ନନ୍ଦିଘୋଷ ବ୍ୟୁରୋ: ସାଢ଼େ ତିନି ମାସ ଧରି ଜଳୁଛି ମଣିପୁର । କୁକୀ-ମିତେଇ ବିବାଦକୁ ନେଇ ଜଳୁଛି ପୂରା ରାଜ୍ୟ । ଆଜି ସକାଳୁ ଉଖରୁଲ ଜିଲ୍ଲାର କୁକୀ ଗାଁରେ ଆଖିବୁଜା ଫାୟାରିଂ ହୋଇଥିବା ବେଳେ ତିନି କୁକୀ ପ୍ରତିନିଧିଙ୍କ ମୃତ୍ୟୁ ହୋଇଛି । ସୁରକ୍ଷାକର୍ମୀ ଓ ଗ୍ରାମବାସୀଙ୍କ ଦ୍ବାରା ବହୁ ଖୋଜାଖୋଜି ପରେ ତିନି ଜଣଙ୍କ ମୃତଦେହ ଉଦ୍ଧାର ହୋଇଛି । ଗତ ମେ ୩ ତାରିଖରୁ ମଣିପୁରରେ ସାମ୍ପ୍ରଦାୟିକ ହିଂସା ଲାଗି ରହିଥିବା ବେଳେ ଦେଢ଼ ଶହରୁ ଅଧିକ ଲୋକଙ୍କର ମୃତ୍ୟୁ ହୋଇଚି । ୩ହଜାର ଲୋକ ଆହତ, ଗୁରୁତର ହୋଇଛନ୍ତି । ପ୍ରାୟ ୬୦ ହଜାର ଲୋକଙ୍କ ଘର ଜଳାଇ ଦିଆଯାଇଥିବା ବେଳେ ସେମାନେ ରିଲିଫ କ୍ୟାମ୍ପରେ ଆଶ୍ରୟ ନେଇଛନ୍ତି । ସେପଟେ ହିଂସାଗ୍ରସ୍ତ ରାଜ୍ୟର ସ୍ଥିତି ସମୀକ୍ଷା ପାଇଁ ଆଜିଠୁ ତିନି ଦିନିଆ ମଣିପୁର ଗସ୍ତରେ ଯାଇଛନ୍ତି ସିପିଆଇଏମର ୪ ଜଣିଆ ସଦସ୍ୟ । ସାଧାରଣ ସମ୍ବାଦକ ସୀତାରାମ ୟେଚୁରୀରେ ନେତୃତ୍ବରେ ଚାରି ଜଣିଆ ଟିମ୍ ମଣିପୁର ଗସ୍ତ କରିଛନ୍ତି । ମଣିପୁର ପ୍ରତି ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଅବହେଳାକୁ ନେଇ ବର୍ଷିଛନ୍ତି ସିପିଆଇଏମ ନେତା ବିନୟ ବିଷ୍ଣୋଇ ।
ବନ୍ଧା ହେଲେ ନକଲି ସୂଚନା ଅଧିକାର କର୍ମୀ
ଭୁବନେଶ୍ବର: ରାଜଧାନୀରୁ ବନ୍ଧା ହେଲେ ନକଲି ସୂଚନା ଅଧିକାର କର୍ମୀ। ଚାକିରି ଆଶାୟୀ, କ୍ରଶର ଲାଇସେନ୍ସ,, ମଦ ଲାଇସେନ୍ସ,, ବଦଳି ଓ ଚାକିରି ଦେବାକୁ କହି କୋଟି କୋଟି ଟଙ୍କା ଠକେଇର ମାଷ୍ଟର ମାଇଣ୍ଡ କିଶୋର ମିଶ୍ରକୁ ଭୁବନେଶ୍ୱରରୁ ଗିରଫ କଲା କ୍ରାଇମବ୍ରାଞ୍ଚ ଏସଟିଏଫ୍ । ଗିରଫ ପରେ କୋରାପୁଟ ଏସଡିଜେଏମରେ କରାଗଲା ହାଜର । କିଶୋର ମିଶ୍ର ଗ୍ୟାଙ୍ଗରେ ରାଜ୍ୟ ତମାମ ଲୋକ ସଂପୃକ୍ତ ଥିବା ସୁରାକ ପାଇଛି ଏସଟିଏଫ୍ । କିଶୋରଙ୍କୁ ରିମାଣ୍ଡରେ ଆଣି ପଚରାଉଚରା କରାଯିବା ସହ ଗ୍ୟାଙ୍ଗରେ ସମ୍ପୃକ୍ତ ଲୋକଙ୍କୁ ଗିରଫ କରାଯିବ । ଗତ ୨ରୁ ୩ବର୍ଷ ମଧ୍ୟରେ ତାଙ୍କ ଆକାଉଣ୍ଟରେ ୨କୋଟିରୁ ଅଧିକ ଜମା ହୋଇଛି । ଯାହାର ଆକାଉଣ୍ଟ ଷ୍ଟେଟମେଣ୍ଟ ପାଇଛି ପୋଲିସ ।
ଡମ୍ପରକୁ ପଛପଟୁ ଧକ୍କା ଦେଲା ଯାତ୍ରୀବାହୀ ବସ୍
ବାରିପଦା: ଡମ୍ପରକୁ ପଛପଟୁ ଧକ୍କା ଦେଲା ଯାତ୍ରୀବାହୀ ବସ୍, ଅଳ୍ପକେ ବର୍ତ୍ତିଲେ ଯାତ୍ରୀ । ୧୮ ନମ୍ବର ଜାତୀୟ ରାଜପଥ ମୟୂରଭଞ୍ଜ ଜିଲ୍ଲା ବେତନଟୀ ଥାନା ନଣ୍ଡାଶୋଳ ନିକଟରେ ଏହି ଦୁର୍ଘଟଣା ଘଟିଛି । ’ବାସୁଦେବ’ ନାମକ ଏକ ଯାତ୍ରୀବାହୀ ବସ ବାଲେଶ୍ଵରରୁ ବାରିପଦା ଆସୁଥିବା ବେଳେ ଘଟିଛି ଦୁର୍ଘଟଣା। ଦୁର୍ଘଟଣାରେ ଡ୍ରାଇଭର ଗୁରୁତର ଆହତ ହୋଇଥିବା ବେଳେ ଯାତ୍ରୀମାନେ ସୁରକ୍ଷିତ ଅଛନ୍ତି । ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ କରୁଛି ।
ମୋକିମଙ୍କ ପାଇଁ ବଢ଼ିଲା ଅଡୁଆ
କଟକ: ବିଧାୟକ ମହମ୍ମଦ ମୋକିମଙ୍କ ଭିଜିଲାନ୍ସ କୋର୍ଟ ରାୟ ଉପରେ ହାଇକୋର୍ଟରୁ ରହିତାଦେଶ ପାଇବା ମାମଲା । ମେଟ୍ରୋ ବିଲଡର୍ସ ମାମଲାରେ ଭିଜିଲାନ୍ସ ଜେଲ ଦଣ୍ଡ ସହ ସଭ୍ୟ ପଦ୍ଦ ରଦ୍ଦ ମାମଲାରେ ହାଇକୋର୍ଟରେ ଶୁଣାଣି ହୋଇଛି । ମୁଖ୍ୟ ବିଚାରପତି ଶୁଭାଶିଷ ତାଳପତ୍ରଙ୍କ କୋର୍ଟରେ ଜନସ୍ବାର୍ଥ ମାମଲାର ଶୁଣାଣି ହୋଇଛି । ଜନସ୍ୱାର୍ଥ ମାମଲାର ଶୁଣାଣି କରିବା ସହିତ ଏହାର ପରିସମାପ୍ତି ଘଟାଇଛନ୍ତି କୋର୍ଟ । ଏହିପରି ମାମଲାର ଶୁଣାଣି ପାଇଁ ଜଣିକିଆ ସ୍ୱତନ୍ତ୍ର ବେଞ୍ଚ ଗଠନ କରାଯାଇଥିବା କୋର୍ଟ ଅବଗତ କରାଇବା ସହିତ କେସର ପରିସମାପ୍ତି ଘଟାଇଛନ୍ତି । ମୁଖ୍ୟ ବିଚାରପତି ସୁଭାଶିଷ ତାଳପତ୍ରଙ୍କ କୋର୍ଟରେ ଆଜି ଏହାର ଶୁଣାଣି ହୋଇଥିଲା । ମେଟ୍ରୋ ବିଲ୍ଡର୍ସ ମାମଲାରେ ଭିଜିଲାନ୍ସ ୩ ବର୍ଷ ସଜା ଶୁଣାଇଥିଲେ ।
ଏହା ଉପରେ ମୋକିମ ରହିତାଦେଶ ଆଣିଥିଲେ । ମାମଲାର ପରବର୍ତ୍ତୀ ଶୁଣାଣି ପାଇଁ ଫେବ୍ରୁଆରୀ ୨୨ ତାରିଖକୁ ଦିନ ଧାର୍ଯ୍ୟ ହୋଇଥିଲା । ହେଲେ ଏହା ପରବର୍ତ୍ତୀ ସମୟରେ ଆଉ ତାଲିକାଭୁକ୍ତ ହୋଇପାରିନଥିଲା । ତେବେ ମାମଲାର ତ୍ବରିତ ବିଚାରପାଇଁ ଡାକ୍ତର ରବି ରଂଜନ ସାହୁଙ୍କ ସହ ତିନି ଜଣ ବ୍ୟକ୍ତି ଏକ ଜନସ୍ବାର୍ଥ ମାମଲା ଦାୟର କରିଥିଲେ । ଯାହାର ଆଜି ଶୁଣାଣି କରି କୋର୍ଟ ଜଣିକିଆ ସ୍ବତନ୍ତ୍ର ବେଞ୍ଚ ଗଠନ କରାଯାଇଥିବା କହି କେସର ଅନ୍ତ ଘଟାଇଛନ୍ତି । ଅନ୍ୟପଟେ ଏହି ମାମଲାର ୬ ମାସ ମଧ୍ୟରେ ଶୁଣାଣି ସରିବ ବୋଲି କୋର୍ଟ ଆଶା କରିଛନ୍ତି ।
ଚିନ୍ତା ବଢ଼ାଇଲା କୋଭିଡର ନୂଆ ଭାରିଆଣ୍ଟ BA.2.86
ନନ୍ଦିଘୋଷ ବ୍ୟୁରୋ: ତିନିଟି ଦେଶରେ ଚିନ୍ତା ସୃଷ୍ଟି କଲା କୋଭିଡର ନୂଆ ଭାରିଆଣ୍ଟ BA.2.86 । ଏହି ଭାରିଆଣ୍ଟ ଅଧିକ ଶକ୍ତିଶାଳୀ ବୋଲି ସୂଚନା ମିଳିଛି । ଆମେରିକା ସେଣ୍ଟର ଫର ଡିଜିଜ କଣ୍ଟ୍ରୋଲ ଆଣ୍ଡ ପ୍ରିଭେନସନ ପକ୍ଷରୁ କୁହାଯାଇଛି ମହାମାରୀ କୋଭିଡ-୧୯ର କାରଣ ସାଜିଥିବା ଭାଇରସର ଏକ ନୂଆ ଅତ୍ୟଧିକ ମ୍ୟୁଟେଟେଡ ଲିନିଏଜ BA.2.86 ଏବେ ପ୍ରସାରିତ ହେଉଛି । ଆମେରିକା, ଇସ୍ରାଏଲ ଓ ଡେନମାର୍କରେ ଏହି ନୂଆ ଭାରିଆଣ୍ଟ ପ୍ରଭାବ ବିସ୍ତାର କରୁଛି । ଆମେରିକାର ସିଡିସି ପକ୍ଷରୁ କୁହାଯାଇଛି- ଏହି ମାରାତ୍ମକ ଭୂତାଣୁ ସମ୍ପର୍କରେ ଦୃଷ୍ଟି ରଖାଯାଇଛି ଏବଂ ସତର୍କତା ଜାରି କରାଯାଇଛି । ଏହି ଭାରିଆଣ୍ଟକୁ ମନିଟରିଂ କରାଯାଉଥିବା ନେଇ କହିଛି ବିଶ୍ବ ସ୍ବାସ୍ଥ୍ୟ ସଂଗଠନ । ଏହି ଭୂତାଣୁ ଅନେକ ପ୍ରକାର ମ୍ୟୁଟେସନରୁ ସୃଷ୍ଟି ହୋଇଛି ବୋଲି ସଂଗଠନ କହିଛି । ୨୦୧୯ରେ କୋଭିଡର ମୁଖ୍ୟ କାରଣ ସାଜିଥିବା ସାର୍ସ କୋଭିଡ-୨ ସମେତ ସମସ୍ତ ଭାଇରସର ମ୍ୟୁଟେସନ ଘଟିବାରେ ଲାଗିଛି । ତେବେ ଅନେକ ଭାରିଆଣ୍ଟର ଖୁବ୍ କମ୍ ପ୍ରଭାବ ରହିବା ବେଳେ କେତେକ ଭାରିଆଣ୍ଟର ପ୍ରଭାବ ଆଦୌ ପଡୁନାହିଁ । ବର୍ତ୍ତମାନ ବିଶ୍ବ ସ୍ବାସ୍ଥ୍ୟ ସଂଗଠନ ୩ଟି ଭାରିଆଣ୍ଟକୁ ଟ୍ରାକିଂ କରୁଥିବାବେଳେ ୭ଟି ଭାରିଆଣ୍ଟକୁ ମନିଟରିଂ କରୁଥିବା ସୂଚନା ମିଳିଛି ।
ଦିଲ୍ଲୀରୁ ପୁନେ ଯାଉଥିବା ଭିସ୍ତାରା ବିମାନରେ ବୋମା ଆତଙ୍କ
ନୂଆଦିଲ୍ଲୀ: ବିମାନରେ ବୋମା ଆତଙ୍କ । ଦିଲ୍ଲୀରୁ ପୁନେ ଯାଉଥିବା ଭିସ୍ତାରା ବିମାନରେ ବୋମା ଥିବା ସୂଚନା ମିଳିବା ପରେ ଯାତ୍ରୀଙ୍କୁ ବାହାର କରାଯାଇ ବିମାନର ଯାଞ୍ଚ ଚାଲିଛି । ଆଇସୋଲେସନ ଓ୍ବେରେ ସୁରକ୍ଷାକର୍ମୀମାନେ ବିମାନର ଯାଞ୍ଚ କରୁଛନ୍ତି । ବିମାନରେ ବୋମା ଥିବା ନେଇ କଲ ସେଣ୍ଟରକୁ ଏକ ଫୋନ କଲ ଆସିବା ପରେ ସୁରକ୍ଷା ଏଜେନ୍ସି ଆଲର୍ଟ ରହିଛି ।
ପିପିଲି ଚାନ୍ଦୁଆ ଶିଳ୍ପର ହେବ ବିକାଶ, ସପ୍ତାହେ ଭିତରେ ଖୁସି ଖବର ଦେବେ ମୁଖ୍ୟମନ୍ତ୍ରୀ
ପିପିଲି: ପିପିଲି ଚାନ୍ଦୁଆ ଶିଳ୍ପର ହେବ ବିକାଶ । ଏଥିପାଇଁ ସପ୍ତାହେ ଭିତରେ ଖୁସି ଖବର ଦେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପୁରୀ ଜିଲ୍ଲାର ରୂପାନ୍ତରଣ ପାଇଁ ଗ୍ରାଉଣ୍ଡରେ ଅନୁଧ୍ଯାନ କରି ଏହି ପ୍ରତିଶ୍ରୁତି ଦେଇଛନ୍ତି ଫାଇଭ-ଟି ସଚିବ ଭିକେ ପାଣ୍ଡିଆନ । ଫାଇଭ-ଟି ସଚିବ କହିଛନ୍ତି, ପିପିଲି ଚାନ୍ଦୁଆ ଓଡ଼ିଶା କଳାର ପରିଚୟ । ଏହାର ଉନ୍ନତିକରଣ ପାଇଁ ଡିପିଆର ପ୍ରସ୍ତୁତ କରିବାକୁ ଜିଲ୍ଲାପାଳଙ୍କୁ ସେ ନିର୍ଦ୍ଦେଶ ଦେଇଛନ୍ତି ।
ପିପିଲି ଇନ୍ଦିରା ଗାନ୍ଧୀ ପଡ଼ିଆରେ ଲୋକଙ୍କ ସହିତ ଆଲୋଚନା କରିଛନ୍ତି ଫାଇଭ-ଟି ସଚିବ । ପ୍ରତି ଲୋକଙ୍କ ପାଖକୁ ଯାଇ ସମସ୍ୟା ଶୁଣିଛନ୍ତି । ଏହି ସମୟରେ ଫାଇଭ-ଟି ସଚିବଙ୍କୁ ରାକ୍ଷୀ ପିନ୍ଧାଇଦେଇଥିଲେ ମହିଳା । ଲୋକଙ୍କଠାରୁ ଦରଖାସ୍ତ ଗ୍ରହଣ କରି ଆସନ୍ତା ସାତ ଦିନ ଅର୍ଥାତ ୨୫ ତାରିଖ ଭିତରେ ଧର୍ମାନୁଷ୍ଠାନ ସମ୍ପର୍କିତ ଦାବି ପୂରଣ କରାଯାଇ ଖୁସି ଖବର ମିଳିବ ବୋଲି ପ୍ରତିଶ୍ରୁତି ଦେଇଛନ୍ତି ।
ମୁଖ୍ୟମନ୍ତ୍ରୀ ଦେଉଥିବା ଅନୁଦାନକୁ ସ୍ବଚ୍ଛତାର ସହିତ ବିନିଯୋଗ କଲେ ଆଗକୁ ଅଧିକ ଅର୍ଥ ପ୍ରଦାନ କରାଯିବ ବୋଲି ଫାଇଭ-ଟି ସଚିବ କହିଛନ୍ତି । ଦିନେ ଦୁଇଦିନ ମଧ୍ୟ ପିଇବା ପାଣି ସମ୍ପର୍କିତ ଯାହା ବି ସମସ୍ୟା ରହିଛି ତାହାର ସମାଧାନ କରାଯିବ । ଏହି ଅବସରରେ ମିଶନ ଶକ୍ତି ମାଆଙ୍କୁ ପ୍ରଶଂସା କରିଥିଲେ ଭିକେ ପାଣ୍ଡିଆନ ।
ମୁଖ୍ୟମନ୍ତ୍ରୀ ପ୍ରତି ସରକାରୀ କାର୍ଯ୍ୟକ୍ରମରେ ମିଶନ ଶକ୍ତି ମାଆମାନଙ୍କୁ ସାମିଲ କରୁଛନ୍ତି । ଏହାଦ୍ବାରା ମାଆ ସ୍ବାବଲମ୍ବୀ ହୋଇ ଘର ଚଳାଉଛନ୍ତି । ସେହିପରି ବିଏସକେଓ୍ବାଇ ଲୋକଙ୍କ ପାଇଁ ସଞ୍ଜୀବନୀ ସାଜିଛି । ଏହା ମାଧ୍ୟମରେ ଦେଶର ବଡ଼ ବଡ଼ ହସ୍ପିଟାଲରେ ମାଗଣା ଚିକିତ୍ସା ସୁବିଧା ଉପଲବ୍ଧ ହେଉଛି । ଚାଷୀମାନଙ୍କୁ ମଧ୍ୟ ରାଜ୍ୟ ସରକାର ଏକ ଲକ୍ଷ ଟଙ୍କା ଯାଏ ବିନା ସୁଧରେ ଋଣ ପ୍ରଦାନ କରୁଛନ୍ତି । ଫସଲ ବୀମା ପ୍ରିମିୟମ ଚାଷୀଙ୍କୁ ଦେବାକୁ ପଡ଼ୁନାହିଁ । ସେହିପରି ଫାଇଭ-ଟି ସ୍କୁଲ ରୂପାନ୍ତରଣ ଶିକ୍ଷା କ୍ଷେତ୍ରରେ ବିପ୍ଳବ ଆଣିଛି ବୋଲି ଫାଇଭ-ଟି ସଚିବ କହିଛନ୍ତି ।
ନକଲି ସାର୍ଟିଫିକେଟ୍ ମାମଲା, ବିଦା ହେଲେ ୪ ଶିକ୍ଷକ
ବଲାଙ୍ଗୀର: ବଲାଙ୍ଗୀରରେ ନକଲି ସାର୍ଟିଫିକେଟରେ ଶିକ୍ଷକ ଚାକିରି ମାମଲା । ନକଲି ଶିକ୍ଷକଙ୍କ ବିରୋଧରେ କଡ଼ା ଆକ୍ସନ । ୪ ନକଲି ଶିକ୍ଷକଙ୍କୁ ବିଦାକରିଛନ୍ତି ଜିଲ୍ଲା ଶିକ୍ଷାଧିକାରୀ । ସମସ୍ତଙ୍କୁ ଚାକିରିରୁ ବହିଷ୍କୃତ କରାଯାଇଛି । ବହିଷ୍କୃତ ଶିକ୍ଷକ ହେଲେ ସଞ୍ଜିତ ପାଣି ମହାନନ୍ଦ, ମୃଣ୍ମୟୀ ପଣ୍ଡା, ବିରଞ୍ଚି ପ୍ରସାଦ ନାୟକ ଓ ଅଲମା ଟପୋ । ସମସ୍ତେ ନକଲି ସାର୍ଟିଫିକେଟ ଦେଇ ସରକାରୀ ଚାକିରି ହାତେଇଥିଲେ । ଗତ ୧୦ତାରିଖରେ ରଣ୍ଡା ହାଇସ୍କୁଲର ହିନ୍ଦୀ ଶିକ୍ଷୟିତ୍ରୀ ମୃଣ୍ମୟୀ ପଣ୍ଡାଙ୍କୁ ଗିରଫ କରିଥିଲା ପୋଲିସ I ୨୦୧୩ ମସିହାରୁ ନକଲି ସାର୍ଟିଫିକେଟରେ ମୃଣ୍ମୟୀ ଚାକିରି କରିଥିବା ଅଭିଯୋଗ ହୋଇଛି I ମୃଣ୍ମୟୀ ପ୍ରଦାନ କରିଥିବା ସାର୍ଟିଫିକେଟ ଅନୁସାରେ ଗୋଟିଏ ବର୍ଷରେ ସେ ଯୁକ୍ତ ଦୁଇ ଓ ହିନ୍ଦୀ ଟିଚର୍ସ ଟ୍ରେନିଂ ପାସ କରିଥିଲେ । ତାଙ୍କ ସହିତ ଅନ୍ୟ ୩ ଜଣ ଶିକ୍ଷକ ନକଲି ସାର୍ଟିଫିକେଟରେ ଚାକିରି କରିଥିବାନେଇ ଜଣାପଡ଼ିଥିଲା । ଏନେଇ ଟାଉନଥାନାରେ ଅଭିଯୋଗ କରିଥିଲେ ଜିଲ୍ଲା ଶିକ୍ଷାଧିକାରୀ । ଅନ୍ୟ ତିନି ନକଲି ଶିକ୍ଷକ ଏବେ ବି ଫେରାର ଥିବା ସୂଚନା ମିଳିଛି । ସେମାନଙ୍କ ନାଁରେ ମଧ୍ୟ ପୋଲିସ ମାମଲା ରୁଜୁ କରିଛି । ସମସ୍ତଙ୍କର ବ୍ୟାଙ୍କ ଆକାଉଣ୍ଟ ଫ୍ରିଜ୍ ପାଇଁ ବ୍ୟାଙ୍କକୁ ଚିଠି ଲେଖିଥିଲା ବଲାଙ୍ଗୀର ପୋଲିସ ।
ଶବ୍ଦ ପ୍ରଦୂଷଣ କରୁଥିବା ବୁଲେଟ ଜବତ
ବଲାଙ୍ଗୀର: ଜବତ ହେଲା ଶବ୍ଦ ପ୍ରଦୂଷଣ କରୁଥିବା ବୁଲେଟ୍ । ବଲାଙ୍ଗୀର ପୋଲିସ ଶଦ୍ଦ ପ୍ରଦୂଷଣ କରୁଥିବା ବୁଲେଟ୍ ଚାଳକଙ୍କୁ ସାବାଡ କରିବା ପାଇଁ ଆରମ୍ଭ କରିଛି ସ୍ପେସିଆଲ ଡ୍ରାଇଭ I ସାଇଲେନସର ବଦଳାଇ ସହରରେ ଶଦ୍ଦ ପ୍ରଦୂଷଣ କରୁଥିବା ୬ଟି ବୁଲେଟକୁ ଜବତ କରିବା ସହ 31 ହଜାର ଟଙ୍କା ଜୋରିମାନା ଆଦାୟ କିଛି ଟାଉନ ଥାନା ପୋଲିସ। ଫାଇନ ଦେବା ପରେ ଜବତ ବୁଲେଟ୍ରୁ ଶବ୍ଦ ପ୍ରଦୂଷଣ କରୁଥିବା ସାଇଲେନସର ଖୋଲିବା ପରେ ମାଲିକଙ୍କୁ ଦିଆଯିବI ଜବତ ବୁଲେଟର ମାଲିକ ମାନେ ଯଦି ପୁନଃବାର ଶବ୍ଦ ପ୍ରଦୂଷଣ କରନ୍ତି ତେବେ ସେମାନଙ୍କ ଗାଡି ଜବତ କରାଯିବା ସହ ଲାଇସେନ୍ସ ଜବତ କରାଯିବ ବୋଲି ଟାଉନ୍ ଥାନା ଅଧିକାରୀ ବିଶ୍ୱଜିତ୍ ମନବୋଧ କହିଛନ୍ତି I
ମାମୁଁ ଘର ଗାଁରେ ଭାଣିଜୀର ଆତ୍ମହତ୍ୟା
କେନ୍ଦୁଝର: ମାମୁଁ ଘର ଗାଁରେ ଭାଣିଜିର ଆତ୍ମହତ୍ୟା । କେନ୍ଦୁଝର ଜିଲ୍ଲା ନନ୍ଦିପଡ଼ା ଥାନା ଗିରିଗାଁରେ ଘଟିଛି ଅଭାବନୀୟ ଘତଣା । ମୃତକ ହେଲେ +୨ ଛାତ୍ରୀ ପାୟଲ ପ୍ରିୟଦର୍ଶନୀ । ପରିବାର ଲୋକଙ୍କ ସୂଚନା ଅନୁସାରେ, ଦୁଇଦିନ ତଳେ ପାୟଲଙ୍କ ପିଉସୀ ଅସୁସ୍ଥ ହୋଇ ଆନନ୍ଦପୁର ଡାକ୍ତରଖାନାରେ ଭର୍ତ୍ତି ହୋଇଥିଲେ । ପାୟଲ ଡାକ୍ତରଖାନାରେ ରହି ତାଙ୍କର ଦେଖାଶୁଣା କରୁଥିଲେ । ବୁଧବାର ଡାକ୍ତରଖାନାରୁ ମାମୁଁଘରକୁ ଫେରିଥିବାବେଳେ ଗତକାଲି ରାତିରେ ଘରୁ କେଉଁଆଡ଼େ ଚାଲିଯାଇଥିଲେ । ବହୁ ଖୋଜାଖୋଜି ପରେ ଆଜି ସକାଳୁ ଗାଁ ନିକଟ ଏକ ଗଛରୁ ତାଙ୍କର ଝୁଲନ୍ତା ମୃତଦେହ ଉଦ୍ଧାର ହୋଇଛି । ଆତ୍ମହତ୍ୟାର କାରଣ ଜଣା ପଡ଼ିନଥିବାବେଳେ ପୋଲିସ ତଦନ୍ତ ଜାରି ରଖିଛି ।