କେନ୍ଦ୍ରାପଡା: ମାଛ ଖାଇବାରୁ ମାଛରଙ୍କା ଚଢେଇକୁ ହତ୍ୟା । ଇନଷ୍ଟଗ୍ରାମରେ ଭାଇରାଲ ହେଲା ଫଟୋ । କେନ୍ଦ୍ରାପଡ଼ା ଜିଲ୍ଲା ରାଜକନିକା ଅଞ୍ଚଳରୁ ଆସିଛି ଏଭଳି ଅଭିଯୋଗ । ତାଳଚୁଆ ପଟାପରିଆ ଗାଁର ଗୁରୁ ଦଳାଇ ରାଜକନିକା ଅଞ୍ଚଳରେ ଚିଙ୍ଗୁଡ଼ି ଘେରିରେ କାମ କରନ୍ତି । ଚିଙ୍ଗୁଡ଼ିକୁ ମାଛରଙ୍କା ପକ୍ଷୀ ଖାଇବାରୁ ଉତକ୍ଷିପ୍ତ ହୋଇ ହତ୍ୟା କରିଛନ୍ତି ଗୁରୁ ଦଳାଇ ।
ଏହାର ଭିଡିଓ ଭାଇରାଲ ହେବା ପରେ ଖବରପାଇ କନିକା ରେଞ୍ଜ ଅଫିସର ଚଢ଼ାଉ କରି ଗୁରୁ ଦଳାଇକୁ ଗିରଫ କରିଛନ୍ତି ।
ଭୁବନେଶ୍ୱର: ମୁଖ୍ୟମନ୍ତ୍ରୀଙ୍କୁ ଭେଟିଲେ ରାଜ୍ୟର ନିଟ୍ ଟପ୍ପର । ପ୍ରଥମ, ଦ୍ବିତୀୟ ଓ ତୃତୀୟ ସ୍ଥାନ ଅଧିକାର କରିଥିବା ନିଟ୍ ଟପ୍ପର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସାକ୍ଷାତ କରିଛନ୍ତି । ଆଜି ନବୀନ ନିବାସ ଯାଇ ଏହି ଛାତ୍ରଛାତ୍ରୀମାନେ ମୁଖ୍ୟମନ୍ତ୍ରୀଙ୍କୁ ସାକ୍ଷାତ କରିଛନ୍ତି । ସ୍ବୟଂଶକ୍ତି ତ୍ରିପାଠୀ ଓଡ଼ିଶାରୁ ଟପ୍ପର ହୋଇଥିବାବେଳେ ସର୍ବଭାରତୀୟ ସ୍ତରରେ ଅଷ୍ଟମ ସ୍ଥାନ ହାସଲ କରିଛନ୍ତି । ସେହିପରି ସୂର୍ଯ୍ୟପ୍ରତାପ ମିଶ୍ର ଓଡ଼ିଶାରୁ ଦ୍ବିତୀୟ ସ୍ଥାନ ହାସଲ କରିଥିବା ବେଳେ, ସର୍ବଭାରତୀୟ ସ୍ତରରେ ୩୫ତମ ରାଙ୍କରେ ହାସଲ କରିଛନ୍ତି । ଏହାସହ ଅଭିପସା ଚୌଧୁରୀ ଓଡ଼ିଶାରୁ ତୃତୀୟ ସ୍ଥାନ ହାସଲ କରିଥିବା ବେଳେ, ସର୍ବଭାରତୀୟ ସ୍ତରରେ ୬୩ ରାଙ୍କ ହାସଲ କରିଛନ୍ତି । ୧୩ ତାରିଖ ଦିନ ପ୍ରକାଶ ପାଇଥିଲା ମେଡିକାଲ ପ୍ରବେଶିକା ପରୀକ୍ଷା ନିଟ-ୟୁଜି ୨୦୨୩ର ରେଜଲ୍ଟ ।
ନୂଆଦିଲ୍ଲୀ: ଦିଲ୍ଲୀ ମୁଖାର୍ଜୀ ନଗର କୋଚିଂ ସେଣ୍ଟରରେ ଭୀଷଣ ଅଗ୍ନିକାଣ୍ଡ । ନିଆଁ ଲିଭା କାର୍ଯ୍ୟରେ ନିୟୋଜିତ ହୋଇଛନ୍ତି ୧୧ଟି ଦମକଳବାହିନୀ । ଘଣ୍ଟାଏ ଧରି ନିଆଁ ଲିଭା କାର୍ଯ୍ୟ ଜାରି ରହିଛି । ରଶି ସାହାଯ୍ୟରେ ପିଲାମାନଙ୍କୁ ବାହାରକୁ ଅଣାଯାଉଛି । ବିଲ୍ଡିଂ ଭିତରେ ଫଶି ରହିଥିବା ପିଲାମାନେ ଜୀବନ ବିକଳରେ ଝରକା ଦେଇ ପିଲାମାନେ ଡେଇଁ ପଡୁଥିବା ଦେଖାଯାଇଛି । କୋଚିଂ ସେଣ୍ଟରର ୪ ଜଣ ଛାତ୍ର ଆହତ ହୋଇଥିବା ସୂଚନା ମିଳିଛି ।
ଭୋପାଳ: ମଧ୍ୟପ୍ରଦେଶରେ ବିଜେପିକୁ ବଡ଼ ଧରଣର ଧକ୍କା । କଂଗ୍ରେସରେ ସାମିଲ ହୋଇଛନ୍ତି ଶିବପୁରୀରେ ବିଜେପି ହେଭିଓ୍ବେଟ ବୈଜନାଥ ସିଂ ଯାଦବ । ୨୦୨୦ରେ ଜ୍ୟୋତିରାଦିତ୍ୟ ସିନ୍ଧିଆଙ୍କ ନେତୃତ୍ବରେ ହୋଇଥିବା ବିଦ୍ରୋହରେ ସାମିଲ ବୈଜନାଥ ସଦଳବଳେ ବିଜେପି ଛାଡ଼ି ପୁଣି କଂଗ୍ରେସରେ ସାମିଲ ହୋଇଛନ୍ତି । ବଡ଼କଥା ହେଉଛି ଶିବପୁରୀରୁ ଭୋପାଳର ଦୂରତା ୩୦୦ କିଲୋମିଟର ହୋଇଥିବାବେଳେ ପ୍ରାୟ ୪୦୦ କାରର ଏକ କାରକେଡରେ ଯାଇ କଂଗ୍ରେସରେ ସାମିଲ ହୋଇଛନ୍ତି ବୈଜନାଥ । ୨୦୨୦ରେ ଜ୍ୟୋତିରାଦିତ୍ୟ ସିନ୍ଧିଆଙ୍କ ନେତୃତ୍ବରେ କଂଗ୍ରେସରେ ହୋଇଥିବା ବିଦ୍ରୋହରେ ବୈଜନାଥ ସାମିଲ ଥିଲେ ଏବଂ ଏହି ବିଦ୍ରୋହ ଯୋଗୁ କମଲନାଥ ସରକାରର ପତନ ଘଟିଥିଲା । ବିଜେପିରେ କୋଣଠେସା ହେବା ପରେ ଶେଷରେ ବୈଜନାଥ ପୁଣି ଘରବାହୁଡା କରିଛନ୍ତି । ଆୟୋଜିତ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ବୈଜନାଥଙ୍କୁ ସ୍ବାଗତ କରିଥିଲେ କମଲନାଥ ଓ ଦିଗବିଜୟ ସିଂ ।
ଓ୍ୱାଶିଂଟନ: ବିଭିନ୍ନ ପ୍ରତିବନ୍ଧକ ସତ୍ତ୍ବେ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରତି ବଢୁଛି ସମର୍ଥନ । ଆସନ୍ତା ୨୦୨୪ରେ ରାଷ୍ଟ୍ରପତି ନିର୍ବାଚନ ଲାଗି ପ୍ରତିଦ୍ବନ୍ଦ୍ବିତା କରିବାକୁ ଯାଉଥିବା ଟ୍ରମ୍ଫ ବର୍ତ୍ତମାନ ସୁଦ୍ଧା ସଂଗ୍ରହ କରିସାରିଲେଣି ୭ ନିୟୁତ ଡଲାରର ପାଣ୍ଠି । ହ୍ବାଇଟ ହାଉସରୁ ଗୁରୁତ୍ବପୂର୍ଣ୍ଣ ନଥି ନେଇଯିବା ସହ ପର୍ଣ୍ଣଷ୍ଟାର ମାମଲାରେ ଅଡୁଆ ପରିସ୍ଥିତିର ସମ୍ମୁଖୀନ ହୋଇଥିବା ଟ୍ରମ୍ଫଙ୍କ ପ୍ରତି ସମର୍ଥନ କ୍ରମଶଃ ବଢ଼ିବା ପରିଲକ୍ଷିତ ହୋଇଛି । ବାଇଡେନ ପ୍ରଶାସନ ପକ୍ଷରୁ ତାଙ୍କୁ ଟାର୍ଗେଟ କରାଯାଉଛି ବୋଲି ଟ୍ରମ୍ଫ ବାରମ୍ବାର ଅଭିଯୋଗ କରିଆସୁଛନ୍ତି । ଗତକାଲି ହ୍ବାଇଟ ହାଉସରୁ ନଥି ନେବା ମାମଲାରେ ତାଙ୍କୁ ମିଆମି କୋର୍ଟ ଜାମିନ ପ୍ରଦାନ କରିଥିବାବେଳେ ତାଙ୍କ ସମର୍ଥନରେ ହଜାର ହଜାର ସମର୍ଥକ ଫେଡେରାଲ କୋର୍ଟ ଆଗରେ ନାରାବାଜି କରିଥିଲେ । ବର୍ତ୍ତମାନ ସୁଦ୍ଧା ଟ୍ରମ୍ଫଙ୍କୁ ମିଳିଥିବା ଫଣ୍ଡ ମଧ୍ୟରେ ରହିଛି ୪.୫ ନିୟୁତ ଡଲାରର ଡିଜିଟାଲ ଅର୍ଥ ଓ ଏକ ଡୋନର ଇଭେଣ୍ଟରୁ ସଂଗୃହୀତ ୨.୧ ନିୟୁତ ଡଲାର । ରାଷ୍ଟ୍ରପତି ନିର୍ବାଚନ ପୂର୍ବରୁ ଟ୍ରମ୍ଫଙ୍କୁ ଏହି ବିପୁଳ ଅର୍ଥ ସହାୟତା ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।
ନୂଆଦିଲ୍ଲୀ: ନାବାଳିକାଙ୍କୁ ଯୌନ ନିର୍ଯାତନା ମାମଲା । କୁସ୍ତିଯୋଦ୍ଧା ସଭାପତି ବ୍ରିଜ ଭୂଷଣ ସିଂଙ୍କ ବିରୋଧରେ ନାହିଁ କୌଣସି ପ୍ରମାଣ । ତାଙ୍କ ବିରୋଧରେ ଦାୟର ପୋକ୍ସୋ ଏଫଆଇଆରକୁ ରଦ୍ଦ କରିବା ଲାଗି ରିପୋର୍ଟ ଦାଖଲ ହୋଇଛି ବୋଲି କହିଛି ଦିଲ୍ଲୀ ପୋଲିସ । ପୋକ୍ସୋ ମାମଲାରେ ଦିଲ୍ଲୀ ପୋଲିସ ପକ୍ଷରୁ ଦାୟର ହୋଇଛି ୫୦୦ ପୃଷ୍ଠା ସମ୍ବଳିତ କ୍ୟାନସିଲେସନ ରିପୋର୍ଟ । ୧୫ ତାରିଖ ସୁଦ୍ଧା ପୋଲିସ ତଦନ୍ତ ସାରି ଚାର୍ଜସିଟ ଦାଖଲ କରାଯିବ ବୋଲି କେନ୍ଦ୍ରମନ୍ତ୍ରୀ ଅନୁରାଗ ଠାକୁର କହିଥିବାବେଳେ ଆଜି ଦିଲ୍ଲୀ ପୋଲିସ ଏହି ବୟାନ ଦେଇଛି । ରେସଲର ସଂଘ ଲାଗି ମୁକ୍ତ ଓ ଅବାଧ ନିର୍ବାଚନ, ବ୍ରିଜ ଭୂଷଣଙ୍କୁ ଗିରଫ ସମେତ ଅନ୍ୟାନ୍ୟ ଦାବି ଆନ୍ଦୋଳନରତ ରେସଲରମାନେ ରଖିଥିଲେ ।
ଭୁବନେଶ୍ୱର: ଜଳୁଛି ରାଜଧାନୀ । ଦିନ ସାଢ଼େ ୧୧ଟା ସୁଦ୍ଧା ୪୧ ଡିଗ୍ରୀ ଛୁଇଁଲା ଭୁବନେଶ୍ବର ତାପମାତ୍ରା । ଦୁଇ ଦିନ ଆଶ୍ବସ୍ତି ପରେ ପୁଣି ପାରା ହାଇ । ଉପକୂଳ ଓଡ଼ିଶାରେ ବି ତାପମାତ୍ରା ଦୃଷ୍ଟାନ୍ତମୂଳକ ବୃଦ୍ଧି ଆଶଙ୍କା ରହିଥିବା କହିଛି ଆଞ୍ଚଳିକ ପାଣିପାଗ କେନ୍ଦ୍ର । ପଶ୍ଚିମ ତଥା ଉତ୍ତର-ପଶ୍ଚିମ ଦିଗରୁ ଶୁଷ୍କ ଉତ୍ତପ୍ତ ବାୟୁ ପ୍ରବାହ ଅଧିକ ସକ୍ରିୟ ଥିବାରୁ ଉପକୂଳ ଓଡ଼ିଶାରେ ତାପମାତ୍ରା ପୁଣି ଥରେ ଉପରମୁହାଁ ହୋଇଛି । ଆଦ୍ରତା ୪୫ ପ୍ରତିଶତ ଥିବାରୁ ଗୁଳୁଗୁଳି ଜୋର ହେବ ବୋଲି ସତର୍କ କରାଇଛି ପାଣିପାଗ କେନ୍ଦ୍ର । ସେପଟେ ପଶ୍ଚିମ ଓଡ଼ିଶାରେ ବି ଅସହ୍ୟ ତାତି । ଗରମ ସାଙ୍ଗକୁ ଗୁଳୁଗୁଳି ଯୋଗୁ ଅସ୍ତବ୍ୟସ୍ତ ଜନଜୀବନ ।
ପୁରୀ: ଆସନ୍ତା ୧୯ ତାରିଖରେ ଶ୍ରୀଜିଉଙ୍କ ନବଯୌବନ ଦର୍ଶନ । ଏନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ଚୂଡ଼ାନ୍ତ ପର୍ଯ୍ୟାୟରେ ପ୍ରସ୍ତୁତି । ମାତ୍ରା ୩ ଘଣ୍ଟା ମିଳିବ ମହାପ୍ରଭୁଙ୍କ ଦର୍ଶନ । ସକାଳ ୮ଟା ରୁ ୯ଟା ଯାଏ ଘଣ୍ଟାଏ ହେବ ପାରିମାଣିକ ଦର୍ଶନ । ୯ ଟାରୁ ୧୧ଟା ଯାଏ ୨ ଘଣ୍ଟା ପର୍ଯ୍ୟନ୍ତ ସର୍ବସାଧାରଣ ଦର୍ଶନ ରହିଛି । ପାରିମାଣିକ ଦର୍ଶନ ପାଇଁ ଦକ୍ଷିଣ ଦ୍ବାର ଦେଇ ଯିବେ ଭକ୍ତ । ସେହପରି ସର୍ବସାଧାରଣ ଦର୍ଶନ ପାଇଁ ସିଂହଦ୍ବାର ଦେଇ ଯିବେ ଭକ୍ତ । ୧୧ଟା ପରଠାରୁ ମହାପ୍ରଭୁଙ୍କ ଦର୍ଶନ ବନ୍ଦ ରହିବ । କେବଳ ଭକ୍ତମାନେ ବେଢ଼ା ପରିକ୍ରମା ସହ ପାର୍ଶ୍ବ ଦେବାଦେବୀଙ୍କୁ ଦର୍ଶନ କରିପାରିବେ । ପାରିମାଣିକ ଦର୍ଶନରେ ୭ ହଜାର ଟିକେଟର ବ୍ୟବସ୍ଥା କରାଯାଇଛି । ପ୍ରତି ଟିକେଟର ମୂଲ୍ୟ ୧୦୦ ଟଙ୍କା ରହିଛି । ରାତି ୯ଟା ସୁଦ୍ଧା ସେନାପଟା ଲାଗି କାର୍ଯ୍ୟକ୍ରମ କରାଯିବା ନେଇ ଶ୍ରୀମନ୍ଦିର ମୁଖ୍ୟ ପ୍ରଶାସକ ରଞ୍ଜନ ଦାସ ଓ ଦଇତାପତି ନିଯୋଗ ସମ୍ପାଦକ ରାମକୃଷ୍ଣ ଦାସ ମହାପାତ୍ର ସୂଚନା ଦେଇଛନ୍ତି ।
ବାଲେଶ୍ବର: ବାଲେଶ୍ବର ଜିଲ୍ଲା ଜଳେଶ୍ବରରେ ବିଭତ୍ସ ହତ୍ୟା । ରଜରେ ଗୋଡ଼ାଇ ଗୋଡ଼ାଇ ବାପ ପୁଅଙ୍କୁ ହତ୍ୟା । ରାଇବଣିଆ ଥାନା କବାଟଘାଟି ଗାଁରେ ଘଟିଛି ଏଭଳି ଅଭାବନୀୟ ଘଟଣା । ଗାଁର ପ୍ରଫୁଲ୍ଲ ବିନ୍ଦାଣୀ ବାପ, ପୁଅକୁ ହତ୍ୟା କରିଥିବା ଅଭିଯୋଗ ହୋଇଛି । ବାପା ହାରା ବିନ୍ଧାଣି ଓ ପୁଅ କ୍ରିଷ୍ଣା ବିନ୍ଧାଣି ପ୍ରାଣ ହରାଇଥିବାବେଳେ ଅଟକାଇବାକୁ ଯାଇ ଗ୍ରାମର ଜଣେ ବ୍ୟକ୍ତି ଗୁରୁତର ଆହତ ହୋଇଛନ୍ତି । ଗୁରୁତର ହାଡ଼ୁ ସିଂଙ୍କୁ ହାତିଗଡ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି । ସରଦାରବନ୍ଦ ପଞ୍ଚାୟତ ବଡଟିକାୟତପୁର ଗାଁର ବାପ-ପୁଅ ରଜରେ କକା ଘରକୁ ଆସିଥିଲେ । ସେଠାରେ ପ୍ରଫୁଲ୍ଲ ବିନ୍ଧାଣୀଙ୍କ ସହିତ କୌଣସି କାରଣକୁ ନେଇ କଥା କଟାକଟି ହୋଇଥିଲା । ଏଥିରେ ଉତକ୍ଷିପ୍ତ ହୋଇ ଗୋଡ଼ାଇ ଗୋଡ଼ାଇ ହାଣିଥିଲେ ପ୍ରଫୁଲ୍ଲ । ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି ରଇବଣିଆ ପୋଲିସ ।
ସମ୍ବଲପୁର: ହଜାର ହଜାର ଯାତ୍ରୀଙ୍କୁ ନେଇ ଯାଉଥିବା ଟ୍ରେନ୍ କେତେ ସୁରକ୍ଷିତ । ଆପଣଙ୍କ ମନରେ ଏ ପ୍ରଶ୍ନ ଆସିବା ସ୍ବାଭାବିକ ଅଟେ । କାରଣ ନିକଟରେ ବାହାନଗାରେ କରମଣ୍ଡଳ ଏକ୍ସପ୍ରେସ ଦୁର୍ଘଟଣା ସମସ୍ତଙ୍କୁ ବିଚଳିତ ଓ ଚିକିତ କରିଥିଲା । ଏହାରି ଭିତରେ ରେଳ ବିଭାଗର ଆଉ ଏକ ଖାମଖିଆଲି ମନୋଭାବ ଦେଖିବାକୁ ମିଳିଛି ସମ୍ବଲପୁରରେ । ହାଓ୍ବଡାରୁ ସମ୍ବଲପୁରକୁ ସଂଯୋଗ କରୁଥିବା ଏହି ରେଳ ଲାଇନ କେତେ ଲୋକଙ୍କ ପାଇଁ ସୁରକ୍ଷିତ । ଟ୍ରେନ ଟ୍ରାକରେ ଲାଗିଥିବା ସ୍ଲିପର ସମ୍ପୂର୍ଣ୍ଣ ଭାବେ ଛିଣ୍ଡିଗଲାଣି । ଏହି ଟ୍ରାକରେ ପ୍ରତିଦିନ ଯାଆସ କରୁଥିବା ଟ୍ରାକମ୍ୟାନଙ୍କ ଏହା ଉପରେ କେମିତି ନଜର ପଡ଼ୁନି ତାକୁ ନେଇ ପ୍ରଶ୍ନ । ସବୁଠାରୁ ବଡକଥା ହେଲା ଏହି ସ୍ଥାନରେ ରେଳ ଲାଇନର ଜଏଣ୍ଟ ଅଛି ହେଲେ, କିଭଳି ଭଙ୍ଗା ସ୍ଲିପରକୁ ରବର ଦେଇ ଆଡଜଷ୍ଟ କରାଯାଇଛି ତାକୁ ନେଇ ଆଶ୍ଚର୍ଯ୍ୟ ହୋଇଛନ୍ତି ସମସ୍ତେ ।
