ସମ୍ବଲପୁର: ଚାରମାଳ ଥାନା କ୍ଷେତିନାଳି ଗାଁରେ ଅଭାବନୀୟ ଘଟଣା । ସ୍ତ୍ରୀର ପ୍ରେମିକକୁ ଗୁଳି କଲା ସ୍ବାମୀ । ଦୁଇ ବର୍ଷ ହେଲା ଘର ଛାଡି ପ୍ରେମିକ ସହ ରହୁଥିଲେ ସଂପୃକ୍ତ ମହିଳା ।
ହେଲେ ଗତକାଲି ବିଳମ୍ବିତ ରାତିରେ ଉଭୟଙ୍କୁ ଗାଁରେ ଦେଖି ମହିଳାଙ୍କ ସ୍ବାମୀ ଗୁଳି କରି ଫେରାର ହୋଇଯାଇଥିଲେ । ଗୁରୁତର ଅବସ୍ଥାରେ ପ୍ରେମିକ ପଙ୍କଜ ଦେହୁରୀଙ୍କୁ ପ୍ରଥମେ ଭୀମସାର ଓ ପରେ କଟକ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି ।
ଯାଜପୁର: ବରୀ ବ୍ଲକ ପାଲଟପୁର ଗାଁରେ ଅଭାବନୀୟ ଘଟଣା। ମହିଳାଙ୍କୁ ଟାଣିନେଲା କୁମ୍ଭୀର । ବିରୂପା ନଦୀକୁ ଗାଧୋଇବାକୁ ଯାଇଥିବା ବେଳେ ପାଲଟପୁର ଗାଁର ୩୫ ବର୍ଷୀୟ ମହିଳା ଜ୍ୟୋସ୍ନାରାଣୀ ଜେନାଙ୍କୁ କୁମ୍ଭୀର ଟାଣି ଖାଇଦେଇଥିଲା ।
ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ମହିଳାଙ୍କ ମୃତଦେହ ଉଦ୍ଧାର କରିଛି l ସ୍ଥାନୀୟ ଅଞ୍ଚଳରେ ଭୟର ବାତାବରଣ ।
ଭଦ୍ରକ: ଗୋଟିଏ ମାଛର ମୂଲ୍ୟ 5 ଲକ୍ଷ 33 ହଜାର ଟଙ୍କା । କଥାଟା ଶୁଣିଲେ ଆଶ୍ଚର୍ଯ୍ୟ ଲାଗିଲେ ବି ସତ । ଚାନ୍ଦବାଲି ଧାମରା ମୁହାଣ ଠାରୁ ୨୫ କିଲୋମିଟର ଦୂର ସମୁଦ୍ରରୁ ଧୀବର ମଣ୍ଟୁ ମଣ୍ଡଳ ଏହି ବିରଳ ତେଲିଆ ମାଛ ଧରିଥିଲେ ।
ମାଛଟିର ଓଜନ ୨୬ କିଲୋଗ୍ରାମ ହୋଇଥିବା ବେଳେ କେଜି ପ୍ରତି ମାଛର ମୂଲ୍ୟ ୨୦ ହଜାର ୫୦୦ ଟଙ୍କା ରହିଛି । ମୋଟ ୫ ଲକ୍ଷ ୩୩ ହଜାରେ ଟଙ୍କାରେ ମାଛଟିକୁ ନିଲାମ କରାଯାଇଛି । ଏହି ମାଛକୁ ଧାମରା ଚନ୍ଦିନୀପାଳ କଣ୍ଟାରେ ମସ୍ୟଜୀବୀ ଶଙ୍କର ଗିରି ନିଲାମ ନେଇ ବିଦେଶୀ କମ୍ପାନୀକୁ ବିକ୍ରି କରିଛନ୍ତି ।
ନୂଆଦିଲ୍ଲୀ: ଆଜିଠୁ ସର୍ବସାଧାରଣଙ୍କ ପାଇଁ ଖୋଲିବ ରାଷ୍ଟ୍ରପତି ଭବନର ଅମୃତ ଉଦ୍ୟାନ । ସୋମବାର ବ୍ୟତୀତ ସେପ୍ଟେମ୍ବର ୧୭ ତାରିଖ ଯାଏଁ ଉଦ୍ୟାନ ଲୋକଙ୍କ ପାଇଁ ଖୋଲାରହିବ । ସେପ୍ଟେମ୍ବର ୫ ତାରିଖ ଗୁରୁ ଦିବସ ଅବସରରେ କେବଳ ଶିକ୍ଷକମାନଙ୍କ ପାଇଁ ଏହାକୁ ଖୋଲା ରଖିବାକୁ ନିଷ୍ପତ୍ତି ନିଆଯାଇଛି । ଚଳିତ ବର୍ଷରୁ ପ୍ରଥମ ଥର ପାଇଁ ରାଷ୍ଟ୍ରପତି ଭବନର ଅମୃତ ଉଦ୍ୟାନକୁ ସର୍ବସାଧାରଣଙ୍କ ପାଇଁ ବର୍ଷକୁ ଦୁଇଥର ଖୋଲାଯାଉଛି।
ଏଥିପାଇଁ ଅଗଷ୍ଟ ୭ରୁ ଅନଲାଇନ ବୁକିଂ ଆରମ୍ଭ ହୋଇଛି । ପର୍ଯ୍ୟଟକମାନେ ସକାଳ ୧୦ ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ଅମୃତ ଉଦ୍ୟାନ ପରିଦର୍ଶନ କରିପାରିବେ । ମୋଗଲ ଗାର୍ଡେନରୁ ଅମୃତ ଉଦ୍ୟାନକୁ ପରିବର୍ତ୍ତିତ ହୋଇଥିବା ଏହି ଉଦ୍ୟାନରେ ୧୨ ପ୍ରକାରର ୧୦ ହଜାରୁ ଅଧିକ ଟ୍ୟୁଲିପ ଫୁଲ ରହିଛି ।
୧୩୮ରୁ ଅଧିକ ପ୍ରକାରର ଗୋଲାପ, ୭୦ରୁ ଅଧିକ ଅଲଗା ଅଲଗା ପ୍ରଜାତିର ବିଭିନ୍ନ ଫୁଲ ରହିଛି । ଉଦ୍ୟାନକୁ ଦେଶର ପ୍ରଥମ ରାଷ୍ଟ୍ରପତି ଡ. ରାଜେନ୍ଦ୍ର ପ୍ରସାଦ ସାଧାରଣ ଲୋକଙ୍କ ପାଇଁ ଖୋଲିଥିଲେ । ରାଷ୍ଟ୍ରପତି ଭବନକୁ ନିମନ୍ତ୍ରିତ ଅତିଥି ଏବଂ ପର୍ଯ୍ୟଟକଙ୍କ ପାଇଁ ଆକର୍ଷଣର କେନ୍ଦ୍ର ବିନ୍ଦୁ ସାଜିଥାଏ ଏହି ଅମୃତ ଉଦ୍ୟାନ ।
ବେଙ୍ଗାଲୁରୁ: ସଫଳତାର ପାହାଚ ଚଢୁଛି ଇସ୍ରୋ । ଆଉ ମାତ୍ର ସପ୍ତାହେ ପରେ ଚନ୍ଦ୍ରପୃଷ୍ଠରେ ଅବତରଣ କରିବ ଚନ୍ଦ୍ରଯାନ-୩ । ଦିନକୁ ଦିନ ଚନ୍ଦ୍ରର ଖୁବ ନିକଟତର ହେବାରେ ଲାଗିଛି ଚନ୍ଦ୍ରଯାନ-୩ । ଆଜି ହେବ ପଞ୍ଚମ ଲୁନାର ମାନୋଭର ବା କକ୍ଷ ପରିବର୍ତ୍ତନ । କାଲି ପ୍ରପଲସନ ଓ ଲ୍ୟାଣ୍ଡର ମୋଡ୍ୟୁଲ ଅଲଗା ହେବେ । ୧୮ ଅଗଷ୍ଟରେ ଲ୍ୟାଣ୍ଡର ମୋଡ୍ୟୁଲ କକ୍ଷର ଉଚ୍ଚତା ହ୍ରାସ କରାଯିବ ।
୨୦ ଅଗଷ୍ଟରେ ଲ୍ୟାଣ୍ଡର କକ୍ଷରୁ ଅଲଗା କରାଯାଇ ୨୩ ତାରିଖ ସନ୍ଧ୍ୟା ୫ଟା ୪୭ରେ ଏହା ସଫ୍ଟ ଲ୍ୟାଣ୍ଡିଂ କରିବ ବୋଲି ସୂଚନା ମିଳିଛି ।ଗତି ସମୟରେ ଚନ୍ଦ୍ରଯାନର ହରିଜଣ୍ଟାଲ ସ୍ପିଡ ହାରାହାରି ୧ ଦଶମିକ ୬୮ କିଲୋମିଟର ପ୍ରତି ସେକଣ୍ଡ ଅର୍ଥାତ ଘଣ୍ଟାପ୍ରତି ୬ ହଜାର ୪୮ କିଲୋମିଟରକୁ ହ୍ରାସ କରାଯାଇଛି । ସଫ୍ଟ ଲ୍ୟାଣ୍ଡିଂ ସମୟରେ ଏହାର ଗତି ଶୂନକୁ ହ୍ରାସ କରିବା ଲାଗି ବ୍ୟବସ୍ଥା କରାଯାଉଛି ।
ଯଦି ଅଗଷ୍ଟ ୨୩ରେ ସଫ୍ଟ ଲ୍ୟାଣ୍ଡିଂ କରିବାରେ ଚନ୍ଦ୍ରଯାନ-୩ ସଫଳ ହୁଏ ତେବେ ଏକ୍ଷେତ୍ରରେ ଆମେରିକା, ପୂର୍ବତନ ସୋଭିଏତ ଋଷ ଓ ଚୀନ ପରେ ଭାରତ ହେବ ଚତୁର୍ଥ ରାଷ୍ଟ୍ର । ଗତ ୨୦୧୯ରେ ଚନ୍ଦ୍ରଯାନ-୨ ସଫ୍ଟ ଲ୍ୟାଣ୍ଡିଂ ବିଫଳ ହେବା ପରେ ଇସ୍ରୋରେ ଖେଳିଯାଇଥିଲା ନୈରାଶ୍ୟ ।
ଭୁବନେଶ୍ବର: ବାଂଲାଦେଶ ଏବଂ ଏହାର ଆଖପାଖରେ ସୃଷ୍ଟି ହୋଇଥିବା ଘୂର୍ଣ୍ଣିବଳୟ ପ୍ରଭାବରେ ସ୍ବାଭାବିକ ଅବସ୍ଥାନକୁ ଫେରୁଛି ମୌସୁମୀ ନିମ୍ନ ଚାପରେଖା। ପ୍ରଭାବରେ ଆସନ୍ତା ୪ ଦିନ ପର୍ଯ୍ୟନ୍ତ ରାଜ୍ୟରେ ହାଲୁକାରୁ ମଧ୍ୟମ ଧରଣର ବର୍ଷା ସହିତ କିଛି ଜିଲ୍ଲାରେ ପ୍ରବଳ ବର୍ଷା ନେଇ ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର ।
ଆଜି ପ୍ରବଳ ବର୍ଷା ନେଇ ୫ ଜିଲ୍ଲାକୁ ଆଲର୍ଟ କରାଯାଇଛି । ଏସବୁ ଜିଲ୍ଲାରେ ୭୦ରୁ ୧୧୦ମିଲିମିଟର ପର୍ଯ୍ୟନ୍ତ ବର୍ଷା ହେବା ସମ୍ଭାବନା ରହିଛି। କାଲି ଏବଂ ୧୮ତାରିଖରେ ବର୍ଷାର ସର୍ବାଧିକ ପ୍ରଭାବ ପଡିବ। କାଲି ପ୍ରବଳ ବର୍ଷା ନେଇ ବାଲେଶ୍ବର, ଭଦ୍ରକ, ମୟୁରଭଞ୍ଜ, କେନ୍ଦୁଝର, କଟକ, କେନ୍ଦ୍ରାପଡା, ଯାଜପୁର, ଜଗତସିଂହପୁର, ପୁରୀ, ଖୋର୍ଦ୍ଧା, ନୟାଗଡ, ଗଞ୍ଜାମ, ଗଜପତି, ରାୟଗଡା, ନରବଙ୍ଗପୁର, ମାଲକାନଗିରି, କୋରାପୁଟ ଏବଂ ବଲାଙ୍ଗୀର ଜିଲ୍ଲାକୁ ସତର୍କ କରାଇଛି ପାଣିପାଗ କେନ୍ଦ୍ର ।
ଶିମଲା: ହିମାଚଳ ପ୍ରଦେଶରେ ପ୍ରବଳ ବର୍ଷା ଯୋଗୁଁ ଭୂସ୍ଖଳନ ବଢିଚାଲିଛି । ରାଜଧାନୀ ଶିମଲାର କ୍ରିଷ୍ଣା ନଗର ଅଞ୍ଚଳରେ ଭୂସ୍ଖଳନ ଘଟିଛି । ଯେଉଁଥିରେ ଅନେକ ଲୋକ ପୋତି ହୋଇଯାଇଥିବା ଆଶଙ୍କା କରାଯାଉଛି । ଶିମଲାରେ ଘଟିଥିବା ଘଟଣା ସମୟରେ ଲାଲପାଣି ଅଞ୍ଚଳରେ ଥିବା ସ୍ଲଟର ହାଉସର କୋଠା ମଧ୍ୟ ହଠାତ୍ ଭୁଶୁଡ଼ି ପଡ଼ିଥିବା ବେଳେ ଭୂସ୍ଖଳନ ଯୋଗୁଁ ୫ରୁ ଅଧିକ ଘର ଓ ଅନେକ ଯାନବାହନ ମଧ୍ୟ କ୍ଷତିଗ୍ରସ୍ତ ହୋଇଛି ।
ସ୍ଲଟର ହାଉସ୍ କୋଠା ଭୁଶୁଡ଼ି ପଡ଼ିବାରୁ ଅନେକ ଲୋକ ଫସି ରହିଥିବା ଆଶଙ୍କା କରାଯାଉଛି। ଗଛ ପଡ଼ିବାରୁ କୋଠାଟି ଭୁଶୁଡ଼ି ପଡ଼ିଥିଲା। ଏକ ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚିଛନ୍ତି । ହିମାଚଳ ପ୍ରଦେଶରେ ବାଦଲଫଟା ବର୍ଷା ଓ ଭୂସ୍ଖଳନ ଯୋଗୁଁ ଏପର୍ଯ୍ୟନ୍ତ 60ରୁ ଅଧିକ ଲୋକଙ୍କ ମୃତ୍ୟୁ ହରାଇସାରିଲାଣି । ଦିନକୁ ଦିନ ମୃତ୍ୟୁସଂଖ୍ୟା ବଢିଚାଲିଛି ।
ରାଜ୍ୟ ଜରୁରୀକାଳୀନ ପରିଚାଳନା କେନ୍ଦ୍ରର ସୂଚନା ଅନୁଯାୟୀ, ବିପର୍ଯ୍ୟୟ ଯୋଗୁଁ ରାଜ୍ୟର ୭୫୨ଟି ରାସ୍ତା ବନ୍ଦ ରହିଛି। କାଲକା-ଶିମଲା ରେଳ ପଥ ଗୁରୁତର ଭାବେ କ୍ଷତିଗ୍ରସ୍ତ ହୋଇଛି । ପ୍ରବଳ ବର୍ଷା ଯୋଗୁଁ ରାଜ୍ୟର ଅଧିକାଂଶ ଅଞ୍ଚଳରେ ସ୍କୁଲ କଲେଜ ବନ୍ଦ ରହିଛି ।
ଭୁବନେଶ୍ବର: ରାଜଧାନୀରେ ଚାଞ୍ଚଲ୍ୟ । ସ୍ବାଧୀନତା ଦିବସରେ ଭୁବନେଶ୍ବରରେ ହତ୍ୟାକାଣ୍ଡ । ଖଣ୍ଡଗିରି ବାରି ବସ୍ତିରେ ବୃଦ୍ଧାଙ୍କୁ ବୀଭତ୍ସ ହତ୍ୟା । ବୃଦ୍ଧାଙ୍କ ଗଳା କାଟି ହତ୍ୟା ଦୁର୍ବୃତ୍ତ ହତ୍ୟା କରିଥିବାବେଳେ ବୋହୁ ଗୁରୁତର ହୋଇଛନ୍ତି । ହତ୍ୟାକାଣ୍ଡର କାରଣ ଅସ୍ପଷ୍ଟ ରହିଛି । ଡାକ୍ତରଖାନାରେ ବୋହୁଙ୍କ ଚିକିତ୍ସା କରାଯାଉଛି । ମୃତ ବୃଦ୍ଧା ଗଞ୍ଜାମ ଜିଲ୍ଲା ବେଲଗୁଣ୍ଠାର ହୋଇଥିବା ସୂଚନା ମିଳିଛି । ଘରେ ବୃ୍ଦ୍ଧାଙ୍କ ସହ ତାଙ୍କ ସାନ ପୁଅ ଓ ବୋହୁ ରହୁଥିଲେ । ସଂଧ୍ୟାରେ ଘର ଭିତରୁ କିଛି ଶବ୍ଦ ଶୁଣାଯିବାରୁ ପଡୋଶୀ ପୋଲିସକୁ ଖବର ଦେଇଥିଲେ । ବୋହୂ ବୈଶାଖୀ ପଲେଇ ସୁସ୍ଥ ହେଲା ପରେ ବୃଦ୍ଧାଙ୍କ ମୃତ୍ୟୁ ପଛର ରହସ୍ୟ ଜଣାପଡ଼ିବ । ଘଟଣାସ୍ଥଳରେ ଭୁବନେଶ୍ବର ଡିସିପି ପହଞ୍ଚି ତଦନ୍ତ କରିଛନ୍ତି । ଭରତପୁର ଥାନା ପୋଲିସ ଓ ସାଇଣ୍ଟିଫିକ୍ ମଧ୍ୟ ଟିମ୍ ତଦନ୍ତ କରୁଛି । ପୂର୍ବ ଶତ୍ରୁତାରୁ ହତ୍ୟାକାଣ୍ଡ ଘଟିଥିବା ସନ୍ଦେହ କରାଯାଉଛି ।
ନୂଆଦିଲ୍ଲୀ: ଆସନ୍ତା ଅକ୍ଟୋବର ୫ ତାରିଖରୁ ବିଶ୍ୱକପ ମହାକୁମ୍ଭ । ନଭେମ୍ବର ୧୯ ତାରିଖରେ ଫାଇନାଲ ମୁକାବିଲା । ନୂଆ କାର୍ଯ୍ୟସୂଚୀରେ ୯ଟି ମ୍ୟାଚର ତାରିଖ ଅଦଳବଦଳ ହୋଇଥିବା ବେଳେ ଟିକେଟ ପାଇଁ ମଧ୍ୟ ଘୋଷଣା ହୋଇଛି । ବିଶ୍ୱକପ ଟିକେଟ ପାଇଁ ସର୍ବପ୍ରଥମେ କ୍ରିକେଟପ୍ରେମୀଙ୍କୁ ରେଜିଷ୍ଟ୍ରେସନ କରିବାକୁ ହେବ । ଆଉ ଏହାପରେ ହିଁ ଜଣେ ଦର୍ଶକ ଟିକେଟ କିଣିପାରିବ । ଟିକେଟ ପାଇଁ ଆଜି ଠାରୁ ରେଜିଷ୍ଟ୍ରେସନ ଆରମ୍ଭ ହୋଇଛି, ପଞ୍ଜୀକରଣ ବେଳେ ନାମ, ଠିକଣା ଓ କେଉଁ ଦେଶର ନାଗରିକ ତାହାର ତଥ୍ୟ ଦେବାକୁ ପଡିବ । ରେଜିଷ୍ଟ୍ରେସନ ପରେ ଟିକେଟ ବୁକିଂ ପାଇଁ ୨୫ ଅଗଷ୍ଟ ପର୍ଯ୍ୟନ୍ତ ଅପେକ୍ଷା କରିବାକୁ ହେବ । ୨୫ ଅଗଷ୍ଟରୁ ପର୍ଯ୍ୟାୟକ୍ରମେ ବିଶ୍ୱକପ ମ୍ୟାଚ୍ ପାଇଁ ଟିକେଟ ବିକ୍ରି ହେବ । ଭାରତୀୟ ଟିମର ମ୍ୟାଚକୁ ଛାଡି ଅନ୍ୟ ମ୍ୟାଚର ଟିକେଟ ଓ ଅଭ୍ୟାସ ମ୍ୟାଚ୍ ପାଇଁ ଟିକେଟ ଅଗଷ୍ଟ ୨୫ରୁ ଉପଲବ୍ଧ ହେବ । ସେହିଭଳି ଟିମ୍ ଇଣ୍ଡିଆର ମ୍ୟାଚ୍ ଓ ଅଭ୍ୟାସ ମ୍ୟାଚର ଟିକେଟ ୩୦ ଅଗଷ୍ଟରୁ ୩ ସେପ୍ଟେମ୍ବର ମଧ୍ୟରେ ଉପଲବ୍ଧ ହେବ । ଭାରତ-ପାକିସ୍ତାନ ମ୍ୟାଚର ଟିକେଟ ସେପ୍ଟେମ୍ବର ୩ ତାରିଖରେ ମିଳିବ । ସେହିଭଳି ସେମିଫାଇନାଲ ଓ ଫାଇନାଲ ମୁକାବିଲାର ଟିକେଟ ୧୫ ସେପ୍ଟେମ୍ବରରେ କିଣିପାରିବେ ଦର୍ଶକ । ଟିକେଟ ବୁକ୍ କରିବା ପରେ କାଉଣ୍ଟରରୁ ଟିକେଟ ନେଲେ ହିଁ ଷ୍ଟାଡିୟମରେ ପ୍ରବେଶ ପାଇଁ ଅନୁମତି ମିଳିବ ।
ବିସିସିଆଇ ବୁକ୍ ମାଇଁ ସୋ’କୁ ନିଜର ଟିକେଟ ପାର୍ଟନର କରିଛି । ଭାରତର ମ୍ୟାଚ୍ ପାଇଁ ୫ଟି ପର୍ଯ୍ୟାୟରେ ଟିକେଟ ବିକ୍ରି ହେବ । ଅଷ୍ଟ୍ରେଲିଆ ଓ ଆଫଗାନିସ୍ତାନ ବିପକ୍ଷ ମ୍ୟାଚ୍ ପାଇଁ ୩୧ ଅଗଷ୍ଟରେ ଟିକେଟ ଉପଲବ୍ଧ ହେବ । ସେହିଭଳି ନ୍ୟୁଜିଲାଣ୍ଡ, ଇଂଲଣ୍ଡ, ଶ୍ରୀଲଙ୍କା ବିପକ୍ଷ ମ୍ୟାଚ୍ ପାଇଁ ୧ ସେପ୍ଟେମ୍ବରରେ ଟିକେଟ ମିଳିବ । ଦକ୍ଷିଣ ଆଫ୍ରିକା ଓ ନେଦରଲାଣ୍ଡସ ମ୍ୟାଚ୍ ପାଇଁ ୨ ସେପ୍ଟେମ୍ବରରେ ଟିକେଟ ଉପଲବ୍ଧ ହେବାକୁ ଥିବା ବେଳେ ଭାରତ-ପାକିସ୍ତାନ ମ୍ୟାଚ୍ ପାଇଁ ସେପ୍ଟେମ୍ବର ୩ରେ ଟିକେଟ ମିଳିବ ।
ଭୁବନେଶ୍ବର: ଭାରତୀୟ ହକିକୁ ନେଇ ନିର୍ମାଣ ହୋଇଥିବା ଡକ୍ୟୁମେଣ୍ଟ୍ରି ଫିଲ୍ମ INDIA’S GAME ର ସ୍ବତନ୍ତ୍ର ସ୍କ୍ରିନିଂ ଲୋକସେବା ଭବନରେ ଅନୁଷ୍ଠିତ ହୋଇଯାଇଛି । ଦେଶକୁ ଏକାଠି କରିଥିବା ଏକ ଦଳର କାହାଣୀ ଏହି ଡକ୍ୟୁମେଣ୍ଟ୍ରିରେ ସ୍ଥାନ ପାଇଛି । ଏହି ଡକ୍ୟୁମେଣ୍ଟ୍ରି ଫିଲ୍ମକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଲୋକାର୍ପଣ କରିଛନ୍ତି। ଲେଭେଲ ଫିଲ୍ମ ଦ୍ୱାରା ଡକ୍ୟୁମେଣ୍ଟ୍ରି ଫିଲ୍ମଟି ନିର୍ମାଣ ହୋଇଛି । ସ୍ଵତନ୍ତ୍ର ସ୍କ୍ରିନିଂ ଉତ୍ସବ ରେ ମୁଖ୍ୟ ଶାସନ ସଚିବଙ୍କ ସହ ବିଭିନ୍ନ ବିଭାଗର ସଚିବ, ହକି ଇଣ୍ଡିଆର କର୍ମକର୍ତ୍ତା, ଭାରତୀୟ ହକି ଦଳର ଓଡ଼ିଆ ଲିଜେଣ୍ଡ ଖେଳାଳି, ବିଶିଷ୍ଟ ବ୍ୟକ୍ତିତ୍ୱ ମାନେ ଉପସ୍ଥିତ ଥିଲେ । ୧୯୨୮ ମସିହା ଆମଷ୍ଟରଡ଼ାମ ଅଲିମ୍ପିକ ସ୍ବର୍ଣ୍ଣ ପଦକ ଠାରୁ ଆରମ୍ଭ କରି ୧୯୮୦ ମସ୍କୋ ଅଲିମ୍ପିକର ସ୍ବର୍ଣ୍ଣ ପଦକ ଜିତିବାର କାହାଣୀ ସ୍ଥାନ ପାଇଛି । ୧୯୭୫ରେ ଉଭୟ ଭାରତୀୟ ହକି ଏବଂ କ୍ରିକେଟ ଦଳ ବିଶ୍ଵ ଚମ୍ପିୟାନ ହେବା ପରେ ପରେ କେମିତି ଭାରତୀୟ ହକି ରସାତଳଗାମୀ ହେଲା ଓ କ୍ରିକେଟର ଉତଥାନ ହେଲା ସେ ବିଷୟ ସ୍ଥାନ ପାଇଛି । ୧୯୮୦ ପରେ ପଦକ ଶୂନ୍ୟ ଭାରତୀୟ ହକି ଦଳକୁ ଓଡିଶା ସରକାର ଏବଂ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସହାୟତାର ହାତ ବଢାଇଲେ । ଏହା ପରେ ଟୋକିଓ ଅଲିମ୍ପିକରେ ବ୍ରୋଞ୍ଚ ପଦକ ଜିତିଲା ଭାରତ । ସେ ସମ୍ପର୍କରେ ଡକ୍ୟୁମେଣ୍ଟ୍ରି ଫିଲ୍ମରେ ସ୍ଥାନ ପାଇଛି । ଏହି ଡକ୍ୟୁମେଣ୍ଟ୍ରି ଫିଲ୍ମଟି ସମସ୍ତ ପଦକ ବିଜେତା ହକି ଖେଳାଳି ଏବଂ ସ୍ଵାଧୀନତା ସଂଗ୍ରାମୀ ମାନଙ୍କ ଉଦେଶ୍ୟରେ ସ୍ୱାଧୀନତା ଦିବସରେ ଶ୍ରଦ୍ଧାଞ୍ଜଳି ଜଣାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ l ଏହି ଡକ୍ୟୁମେଣ୍ଟ୍ରି ଫିଲ୍ମ ଫାଇଭ-ଟି ସଚିବ ଭିକେ ପାଣ୍ଡିଆନଙ୍କ ପରିକଳ୍ପନାରେ ପ୍ରସ୍ତୁତ ହୋଇଛି l ଆଗକୁ ଏହି ଡକ୍ୟୁମେଣ୍ଟ୍ରି ଫିଲ୍ମ ଓଡ଼ିଆ ଭାଷାରେ ଆସିବ ।
