ଦିଗପହଣ୍ଡି: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ରାଜ୍ୟ ବିକାଶର ଖସଡ଼ାକୁ ବାସ୍ତବ ରୂପ ଦେବାକୁ ଆଗେଇ ଆସିଛନ୍ତି 5T ଓ ନବୀନ ଓଡ଼ିଶା ଅଧ୍ୟକ୍ଷ ଭି.କେ.ପାଣ୍ଡିଆନ। ଜଣେ ଦକ୍ଷ ପ୍ରଶାସକ ଭାବେ ଯେତିକି ଜଣାଶୁଣା, ଜଣେ ଦରଦୀ ମଣିଷ ଭାବେ ସେତିକି ଲୋକପ୍ରିୟ । ଓଡ଼ିଶାର ଲୋକକଳାକୁ ବଞ୍ଚାଇବା, କଳାକାରଙ୍କୁ ଜୀବନ ଜୀବିକା ଯୋଗାଇବାରେ ତାଙ୍କର ରହିଛି ପ୍ରମୁଖ ଅବଦାନ। ଗଞ୍ଜାମ ଜିଲ୍ଲାପାଳ ଥିବା ବେଳେ ବିଲୁପ୍ତ ହେବାକୁ ବସିଥିବା ଲୋକକଳାକୁ ଆଗକୁ ଆଣିବା ପାଇଁ ତାଙ୍କ ପ୍ରୟାସକୁ ସାରା ରାଜ୍ୟ ପରେ ଆପଣାଇଥିଲା । ଏବେ 5T ଓ ନବୀନ ଓଡ଼ିଶା ଅଧ୍ୟକ୍ଷ ହେବା ପରେ ଜାତୀୟ ଗଣମାଧ୍ୟମରେ ତାଙ୍କର ଏହି ଅଭିନବ ଯୋଜନା ପୁଣି ଶିରୋନାମାକୁ ଫେରିଛି । କଳା କ୍ଷେତ୍ରରେ ତାଙ୍କର ଅବଦାନକୁ ଏବେ ମନେ ପକାଇ ଝୁରି ହେଉଛନ୍ତି ଗଞ୍ଜାମ ଜିଲ୍ଲାର ବିଭିନ୍ନ କଳାକାର ସଂଗଠନ।
ସେ ଚିହ୍ନିଥିଲେ ଓଡ଼ିଶାର ପ୍ରାଣକୁ । ଓଡିଆ ଲୋକକଳାକାରଙ୍କ ପ୍ରତିଭା ଓ ମନକୁ । ରାଜ୍ୟରେ ବିଭିନ୍ନ ପ୍ରକାରର ଲୋକକଳା ବୁଡ଼ିବାକୁ ବସିଥିବା ବେଳେ ଏହା ବଞ୍ଚାଇବାକୁ ଆଗେଇ ଆସିଥିଲେ ଭି.କେ.ପାଣ୍ଡିଆନ । ଗଞ୍ଜାମ ଜିଲ୍ଲାପାଳ ଥିବା ବେଳେ ଏପରି ଏକ ଯୋଜନା କରିଥିଲେ ଯାହା ସାରା ରାଜ୍ୟ ପରେ ଆପଣାଇଥିଲା । 5T ଓ ନବୀନ ଓଡ଼ିଶା ଅଧ୍ୟକ୍ଷ ହେବା ପରେ କଳା କ୍ଷେତ୍ରରେ ପାଣ୍ଡିଆନଙ୍କ ଅବଦାନକୁ ମନେ ପକାଇ ଝୁରି ହେଉଛନ୍ତି ଗଞ୍ଜାମ ଜିଲ୍ଲାର କଳାକାର ଗୋଷ୍ଠୀ । ୨୦୧୦ ମସିହାରେ ଗଞ୍ଜାମ ଜିଲ୍ଲାପାଳ ଥିବା ବେଳେ ଅନେକ ସମୟରେ ଜିଲ୍ଲାର ବିଭିନ୍ନ ଲୋକକଳାକାରଙ୍କ ଅଭିଯୋଗ ଶୁଣୁଥିଲେ ।
ସବୁଠି ଗୋଟିଏ ଦାବି ବା ନିବେଦନ ଥିଲା । ଆର୍ଥିକ ଅନଟନ ସୁଧାରିବା ପାଇଁ କିଛି ସରକାରୀ ସାହାଯ୍ୟ ଅପେକ୍ଷାରେ ଥିଲେ କଳାକାର । ଜିଲ୍ଲାପାଳ ଭାବେ ରେଡ଼କ୍ରସ ପାଣ୍ଠିରୁ ପାଣ୍ଡିଆନ କିଛି ସାହାଯ୍ୟ ଦେଉଥିଲେ ମଧ୍ୟ ଏହା ସ୍ଥାୟୀ ପ୍ରତିକାର ନଥିଲା । ଚିନ୍ତା କରୁଥିଲେ କିଛି ଗୋଟେ ଏମାନଙ୍କ ପାଇଁ ସ୍ବତନ୍ତ୍ର ଯୋଜନା କରିବା ପାଇଁ । ତତକାଳୀନ ଜିଲ୍ଲା ସଂସ୍କୃତି ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ ଜିଲ୍ଲାରେ କେତେ ପ୍ରକାରର ଲୋକକଳା ଅଛି, କେଉଁ ବର୍ଗରେ କେତେ କଳାକାର ଅଛନ୍ତି, ତାର ଏକ ତାଲିକା ପ୍ରସ୍ତୁତ କରିବାକୁ ।
ଏହା ପରେ ଆରମ୍ଭ ହେଲା ଐତିହାସିକ ଯୋଜନା । ସରକାରଙ୍କ ବିଭିନ୍ନ ଯୋଜନାର ପ୍ରଚାର ପ୍ରସାର ପାଇଁ ଉଦ୍ଦିଷ୍ଟ ଆଇଇସି ପାଣ୍ଠିରୁ କିଛି ଲୋକକଳାର ବିକାଶ ପାଇଁ ଖର୍ଚ୍ଚ କରିବାକୁ ଚିନ୍ତା କଲେ ପାଣ୍ଡିଆନ । ଉଦ୍ଦେଶ୍ୟ ଥିଲା, ବିଲୁପ୍ତ ହେବାକୁ ଥିବା ଲୋକକଳାକୁ ବଞ୍ଚାଇବା, କଳାକାରମାନଙ୍କୁ ଆର୍ଥିକ ପ୍ରୋତ୍ସାହନ ଯୋଗାଇବା ଏବଂ ସହଜ ଓ ସରଳ ମାଧ୍ୟମରେ ସରକାରଙ୍କ ଯୋଜନା ଲୋକଙ୍କ ପାଖରେ ପହଞ୍ଚାଇବା। ଯୋଜନା କିପରି କାର୍ଯ୍ୟକାରୀ ହେଲା, ସେ ବିଷୟରେ ଶୁଣନ୍ତୁ କ’ଣ କହୁଛନ୍ତି ସଂସ୍କୃତି ବିଭାଗର ସହକାରୀ ନିର୍ଦ୍ଦେଶକ ତଥା ତତ୍କାଳୀନ ଜିଲ୍ଲା ସଂସ୍କୃତି ଅଧିକାରୀ ।
ଅଭିନୟ, କଳା, ସଂସ୍କୃତିର ଷଠିଘର ଓଡ଼ିଶା । ଯୋଡିଶଙ୍ଖ, ରଣପା, ଦାସକାଠିଆ, ପାଲା, ସଖୀନାଚ, ବାଘ ନାଚ, ଘୋଡ଼ାନାଚ, ପ୍ରହ୍ଲାଦ ନାଚ, ଘୁଡ଼କୀ, ରାମ ଲୀଲା, କୃଷ୍ଣ ଲୀଳା ଭଳି ଲୋକକଳାରେ ଭରପୂର ଗଞ୍ଜାମ ଜିଲ୍ଲା । ହେଲେ ଏମାନଙ୍କ ପାଇଁ ସରକାରଙ୍କ କିଛି ପ୍ରୋତ୍ସହାନର ବ୍ୟବସ୍ଥା ନଥିଲା । ଏଣୁ ଗଞ୍ଜାମ ଜିଲ୍ଲାପାଳ ଭାବେ ବଦଳାଇଥିଲେ ରଣନୀତି । ଦୃଢ ସଙ୍କଳ୍ପ ନେଇଥିଲେ ଏମାନଙ୍କ ପାଇଁ କିଛି କରିବାକୁ । ନରେଗା ଯୋଜନାରେ ଗଞ୍ଜାମକୁ ସାରା ଦେଶରେ ଏକ ନମ୍ବର କରାଇଥିବା ପାଣ୍ଡିଆନ ଲୋକକଳା ପାଇଁ କିଛି କରିବାକୁ ମନସ୍ଥ କରିଥିଲେ । ଜିଲ୍ଲା ସ୍ତରରେ ଉପଲବ୍ଧ ପାଣ୍ଠିର ଅର୍ଥପୂର୍ଣ୍ଣ ବ୍ୟବହାର ଯୋଗୁଁ ଦାରିଦ୍ର୍ୟର ଶିକାର ହୋଇଥିବା କଳାକାରଙ୍କ ଜୀବନରେ ଏକ ପରିବର୍ତ୍ତନ ଆସିଥିଲା ।
ପାଣ୍ଡିଆନ୍ ବ୍ଲକ ଏବଂ ଜିଲ୍ଲା ସ୍ତରରେ ଫେଡେରେସନ୍ ଗଠନ କରିଥିଲେ । ସେମାନଙ୍କୁ ପଞ୍ଜୀକୃତ କରିଥିଲେ ଏବଂ ପରେ ଜିଲ୍ଲା ପ୍ରଶାସନ ପ୍ରତ୍ୟେକ ଫେଡେରେସନ୍ ସହିତ ଏକ ଏମଓୟୁ ସ୍ୱାକ୍ଷର କରିଥିଲେ ଜୁନ୍ ୩, ୨୦୧୦ରେ । ଏଥିରେ କଳାକାର ଏବଂ ଗୁରୁମାନଙ୍କୁ ଲୋକକଳା ଫର୍ମକୁ ଲୋକପ୍ରିୟ କରିବା ଦାୟିତ୍ବ ଦିଆଯାଇଥିଲା । ଏହାର ପ୍ରତିବଦଳରେ ଆର୍ଥିକ କ୍ଷତିପୂରଣ ମିଳିବାର ବ୍ୟବସ୍ଥା କରାଯାଇଥିଲା । ଏହାପରେ ସେମାନଙ୍କୁ ସରକାରଙ୍କ ଯୋଜନାର ପ୍ରଚାର ପ୍ରସାର କାମରେ ଲାଗାଯାଇଥିଲା । ତାଲିମ ପ୍ରାପ୍ତ ଗୁରୁମାନେ ଗାଁ ଗାଁ ବୁଲିବେ, ଅଧିକ କଳାକାର ବାଛିବେ ଏବଂ ସେମାନଙ୍କୁ ତାଲିମ ଦେବା ପାଇଁ ନିଷ୍ପତ୍ତି ହୋଇଥିଲା ।
ଗୋଟିଏ ବର୍ଷରେ ପ୍ରାୟ ୧୨ହଜାର କାର୍ଯ୍ୟକ୍ରମ ହୋଇଥିଲା ଗଞ୍ଜାମ ଜିଲ୍ଲାରେ । ଗଞ୍ଜାମ ଜିଲ୍ଲାର ଅପାର ସଫଳତା ପରେ ମୁଖ୍ୟମନ୍ତ୍ରୀ ୨୦୧୧ ମସିହା ଏପ୍ରିଲ ପହିଲାରେ ସାରା ରାଜ୍ୟରେ ଏହି ଯୋଜନା କାର୍ଯ୍ୟକାରୀ କରିଥିଲେ । ପାଣ୍ଡିଆନଙ୍କ ଯୋଗୁଁ ଗଞ୍ଜାମ ଜିଲ୍ଲା ସହିତ ସାରା ରାଜ୍ୟରେ ଲୋକକଳା ବଞ୍ଚିପାରିଲା ଏବଂ କଳାକାରମାନେ ଆର୍ଥିକ ସ୍ବାବଲମ୍ବୀ ହୋଇପାରିଲେ । ଏଥିପାଇଁ ଗଞ୍ଜାମ ଜିଲ୍ଲାର ବିଭିନ୍ନ କଳାକାର ମାନେ ପାଣ୍ଡିଆନଙ୍କୁ ଝୁରି ହେବା ସହ ତାଙ୍କୁ ଭଗବାନଙ୍କ ସହ ତୁଳନା କରିଛନ୍ତି ।
ଓଡ଼ିଶାର ବିକାଶରେ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସ୍ବପ୍ନ ପୂରଣ କରିବା ଦିଗରେ ଭି.କେ. ପାଣ୍ଡିଆନଙ୍କ ଦୃଢ ସଙ୍କଳ୍ପ, କଠିନ ପରିଶ୍ରମ ପାଇଁ ଯେତିକି ଚର୍ଚ୍ଚାରେ, ତାଙ୍କ ଭିତରେ କଳାକୁ ଆଦର କରୁଥିବା ଏବଂ କଳାକାରମାନଙ୍କ ପାଇଁ ଦରଦୀପଣିଆ ସେତିକି ପ୍ରଶଂସିତ । ପାଣ୍ଡିଆନ୍ ଗଞ୍ଜାମର ଗରିବ କଳାକାରମାନଙ୍କୁ ଭବିଷ୍ୟତ ଦେଖାଇଛନ୍ତି ଯାହା ସାରା ରାଜ୍ୟକୁ ବାଟ ଦେଖାଇଛି ।
