ଭଦ୍ରକ: ୧୭ ଲକ୍ଷ ଟଙ୍କାର ବ୍ରାଉନସୁଗାର ଜବତ କରିଛି ଭଦ୍ରକ ଗ୍ରାମାଞ୍ଚଳ ପୋଲିସ । ଚରମ୍ପା ରମ୍ଭିଳା କେନାଲ ଛକ ନିକଟରେ ରେଡ୍ କରି ବ୍ରାଉନସୁଗାର ଜବତ କରାଯାଇଛି । ବାଲେଶ୍ବରରୁ ଭଦ୍ରକ ଆଡକୁ ବାଇକ ଯୋଗେ ଦୁଇ ଯୁବକ ବ୍ରାଉନସୁଗାର ନେଇ ଯାଉଥିଲେ । ଉଭୟଙ୍କୁ ପୋଲିସ ଅଟକାଇବାବେଳେ ଖସିଯିବାକୁ ଉଦ୍ୟମ କରିଥିଲେ ଅଭିଯୁକ୍ତ । ଜଣେ ଫେରାର ହୋଇଯାଇଥିବାବେଳେ ଅନ୍ୟ ଜଣଙ୍କୁ ପୋଲିସ ଗିରଫ କରିଛି । ଗିରଫ ଅଭିଯୁକ୍ତ ହେଲା ଚନ୍ଦନ ମଲ୍ଲିକ । ତା ନିକଟରୁ ୧୧୮ ଗ୍ରାମ ବ୍ରାଉନସୁଗାର ଓ ଗୋଟିଏ ମୋବାଇଲ ଜବତ ହୋଇଛି
ବଲାଙ୍ଗୀରରେ 5T ସଚିବ ଭି କେ ପାଣ୍ଡିଆନ, ଲୋକଙ୍କ ପାଖକୁ ଯାଇ ଗ୍ରହଣ କଲେ ଦାବିପତ୍ର
ବଲାଙ୍ଗୀର: ବଲାଙ୍ଗୀର ଟିଟିଲାଗଡ଼ରେ ଲୋକଙ୍କ ସହିତ ଆଲୋଚନା କରିଛନ୍ତି 5T ସଚିବ ଭିକେ ପାଣ୍ଡିଆନ । ସିଟି ସ୍କୁଲ ପଡିଆରେ ଆୟୋଜିତ ଜନଶୁଣାଣି କାର୍ଯ୍ୟକ୍ରମରେ ଯୋଗଦେଇ ସମସ୍ତଙ୍କଠାରୁ ଅଭିଯୋଗପତ୍ର ଗ୍ରହଣ କରିଥିଲେ 5T ସଚିବ । ଚାଷୀଙ୍କ ସମସ୍ୟାକୁ ପ୍ରାଥମିକ ଭିତ୍ତିରେ ସମାଧାନ କରାଯିବା ସହିତ ଧର୍ମାନୁଷ୍ଠାନ ସମ୍ପର୍କିତ ଦାବିକୁ ୭ଦିନ ଭିତରେ ସମାଧାନ କରାଯିବ ବୋଲି 5T ସଚିବ ପ୍ରତିଶ୍ରୁତି ଦେଇଛନ୍ତି । 5T ସଚିବ କହିଛନ୍ତି ଟିଟିଲାଗଡରେ ଆଉ ପିଇବା ପାଣିର ସମସ୍ୟା ରହିବନି ।
ଚାଷ ଜମିରେ ମଧ୍ୟ ଜଳସେଚନ ସୁବିଧା ଯୋଗାଇ ଦିଆଯାଉଛି । ଜଳସେଚନ ପାଇଁ କେବଳ ଟିଟିଲାଗଡରେ ୯୫୦ କୋଟି ଓ ପିଇବାପାଣି ପାଇଁ ୭୦୦ କୋଟି ଟଙ୍କା ଖର୍ଚ୍ଚ କରାଯାଉଛି । ୪ଟି ସ୍ଥାନରେ ଜଳସେଚନ ପ୍ରକଳ୍ପ ନିର୍ମାଣ ଚାଲିଥିବାବେଳେ ଆସନ୍ତା ବର୍ଷେ ମଧ୍ୟରେ ସାରିବାକୁ ଲକ୍ଷ୍ୟ ରଖାଯାଇଛି । ପରେ ହରିଶଙ୍କର ମନ୍ଦିର ଏବଂ ହରିଶଙ୍କର ମିଶନ ଶକ୍ତି ଏସଏମଇ ପାର୍କ କରିଥିଲେ ଫାଇଭ-ଟି ସଚିବ ।
କରାଚୀରୁ ରାୱଲପିଣ୍ଡି ଯାଉଥିବା ଟ୍ରେନ୍ ଲାଇନଚ୍ୟୁତ, ୧୫ ମୃତ, ୫୦ରୁ ଅଧିକ ଆହତ
କରାଚୀ: ପାକିସ୍ତାନରେ ଭୟଙ୍କର ଟ୍ରେନ ଦୁର୍ଘଟଣା ଘଟିଛି । ଶାହଜାଦପୁର ଏବଂ ନୱାବଶାହ ମଧ୍ୟରେ ସ୍ଥିତ ସହାରା ରେଲୱେ ଷ୍ଟେସନ ନିକଟରେ ଟ୍ରେନ୍ ଦୁର୍ଘଟଣାଗ୍ରସ୍ତ ହୋଇଛି । ରାୱଲପିଣ୍ଡି ଯାଉଥିବା ହଜାରା ଏକ୍ସପ୍ରେସର ପ୍ରାୟ ୧୦ଟି ବଗି ଲାଇନଚ୍ୟୁତ ହେବା କାରଣରୁ ଏହି ଦୁର୍ଘଟଣା ଘଟିଛି । ଏହି ଦୁର୍ଘଟଣାରେ ଅତିକମରେ ୧୫ ଜଣଙ୍କ ମୃତ୍ୟୁ ହୋଇଥିବା ସୂଚନା । ସେହିପରି ୫୦ରୁ ଅଧିକ ଲୋକ ଆହତ ହୋଇଛନ୍ତି ।
ତେବେ ମୃତ୍ୟୁ ସଂଖ୍ୟା ବୃଦ୍ଧି ପାଇବାର ଆଶଙ୍କା କରାଯାଉଛି କାରଣ ଟ୍ରେନର ଅଧିକ ସଂଖ୍ୟାରେ ଯାତ୍ରୀ ଥିଲେ । କରାଚୀଠୁ ୨୭୫ କିମି ଦୂରରେ ଏହି ଦୁର୍ଘଟଣା ଘଟିଛି । ଆହତ ଯାତ୍ରୀଙ୍କୁ ନିକଟସ୍ଥ ହସ୍ପିଟାଲକୁ ନିଆଯାଇଛି । ତେବେ କେଉଁ କାରଣରୁ ବଗି ଲାଇନଚ୍ୟୁତ ହୋଇଛି ସେନେଇ କିଛି ସୂଚନା ମିଳିପାରିନାହିଁ । ପ୍ରଶାସନ ପକ୍ଷରୁ ଉଦ୍ଧାର କାର୍ଯ୍ୟ ଜୋରଦାର କରାଯାଇଛି । ଆଖପାଖ ହସ୍ପିଟାଲଗୁଡ଼ିକୁ ଆଲର୍ଟରେ ରଖାଯାଇଛି । ଦୁର୍ଘଟଣା କାରଣରୁ ଏହି ଲାଇନ ଦେଇ ଯିବାକୁ ଥିବା ଟ୍ରେନଗୁଡ଼ିକୁ ବାତିଲ କରାଯାଇଛି ।
ଲାଞ୍ଚ ନେଲେ ସ୍ବାମୀ, ମେୟର ପଦ ହରାଇଲେ ସ୍ତ୍ରୀ
ଜୟପୁର: ଲାଞ୍ଚ ନେଲେ ସ୍ବାମୀ । ମେୟର ପଦ ହରାଇଲେ ସ୍ତ୍ରୀ । ଏହି ଘଟଣା ଘଟିଛି ରାଜସ୍ଥାନ ଜୟପୁରରେ । ଏକ ଜମି ଲିଜ୍ ଦେବା ସକାଶେ ସ୍ବାମୀ ୨ ଲକ୍ଷ ଟଙ୍କା ଲାଞ୍ଚ ନେବା ଅଭିଯୋଗରେ ଦୁର୍ନୀତି ନିବାରଣ ବ୍ୟୁରୋ ଦ୍ବାରା ଗିରଫ ହେବା ପରେ ଜୟପୁର ହେରିଟେଜ ମ୍ୟୁନିସିପାଲ କର୍ପୋରେସନ ମେୟର ମୁନେଶ ଗୁର୍ଜରଙ୍କୁ ହଟାଇ ନିଆଯାଇଛି । ଏପରିକି ଜୟପୁର ହେରିଟେଜ କର୍ପୋରେସନର ଓ୍ବାର୍ଡ ନମ୍ବର ୪୩ର କାଉନସିଲର ପଦରୁ ମଧ୍ୟ ମୁନେଶଙ୍କୁ ହଟାଯାଇଛି ।
ବାସଭବନରେ ଖୋଦ୍ ମେୟର ଉପସ୍ଥିତ ଥିବାବେଳେ ସ୍ବାମୀ ସୁଶୀଲ ଗୁର୍ଜର ଏହି ଟଙ୍କା ଲାଞ୍ଚ ନେଉଥିଲେ । ରେଡ୍ ବେଳେ ତାଙ୍କ ଘରୁ ନଗଦ ୪୦ ଲକ୍ଷ ଟଙ୍କା ଜବତ ହୋଇଥିଲା । ଏହି ପୋଲିସ କହିଛି ନାରାୟଣ ସିଂ ଓ ଅନିଲ ଦୁବେଙ୍କ ସହାୟତାରେ ସୁଶୀଲ ଏହି ୨ ଲକ୍ଷ ଟଙ୍କା ଦାବି କରିଥିଲେ । ସେହିପରି ନାରାୟଣ ସିଂଙ୍କ ଘରୁ ନଗଦ ୮ ଲକ୍ଷ ଟଙ୍କା ଜବତ ହୋଇଛି ।
ମୁଣ୍ଡରେ ବନ୍ଧୁକ ଲଗାଇ ଲୁଟ୍ ପରେ କାର୍ ଜାଳିଦେଲେ ଦୁର୍ବୃତ୍ତ
ବାଲିପାଟଣା: ମୁଣ୍ଡରେ ବନ୍ଧୁକ ଲଗାଇ ଲୁଟ୍ ପରେ କାର୍ ଜାଳିଦେଲେ ଦୁର୍ବୃତ୍ତ । ଭୁବନେଶ୍ବର ଉପକଣ୍ଠ ବାଲିପାଟଣା ଥାନା ବଦଳା ପଣ୍ଡୁଆ ସାହିରେ ଏହି ଘଟଣା ଘଟିଛି । ଗତକାଲି ରାତି ପ୍ରାୟ ୧୨ଟାରେ ଅଜିତ ସ୍ବାଇଁ ଘରକୁ ଫେରୁଥିଲେ । ଗାଁ ମୁଣ୍ଡରେ ଅଜିତଙ୍କ କାର ଅଟକାଇ ଥିଲେ ୨ ଜଣ ଦୁର୍ବୃତ୍ତ । ଅଜିତ ସ୍ବାଇଁଙ୍କ ମୁଣ୍ଡରେ ଦୁର୍ବୃତ୍ତମାନେ ବନ୍ଧୁକ ଲଗାଇ ପର୍ସ ନେଇଯିବା ସହ ତାଙ୍କ ମୁହଁରେ କିଛି ସ୍ପ୍ରେ କରି ଦେଇଥିଲେ । ଅଜିତ ସଂଜ୍ଞାହୀନ ହେବା ପରେ ତାଙ୍କୁ ବିଲରେ ତାଙ୍କୁ ଫିଙ୍ଗି ଦେଇଥିଲେ । ପରେ ଅଜିତଙ୍କ କାରକୁ ପୋଡ଼ି ଦେଇଛନ୍ତି । ଆଜି ସକାଳୁ ସ୍ଥାନୀୟ ଲୋକ ଅଜିତଙ୍କୁ ଅଚେତ ଅବସ୍ଥାରେ ଉଦ୍ଧାର କରିଥିଲେ । ପରେ ଅଜିତ ବାଲିପାଟଣା ଥାନାରେ ଲିଖିତ ଅଭିଯୋଗ କରିଛନ୍ତି । ପୋଲିସ ଏହି ଘଟଣାର ଅଧିକ ତଦନ୍ତ କରୁଛି ।
ଜାମ୍ମୁ-କାଶ୍ମୀରରେ ବଡ଼ ଧରଣର ଭୂସ୍ଖଳନ
ଶ୍ରୀନଗର: ଜାମ୍ମୁ-କାଶ୍ମୀରରେ ବଡ଼ ଧରଣର ଭୂସ୍ଖଳନ । ପାହାଡ଼ରୁ ବିରାଟ ପଥର ଧସିବା ଯୋଗୁ ଜାମ୍ମୁ-ଶ୍ରୀନଗର ହାଇଓ୍ବେ ଦେଇ ଯାତାୟାତ ବନ୍ଦ ହୋଇଛି । ଲ୍ୟାଣ୍ଡ୍ ସ୍ଲାଇଡ ଯୋଗୁ ରାସ୍ତା ବନ୍ଦ ହୋଇଥିବା ବେଳେ ଉଭୟ ପାର୍ଶ୍ବରେ ଯାତ୍ରୀମାନେ ଅଟକି ରହିଛନ୍ତି । ହାଇଓ୍ବେ ଜାମ୍ ଫଳରେ ଅମରନାଥ ଯାତ୍ରୀମାନେ ଚନ୍ଦେରକୋଟ ଯାତ୍ରୀ ନିବାସରେ ଅଟକି ରହିଛନ୍ତି । ହାଇଓ୍ବେ ସଫା ନହେବା ଯାଏଁ ସେହି ରାସ୍ତା ଦେଇ ଗାଡ଼ିମୋଟର ନଯିବାକୁ ପ୍ରଶାସନ ପକ୍ଷରୁ ଆଲର୍ଟ କରାଯାଉଛି । ଜୁଲାଇ ୧ ତାରିଖରୁ ବାବା ଅମରନାଥଙ୍କ ଯାତ୍ରା ଆରମ୍ଭ ହୋଇଥିବା ବେଳେ ଏବେ ସୁଦ୍ଧା ୪ ଲକ୍ଷରୁ ଊର୍ଦ୍ଧ୍ବ ଶ୍ରଦ୍ଧାଳୁ ଦର୍ଶନ କରିଛନ୍ତି ।
ହରିୟାଣା ହିଂସା ପରେ ବୁଲଡୋଜର ଆକ୍ସନ, ମାଟିରେ ମିଶିଲା ଏକାଧିକ ଘର ଓ ଦୋକନ
ଚଣ୍ଡିଗଡ଼: ହରିୟାଣା ନୁହରେ ହିଂସା ପରେ ବୁଲଡୋଜର ଆକ୍ସନ । ତିନି ଦିନ ଧରି ନୁହ ଓ ଆଖପାଖ ଅଞ୍ଚଳରେ ପ୍ରଶାସନ ପକ୍ଷରୁ ଜବରଦଖଲ ଉଚ୍ଛେଦ କାର୍ଯ୍ୟ ଜୋରଦାର ଚାଲିଛି । ଧାର୍ମିକ ଶୋଭାଯାତ୍ରା ବେଳେ ଏକ ହୋଟେଲ ଉପରୁ ପଥର ମାଡ଼ କରାଯାଇଥିବା ଜଣାପଡ଼ିବା ପରେ ନୁହରେ ଥିବା ଏକ ବହୁତଳ ବିଶିଷ୍ଟ ହୋଟେଲକୁ ଭାଙ୍ଗି ଦିଆଯାଇଛି । ନୁହ ଓ ଏହାର ଆଖପାଖରେ ଅନେକ ଦୋକାନ ଓ ଘରକୁ ପ୍ରଶାସନ ଭାଙ୍ଗି ଦେଇଛି । ସାମ୍ପ୍ରଦାୟିକ ହିଂସାରେ ସମ୍ପୃକ୍ତି ଥିବା ସନ୍ଦେହରେ ପ୍ରଶାସନ ପକ୍ଷରୁ ଜବରଦଖଲ ଉଚ୍ଛେଦ କରାଯାଉଛି ।
ନୁହ ଗୋଷ୍ଠୀ ସଂଘର୍ଷରେ ଏବେ ସୁଦ୍ଧା ୧୦୬ ମାମଲା ରୁଜୁ ହୋଇଥିବା ବେଳେ ୨୧୬ ଜଣଙ୍କୁ ଗିରଫ କରାଯାଇଛି । ସେପଟେ ଆଜି ନୁହରେ ଏକ ଗୋଷ୍ଠୀ ପକ୍ଷରୁ ମହାପଞ୍ଚାୟତର ଆୟୋଜନ କରାଯାଇଛି । ପ୍ରାୟ ୧ ହଜାର ଲୋକଙ୍କ ସମାଗମ ହେବା ସମ୍ଭାବନା ରହିଥିବାରୁ ପୋଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ପୋଲିସ ଗାଡ଼ି ମୋଟର ଯାଞ୍ଚ କରିବା ସହ ସ୍ଥିତି ଉପରେ କଡ଼ା ନଜର ରଖିଛି ।
ପୁଣି ଭାରତୀୟ ଯୁବକଙ୍କ ପ୍ରେମରେ ଜଣେ ପାକିସ୍ତାନୀ ମହିଳା, ଭର୍ଚୁଆଲରେ ଅରବାଜଙ୍କୁ ବାହାହେଲେ କରାଚିର ଅମିନା
ନୂଆଦିଲ୍ଲୀ: ପୁଣି ଭାରତୀୟ ଯୁବକଙ୍କ ପ୍ରେମରେ ଜଣେ ପାକିସ୍ତାନୀ ମହିଳା । ଯୋଧପୁରର ଜଣେ ଯୁବକଙ୍କୁ ଭର୍ଚୁଆଲରେ ବାହା ହୋଇଛନ୍ତି ପାକିସ୍ତାନୀ ମହିଳା । ଭାରତକୁ ଆସିବା ଲାଗି ଭିସା ପାଇବାରେ ବିଫଳ ହେବା ପରେ ସେ ଏହି ପଥ ବାଛିନେଇଥିଲେ । କରାଚିର ଅମିନା ନାମ୍ନୀ ମହିଳା ଭିସା ପାଇବାରେ ବ୍ଯର୍ଥ ହେବା ପରେ ସେ ଅରବାଜ ଖାନଙ୍କୁ ଭର୍ଚୁଆଲରେ ବାହା ହୋଇଥିଲେ । ଅରବାଜ କହିଛନ୍ତି ଭିସା ଲାଗି ଅମିନା ଆବେଦନ କରିଥିଲେ । ସ୍ବୀକୃତି ନମିଳିବା କାରଣରୁ ସେ ପାକିସ୍ତାନରେ ବିବାହ କରିବେ ନାହିଁ । ଏଣୁ ସେ ତାଙ୍କୁ ଭର୍ଚୁଆଲରେ ବିବାହ କରିଛନ୍ତି । ତେବେ ଅମିନା ଭାରତରେ ପହଞ୍ଚିବା ପରେ ତାଙ୍କୁ ସେ ପୁନଃବିବାହ କରିବେ । ଭର୍ଚୁଆଲରେ ବିବାହ କରିବା ଲାଗି ଗତ ୨ ଅଗଷ୍ଟରେ ଅରବାଜ ନିଜ ସମ୍ପର୍କୀୟଙ୍କ ସହ ଯୋଧପୁରର ଓସଓ୍ବାଲ ସମାଜ ଭବନକୁ ଯାଇଥିଲେ । ଯୋଧପୁରର ଜଣେ କାଜିଙ୍କ ଦ୍ବାରା ଏହି ଭର୍ଚୁଆଲ ମ୍ୟାରେଜ ସମ୍ପନ୍ନ ହୋଇଥିଲା ।
ଅନ୍ୟପକ୍ଷରେ ଖୁବ୍ ଶୀଘ୍ର ଅମିନା ଭାରତ ଆସିବା ଲାଗି ଭିସା ପାଇବେ ବୋଲି ଆଶା ବ୍ୟକ୍ତ କରିଛନ୍ତି ଅରବାଜ । କିଛି ଦିନ ତଳେ ପାକିସ୍ତାନର ସୀମା ହାଇଦର ନାମ୍ନୀ ଜଣେ ମହିଳା ନିଜର ୪ ସନ୍ତାନଙ୍କୁ ଧରି ନୋଏଡା ଚାଲିଆସିଥିଲେ ଏବଂ ସଚିନ ନାମକ ଜଣେ ଯୁବକଙ୍କୁ ବାହା ହୋଇଥିଲେ । ଏକ ମୋବାଇଲ ଗେମ୍ ଖେଳୁଥିବା ବେଳେ ଦୁହିଁଙ୍କ ମଧ୍ୟରେ ପ୍ରେମ ସମ୍ପର୍କ ସ୍ଥାପନ ହୋଇଥିଲା ।
ରେସିଂରେ ବାଇକ କ୍ରାସ୍, ଆଖିବୁଜିଲେ ୧୩ ବର୍ଷ ବୟସ୍କ ବେଙ୍ଗାଳୁରୁ କିଡ୍ ଶ୍ରେୟସ ହରିଶ
ଚେନ୍ନାଇ: ରେସିଂ ପ୍ରତିଯୋଗିତାରେ ୧୩ ବର୍ଷୀୟ ବାଇକ ରେସରଙ୍କ ମୃତ୍ୟୁ । ଚେନ୍ନାଇର ଇରୁଙ୍ଗାଟ୍ଟୁକୋଟମରେ ଆୟୋଜିତ ନ୍ୟାସନାଲ ମୋଟରସାଇକେଲ ରେସିଂ ଚାମ୍ପିଅନସିପରେ ରେସିଂ ପ୍ରତିଯୋଗିତାରେ ସାମିଲ ଥିବାବେଳେ ଦୁର୍ଘଟଣାରେ ପ୍ରାଣ ହରାଇଛନ୍ତି କୋପରମ ଶ୍ରେୟସ ହରିଶ । ଗତ ମେ ମାସରେ ସ୍ପେନରେ ଆୟୋଜିତ ଟୁ-ହୁଇଲର ରେସିଂ ବିଶ୍ବ ଚାମ୍ପିଅନସିପରେ ଫାଇନାଲରେ ପ୍ରବେଶ କରିବା କ୍ଷେତ୍ରରେ ଶ୍ରେୟସ ଥିଲେ ପ୍ରଥମ ଭାରତୀୟ ।
ବେଙ୍ଗାଲୁରୁ କିଡ୍ ନାମରେ ଖ୍ୟାତି ଅର୍ଜନ କରିଥିବା ଶ୍ରେୟସ ପ୍ରତିଯୋଗିତାରେ ଏକ ୨୦୦ ସିସି ମୋଟର ବାଇକ ଚଳାଉଥିବାବେଳେ ଦୁର୍ଘଟଣାର ସମ୍ମୁଖୀନ ହୋଇଥିଲେ । ଶ୍ରେୟସଙ୍କ ପଛରେ ଥିବା ଅନ୍ୟ ଜଣେ ଚାଳକ ଶ୍ରେୟସଙ୍କୁ ଗାଡିକୁ ଧକ୍କା ଦେବାରୁ ଶ୍ରେୟସ ଗୁରୁତର ଆହତ ହୋଇଥିଲେ । ତାଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା । ତାଙ୍କୁ ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଥିଲା । ମାତ୍ର ସେତେବେଳକୁ ଶ୍ରେୟସଙ୍କ ମୃତ୍ୟୁ ଘଟିସାରିଥିଲା । ଶ୍ରେୟସଙ୍କ ମୃତ୍ୟୁ ପରେ ମାଡ୍ରାସ ମୋଟର ସ୍ପୋର୍ଟ୍ସ କ୍ଳବର ସମସ୍ତ କାର୍ଯ୍ୟକ୍ରମକୁ ବାତିଲ କରାଯାଇଛି । ଗତ ଜୁଲାଇ ୨୬ ତାରିଖରେ ନିଜର ୧୩ ତମ ଜନ୍ମଦିନ ପାଳନ କରିଥିଲେ ଶ୍ରେୟସ । ଏଫଆଇଏମ ମିନି ଜିପିରେ କ୍ୟାରିୟର ଆରମ୍ଭ କରିଥିଲେ ଶ୍ରେୟସ ଏବଂ ୨୦୨୨ରେ ସେ ଚାମ୍ପିଅନସିପରେ ବିଜୟୀ ହୋଇଥିଲେ । ଟିଭିଏସ ପକ୍ଷରୁ ତାଙ୍କୁ ଏକ ବାଇକ ବି ଯୋଗାଇ ଦିଆଯାଇଥିଲା ।
ରାଜ୍ୟରୁ ଟଳିଲା ବନ୍ୟା ବିପଦ, ସବୁ ନଦୀରେ କମୁଛି ପାଣି
ଭୁବନେଶ୍ୱର: ରାଜ୍ୟରୁ ଟଳିଲା ବନ୍ୟା ବିପଦ । ହୀରାକୁଦର ଜଳସ୍ତର ୬୨୧.୯୫ ଫୁଟରେ ପ୍ରବାହିତ ହେଉଛି । ଜଳ ଭଣ୍ଡାରକୁ ୩ ଲକ୍ଷ ୫୦ ହଜାର କ୍ୟୁସେକ ଜଳ ପ୍ରବେଶ କରୁଛି ଓ ୩ ଲକ୍ଷ ୫୦ ହଜାର କ୍ୟୁସେକ ଜଳ ନିଷ୍କାସନ ହେଉଛି । ତେଣୁ ସ୍ଥିତି ସ୍ଥିର ଅଛି । ହୀରାକୁଦର ୨୦ ଗେଟ୍ ଖୋଲା ଅଛି । ବର୍ତ୍ତମାନ ଆଉ ଖୋଲିବାର ନାହିଁ । ସ୍ଥିତି ନିରୀକ୍ଷଣ କରାଯାଉଥିବା ଜଳସମ୍ପଦ ବିଭାଗ ସର୍ବୋଚ୍ଚ ଯନ୍ତ୍ରୀ କହିଛନ୍ତି । ସବୁଠାରେ ପାଣି ଖସିବା ଆରମ୍ଭ ହେଲାଣି । ଦିନେ ଦୁଇ ଦିନ ଭିତରେ ସବୁଠାରୁ ପାଣି ଖସିଯିବ । ଆତଙ୍କିତ ହେବାର କିଛି ନାହିଁ । ଘାଇ ମରାମତି କାମ ହେବା ସହ କିଛି କାମ ସରିଲାଣି । ମୁଣ୍ଡଳୀରେ ୨ ଲକ୍ଷ ୬୧ ହଜାର କ୍ୟୁସେକ୍ ଜଳ ପ୍ରଭାହିତ ହେଉଛି । ବାରମୁଲଠାରେ ୩ ଲକ୍ଷ ୯୬ ହଜାର କ୍ୟୁସେକ୍ ଓ ଖଇରମାଲରେ ୪ ଲକ୍ଷ ୭୮ ହଜାର କ୍ୟୁସେକ୍ ଜଳ ପ୍ରବାହିତ ହେଉଛି ବୋଲି କହିଛନ୍ତି ଜଳ ସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ।