ଭୁବନେଶ୍ବର: ସ୍ନେକ୍ ହେଲ୍ପଲାଇନ ସଦସ୍ୟଙ୍କ ପାଇଁ ଖୁସି ଖବର । ସାପ ଧରାଳିଙ୍କର ହେବ ବୀମା । ଏହାର ପ୍ରିମିୟମ ଭରିବ ଜଙ୍ଗଲ ଓ ପରିବେଶ ବିଭାଗ । ରାଜସ୍ୱ ବିଭାଗର ଓସ୍ଡମାକୁ ସାପ ଧରାଳିଙ୍କ ଟ୍ରେନିଂ ପାଇଁ ପ୍ରସ୍ତାବ ଦେବ ଜଙ୍ଗଲ ଓ ପରିବେଶ ବିଭାଗ ।
କେତେ ଅର୍ଥ ଆବଶ୍ୟକ, କଣ ଟ୍ରେନିଂ ଦରକାର ସେ ନେଇ ପ୍ରସ୍ତାବ ଦେବା ପରେ ଟ୍ରେନିଂ କାର୍ଯ୍ୟକ୍ରମ ଆରମ୍ଭ ହେବ ବୋଲି କହିଛନ୍ତି ରାଜସ୍ବ ମନ୍ତ୍ରୀ ପ୍ରମିଳା ମଲ୍ଲିକ ।
କିଭ୍: ୟୁକ୍ରେନ ପ୍ରତିରକ୍ଷା ମନ୍ତ୍ରୀଙ୍କୁ ବହିଷ୍କାର କଲେ ରାଷ୍ଟ୍ରପତି ଭୋଲୋଦିମିର ଜେଲେନସ୍କି । ଗତବର୍ଷ ଫେବ୍ରୁଆରୀରୁ ଉଭୟ ୟୁକ୍ରେନ ଓ ଋଷ ମଧ୍ୟରେ ଘମାଘୋଟ ଲଢେଇ ଜାରି ରହିଥିବାବେଳେ କାହିଁକି ଜେଲେନସ୍କି ଏହି ପଦକ୍ଷେପ ନେଲେ ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଜାତି ଉଦ୍ଦେଶ୍ୟରେ ଭାଷଣ ଦେଇ ପ୍ରତିରକ୍ଷା ମନ୍ତ୍ରୀ ଓଲେକ୍ସି ରେଜିନକୋଭଙ୍କୁ ବହିଷ୍କାର କରାଯାଇଛି ବୋଲି ସୂଚନା ଦେଇଛନ୍ତି ଜେଲେନସ୍କି ।
ତାଙ୍କ ସ୍ଥାନରେ ରୁସ୍ତମ ଉମରୋଭଙ୍କୁ ନିଯୁକ୍ତି ଦିଆଯାଇଛି । ଗତବର୍ଷ ନଭେମ୍ବରରୁ ରେଜିନକୋଭ ୟୁକ୍ରେନର ପ୍ରତିରକ୍ଷା ମନ୍ତ୍ରାଳୟ ଦାୟିତ୍ବ ତୁଲାଇ ଆସୁଥିଲେ । ଏହା ସହ ଯୁଦ୍ଧ ଜାରି ରଖିବା ଲାଗି ସେ ପାଶ୍ଚାତ୍ୟ ରାଷ୍ଟ୍ରରୁ କୋଟି କୋଟି ଡଲାର ମୂଲ୍ୟର ଅସ୍ତ୍ରଶସ୍ତ୍ର ଯୋଗାଡ କରିବାରେ ସକ୍ଷମ ହୋଇଥିଲେ । ତେବେ ପ୍ରତିରକ୍ଷା ବିଭାଗରେ ଦୁର୍ନୀତି ହୋଇଥିବା ନେଇ ତାଙ୍କ ନାମରେ ଅଭିଯୋଗ ଆସିବା ପରେ ରେନିକୋଭଙ୍କୁ ବହିଷ୍କାର କରାଗଲା ବୋଲି ସୂଚନା ମିଳିଛି ।
ୟୁକ୍ରେନରେ ବର୍ତ୍ତମାନ ଯୁଦ୍ଧ ସତ୍ତ୍ବେ ଦୁର୍ନୀତି ବିରୋଧରେ ଅଭିଯାନ ଜାରି ରହିଛି । ୟୁରୋପୀୟ ୟୁନିଅନରେ ଯୋଗ ଦେବା ଲାଗି ୟୁକ୍ରେନ ଆବେଦନ କରିଥିବାବେଳେ ଦୁର୍ନୀତିମୁକ୍ତ ବ୍ୟବସ୍ଥା ଏକ ମୁଖ୍ୟ ସର୍ତ୍ତ ହୋଇଥିବାରୁ ୟୁକ୍ରେନରେ ଏବେ ଦୁର୍ନୀତି ବିରୋଧୀ ଅଭିଯାନ ଜାରି ରହିଛି । ୪୧ ବର୍ଷ ବୟସ୍କ ଉମରୋଭ ପୂର୍ବରୁ ୟୁକ୍ରେନର ଷ୍ଟେଟ ପ୍ରପର୍ଟି ଫଣ୍ଡରେ କାର୍ଯ୍ୟ କରିଥିଲେ ।
ବେଙ୍ଗାଲୁରୁ: ଚନ୍ଦ୍ର ମିଶନରେ ଇସ୍ରୋକୁ ବଡ଼ ସଫଳତା । ୩୦ରୁ ୪୦ ସେଣ୍ଟିମିଟର ଦୂରରେ ପୁଣି ସଫ୍ଟ ଲ୍ୟାଣ୍ଡିଂ କଲା ଲ୍ୟାଣ୍ଡର । ଲ୍ୟାଣ୍ଡିଂ ସ୍ଥଳରୁ ୪୦ ସେମି ଉଚ୍ଚକୁ ଉଠିବା ସହ ୩୦ରୁ ୪୦ ସେମି ଦୂରରେ ସୁରକ୍ଷିତ ଭାବେ ଲ୍ୟାଣ୍ଡ କରିଛି । କମାଣ୍ଡ ଅନୁସାରେ ଇଞ୍ଜିନ ଫାୟାର ହେବା ସହ ନିଜେ ନିଜକୁ ଅନ୍ୟ ଏକ ସ୍ଥାନକୁ ସ୍ଥାନାନ୍ତରିତ କରିବାରେ ସଫଳ ହୋଇଛି ଲ୍ୟାଣ୍ଡର ବିକ୍ରମ ।
ଲ୍ୟାଣ୍ଡରର ଏହି ସଫଳତା ପରେ ଭବିଷ୍ୟତରେ ବିକ୍ରମ ଫେରିବା ସହ ମାନବ ମିଶନ ସଫଳ ହେବା ଆଶା ବଢ଼ିଛି । ଚନ୍ଦ୍ରଯାନ-୩ର ସବୁ ସିଷ୍ଟମ ସ୍ବାଭାବିକ କାର୍ଯ୍ୟ କରୁଛି ବୋଲି ଇସ୍ରୋ ଟୁଇଟ କରି ସୂଚନା ଦେଇଛି । ଲ୍ୟାଣ୍ଡରେ ଲଗାଯାଇଥିବା ରାମ୍ପ, ChaSTE ଏବଂ ILSA ଫୋଲ୍ଡ ହେବା ସହ ପୁନଃ ସଫ୍ଟ ଲ୍ୟାଣ୍ଡିଂ ପ୍ରକ୍ରିୟା ସଫଳତାର ସହ ଶେଷ ହେବା ପରେ ପୁନଃ ନିୟୋଜିତ ହୋଇଛନ୍ତି । ଟୁଇଟର ହ୍ୟାଣ୍ଡେଲରେ ପୁରା ପ୍ରକ୍ରିୟାର ଭିଡିଓ ସେୟାର କରିଛି ଇସ୍ରୋ ।
Chandrayaan-3 Mission:
🇮🇳Vikram soft-landed on 🌖, again!Vikram Lander exceeded its mission objectives. It successfully underwent a hop experiment.
On command, it fired the engines, elevated itself by about 40 cm as expected and landed safely at a distance of 30 – 40 cm away.… pic.twitter.com/T63t3MVUvI
— ISRO (@isro) September 4, 2023
ଭୁବନେଶ୍ବର: ସୋନପୁରରେ ଅନୁସୂଚିତ ଜାତି ଛାତ୍ରଛାତ୍ରୀଙ୍କ ପାଇଁ ହଷ୍ଟେଲ ନିର୍ମାଣରେ ସରକାରୀ ଅର୍ଥ ଆତ୍ମସାତ ମାମଲା । ହିନ୍ଦୁସ୍ତାନ ଷ୍ଟିଲ୍ କନଷ୍ଟ୍ରକ୍ସନ ୱାର୍କ୍ସ ଲିମିଟେଡ୍ରେ ଭିଜିଲାନ୍ସ ରେଡ୍ । ବଲାଙ୍ଗୀର ଭିଜିଲାନ୍ସ ସ୍ପେଶାଲ ଜଜ୍ଙ୍କ ନିର୍ଦ୍ଦେଶରେ କମ୍ପାନୀ କର୍ମଚାରୀଙ୍କ ଘର ଓ ଅଫିସରେ ଭିଜିଲାନ୍ସ ରେଡ୍ ଚାଲିଛି । ଭୁବନେଶ୍ୱର ନୟାପଲ୍ଲୀ N1/ 157 ରେ ରେଡ୍। ପୂର୍ବରୁ ମାମଲାରେ ସ୍ପେସାଲ୍ କ୍ଲାସ୍ କଣ୍ଟ୍ରାକ୍ଟର ବିଜୟ କୁମାର ଅଗ୍ରୱାଲ ଏବଂ ତାଙ୍କ ପାୱାର ଅଫ୍ ଆଟର୍ଣ୍ଣି ହୋଲ୍ଡର ଦୀପକ କୁମାର ଅଗ୍ରୱାଲ ଓଡ଼ିଶା ଭିଜିଲାନ୍ସ ଦ୍ବାରା ଗିରଫ ହୋଇଛନ୍ତି।
ସୋନପୁର ଜିଲ୍ଲାର ଅନୁସୂଚିତ ଜାତି ଛାତ୍ରଛାତ୍ରୀମାନଙ୍କ ପାଇଁ ୪ଟି ଶହେ ସିଟ୍ ବିଶିଷ୍ଟ ହଷ୍ଟେଲର ନିର୍ମାଣରେ ଅର୍ଥ ତୋଷାରପାତ ନେଇ ଅଭିଯୋଗ ହେବା ପରେ ଭିଜିଲାନ୍ସ ପକ୍ଷରୁ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ଭଲ ଜିନିଷ ଲଗେଇବା ବଦଳରେ ଚାଲୁ ଜିନିଷ ବ୍ୟବହାର କରାଯାଇଛି । ବ୍ରାଣ୍ଡେଡ ଓ ଦାମୀ କମ୍ପାନୀର ଉପକରଣ ବ୍ୟବହାର ପାଇଁ ନିର୍ଦ୍ଦେଶ ଥିବା ବେଳେ, ନିମ୍ନମାନର ସାମଗ୍ରୀ ବ୍ୟବହାର କରିଛନ୍ତି କଣ୍ଟ୍ରାକ୍ଟର। ଭିଜିଲାନ୍ସ ଏ ମାମଲାର ତଦନ୍ତ କରୁଥିବା ଶୁଣି କଣ୍ଟ୍ରାକ୍ଟର ବିଜୟ ଅଗ୍ରୱାଲ ଓ ଦୀପକ ଅଗ୍ରୱାଲ ଫେରାର ହୋଇଯାଇଥିଲେ।
ଅନୁସୂଚିତ ଜାତି ଛାତ୍ରନିବାସ ନିର୍ମାଣରେ ବ୍ୟାପକ ଅନିୟମିତତା କରି ଟଙ୍କା ହଡ଼ପ କରିଥିବା ଠିକା ସଂସ୍ଥା ବିରୋଧରେ କାର୍ଯ୍ୟାନୁଷ୍ଠାନ ପାଇଁ ସୁବର୍ଣ୍ଣପୁର ଜିଲ୍ଲାପାଳ ବିମଳେନ୍ଦୁ ରାୟ ଗତ ୫ ତାରିଖ ଦିନ ଜିଲ୍ଲା କାର୍ଯ୍ୟାଳୟ (ଏସସି/ଏସଟି ଉନ୍ନୟନ ବିଭାଗ) ପତ୍ର ସଂଖ୍ୟା ୧୧୧୧, ତା. ୫.୭.୨୦୨୩ ଅନୁଯାୟୀ ସମ୍ବଲପୁର ଭିଜିଲାନ୍ସ ଏସପିଙ୍କୁ ପତ୍ର ଲେଖିଥିଲେ।
ଏନେଇ ଭିଜିଲାନ୍ସ ବିଭାଗ ପକ୍ଷରୁ ଉକ୍ତ ଘଟଣାର ତଦନ୍ତ ଆରମ୍ଭ ହୋଇଥିଲା। ସୋନପୁର ଭିଜିଲାନ୍ସ ଟିମ ଏବଂ କଟକ ଭିଜିଲାନ୍ସ ବିଭାଗର ବୈଷୟିକ ଟିମ୍ ଏହାର ତଦନ୍ତ ଆରମ୍ଭ କରିଥିଲେ। ସେମାନେ ମକୁନ୍ଦପୁର ଗ୍ରାମକୁ ଯାଇ ଛାତ୍ରୀନିବାସ ଅନୁଧ୍ୟାନ କରିବା ସହ ପ୍ରଧାନଶିକ୍ଷକଙ୍କୁ ପଚରାଉଚରା କରିଥିଲେ। ଭୁବନେଶ୍ବର ଆଇଆର୍ସି ଭିଲେଜର ପ୍ଲଟ ନଂ. ୧/୨୦୭ରେ ଥିବା ମେସର୍ସ ହିନ୍ଦୁସ୍ତାନ ଷ୍ଟିଲୱାର୍କ୍ସ କନ୍ଷ୍ଟ୍ରକସନ ଲିଃ.(ଏଚ୍ଏସ୍ସିଏଲ୍) ନାମକ ଠିକାସଂସ୍ଥା କେବିକେ ଜିଲ୍ଲା ପାଇଁ ୨୦୧୭-୧୮ରେ ସ୍ବତନ୍ତ୍ର ଆର୍ଏଲ୍ଟିଏପି ଯୋଜନାରେ ମୁକୁନ୍ଦପୁର ଆଶ୍ରମ ସ୍କୁଲର ୧୦୦ ଶଯ୍ୟା ବିଶିଷ୍ଟ ଛାତ୍ରୀନିବାସ ନିର୍ମାଣ କରିଥିଲା।
ଭୁବନେଶ୍ବର: ଆଜି ଆନୁଷ୍ଠାନିକ ଭାବେ କଂଗ୍ରେସରେ ଯୋଗ ଦେଲେ ଭାରତୀୟ ହକି ଦଳର ପୂର୍ବତନ ଅଧିନାୟକ ପ୍ରବୋଧ ତିର୍କୀ। କଂଗ୍ରେସ ଭବନରେ ମିଶ୍ରଣ ପର୍ବରେ ସେ ଯୋଗ ଦେଇଛନ୍ତି । ଏହାସହ ଧଉଳି ଅଞ୍ଚଳର କିଛି ରାଜନେତା ବି ଯୋଗ ଦେଇଛନ୍ତି।
ପିସିସି ସଭାପତି ଶରତ ପଟ୍ଟନାୟକ, ପ୍ରଭାରୀ ଚେଲା କୁମାର, ବିଧାୟକ ସୁରେଶ ରାଉତରାୟ, ପ୍ରଚାର କମିଟି ଅଧ୍ୟକ୍ଷ ବିଜୟ ପଟ୍ଟନାୟକ, ନିରଞ୍ଜନ ପଟ୍ଟନାୟକ ପ୍ରମୁଖ ଉପସ୍ଥିତ ଥିଲେ । ରାହୁଲଙ୍କ ଭାରତ ଯୋଡୋ ଯାତ୍ରାରେ ଅନୁପ୍ରାଣିତ ହୋଇ ଏପରି ପଦକ୍ଷେପ ନେଇଥିବା କହିଛନ୍ତି ପ୍ରବୋଧ । ଲୋକ ସେବା ପାଇଁ କଂଗ୍ରେସକୁ ଆସିଛି, ସମସ୍ତେ ମିଶିଲେ କଂଗ୍ରେସ ଆଗକୁ ଯିବ ବୋଲି ସେ କହିଛନ୍ତି ।
ଲକ୍ଷ୍ନୌ: ତିନି ମହଲା ବିଶିଷ୍ଟ କୋଠା ଭୁଶୁଡ଼ି ଦୁଇ ମୃତ । ଉତ୍ତରପ୍ରଦେଶ ବାରବାଙ୍କୀରେ ଅଘଟଣ । ଭଙ୍ଗା ବିଲ୍ଡିଂ ତଳେ ଚାପି ହୋଇ ରହିଥିବା
୧୦ଜଣଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରାଯାଇଛି । ଏବେ ବି ଆଉ ୪ଜଣ ଫସି ରହିଥିବା ଆଶଙ୍କା କରାଯାଉଛି । ଭୋର ପ୍ରାୟ ସାଢ଼େ ୩ଟା ବେଳେ ତିନି ମହଲା ବିଶିଷ୍ଟ କୋଠାଟି ଭୁଶୁଡ଼ି ପଡ଼ିଥିଲା । ଖବରପାଇ ଅଗ୍ନିଶମ ବାହିନୀ ଓ ଏନଡିଆରଏଫ ଟିମ୍ ଘଟଣା ସ୍ଥଳରେ ପହଞ୍ଚି ରେସ୍କ୍ୟୁ ଅପରେସନ ଚଳାଇଛନ୍ତି । ଆହତମାନଙ୍କୁ ଲକ୍ଷ୍ନୌ ଟ୍ରମା ସେଣ୍ଟରରେ ଭର୍ତ୍ତି କରାଯାଇଛି ।
ବେଙ୍ଗାଲୁରୁ: ଇସ୍ରୋ ମହିଳା ବୈଜ୍ଞାନିକଙ୍କ ପରଲୋକ । ଚନ୍ଦ୍ରଯାନ ଲଞ୍ଚିଂ ବେଳେ ଆଇକନିକ ଭଏସ ଦେଇଥିବା ମହିଳା ବୈଜ୍ଞାନିକ ଏନ ଭଲରମଥିଙ୍କ ହୃଦଘାତରେ ମୃତ୍ୟୁ ହୋଇଛି । ଚେନ୍ନାଇର ଏକ ଘରୋଇ ହସ୍ପିଟାଲରେ ତାଙ୍କର ପରଲୋକ ଘଟିଛି । ଚନ୍ଦ୍ରଯାନ-୩ ଲଞ୍ଚିଂ ବେଳେ କାଉଣ୍ଟଡାଉନ ଭଏସ ଦେଇଥିଲେ ଭଲରମଥୀ ।
ଚନ୍ଦ୍ରଯାନର ସଫଳ ଉତକ୍ଷେପଣ ସହ ମିଶନ ସଫଳ ହୋଇଥିବା ବେଳେ ଲଞ୍ଚିଂ କାଉଣ୍ଟଡାଉନ୍ କରିଥିବା ସ୍ୱର କିନ୍ତୁ ଆଉ ଶୁଣିବାକୁ ମିଳିବନି । ଅନେକ ରକେଟ ଲଞ୍ଚିଂ ବେଳେ ଦମଦାର ସ୍ବରରେ ଆଇକନିକ ଭଏସ ଦେଇଥିଲେ ଭଲରମଥୀ । ମାତ୍ର ଅସୁସ୍ଥତା ଯୋଗୁ ସେ ସୂର୍ଯ୍ୟ ମିଶନ ବେଳେ କାଉଣ୍ଟଡାଉନ ଭଏସ ଦେଇପାରିନ ଥିଲେ ।
ତାମିଲନାଡ଼ୁର ଅରିୟାଲୁର ନିବାସୀ ଭଲରମଥି ଚେନ୍ନାଇରେ ଥିବା ବେଳେ ଗତ ଶନିବାର ସନ୍ଧ୍ୟାରେ ତାଙ୍କ ଛାତିରେ ଯନ୍ତ୍ରଣା ହୋଇଥିଲା। ପରିବାର ଲୋକେ ତାଙ୍କୁ ହସ୍ପିଟାଲ ନେଇଥିବା ବେଳେ ସେଠାରେ ତାଙ୍କର ମୃତ୍ୟୁ ହୋଇଛି ।
ବାଲେଶ୍ବର: ଜିଲ୍ଲା ମୁଖ୍ୟ ଚିକିତ୍ସାଳୟର କେମୋ ଓ୍ବାର୍ଡ ବାହାରେ ଲାଗିଲା ନିଆଁ । ଏସିର ଆଉଟଡୋର ୟୁନିଟ୍ରେ ନିଆଁ ଲାଗିଯାଇଛି । ଫଳରେ ଆଉଟଡୋରଟି ଜଳି ଯାଇଛି । ନିଆଁ ଦେଖି ଭୟଭୀତ ହୋଇ ଓ୍ବାର୍ଡରୁ ବାହାରି ଆସିଥିଲେ ରୋଗୀ ଓ ସମ୍ପର୍କୀୟ । ଖବର ପାଇ ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଛି ।
ଭୁବନେଶ୍ବର: ଦିବ୍ୟାଙ୍ଗଙ୍କ ପାଇଁ କ୍ୟାପିଟାଲ୍ ରିଜିଅନ୍ ଅର୍ବାନ୍ ଟ୍ରାନ୍ସପୋର୍ଟ କ୍ରୁଟ୍ ଏକ ଅଭିନବ ଯୋଜନା କାର୍ଯ୍ୟକାରୀ କରିବାକୁ ଯାଉଛି। ଏହି ଯୋଜନାରେ ଭୁବନେଶ୍ୱର ସହରରେ ଭିନ୍ନକ୍ଷମଙ୍କ ପାଇଁ ସ୍ଵତନ୍ତ୍ର ବ୍ୟବସ୍ଥା ରହିଥିବା ନୂତନ ଇଲେକ୍ଟ୍ରିକ୍ ବସ ଚଳାଚଳ କରିବ। ଏଥିରେ ସାଧାରଣ ଯାତ୍ରୀ ବି ଯାତାୟାତ କରିବା ବ୍ୟବସ୍ଥା କରାଯିବ।
ଦିବ୍ୟାଙ୍ଗଙ୍କ ପାଇଁ ସାଧାରଣ ସିଟ୍କୁ ଛାଡ଼ି ସ୍ଵତନ୍ତ୍ର ସିଟ୍ ବ୍ୟବସ୍ଥା ରହିବ। ବସରେ ଚଢ଼ିବା ଓ ଓହ୍ଲାଇବା ପାଇଁ ଲିଫ୍ଟ ବ୍ୟବସ୍ଥା କରାଯିବ । ଜଣେ ଦିବ୍ୟାଙ୍ଗ ବିନା ସାହାରାରେ ସିଧାସଳଖ ଭାବେ ବସରେ ଚଢ଼ିପାରିବେ ଏବଂ ଓହ୍ଲାଇ ପାରିବେ। ପୂର୍ବରୁ କ୍ରୁଟ୍ ଚଲାଉଥିବା ବସଗୁଡ଼ିକରେ ଯଦିଓ ଭିନ୍ନକ୍ଷମଙ୍କ ନିମନ୍ତେ ଟିକେଟରେ ରହାତି ଓ ସ୍ୱତନ୍ତ୍ର ସିଟ୍ ବ୍ୟବସ୍ଥା ରହିଥିଲା ଏହା ଶତ ପ୍ରତିଶତ ସଫଳ ହେଉ ନ ଥିଲା ।
ବାହାର ରାଜ୍ୟ ଭଳି ଏଣିକି ଓଡ଼ିଶାରେ ସ୍ଵତନ୍ତ୍ର ଲିଫ୍ ବ୍ୟବସ୍ଥା ଥିବା ‘ଲୋ ସ୍କୋର୍ ବସ୍ ଚଳାଚଳ କରିବାକୁ ଯାଉଥିବା କୁଟ୍ର ଅପରେସନ୍ ହେଡ୍ ସଞ୍ଜୟ ବିଶ୍ଵାଳ ସୂଚନା ଦେଇଛନ୍ତି।
ଭୁବନେଶ୍ୱର: ଭୁବନେଶ୍ବରରୁ ଦିଲ୍ଲୀ ଯାଉଥିବା ଇଣ୍ଡିଗୋ ବିମାନର ଜରୁରୀ ଅବତରଣ । ଯାନ୍ତ୍ରିକ ତ୍ରୁଟି ସିଗ୍ନାଲ ମିଳିବା ପରେ ଜରୁରୀ ଅବତରଣ କଲେ ପାଇଲଟ । ଟେକଅପ୍ କରିବାର ୨୫ ମିନିଟ ପରେ ଦେଖାଦେଇଥିଲା ଯାନ୍ତ୍ରିକ ତ୍ରୁଟି । ଯାତ୍ରୀଙ୍କୁ ସତର୍କ କରାଇ ବିମାନ ଫେରାଇ ଆଣିଲେ ପାଇଲଟ ।
ଭୁବନେଶ୍ୱରରୁ ନୂଆଦିଲ୍ଲୀ ଯାଉଥିଲା ଇଣ୍ଡିଗୋ 6E 2065 ବିମାନର ସମସ୍ତ ଯାତ୍ରୀ ସୁରକ୍ଷିତ ଅଛନ୍ତି । ଅବତରଣ ପରେ ବିମାନର ଯାନ୍ତ୍ରିକ ତ୍ରୁଟିକୁ କରାଗଲା ଯାଞ୍ଚ୍ । ସବୁ ସ୍ବାଭାବିକ ଥିବା କହିଲେ ଏୟାରପୋର୍ଟ ନିର୍ଦ୍ଦେଶକ । ଡିଜିସିଏ ଅନୁମତି ପରେ ପୁଣି ଉଡାଣ ଭରିବ ବିମାନ ।
