କଟକ: ବିଶିଷ୍ଟ ସାହିତ୍ୟିକ ହୁସେନ ରବି ଗାନ୍ଧୀଙ୍କ ପରଲୋକ। କଟକ ଏସିସିବି ମେଡିକାଲରେ ଚିକିତ୍ସାଧୀନ ଅବସ୍ଥାରେ ତାଙ୍କର ପରଲୋକ ହୋଇଛି । ସେ ମେରୁଦଣ୍ଡଜନିତ ରୋଗରେ ପୀଡ଼ିତ ଥିଲେ। କିଛି ଦିନ ହେଲା ଆଇସିୟୁରେ ରହି ଚିକିତ୍ସା ହେଉଥିଲେ ହୁସେନ ରବି ଗାନ୍ଧୀ । ସେ ପୂର୍ବରୁ ଓଡ଼ିଶା ସାହିତ୍ୟ ଏକାଡେମୀର ସଭାପତି ଓ ଉତ୍କଳ ପ୍ରସଙ୍ଗର ସମ୍ପାଦକ ଥିଲେ । ପ୍ରଗତିଶୀଳ ଓ ଜନବାଦୀ କବି ଭାବେ ପରିଚିତ ଥିଲେ ହୁସେନ ରବି ଗାନ୍ଧି । ସେ ଏକାଧିକ ପତ୍ରିକାର ସମ୍ପାଦନା କରିଥିଲେ । ଯାଜପୁର ଜିଲ୍ଲାର କୋରେଇରେ ଜନ୍ମଗ୍ରହଣ କରିଥିବା ହୁସେନ ରବି ଗାନ୍ଧୀ ଛାତ୍ର ଜୀବନରୁ ରାଜନୀତିରେ ସକ୍ରିୟ ଥିଲେ । ପରବର୍ତ୍ତୀ ସମୟରେ ସେ ବିଜେଡିରେ ଯୋଗଦେଇଥିଲେ । ତାଙ୍କ ବିୟୋଗରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶୋକ ପ୍ରକାଶ କରିଛନ୍ତି । ହୁସେନ ରବି ଗାନ୍ଧି ବିଜୁ ବାବୁଙ୍କ ସହ ଜଡ଼ିତ ଥିଲେ ଓ ବିଜୁ ଜନତା ଦଳ ସହ ତାଙ୍କର ସମ୍ପୃକ୍ତି ରହିଥିଲା । ଦଳରେ ରହି ଦଳକୁ ମଜବୁତ କରିବା ସହ ବିଜୁ ବାବୁଙ୍କ ମୁଲ୍ୟବୋଧ ଓ ବିଜେଡିର ଲକ୍ଷ୍ୟକୁ ଆଗକୁ ନେବାରେ ସାହାଯ୍ୟ କରିଥିଲେ । ତାଙ୍କର ବିୟୋଗ ରଜ୍ୟ ପାଇଁ ଏକ ଅପୂରଣୀୟ କ୍ଷତି ବୋଲି କହିଛନ୍ତି ମୁଖ୍ୟମନ୍ତ୍ରୀ । ହୁସେନଙ୍କ ଆତ୍ମାର ସଦଗତି ସହ ଶୋକାକୁଳ ପରିବାର ବର୍ଗଙ୍କୁ ସମବେଦନା ଜଣାଇଛନ୍ତି ମୁଖ୍ୟମନ୍ତ୍ରୀ ।
ବିଦ୍ୟାଳୟରେ ମ୍ୟୁଜିକ ଚେୟାର ଖେଳ ସମୟରେ ଅଘଟଣ, ୨୫ ଛାତ୍ରୀ ଗୁରୁତର
ବାଲେଶ୍ବର: ବାଲେଶ୍ବର ଜିଲ୍ଲା ସୋର ବରଖୁଡ଼ି ଏମ୍ଇ ସ୍କୁଲରେ ଅଘଟଣ। ସ୍କୁଲରେ ମ୍ୟୁଜିକ ଚେୟାର ଖେଳ ବେଳେ ୨୫ ଛାତ୍ରୀ ଗୁରୁତର ହୋଇଥିବା ସୂଚନା ମିଳିଛି l ଛାତ୍ରୀମାନେ ନିଃଶ୍ୱାସ ପ୍ରଶ୍ବାସ ନେବାରେ ଯନ୍ତ୍ରଣା ଅନୁଭବ କରିବାରୁ ସମସ୍ତଙ୍କୁ ସୋର ଡାକ୍ତରଖାନରେ ଭର୍ତ୍ତି କରାଯାଇଛି । ଅତି ଗୁରୁତର ଜଣେ ଛାତ୍ରୀଙ୍କୁ ବାଲେଶ୍ବର ସ୍ଥାନାନ୍ତର କରାଯାଇଛି। ଅଧିକାଂଶ ଛାତ୍ରୀଙ୍କୁ ଅକ୍ସିଜେନ ଦିଆଯାଇଛି ବାଲେଶ୍ବର ଜିଲ୍ଲା ସୋର ବରଖୁଡ଼ି ଏମ୍ଇ ସ୍କୁଲରେ ମ୍ୟୁଜିକ ଚେୟାର ଖେଳ ବେଳେ ୨୫ ଛାତ୍ରୀ ଗୁରୁତର ହୋଇଥିଲେ l
ଦିଲ୍ଲୀ ଦରବାରରେ ଓଡିଶା ସ୍ବାର୍ଥ ସମ୍ୱଳିତ ଦାବି ହେବ ଜୋରଦାର
ଭୁବନେଶ୍ବର: ରାଜ୍ୟବାସୀଙ୍କ ସ୍ବାର୍ଥ ରକ୍ଷା ପାଇଁ ଦିଲ୍ଲୀରେ ଦାବି ଜୋରଦାର କରିବ ବିଜେଡି। ବିଜେଡି ସଂସଦୀୟ ଦଳ ବୈଠକରେ ସାଂସଦଙ୍କୁ ଏନେଇ ଗୁରୁମନ୍ତ୍ର ଦେଇଛନ୍ତି ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ସଂସଦର ଉଭୟ ଗୃହରେ ବିଜେଡି ରାଜ୍ୟ ସ୍ବାର୍ଥ ସମ୍ପର୍କିତ ପ୍ରସଙ୍ଗଗୁଡିକୁ ପ୍ରଭାବୀ ଢଙ୍ଗରେ ଉପସ୍ଥାପନ କରିବ। ବିଭିନ୍ନ ସମୟରେ ବିଜେପି ନେତାମାନେ କରୁଥିବା ଅପପ୍ରଚାରକୁ କିପରି ରୋକାଯିବ ତା ଉପରେ ଗୁରୁତ୍ବ ଦେଇଛନ୍ତି ମୁଖ୍ୟମନ୍ତ୍ରୀ । କାରଣ ବିଜେପିର ଅପପ୍ରଚାର ଯୋଗୁଁ ରାଜ୍ୟବାସୀଙ୍କ ସ୍ବାର୍ଥ ହାସଲ ହୋଇପାରୁନି ଓ ଗରିବଗୁରୁବା ଲୋକ ପ୍ରଭାବିତ ହେଉଛନ୍ତି । ବଳକା ଉଷୁନା ଚାଉଳ ପ୍ରସଙ୍ଗ ଠାରୁ ଆରମ୍ଭ କରି ମହିଳା ସଂରକ୍ଷଣ ବିଲ୍କୁ ପାସ କରିବା ପାଇଁ ଦିଲ୍ଲୀରେ ସ୍ବର ସଶକ୍ତ କରିବେ ବିଜେଡି ସାଂସଦ ।
ଅହିଂସାକୁ ସମ୍ବିଧାନର ମୁଖବନ୍ଧରେ ସାମିଲ କରିବା ପାଇଁ ନବୀନ କରୁଥିବା ଦାବିକୁ ଆହୁରି ଜୋରଦାର କରାଯିବ । ସେହିଭଳି ୧୬୯ ଜନଜାତିଙ୍କୁ ତାଲିକାଭୁକ୍ତ କରିବାକୁ ଦାବି ଜୋରଦାର କରାଯିବ। ରେଳବାଇରେ ଓଡ଼ିଶାକୁ ନ୍ୟାୟ ମିଳୁନଥିବାରୁ ସଂସଦର ଉଭୟ ଗୃହରେ ବିଜେଡି ସାଂସଦମାନେ ଏହାର ପ୍ରତିବାଦ କରିବେ । ଆବାସ ଯୋଜନାରେ ଅନ୍ୟାୟ ଭାବେ ୪ଲକ୍ଷ ହିତାଧିକାରୀ ନାମ ତାଲିକାକୁ କେନ୍ଦ୍ର କାଟିଦେଇଛି । ଓଡିଶାର ଆହୁରି ୧୫ ଲକ୍ଷ ଯୋଗ୍ୟ ହିତାଧିକାରୀ ଆବାସ ଯୋଜନାରେ ସାମିଲ ହେବାର ଆବଶ୍ୟକତା ରହିଛି । ସଂସଦରେ ଏନେଇ କେନ୍ଦ୍ରର ଦୃଷ୍ଟି ଆକର୍ଷଣ କରିବେ ବିଜେଡି ସାସଂଦ । ରାଷ୍ଟ୍ରୀୟ ରାଜମାର୍ଗ ଓ ଟେଲିକମ ନେଟୱାର୍କ କ୍ଷେତ୍ରରେ ମଧ୍ୟ ଅବହେଳିତ ହେଉଛି ଓଡ଼ିଶା । ଦୀର୍ଘ ବର୍ଷ ଧରି ଓଡ଼ିଶାକୁ ସ୍ବତନ୍ତ୍ର ରାଜ୍ୟ ମାନ୍ୟତା ପାଇଁ ହେଉଥିବା ଦାବିକୁ ଅଣଦେଖା କରୁଛି କେନ୍ଦ୍ର । ରାଜ୍ୟକୁ ମିଳୁନି ପର୍ଯ୍ୟାପ୍ତ କେନ୍ଦ୍ରୀୟ ଅନୁଦାନ । ସମ୍ବିଧାନର ଅଷ୍ଟମ ଅନୁଚ୍ଛେଦରେ ସ୍ଥାନ ପାଉନଥିବା ଭୂମିଜ ଭାଷାକୁ ସାମିଲ କରିବା ପାଇଁ ହେଉଥିବା ଦାବିକୁ ମଧ୍ୟ କର୍ଣ୍ଣପାତ କରୁନି କେନ୍ଦ୍ର ।
ସ୍କୁଲ ଛାତ୍ରୀ ଦେଲେ କନ୍ୟା ସନ୍ତାନ ଜନ୍ମ
କେନ୍ଦୁଝର: ଅନୁସୂଚିତ ଜନଜାତି ବିଦ୍ୟାଳୟର ଛାତ୍ରୀ ଦେଲେ କନ୍ୟା ସନ୍ତାନ ଜନ୍ମ । କେନ୍ଦୁଝର ସଦର ଥାନା ଅଞ୍ଚଳରେ ଥିବା ଏକ ଅନୁସୂଚିତ ଜନଜାତି ବିଦ୍ୟାଳୟର ଜଣେ ଛାତ୍ରୀ କନ୍ୟା ସନ୍ତାନ ଜନ୍ମ ଦେଇଛନ୍ତି । ଏନେଇ ଛାତ୍ରୀଙ୍କ ମାଆ କେନ୍ଦୁଝର ଥାନାରେ ଏତଲା ଦେବା ପରେ ଗାଁର ଜଣେ ଯୁବକକୁ ଅଟକ ରଖି ପଚରାଉଚରା କରୁଛି ପୋଲିସ ।
ଛାତ୍ରୀ ଜଣକ ଗର୍ଭବତୀ ଥିବା ବିଦ୍ୟାଳୟ କର୍ତ୍ତୃପକ୍ଷ କିପରି ଜାଣି ପାରିଲେ ନାହିଁ, ତାହା ପ୍ରଶ୍ନବାଚୀ ସୃଷ୍ଟି କରିଛି । ଜାନୁଆରୀ ୧୨ ତାରିଖରୁ ଛାତ୍ରୀ ଜଣଙ୍କ ବିଦ୍ୟାଳୟରୁ ଘରକୁ ଯାଇ ଆଉ ଫେରିନଥିଲେ । ଜାନୁଆରୀ ୨୫ ତାରିଖରେ ସେ ଏକ କନ୍ୟା ସନ୍ତାନ ଜନ୍ମ ଦେଇଥିବା ବେଳେ ନବଜାତର ଅବସ୍ଥା ସଙ୍କଟାପନ୍ନ ଥିବାରୁ ଏସଏନସିୟୁରେ ଭର୍ତ୍ତି କରାଯାଇଛି । ଏନେଇ ଟାଉନ ଥାନା ପୋଲିସ ତଦନ୍ତ ଜାରି ରଖିଛନ୍ତି ।
ପୁରୀରେ ମୁଖ୍ୟ ଶାସନ ସଚିବ, ଶ୍ରୀକ୍ଷେତ୍ରରେ ବିକାଶମୂଳକ କାର୍ଯ୍ୟର ସମୀକ୍ଷା
ପୁରୀ: ପୁରୀରେ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର । ସରକାରଙ୍କ ବିଭିନ୍ନ ଉନ୍ନତିମୂଳକ ଯୋଜନାରେ କରାଯାଉଥିବା ପ୍ରକଳ୍ପ କାର୍ଯ୍ୟ ବୁଲି ମୁଖ୍ୟ ଶାସନ ସଚିବ ସମୀକ୍ଷା କରିଛନ୍ତି । ପ୍ରଥମେ ସ୍ୱର୍ଗଦ୍ୱାରରେ ପହଞ୍ଚି ଉନ୍ନୟନ କାମର ସମୀକ୍ଷା କରିଥିଲେ । ତେବେ କାର୍ଯ୍ୟ କେତେ ବାଟ ଆଗକୁ ଯାଇଛି, ଜିଲ୍ଲା ପ୍ରଶାସନଠୁ ନେଲେ ଅପଡେଟ୍ । ଶବ ସତ୍କାର ବ୍ୟବସ୍ଥା ସମ୍ପର୍କରେ ଅନୁଧ୍ୟାନ କରିବା ସହ ଅନ୍ୟାନ୍ୟ ବ୍ୟବସ୍ଥା ସମ୍ପର୍କରେ ପଚାରି ବୁଝିଥିଲେ ମୁଖ୍ୟ ଶାସନ ସଚିବ । ପରେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ କାର୍ଯ୍ୟ ବୁଲି ସମୀକ୍ଷା କରୁଛନ୍ତି ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ।
ବିଜେପି ସଂଗଠନ ଏବେ ଭାଗଭାଗ: ଜୟଦେବ ଜେନା
ଭୁବନେଶ୍ବର: ବି.ଆର.ଏସ.ରେ ଓଡ଼ିଶା ନେତା ମିଶିବା ନେଇ ପିସିସିର ପୂର୍ବତନ ସଭାପତି ଜୟଦେବ ଜେନା ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, ଓଡ଼ିଶାରେ ପୂର୍ବରୁ ବହୁ ଦଳ ଏପରି ଚେଷ୍ଟା କରିଛନ୍ତି । କିନ୍ତୁ କୌଣସି ପ୍ରଭାବ ପଡ଼ିନାହିଁ l ସେହିପରି ବିଜେପି ଉପରେ ବର୍ଷିଛନ୍ତି ଜୟଦେବ l ସେ କହିଛନ୍ତି, ବିଜେପି ସଂଗଠନ ଏବେ ଭାଗଭାଗ l ରାଜ୍ୟ ବିଜେପିର ୪- ୫ ଜଣ ନେତା ମାନସିକସ୍ତରରେ ଏକାଠି ନାହାନ୍ତି କି ଏକାଠି ହୋଇପାରିବେନି l ୨୦୧୯ରେ ବିଜେପି ଅର୍ଥ ଓ ବିଭିନ୍ନ ଲୋଭ ଦେଖାଇ କଂଗ୍ରେସର କିଛି ନେତାଙ୍କୁ ନେଇଥିଲା l ସେମାନଙ୍କୁ ନିର୍ବାଚନରେ ବ୍ୟବହାର କଲା l ଯେଉଁମାନେ ବିଜେଡି କି କଂଗ୍ରେସରେ ମିଶି ପାରୁନାହାନ୍ତି, ସେମାନଙ୍କୁ ବିଜେପି ନେଉଛି l ଗିରିଧର ଗମାଙ୍ଗଙ୍କୁ ବିଜେପି ନିର୍ବାଚନରେ ବ୍ୟବହାର କଲା l ତାପରେ ତାଙ୍କୁ ଅପମାନିତ କଲା l ବିଜେପି ୨୦୧୯ରେ ମିଶନ- ୧୨୦ ନାରା ଦେଇଥିଲା l ଏବେ ତାଙ୍କ ସ୍ଥିତି କ’ଣ ବୋଲି ଜୟଦେବ ଜେନା ପ୍ରଶ୍ନ କରିଛନ୍ତି l କଂଗ୍ରେସରୁ ନେତା ନେଇ ବିଜେପି ସଫଳ ହୋଇପାରିବନି ବୋଲି ପିସିସିର ପୂର୍ବତନ ସଭାପତି ଜୟଦେବ ଜେନା କହିଛନ୍ତି ।
ବାୟୁସେନା ବିମାନ ଦୁର୍ଘଟଣା : ଦୁଇ ପାଇଲଟ୍ ସୁରକ୍ଷିତ, ଜଣଙ୍କ ତଲାସ ଜାରି
ମୋରେନା : ମଧ୍ୟପ୍ରଦେଶର ମୋରେନାରେ ଦୁର୍ଘଟଣାଗ୍ରସ୍ତ ଦୁଇ ବିମାନର ଦୁଇ ଜଣ ପାଇଲଟ ସୁରକ୍ଷିତ ଅଛନ୍ତି । ଅନ୍ୟପକ୍ଷରେ ତୃତୀୟ ପାଇଲଟଙ୍କ ତଲାସ ଜାରି ରହିଛି ।
ସୂଚନାଯୋଗ୍ୟ ଯେ, ମୋରେନା ଜିଲ୍ଲାରେ ବାୟୁସେନାର ସୁଖୋଇ-୩୦ ଓ ମିରାଜ-୨୦୦୦ ବିମାନ ଶନିବାର ସକାଳେ କ୍ରାସ୍ ହୋଇଥିଲା । କୁହାଯାଉଛି ଯେ, ଅଭ୍ୟାସ ସମୟରେ ଦୁଇ ବିମାନ ମଧ୍ୟରେ ଧକ୍କା ହୋଇଥିଲା । ଦୁର୍ଘଟଣା ପରେ ବିମାନର ପାଇଲଟ୍ ମାନେ ବାହାରି ଯାଇଥିଲେ। ସୁଖୋଇରେ ଦୁଇ ଜଣ ପାଇଲଟ୍ ଥିବା ବେଳେ ମିରାଜରେ ଜଣେ ପାଇଲଟ୍ ଥିଲେ । ସୁଖୋଇର ଦୁଇ ପାଇଲଟ୍ ସୁରକ୍ଷିତ ଉଦ୍ଧାର ହୋଇଥିବା ବେଳେ ମିରାଜ୍ ପାଇଲଟଙ୍କ ତଲାସ ଜାରି ରହିଛି ।
ବାୟୁସେନା ହେଲିକପ୍ଟର ତୃତୀୟ ପାଇଲଟଙ୍କ ଲୋକେସନରେ ପହଞ୍ଚିଥିବା ସୂଚନା ମିଳୁଛି । ଗୋଟିଏ ଲଢୁଆ ବିମାନ ମୋରେନା ଜିଲ୍ଲାର ପହାଡଗଡର ବିକାଶଖଣ୍ଡରେ ପଡ଼ିଥିଲା । ପ୍ରତ୍ୟକ୍ଷଦର୍ଶୀଙ୍କ ଅନୁସାରେ ଆକାଶରେ ଥିବା ବେଳେ ବିମାନରେ ନିଆଁ ଲାଗିଯାଇଥିଲା ଓ ଏହା ତୀବ୍ର ବେଗରେ ତଳକୁ ଖସିଥିଲା । ପାଇଲଟ ବିମାନକୁ ଗାଁଠାରୁ ଦୂରକୁ ନେଇ କ୍ରାସ କରିଥିବା କାରଣରୁ ଅନେକ ଜୀବନ ବଞ୍ଚିଯାଇଛି । ବାୟୁସେନା ଦୁର୍ଘଟଣାର କାରଣ ଜାଣିବା ପାଇଁ ତଦନ୍ତ ଆଦେଶ ଦେଇଛି ।
ବିଲରୁ ରାଜମିସ୍ତ୍ରିଙ୍କ ମୃତଦେହ ଉଦ୍ଧାର, ହତ୍ୟା ସନ୍ଦେହ
ସୋର: ରାଜମିସ୍ତ୍ରିଙ୍କୁ ହତ୍ୟା ସନ୍ଦେହ l ବିଲରେ ପଡିଛି ରକ୍ତାକ୍ତ ମୃତଦେହ l ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ବାଲେଶ୍ବର ଜିଲ୍ଲା ସୋର ଖଜିଡିହା ଗାଁରେ । ବିହାରର ରାଜମିସ୍ତ୍ରି ଧୀରେଶ ଜେନା ଖଜିଡିହା ଗାଁରେ ରହି ଆସୁଥିଲେ l ସେହି ଗାଁରେ ରଶ୍ମିତା ଦାସଙ୍କୁ ଭଲ ପାଇ ବିବାହ କରିଥିଲେ l ଗତକାଲି ସନ୍ଧ୍ୟାରେ ଧୀରେଶ ମଦ ପିଇ ଝଗଡ଼ା କରିବାରୁ ତାଙ୍କ ଶ୍ବଶୁର ତାଙ୍କୁ ମାଡ଼ ଦେଇଥିଲେ l ଧୀରେଶ ମାଡ଼ ଖାଇ ଘରୁ ଚାଲି ଯାଇଥିବା ଶ୍ବଶୁର କହିଛନ୍ତି l ସକାଳେ ଘର ନିକଟସ୍ଥ ବିଲରେ ଧୀରେଶଙ୍କ ମୃତଦେହ ପଡ଼ିଥିବା ସ୍ଥାନୀୟ ଲୋକ ଦେଖି ପୋଲିସକୁ ଖବର ଦେଇଥିଲେ l
ସ୍ତ୍ରୀ ସସ୍ମିତା ଏକ ନୂଆ ଖୁଲାସା କରି କହିଛନ୍ତି, ମଧୁଗାଁର ବିଜୁ ବାରିକଙ୍କୁ ଦୁଇ ମାସ ତଳେ ଚାକିରି ପାଇଁ ଟଙ୍କା ଦେବାନେବାକୁ ନେଇ ତାଙ୍କ ସ୍ବାମୀ ଧୀରେଶ ବିଜୁଙ୍କୁ ହତ୍ୟା କରିଥିଲେ । ଯାହା ଲୁକ୍କାୟିତ ହୋଇ ରହିଯାଇଛି l ଧୀରେଶଙ୍କ ମୃତ୍ୟୁ ସହିତ ଏହାର ସଂଯୋଗ ଥାଇପାରେ । ଅନ୍ୟପକ୍ଷରେ ଧୀରେଶଙ୍କର ଶ୍ବଶୁର ଜ୍ବାଇଁକୁ ହତ୍ୟା କରିଥିବା ସନ୍ଦେହ କରାଯାଉଛି । ଏନେଇ ଅଧିକ ତଦନ୍ତ କରୁଛି ପୋଲିସ ।
ମଧ୍ୟପ୍ରଦେଶ ଓ ରାଜସ୍ଥାନରେ ବାୟୁସେନାର ତିନୋଟି ବିମାନ ଦୁର୍ଘଟଣାଗ୍ରସ୍ତ
ବ୍ୟୁରୋ ରିପୋର୍ଟ: ରାଜସ୍ଥାନର ଭରତପୁର ଓ ମଧ୍ୟପ୍ରଦେଶର ମୁରୈନା ନିକଟରେ ଶନିବାର ସକାଳେ ଭାରତୀୟ ବାୟୁସେନାର ଦୁଇଟି ଲଢୁଆ ବିମାନ ଦୁର୍ଘଟଣାଗ୍ରସ୍ତ ହୋଇଛନ୍ତି । ରାଜସ୍ଥାନରେ ସେନାର ଏକ ଛୋଟ ବିମାନ ଦୁର୍ଘଟଣାଗ୍ରସ୍ତ ହୋଇଥିବା ବେଳେ ମଧ୍ୟପ୍ରଦେଶର ମୁରୈନାରେ ମିରାଜ-୨୦୦୦ ଓ ସୁଖୋଇ ୩୦ ଲଢୁଆ ବିମାନ ଦୁର୍ଘଟଣାଗ୍ରସ୍ତ ହୋଇଛି ।ଦୁର୍ଘଟଣାସ୍ଥଳରେ ଉଦ୍ଧାରକାର୍ଯ୍ୟ ଜାରି ରହିଛି । ମଧ୍ୟପ୍ରଦେଶରେ ଦୁର୍ଘଟଣାଗ୍ରସ୍ତ ବିମାନ ଗୋଆଲିଅର ବିମାନଘାଟିରୁ ଉଡିଥିଲେ। କୁହାଯାଉଛି ଯେ, ବିମାନ ଅଭ୍ୟାଶ ଉଡାଣରେ ଥିଲେ ।
ରାଜସ୍ଥାନର ଭରତପୁରରେ ଆକାଶରେ ବିସ୍ଫୋରଣ
ରାଜସ୍ଥାନର ଭରତପୁରରୁ ଆସୁଥିବା ସୂଚନା ଅନୁସାରେ ସେନାର ଏକ ଛୋଟ ବିମାନ ଦୁର୍ଘଟଣାଗ୍ରସ୍ତ ହୋଇଛି । ଏହି ଦୁର୍ଘଟଣା ଭରତପୁରର ଉଚ୍ଚୈନ ଥାନା ଅଂଚଳରେ ହୋଇଛି । ବୈଶୟିକ ତ୍ରୁଟି କାରଣରୁ ଦୁର୍ଘଟଣା ହୋଇଥିବା କୁହାଯାଉଛି । ବିମାନଟି ସେନାର କୁହାଯାଉଥିଲେ ବି ଏପର୍ଯ୍ୟନ୍ତ ଚିତ୍ର ସ୍ପଷ୍ଟ ହୋଇନାହିଁ । କିଛି ଏହାକୁ ବାୟୁସେନା ବିମାନ ବୋଲି ଦାବି କରୁଛନ୍ତି । ବିମାନଟି ଆକାଶରେ ଥିବା ବେଳେ ସେଥିରେ ବିସ୍ଫୋରଣ ହୋଇଥିଲା ।
ବିସ୍ଫୋରଣ ପରେ ବିମାନ ଗାଁ ପାଖରେ ଥିବା ଖାଲି ସ୍ଥାନରେ ଖସି ପଡ଼ିଥିଲା । ବିମାନ ଗାଁ ଉପରେ ପଡିଥିଲେ ମୃତହାତଙ୍କ ସଂଖ୍ୟା ବୃଦ୍ଧି ପାଇବାର ଆଶଙ୍କା ଅଧିକ ଥିଲା । ରିପୋର୍ଟ ଲେଖାଯିବା ପର୍ଯ୍ୟନ୍ତ ବିମାନରେ କେତେଜଣ ଚାଳକ ସଦସ୍ୟ ଥିଲେ ତାହା ଜଣା ପଡ଼ିନାହିଁ ।
ମୋ ହତ୍ୟା ପାଇଁ ଆତଙ୍କବାଦୀ ସୁପାରି ଦିଆଯାଇଛି, ଇମ୍ରାନ ଖାନଙ୍କ ବଡ଼ ଅଭିଯୋଗ
ଇସଲାମାବାଦ: ପାକିସ୍ତାନରେ ଅର୍ଥନୈତିକ ସଙ୍କଟ ଜାରି ରହିଥିବା ବେଳେ ଏବେ ରାଜନୈତିକ ସଙ୍କଟ ନୂଆ ମୋଡ ନେଇଛି । ପୂର୍ବତନ ପାକ୍ ପ୍ରଧାନମନ୍ତ୍ରୀ ଇମ୍ରାନ୍ ଖାନ ରାଷ୍ଟ୍ରପତି ଆସିଫ ଅଲି ଜର୍ଦ୍ଦାରିଙ୍କ ବିରୋଧରେ ଗମ୍ଭୀର ଅଭିଯୋଗ ଆଣିଛନ୍ତି । ଜର୍ଦ୍ଦାରୀ ତାଙ୍କ ହତ୍ୟା ପାଇଁ ଆତଙ୍କବାଦୀଙ୍କୁ ସୁପାରୀ ଦେଇଥିବା ଅଭିଯୋଗ କରିଛନ୍ତି ଇମ୍ରାନ୍ ଖାନ୍ ।
ପାକିସ୍ତାନୀ ଖବରକାଗଜ ଡନରେ ପ୍ରକାଶିତ ଏ ଖବର ଅନୁସାରେ ଇମ୍ରାନ କହିଛନ୍ତି ଯେ, ତାଙ୍କ ହତ୍ୟା ପାଇଁ ପ୍ଲାନ୍ ସି ଚାଲିଛି । ଗତବର୍ଷ ସେ ତାଙ୍କ ହତ୍ୟା ପାଇଁ ୪ ଜଣ ବ୍ୟକ୍ତି ଷଡ଼ଯନ୍ତ୍ର କରୁଥିବା କଥା କହିଥିଲେ । ଯେଉଁମାନଙ୍କ ନାମ ସହିତ ଏକ ରେକର୍ଡିଂ ତାଙ୍କ ପାଖରେ ଅଛି ଓ ତାକୁ ସେ ଖୁବଶୀଘ୍ର ରିଲିଜ୍ କରିବେ ବୋଲି କହିଛନ୍ତି । ସେ କହିଛନ୍ତି ଯେ, ପ୍ରଥମ ଷଡଯନ୍ତ୍ରର ପର୍ଦ୍ଦାଫାସ କରିବା ପରେ ତାଙ୍କ ହତ୍ୟା ଷଡ଼ଯନ୍ତ୍ରର ପ୍ଲାନ୍ ଏ’ ର କାର୍ଯ୍ୟକାରୀ ହୋଇନଥିଲା । ଅନ୍ୟପକ୍ଷରେ ଦ୍ବିତୀୟ ପ୍ରୟାସ ବଜିରାବାଦରେ ହୋଇଥିଲା ।
ଶୁକ୍ରବାର ଦିନ ନିଜ ଘରେ ଏକ ଟିଭି ଚ୍ୟାନେଲକୁ ଦେଇଥିବା ସାକ୍ଷାତକାରରେ ଇମ୍ରାନ ଦାବି କରିଛନ୍ତି ଯେ, ତାଙ୍କ ହତ୍ୟା ପାଇଁ ଜର୍ଦ୍ଦାରୀ ଏଜେନ୍ସି ସମର୍ଥିତ ଏକ ଆତଙ୍କବାଦୀ ସଂଗଠନକୁ ଟଙ୍କା ଦେଇଛନ୍ତି । ତାଙ୍କ ହତ୍ୟା ଷଡ଼ଯନ୍ତ୍ରରେ ସାମିଲ ଥିବା ୪ ଜଣ ବ୍ୟକ୍ତିଙ୍କୁ ଜର୍ଦ୍ଦାରୀଙ୍କ ସମର୍ଥନ ରହିଛି ବୋଲି ସେ ଅଭିଯୋଗ କରିଛନ୍ତି ।