି, ସରକାର ଶାସନ ପାଇଁ ନୁହେଁ ସେବା ପାଇଁ ରହିଥାଏ ।
ଲୋକ କଲ୍ୟାଣକୁ ପ୍ରତିଫଳିତ କରୁଛି ନାଁ
ଗୋଟିଏ ଲ୍ୟାଣ୍ଡମାର୍କ ସଡ଼କ ଏବେ ଗୋଟିଏ ମେସେଜ ଦେଉଛି । ଏହା ଦର୍ଶାଉଛି, କ୍ଷମତା କୌଣସି ଅଧିକାର ନୁହେଁ, ଏହା ଏକ କର୍ତ୍ତବ୍ୟ । ପ୍ରଧାନମନ୍ତ୍ରୀଙ୍କ ଅଫିସିଆଲ ଘରର ନାଁ ୨୦୧୬ରେ ଲୋକ କଲ୍ୟାଣ ମାର୍ଗ ରଖା ଯାଇଥିଲା । ଏହା ଏମିତି ଏକ ନାଁ ଯାହା ଲୋକ କଲ୍ୟାଣକୁ ଦର୍ଶାଉଛି ।
ଆଦର୍ଶଗତ ପରିବର୍ତ୍ତନକୁ ଦର୍ଶାଉଛି
ଏପରି ନାଁ ପରିବର୍ତ୍ତନ ସେବା ଭାବନାକୁ ଦର୍ଶାଇବା ପରି କରାଯାଇଛି । ଯାହା ରାଷ୍ଟ୍ର ପ୍ରଥମେକୁ ପ୍ରାଥମିକତା ଦେଉଛି । ସେଣ୍ଟ୍ରାଲ ସେକ୍ରେଟେରିଏଟ ନାଁ କର୍ତ୍ତବ୍ୟ ଭବନ କରାଯାଇଛି । ଏହା ଏକ ବଡ଼ ଆଡମିନଷ୍ଟ୍ରେଟିଭ ହବ ହୋଇଥିବା ବେଳେ ଏହି ଧାରଣା ସୃଷ୍ଟି କରୁଛି ପବ୍ଲିକ ସର୍ଭିସ ଏକ କମିଟମେଣ୍ଟ ଅଟେ । ଏହା ଆଦର୍ଶଗତ ପରିବର୍ତ୍ତନକୁ ଦର୍ଶାଉଛି । ଭାରତର ଲୋକତନ୍ତ୍ର କ୍ଷମତା ବଦଳରେ ଦାୟିତ୍ବ ଓ ଷ୍ଟାଟସ ବଦଳରେ ସେବାକୁ ପ୍ରତିଫଳିତ କରୁଛି । ଆଉ ନାଁରେ ଏକରି ପରିବର୍ତ୍ତନ ଲୋକଙ୍କ ଭାବନାରେ ବି ପରିବର୍ତ୍ତନ ଆଣିବ ।