ନନ୍ଦିଘୋଷ ବ୍ୟୁରୋ : ଆଜିଠାରୁ ଆରମ୍ଭ ହେଲା ଯୁକ୍ତ ଦୁଇ ନାମଲେଖା ଆବେଦନ । ଜୁଲାଇ ୨୩ରୁ ପାଠପଢ଼ା ଆରମ୍ଭ ହେବ । ଚଳିତ ଶିକ୍ଷାବର୍ଷ ପାଇଁ ଏକାଦଶ ଶ୍ରେଣୀ ନାମଲେଖା ପାଇଁ ଆଜିଠାରୁ ଆବେଦନ ଆରମ୍ଭ ହୋଇଛି । ଜୁନ୍ ୩୦ ତାରିଖ ରାତି ୧୧ଟା ୪୫ ମିନିଟ୍ ମଧ୍ୟରେ ଛାତ୍ରଛାତ୍ରୀମାନେ ସାମ୍ସ ୱେବ୍ସାଇଟ୍ରେ ଆବେଦନ କରିପାରିବେ । ଜୁଲାଇ ୮ ତାରିଖରେ ପ୍ରଥମ ମେଧା ତାଲିକା ପ୍ରକାଶ ପାଇବ । ଜୁଲାଇ ୯ରୁ ୧୫ ତାରିଖ ମଧ୍ୟରେ ପ୍ରଥମ ପର୍ଯ୍ୟାୟ ନାମଲେଖା ହେବ । ଅଗଷ୍ଟ ୧୨ ସୁଦ୍ଧା ସମସ୍ତ ପର୍ଯ୍ୟାୟ ନାମଲେଖା ଶେଷ ହେବ । ପ୍ରଥମ ପର୍ଯ୍ୟାୟ ନାମଲେଖା ପରେ ଦ୍ଵିତୀୟ ପର୍ଯ୍ୟାୟ ନାମଲେଖା ପାଇଁ ଜୁଲାଇ ୨୩ ତାରିଖରେ ମେଧା ତାଲିକା ପ୍ରକାଶ ପାଇବ । ଏଥିରେ ଚୟନ ହୋଇଥିବା ଛାତ୍ରଛାତ୍ରୀମାନେ ଜୁଲାଇ ୨୪ ତାରିଖରୁ ୨୮ ତାରିଖ ମଧ୍ୟରେ ନାମଲେଖାଇବେ । ଏହାପରେ ଜୁଲାଇ ୩୦ ତାରିଖରେ ସ୍ପଟ୍ ନାମଲେଖା ପାଇଁ ଚଏସ୍ ଲକିଂ ସୁବିଧା ଉପଲବ୍ଧ ହେବ । ଅଗଷ୍ଟ ୨ ତାରିଖ ମଧ୍ୟରେ ସ୍ପଟ୍ ନାମଲେଖା ପାଇଁ ଛାତ୍ରଛାତ୍ରୀମାନେ ଚଏସ୍ ଲକିଂ କରିପାରିବେ । ସ୍ପଟ୍ ନାମଲେଖା ପାଇଁ ଅଗଷ୍ଟ ୬ ତାରିଖ ଅପରାହ୍ନ ୨ଟାରେ ମେଧା ତାଲିକା ପ୍ରକାଶ ସହ ଇଣ୍ଟିମେସନ୍ ଲେଟର ପ୍ରଦାନ କରାଯିବ । ଚୟନ ହୋଇଥିବା ଛାତ୍ରଛାତ୍ରୀମାନେ ଅଗଷ୍ଟ ୭ ତାରିଖ ମଧ୍ୟାହ୍ନ ୧୨ଟାରୁ ୧୨ ତାରିଖ ରାତି ୯ଟା ମଧ୍ୟରେ କଲେଜରେ ରିପୋଟିଂ କରିବେ । ସାଧାରଣ ବର୍ଗ, ଏସ୍ ଇବିସି, ଓବିସି ବର୍ଗରଛାତ୍ରଛାତ୍ରୀ ଆବେଦନ ଫି ୨୦୦ ଟଙ୍କା ଦାଖଲ କରିବେ । ଏସ୍ସି, ଏସ୍ଟି ବର୍ଗର ଛାତ୍ରଛାତ୍ରୀଙ୍କ ପାଇଁ ୧୦୦ ଟଙ୍କା ଆବେଦନ ଫି ରହିଛି । ମାତ୍ର ଭିନ୍ନକ୍ଷମ ବର୍ଗର ଛାତ୍ରଛାତ୍ରୀଙ୍କ ପାଇଁ ଆବେଦନ ଫି ଛାଡ଼ କରାଯାଇଛି । ଏନେଇ ସମସ୍ତ ସୂଚନା ସାମ୍ମ୍ସ ୱେବ୍ସାଇଟ୍ https://hss. samsodisha.gov.in/newHSSI index.aspx ରେ ଉପଲବ୍ଧ ରହିଛି । ଆବେଦନ ସମୟରେ କୌଣସି ସମସ୍ୟାର ସମାଧାନ ପାଇଁ ସଂଯୋଗ ସହାୟତା ନମ୍ବର ୧୫୫୩୩୫, ୧୮୦୦୩୪୫୬୭୭୦ରେ କିମ୍ବା ଇ-ମେଲ୍ ଆଇଡି sams.dhse@gov. inରେ ଯୋଗାଯୋଗ କରିହେବ ।
IPL ବେଟିଂ ଚାଲିଥିବାବେଳେ ମାଡ଼ି ବସିଲା ପୋଲିସ ; ୮ ଜଣ ଅଭିଯୁକ୍ତ ଗିରଫ
ନନ୍ଦିଘୋଷ ବ୍ୟୁରୋ : IPL ବେଟିଂ ଚାଲିଥିବାବେଳେ ମାଡ଼ି ବସିଲା ପୋଲିସ । ୮ ଜଣ ଅଭିଯୁକ୍ତ ଗିରଫ । ୫ ଲକ୍ଷ ୯ ହଜାର ୧୦୦ ନଗଦ ଟଙ୍କା ଜବତ । ଝାରସୁଗୁଡା ଜିଲ୍ଲା ବ୍ରଜରାଜନଗର ଥାନା ଅନ୍ତର୍ଗତ ଗାନ୍ଧୀଛକ ଏବଂ ରାମପୁର ଅଂଚଳର ଭଡ଼ାଘରେ ଅନଲାଇନ ମଧ୍ୟମରେ IPL ବେଟିଂ ଚାଲିଥିବାବେଳେ ଚଢ଼ାଉ କରିଥିଲା ପୋଲିସ । ଅତର୍କିତ ଭାବରେ ବ୍ରଜରାଜନଗର ପୋଲିସର ଦୁଇଟି ଟିମ ଚଢ଼ାଉ କରି ୮ ଜଣ ଅଭିଯୁକ୍ତ ଗିରଫ କରିଛି । ସେମାନଙ୍କ ନିକଟରୁ ୫ ଲକ୍ଷ ୯ ହଜାର ୧୦୦ ଟଙ୍କା ଜବତ କରିଛି l ଏହାସହ ଅନଲାଇନରେ ୩ ଲକ୍ଷ ୭୦ ହଜାର ଟଙ୍କା ବିଭିନ୍ନ ବ୍ୟାଙ୍କ ଆକାଉଣ୍ଟରେ ଫ୍ରିଜ କରିଛି ପୋଲିସ l ୨ ଟି ଲ୍ଯାପଟପ, ୪୧ ଟି ମୋବାଇଲ, ଦୁଇଟି କାର ଜବତ କରିଛି ପୋଲିସ l ଗିରଫ ଅଭିଯୁକ୍ତମାନଙ୍କ ମଧ୍ୟରେ ଜଣେ ବୁକି ସୁନ୍ଦରଗଡ଼ ରାଜଗାଙ୍ଗପୁରର ରାହୁଲ ସାହୁ ଓ ସ୍ଥାନୀୟ ଅଂଚଳର ଗୋବିନ୍ଦ ଦାସ ମହନ୍ତ, ଆକାଶ ଶ୍ରୀବାସ୍ତବ, ବିଶାଲ କୁମାର ରବି, ଭୀମ କୁମାର ରାମ, ମନୁ ସିଂ, ଶଙ୍କର ପ୍ରସାଦ ରାମ, ରାଜୀବ କୁମାର l ତେବେ ଏହାର ମାଷ୍ଟର ମାଇଣ୍ଡ କିଏ ସେନେଇ ତଦନ୍ତ ଚଲାଇଛି ପୋଲିସ l IPL ବେଟିଂ ପାଇଁ କ୍ରିକେଟ ଲାଇଭ ଆପର ଦୁର୍ବ୍ୟବହାର କରୁଛନ୍ତି ଅଭିଯୁକ୍ତମାନେ l ଲୋକଙ୍କୁ ଅଳ୍ପ ସମୟରେ ଅଧିକ ଅର୍ଥ ରୋଜଗାରର ପ୍ରଲୋଭନ ଦେଖାଇ ଅନଲାଇନ IPL ବେଟିଂ କାରବାର ଚଳାଉଛନ୍ତି l ଖୁବଶୀଘ୍ର ମାଷ୍ଟର ମାଇଣ୍ଡକୁ ଗିରଫ କରାଯିବ ବୋଲି ଝାରସୁଗୁଡା ଏସପି ଜି ରାଘବେନ୍ଦ୍ର ରେଡ୍ଡୀ ସୂଚନା ଦେଇଛନ୍ତି l
ପିପିଲି ପମସରା ବେଆଇନ୍ ବାଲିଘାଟରେ ରାତିଅଧିଆ ଚଢ଼ାଉ କଲା ମାଇନ୍ସ ବିଭାଗ
ନନ୍ଦିଘୋଷ ବ୍ୟୁରୋ : ପିପିଲି ପମସରା ବେଆଇନ୍ ବାଲି ଘାଟରେ ରାତି ଅଧିଆ ଚଢ଼ାଉ କଲା ମାଇନ୍ସ ବିଭାଗ । ଜବତ ହେଲା ବେଆଇନ୍ ବାଲି ଉତ୍ତୋଳନରେ ବ୍ୟବହୃତ ଗୋଟିଏ ଜେସିବି ମେସିନ ଓ ଗୋଟିଏ ଟ୍ରାକ୍ଟର । ପିପିଲି ପମସରା ଦୟା ନଦୀରେ ବାଲି ଚୋରି ହେଉଥିବା ଖବର ପାଇ ପୁରୀ ଜିଲ୍ଲା ମାଇନ୍ସ ଅଧିକାରୀ ସମୀର ମିଶ୍ର ଅଚାନକ ଚଢ଼ାଉ କରିଥିଲେ । ମାଇନ୍ସ ବିଭାଗ ଚଢ଼ାଉ କରୁଥିବା ଜାଣି ମାଫିଆ ମାନେ ଚମ୍ପଟ ମାରିଥିବା ବେଳେ ଟ୍ରାକ୍ଟର ଓ ଜେସିବି ମେସିନ ଜବତ କରି ଥିଲା ମାଇନ୍ସ ବିଭାଗ । ପିପିଲି ଥାନା ଅଧିକାରୀ ସୌମେନ୍ଦୁ ଶେଖର ତ୍ରିପାଠୀ ଓ ସହକାରୀ ଖଣି ଅଧିକାରୀ ବିଶ୍ୱଜିତ୍ ବେହେରା ପ୍ରମୁଖ ଚଢ଼ାଉରେ ସାମିଲ ଥିଲେ ।
ମହଙ୍ଗା ମାଡ଼ରେ ଡବଲ ଷ୍ଟ୍ରୋକ୍ ; ପୁଣି ବଢ଼ିଲା CNG ଦର
ନନ୍ଦିଘୋଷ ବ୍ୟୁରୋ : ମହଙ୍ଗା ମାଡ଼ରେ ଡବଲ ଷ୍ଟ୍ରୋକ୍ । ପୁଣି ବଢ଼ିଲା CNG ଦର । ପେଟ୍ରୋଲ ଓ ଡିଜେଲ ପରେ ରାଜଧାନୀ ଦିଲ୍ଲୀରେ ପୁଣି ବଢ଼ିଛି CNGର ମୂଲ୍ୟ । CNG ଦର ପ୍ରତି କିଲୋଗ୍ରାମ ପିଛା ଦୁଇଟଙ୍କା ବୃଦ୍ଧି ପାଇଛି । ବର୍ଦ୍ଧିତ ଦର ହିସାବରେ ଏଣିକି CNG ୮୩ ଟଙ୍କା ୯ ପଇସାକୁ ବଢ଼ିଛି । ଚତୁର୍ଥ ଥର ପାଇଁ ବୃଦ୍ଧି ପାଇଛି CNG ଦର । ଗତ ୧୨ ଦିନରେ କିଲୋଗ୍ରାମ ପିଛା ୬ ଟଙ୍କା ବଢ଼ିଛି CNG ଦର । ଗତ ୨୩ ତାରିଖରେ ଏକଟଙ୍କା ବଢ଼ିଥିଲା CNG ମୂଲ୍ୟ । ପେଟ୍ରୋଲ, ଡିଜେଲ ପରେ ଏବେ CNGର ଦରବୃଦ୍ଧି ଯୋଗୁଁ ସାଧାରଣ ଜନତାଙ୍କ ଉପରେ ବଡ଼ ବୋଝ ପଡ଼ିଛି । ଏହି ବର୍ଦ୍ଧିତ ଦର କମର୍ସିଆଲ ଗାଡ଼ି ଉପରେ ପଡ଼ିବ । ଫଳରେ ଭଡ଼ା ବୃଦ୍ଧି ହେବା ଆଶଂକା ସୃଷ୍ଟି ହୋଇଛି । ଏହାଦ୍ବାରା ନିଜର ରୋଜଗାର ଉପରେ ପ୍ରଭାବ ପଡ଼ିଥିବା କହିଛନ୍ତି ଦିଲ୍ଲୀର ଅଟୋ ଚାଳକ ।
କର୍ଣ୍ଣାଟକରେ ହେବ କି ନେତୃତ୍ଵ ପରିବର୍ତ୍ତନ ? ସିଦ୍ଦରମୈୟା ଓ ଶିବ କୁମାରଙ୍କୁ ଦିଲ୍ଲୀ ଡକରା
ନନ୍ଦିଘୋଷ ବ୍ୟୁରୋ : ଦିଲ୍ଲୀରେ କର୍ଣ୍ଣାଟକର ଦୁଇ ହେଭିୱେଟ ମୁଖ୍ୟମନ୍ତ୍ରୀ ସିଦ୍ଦରମୈୟା ଓ ଉପମୁଖ୍ୟମନ୍ତ୍ରୀ ଡିକେ ଶିବ କୁମାର। ଉଭୟଙ୍କୁ ଡାକିଛନ୍ତି ହାଇକମାଣ୍ଡ । କଂଗ୍ରେସ ସଭାପତି ମଲ୍ଲିକାର୍ଜୁନଙ୍କ ବାସଭବନରେ ହେବ ବୈଠକ। ନିଜେ ରାହୁଲ ଗାନ୍ଧି ମଧ୍ୟ ଉପସ୍ଥିତ ରହିବେ। ନିଜ ନିଜର ସମର୍ଥକଙ୍କ ସହିତ ଶିବ କୁମାର ଓ ସିଦ୍ଦରମୈୟା ଦିଲ୍ଲୀରେ ପହଞ୍ଚିଛନ୍ତି। ଏହି ଦୁଇ ନେତାଙ୍କ ସହିତି ଆଲୋଚନା କରିବେ ହାଇକମାଣ୍ଡ। କର୍ନାଟକରେ ନେତୃତ୍ଵ ପରିବର୍ତ୍ତନ ନେଇ ଚର୍ଚ୍ଚା ଲାଗି ରହିଛି। ବଦଳିବେ କି ମୁଖ୍ୟମନ୍ତ୍ରୀ, ଏହି ପ୍ରଶ୍ନ ବେଶ୍ କିଛି ଦିନ ହେଲା ଉଠୁଛି। ସିଦ୍ଦରମୈୟାଙ୍କୁ ହଟାଇ ଶିବ କୁମାରଙ୍କୁ ମୁଖ୍ୟମନ୍ତ୍ରୀ କରାଯିବ ବୋଲି ଚର୍ଚ୍ଚା ହେଉଛି। ଏଥିପାଇଁ ଦୁଇ ଜଣଙ୍କୁ ଦିଲ୍ଲୀ ଡକା ଯାଇଛି। ସିଏମ୍ ଚୌକିକୁ ନେଇ ଦୁଇ ନେତାଙ୍କ ମଧ୍ୟରେ ବହୁ ଦିନରୁ ଚାଲିଛି ଛକାପଞ୍ଝା। ଦେଖିବାକୁ ଗଲେ କର୍ଣ୍ଣାଟକରେ କଂଗ୍ରେସ ସରକାର ଗଠନ ଦିନରୁ ହିଁ ଉଭୟଙ୍କ ମଧ୍ୟରେ ଚାଲିଛି ଛକାପଞ୍ଝା। ପରିସ୍ଥିତିରେ ପଡ଼ି ସ୍ଵଚ୍ଛ ଭାବମୂର୍ତ୍ତି ପାଇଁ କଂଗ୍ରେସ ସିଦ୍ଦରମୈୟାଙ୍କୁ ସିଏମ୍ କରିଥିଲା। କିନ୍ତୁ ଶିବ କୁମାରଙ୍କ ନେତୃତ୍ଵରେ ହିଁ ଦଳ ସେଠାରେ ନିର୍ବାଚନ ଲଢିଥିଲା। ଦଳକୁ ଜିତାଇବାରେ ତାଙ୍କର ବଡ଼ ଭୂମିକା ଥିଲା। କିନ୍ତୁ ତାଙ୍କ ବିରୋଧରେ ଇଡି ଲାଗିଥିବାରୁ ଓ ନାନା ଆଇନଗତ ମାମଲା ଥିବାରୁ ତାଙ୍କୁ କଂଗ୍ରେସ ସେତେବେଳେ ସିଏମ୍ କରିନଥିଲା। କିନ୍ତୁ ସେ ମାନୁ ନାହାନ୍ତି। ସିଏମ୍ ହେବା ନିଶା ତାଙ୍କୁ ଏତେ ଘାରିଛି ଯେ, ଏହାକୁ ନେଇ ଦଳରେ ଲାଗି ରହିଛି କନ୍ଦଳ। ତାର ସମାଧାନ ପାଇଁ ସିଦ୍ଦରମୈୟା ଓ ଶିବକୁମାରଙ୍କୁ ଦିଲ୍ଲୀ ଡାକିଛନ୍ତି ହାଇକମାଣ୍ଡ।
ପୁରୀରେ ହେବ ବ୍ରିକ୍ସ ରାଷ୍ଟ୍ର ସମୂହର ଦ୍ଵିତୀୟ ବୈଷୟିକ ସମ୍ମିଳନୀ ; ଜୁନ ୩ ରୁ ୫ ତାରିଖ ପର୍ଯ୍ୟନ୍ତ ଚାଲିବ
ନନ୍ଦିଘୋଷ ବ୍ୟୁରୋ : ପୁରୀରେ ହେବ ବ୍ରିକ୍ସ ରାଷ୍ଟ୍ର ସମୂହର ଦ୍ଵିତୀୟ ବୈଷୟିକ ସମ୍ମିଳନୀ। ଆସନ୍ତା ଜୁନ ୩ ରୁ ୫ ତାରିଖ ପର୍ଯ୍ୟନ୍ତ ପୁରୀରେ ଏହି ସମ୍ମିଳନୀ ଅନୁଷ୍ଠିତ ହେବ। ସମ୍ମିଳନୀରେ ବ୍ରିକ୍ସ ଦେଶର ପ୍ରତିନିଧି ଓ ବିଶେଷଜ୍ଞମାନେ ଯୋଗଦେଇ ବିପର୍ଯ୍ୟୟ ପରିଚାଳନା, ପ୍ରତିରୋଧ କ୍ଷମତା ବୃଦ୍ଧି ଏବଂ ଅନ୍ତର୍ଜାତୀୟ ସହଯୋଗ ସମ୍ପର୍କିତ ବିଭିନ୍ନ ପ୍ରସଙ୍ଗରେ ଆଲୋଚନା କରିବେ । ବ୍ରିକ୍ସ ସଦସ୍ୟ ହେଉଛନ୍ତି ଭାରତ, ରୁଷିଆ, ଚୀନ, ବ୍ରାଜିଲ୍ ଓ ଦକ୍ଷିଣ ଆଫ୍ରିକା। ଏହି ସମ୍ମିଳନୀରେ ଏହି ସବୁ ଦେଶର ପ୍ରତିନିଧି ଯୋଗ ଦେବେ। ଓଡ଼ିଶାକୁ ଏହି ଗୁରୁତ୍ୱପୂର୍ଣ୍ଣ ବୈଷୟିକ ବୈଠକର ଆୟୋଜକ ଭାବେ ଚୟନ କରାଯାଇଥିବାର ପ୍ରଚ୍ଛଦରେ ରହିଛି ବିପର୍ଯ୍ୟୟ ପ୍ରସ୍ତୁତି ଓ ପରିଚାଳନା କ୍ଷେତ୍ରରେ ରାଜ୍ୟର ସକ୍ରିୟ, ସଫଳ ଏବଂ ସୁଦୃଢ଼ ପଦକ୍ଷେପ । ବିଶେଷକରି ବାତ୍ୟା ପରିଚାଳନା, ଗୋଷ୍ଠୀ-ଭିତ୍ତିକ ପୂର୍ବ ସଚେତନତା ବ୍ୟବସ୍ଥା ଏବଂ ସଫଳ ଉଦ୍ଧାର ଓ ସ୍ଥାନାନ୍ତରଣ କୌଶଳ ନିମନ୍ତେ ଓଡିଶା ଅନ୍ତର୍ଜାତୀୟସ୍ତରରେ ପ୍ରଶଂସିତ ହୋଇଆସିଛି । ଏହି ବୈଷୟିକ ସମ୍ମିଳନୀ ମାଧ୍ୟମରେ BRICS ଦେଶମାନଙ୍କ ମଧ୍ୟରେ ବିପର୍ଯ୍ୟୟ ପରିଚାଳନା ସମ୍ବନ୍ଧୀୟ ଜ୍ଞାନ-ବିନିମୟ, ନୂତନ ପ୍ରଯୁକ୍ତି ଓ ସମନ୍ୱିତ କାର୍ଯ୍ୟପଦ୍ଧତି ଉପରେ ଆଲୋଚନା ହେବା ସହିତ ପାରସ୍ପରିକ ସହଯୋଗ ଆହୁରି ସୁଦୃଢ଼ ହେବ ବୋଲି ଆଶା କରାଯାଉଛି l ଏହି ପରିପ୍ରେକ୍ଷୀରେ BRICS ରାଷ୍ଟ୍ରସମୂହଙ୍କୁ ନେଇ ଏପରି ଏକ ବୈଷୟିକ ସମ୍ମିଳନୀ ପୁରୀଠାରେ ଅୟୋଜିତ ହେବା ଓଡ଼ିଶାର ବିପର୍ଯ୍ୟୟ ପରିଚାଳନା କ୍ଷେତ୍ରରେ ସଫଳତା ଓ ଦକ୍ଷତାକୁ ଅନ୍ତର୍ଜାତୀୟସ୍ତରରେ ପ୍ରଚାରିତ କରିବା ସହ ବିଶ୍ବସ୍ତରରେ ଓଡ଼ିଶାର ଛବିକୁ ଆହୁରି ସମୃଦ୍ଧ କରିବ।
ବହୁଚର୍ଚ୍ଚିତ ପ୍ଲଟ ବ୍ୟବସାୟୀ ସୁଧୀର ପାତ୍ର ଅପହରଣ ଓ ହତ୍ୟା ମାମଲା ; ସରୋଜ ପଣ୍ଡାଙ୍କୁ ପୁଲିସର ଏନକାଉଣ୍ଟର
ନନ୍ଦିଘୋଷ ବ୍ୟୁରୋ : ବହୁଚର୍ଚ୍ଚିତ ପ୍ଲଟ ବ୍ୟବସାୟୀ ସୁଧୀର ପାତ୍ର ଅପହରଣ ଓ ହତ୍ୟା ମାମଲାରେ ପୋଲିସର ଏନକାଉଣ୍ଟର । ଫେରାର ଅଭିଯୁକ୍ତ ବଡ଼ଗଡ଼ ଥାନା ଅନ୍ତର୍ଗତ ନଉଗାଁର ରଞ୍ଜନ ମଲ୍ଲିକ ଓ ହିଞ୍ଜିଳିକାଟୁ ଥାନା ଅନ୍ତର୍ଗତ ସିକିରି ପାଢ଼ୀ ସାହିର ସରୋଜ ପଣ୍ଡାଙ୍କୁ ପୋଲିସ ଏନକାଉଣ୍ଟର କରିଛି ବ୍ରହ୍ମପୁର ପୋଲିସ । ଆହତ ଅଭିଯୁକ୍ତଙ୍କୁ ଚିକିତ୍ସା ନିମନ୍ତେ ବ୍ରହ୍ମପୁର ବଡ଼ ମେଡିକାଲରେ ଭର୍ତ୍ତି କରାଯାଇଛି । ଗତକାଲି ପୋଲିସ ରାଜସ୍ଥାନରୁ ରଞ୍ଜନ, ସରୋଜଙ୍କ ସମେତ ଆଉ ଦୁଇ ଜଣଙ୍କୁ ଟ୍ରାଞ୍ଜିଟ ରିମାଣ୍ଡରେ ଆଣୁଥିଲା । ଏହି ସମୟରେ ସଦର ଥାନା ଅନ୍ତର୍ଗତ ରତ୍ନପୁର ଠାରେ ଏମାନେ ରାତି ପ୍ରାୟ ୧୨ ଟାରେ ପରିସ୍ରା ଯିବା ପାଇଁ କହିଥିଲେ । ଜଣେ ASI ଓ କନେଷ୍ଟବଳ ଓହ୍ଲାଇ ଥିଲେ । ସେହି ସମୟରେ ପୋଲିସ କବଜାରୁ ଚମ୍ପଟ ମାରିବାକୁ ଚେଷ୍ଟା କରିଥିଲେ ଦୁଇ ଅଭିଯୁକ୍ତ । ପୋଲିସର ସର୍ଭିସ ରିଭଲଭର୍ ନେଇ ପୋଲିସ ଉପରକୁ ଫାୟାରିଙ୍ଗ କରିବା ପରେ ପୋଲିସ ଏନକାଉଣ୍ଟର କରିଥିଲା । ପୋଲିସ ଗୁଳିରେ ରଞ୍ଜନ ମଲ୍ଲିକ ଓ ସରୋଜ ପଣ୍ଡାଙ୍କ ଗୋଡରେ ଆଘାତ ଲାଗିଛି । ଅଭିଯୁକ୍ତମାନେ ସୁଧୀର ପାତ୍ର ହତ୍ୟା ମାମଲାରେ ସୂର୍ଯ୍ୟ ପ୍ରତାପ ସିଂହ ଓରଫ ଗୋଲୁ ସହ ମିଶି ହତ୍ୟା କରିଥିଲେ । ସୁଧୀରଙ୍କ ଝିଆରୀ ନିବେଦିତା ତାଙ୍କ ପ୍ରେମିକ କାଳୁ ପ୍ରଧାନଙ୍କୁ ହତ୍ୟା ଯୋଜନା କହିଥିଲେ । କାଳୁ ଏହି ଦୁହିଁଙ୍କ ସହ ମିଶି ସୂର୍ଯ୍ୟ ପ୍ରତାପ ସିଂହ ଗୋଲୁକୁ ପୁରା ହତ୍ୟା ଯୋଜନା ରଚିଥିଲା । ସେଥିରେ ସୁରଟର ସୁମିତ୍ ସିଂ, ଗଞ୍ଜାମର ମୁକେଶ ସାହୁଙ୍କ ସମେତ ରଞ୍ଜନ ଓ ସରୋଜ ସାମିଲ ଥିଲେ। ସୁରଟରେ ରଞ୍ଜନ, ସୂରଜ ଗଞ୍ଜେଇ ଚାଲାଣ ମାମଲାରେ ଗିରଫ ହୋଇଥିଲେ । ପରେ ସେଠାରେ ଜେଲରେ ଅନ୍ୟ ଅଭିଯୁକ୍ତ ଙ୍କ ସହ ମିଶିଥିଲେ । ପୋଲିସ ଗୋଲୁକୁ ଗିରଫ କରିଥିଲେ ସୁଦ୍ଧା ଏମାନେ ସୁଯୋଗ ଦେଖି ଫେରାର ହୋଇଯାଇଥିଲେ । ରାଜସ୍ଥାନରେ ଏମାନେ ଥିବା ଖବର ପାଇ ପୋଲିସ ରାଜସ୍ଥାନରେ ଚଢ଼ାଉ କରି ଗିରଫ କରିଥିଲା ।
ଗତକାଲି ମଙ୍ଗଳା ବେହେରାଙ୍କ ଆକ୍ରମଣକାରୀ ତଥା ମୁଖ୍ଯ ଅଭିଯୁକ୍ତ ଜଗା ସାହୁ ଓରଫ ଜଗନ୍ନାଥ ପୋଲିସ ଗୁଳିରେ ଆହତ ହୋଇଛି । ଏହାକୁ ମିଶାଇ ବ୍ରହ୍ମପୁର ପୋଲିସ ଜିଲ୍ଲାରେ ଏନାକାଉଣ୍ଟର ସଂଖ୍ୟା ୪ରେ ପହଞ୍ଚିଛି । ଗତକାଲି ଆହତ ମଙ୍ଗଳା ବେହେରାଙ୍କ ଆକ୍ରମଣକାରୀ ତଥା ଅଭିଯୁକ୍ତ ଜଗା ସାହୁ ଓରଫ ଜଗନ୍ନାଥକୁ ଏନକାଉଣ୍ଟର କରିଥିଲା ପୋଲିସ । ଅଭିଯୁକ୍ତ ଜଗା ବାଉରୀ ସୁକୁଣ୍ଡାରେ ଥିବା ସୁରାକ ପାଇ ପୋଲିସ ଟିମ ଚଢ଼ାଉ କରି ଜଗାକୁ ଏନକାଉଣ୍ଟର କରିଥିଲା । ସେହିପରି ଗତ ୨୧ ତାରିଖରେ ବ୍ରହ୍ମପୁର ଗିରିରୋଡ ଯୁବକ ଓ ତାଙ୍କ ବାନ୍ଧବୀଙ୍କୁ ଆକ୍ରମଣ ଘଟଣାରେ ଫେରାର ମୁକେଶ ସାହୁକୁ ବ୍ରହ୍ମପୁର ପୋଲିସର ଏନକାଉଣ୍ଟର କରିଥିଲା । ଗତ ୧୮ ତାରିଖରେ ବ୍ରହ୍ମପୁର ଗିରିରୋଡ଼ରେ ଘଟିଥିଲା ଏହି ଚାଞ୍ଚଲ୍ୟକର ଘଟଣା । ଅତି ନିର୍ମମ ଭାବେ ବିଚ ରାସ୍ତାରେ ହୋଇଥିଲା ବର୍ବର ଆକ୍ରମଣ । ସେହିପରି ଗତ ୧୭ ତାରିଖରେ ଦୁର୍ଦ୍ଦାନ୍ତ ଅପରାଧି ଦୀପୁନା ନାୟକ ପୋଲିସ ଗୁଳିରେ ଜଖମ ହୋଇଥିଲା । ଗୋପାଳପୁର ଥାନା ଅଞ୍ଚଳରେ ଛପି ରହିଥିବା ଲାଞ୍ଜିପଲ୍ଲୀ ଅଞ୍ଚଳର ଦୀପୁନା ନାୟକଙ୍କୁ ପୋଲିସ ପ୍ରଥମେ ଧରିଥିଲା । ଦୀପୁନାଙ୍କ ଅନ୍ୟ ସହଯୋଗୀ ମାନଙ୍କୁ ଧରିବା ପାଇଁ ପୋଲିସ ଦୀପୁନାଙ୍କୁ ନେଇ ଗୋଳନ୍ଥରା ଥାନା ଅନ୍ତର୍ଗତ କୀର୍ତ୍ତିପୁର ଜଙ୍ଗଲକୁ ଯାଇଥିବା ବେଳେ ସେଠାରେ ଦୀପୁନା ପୋଲିସ ଉପରକୁ ବୋମା ଫିଙ୍ଗିଥିଲା । ଯାହାଫଳରେ ପୋଲିସ ବାଧ୍ୟ ହୋଇ ଦୀପୁନାଙ୍କୁ ଏନକାଉଣ୍ଟର କରିଥିଲା । ଆଜି ପୁଣି ସୁଧୀର ପାତ୍ର ଅପହରଣ ଓ ହତ୍ୟା ମାମଲାରେ ପୋଲିସ ଦୁଇଜଣଙ୍କୁ ଏନକାଉଣ୍ଟର କରିଛି ।
ବହୁଚର୍ଚ୍ଚିତ ତ୍ଵିଷା ମାମଲା: ସିବିଆଇ ତଦନ୍ତ ସପକ୍ଷରେ ସର୍ବୋଚ୍ଚ ଅଦାଲତ
ନନ୍ଦିଘୋଷ ବ୍ୟୁରୋ : ଦେଶବ୍ୟାପୀ ଚର୍ଚ୍ଚା ସୃଷ୍ଟି କରିଥିବା ବହୁଚର୍ଚ୍ଚିତ ତ୍ଵିଷା ଶର୍ମା ମୃତ୍ୟୁ ମାମଲାରେ ସୁପ୍ରିମକୋର୍ଟ ଏକ ବଡ଼ ଆଭିମୁଖ୍ୟ ଗ୍ରହଣ କରିଛନ୍ତି। ସ୍ପର୍ଶକାତର ଘଟଣାର ତଦନ୍ତ ଭାର କେନ୍ଦ୍ରୀୟ ତଦନ୍ତ ବ୍ୟୁରୋ (CBI) ନେବାର ଆବଶ୍ୟକତା ରହିଛି ବୋଲି ସର୍ବୋଚ୍ଚ ଅଦାଲତଙ୍କ ପକ୍ଷରୁ କୁହାଯାଇଛି। ସିଜେଆଇ ଜଷ୍ଟିସ ସୂର୍ଯ୍ୟକାନ୍ତ, ଜଷ୍ଟିସ ଯୋଗମାଲ୍ୟା ବାଗଚୀ ଏବଂ ଜଷ୍ଟିସ ବିପୁଲ ଏମ. ପାଞ୍ଚୋଲିଙ୍କୁ ନେଇ ଗଠିତ ଏକ ସ୍ୱତନ୍ତ୍ର ଖଣ୍ଡପୀଠ ନିଜ ଆଡୁ,ଏହି ମାମଲାର ଶୁଣାଣି କରି ଏଭଳି ଗୁରୁତ୍ଵପୂର୍ଣ୍ଣ ମତ ରଖିଛନ୍ତି।
ଏହା ସହିତ ଏହି ମାମଲାରେ ବିଚାର ବିଭାଗର ସ୍ଥାଣୁତାକୁ ନେଇ ସୋସିଆଲ ମିଡିଆ କିମ୍ବା ବିଭିନ୍ନ ମହଲରେ ଚାଲିଥିବା ଚର୍ଚ୍ଚାକୁ କୋର୍ଟ ଦୃଢ଼ ଭାବରେ ଖଣ୍ଡନ କରିଛନ୍ତି। ଗତ ଶନିବାର ସୁପ୍ରିମକୋର୍ଟ ଘଟଣାର ଗାମ୍ଭୀର୍ଯ୍ୟକୁ ଦୃଷ୍ଟିରେ ରଖି ନିଜ ତରଫରୁ ଏହି ମାମଲା ରୁଜୁ କରିଥିଲେ। ଯୌତୁକ ନିର୍ଯାତନା ଅଭିଯୋଗ ଆସିବା ଏବଂ ଅଭିଯୁକ୍ତଙ୍କ ପରିବାର ପ୍ରଭାବଶାଳୀ ହୋଇଥିବାରୁ କୋର୍ଟ ଏହାକୁ ଗୁରୁତର ସହ ନେଇଛନ୍ତି।
୫ ମାସର ବିବାହ ଜୀବନ ଓ ଆତ୍ମହତ୍ୟା:
ସୂଚନାଯୋଗ୍ୟ ଯେ, ଗତ ମେ ୧୨ ତାରିଖରେ ତ୍ଵିଷା ଶର୍ମାଙ୍କ ମୃତଦେହ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଥିଲା। ଯୌତୁକ ନିର୍ଯାତନା ସହି ନପାରି ସେ ଆତ୍ମହତ୍ୟା କରିଥିବା ନେଇ ଅଭିଯୋଗ ଆଣିଥିଲେ ପରିବାର ଲୋକେ । ସବୁଠାରୁ ଦୁଃଖଦ କଥା ହେଉଛି, ମୃତ୍ୟୁ ବେଳକୁ ତାଙ୍କ ବିବାହକୁ ମାତ୍ର ୫ ମାସ ହୋଇଥିଲା।
ତ୍ଵିଷାଙ୍କ ସ୍ଵାମୀ ସମର୍ଥ ସିଂହ ପେସାରେ ଜଣେ ଓକିଲ ଏବଂ ତାଙ୍କ ମାଆ ମଧ୍ୟ ଜଣେ ପୂର୍ବତନ ବିଚାରପତି। ଏହି ଘଟଣା ସାମ୍ନାକୁ ଆସିବା ପରେ ବାର୍ କାଉନସିଲ ଅଫ୍ ଇଣ୍ଡିଆ (BCI) ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ସମର୍ଥଙ୍କ ଓକିଲାତି ଲାଇସେନ୍ସକୁ ରଦ୍ଦ କରିଦେଇଛି। ବର୍ତ୍ତମାନ ସମର୍ଥ ଭୋପାଳ ପୋଲିସର ରିମାଣ୍ଡରେ ଅଛନ୍ତି ଏବଂ ପୋଲିସ ତାଙ୍କୁ ପଚରାଉଚରା କରୁଛି।
ମଧ୍ୟପ୍ରଦେଶ ହାଇକୋର୍ଟଙ୍କ ନିର୍ଦ୍ଦେଶକ୍ରମେ ଭୋପାଳ ଏମ୍ସ (AIIMS)ରେ ତ୍ଵିଷାଙ୍କ ଶରୀରର ଦ୍ଵିତୀୟ ଥର ପାଇଁ ପୋଷ୍ଟମର୍ଟମ କରାଯାଇଥିଲା। ଏହା ପରେ ମେ ୨୪ ତାରିଖରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଛି। ମାମଲାଟି ବିଚାର ବିଭାଗ ସହ ଜଡ଼ିତ ଥିବାରୁ ଏବଂ ନିରପେକ୍ଷ ତଦନ୍ତ ପାଇଁ ବର୍ତ୍ତମାନ ସର୍ବୋଚ୍ଚ ଅଦାଲତ ଏହି ମାମଲାକୁ ସିବିଆଇ ହାତକୁ ଟେକିଦେବା ସପକ୍ଷରେ ମତ ଦେଇଛନ୍ତି।
ଭାରତ-ଆମେରିକା ଚର୍ଚ୍ଚା: ପାକିସ୍ତାନ ପ୍ରସଙ୍ଗରେ ରୁବିଓଙ୍କ ବଡ଼ ବୟାନ
ନୂଆଦିଲ୍ଲୀ: ଭାରତ ଏବଂ ଆମେରିକା ମଧ୍ୟରେ ଚାଲିଥିବା ଦ୍ଵିପାକ୍ଷିକ କଥାବାର୍ତ୍ତାକୁ ନେଇ ଏକ ବଡ଼ ବୟାନ ଦେଇଛନ୍ତି ଆମେରିକା ବୈଦେଶିକ ସଚିବ ମାର୍କୋ ରୁବିଓ। ପଶ୍ଚିମ ଏସିଆ ପ୍ରସଙ୍ଗରେ, ବିଶେଷ କରି ଆମେରିକା ଓ ଇରାନ ମଧ୍ୟରେ ସମଝୋତା ଲାଗି ପାକିସ୍ତାନ କରୁଥିବା ମଧ୍ୟସ୍ଥତାକୁ ନେଇ ଭାରତ କୌଣସି ପ୍ରସଙ୍ଗ ଉଠାଇନାହିଁ ବୋଲି ସେ ସ୍ପଷ୍ଟ କରିଛନ୍ତି।
ରୁବିଓଙ୍କ କହିବା ଅନୁଯାୟୀ, ଭାରତ ଓ ଆମେରିକା ମଧ୍ୟରେ ଅନେକ ଗୁରୁତ୍ଵପୂର୍ଣ୍ଣ ପ୍ରସଙ୍ଗରେ ଆଲୋଚନା ହୋଇଛି। ପାକିସ୍ତାନ ମାଟିରୁ ଚାଲିଥିବା ଆତଙ୍କବାଦୀ କାର୍ଯ୍ୟକଳାପ ସମ୍ପର୍କରେ ଭାରତ ସର୍ବଦା ନିଜର ଚିନ୍ତା ପ୍ରକଟ କରିଆସିଛି, ହେଲେ ଏହି ନିର୍ଦ୍ଦିଷ୍ଟ ମଧ୍ୟସ୍ଥତା ପ୍ରସଙ୍ଗରେ ଭାରତ କିଛି କହିନାହିଁ। ପାକିସ୍ତାନ ପ୍ରତି ଭାରତର ଆଭିମୁଖ୍ୟ ଏକ ସମ୍ପୂର୍ଣ୍ଣ ଭିନ୍ନ ପ୍ରସଙ୍ଗ ବୋଲି ସେ ପ୍ରକାଶ କରିଛନ୍ତି।
ଭାରତ ସହ ସମ୍ପର୍କକୁ ନେଇ ଟ୍ରମ୍ପଙ୍କ ଆଭିମୁଖ୍ୟ:
ବୈଦେଶିକ ସଚିବ ମାର୍କୋ ରୁବିଓ ପୁଣି ଦୋହରାଇଛନ୍ତି ଯେ, ଭାରତ ସହ ଘନିଷ୍ଠ ଏବଂ ମଜବୁତ ସମ୍ପର୍କ ରକ୍ଷା କରିବା ପାଇଁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବିଶେଷ ଗୁରୁତ୍ଵ ଦେଉଛନ୍ତି। ଆଗାମୀ ଦିନରେ ଦୁଇ ଦେଶର ସମ୍ପର୍କ ଆହୁରି ସୁଦୃଢ଼ ହେବ ବୋଲି ସେ ଆଶା ବ୍ୟକ୍ତ କରିଛନ୍ତି। ନିଜ ଭାରତ ଗସ୍ତର ତୃତୀୟ ଦିନରେ ଆମେରିକା ବୈଦେଶିକ ସଚିବ ଆଜି ପ୍ରସିଦ୍ଧ ପର୍ଯ୍ୟଟନ ସ୍ଥଳୀ ଆଗ୍ରା ଏବଂ ଜୟପୁର ଗସ୍ତ କରିଛନ୍ତି। ଏହି ସାଂସ୍କୃତିକ ଗସ୍ତ ପରେ ସେ ନୂଆଦିଲ୍ଲୀ ଫେରିବେ।
ଆସନ୍ତାକାଲି ଅନୁଷ୍ଠିତ ହେବାକୁ ଥିବା ହାଇ-ପ୍ରୋଫାଇଲ୍ ‘କ୍ଵାଡ୍’ (QUAD) ବୈଦେଶିକ ମନ୍ତ୍ରୀ ସମ୍ମିଳନୀରେ ମାର୍କୋ ରୁବିଓ ଯୋଗଦେବେ। ଏହି ସମ୍ମିଳନୀରେ ଭାରତ ପ୍ରଶାନ୍ତ ମହାସାଗରୀୟ କ୍ଷେତ୍ରର ସୁରକ୍ଷା ଓ ସହଯୋଗ ସେମେତ ଅନେକ ଆନ୍ତର୍ଜାତୀୟ ମୁଦ୍ଦା ଉପରେ ଆଲୋଚନା ହେବାର ସମ୍ଭାବନା ରହିଛି।
ଦେବାଶିଷଙ୍କ ଇସ୍ତଫା ପରେ ,ବିଜେଡିର ସାମ୍ବାଦିକ ସମ୍ମିଳନୀ
ଭୁବନେଶ୍ବର : ଦେବାଶିଷ ସାମନ୍ତରାୟ ବିଜେଡିରୁ ଇସ୍ତଫା ଦେବା ପରେ ବିଜେଡିର ସାମ୍ବାଦିକ ସମ୍ମିଳନୀ । ଦେବାଶିଷ ସାମନ୍ତରାୟ ଦଳ ଛାଡିବା ବିଜେଡି ଉପରେ କୌଣସି ପ୍ରଭାବ ପଡିବ ନାହିଁ । ସେ ଦଳରୁ ୫ ଥର ଟିକେଟ ନେଇଛନ୍ତି । ନିଜ ଭୁଲ ପାଇଁ ଦୁଇ ଥର ହାରିଛନ୍ତି । ଏବେ ରାଜ୍ୟସଭା ଯାଇଛନ୍ତି । ସେ ନିଜ ସ୍ୱାର୍ଥ ପାଇଁ ଦଳ ଛାଡିଛନ୍ତି । ସେ ଦଳରୁ ଆଉ କେତେ ନେଇଥାନ୍ତେ । ଗତ ୪ ବର୍ଷରେ ଦଳ ପାଇଁ ତାଙ୍କର କୌଣସି ଅବଦାନ ନାହିଁ । ଦଳର ପ୍ରତିକୂଳ ପରିସ୍ଥିତିରେ ସେ ଦଳ ସହ ନାହାନ୍ତି । ସେ ବ୍ୟକ୍ତିଗତ ସ୍ୱାର୍ଥ ଦଳ ଛାଡିଛନ୍ତି । କଟକରେ ତାଙ୍କର ସଂଗଠନ ନାହିଁ । ଦିଲ୍ଲୀରେ କେବେ ତାଙ୍କ ସ୍ୱର ନଥିଲା । ଅନେକ ଲୋକ ଅଛନ୍ତି ଦିଲ୍ଲୀରେ ଦଳର ସ୍ୱର ଉଠାଇବା ପାଇଁ । ଦଳରେ ବର୍ତ୍ତମାନ କର୍ମୀ ସଂଖ୍ୟା ବଢ଼ୁଛନ୍ତି । ତାଙ୍କ ପ୍ରାପ୍ୟ ଠାରୁ ଅଧିକ ବିଜେଡି ଦେଇଛି ବୋଲି ପ୍ରତିକ୍ରିୟା ରଖିଛି ବିଜେଡି ।…