ନନ୍ଦିଘୋଷ ବ୍ୟୁରୋ: ସୁବର୍ଣ୍ଣପୁର ଜିଲ୍ଲା କଂଗ୍ରେସ ପକ୍ଷରୁ ଜିଲ୍ଲାପାଳ କାର୍ଯ୍ୟାଳୟ ଘେରାଉ । କେନ୍ଦ୍ର ସରକାର ମହାତ୍ମାଗାନ୍ଧୀ ଜାତିୟ ନିଶ୍ଚିତ କର୍ମ ନିଯୁକ୍ତି ଯୋଜନାର ନାମକୁ ପରିବର୍ତନ କରି ଜି ରାମ ଜି କରିବାକୁ ନେଇ ପ୍ରତିବାଦ ପ୍ରଦର୍ଶନ କରାଯାଇଛି । ଜିଲ୍ଲା କଂଗ୍ରେସର ଶହଶହ କର୍ମୀ କେନ୍ଦ୍ର ସରକାର ଓ ରାଜ୍ୟ ସରକାରଙ୍କ ବିରୁଦ୍ଧରେ ବିଭିନ୍ନ ସ୍ଲୋଗାନ ଦେଇ ଥିଲେ । ମହାତ୍ମାଗାନ୍ଧୀ ଜାତିୟ ନିଶ୍ଚିତ କର୍ମ ନିଯୁକ୍ତି ଯୋଜନାରେ ଆଗରୁ ୧୦୦ ଦିନର କାମ ମିଳୁଥିବା ବେଳେ ଏବେ କେନ୍ଦ୍ର ସରକାର ୧୫୦ ଦିନ କରନ୍ତୁ ବୋଲି ଦାବି କରିଥିଲେ । ଏହି ଯୋଜନାର ନାମ ପରିବର୍ତନ କରି କେନ୍ଦ୍ର ସରକାର ଜାତିର ପିତା ମହାତ୍ମା ଗାନ୍ଧିଙ୍କୁ ଅପମାନ କରିଥିବା ଅଭିଯୋଗ କରିଛି କଂଗ୍ରେସ ।
ବନ୍ଧାହେଲେ ୪ ସାଇବର ଠକ
ନନ୍ଦିଘୋଷ ବ୍ୟୁରୋ: ଗଞ୍ଜାମ ଜିଲ୍ଲା ଛତ୍ରପୁର ପୋଲିସକୁ ବଡ଼ ସଫଳତା । ୪ ସାଇବର ଠକଙ୍କୁ ଗିରଫ ସହ ୨ଟି ବ୍ୟାଙ୍କ୍ ଜମାଖାତା ଜବତ । ୭୮୦ରୁ ଅଧିକ ମାମଲା ରଜୁ କରାଯାଇଥିବା ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଛତ୍ରପୁର ଏସଡିପିଓ ଚନ୍ଦନ ଘଡେଇ । ଜବତ ହୋଇଥିବା ୨ଟି ବ୍ୟାଙ୍କ୍ ଜମାଖାତାରେ ୮ ଲକ୍ଷ ଟଙ୍କା ଅନ୍ଲାଇନ୍ ଦେଣନେଣ ହୋଇଥିବା ଜଣାପଡିଛି । ଗିରଫ ୪ ଜଣ ହେଲେ ଛତ୍ରପୁର ଗଣେଶନଗର ପ୍ରଥମ ଲାଇନ୍ର କେ.ଅନୀଲ୍ ପାତ୍ର, ନିଳକଣ୍ଠସାହିର ଗଗନ ଦଳାଇ, ହୁମ୍ମାର ଶଙ୍କର୍ଷଣ ସାହୁ ଏବଂ ରମ୍ଭା ଥାନା କୁଜିଢ଼େପ ଗାଁର ପବିତ୍ର ପ୍ରଧାନ । ଏହି ଘଟଣାର ମୁଖ୍ୟ ଏଜେଣ୍ଟ ହେଉଛି ପବିତ୍ର ପ୍ରଧାନ । ସେ ଗତ ୨ ବର୍ଷ ହେଲା ଫେସ୍ବୁକ୍ ସାଙ୍ଗ ଦିଲ୍ଲୀର ରଜତ ଶର୍ମା ନାମକ ଜଣେ ବ୍ୟକ୍ତି ସହ ଯୋଗାଯୋଗ କରି ଅନ୍ଲାଇନ୍ ମାଧ୍ୟମରେ ସାଇବର ଠକେଇ ଚଳାଇଥିଲା ।
ପବିତ୍ର ଛତ୍ରପୁର ଓ ଗଞ୍ଜାମ ଅଂଚଳର ସହଯୋଗୀ ମାନଙ୍କ ମାଧ୍ୟମରେ ହିତାଧିକାରୀଙ୍କ ଆଧାରକାର୍ଡ ନେଇ ସିମ୍ ପ୍ରସ୍ତୁତ କରିଥିଲା । ଏହି ସିମ୍ ବ୍ୟବହାର କରି ବିଭିନ୍ନ ବ୍ୟାଙ୍କ୍ ଗୁଡିକରେ ଜମାଖାତା ଖୋଲିଥିଲା । ସେହି ଜମାଖାତା ଗୁଡିକ କୁରିରିଅର ମାଧ୍ୟମରେ ଦିଲ୍ଲୀର ରଜତ ଶର୍ମାଙ୍କ ନିକଟକୁ ପବିତ୍ର ପଠାଉଥିଲା । ଗୋଟିଏ ଜମାଖାତା ପିଛା ରଜତ ଶର୍ମା ପବିତ୍ରକୁ ୧୮ ହଜାର ଟଙ୍କା ଦେଉଥିଲା । ସେଥିରୁ ପବିତ୍ର ୭ ହଜାର ଟଙ୍କା ରଖି ବାକି ୧୧ ହଜାର ଟଙ୍କା ସହଯୋଗୀ ମାନଙ୍କୁ ଦେଉଥିଲା । ସହଯୋଗୀ ମାନେ ଯେଉଁମାନଙ୍କ ଆକାଉଣ୍ଟ, ସେହିମାନଙ୍କୁ ୩ ରୁ ୫ ହଜାର ଟଙ୍କା ଦେଇ ବାକି ଟଙ୍କା ରଖୁଥିଲେ । ଏହାପରେ ଦିଲ୍ଲୀର ରଜତ ଶର୍ମା ଏଠାରୁ ସଂଗ୍ରହ ହୋଇଥିବା ଜମାଖାତା ଗୁଡିକୁ ଅନ୍ଲାଇନ୍ ବିଭିନ୍ନ ପ୍ରକାର ଖେଳ ତଥା ଠକେଇରେ ବ୍ୟବହାର କରି ଲକ୍ଷ ଲକ୍ଷ ଟଙ୍କା ଲୁଟି ନେଉଥିଲା । ଏଭଳି ଠକେଇ ସିଣ୍ଡିକେଟର ପର୍ଦାଫାଶ କରି ଅଭିଯୁକ୍ତଙ୍କ ନିକଟରେ ପହଞ୍ଚିପାରିଛି ପୋଲିସ ।
ଷ୍ଟାଇପେଣ୍ଡ ଦାବିରେ ଆନ୍ଦୋଳନକୁ ଓହ୍ଲାଇଲେ ଓୟୁଏଟି ଛାତ୍ରଛାତ୍ରୀ
ନନ୍ଦିଘୋଷ ବ୍ୟୁରୋ: ଷ୍ଟାଇପେଣ୍ଡ ଦାବିରେ ଆନ୍ଦୋଳନକୁ ଓହ୍ଲାଇଲେ ଓୟୁଏଟି ଛାତ୍ରଛାତ୍ରୀ। ଓୟୁଏଟି ଫାଟକ ଆଗରେ ଅନଶନରେ ବସିଛନ୍ତି ଶତାଧିକ M.SC ଓ PH.D ଛାତ୍ରଛାତ୍ରୀ। ବାରମ୍ବାର ସରକାରଙ୍କୁ କୁଳପତିଙ୍କ ଜରିଆରେ ଅବଗତ କରାଯାଇଥଲେ ମଧ୍ୟ ସରକାର ଏଥିପ୍ରତି କୌଣସି ପଦକ୍ଷେପ ଗ୍ରହଣ କରୁନଥିବା ସେମାନେ ଅଭିଯୋଗ କରିଛନ୍ତି। ଓଡ଼ିଶାର ଏକମାତ୍ର କୃଷି ବିଶ୍ୱ ବିଦ୍ୟାଳୟରେ ଛାତ୍ରଛାତ୍ରୀମାନଙ୍କୁ ଷ୍ଟାଇପେଣ୍ଡ ନ ମିଳିବା ଦୁର୍ଭାଗ୍ୟ ଜନକ ବୋଲି ସେମାନେ କହିଛନ୍ତି। ଅନ୍ୟ ରାଜ୍ୟର କୃଷି ବିଶ୍ଵବିଦ୍ୟାଳୟର ଛାତ୍ରଛାତ୍ରୀଙ୍କୁ ଷ୍ଟାଇପେଣ୍ଡ ପ୍ରଦାନ କରାଯାଉଥିବା ବେଳେ ଓଡ଼ିଶାରେ କାହିଁକି ଦିଆଯାଉନି ବୋଲି ସେମାନେ ପ୍ରଶ୍ନ କରିଛନ୍ତି। ଷ୍ଟାଇପେଣ୍ଡ ପ୍ରଦାନ ପାଇଁ ରାଜ୍ୟ ସରକାରଙ୍କ ପକ୍ଷରୁ ଲିଖିତ ପ୍ରତିଶୃତି ମିଳିବା ଯାଏ ଅନଶନ ଜାରି ରହିବ ବୋଲି କହିଛନ୍ତି ସେମାନେ ।
ବାଂଲାଦେଶରେ ହିନ୍ଦୁ ରିକ୍ସା ଚାଳକଙ୍କୁ ନିର୍ମମ ମାଡ଼ ; ହାତରେ ପବିତ୍ର ସୂତା ଦେଖି ଚିହିଁକିଲେ ଇସଲାମ ମୌଳବାଦୀ
ନନ୍ଦିଘୋଷ ବ୍ୟୁରୋ: ବାଂଲାଦେଶରେ ସଂଖ୍ୟାଲଘୁଙ୍କ ଉପରେ ବଢି ଚାଲିଛି ହିଂସା । ସଂଖ୍ୟାଲଘୁ ହିନ୍ଦୁଙ୍କ ଉପରେ ନିର୍ଯାତନା ଚରମ ସୀମାରେ ପହଞ୍ଚିଛି । ଲାଗାତାର ହିନ୍ଦୁଙ୍କ ଉପରେ ଆକ୍ରମଣ ମାମଲା ବୃଦ୍ଧି ପାଉଛି । ବାଂଲାଦେଶରେ ହିନ୍ଦୁ ଯୁବକ ଦୀପୁ ଚନ୍ଦ୍ର ଦାସଙ୍କୁ ଈଶ୍ୱର ନିନ୍ଦା ଅଭିଯୋଗରେ ଏକ ଗଣ୍ଡଗୋଳରେ ନିର୍ମମ ଭାବରେ ହତ୍ୟା କରାଯାଇଥିଲା ବେଳେ ଏଥର ଗଣ୍ଡଗୋଳ ଜଣେ ହିନ୍ଦୁ ରିକ୍ସା ଚାଳକଙ୍କୁ ଟାର୍ଗେଟ କରାଯାଇଛି । ତାଙ୍କ ହାତରେ ପବିତ୍ର ସୂତା ଦେଖିବା ପରେ ଲୋକମାନେ ତାଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଛି। ପରେ ପୋଲିସ ତାଙ୍କୁ ଅଟକ ରଖି ଥାନାକୁ ଆଣିଥିଲା।
ଏକ ରିପୋର୍ଟ ଅନୁଯାୟୀ ଏହି ଘଟଣା ବାଂଲାଦେଶର ଝେନାଇଦାହ ଜିଲ୍ଲାରେ ଘଟିଛି। ଡିସେମ୍ବର ୧୯ ତାରିଖ ଶୁକ୍ରବାର ଦିନ ଏକ ଜନଗହଳି ସ୍ଥାନରେ ଗୋବିନ୍ଦ ବିଶ୍ୱାସ ନାମକ ଜଣେ ହିନ୍ଦୁ ରିକ୍ସା ଚାଳକଙ୍କୁ ନିର୍ମମ ଭାବରେ ପିଟାଯାଇଥିଲା । ପ୍ରତ୍ୟକ୍ଷଦର୍ଶୀମାନେ କହିଛନ୍ତି ଯେ ବ୍ୟକ୍ତିଙ୍କ ହାତରେ ପବିତ୍ର ସୂତା ଦେଖିବା ପରେ କିଛି ଇସଲାମ ମୌଳବାଦୀ ତାଙ୍କୁ ଘେରିଯାଇ ପଚରାଉଚରା କରିବାକୁ ଲାଗିଲେ । କିଛି ଲୋକ ତାଙ୍କୁ ଭାରତର ଗୁପ୍ତଚର ସଂସ୍ଥା RAW ର ଏଜେଣ୍ଟ ବୋଲି ମଧ୍ୟ ଅଭିଯୋଗ କରିଥିଲେ।
ଏହା ପରେ ଉତ୍ତ୍ୟକ୍ତ ଜନତା ଗୋବିନ୍ଦଙ୍କୁ ନିର୍ମମ ଭାବରେ ଆକ୍ରମଣ କରିଥିଲେ ଯାହା ଫଳରେ ସେ ଗୁରୁତର ଆହତ ହୋଇଥିଲେ ଏବଂ ଅନେକ ଆଘାତ ପାଇଥିଲେ। ଘଟଣାର ଏକ ଭିଡିଓ ସାମ୍ନାକୁ ଆସିଛି ଯେଉଁଥିରେ ସେ ବାରମ୍ବାର ଅନୁରୋଧ କରୁଥିବାର ଦେଖାଯାଉଛି ଯେ ସେ କେବଳ ଜଣେ ରିକ୍ସା ଚାଳକ କିନ୍ତୁ ତାଙ୍କ କଥା କେହି ଶୁଣି ନଥିଲେ।
ଏହାପରେ ପୋଲିସ ପୀଡିତ ଗୋବିନ୍ଦଙ୍କୁ ଅଟକ ରଖି ଥାନାକୁ ଆଣିଥିଲା । ଏହି ଘଟଣାର ଠିକ୍ ଗୋଟିଏ ଦିନ ପୂର୍ବରୁ ଡିସେମ୍ବର ୧୮ ତାରିଖରେ ଏଭଳି ଏକ ଜନଗହଳି ସ୍ଥାନରେ ଜଣେ ହିନ୍ଦୁ ଯୁବକ ଦୀପୁ ଚନ୍ଦ୍ର ଦାସଙ୍କୁ ପିଟି ପିଟି ହତ୍ୟା କରାଯାଇଥିଲା। ରାତି ପ୍ରାୟ ୯ଟାରେ ତାଙ୍କ ଉପରେ ଆକ୍ରମଣ କରାଯାଇଥିଲା। ତା’ପରେ ତାଙ୍କ ମୃତଦେହକୁ ଏକ ଗଛରେ ବାନ୍ଧି ନିଆଁ ଲଗାଇ ଦିଆଯାଇଥିଲା। ପରେ ପୋଲିସ ଘଟଣାସ୍ଥଳରେ ପହଞ୍ଚି ଭିଡ଼କୁ ନିୟନ୍ତ୍ରଣ କରିବା ସହ ମୃତଦେହକୁ ନିଜ କବଜାକୁ ନେଇଥିଲା।
ଆପଣଙ୍କ ଉପରେ ଶନିଙ୍କ କୋପଦୃଷ୍ଟି ପଡ଼ିଛି କି ? କ’ଣ କଲେ ଶନି ସନ୍ତୁଷ୍ଟ ହେବେ ଜାଣନ୍ତୁ ଏହାର ଉପାୟ…
ନନ୍ଦିଘୋଷ ବ୍ୟୁରୋ: ହିନ୍ଦୁ ଧର୍ମ ଏବଂ ଜ୍ୟୋତିଷ ଶାସ୍ତ୍ରରେ ଶନି ଗ୍ରହଙ୍କର ବିଶେଷ ଗୁରୁତ୍ୱ ଅଛି । ଶନିଙ୍କ ଗତିକୁ ସବୁଠାରୁ ଧୀର ବୋଲି ବିବେଚନା କରାଯାଏ ତେଣୁ ଏହାର ପ୍ରଭାବ ଦୀର୍ଘ ସମୟ ପର୍ଯ୍ୟନ୍ତ ରହିଥାଏ। ଲୋକମାନେ ପ୍ରାୟତଃ ଶନି ନାମକୁ ଭୟ କରନ୍ତି କିନ୍ତୁ ଶନି କେବଳ ଅନୁପଯୁକ୍ତ କାର୍ଯ୍ୟ କରୁଥିବା ଲୋକଙ୍କୁ ଦଣ୍ଡ ଦିଅନ୍ତି। ଯଦି ଆପଣଙ୍କର ବେଳା ଭଲ ନାହିଁ ବା ସମସ୍ତ କାର୍ଯ୍ୟରେ ସମସ୍ୟା ଉପୁଜୁଛି ତାହେଲେ ଆସନ୍ତୁ ଜାଣିବା ଆପଣଙ୍କ ଉପରେ ଶନିଙ୍କର କୋପ ଦୃଷ୍ଟି ପଡ଼ିଛି କି ନାହିଁ । ଏବଂ କେଉଁ ଲକ୍ଷଣଗୁଡ଼ିକ ସୂଚାଇଥାଏ ଯେ ଶନି ଆପଣଙ୍କ ଉପରେ କ୍ରୋଧିତ ଏବଂ ତାଙ୍କୁ ସନ୍ତୁଷ୍ଟ କରିବାର ଉପାୟ।
ଜ୍ୟୋତିଷ ଶାସ୍ତ୍ର ଅନୁସାରେ ଯେତେବେଳେ ଶନି ଗ୍ରହ କୌଣସି କୁଣ୍ଡଳୀରେ ଦୁର୍ବଳ ସ୍ଥିତିରେ ଥାଆନ୍ତି, ଅଶୁଭ ଗ୍ରହ ଦ୍ୱାରା ପୀଡିତ ହୁଅନ୍ତି, କିମ୍ବା ଶନିଙ୍କ ସାଡେ ସତୀ, ଧୈୟା କିମ୍ବା ଅଶୁଭ ଦୃଷ୍ଟିର ପ୍ରଭାବରେ ଥାଆନ୍ତି ସେତେବେଳେ ବ୍ୟକ୍ତି ମାନସିକ, ଆର୍ଥିକ ଏବଂ ଶାରୀରିକ କଷ୍ଟର ସମ୍ମୁଖୀନ ହୁଅନ୍ତି। ଏହାକୁ ସାଧାରଣତଃ ଶନିଦେବଙ୍କ କୁଦୃଷ୍ଟି କୁହାଯାଏ।
ଶନି ଦୋଷର ମୁଖ୍ୟ ଲକ୍ଷଣ :
ଜ୍ୟୋତିଷମାନଙ୍କ ଅନୁସାରେ ଯେତେବେଳେ ଶନି ଗ୍ରହର ଅଶୁଭ ପ୍ରଭାବ ଆରମ୍ଭ ହୁଏ ଜୀବନରେ କିଛି ବିଶେଷ ଲକ୍ଷଣ ଦେଖାଦେବା ଆରମ୍ଭ ହୁଏ। ଯେମିତିକି …
ଆର୍ଥିକ କ୍ଷତି ଏବଂ ଋଣ: ଅନାବଶ୍ୟକ ଖର୍ଚ୍ଚ ବୃଦ୍ଧି, ବ୍ୟବସାୟରେ ହଠାତ୍ କ୍ଷତି କିମ୍ବା ଋଣ ବୋଝ ବୃଦ୍ଧି ଶନି ଗ୍ରହର ଅଶୁଭ ହେବାର ବଡ଼ ସଙ୍କେତ
କାମରେ ବାଧା: ଆପଣ ଯେତେ କଠିନ ପରିଶ୍ରମ କଲେ ମଧ୍ୟ ଶେଷ ମୁହୂର୍ତ୍ତରେ କାମ ଅଟକିଯାଏ ନଚେତ୍ ଆପଣଙ୍କୁ ସଫଳତା ମିଳେ ନାହିଁ
ସ୍ୱାସ୍ଥ୍ୟ ଉପରେ ପ୍ରଭାବ: ସନ୍ଧି ଯନ୍ତ୍ରଣା, ଗୋଡ଼ ସମସ୍ୟା କିମ୍ବା ହାଡ଼ ସମ୍ବନ୍ଧୀୟ ରୋଗ ହଠାତ୍ ଆପଣଙ୍କୁ ହଇରାଣ କରିବା ଆରମ୍ଭ କରେ
ବିବାଦ ଏବଂ ଦ୍ୱନ୍ଦ୍ୱ: ପରିବାରରେ ଅନାବଶ୍ୟକ ଝଗଡ଼ା, ସମ୍ମାନ ହରାଇବା କିମ୍ବା କୋର୍ଟ ମାମଲାରେ ଜଡ଼ିତ ହେବା
ଖରାପ ଅଭ୍ୟାସ ଏବଂ ଆଳସ୍ୟ: ଯଦି ଆପଣଙ୍କ ମନ ହଠାତ୍ ଅନୈତିକ କାର୍ଯ୍ୟକଳାପ ଆଡ଼କୁ ଝୁଲିବାକୁ ଲାଗେ କିମ୍ବା ଆପଣ ବହୁତ ଆଳସ୍ୟ ଅନୁଭବ କରନ୍ତି ତେବେ ଏହା ଶନିଙ୍କ ନକାରାତ୍ମକ ପ୍ରଭାବ ହୋଇପାରେ
ଶନି ଦେବଙ୍କ ପାଇଁ ଉପଚାର
ଶନି ମନ୍ଦିରରେ ଦୀପ ଦାନ କରିବା: ଶନିବାର ସନ୍ଧ୍ୟାରେ ପିପଲ ଗଛ ତଳେ ସୋରିଷ ତେଲ ଦୀପ ଜଳାନ୍ତୁ। ଦୀପରେ କଳା ତିଲ ରଖିବାକୁ ମନେରଖନ୍ତୁ
ହନୁମାନ ଚାଳିଶା ପାଠ କରିବା: ଶନିଦେବଙ୍କୁ ପ୍ରଭୁ ହନୁମାନଙ୍କର ଜଣେ ମହାନ ଭକ୍ତ ଭାବରେ ବିବେଚନା କରାଯାଏ। ଶନିବାର ଦିନ ହନୁମାନ ଚାଳିଶା କିମ୍ବା ସୁନ୍ଦରକାଣ୍ଡ ପାଠ କରିବା ଦ୍ୱାରା ଶନିଙ୍କ ସାଡେ ସତୀ ଏବଂ ଧୈୟର ପ୍ରଭାବ ହ୍ରାସ ପାଇଥାଏ।
ଛାୟା ଦାନ କରନ୍ତୁ: ଏକ ପାତ୍ରରେ ସୋରିଷ ତେଲ ନିଅନ୍ତୁ, ସେଥିରେ ଆପଣଙ୍କ ମୁହଁ ଦେଖନ୍ତୁ ଏବଂ ତା’ପରେ ସେହି ତେଲକୁ କୌଣସି ଅଭାବୀ ବ୍ୟକ୍ତିଙ୍କୁ ଦାନ କରନ୍ତୁ କିମ୍ବା ଶନି ମନ୍ଦିରରେ ରଖନ୍ତୁ।
କଳା ଜିନିଷ ଦାନ: ଶନିବାର ଦିନ କଳା ଉରଦ ଡାଲି, କଳା ତିଲ, କଳା ପୋଷାକ କିମ୍ବା ଲୁହା ପାତ୍ର ଦାନ କରିବା ଅତ୍ୟନ୍ତ ଶୁଭ ବୋଲି ବିବେଚନା କରାଯାଏ।
ଇଣ୍ଡୋନେସିଆରେ ଭୟଙ୍କର ଦୁର୍ଘଟଣା ; ବସ୍ ଓଲଟି ୧୬ ମୃତ
ନନ୍ଦିଘୋଷ ବ୍ୟୁରୋ: ବସ୍ ଦୁର୍ଘଟଣାରେ ଚାଲିଗଲା ୧୬ଜଣଙ୍କ ଜୀବନ । ଇଣ୍ଡୋନେସିଆରେ ଏକ ଭୟଙ୍କର ସଡ଼କ ଦୁର୍ଘଟଣା ଘଟିଛି । ରିପୋର୍ଟ ଅନୁଯାୟୀ ରବିବାର ବିଳମ୍ବିତ ରାତିରେ ଇଣ୍ଡୋନେସିଆର ମୁଖ୍ୟ ଦ୍ୱୀପ ଜାଭାରେ ଏକ ଯାତ୍ରୀବାହୀ ବସ୍ ଦୁର୍ଘଟଣାରେ ଅତି କମରେ ୧୬ ଜଣଙ୍କର ମୃତ୍ୟୁ ହୋଇଛି ଏବଂ ୧୯ଜଣ ଗୁରୁତର ଆହତ ହୋଇଛନ୍ତି । କ୍ରାପ୍ୟାକ୍ ଟୋଲ୍ ପ୍ରସ୍ଥାନ ନିକଟବର୍ତ୍ତୀ ଏକ ଛକରେ ଏହି ଦୁର୍ଘଟଣା ଘଟିଥିଲା, ଯେଉଁଠାରେ ଯାତ୍ରୀବାହୀ ବସ୍ଟି ୩୪ ଜଣ ଯାତ୍ରୀଙ୍କୁ ନେଇ ଯାଉଥିବାବେଳେ ଭାରସାମ୍ୟ ହରାଇ କଂକ୍ରିଟ୍ ବାରିୟରରେ ଧକ୍କା ହେବା ପରେ ଓଲଟି ପଡ଼ିଥିଲା। ଆନ୍ତଃ-ପ୍ରାଦେଶିକ ବସ୍ ଟି ରାଜଧାନୀ ଜାକର୍ତ୍ତାରୁ ଦେଶର ପୁରୁଣା ରାଜକୀୟ ସହର, ଯୋଗ୍ୟାକାର୍ତାକୁ ଯାତ୍ରା କରୁଥିଲା।
ସେମାରାଙ୍ଗ ସନ୍ଧାନ ଏବଂ ଉଦ୍ଧାର କାର୍ଯ୍ୟାଳୟର ମୁଖ୍ୟ ବୁଡିଓନୋ କହିଛନ୍ତି ଯେ ବସ୍ର ଝରକା ଭାଙ୍ଗି ଯାଇଥିଲା, ଯାହା ପ୍ରବେଶକୁ ଅବରୋଧ କରିଥିଲା। ଅନେକ ଲୋକ ଭିତରେ ଫସି ରହିଥିଲେ ଏବଂ ଉଦ୍ଧାରକାରୀମାନଙ୍କୁ ସେମାନଙ୍କୁ ମୁକ୍ତ କରିବା ପାଇଁ ସ୍ୱତନ୍ତ୍ର ଉପକରଣ ବ୍ୟବହାର କରିବାକୁ ପଡିଥିଲା। ବୁଡିଓନୋଙ୍କ ଅନୁଯାୟୀ ଆହତମାନଙ୍କ ପାଖକୁ ପହଞ୍ଚିବା ପାଇଁ ଉଦ୍ଧାରକାରୀ ଦଳକୁ ଓଲଟି ପଡ଼ିଥିବା ବସ୍ରେ ସତର୍କତାର ସହ ପ୍ରବେଶ କରିବାକୁ ପଡିଥିଲା। ଭାଙ୍ଗିଯାଇଥିବା କାଚ ପାଇଁ ପ୍ରତ୍ୟେକ ପଦକ୍ଷେପ ବିପଦପୂର୍ଣ୍ଣ ଥିଲା କିନ୍ତୁ କିଛି ଘଣ୍ଟାର ପ୍ରୟାସ ପରେ ସମସ୍ତ ପୀଡିତଙ୍କୁ ଉଦ୍ଧାର କରାଯାଇଥିଲା। ସମସ୍ତ ଆହତଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି ଏବଂ ସେମାନଙ୍କର ଚିକିତ୍ସା କରାଯାଉଛି।
ଘଟଣାସ୍ଥଳରୁ ଛଅ ଜଣ ଯାତ୍ରୀଙ୍କ ମୃତଦେହ ଉଦ୍ଧାର କରାଯାଇଥିଲା। ଡାକ୍ତରଖାନାକୁ ଯିବା ବାଟରେ କିମ୍ବା ଚିକିତ୍ସା ସମୟରେ ଆଉ ଦଶ ଜଣଙ୍କର ମୃତ୍ୟୁ ହୋଇଥିଲା। ବୁଡିଓନୋଙ୍କ ଅନୁଯାୟୀ, ୧୮ ଜଣ ଆହତଙ୍କ ମଧ୍ୟରୁ ୫ ଜଣଙ୍କ ଅବସ୍ଥା ଗୁରୁତର ଥିବା ବେଳେ ୧୩ ଜଣ ନିକଟବର୍ତ୍ତୀ ଦୁଇଟି ହସ୍ପିଟାଲରେ ଗୁରୁତର ଅବସ୍ଥାରେ ଅଛନ୍ତି। ମୃତକ ଏବଂ ଆହତମାନଙ୍କୁ ଚିହ୍ନଟ କରିବା ପ୍ରକ୍ରିୟା ଜାରି ରହିଛି ଏବଂ ପୋଲିସ ଏବଂ ସମ୍ପୃକ୍ତ ଏଜେନ୍ସିଗୁଡ଼ିକ ଦୁର୍ଘଟଣାର କାରଣ ତଦନ୍ତ କରୁଛନ୍ତି।
ଆରାବଲୀ ପର୍ବତ ଲାଗି ମହାଭାରତ ; ପରିବେଶବିତ ଓ ନାଗରିକ ସଂଗଠନର ବିକ୍ଷୋଭ
ନନ୍ଦିଘୋଷ ବ୍ୟୁରୋ: ରାଜସ୍ଥାନର ଆରାବଲୀ ପର୍ବତକୁ ନେଇ ଏବେ ମହାଭାରତ। ପରିବେଶବିତ ଓ ସ୍ବେଚ୍ଛାସେବୀମାନଙ୍କ ବିକ୍ଷୋଭ। ଆରାବଲୀ ପର୍ବତର ନୂତନ ବ୍ୟାଖ୍ୟାନ ବଡ ଧରଣର ଖଣି ଉତ୍ତୋଳନ ଓ ବେଆଇନ ନିର୍ମାଣ କ୍ଷେତ୍ରରେ ସହାୟକ ବୋଲି ବିରୋଧୀ କହୁଥିବାବେଳେ ପ୍ରାଚୀନ ପର୍ବତର ୯୦ ପ୍ରତିଶତ ସୁରକ୍ଷିତ ବୋଲି ଦାବି କରୁଛନ୍ତି କେନ୍ଦ୍ର ସରକାର l ଆରାବଲୀ ପର୍ବତ ମାମଲାରେ ଗତ ନଭେମ୍ବରରେ ପର୍ବତର ନୂତନ ବ୍ୟାଖ୍ୟାନକୁ ମଞ୍ଜୁର କରିଥିଲେ ସୁପ୍ରିମକୋର୍ଟ l ଏହା ସହ ନୂଆ ଖଣି ଲିଜକୁ ସୁପ୍ରିମକୋର୍ଟ ବାତିଲ କରିଥିବାବେଳେ ବର୍ତ୍ତମାନର ଖଣି କାର୍ଯ୍ୟ କଡ଼ା ନିୟମ ଅନୁସାରେ ଚାଲିବାକୁ ସୁପ୍ରିମକୋର୍ଟ କହିଥିଲେ l
କେନ୍ଦ୍ରର ସତ୍ୟପାଠରେ କୁହାଯାଇଛି ଯେ କେବଳ ଭୂପୃଷ୍ଠରୁ ୧୦୦ ମିଟର କିମ୍ବା ତା’ଠାରୁ ଅଧିକ ଉଚ୍ଚତା ବିଶିଷ୍ଟ ଭୂମିରୂପ ଏବଂ ସେଗୁଡିକର ଢାଲ ଓ ସଂଲଗ୍ନ ଅଞ୍ଚଳ ଆରାବଲୀ ପର୍ବତମାଳାର ଅଂଶ ଭାବରେ ଯୋଗ୍ୟ ବିବେଚିତ ହେବ। ଏହା ସହ ପର୍ବତଠାରୁ ୫୦୦ ମିଟର ଦୂର ଯାଏ ଅଞ୍ଚଳକୁ ଆରାବଲୀର ଅଂଶବିଶେଷ ଭାବେ ବିବେଚନା କରାଯିବ l ବିରୋଧୀଙ୍କ ପକ୍ଷରୁ ଯୁକ୍ତି ହେଉଛି- ନୂଆ ବ୍ୟାଖ୍ୟାନ ଅନୁସାରେ ଆରାବଲୀର ୯୦ ପ୍ରତିଶତ ଅଞ୍ଚଳ ବର୍ତ୍ତମାନ ଆରାବଲୀର ବୋଲି ପରିଗଣିତ ହେବ ନାହିଁ l ୧୦୦ ମିଟର ଉଚ୍ଚତା ତଳେ ଥିବା ପର୍ବତାଞ୍ଚଳରେ ଏଣିକି ଖଣି କାର୍ଯ୍ୟ ଚାଲିପାରିବ ବୋଲି ସେମାନେ କହିଛନ୍ତି l ସେପଟେ ସରକାରଙ୍କ ଯୁକ୍ତି ହେଉଛି ୧ ଲକ୍ଷ ୪୪ ହଜାର ବର୍ଗ କିଲୋମିଟର ପରିବ୍ୟାପ୍ତ ଆରାବଲୀର କେବଳ ୦.୧୯ ପ୍ରତିଶତ ଅଞ୍ଚଳ ଖଣି କାର୍ଯ୍ୟରେ ବ୍ୟବହୃତ ହେବ l ପରିବେଶର ସୁରକ୍ଷା ଦୃଷ୍ଟିରୁ ଆରାବଲୀରେ ଖଣି କାର୍ଯ୍ୟ ନିଷିଦ୍ଧ କରାଯାଇଥିଲା l
େଆରାବଲୀର ନୂଆ ବ୍ୟାଖ୍ୟାନ ବିରୋଧରେ ହରିଆଣା ଓ ରାଜସ୍ଥାନରେ ଜୋରଦାର ପ୍ରତିବାଦ ଦେଖାଦେଇଛି l ଆରାବଲୀ ବଚାଓ ସଂସ୍ଥା ପକ୍ଷରୁ ଆନ୍ଦୋଳନ କରାଯାଉଛି l ଆରାବଲୀ ନାହିଁ ତ ଜୀବନ ନାହିଁ, ଆରାବଲୀ ବଞ୍ଚାନ୍ତୁ ଭବିଷ୍ୟତ ବଞ୍ଚାନ୍ତୁ ବୋଲି ଆନ୍ଦୋଳନକାରୀ ସ୍ଲୋଗାନ ଦେବା ସହ ସୁପ୍ରିମକୋର୍ଟଙ୍କ ନିର୍ଦ୍ଦେଶକୁ ବି ସମାଲୋଚନା କରିଛନ୍ତି l ଏହି ବହୁ ପ୍ରାଚୀନ ପର୍ବତ ପରିବେଶ, ଜଳବାୟୁ, ଜଳ ନିରାପତ୍ତା, ଜୀବନ ଲାଗି ବେଶ୍ ସହାୟକ ହୋଇଥିବାରୁ ଏଥିରେ କୌଣସି ପ୍ରକାର ଉତ୍ତୋଳନ ନ ହେବା ଉଚିତ ବୋଲି କହୁଛନ୍ତି ବିରୋଧୀ l ଏହି ପର୍ବତ ଗୁଜରାଟ, ରାଜସ୍ଥାନ, ହରିଆଣା ଓ ଦିଲ୍ଲୀର ବହୁ ଅଞ୍ଚଳକୁ ନେଇ ଗଠିତ ଏବଂ ଏହାର ଦୈର୍ଘ୍ୟ ହେଉଛି ୬୯୦ କିଲୋମିଟର l ଆରାବଲୀ ପର୍ବତର ନିମ୍ନ ଭାଗରେ ଥିବା ଜଳ ପ୍ରଣାଳୀ ଜରିଆରେ ଦିଲ୍ଲୀ, ଗୁରୁଗ୍ରାମ, ଫରିଦାବାଦ ଓ ଅଲଓ୍ବାରକୁ ଜଳ ଯୋଗାଯାଇଥାଏ l ଯଦି ୧୦୦ ମିଟର ତଳେ ଖନନ କାର୍ଯ୍ୟ କରାଯାଏ ତେବେ ଜଳ ପ୍ରଣାଳୀ ନଷ୍ଟ ହୋଇଯିବ l
କାହିଁକି ଦିଲ୍ଲୀ ବିମାନବନ୍ଦରରେ ଏୟାର ଇଣ୍ଡିଆ ବିମାନ ଉଡ଼ାଣ ପରେ ତୁରନ୍ତ ଅବତରଣ କଲା ?
ଦିଲ୍ଲୀ: ଇଞ୍ଜିନ ଅଏଲ ପ୍ରେସର ହୋଇଗଲା ଜିରୋ। ଦିଲ୍ଲୀ ଫେରିଲା ଏୟାର ଇଣ୍ଡିଆ ବିମାନ। ଦିଲ୍ଲୀରୁ ମୁମ୍ବାଇ ଯାଉଥିବା ଏୟାର ଇଣ୍ଡିଆ ବିମାନ ଆଜି ଉଡ଼ାଣ ଭରିବାର କିଛି କ୍ଷଣ ପରେ ପୁଣି ଦିଲ୍ଲୀ ଫେରିଛି। ମଝି ଆକାଶରେ ବିମାନର ନିରାପତ୍ତା ବିପନ୍ନ ହେବା ଆଶଙ୍କା କରି ତୁରନ୍ତ ବିମାନକୁ ଦିଲ୍ଲୀ ଫେରାଇ ଅଣାଯାଇଥିଲା। ବୋଇଂ ୭୭୭-୩୩୭ ERର ଏହି ବିମାନ ଭୋର ୩.୨୦ରେ ଦିଲ୍ଲୀ ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନ ବନ୍ଦରରୁ ମୁମ୍ବାଇ ଅଭିମୁଖେ ବାହାରିଥିଲା। ମାତ୍ର ଦକ୍ଷିଣ ପଟ ଇଞ୍ଜିନରେ ଅଏଲ ପ୍ରେସର କମ୍ ଥିବା ଦେଖିଥିଲେ ପାଇଲଟ। ସଂଗେସଂଗେ ଅଏଲ ପ୍ରେସର ଜିରୋକୁ ଖସିଯିବାରୁ ଏମର୍ଜେନ୍ସି ଅବସ୍ଥା ସୃଷ୍ଟି ହୋଇଥିଲା। ପରେ ବିମାନକୁ ଦିଲ୍ଲୀ ଫେରାଇ ଅଣାଯାଇଥିଲା। ତେବେ ବିମାନର ଯାତ୍ରୀ ଓ କ୍ରିଉ ମେମ୍ବର ସୁରକ୍ଷିତ ଥିବା ସୂଚନା ମିଳିଛି।
ଏୟାର ଇଣ୍ଡିଆର ଜଣେ ମୁଖପାତ୍ରଙ୍କ ଅନୁଯାୟୀ, ମାନକ କାର୍ଯ୍ୟ ପ୍ରଣାଳୀ (SOP) ଅନୁଯାୟୀ, କର୍ମଚାରୀମାନେ ସତର୍କତାମୂଳକ ପଦକ୍ଷେପ ସ୍ୱରୂପ ବିମାନକୁ ଦିଲ୍ଲୀ ଫେରାଇ ଆଣିବାକୁ ନିଷ୍ପତ୍ତି ନେଇଥିଲେ। ବିମାନଟି ଦିଲ୍ଲୀ ବିମାନବନ୍ଦରରେ ସୁରକ୍ଷିତ ଭାବରେ ଅବତରଣ କରିଥିଲା, ଯାହା ପରେ ସମସ୍ତ ଯାତ୍ରୀ ଏବଂ କର୍ମଚାରୀଙ୍କୁ ସୁରକ୍ଷିତ ଭାବରେ ଅବତରଣ କରାଯାଇଥିଲା। ଏହି ଅପ୍ରତ୍ୟାଶିତ ପରିସ୍ଥିତି ଯୋଗୁଁ ଯାତ୍ରୀମାନଙ୍କୁ ହୋଇଥିବା ଅସୁବିଧା ପାଇଁ ଏୟାର ଇଣ୍ଡିଆ ଦୁଃଖ ପ୍ରକାଶ କରୁଛି। ଅବତରଣ ପରେ ଗ୍ରାଉଣ୍ଡ ଷ୍ଟାଫ୍ ଦିଲ୍ଲୀରେ ଯାତ୍ରୀମାନଙ୍କୁ ତୁରନ୍ତ ସହାୟତା ପ୍ରଦାନ କରିଥିଲେ। ଏହା ସହିତ, ଯାତ୍ରୀମାନଙ୍କୁ ମୁମ୍ବାଇ ପରିବହନ ପାଇଁ ବିକଳ୍ପ ବ୍ୟବସ୍ଥା କରାଯାଇଛି। ବିମାନଟି ଏବେ ଦିଲ୍ଲୀରେ ସୁରକ୍ଷିତ ଭାବରେ ଅବତରଣ କରିଛି, ଏବଂ ଯାତ୍ରୀ ଏବଂ କର୍ମଚାରୀମାନଙ୍କୁ ବିମାନରୁ ଓହ୍ଲାଇ ଦିଆଯାଇଛି। ସମସ୍ତେ ସୁରକ୍ଷିତ ଅଛନ୍ତି।
କୁକୁର କାମୁଡ଼ିବା ପରେ କୁକୁର ଭଳି ଆଚରଣ କଲେ ଯୁବକ ; ଭିଡ଼ିଓ ଭାଇରାଲ
ନନ୍ଦିଘୋଷ ବ୍ୟୁରୋ: କୁକୁର କାମୁଡିବା ପରେ କୁକୁର ଭଳି ଆଚରଣ କଲା ମଣିଷ । ପରିବାର ଲୋକଙ୍କୁ କାମୁଡ଼ିବାକୁ ଗୋଡ଼ାଇଲା ଏବଂ କୁକୁର ଭଳି ଆଚରଣ କଲା । ସମସ୍ତେ ଏପରି ଘଟଣା ଘଟେ ବୋଲି ଶୁଣିଥିବା ବେଳେ ସତରେ ଏଭଳି ଘଟଣା ସାମ୍ନାକୁ ଆସିଛି । ଆଜ୍ଞା ହଁ ଉତ୍ତର ପ୍ରଦେଶର ଆଲିଗଡ଼ରୁ ଏହି ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଜଣେ ଯୁବକଙ୍କୁ କୁକୁର କାମୁଡ଼ି ଦେଇଥିଲା। ଘରକୁ ଫେରି କ୍ଷତ ଧୋଇବା ପରେ ହଠାତ୍ ତାଙ୍କ ଅବସ୍ଥା ଖରାପ ହୋଇଗଲା। କୁକୁର କାମୁଡ଼ିବାର ମାତ୍ର ୧୮ ଘଣ୍ଟା ପରେ ଯୁବକ ଜଣକ ଅଜବ ବ୍ୟବହାର କରିବା ଆରମ୍ଭ କରିଥିଲେ ଯାହା ତାଙ୍କ ପରିବାର ଏବଂ ଗାଁ ଲୋକଙ୍କୁ ଭୟଭୀତ କରିଥିଲା ।
୨୩ ବର୍ଷୀୟ ରାମକୁମାର ଓରଫ ରାମୁଙ୍କୁ ଆଲିଗଡ଼ର ଖୈର ତହସିଲ ଅନ୍ତର୍ଗତ ଉତୱାରା ଗାଁରେ ଏକ ବୁଲା କୁକୁର କାମୁଡ଼ି ଦେଇଥିଲା। ପ୍ରାରମ୍ଭରେ ଆଘାତ ସାମାନ୍ୟ ଦେଖାଯାଉଥିଲା କିନ୍ତୁ ମାତ୍ର ୧୮ ଘଣ୍ଟା ପରେ ଯୁବକଙ୍କ ଅବସ୍ଥା ଏତେ ଖରାପ ହୋଇଗଲା ଯେ ସେ କୁକୁର ପରି ବ୍ୟବହାର କରିବାକୁ ଲାଗିଲେ। ରାମୁ ରାସ୍ତାରେ ଚାଲୁଥିବା ସମୟରେ ଏକ ବୁଲା କୁକୁର ତାଙ୍କ ଗୋଡ଼କୁ କାମୁଡ଼ି ଦେଇଥିଲା। କ୍ଷତଟି ସାମାନ୍ୟ ଥିଲା ତେଣୁ ରାମୁ ଘରକୁ ଯାଇ ସାବୁନରେ ଧୋଇ ପ୍ରାଥମିକ ଚିକିତ୍ସା କରିଥିଲେ। ରାମୁ ତାଙ୍କ ପରିବାରକୁ କହିଥିଲେ ଯେ ସେ ପରଦିନ ଖୈର କମ୍ୟୁନିଟି ହେଲ୍ଥ ସେଣ୍ଟରକୁ ଯାଇ ଆଣ୍ଟି-ରାବିଜ୍ ଇଞ୍ଜେକ୍ସନ ନେବେ। ତା’ପରେ ତାଙ୍କର ରାତି ସାଧାରଣ ଥିଲା, କୌଣସି ଅସାଧାରଣ ଲକ୍ଷଣ ଦେଖାଯାଉନଥିଲା। ପରଦିନ ସକାଳେ ରାମୁ ଗାଧୋଇଥିଲେ ଖାଇଥିଲେ ଏବଂ CHC ଯିବାକୁ ପ୍ରସ୍ତୁତ ହେଉଥିଲେ ସେହି ସମୟରେ ଅପରାହ୍ନ ପ୍ରାୟ ୨ଟା ସମୟରେ ହଠାତ୍ ତାଙ୍କ ଅବସ୍ଥା ଖରାପ ହୋଇଗଲା। ସେ ଚିତ୍କାର କରିବା ଆରମ୍ଭ କଲେ, ଜିଭ ବାହାର କରି କୁକୁର ପରି ଶବ୍ଦ କଲେ। ସେ ନିଜକୁ କାମୁଡ଼ିବାକୁ ଚେଷ୍ଟା କଲେ ଏବଂ ତା’ପରେ ତାଙ୍କ ପରିବାର ସଦସ୍ୟଙ୍କ ପାଖକୁ ଦୌଡ଼ି ଦୌଡ଼ି ସେମାନଙ୍କୁ କାମୁଡ଼ିବାକୁ ଚେଷ୍ଟା କଲେ। ପରିବାର ଲୋକେ ଭୟଭୀତ ହୋଇ ତାଙ୍କୁ ଏକ ରଶି ସାହାଯ୍ୟରେ ଏକ ଖଟରେ ବାନ୍ଧି ଦେଲେ ଯାହାର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି।
ପରିବାର ଲୋକେ ରାମୁକୁ ଖୈର ସିଏଚ୍ସିକୁ ନେଇଗଲେ। ପ୍ରାଥମିକ ପରୀକ୍ଷା ପରେ ଚିକିତ୍ସା ଅଧିକାରୀ ଡାକ୍ତର ରୋହିତ ଭାଟି ତାଙ୍କ ଅବସ୍ଥା ଗୁରୁତର ବୋଲି ଘୋଷଣା କରି ଦିଲ୍ଲୀର ମହର୍ଷି ବାଲ୍ମିକି ସଂକ୍ରାମକ ରୋଗ ହସ୍ପିଟାଲକୁ ରେଫର କରିଥିଲେ। କିନ୍ତୁ ବାଟରେ ପରିବାର ଲୋକେ ତାଙ୍କୁ ପ୍ରଥମେ ଖୁର୍ଜା ମେଡିକାଲକୁ ନେଇଗଲେ ଯେଉଁଠାରେ ପ୍ରାରମ୍ଭିକ ଚିକିତ୍ସା ପରେ ରାମୁର ଅବସ୍ଥାରେ କିଛିଟା ଉନ୍ନତି ହୋଇଥିଲା। ସେ ବିଳମ୍ବିତ ରାତିରେ ଘରକୁ ଫେରିଥିଲେ।
ରାମୁର ଅବସ୍ଥା ଏବେ ସ୍ଥିର ଅଛି କିନ୍ତୁ ସମ୍ପୂର୍ଣ୍ଣ ଚିକିତ୍ସା ପାଇଁ ତାଙ୍କୁ ଦିଲ୍ଲୀ ନେବା ପାଇଁ ପ୍ରସ୍ତୁତି ଚାଲିଛି। ରାମୁକୁ କାମୁଡ଼ିଥିବା କୁକୁର ଏବେ ବି ଗାଁରେ ଘୁରି ବୁଲୁଛି ଯାହା ଫଳରେ ଗାଁ ଲୋକଙ୍କ ମଧ୍ୟରେ ଭୟ ସୃଷ୍ଟି ହୋଇଛି। ଗାଁ ଲୋକମାନେ ପ୍ରଶାସନକୁ ବୁଲା କୁକୁରମାନଙ୍କୁ ଧରି ଟୀକାକରଣ ଅଭିଯାନ ଆରମ୍ଭ କରିବାକୁ ଦାବି କରୁଛନ୍ତି। ରାମୁର ବାପା ବିଜୟ ପାଲ ସିଂହ କହିଛନ୍ତି, “ମୋ ପୁଅ ଖାଇବା ପର୍ଯ୍ୟନ୍ତ ସମ୍ପୂର୍ଣ୍ଣ ସୁସ୍ଥ ଥିଲା। ହଠାତ୍ ତା’ର ଆଚରଣ ବଦଳିଗଲା। ଆମେ ଭୟଭୀତ ହୋଇ ତାକୁ ବାନ୍ଧି ଡାକ୍ତରଖାନାକୁ ନେଇଗଲୁ।”
ସେ ବୁଝାଇଲେ ଯେ ରାମୁ ଜଣେ ଶ୍ରମିକ ଭାବରେ କାମ କରେ ଏବଂ ତାଙ୍କ ପରିବାର ଆର୍ଥିକ ଦୃଷ୍ଟିରୁ ଦୁର୍ବଳ। କୁକୁରଟି ଏବେ ବି ବଞ୍ଚିଛି ଏବଂ ଗାଁରେ ବୁଲୁଛି। ରାମୁର ଅବସ୍ଥା ଦେଖି ସମସ୍ତେ ଭୟଭୀତ। ସେମାନେ ପ୍ରଶାସନକୁ ବୁଲା କୁକୁରମାନଙ୍କୁ ଧରିବାକୁ ଦାବି କରୁଛନ୍ତି ନଚେତ୍ ଆହୁରି ଦୁର୍ଘଟଣା ଘଟିପାରେ। ଡାକ୍ତର ବୁଝାଇଲେ ଯେ ଯୁବକଙ୍କ ଅବସ୍ଥା ରାବିଜ୍ର ପ୍ରାରମ୍ଭିକ ଲକ୍ଷଣ ସହିତ ସମାନ। ରାବିଜ୍ର ଲକ୍ଷଣ ସାଧାରଣତଃ ୧୦-୧୪ ଦିନ ପରେ ଦେଖାଯାଏ କିନ୍ତୁ ଯଦି କାମୁଡ଼ିଥିବା ପଶୁ ପୂର୍ବରୁ ସଂକ୍ରମିତ କିମ୍ବା ପାଗଳ ହୋଇଯାଏ ତେବେ ଏହାର ପ୍ରଭାବ ୨୪ ଘଣ୍ଟା ମଧ୍ୟରେ ଦେଖାଯାଇପାରେ । ଡାକ୍ତର ପ୍ରାଥମିକ ଚିକିତ୍ସା ଯୋଗାଇ ତାଙ୍କୁ ଦିଲ୍ଲୀ ପଠାଇଥିଲେ। ସେ ଏହା ମଧ୍ୟ ଅନୁରୋଧ କରିଥିଲେ ଯେ ଯଦି କୌଣସି ବ୍ୟକ୍ତି କୁକୁର, ବିଲେଇ କିମ୍ବା ମାଙ୍କଡ଼ କାମୁଡ଼ିଦିଏ, ତେବେ ତୁରନ୍ତ ସାବୁନ ଏବଂ ପାଣିରେ କ୍ଷତକୁ ଧୋଇ ଦିଅନ୍ତୁ ଏବଂ 24 ଘଣ୍ଟା ମଧ୍ୟରେ ଏକ ଆଣ୍ଟି-ରାବିଜ୍ ଇଞ୍ଜେକ୍ସନ ନିଅନ୍ତୁ। ଏହି ଇଞ୍ଜେକ୍ସନ CHC ରେ ମାଗଣାରେ ଉପଲବ୍ଧ।ଏପରି କ୍ଷେତ୍ରରେ ବିଳମ୍ବ ମାରାତ୍ମକ ହୋଇପାରେ।
ଅସମ୍ଭାଳ ହୋଇପଡିଲାଣି ଦିଲ୍ଲୀ ବାୟୁ ; ସାଂଘାତିକ ସ୍ତରରେ ବାୟୁ ପ୍ରଦୂଷଣ
ନନ୍ଦିଘୋଷ ବ୍ୟୁରୋ: ଦିଲ୍ଲୀରେ ଲଗାତାର ସପ୍ତମ ଦିନ ଲାଗି ଘନ କୁହୁଡିର ପ୍ରଭାବ । ଦିଲ୍ଲୀ ସଂଲଗ୍ନ ଗାଜିଆବାଦରେ ସର୍ବନିମ୍ନ ତାପମାତ୍ରା ୭ ଡିଗ୍ରୀ ରେକର୍ଡ କରାଯାଇଛି । ଦିଲ୍ଲୀରେ ପ୍ରବଳ ଥଣ୍ଡା ଜାରି ରହିଛି । ପାଣିପାଗ ବିଭାଗ ଦିଲ୍ଲୀ-ଏନସିଆର ଅଞ୍ଚଳ ପାଇଁ ୟେଲୋ ଆଲର୍ଟ ଜାରି କରିଛି । ଥଣ୍ଡା ପବନ ବୃଦ୍ଧି ସହିତ, ବାୟୁ ଗୁଣବତ୍ତା ଅତ୍ୟନ୍ତ ଖରାପ ବର୍ଗରେ ପହଞ୍ଚିଛି । ଯାହା ସ୍ୱାସ୍ଥ୍ୟ ଏବଂ ଯାତାୟାତ ଉଭୟକୁ ପ୍ରଭାବିତ କରୁଛି । ଦିଲ୍ଲୀ-ଏନସିଆରରେ ଥଣ୍ଡା ଏବଂ ପବନର ବେଗ ବୃଦ୍ଧି ପାଉଛି । ଗତ ଦୁଇ ଦିନ ଧରି, ଦିଲ୍ଲୀ-ଏନସିଆରରେ ଶୀତର ପରିମାଣ ନିରନ୍ତର ବୃଦ୍ଧି ପାଉଛି । ସକାଳୁ ସନ୍ଧ୍ୟା ପର୍ଯ୍ୟନ୍ତ ସୂର୍ଯ୍ୟ କିରଣ ଦେଖାଯାଉନାହିଁ । ଘନ କୁହୁଡ଼ି ସମଗ୍ର ଅଞ୍ଚଳକୁ ଘୋଡ଼ାଇ ରଖିଛି । ଯାହା ଦୃଶ୍ୟମାନତା ହ୍ରାସ କରୁଛି ଏବଂ ଶୀତକୁ ବୃଦ୍ଧି କରୁଛି ।
ପୂର୍ବରୁ ଘଣ୍ଟା ପ୍ରତି 8 ରୁ 20 କିଲୋମିଟର ବେଗରେ ବହିଥିବା ଥଣ୍ଡା ପବନ ଆଜିଠାରୁ ଘଣ୍ଟା ପ୍ରତି 25 କିଲୋମିଟରକୁ ବୃଦ୍ଧି ପାଇବା ସମ୍ଭାବନା ରହିଛି । ଏହି ପ୍ରବଳ ପବନ ତାପମାତ୍ରାକୁ ଆହୁରି ହ୍ରାସ କରୁଛି । ଦୁର୍ଘଟଣାର ଆଶଙ୍କା ହ୍ରାସ କରିବା ପାଇଁ ଆଇଏମଡି ଲୋକଙ୍କୁ ସତର୍କତା ଅବଲମ୍ବନ କରିବାକୁ କହିଛି । ସକାଳୁ ବାହାରକୁ ନଯିବାକୁ ଏବଂ ରାଜପଥରେ ଅନାବଶ୍ୟକ ଯାତ୍ରା ନକରିବାକୁ ପରାମର୍ଶ ଦେଇଛି । ଦିଲ୍ଲୀରେ ସର୍ବାଧିକ ତାପମାତ୍ରା 20 ଏବଂ ସର୍ବନିମ୍ନ 8 ଡିଗ୍ରୀ ସେଲସିୟସ୍ ରେକର୍ଡ କରାଯାଇଛି । ନୋଏଡାର ତାପମାତ୍ରା 22 ରୁ 11 ଡିଗ୍ରୀ ସେଲସିୟସ୍ ମଧ୍ୟରେ ଥିଲା । AQI 328 ଥିଲା। ଗାଜିଆବାଦରେ ସବୁଠାରୁ ଖରାପ ପରିସ୍ଥିତି ଅନୁଭୂତ ହୋଇଥିଲା ।
AQI 484 ଏବଂ ତାପମାତ୍ରା 21 ଏବଂ 11 ଡିଗ୍ରୀ ସେଲସିୟସ୍ ଥିଲା।ଗୁରୁଗ୍ରାମରେ AQI 323 ଏବଂ ଗ୍ରେଟର ନୋଏଡାରେ 432 ରେକର୍ଡ କରାଯାଇଛି । IMD ଅନୁଯାୟୀ, ଡିସେମ୍ବର 27 ତାରିଖ ପର୍ଯ୍ୟନ୍ତ ସପ୍ତାହ ସାରା ଥଣ୍ଡା ପାଗ ଜାରି ରହିବ, ସର୍ବାଧିକ ତାପମାତ୍ରା 19 ଡିଗ୍ରୀ ସେଲସିୟସ୍ ଏବଂ ସର୍ବନିମ୍ନ ତାପମାତ୍ରା 7 ଡିଗ୍ରୀ ସେଲସିୟସ୍ ପହଞ୍ଚିବ ବୋଲି ଆଶା କରାଯାଉଛି । ଏହି ସମୟ ମଧ୍ୟରେ ଘନ କୁହୁଡ଼ି ଏବଂ ଥଣ୍ଡା ପବନ ଜାରି ରହିବ… ଘନ କୁହୁଡ଼ି ଯୋଗୁ ସ୍ଥିତି ଅଧିକ ଶୋଚନୀୟ ହୋଇଛି। ଦିଲ୍ଲୀରେ ଶତାଧିକ ବିମାନ ବାତିଲ ହୋଇଥିବା ବେଳେ ଅନେକ ବିମାନର ଉଡାଣ ଡେରି ହୋଇଛି ।