ନନ୍ଦିଘୋଷ ବ୍ୟୁରୋ : ରାଜଧାନୀ ଦିଲ୍ଲୀରେ ଥମୁନି ଜଳବିତ୍ପାତ। ଯମୁନା ନଦୀର ଜଳପତ୍ତନ ବୃଦ୍ଧି ପାଉଥିବାରୁ ହଜାର ହଜାର ଲୋକ ଜଳବନ୍ଦୀ ହୋଇଛନ୍ତି। ମୋନାଷ୍ଟ୍ରି ମାର୍କେଟ, ଯମୁନା ବଜାର, ବସୁଦେବ ଘାଟ ସ୍ଥିତି ସଂଗୀନ ହୋଇଛି। ପାଣିରେ ବୁଡ଼ି ରହିଛି ଏନସିଆରର ଅନେକ ଅଞ୍ଚଳ । ରାସ୍ତା, କାର ଏବଂ ଘରେ ପାଣି ପ୍ରବେଶ କରିଛି । ଗୁରୁଗ୍ରାମରେ ବନ୍ୟା ପାଇଁ ଜଳ ନିଷ୍କାସନ ସମସ୍ୟାକୁ ଦାୟୀ କରାଯାଉଛି। ଦିଲ୍ଲୀରେ ଯମୁନା ନଦୀର ଜଳ ଛଅ ଦଶନ୍ଧି ମଧ୍ୟରେ ତୃତୀୟ ସର୍ବୋଚ୍ଚ ସ୍ତରରେ ପହଞ୍ଚିଛି । ଗୀତା କଲୋନି, ମୟୂର ବିହାର ଫେଜ୍, ଯମୁନା ବଜାର, ରିଙ୍ଗ ରୋଡ୍ , ସିଭିଲ୍ ଲାଇନ୍ସ, ସୋନିଆ ବିହାର, କାଶ୍ମୀର ଗେଟ୍, ବାୱାନା, ମୁକୁନ୍ଦପୁର, ସରିତା ବିହାର ଏବଂ ଜନକପୁରୀ ଅଞ୍ଚଳ ଜଳମଗ୍ନ ହୋଇଛି । ଯମୁନା ବଜାରର ଲୋକମାନଙ୍କୁ ଆଣ୍ଠୁଏ ପାଣି ଦେଇ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଥିଲା। ତଳିଆ ଅଞ୍ଚଳରେ ରହୁଥିବା ୧୪ ହଜାର ଲୋକଙ୍କୁ ଉଦ୍ଧାର କରାଯାଇଛି ।
ଆଫଗାନିସ୍ତାନରେ ପୁଣି ଭୂକମ୍ପ ; ରିକ୍ଟର ସ୍କେଲରେ ତୀବ୍ରତା ୬.୨ ରେକର୍ଡ
ନନ୍ଦିଘୋଷ ବ୍ୟୁରୋ : ଦକ୍ଷିଣ ପୂର୍ବ ଆଫଗାନିସ୍ତାନରେ ପୁଣି ବଡ଼ଧରଣର ଭୂକମ୍ପ। ରିକ୍ଟର ସ୍କେଲରେ ଏହାର ତୀବ୍ରତା ଥିଲା ୬.୨। ଗତ ରବିବାରଠାରୁ ଆଫଗାନିସ୍ତାନରେ ଘଟିଥିବା ଭୂକମ୍ପରୁ ଏହା ହେଉଛି ତୃତୀୟ। ଭୂକମ୍ପ ସମ୍ପର୍କରେ ସୂଚନା ଦେଇଛି ଜର୍ମାନ ରିସର୍ଚ୍ଚ ସେଣ୍ଟର ଫର ଜିଓସାଇନ୍ସେସ। ନଙ୍ଗାରହାର ଓ ନଘମାନ ଅଞ୍ଚଳରେ ୧୬୦ କିଲୋମିଟର ଭୂଗର୍ଭରେ ଏହି ଭୂକମ୍ପ ଅନୁଭୂତ ହୋଇଥିଲା। ଗତ ରବିବାର ଘଟିଥିବା ଭୂକମ୍ପରେ ବର୍ତ୍ତମାନ ସୁଦ୍ଧା ମୃତ୍ୟୁ ସଂଖ୍ୟା ୨୨ଶହ ହୋଇଥିବାବେଳେ ଭୂକମ୍ପ ପ୍ରବଣ ଅଞ୍ଚଳରେ ଉଦ୍ଧାର କାର୍ଯ୍ୟ ଜାରି ରହିଛି। ୩ ହଜାର ୬୦୦ରୁ ଅଧିକ ଲୋକ ଏହି ଭୂକମ୍ପରେ ଆହତ ହୋଇଥିଲେ। ପ୍ରାୟ ୮୪ ହଜାର ଲୋକ ଏହି ଭୂକମ୍ପରେ ପ୍ରଭାବିତ ହୋଇଥିଲେ। ଭୂକମ୍ପର ତୀବ୍ରତା ଏତେ ଅଧିକ ଥିଲା ଯେ ଏହାର ପ୍ରଭାବ ଦିଲ୍ଲୀ-ଏନସିଆର ଓ ଜାମ୍ମୁ ଓ କାଶ୍ମୀରରେ ବି ଅନୁଭୂତ ହୋଇଥିଲା। ହିନ୍ଦୁକୁଶ ପାର୍ବତ୍ୟାଞ୍ଚଳରେ ରହିଥିବା ଆଫଗାନିସ୍ତାନ ସର୍ବଦା ଭୂକମ୍ପପ୍ରବଣ ରହିଆସିଛି।
ବୈତରଣୀରେ ପୁଣି ଆସିଲା ବନ୍ୟା: ତିନି ମାସ ମଧ୍ୟରେ ଏହା ତୃତୀୟ ବନ୍ୟା
ବୈତରଣୀରେ ପୁଣି ଆସିଲା ବନ୍ୟା। ଏଥର ଛୋଟ ଧରଣର ବନ୍ୟା ହୋଇଥିଲେ ବି ବଢ଼ାଇ ଦେଇଛି ଚିନ୍ତା। କାରଣ ଗତ ତିନି ମାସ ମଧ୍ୟରେ ଏହା ବୈତରଣୀରେ ତୃତୀୟ ବନ୍ୟା। ଆଖୁଆପଦାରେ ବିପଦ ସଙ୍କେତ ଉପରେ ପ୍ରବାହିତ ହେଉଛି ବନ୍ୟାଜଳ। ପାଣି ବଢ଼ିଥିବାରୁ ପ୍ରଭାବିତ ହୋଇଛନ୍ତି ଭଦ୍ରକ, ବନ୍ତ, ଧାମନଗର ଓ ଭଣ୍ଡାରୀପୋଖରୀ। ସେହିପରି ଯାଜପୁର ଜିଲ୍ଲା ପୁଣି ଥରେ ବନ୍ୟାର ପ୍ରକୋପ ସହିଛି। ଗତକାଲି ୧୪ଟି ବ୍ଲକରେ ୧୦୦ ମିଲିମିଟରରୁ ଅଧିକ ଓ ୪୨ଟି ବ୍ଲକରେ ୫୦ ମିଲିମିଟରରୁ ଅଧିକ ବର୍ଷା ହୋଇଛି। ଯାହା ପ୍ରବଳରୁ ଅତି ପ୍ରବଳ ବର୍ଷା। ଉପର ମହାନଦୀ, ବୈତରଣୀ ଓ ବୁଢାବଳଙ୍ଗରେ ବଢ଼ିଛି ବର୍ଷାର ପରିମାଣ। କେବଳ ବୈତରଣୀରେ ହିଁ ଛୋଟ ଧରଣର ବନ୍ୟା ଥିବାରୁ ଜିଲ୍ଲା ପ୍ରଶାସନକୁ କରାଯାଇଛି ସତର୍କ।
ଭଦ୍ରକ, ବନ୍ତ, ଧାମନଗର ଓ ଭଣ୍ଡାରୀପୋଖରୀରେ ମଧ୍ୟ ପ୍ରବଳ ବର୍ଷା ଲାଗି ରହିଛି । ଅସ୍ତବ୍ୟସ୍ତ ହୋଇପଡ଼ିଛି ଜନଜୀବନ। ବଜାର ଓ ହାଟଠାରୁ ଆରମ୍ଭ କରି ରାସ୍ତା ଘାଟ ଶୂନଶାନ ହୋଇପଡ଼ିଛି। ଗୋଟିଏ ପଟେ ବୈତରଣୀରେ ବନ୍ୟା ଆସିଥିବା ବେଳେ, ଭଦ୍ରକରେ ପ୍ରବାହିତ ସାଳନ୍ଦୀ ନଦୀ ମଧ୍ୟ ଫୁଲିବା ଆରମ୍ଭ କରିଛି। ଯାହାକୁ ନେଇ ତଳିଆ ଅଞ୍ଚଳବାସୀଙ୍କ ମନରେ ପଶିଛି ଛନକା। ସେପଟେ ଯାଜପୁର ବ୍ଲକ ସୁଜନପୁର ପଞ୍ଚାୟତର ହସନପୁର ଗାଁରେ ଭାଙ୍ଗିଛି ବ୍ରିଜ। ଖରସ୍ରୋତା ନଦୀର ଶାଖା ଦୁଧେଇନାଳରେ ଜଳସ୍ରୋତ ପ୍ରଖର ଥିବାରୁ, ଏହି ସେତୁର ପାରାପେଠି ଓ ଆପ୍ରୋଚ ରୋଡ ଭାଙ୍ଗି ପଡ଼ିଛି। ଫଳରେ ହସନପୁର ଓ ଦୁର୍ଗାପୁରକୁ ବିଚ୍ଛିନ୍ନ ହୋଇଛି ଯୋଗାଯୋଗ। ଲଗାଣ ବର୍ଷା ଯୋଗୁଁ ଜଳକା ସତର୍କ ସଙ୍କେତ ଉପରେ ଅଛି। ହେଲେ ଏହା ବିପଦ ସଙ୍କେତକୁ ଟପିବନି ବୋଲି ଆକଳନ କରାଯାଇଛି । ସେହିପରି ହୀରାକୁଦରେ ଜଳସ୍ତର ବୃଦ୍ଧି ପାଇବାର ସମ୍ଭାବନା ଥିଲେ ବି ମହାନଦୀରେ ବନ୍ୟା ହେବନି।
୩ ଜିଲ୍ଲାର ସଭାପତି ଓ କାର୍ଯ୍ୟକାରୀ ସଭାପତିଙ୍କ ନାଁ ଘୋଷଣା
ଘୋଷଣା ହେଲା ବିଜେଡିର ଜିଲ୍ଲା ସଭାପତିଙ୍କ ନାଁ । ୩ ଜିଲ୍ଲାର ସଭାପତି ଓ କାର୍ଯ୍ୟକାରୀ ସଭାପତିଙ୍କ ନାଁ ଘୋଷଣା । ଢେଙ୍କାନାଳ, କୋରାପୁଟ ଓ ରାୟଗଡ଼ା ଜିଲ୍ଲା ସଭାପତିଙ୍କ ନାଁ ଘୋଷଣା । ନୃସିଂହ ଚରଣ ସାହୁ ହେଲେ ଢେଙ୍କାନାଳ ଜିଲ୍ଲା ବିଜେଡି ସଭାପତି । ସନ୍ଦୀପ ଷଡ଼ଙ୍ଗୀ ହେଲେ ଢେଙ୍କାନାଳ ଜିଲ୍ଲା ବିଜେଡିର କାର୍ଯ୍ୟକାରୀ ସଭାପତି । ଝିନ ହିକକା ହେଲେ କୋରାପୁଟ ଜିଲ୍ଲା ବିଜେଡି ସଭାପତି । ଦୁର୍ଗା ମିଶ୍ର ଓ ପ୍ରସାଦ ବିଡିକା କାର୍ଯ୍ୟକାରୀ ସଭାପତି । ଜଗନ୍ନାଥ ସାରକା ହେଲେ ରାୟଗଡ଼ା ଜିଲ୍ଲା ବିଜେଡି ସଭାପତି । ଗୟାଧର ପୁଆଲୋ ଓ ରଞ୍ଜିତ ପାଣିଗ୍ରାହୀ ହେଲେ କାର୍ଯ୍ୟକାରୀ ସଭାପତି । ସମସ୍ତଙ୍କ ନିଯୁକ୍ତି ଦେଇଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ ।
ସ୍ନେହାଙ୍ଗିନୀ ଛୁରିଆ ହେଲେ ବିଜୁ ମହିଳା ଜନତା ଦଳର ସଭାନେତ୍ରୀ
ସ୍ନେହାଙ୍ଗିନୀ ଛୁରିଆ ହେଲେ ବିଜୁ ମହିଳା ଜନତା ଦଳର ସଭାନେତ୍ରୀ । ସ୍ନେହାଙ୍ଗିନୀଙ୍କୁ ନିଯୁକ୍ତି ଦେଲେ ସଭାପତି ନବୀନ ପଟ୍ଟନାୟକ । ୧୫ ଜଣ ମହିଳା ନେତ୍ରୀଙ୍କୁ ମହିଳା ବ୍ୟାପାର ଦାୟିତ୍ବ । ସୁମିତ୍ରା ଜେନା – ବରିଷ୍ଠ ସାଧାରଣ ସମ୍ପାଦକ, ମହିଳା ବ୍ୟାପାର । ରାଜଶ୍ରୀ ମଲ୍ଲିକ – ବରିଷ୍ଠ ସାଧାରଣ ସମ୍ପାଦକ, ମହିଳା ବ୍ୟାପାର । ଲେଖାଶ୍ରୀ ସାମନ୍ତସିଂହାର – ବରିଷ୍ଠ ସାଧାରଣ ସମ୍ପାଦକ, ମହିଳା ବ୍ୟାପାର । ସୁଲୋଚନା ଦାସ – ସାଧାରଣ ସମ୍ପାଦକ, ମହିଳା ବ୍ୟାପାର । ସୁଲତା ଦେଓ – ସାଧାରଣ ସମ୍ପାଦକ, ମହିଳା ବ୍ୟାପାର । ବର୍ଷା ସିଂହ ବରିହା – ସାଧାରଣ ସମ୍ପାଦକ, ମହିଳା ବ୍ୟାପାର । ଶର୍ମିଷ୍ଠା ସେଠୀ – ସାଧାରଣ ସମ୍ପାଦକ, ମହିଳା ବ୍ୟାପାର । ଶ୍ରୀମୟୀ ମିଶ୍ର – ସାଧାରଣ ସମ୍ପାଦକ, ମହିଳା ବ୍ୟାପାର । ଲୋପାମୁଦ୍ରା ବକ୍ସିପାତ୍ର – ସାଧାରଣ ସମ୍ପାଦକ, ମହିଳା ବ୍ୟାପାର । ମିନତି ବେହେରା – ସାଧାରଣ ସମ୍ପାଦକ, ମହିଳା ବ୍ୟାପାର । କସ୍ତୁରୀ ମହାପାତ୍ର – ସାଧାରଣ ସମ୍ପାଦକ, ମହିଳା ବ୍ୟାପାର । ପଦ୍ମିନୀ ଦିଆନ – ସାଧାରଣ ସମ୍ପାଦକ, ମହିଳା ବ୍ୟାପାର । ଦିପାଳୀ ଦାସ – ସାଧାରଣ ସମ୍ପାଦକ, ମହିଳା ବ୍ୟାପାର । ରଞ୍ଜିତା ସାହୁ – ସାଧାରଣ ସମ୍ପାଦକ, ମହିଳା ବ୍ୟାପାର । ଗିତାଞ୍ଜଳୀ ବସ୍ତିଆ – ସାଧାରଣ ସମ୍ପାଦକ, ମହିଳା ବ୍ୟାପାର ।
ଫେରିବ କି ଜଗନ୍ନାଥଙ୍କ ହଜାର ହଜାର ଏକର ଜମି ! ପ୍ରକ୍ରିୟା ଆରମ୍ଭ କଲେ ସରକାର
ଫେରିବ କି ଜଗାର ହଜାର ହଜାର ଏକର ଜମି ! ନା କେବଳ ଘୋଷଣାରେ ରହିଯିବ ସୀମିତ । ଆଇନ ମନ୍ତ୍ରୀ କହିଲେ, ପ୍ରକ୍ରିୟା ଆରମ୍ଭ କରିଛନ୍ତି ସରକାର । ବିଜେଡି କହିଲା ପ୍ରଥମେ ଆଇନ ଆଣ, ଜମି କିଣାବିକା ବନ୍ଦକର । ଜଗନ୍ନାଥଙ୍କ ଜମି ଅଛି । ହେଲେ ଭୂସମ୍ପତ୍ତିର ସଠିକ ଆକଳନ ହୋଇନାହିଁ । ଯେଉଁଠି ଜଗନ୍ନାଥ ଜମି ଅଛି ସେସବୁ କିପରି ମହାପ୍ରଭୁଙ୍କ କାମରେ ଲାଗିବ ତାକୁ ନେଇ ପ୍ରକ୍ରିୟା ଆରମ୍ଭ କରିଛନ୍ତି ରାଜ୍ୟ ସରକାର । ରାଜ୍ୟ ଭିତରେ ଓ ବାହାରେ ଜଗନ୍ନାଥଙ୍କ ୫୮ ହଜାର ଏକର ଜମି ରହିଛି । ପ୍ରାୟ ୩୭ ହଜାର ଏକର ଜମିର କାଗଜପତ୍ର ପ୍ରସ୍ତୁତ କରାଯାଇଛି । ବାକି ହୋଇନାହିଁ । ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିଛନ୍ତି ସରକାର ଏ ଦିଗରେ ତ୍ୱରିତ ପଦକ୍ଷେପ ନେଉଛନ୍ତି। ମହାପ୍ରଭୁଙ୍କର ଯେଉଁଠି ଭୂସମ୍ପତ୍ତି ଅଛି ତାର ସଠିକ୍ ଆକଳନ କିପରି ହୋଇପାରିବ ସେନେଇ ସରକାର ଯୋଜନା ପ୍ରସ୍ତୁତ କରୁଛନ୍ତି । ରାଜ୍ୟ ଏବଂ ରାଜ୍ୟ ବାହାରେ ଯେଉଁଠି ମହାପ୍ରଭୁଙ୍କ ସମ୍ପତ୍ତି ଅଛି ସେସବୁ ମହାପ୍ରଭୁଙ୍କ କାମରେ କିପରି ବିନିଯୋଗ ହେବ ସେନେଇ ସରକାର ପଦକ୍ଷେପ ନେଉଛନ୍ତି। ଅନ୍ୟପଟେ କଂଗ୍ରେସ କହିଛି ସରକାର କେବଳ ଘୋଷଣା ନକରି ଜମି କିପରି ଫେରିପାରିବ ସେ ଦିଗରେ ପ୍ରୟାସ କରନ୍ତୁ । ବରିଷ୍ଠ କଂଗ୍ରେସ ନେତା କହିଛନ୍ତି ନେପାଳ, ଆନ୍ଧ୍ରପ୍ରଦେଶରେ ବି ଜମି ଅଛି । ତାହାକୁ ଫେରସ୍ତ ଆଣନ୍ତୁ ।
ଜଗନ୍ନାଥ ଜମି ଫେରସ୍ତ ଆଣିବାର ଆବଶ୍ୟକତା ରହିଛି ବୋଲି ପୁରୀ ବିଜେଡି ବିଧାୟକ ସୁନୀଲ ମହାନ୍ତି କହିଛନ୍ତି । ସରକାର ପ୍ରଥମେ ଆଇନ ଆଣନ୍ତୁ , ତାପରେ ଜମି ଫେରାଇବା ପ୍ରକ୍ରିୟା କରିବେ। ଦେଢ ବର୍ଷ ହେବ ସରକାର କେବଳ କହୁଛନ୍ତି । କିନ୍ତୁ କାମ ଧୀମେଇ ଯାଇଛି । ଜଗନ୍ନାଥ ଜମିକୁ ଅଛି ଅସାଧୁ ବ୍ୟକ୍ତି ଜବରଦଖଲ କରି ରଖିଛନ୍ତି । ଏପରିକି ଏହି ଜମିକୁ ବିକ୍ରି ମଧ୍ୟ କରୁଛନ୍ତି । ପ୍ରଥମେ ରାଜ୍ୟ ସରକାର ଏଥିରେ ଅଙ୍କୁଶ ଲଗାଇବା ଦରକାର ବୋଲି ବିଜେଡି କହିଛି । ଜଗନ୍ନାଥଙ୍କର ୬୦ ହଜାର ୪୨୬ ଏକର ଜମି ଅଛି । ସେଥିରୁ ୩୪ହଜାର ୬୧ ଏକର ଜମିର କାଗଜପତ୍ର ରହିଛି । ୬ ବର୍ଷରେ ମାତ୍ର ୪ ହଜାର ଏକର ଜମି ଫେରିଛି । ରାଜ୍ୟର ୨୪ଟି ଜିଲ୍ଲାରେ ଜଗନ୍ନାଥଙ୍କ ଜମି ଥିବା ବେଳେ ୧୦ଟି ଜିଲ୍ଲାରେ ରାଜସ୍ବ ଆଦାୟ ହେଉଛି । ରାଜ୍ୟ ସରକାର ଜଗନ୍ନାଥଙ୍କ ଜମି ଫେରାଇ ଆଣିବେ ନା ଏହା କେବଳ ଘୋଷଣାରେ ରହିଯିବ ତାହାକୁ ନେଇ ଆରମ୍ଭ ହୋଇଛି ବିତର୍କ ।
ସବୁ ଦଳକୁ ଘାରିଛି ସଂଗଠନ ଚିନ୍ତା: ନିର୍ବାଚନ ପୂର୍ବରୁ ଚଳଚଞ୍ଚଳ ତିନି ଦଳର ଶିବିର
ସବୁ ଦଳକୁ ଘାରିଛି ସଂଗଠନ ଚିନ୍ତା । ଦିଲ୍ଲୀରେ ବିଜେପିର କସରତ ଜାରି । ଓଡିଶାରେ ଏଆଇସିସି ଖୋଜୁଛି ଜିଲ୍ଲା ମୁଖିଆ । ସଂଗଠନ ପରେ ଜିଲ୍ଲା ସମୀକ୍ଷା କରୁଛି ବିଜେଡି ।.. ..ସଂଗଠନ ଓ ସରକାର ଏକା ସାଙ୍ଗରେ ଚଳାଇବା ଲାଗି ଶାସକ ବିଜେପିରେ ଚାଲିଛି ଜୋରଦାର କସରତ। ରାଜ୍ୟ ବିଜେପି ମଙ୍ଗୁଆଳଙ୍କ ସହ ଦିଲ୍ଲୀର ଶୀର୍ଷ ନେତୃତ୍ବଙ୍କର ଜାରି ରହିଛି କସରତ । କିଏ ରାଜ୍ୟ ପରିଷଦରେ ସାମିଲ ହେବ? କାହାକୁ ମିଳିବ ନିଗମ ଲଡୁ ? ମନ୍ତ୍ରିମଣ୍ଡଳରେ କିଏ ହେବେ ସାମିଲ, କିଏ ବାଦ ପଡିବେ ଓ କାହାର ବିଭାଗ ପରିବର୍ତ୍ତିନ ହେବ ସେ ନେଇ ରାଜ୍ୟ ଓ କେନ୍ଦ୍ର ବିଜେପି ନେତୃତ୍ବ ଓଡିଶାରୁ ଦିଲ୍ଲୀଯାଏ ମାନସମନ୍ଥନ ଜାରି ରଖିଛନ୍ତି । ବିଜେପି ପରି କଂଗ୍ରେସକୁ ମଧ୍ୟ ସଂଗଠନ ସଜାଡିବା ଟେନସନରେ ଘାଣ୍ଟି ହେଉଛି । ପ୍ରଥମଥର ଲାଗି ପିସିସି ନୁହେଁ ଏଆଇସିସି ଓଡିଶା ସଂଗଠନକୁ ମଜଭୁତ କରିବାକୁ ଅଣ୍ଟା ଭିଡିଛି । ସଂଗଠନ ସୃଜନ ଅଭିଯାନ ଜରିଆରେ ୩୫ ସାଂଗଠନିକ ଜିଲ୍ଲାକୁ ଏଆଇସିସିର ୩୫ ଜଣ ପର୍ଯ୍ୟବେକ୍ଷକ ଗସ୍ତ କରି ଜିଲ୍ଲା ସଭାପତି ଚୟନ କସରତକୁ ଜୋରଦାର କରିଛନ୍ତି । ଲବି ନୁହେଁ, ଦକ୍ଷ ଲୋକଙ୍କୁ ସଂଗଠନ ଦାୟିତ୍ବ ଦେବାକୁ ଦଳ ଏପରି ନୂଆ ରଣନୀତି ପ୍ରସ୍ତୁତ କରିଥିବା କହିଛି କଂଗ୍ରେସ ।
ସଂଗଠନ ସଜାଡିବା ପ୍ରକ୍ରିୟାରେ ଦୁଇ ଜାତୀୟ ଦଳରୁ ଢେର ଆଗରେ ରହିଛି ବିଜେଡି । ବିଜେଡି ରାଜ୍ୟ ପରିଷଦ, ରାଜ୍ୟ କାର୍ଯ୍ୟକାରିଣୀ, ରାଜନୈତିକ ବ୍ୟାପର କମିଟି, ଯୁବ ଓ ଛାତ୍ର ସଭାପତି, ଅଧିକାଂଶ ସାମ୍ମୁଖ୍ୟ ଗଠନ କରି କାମ ଆରମ୍ଭ କରିଦେଇଛି । ପ୍ରତ୍ୟେକ ଦିନ ବିଜେଡି ସଭାପତି ନବୀନ ପଟ୍ଟନାୟକ ବିଭିନ୍ନ ଜିଲ୍ଲାର ସାଂଗଠନିକ କାର୍ଯ୍ୟକଳାପକୁ ସମୀକ୍ଷା କରିବା ସହ ଲୋକଙ୍କ ସ୍ବର ସାଜି ସମସ୍ୟା ଦୂର କରିବାକୁ ବିଜେଡି ନେତାଙ୍କୁ ଗୁରୁମନ୍ତ୍ର ଦେଉଛନ୍ତି । ରାଜନୈତିକ ସମୀକ୍ଷକ କେ. ରବିଙ୍କ ଯୁକ୍ତି ହେଉଛି ୨୦୨୪ ନିର୍ବାଚନ ପରେ ରାଜ୍ୟର ୩ ପ୍ରମୁଖ ଦଳ ସଂଗଠନ ସଜାଡିବାରେ ଲାଗିଛନ୍ତି । ବିଜେପି ଅଙ୍କ ଛିଣ୍ଡୁନଥିବା ବେଳେ କଂଗ୍ରେସର ନୂଆ ରଣନୀତି ଦଳକୁ ଅଡୁଆରେ ପକାଉଛି । ବିଜେଡିରେ ବି ଯେମିତି ସଂଗଠନ ଚଳଚଞ୍ଚଳ ହେବା କଥା ତାହା ହେଉନାହିଁ ବୋଲି ସମୀକ୍ଷକ କହିଛନ୍ତି । ଆଗକୁ ପଂଚାୟତ ଓ ପୌର ନିର୍ବାଚନ । ଏହା ପୂର୍ବରୁ ବିଜେପି, ବିଜେଡି ଓ କଂଗ୍ରେସ ସଂଗଠନ ସଜାଡିବାରେ ଲାଗିଛନ୍ତି ।
ସଂଶୋଧିତ GSTକୁ ନେଇ ସରକାରଙ୍କୁ ଘେରିଲେ ବିରୋଧୀ
ଜିଏସଟି ସଂଶୋଧନରେ ଗରିବ ଓ ମଧ୍ୟବିତ୍ତ କିଛି ଲାଭ ପାଇବେନି। ପରିବର୍ତ୍ତିତ GSTକୁ ବିରୋଧୀ ସରକାରଙ୍କୁ ଘେରିଛନ୍ତି। କେନ୍ଦୁପତ୍ର ତୋଳାଳି ଓ ବୁଣାକାରଙ୍କ ଜିଏସଟି ପ୍ରସଙ୍ଗ ଉଠାଇଛି ବିଜେଡି। ରାଜ୍ୟର ୩୦ ଜିଲ୍ଲାରୁ ୨୨ ଜିଲ୍ଲାରେ କେନ୍ଦୁପତ୍ର ତୋଳିବା କାମରେ ଲୋକେ ନିର୍ଭରଶୀଳ। ଏହା ଉପରେ ୧୮% GST ଲାଗୁ ନେଇ ବିଜେଡି ବାରମ୍ବାର ପ୍ରତିବାଦ କରିଛି। ଏବେ ଏହାକୁ ୫ ପ୍ରତିଶତ କରାଯାଇଛି। ହେଲେ ଏହାକୁ ଶୁନ ପ୍ରତିଶତ କରାଗଲା ନାହିଁ। କିଛି ଫିନିସଡ୍ ସାମଗ୍ରୀ ୪୦% ସ୍ଲାବରେ ରହିଛି।କେନ୍ଦୁପତ୍ର ଏଥିରେ ଅନ୍ତର୍ଭୁକ୍ତ ଅଛି। ତେଣୁ ଏହି ୫% ଲଗାଇଲେ ବି ଡବଲ ଟିକସ ଲାଗୁ ହେବ। ଦର ବଢିବାରୁ ଏହାର ପ୍ରଭାବ ତୋଳାଳିଙ୍କ ଉପରେ ପଡିବ। ତେଣୁ ଏହାକୁ ଶୂନ କରାଯାଉ। ଆଉ ଗୋଟେ କଥା ସ୍ପଷ୍ଟ ନାହିଁ ଯେ ଓଡ଼ିଶା ଯେଉଁ ମାସକୁ ହଜାରେ କୋଟି ହରାଇବ ତାହା ଭରଣା କିଏ କରିବ ବୋଲି ବିଜେଡି ପ୍ରଶ୍ନ କରିଛି। ଜିଏସଟି ସ୍ଲାବ କମିବା ପ୍ରସଙ୍ଗକୁ ନେଇ ସରକାରଙ୍କୁ ତେରଛା ବାଣ ମାରିଛି କଂଗ୍ରେସ। ଲୋକେ କଣ ପାଇଛନ୍ତି ବୋଲି ପ୍ରଶ୍ନ କରିଛି ଦଳ।ଲୋକଙ୍କ ଉପରେ ୩୦ରୁ ଅଧିକ ପ୍ରକାର ଟିକସ ବୋଝ ପଡୁଛି।ଜିଏସଟି ସ୍କାବ କମିବା ଦ୍ଵାରା ଓଡିଶା ଅଧିକ କ୍ଷତିଗ୍ରସ୍ତ ହେବ। ରାଜ୍ୟ ପାଇବ କମ ହରାଇବା ଅଧିକ। ପେଟ୍ରୋଲ, ଡିଜେଲକୁ ଜିଏସଟି ପରିସରଭୁକ୍ତ କରିଥିଲେ ସାଧାରଣ ଲୋକ ଲାଭ ପାଇଥାନ୍ତେ। ସେପଟେ ଏହାକୁ ଲୋକ ଦେଖାଣିଆ ବୋଲି କହିଛି ବାମ ଦଳ ।
ଜିଏସଟି ସ୍ଲାବ କମିବା ଆମେରିକା ଟାରିଫ ଇଫେକ୍ଟ କହିଛି ବ୍ୟବସାୟୀ ମହାସଂଘ। ଖାଦ୍ୟ ସାମଗ୍ରୀ ଉପରେ ୨ ପ୍ରକାର ଟିକସ ଵ୍ୟଵସ୍ଥାକୁ ବିରୋଧ କରିଛି ମହାସଙ୍ଘ। ଟିକସ ଚୋରି ରୋକିବାକୁ ଚାହୁଁଥିଲେ ସରକାର ଗୋଟିଏ ଟିକସ ବ୍ୟବସ୍ଥା କରନ୍ତୁ। ସବୁ ଖାଦ୍ୟ ସାମଗ୍ରୀ ଟିକସ ଶୂନ ପ୍ରତିଶତକୁ ଆଣାଯାଉ ବୋଲି ଦାବି କରିଛି ବ୍ୟବସାୟୀ ମହାସଂଘ। ଆସନ୍ତା ୧୫ରେ ନାଗପୁରରେ ଏ ପ୍ରସଙ୍ଗରେ ବ୍ୟବସାୟୀ ମହାସଂଘ ବୈଠକରେ ଆଲୋଚନା ହେବ।ଜିଏସଟି ସ୍ଲାବ କମିବା ଯୋଗୁ କିଛି ମାସ ରାଜ୍ୟଗୁଡିକର କ୍ଷତି ହେବ କିନ୍ତୁ ଆଗକୁ ତାହା ଭରଣା ହୋଇଯିବ ବୋଲି ଅର୍ଥ ବିଶାରଦ କହିଛନ୍ତି। ଜିଏସଟି ସଂସ୍କାରକୁ ଐତିହାସିକ ବୋଲି କହିଛନ୍ତି ମୁଖ୍ୟମନ୍ତ୍ରୀ।କହିଛନ୍ତି, ଦେଶରେ ବ୍ୟବସାୟକୁ ପ୍ରୋତ୍ସାହନ ଦେବାକୁ ଏହା ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ। ଜିଏସଟିକୁ ନେଇ ବ୍ୟାପକ ପ୍ରଚାର ପ୍ରସାର କରାଯାଉଥିବା ବେଳେ ପ୍ରକୃତରେ ଏହା ସାଧାରଣ ବର୍ଗଙ୍କୁ କେତେ ଲାଭ ଦେବ ତା ଉପରେ ସମସ୍ତଙ୍କର ନଜର।
YouTubeରେ ୧ ମିଲିୟନ ଭ୍ୟୁଜରେ କେତେ ଟଙ୍କା ମିଳିଥାଏ ?
ବର୍ତ୍ତମାନର ସମୟରେ ୟୁଟ୍ୟୁବ ଏଣ୍ଟରନଟେନମେଣ୍ଟ ସହ ରୋଜଗାରର ଏକ ସାଧନ ପାଲଟି ଯାଇଛି । ତେଣୁ ଯଦି ଆପଣ ୟୁଟ୍ୟୁବ ଚ୍ୟାନେଲ କରି ଅର୍ଥ ରୋଜଗାର କରିବାକୁ ଚାହୁଁଛନ୍ତି, ତେବେ ଏକ ମିଲିୟନ ଭ୍ୟୁଜରେ କେତେ ଟଙ୍କା ମିଳେ, ତାହା ଜାଣିବା ନିହାତି ଜରୁରୀ । ବିଭିନ୍ନ କ୍ଷେତ୍ର ସହ ଜଡ଼ିତ ବ୍ୟକ୍ତିବିଶେଷମାନେ ଏବେ ୟୁଟ୍ୟୁବରେ କଣ୍ଟେଣ୍ଟ ଅପଲୋଡ୍ କରୁଛନ୍ତି । ଲୋକମାନେ ଏହି ପ୍ଲାଟଫର୍ମରେ ଫେମସ ହେବା ସଙ୍ଗେସଙ୍ଗେ ଭଲ ଅର୍ଥ ମଧ୍ୟ ଉପାର୍ଜନ କରିବାରେ ସକ୍ଷମ ହୋଇପାରୁଛନ୍ତି ।
କୌଣସି ଭିଡିଓ ଉପରେ ଏକ ମିଲିୟନ ଭ୍ୟୁଜ୍ ଆସିବା ପରେ ସେଥିରୁ କେତେ ଟଙ୍କା ମିଳେ, ସେନେଇ କିଛି ଫିକ୍ସ ହୋଇନଥାଏ । ଏହା ଭିଡିଓର କଣ୍ଟେଣ୍ଟ, କ୍ୟାଟେଗୋରୀ, ବିଜ୍ଞାପନ ରେଟ ଓ ଫରଫର୍ମାନ୍ସ ସମେତ କିଛି ଜିନିଷ ଉପରେ ନିର୍ଭର କରିଥାଏ । ୟୁଟ୍ୟୁବରେ ରୋଜଗାରର ମୁଖ୍ୟ ମାଧ୍ୟମ ହେଉଛି ବିଜ୍ଞାପନ (ads) । ଯେତେବେଳେ କୌଣସି ଦର୍ଶକ କୌଣସି ୟୁଟ୍ୟୁବ ଭିଡିଓରେ ବିଜ୍ଞାପନ ଦେଖିଥାନ୍ତି, ସେ କ୍ଷେତ୍ରରେ ହେଉଥିବା ରୋଜଗାରରୁ ୟୁଟ୍ୟୁବକୁ ଅର୍ଥ ଯାଇଥାଏ । ଏହାଛଡ଼ା କ୍ରିଏଟର୍ସ, ସ୍ପନସରସିପ, ବ୍ରାଣ୍ଡ ପ୍ରମୋସନ ଓ ଏଫିଲିଏଟ ମାର୍କେଟିଂ ଆଦିରୁ ମଧ୍ୟ ପଇସା ରୋଜଗାର କରାଯାଇଥାଏ ।
ୟୁଟ୍ୟୁବ ଭିଡିଓରୁ ହେଉଥିବା ରୋଜଗାର ଅନେକ ଜିନିଷ ଉପରେ ନିର୍ଭର କରେ । ସେଥିମଧ୍ୟରୁ ଗୋଟିଏ ହେଉଛି Cost Per Mille (CPM) । କ୍ରିଏଟର୍ସଙ୍କ ପାଇଁ ଏହାର ଅର୍ଥ ହେଉଛି, ସେମାନଙ୍କର କଣ୍ଟେଣ୍ଟ ଉପରେ ୧୦୦୦ ads ଇମ୍ପ୍ରେସନ ପାଇଁ ବିଜ୍ଞାପନଦାତା କେତେ ପଇସା ଦେଇଥାଏ । ବିଦେଶୀଙ୍କ ତୁଳନାରେ ଭାରତରେ ଏହାର ପରିମାଣ କମ୍ ହୋଇଥାଏ । ଏଠାରେ CPM ପାଖାପାଖି ୪୨-୧୭୦ ଟଙ୍କା ପର୍ଯ୍ୟନ୍ତ ହୋଇଥାଏ । ଗେମିଂ ଓ ଫିଟନେଟ ଆଦି କ୍ୟାଟେଗୋରୀ ହିସାବରେ ଅଧିକ ରୋଜଗାର ହୋଇଥାଏ । ଯଦି ଜଣେ କ୍ରିଏଟର୍ସଙ୍କ ଭିଡିଓ ଆମେରିକା, ଇଂଲଣ୍ଡ ସମେତ ଅନ୍ୟ ଦେଶରେ ଲୋକେ ଦେଖିଥାନ୍ତି, ତେବେ ଅଧିକ ରୋଜଗାର ହୋଇଥାଏ । କୌଣସି ଦର୍ଶକ ବିଜ୍ଞାପନ ଦେଖିଲେ, ବା କ୍ଲିକ କଲେ କ୍ରିଏଟର୍ସଙ୍କ ଖାତାରେ ଅଧିକ ପଇସା ଆସିଥାଏ । ଭାରତରେ ସାଧାରର ଭାବେ ଏକ ମିଲିୟନ ଭ୍ୟୁଜ ଉପରେ ୧୦-୫୦ ହଜାର ଟଙ୍କା ପର୍ଯ୍ୟନ୍ତ ରୋଜଗାର ହୋଇପାରେ । କିଛି କ୍ରିଏଟର୍ସଙ୍କ ପାଇଁ ଏହା କମ-ଅଧିକ ହୋଇପାରେ । ହାଇ-କ୍ବାଲିଟୀ କଣ୍ଟେଣ୍ଟ ଓ ବ୍ରାଣ୍ଡ ପାର୍ଟନରସିପ ମାଧ୍ୟମରେ କ୍ରିଏଟର୍ସ ନିଜର ଇନକମ୍ ବଢ଼ାଇପାରନ୍ତି ।
ନିଶା ମାଫିଆଙ୍କ ଉପରେ ପୋଲିସର ‘ପ୍ରହାର’: ମାଓବାଦୀଙ୍କ ମେରୁଦଣ୍ଡ ଉପରେ ମାଡ଼
ନିଶା ମାଫିଆଙ୍କ ଉପରେ ପୋଲିସର ‘ପ୍ରହାର’ । ମାଓବାଦୀଙ୍କ ମେରୁଦଣ୍ଡ ଉପରେ ମାଡ଼ । କୋରାପୁଟରୁ ଜବତ ହେଲା ୪୦ ଲକ୍ଷର ଗୁଟଖା । ୩ଟି ଥାନା ଅଞ୍ଚଳରୁ ୪୩୧ କେଜି ଗଞ୍ଜେଇ ଜବତ । ରାଜ୍ୟରେ ନିଶା କାରବାର ଉପରେ ରୋକ ଲଗାଇବାକୁ ଡିଜିପିଙ୍କ ନିର୍ଦ୍ଦେଶରେ ରାଜ୍ୟରେ ଆରମ୍ଭ ହୋଇଛି ଅପରେସନ ପ୍ରହାର । ଏହି କ୍ରମରେ କୋରାପୁଟ ଜିଲ୍ଲାରେ ବିଭିନ୍ନ ଅଞ୍ଚଳରେ ଚଢାଉ କରିଛି ପୋଲିସ୍ । ଜିଲ୍ଲାର କାକିରିଗୁମା ଥାନା ଅଞ୍ଚଳରୁ ୩୯୪ କେଜି ଗଞ୍ଜେଇ ଜବତ କରାଯାଇଥିବାବେଳେ ଶିମିଳିଗୁଡାରୁ ୩୨ କେଜି ଓ ଜୟପୁରରୁ ୫ କେଜି ଗଞ୍ଜେଇ ଜବତ କରାଯାଇଛି । ମାମଲାରେ ଗୋଟିଏ ଟ୍ରକ ଓ ଗୋଟିଏ ବୋଲେରୋ ଜବତ କରିଛି ପୋଲିସ । ଆସନ୍ତା ଦିନରେ ଅପରେସନ ପ୍ରହାରକୁ ଅଧିକ କ୍ରିୟାଶୀଳ କରାଯିବ କହିଛନ୍ତି କୋରାପୁଟ ଏସପି।
ଅପରେସନ ପ୍ରହାର ମାଧ୍ୟମରେ କେବଳ ଗଞ୍ଜେଇ ନୁହେଁ ବେଆଇନ ମଦ ଓ ଗୁଟଖା କାରବାର ଉପରେ ବି ହୋଇଛି ଚଢାଉ । ଜୟପୁର ସହରର ବିଭିନ୍ନ ସ୍ଥାନରେ ଚଢାଉ କରି ବିପୁଳ ପରିମାଣରେ ଗୁଟଖା ଜବତ କରିଛି ପୋଲିସ । ଜବତ ଗୁଟଖାର ଆନୁମାନିକ ମୁଲ୍ୟ ପ୍ରାୟ ୪୦ ଲକ୍ଷ ଟଙ୍କା ହେବ । ଗୁଟଖା ଗୁଡିକ କେଉଁଠି ଆସୁଛି କିଏ କିଏ ଏହି କାରବାରରେ ସାମିଲ୍ ଅଛନ୍ତି ତାହା ଉପରେ ତଦନ୍ତ ଚାଲିଥିବା କହିଛନ୍ତି କୋରାପୁଟ ଏସପି । ଜିଲ୍ଲାର ସମସ୍ତ ଶିକ୍ଷା ଅନୁଷ୍ଠାନର ନିକଟରେ ନଜର ରଖିଛି ପୋଲିସ୍ । ଆଗକୁ ପାର୍ବଣ ଥିବାରୁ ଜିଲ୍ଲାରେ ସକ୍ରିୟ ହୋଇଛନ୍ତି ନିଶା ମାଫିଆ । ତେବେ ପୋଲିସର ଅପରେସନ ପ୍ରହାର ଫଳରେ ମାଫିଆଙ୍କ ଭିତରେ ଆତଙ୍କ ଖେଳିଥିବାବେଳେ ଗଞ୍ଜେଇ ଜବତ ପରେ ଏହା ମାଓବାଦୀଙ୍କ ଆର୍ଥୀକ ମେରୁଦଣ୍ଡ ଉପରେ ପଡ଼ି ଶକ୍ତ ପ୍ରହାର।