ବଲାଙ୍ଗୀର: ନନ୍ଦିଘୋଷ ଟିଭିରେ ଖବର ପ୍ରସାରଣ ପରେ ବଲାଙ୍ଗୀରର ସାଇକେଲ ରାଣୀ ନୁପୁରଙ୍କୁ ଛୁଟୁଛି ସହାୟତାର ସୁଅ ।ନୁପୁର ମେହେରଙ୍କୁ ଏକ ନୂଆ ସାଇକଲ ପ୍ରଦାନ କରିଛି ବଲାଙ୍ଗୀର ଉଠାଦୋକାନୀ ସଂଘ । ଅନେକ ବୁଦ୍ଧିଜୀବୀ ମଧ୍ୟ ନୁପୁରଙ୍କ ପରିଶ୍ରମକୁ ପ୍ରଶଂସା କରିଛନ୍ତି । ପରିଣତ ବୟସରେ ବି ସେ କିଭଳି ଆତ୍ମନିର୍ଭରଶୀଳ ଓ ମହିଳା ସଶକ୍ତିରଣ ପାଇଁ ଉଦାହରଣ ସାଜିଛନ୍ତି, ପ୍ରତିଦିନ ସେ କିଭଳି ୧୦ ବର୍ଷ ତଳର ସାଇକେଲ ଧରି ୧୦ କିଲୋମିଟର କାମ କରିବାକୁ ଯାଆନ୍ତି । ଘର ଚଳାଇବାରେ ସ୍ବାମୀଙ୍କୁ ସହଯୋଗ କରନ୍ତି । ତାହା ନନ୍ଦିଘୋଷ ଟିଭରେ ପ୍ରସାରଣ କରାଯାଇଥିଲା । ଏହି ଖବର ଜାଣିବା ପରେ ବଲାଙ୍ଗୀର ଉଠାଦୋକାନୀ ସଂଘ ଓ କିଛି ସ୍ବେଛାସେବୀ ମିଶି ଏକ ଅତ୍ୟାଧୁନିକ ସାଇକଲ ଉପହାର ଦେଇଛନ୍ତି ।
ଚିଲିକାର ଅଥଳ ଜଳରାଶି ମଝିରେ ସ୍ବାଧିନତା ଦିବସ ପାଳନ
କୃଷ୍ଣପ୍ରସାଦ: ଚିଲିକାର ନୀଳ ଜଳ ରାଶି ମଝିରେ ଭାରତ ମାର ବନ୍ଦାପନା । ଏଭଳି ନିଆରା ଢଙ୍ଗରେ ସ୍ବାଧୀନତା ଦିବସ ପାଳନ କରିଛନ୍ତି କୃଷ୍ଣପ୍ରସାଦ ବ୍ଲକର ଖଟି ସାହି ଗାଁର ମହିଳା ସ୍ଵୟଂ ସହାୟକ ଗୋଷ୍ଠୀ ମହିଳା । ଏଠି ପଡିଆ ନାହିଁ ସତ ଡ଼ଙ୍ଗା ସାଜିଛି ସ୍ବାଧୀନତା ଉତ୍ସବ ପାଳନର ସାଧନାର କ୍ଷେତ୍ର । ଯେଉଁ ଡ଼ଙ୍ଗା ମତ୍ସଜୀବୀ ମାନଙ୍କୁ ଜୀବନ ଜିବିକା ପ୍ରତି ପୋଷଣର ସାହାରା ଦେଇଥାଏ । ସେଠି ଆଜି ଅତ୍ୟନ୍ତ ଗର୍ବ ଓ ଆନନ୍ଦର ସହ ସ୍ଵାଧିନତା ଦିବସ ଉତ୍ସବ ପାଳନ କରିଛନ୍ତି ମହିଳା ମତ୍ସ୍ୟଜୀବୀ ମାନେ । ଡ଼ଙ୍ଗା ଉପରେ ଠିଆ ହୋଇ ଭାରତ ମାତାର ଜୟ ଗାନ କରିଛନ୍ତି ।
ବ୍ରହ୍ମପୁର ସଂସ୍କରଣ ସକାଳ ଓ ନନ୍ଦିଘୋଷ ପରିବାର ପକ୍ଷରୁ ସ୍ବାଧୀନତା ଦିବସ ପାଳିତ
ବ୍ରହ୍ମପୁର: ବ୍ରହ୍ମପୁର ସଂସ୍କରଣ ସକାଳ ଓ ନନ୍ଦିଘୋଷ ପରିବାର ପକ୍ଷରୁ ପାଳିତ ହୋଇଛି ୭୭ ତମ ସ୍ବାଧୀନତା ଦିବସ । ଏହି ଅବସରରେ ଗଜପତିନଗର କର୍ପୋରେଟର ସମିର ମିଶ୍ର ମୁଖ୍ୟଅତିଥି ଭାବେ ଯୋଗଦେଇ ଜାତୀୟ ପତାକା ଉତୋଳନ କରିଥିଲେ । ମହାତ୍ମାଗାନ୍ଧୀଙ୍କ ନେତୃତ୍ୱରେ ଭାରତ ସ୍ୱାଧୀନ ହୋଇଥିଲା । ଅନେକ ମହାପୁରୁଷ ସଂଗ୍ରାମରେ ଝାସ ଦେଇ ଦେଶକୁ ସ୍ବାଧୀନ କରାଇଥିଲେ । ଅନ୍ୟ ଅତିଥିମାନଙ୍କ ମଧରେ ରାଜେନ୍ଦ୍ର କୁମାର ପଣ୍ଡା , ରାଜେଶ କୁମାର ସାହୁଙ୍କ ସହ ସକାଳ ଓ ନନ୍ଦିଘୋଷ ଟିଭି ପରିବାରର ସମସ୍ତ ସଦସ୍ଯ ଉପସ୍ଥିତ ଥିଲେ । ଅତିଥି ମାନଙ୍କୁ ଔପଢୋକନ ଦେଇ ସମ୍ମାନିତ କରାଯାଇଥିଲା । ସକାଳ ଖବରକାଗଜର ବ୍ରହ୍ମପୁର ସଂସ୍କରଣର ମୁଖ୍ଯ ଶକ୍ତିଧର ରାଜଗୁରୁ କାର୍ଯ୍ୟକ୍ରମ ପରିଚାଳନା କରିଥିବା ବେଳେ ନନ୍ଦିଘୋଷ ଟିଭିର ବ୍ୟୁରୋ ଚିଫ୍ ଦେବହରି ବେହେରା ଧନ୍ୟବାଦ ଅର୍ପଣ କରିଥିଲେ ।
ସୁଲଭ ଇଣ୍ଟର ନ୍ୟାସନାଲର ପ୍ରତିଷ୍ଠାତା ବିନ୍ଦେଶ୍ବର ପାଠକଙ୍କ ପରଲୋକ
ନୂଆଦିଲ୍ଲୀ: ପରଲୋକରେ ସୁଲଭ ଇଣ୍ଟର ନ୍ୟାସନାଲର ପ୍ରତିଷ୍ଠାତା ବିନ୍ଦେଶ୍ବର ପାଠକ । ଦିଲ୍ଲୀ ଏମ୍ସରେ ଚିକିତ୍ସିତ ହେଉଥିାବାବେଳେ ଶେଷ ନିଶ୍ବାସ ତ୍ୟାଗ କରିଛନ୍ତି । ସୁଲଭ ଇଣ୍ଟର ନ୍ୟାସନାଲର କେନ୍ଦ୍ରୀୟ କାର୍ଯ୍ୟାଳୟରେ ପତାକା ଉତ୍ତୋଳନ କରିବା ପରେ ହଠାତ୍ ତାଙ୍କ ସ୍ୱାସ୍ଥ୍ୟ ଅବସ୍ଥା ବିଗିଡି ଯାଇଥିଲା । ତାଙ୍କୁ ଦିଲ୍ଲୀ ଏମ୍ସରେ ଭର୍ତ୍ତି କରାଯାଇଥିଲା । ସେଠାରେ ତାଙ୍କ ନିଧନ ଘଟିଛି । ୧୯୭୦ କସିହାରେ ସେ ସାମାଜିକ ସେବା ପାଇଁ ସୁଲଭ ଇଣ୍ଟର ନ୍ୟାସନାଲକୁ ପ୍ରତିଷ୍ଠା କରିଥିଲେ ।
ସ୍କୁଲରେ ଜାତୀୟ ପତାକା ଉତ୍ତୋଳନ ବେଳେ ଟଳି ପଡ଼ିଲେ ପ୍ରଧାନଶିକ୍ଷକ
ପୁରୀ: ଜାତୀୟ ପତାକା ଉତ୍ତୋଳନ ବେଳେ ଟଳିପଡ଼ିଲେ ପ୍ରଧାନ ଶିକ୍ଷକ । ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଳକ୍ ମଲେଶ୍ବରୀ ପ୍ରକଳ୍ପ ପ୍ରାଥମିକ ବିଦ୍ୟାଳୟରେ ସ୍ବାଧୀନତା ଦିବସ ପାଳନ ସମୟରେ ଅଘଟଣ ଘଟିଛି । ମୃତ ଶିକ୍ଷକ ହେଲେ ପ୍ରଫୁଲ୍ଲ ଚନ୍ଦ୍ର ସାହୁ । ତ୍ରିରଙ୍ଗା ଉତ୍ତୋଳନ ପରେ ସେ ହଠାତ ଟଳିପଡ଼ିଥିଲେ । ତାଙ୍କୁ କୃଷ୍ଣପ୍ରସାଦ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା । ସେଠାରେ ତାଙ୍କୁ ଡାକ୍ତର ମୃତ ଘୋଷଣା କରିଥିଲେ । ହୃଦଘାତରେ ତାଙ୍କର ମୃତ୍ୟୁ ହୋଇଥିବା ସୂଚନା ମିଳିଛି । ପ୍ରଧାନଶିକ୍ଷକଙ୍କ ମୃତ୍ୟୁ ପରେ ସ୍ଥାନୀୟ ଅଂଚଳରେ ଖେଳି ଯାଇଛି ଶୋକର ଛାୟା ।
ସ୍ବାଧୀନତା ଦିବସକୁ ଗୁଗୁଲ ଡୁଡୁଲର ନିଆରା ସମ୍ମାନ
ନନ୍ଦିଘୋଷ ବ୍ୟୁରୋ: ସ୍ବାଧୀନତା ଦିବସକୁ ଗୁଗୁଲ ଡୁଡୁଲର ନିଆରା ସମ୍ମାନ । ୭୭ତମ ସ୍ବାଧୀନତା ଦିବସରେ ଗୁଗୁଲ ଭାରତର ବିବିଧ ବୟନକୁ ଲୋଗୋରେ ସ୍ଥାନ ଦେଇଛି । ଦେଶର ସମସ୍ତ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳର ବୟନ ପରମ୍ପରାକୁ ଗୁଗୁଲ ଲୋଗୋରେ ସ୍ଥାନ ଦେଇ ଦେଶକୁ ସମ୍ମାନ ଦେଇଛି । ଏହି ଲୋଗୋକୁ ନୂଆ ଦିଲ୍ଲୀର ଆର୍ଟିଷ୍ଟ ନମ୍ରତା କୁମାର କରିଛନ୍ତି । ଭାରତର ବୟନ କଳାକୁ ଏକ ସନ୍ତୁଳିତ ଢଙ୍ଗରେ ସେ ଉପସ୍ଥାପିତ କରିଛନ୍ତି । ବୟନ କଳା ଭାରତର ପରିଚୟ । ଯାହାକୁ ନମ୍ରତା ଗୁଗୁଲ ଲୋଗୋରେ ସ୍ଥାନ ଦେବାକୁ ଉଚିତ ମନେ କରି ସ୍ବାଧୀନତା ଦିବସ ଲାଗି ଉତ୍ସର୍ଗ କରିଛନ୍ତି । ଭାରତର ବଡ଼ ପର୍ବପର୍ବାଣୀରେ ଗୁଗୁଲ ଏପରି ଲୋଗୋରେ ପରିବର୍ତ୍ତନ କରି ଦେଶର ଉତ୍ସବରେ ନିଜକୁ ସାମିଲ କରିଥାଏ ।
ହିମାଚଳରେ ଜଳ ପ୍ରଳୟ, ମୃତ୍ୟୁ ସଂଖ୍ୟା ୫୫
ହିମାଚଳ: ହିମାଚଳରେ ଜଳ ପ୍ରଳୟ । ଲ୍ୟାଣ୍ଡସ୍ଲାଇଡ, ବାଦଲ ଫଟା ବର୍ଷାରେ ମୃତ୍ୟୁସଂଖ୍ୟା ୫୫ ଛୁଇଁଛି । ସାରାରାଜ୍ୟରେ ପ୍ରକୃତିର କରାଳ ରୂପ । ଏବେ ବି ଅନେକ ଲୋକ ମାଟି ତଳେ ଫସି ରହିଥିବା ବେଳେ ମୃତ୍ୟୁସଂଖ୍ୟା ବଢ଼ିବା ଆଶଙ୍କା କରାଯାଉଛି । ଏନଡିଆରଏଫ, ଆଇଟିବିପି ପକ୍ଷରୁ ରେସ୍କ୍ୟୁ ଅପରେସନ ଜାରି ରହିଛି । ପାହାଡ଼ି ରାଜ୍ୟରେ ବର୍ଷା, ବନ୍ୟା ସ୍ଥିତି ଯୋଗୁଁ ଶିକ୍ଷାନୁଷ୍ଠାନ ବନ୍ଦ ରଖାଯାଇଛି । ଭୂସ୍ଖଳନ ଯୋଗୁଁ ବନ୍ଦ ରହିଥିବା ଚଣ୍ଡିଗଡ଼-ସିମଲା ହାଇଓ୍ବେ ଖୋଲାଯାଇଥିବା ବେଳେ ଗାଡ଼ିମୋଟର ଚଳାଚଳ ସ୍ବାଭାବିକ ହୋଇଛି । ସିମଲାରେ ରେସ୍କ୍ୟୁ ଅପରେସନରେ ସେନା ହେଲିକପ୍ଟର ସାମିଲ କରାଯାଇଛି । ଆଗାମି ଦୁଇ ଦିନ ପାଇଁ ହିମାଚଳ ଓ ଉତ୍ତରାଖଣ୍ଡରେ ପ୍ରବଳ ବର୍ଷା ନେଇ ସତର୍କତା ଜାରି କରିଛି ପାଣିପାଗ ବିଭାଗ । ସିମଲାରେ ଶିବ ମନ୍ଦିର ଧସିଯିବା ଘଟଣାରେ ମୃତ୍ୟୁସଂଖ୍ୟା ୧୫ ଛୁଇଁଛି । ଏବେ ବି ଅନେକ ଲୋକ ମାଟି ତଳେ ଦବି ରହିଛନ୍ତି । ସେମାନଙ୍କୁ ଉଦ୍ଧାର କରିବାକୁ ଉଦ୍ୟମ ଚାଲିଛି । ସେପଟେ ଉତ୍ତରାଖଣ୍ଡରେ ବି ପ୍ରବଳ ବର୍ଷା ଓ ବନ୍ୟା ଯୋଗୁଁ ସ୍ଥିତି ଅସମ୍ଭାଳ ହୋଇଛି । ବିଭିନ୍ନ ସ୍ଥାନରେ କେଦାରନାଥ ଓ ବଦ୍ରିନାଥ ଯାତ୍ରୀ ଫସି ରହିଥିବା ବେଳେ ଗତକାଲି ଓ ଆଜି ପାଇଁ ଚାରଧାମ ଯାତ୍ରା ସ୍ଥଗିତ ରଖାଯାଇଛି । ଏସଡିଆରଏଫ ପକ୍ଷରୁ ରିଳିଫ ଯୋଗାଣ ଓ ରେସ୍କ୍ୟୁ ଅପରେସନ ଜାରି ରହିଛି । ଦୁଇ ଦିନ ଲଗାଣ ବର୍ଷା ଯୋଗୁ ସ୍ଥିତି ଅତି ସଂଗୀନ ହୋଇଥିବା ଗଙ୍ଗା, ଅଳକାନନ୍ଦା, ମନ୍ଦାକିନୀ ନଦୀ ବିପଦସଙ୍କେତ ଉପରେ ପ୍ରବାହିତ ହେଉଛି । ନଦୀ କୂଳବର୍ତ୍ତୀ ଅଞ୍ଚଳରୁ ଲୋକମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି ।
ଲାଲକିଲ୍ଲାରୁ ପ୍ରଧାନମନ୍ତ୍ରୀଙ୍କ ବକ୍ତବ୍ୟକୁ ନେଇ ଖଡଗେଙ୍କ ଆକ୍ରମଣ, ଆରବର୍ଷ ଘରେ ଉଡ଼ାଇବେ ତ୍ରିରଙ୍ଗା
ନୂଆଦିଲ୍ଲୀ : ସ୍ୱାଧୀନତା ଦିବସରେ ପ୍ରଧାନମନ୍ତ୍ରୀଙ୍କ ବିବୃତ୍ତିକୁ ନେଇ ପୁଣି ଜୋର ଧରିଲା ରାଜନୀତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ‘ଆଗାମୀ ବର୍ଷକୁ ପୁଣି ତ୍ରିରଙ୍ଗା ଉଡାଇବି’ ଉକ୍ତିକୁ ନେଇ ଭିନ୍ନ ମତ ଦେଇଛନ୍ତି କଂଗ୍ରେସ ସଭାପତି ମଲ୍ଲିକାର୍ଜୁନ ଖଗଡେ । ସେ ତାଙ୍କୁ ତାତ୍ସଲ୍ୟ କରି କହିଛନ୍ତି ଯେ, ‘ଆସନ୍ତା ବର୍ଷ ମୋଦୀ ତାଙ୍କ ଘରେ ପତାକା ଉତ୍ତୋଳନ କରିବେ। ଆଜି ବି ସେମାନେ ଅହଂକାର ପ୍ରଦର୍ଶନ କରୁଛନ୍ତି, ତାହାଲେ ସେ ଦେଶ କିପରି ଗଢିବେ।’
ବାସ୍ତବରେ ପ୍ରଧାନମନ୍ତ୍ରୀ ଲୋକମାନଙ୍କଠାରୁ ଆଶୀର୍ବାଦ ଲୋଡ଼ିଥିଲେ ଏବଂ କହିଥିଲେ, ଯେତେବେଳେ ଦେଶ ୨୦୪୭ ମସିହାରେ ସ୍ୱାଧୀନତାର 100 ବର୍ଷ ପାଳନ କରିବ, ସେତେବେଳେ ଆମ ଦେଶର ତ୍ରିରଙ୍ଗା ବିଶ୍ୱର ଏକ ବିକଶିତ ଦେଶର ପରିଚୟ ନେଇ ଫରଫର ଉଡିବ | ଏଥିପାଇଁ ସେ ଆସନ୍ତା ୫ ବର୍ଷକୁ ଗୁରୁତ୍ୱପୂର୍ଣ୍ଣ ବୋଲି କହିଥିଲେ ଏବଂ ସେ ଦୃଢ ବିଶ୍ୱାସର ସହ ଲାଲକିଲ୍ଲାରେ ୨୦୨୪ରେ ବି ଜାତୀୟ ପତାକା ଉଠାଇବେ ବୋଲି କହିଥିଲେ।
ଅନ୍ୟପକ୍ଷରେ ଆରଜେଡି ସୁପ୍ରିମୋ ତଥା ବିହାରର ପୂର୍ବତନ ସିଏମ ଲାଲୁ ପ୍ରସାଦ ଯାଦବ ମଧ୍ୟ ଖଡ଼ଗେଙ୍କ କଥାକୁ ଦୋହରାଇଛନ୍ତି। ଆଉ କହିଛନ୍ତି ଯେ ଆଗାମୀ ବର୍ଷ ପ୍ରଧାନମନ୍ତ୍ରୀ ମୋଦି ପତାକା ଉତ୍ତୋଳନ କରିବେ ନାହିଁ। ଏହା ହିଁ ତାଙ୍କର ଅନ୍ତିମ ଉତ୍ତୋଳନ ଅଟେ । ପରବର୍ତ୍ତୀ ସମୟରେ ଏହି କାର୍ଯ୍ୟ ଆମେ କରିବୁ ।
ସେପଟେ ଲାଲକିଲ୍ଲାର ସ୍ୱାଧୀନତା ଦିବସର କାର୍ଯ୍ୟକ୍ରମରେ ସାମିଲ ହେବାକୁ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେଙ୍କୂ ମଧ୍ୟ ନିମନ୍ତ୍ରଣ କରାଯାଇଥିଲା । ହେଲେ ସେ ଏହି କାର୍ଯ୍ୟକ୍ରମରେ ଉପସ୍ଥିତ ନଥିଲେ ଏବଂ ତାଙ୍କ ପାଇଁ ନିର୍ଦ୍ଧାରିତ ଥିବା ଖାଲି ଥିବା ଦେଖିବାକୁ ମିଳିଥିଲା । ଏ ନେଇ କଂଗ୍ରେସ ପକ୍ଷରୁ ବୟାନ ଜାରି କରାଯାଇଛି ।
ସେ କହିଛନ୍ତି କି, ତାଙ୍କୁ ନିଜ ଘରେ ଏବଂ ପରେ କଂଗ୍ରେସ ମୁଖ୍ୟାଳୟରେ ତ୍ରିରଙ୍ଗା ଉଡାଇବାର ଥିଲା । ଏଥିପାଇଁ ସେ ଲାଲକିଲ୍ଲାରେ ହୋଇଥିବା ସମାରୋହରେ ସାମିଲ ହୋଇପାରି ନଥିଲେ । ଯଦି ସେ ଲାଲକିଲ୍ଲାରେ ଅନୁଷ୍ଠିତ ସମାରୋହରେ ସାମିଲ ହୋଇଥାନ୍ତେ ତେବେ ଘରେ ଏବଂ ଦଳୀୟ କାର୍ଯ୍ୟାଳୟରେ ପତାକା ଉତ୍ତୋଳନ କରିପାରିନଥାନ୍ତେ । ସୁରକ୍ଷା କାରଣରୁ ସେ ଲାଲକିଲ୍ଲାରୁ ଶୀଘ୍ର ବାହାରିପାରିନଥାନ୍ତେ । ସେଠାରେ ଅତିକମରେ ୨ ଘଣ୍ଟା ରହିବାକୁ ପଡ଼ିଥାନ୍ତା । ସେ ଆହୁରି ମଧ୍ୟ କହିଛନ୍ତି ରାଷ୍ଟ୍ରପତି ଭବନରେ ସେ ସନ୍ଧ୍ୟାବେଳେ ଉପସ୍ଥିତ ରହିବେ ।
ବଲିଉଡ ଷ୍ଟାର ଅକ୍ଷୟ କୁମାରଙ୍କୁ ମିଳିଲା ଭାରତର ନାଗରିକତା
ନୂଆଦିଲ୍ଲୀ : ବଲିଉଡ ଷ୍ଟାର ଅକ୍ଷୟ କୁମାରଙ୍କୁ ମିଳିଲା ଭାରତର ନାଗରିକତା । ୭୭ତମ ସ୍ୱାଧୀନତା ଦିବସ ଆବସରରେ ଫ୍ୟାନ୍ସଙ୍କୁ ଦେଲେ ଖୁସି ଖବର । ଖିଲାଡି କୁମାରଙ୍କୁ ଭାରତର ପାସପୋର୍ଟ ମିଳିଛି, ଏହି ଖୁସି ଖବରକୁ ସେ ନିଜ ଟ୍ୱିଟ୍ ଜରିଆରେ ନିଜ ଫ୍ୟାନ୍ସଙ୍କୁ ଜଣାଇଛନ୍ତି । ସେ ଟ୍ୱିଟ୍ କରି ଲେଖିଛନ୍ତି କି, ହୃଦୟ ଓ ନାଗରିକତା ଉଭୟ ହିନ୍ଦୁସ୍ତାନୀ ।
ପ୍ରଥମେ ଅକ୍ଷୟଙ୍କ ପାଖରେ କେବଳ କାନାଡାର ନାଗରିକତା ଥିଲା । ଏବେ ସେ ଭାରତର ନାଗରିକତା ହାସଲ କରି ବହୁତ ଖୁସି । ଏନେଇ ସୋସିଆଲ ମିଡିଆରେ ତାଙ୍କ ଫ୍ୟାନ୍ସ ମାନେ ମଧ୍ୟ ତାଙ୍କୁ ଅଭିନନ୍ଦନ ଜାଣାଉଛନ୍ତି ।
Dil aur citizenship, dono Hindustani.
Happy Independence Day!
Jai Hind! 🇮🇳 pic.twitter.com/DLH0DtbGxk— Akshay Kumar (@akshaykumar) August 15, 2023
ସୂଚନା ଅନୁଯାୟୀ, ଅନେକ ଦିନ ଧରି ଅକ୍ଷୟକୁମାର ଭାରତର ନାଗରିକତା ପାଇବା ପାଇଁ ଚେଷ୍ଟା ଜାରି ରଖିଥିଲେ । କାରଣ ତାଙ୍କର ଭାରତର ନାଗରିକତା ନଥିଲା, ଯାହା ଦ୍ୱାରା ତାଙ୍କୁ ବହୁ ସମାଲୋଚନାର ସାମ୍ନା କରିବାକୁ ପଡୁଥିଲା । ସୋସିଆଲ ମିଡିଆରେ ଅକ୍ଷୟଙ୍କୁ କାନାଡ଼ା କୁମାରର ଟ୍ୟାଗ୍ କରି ଟ୍ରୋଲ୍ ମଧ୍ୟ କରୁଥିଲେ । ଲୋକମାନେ ତାଙ୍କୁ କହୁଥିଲେ କି, ଆପଣ ଯେଉଁ ଦେଶରେ କାମ କରୁଛନ୍ତି,ସେ ଦେଶର ନାଗରିତା ନାହିଁ । ଏପରି ନାଗରିକତା ବିବାଦକୁ ନେଇ ପ୍ରଶ୍ନରେ ସେ କେବଳ ଉତ୍ତରରେ ସେ କହୁଥିଲେ କି, ମୋ ହୃଦୟ ହିନ୍ଦୁସ୍ତାନୀ ।
ନୂଆପଡ଼ାର ୩ଟି ସ୍ଥାନର ବିକାଶ ପାଇଁ ମିଳିଲା ୧୫ କୋଟି ଟଙ୍କା
ନୂଆପଡ଼ା : ନୂଆପଡ଼ା ଜିଲ୍ଲାର ୩ଟି ସ୍ଥାନର ବିକାଶ ତଥା ସୌନ୍ଦର୍ଯ୍ୟକରଣ ପାଇଁ ମିଳିଲା ୧୫ କୋଟି ଟଙ୍କା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଅନୁଦାନ ମଞ୍ଜୁର କରିଛନ୍ତି । କୋମନା ବ୍ଲକ ସୁନବେଡ଼ାରେ ଥିବା ମାଆ ସୁନାଦେଈଙ୍କ ପୀଠର ସୌନ୍ଦର୍ଯ୍ୟକରଣ ପାଇଁ ଅଢ଼େଇ କୋଟି, ନୂଆପଡା ବ୍ଲକ ପତୋରାର ଯୋଗେଶ୍ୱର ମନ୍ଦିରର ସୌନ୍ଦର୍ଯ୍ୟକରଣ ପାଇଁ ପାଞ୍ଚ କୋଟି ଓ ବୋଡ଼େନ ବ୍ଲକ ପାତାଳଗଙ୍ଗା ପର୍ଯ୍ୟଟନ କ୍ଷେତ୍ରର ବିକାଶ ପାଇଁ ୭ କୋଟି ୨୦ ଲକ୍ଷ ଟଙ୍କା ମଞ୍ଜୁର ହୋଇଛି ।
ଗତ ମେ ୨୨ ତାରିଖରେ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ ଫାଇଭ-ଟି ସଚିବ ଭି.କେ ପାଣ୍ଡିଆନ ନୂଆପଡା ଜିଲ୍ଲା ଗସ୍ତରେ ଆସି ଏହି ୩ଟି ପ୍ରମୁଖ ସ୍ଥଳୀକୁ ପରିଦର୍ଶନ କରିବା ସହ ସ୍ଥାନୀୟ ଲୋକଙ୍କ ସହ ଆଲୋଚନା କରିଥିଲେ । ଲୋକଙ୍କଠାରୁ ଦାବି ପତ୍ର ଗ୍ରହଣ କରିଥିଲେ। ଏସମ୍ପର୍କରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଅବଗତ କରିବା ପରେ ମୁଖ୍ୟମନ୍ତ୍ରୀ ୧୫ କୋଟି ଟଙ୍କା ମଞ୍ଜୁର କରିଛନ୍ତି । ଶୀଘ୍ର କାମ ଆରମ୍ଭ ହେବ ବୋଲି ନୂଆପଡା ଜିଲ୍ଲାପାଳ ହେମକାନ୍ତ ସାଏ କହିଛନ୍ତି।