ଭୁବନେଶ୍ବର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିଲେ ସେଲିବ୍ରିଟି ସେଫ୍ ବିକାଶ ଖାନ୍ନା । ନ୍ୟୁୟର୍କର ଟାଇମ୍ସ ସ୍କୋୟାରରେ କୋଣାର୍କ ଚକ୍ରର ଅବିକଳ ପ୍ରତିକୃତି ସ୍ଥାପନା କରି ସେ ବେଶ୍ ପ୍ରଶଂସା ସାଉଁଟିଥିଲେ । ବିକାଶ ଖାନ୍ନା ସ୍ବାଧୀନତା ଦିବସ ପାଳନ ଅବସରରେ ନ୍ୟୁୟର୍କ ସହରର ଟାଇମ୍ସ ସ୍କୋୟାର ଠାରେ ବିଶ୍ବପ୍ରସିଦ୍ଧ କୋଣାର୍କ ଚକ୍ରର ଏକ ପ୍ରତିରୂପ ସ୍ଥାପନ କରିଥିଲେ । କୋଣାର୍କ ଚକ୍ର ବିଶ୍ବ ଏକତାର ପ୍ରତୀକ ବୋଲି ସେ ମତ ଦେଇଥିଲେ । ମୁଖ୍ୟମନ୍ତ୍ରୀ ମଧ୍ୟ ବିକାଶ ଖାନ୍ନାଙ୍କ ସୃଜନଶୀଳତା ଓ ଔଦ୍ୟୋଗୀକ ମନୋଭାବର ପ୍ରଶଂସା କରି ତାଙ୍କୁ ଓଡିଶା ଆସିବାକୁ ନିମନ୍ତ୍ରଣ କରିଥିଲେ । ସେପଟେ କୋଣାର୍କ ମନ୍ଦିରରେ ବିକାଶ ଖାନ୍ନାଙ୍କୁ ସମ୍ବର୍ଧିତ କରିଛନ୍ତି ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ । ଏହି ଅବସରରେ ବିକାଶ ଖାନା ପୁଣି ଥରେ କୋଣାର୍କ ବୁଲିବା ସହ ବିଭିନ୍ନ ତଥ୍ୟ ଏବଂ କାରୁକାର୍ଯ୍ୟ ଉପରେ ଆଲୋଚନା କରିଥିଲେ ।
ହମାସ-ଇସ୍ରାଏଲ ଯୁଦ୍ଧ ପ୍ରଭାବ, ଆହୁରି ମହଙ୍ଗା ହୋଇପାରେ ସୁନା ଦର
ନନ୍ଦିଘୋଷ ବ୍ୟୁରୋ: ଇସ୍ରାଏଲ ଏବଂ ପାଲେଷ୍ଟାଇନର ହମାସ ସଂଗଠନ ମଧ୍ୟରେ ଚାଲିଥିବା ଲଢ଼େଇର ପ୍ରଭାବ ସୁନା ବଜାର ଉପରେ ପୂର୍ବରୁ ପଡ଼ିସାରିଛି। ଇତିମଧ୍ୟରେ ସୁନା ମୂଲ୍ୟ ୧୦ ଗ୍ରାମ ପିଛା ୮୭୪ ଟଙ୍କା ବୃଦ୍ଧି ପାଇ ୫୭୪୧୫ ଟଙ୍କାରେ ପହଞ୍ଚିଛି। ଆଗକୁ ଏହାର ଦାମ୍ରେ ଆହୁରି ୩୦୦୦ ଟଙ୍କା ବୃଦ୍ଧି ହୋଇପାରେ। ସୁନା ଦାମ ବଢ଼ୁଥିବାରୁ ଭାରତରେ ଗ୍ରାହକମାନେ ସେମାନଙ୍କ ନିକଟରେ ରଖିଥିବା ସୁନାକୁ ପାର୍ବଣ ପୂର୍ବରୁ ବଜାରରେ ବିକ୍ରି କରିବେ ବୋଲି ସୋ’ରୁମ୍ ଗୁଡ଼ିକ ମତ ଦେଇଛନ୍ତି। ପୁରୁଣା ସୁନାକୁ ବିକ୍ରି କରି ଗ୍ରାହକମାନେ ନୂଆ ଗହଣା କିଣିବେ ବୋଲି ସେମାନେ କହିଛନ୍ତି।
ପଶ୍ଚିମ ଏସିଆରେ ଯଦି ଏହି ସଂଘର୍ଷ ଦୀର୍ଘଦିନ ଧରି ଜାରି ରହେ ତାହେଲେ ସୁନା ମୂଲ୍ୟ ୧୦ ଗ୍ରାମ ପିଛା ୨୫୦୦ରୁ ୩୦୦୦ ଟଙ୍କା ପର୍ଯ୍ୟନ୍ତ ବୃଦ୍ଧି ପାଇପାରେ। ସୁନା ମୂଲ୍ୟ ବଢ଼ୁଥିବାରୁ ଗତବର୍ଷ ପାର୍ବଣ ଋତୁ ତୁଳନାରେ ଚଳିତବର୍ଷ ଗ୍ରାହକମାନେ ୧୫ ପ୍ରତିଶତ ପର୍ଯ୍ୟନ୍ତ ଅଧିକ ସୁନା ବଦଳାଇବେ। ସେ କହିଛନ୍ତି ତାଙ୍କ କମ୍ପାନିରେ ସହରାଞ୍ଚଳରେ ଗ୍ରାହକମାନେ ୨୫ରୁ ୩୦ ପ୍ରତିଶତ ପର୍ଯ୍ୟନ୍ତ ପୁରୁଣା ସୁନା ବଦଳାଇଥାନ୍ତି। କିନ୍ତୁ ଗ୍ରାମାଞ୍ଚଳରେ ଉକ୍ତ ପ୍ରତିଶତ ୩୦ରୁ ୩୫ ପ୍ରତିଶତ। ଗ୍ରାମାଞ୍ଚଳରେ ଲୋକଙ୍କ ନିକଟରେ ନଗଦ ଅର୍ଥ କମ୍ ଥିବା କାରଣରୁ ସେମାନେ ପୁରୁଣା ସୁନାକୁ ବଦଳାଇ ନୂଆ ସୁନା କିଣିଥାନ୍ତି ବୋଲି ସେ କହିଛନ୍ତି।
ତନିସ୍କର ମୋଟ ବ୍ୟବସାୟରେ ଗୋଲ୍ଡ ଏକ୍ସଚେଞ୍ଜର ଅଂଶ ୪୧ ପ୍ରତିଶତ ଥିଲା। ଚଳିତବର୍ଷ ସେମାନେ ଏହାକୁ ୪୫ ପ୍ରତିଶତକୁ ବୃଦ୍ଧି କରିବାକୁ ଲକ୍ଷ୍ୟ ରଖିଛନ୍ତି ବୋଲି କମ୍ପାନିର ସିଇଓ ଅଜୟ ଚାୱଲ କହିଛନ୍ତି। ଏକ୍ସଚେଞ୍ଜ ବ୍ୟବସାୟ ବୃଦ୍ଧି ଦ୍ବାରା ସୁନା ଆମଦାନି ହ୍ରାସରେ ସହାୟକ ହୋଇଥାଏ। ମାଲାବାର ଗୋଲ୍ଡ ଆଣ୍ଡ୍ ଡାଇମଣ୍ଡ୍ସର କହିବା ଅନୁଯାୟୀ ଗତ ଆର୍ଥିକବର୍ଷରେ କମ୍ପାନିର ମୋଟ ବ୍ୟବସାୟରେ ଗୋଲ୍ଡ ଏକ୍ସଚେଞ୍ଜର ଯୋଗଦାନ ୩୬ ପ୍ରତିଶତ ଥିଲା।
ଚଳିତବର୍ଷ ମଧ୍ୟ ଏହା ସମାନ ସ୍ତରରେ ରହିବ ବୋଲି କମ୍ପାନି ଆଶାବ୍ୟକ୍ତ କରିଛି। ହମାସ ଓ ଇସ୍ରାଏଲ ଯୁଦ୍ଧ ଦ୍ବାରା ବଜାରରେ ସୃଷ୍ଟି ହୋଇଥିବା ଅନିଶ୍ଚିତତା କାରଣରୁ ଅନେକ ନିବେଶକ ଇକ୍ବିଟି ପରିବର୍ତ୍ତେ ସୁନାରେ ନିବେଶ କରିବାକୁ ଅଧିକ ପସନ୍ଦ କରିବେ। ଏଥିଯୋଗୁ ସୁନା ଚାହିଦା ଓ ମୂଲ୍ୟ ବଢ଼ିବ ବୋଲି ଆଶଙ୍କା ବ୍ୟକ୍ତ କରାଯାଇଛି। ତେବେ ହୀରା ବ୍ୟବସାୟ ଉପରେ ପଶ୍ଚିମ ଏସିଆ ସମସ୍ୟା କେତେମାତ୍ରାରେ ପଡ଼ିବ ତାହା ଏବେଠାରୁ କୁହାଯାଇ ପାରିବ ନାହିଁ ବୋଲି ଜେମ୍ ଆଣ୍ଡ୍ ଜୁଏଲାରି ରପ୍ତାନି ପ୍ରୋତ୍ସାହନ ପରିଷଦର ଅଧ୍ୟକ୍ଷ ବିପୁଲ ଶାହ କହିଛନ୍ତି।
ହୁରୁନ ପକ୍ଷରୁ ପ୍ରକାଶ ପାଇଲା ଭାରତର ଧନୀ ତାଲିକା, ଜାଣନ୍ତୁ ଦେଶର ଏକ ନମ୍ବର ଧନୀ କିଏ?
ବୁଧବାର: ହୁରୁନ ପକ୍ଷରୁ ଭାରତର ଧନୀ ତାଲିକା ପ୍ରକାଶ ପାଇଛି । ୩୬୦ ୱାନ୍ ୱେଲ୍ଥ ହୁରୁନ୍ ଇଣ୍ଡିଆ ରିଚ୍ ଲିଷ୍ଟରେ ରିଲାଏନ୍ସ ଇଣ୍ଡଷ୍ଟ୍ରିଜର ଚେୟାରମ୍ୟାନ୍ ମୁକେଶ ଅମ୍ବାନୀ, ଅଦାନୀ ଗ୍ରୁପର ମୁଖ୍ୟ ଗୌତମ ଅଦାନୀଙ୍କୁ ପଛରେ ପକାଇଛନ୍ତି। ହୁରୁନ୍ ଇଣ୍ଡିଆ ଏବଂ ୩୬୦ ୱାନ୍ ୱେଲ୍ଥ ମିଶି ଜାରି କରିଥିବା ତାଲିକାରେ ଗୌତମ ଅଦାନୀଙ୍କ ସମ୍ପତ୍ତି ମୁକେଶ ଅମ୍ବାନୀଙ୍କ ତୁଳନାରେ ବହୁତ କମ୍ ଥିବା ଦେଖାଯାଇଛି। କାରଣ ଜାନୁଆରି ମାସରେ ହିଣ୍ଡନବର୍ଗ ରିସର୍ଚ୍ଚର ରିପୋର୍ଟ ଆସିବା ପରେ ଅଦାନୀ ଗ୍ରୁପ୍ର ମୋଟ ସମ୍ପତ୍ତି ମୂଲ୍ୟ ଯଥେଷ୍ଟ ହ୍ରାସ ପାଇଥିଲା। ଏହା ପୂର୍ବରୁ ସେ ଭାରତର ୧ନଂ ଧନୀ ହୋଇ ରହିଆସୁଥିବା ବେଳେ ହିଣ୍ଡନବର୍ଗ ରିସର୍ଚ୍ଚର ରିପୋର୍ଟ ସବୁ ବିଗାଡ଼ି ଦେଇଥିଲା।
ମୁକେଶ ଅମ୍ବାନୀଙ୍କ ସମ୍ପତ୍ତି ୨୦୧୪ରେ ୧,୬୫,୧୦୦କୋଟି ଥିବା ବେଳେ ୨୦୨୩ ମସିହାରେ ଏହା ବଢ଼ି ପ୍ରାୟ ୮,୦୮,୭୦୦ କୋଟି ଟଙ୍କାକୁ ବୃଦ୍ଧି ପାଇଛି। ଏହି ବର୍ଦ୍ଧିତ ସମ୍ପତ୍ତି ସହ ପ୍ରଥମ ସ୍ଥାନରେ ରହିଛନ୍ତି ମୁକେଶ। ଏହା ସହ ଅଦାନୀ ଗ୍ରୁପର ଚେୟାରମ୍ୟାନ୍ ଗୌତମ ଅଦାନୀ ୪୭୪,୮୦୦କୋଟି ଟଙ୍କାର ସମ୍ପତ୍ତି ସହିତ ଦ୍ୱିତୀୟ ସ୍ଥାନକୁ ଖସି ଆସିଛନ୍ତି। ସେରମ୍ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆର ପ୍ରତିଷ୍ଠାତା ସାଇରସ୍ ଏସ୍ ପୁନାୱାଲା ଭାରତର ତୃତୀୟ ଧନୀ ବ୍ୟକ୍ତି ହୋଇଛନ୍ତି। ତାଙ୍କର ମୋଟ ସମ୍ପତ୍ତି ହେଉଛି ୨,୭୮,୫୦୦ କୋଟି ଟଙ୍କା।
ଏଚସିଏଲର ପ୍ରତିଷ୍ଠାତା ଶିବ ନାଦରଙ୍କ ମୋଟ ସମ୍ପତ୍ତି ୨,୨୮,୯୦୦ କୋଟି ଟଙ୍କା ରହିଥିବା ବେଳେ ସେ ଏହି ତାଲିକାରେ ଚତୁର୍ଥ ସ୍ଥାନରେ ଅଛନ୍ତି। ସେହିଭଳି ୧, ୭୬, ୫୦୦କୋଟି ଟଙ୍କା ସହିତ ପଞ୍ଚମ ସ୍ଥାନରେ ଅଛନ୍ତି ଗୋପିଚାନ୍ଦ ହିନ୍ଦୁଜା।
ଅମିତ ରୋହିଦାସ ଓ ଦୀପଗ୍ରେସ ଏକ୍କାଙ୍କୁ ସମ୍ବର୍ଦ୍ଧିତ କଲେ ମୁଖ୍ୟମନ୍ତ୍ରୀ
ଭୁବନେଶ୍ବର: ଏସିଆନ ଗେମ୍ସରେ ସଫଳତା ପାଇଥିବା ହକି ଖେଳାଳି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିଛନ୍ତି । ଏହି ଅବସରରେ ଅମିତ ରୋହିଦାସ ଓ ଦୀପଗ୍ରେସ ଏକ୍କାଙ୍କୁ ସମ୍ବର୍ଦ୍ଧିତ କରିଛନ୍ତି ମୁଖ୍ୟମନ୍ତ୍ରୀ । ଦୀପଗ୍ରେସଙ୍କୁ ୫୦ ଲକ୍ଷ ଟଙ୍କା ଓ ଅମିତ ରୋହିଦାସଙ୍କୁ ଦେଢ କୋଟି ଟଙ୍କା ପୁରସ୍କାର ଦେଇଥିଲେ । ପୁରୁଷ ହକି ଫାଇନାଲରେ ପୁରୁଷ ଟିମ୍ ବିଜୟୀ ହୋଇ ସ୍ବର୍ଣ୍ଣ ପଦକ ହାସଲ କରିଥିଲେ । ଦଳ ତରଫରୁ ଏକ ଗୁରୁତ୍ବପୂର୍ଣ୍ଣ ଗୋଲ ଦେଇଥିଲେ ଅମିତ ରୋହିଦାସ । ସେହିଭଳି ମହିଳା ଟିମ୍ ବ୍ରୋଞ୍ଜ ପଦକ ହାତେଇଥିଲା । ସେମାନଙ୍କର କଠିନ ପରିଶ୍ରମ ଓ ସଫଳତା ପାଇଁ ଓଡ଼ିଶା ଆଜି ଗର୍ବିତ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି । ଆଗକୁ ଏଭଳି ପ୍ରୟାସ ଜାରି ରହୁ ବୋଲି ସେ କହିଛନ୍ତି ।
ଆଫଗାନିସ୍ତାନ ବିପକ୍ଷ ମ୍ୟାଚରେ ଏହିସବୁ ରେକର୍ଡ କଲେ ହିଟମ୍ୟାନ
ନୂଆଦିଲ୍ଲୀ: ବିଶ୍ବକପର ଭାରତ ନିଜର ଦ୍ବିତୀୟ ମ୍ୟାଚରେ ଆଫଗାନିସ୍ତାନକୁ ଭେଟିଥିବାବେଳେ ୮ ଓ୍ବିକେଟରେ ବିଜୟୀ ହୋଇଛି । ତେବେ ଶତକୀୟ ପାଳି ଖେଳିଥିବା ରୋହିତ ଶର୍ମା ଏହି ମ୍ୟାଚରେ ଅେନକ ରେକର୍ଡ ଅର୍ଜନ କରିଛନ୍ତି । ଦିନିକିଆରେ ସର୍ବାଧିକ ଛକା ମାରିବାର ରେକର୍ଡ ତାଙ୍କ ନାମରେ କରିଛନ୍ତି । ଓ୍ବେଷ୍ଟଇଣ୍ଡିଜର ପୂର୍ବତନ ଧୂଆଁଧାର ବ୍ୟାଟ୍ସମ୍ୟାନ କ୍ରିସ ଗେଲଙ୍କ ରେକର୍ଡକୁ ଭାଙ୍ଗିଛନ୍ତି । ରୋହିତ ଦିନିକିଆରେ ୫୫୬ଟି ଛକା ମାରି ଏବେ ଏକ ନମ୍ବର ସ୍ଥାନରେ ରହିଛନ୍ତି । ତାଙ୍କ ପଛକୁ ରହିଛନ୍ତି କ୍ରିସ୍ ଗେଲ୍ ସେ ୫୫୩ ଛକା ମାରିଛନ୍ତି । କେବଳ ଏତିକି ନୁହେଁ ଏହି ମ୍ୟାଚରେ ଅନେକ ରେକର୍ଡ ମଧ୍ୟ ତାଙ୍କ ନାମରେ ଯୋଡ଼ି ହୋଇଛି ।
ଭାରତୀୟ କ୍ରିକେଟର ରୋହିତ ଶର୍ମା ବୁଧବାର ଦିନ ଆଫଗାନିସ୍ତାନ ବିରୋଧରେ ଶତକ ହାସଲ କରିଛନ୍ତି। ନିଜର ୧୯ତମ ଦିନିକିଆ ବିଶ୍ବକପ ମ୍ୟାଚରେ ସେ ସପ୍ତମ ଶତକ ହାସଲ କରିଛନ୍ତି। ଏହା ପୁଣି ୬୩ଟି ବଲରେ ହାସଲ କରିଛନ୍ତି। ଏହି ରେକର୍ଡ ହାସଲ କରିବାରେ ରୋହିତ ହେଉଛନ୍ତି ପ୍ରଥମ। ସେ ବିଶ୍ବକପରେ ସର୍ବାଧିକ ୭ଟି ଶତକ ହାସଲ କରିପାରିଛନ୍ତି। ତାଙ୍କ ତଳକୁ ସଚିନ ତେନ୍ଦୁଲକର ୬ଟି ଶତକ ହାସଲ କରିଥିଲେ। ସ୍ଥାନୀୟ ଅରୁଣ ଜେଟଲୀ କ୍ରିକେଟ ଷ୍ଟାଡିୟମରେ ହିଟ୍ମ୍ୟାନ ଏକାଧିକ ରେକର୍ଡ ହାସଲ କରିଛନ୍ତି। ରୋହିତ ଶର୍ମା ବିଶ୍ବକପରେ ଆଜି ୧୦୦୦ ରନ୍ ପୂରା କରିଛନ୍ତି।
ସେ ଅନ୍ତର୍ଜାତୀୟ କ୍ରିକେଟରେ ୫୫୯ଟି ଛକା (ଦିନିକିଆ୩୦୦, ଟେଷ୍ଟ୭୭ ଓ ଟି-୨୦ରେ ୧୮୨) ମାରିବାରେ ପ୍ରଥମ ବ୍ୟାଟର ହୋଇପାରିଛନ୍ତି। ଆଜିର ମ୍ୟାଚକୁ ବାଦ୍ ଦେଲେ ରୋହିତ ଶର୍ମା ତାଙ୍କର ୨୫୩ଟି ଦିନିକିଆ ଅନ୍ତର୍ଜାତୀୟ ଖେଳି ସାରିଛନ୍ତି। ସେ ୨୪୫ତମ ଇନିଂସରୁ ପୂର୍ବରୁ ସର୍ବାଧିକ ଦିନିକିଆ ସ୍କୋର ୨୬୪ ରନ୍ କରିଛନ୍ତି। ପୂର୍ବରୁ ସେ ୩୦ଟି ଦିନିକିଆ ଶତକ ହାସଲ କରିଥିଲେ। ତିନି ଥର ଦ୍ବିଶତକ ହାସଲ କରିଥିଲେ। ୫୩ଥର ଅର୍ଦ୍ଧଶତକ ମାରିଥିବା ବେଳେ ୯୩୫ଟି ଚୌକା ଓ ୨୯୬ଟି ଛକା ମାରିଥିଲେ।
ଅନ୍ତର୍ଜାତୀୟ କ୍ରିକେଟ୍ ପରିଦଷଦ (ଆଇସିସି) ଦ୍ବାରା ପରିଚାଳିତ ବିଶ୍ବକପ୍-୨୦୨୩ରେ ଭାରତ ନିଜର ଦ୍ବିତୀୟ ମ୍ୟାଚରେ ବୁଧବାର ଆଫ୍ଗାନିସ୍ତାନକୁ ଭେଟିଛି। ଆଫ୍ଗାନିସ୍ତାନ ଟସ୍ ଜିଣି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲା। ଅତିଥି ଟିମ୍ ନିର୍ଦ୍ଧାରିତ ୫୦ ଓଭରରେ ୮ଟି ୱକେଟ୍ ହରାଇ ୨୭୨ ରନ୍ ସଂଗ୍ରହ କରିଛି। ଫଳରେ ଭାରତକୁ ୨୭୩ ରନରେ ବିଜୟ ଲକ୍ଷ୍ୟ ମିଳିଛି। ଭାରତ ପକ୍ଷରୁ ଯଶପ୍ରୀତ ବୁମରା ସର୍ବାଧିକ ୪ଟି ୱିକେଟ୍ ନେଇଛନ୍ତି।
କେନ୍ଦ୍ରମନ୍ତ୍ରୀ ବିଶ୍ବେଶ୍ବର ଟୁଡୁଙ୍କୁ ଟାର୍ଗେଟ୍ କଲେ ସୁଦାମ ମାର୍ଣ୍ଡି
ଭୁବନେଶ୍ବର: ଅମର୍ଦ୍ଦା ଏୟାରଷ୍ଟ୍ରିପ ନେଇ ବିଜେପିକୁ ମନ୍ତ୍ରୀ ସୁଦାମ ମାର୍ଣ୍ଡିଙ୍କ ଜବାବ। କେନ୍ଦ୍ରମନ୍ତ୍ରୀ ବିଶ୍ବେଶ୍ବର ଟୁଡୁଙ୍କୁ ଟାର୍ଗେଟ୍ କରିଛନ୍ତି ସୁଦାମ ମାର୍ଣ୍ଡି। ଅମର୍ଦ୍ଦା ଏୟାରଷ୍ଟ୍ରିପ ବିକାଶ ପାଇଁ ୨୦୧୬ରେ ରାଜ୍ୟ ସରକାରଙ୍କ ପକ୍ଷରୁ ଉଦ୍ୟମ ଆରମ୍ଭ ହୋଇଥିଲା। ଏବାବଦରେ ଏନଓସି ପ୍ରଦାନ କରିବା ପାଇଁ ଡିଆରଡିଓକୁ ନିର୍ଦ୍ଦେଶ ଦେବାକୁ ୨୦୨୨ରେ ପ୍ରତିରକ୍ଷା ସଚିବଙ୍କୁ ଚିଠି ଲେଖାଯାଇଥିଲା। ବିଭାଗର ୧୬୦. ୩୫ ଏକର ଜମିରେ କାର୍ଯ୍ୟ କରିବାକୁ ରାଜ୍ୟ ସରକାରଙ୍କୁ ଏହାପରେ ଅନୁମତି ମିଳିଥିଲା। ପ୍ରତିରକ୍ଷା ବିଭାଗ ଜମି ବାବଦକୁ ରାଜ୍ୟ ସରକାରଙ୍କ ଠାରୁ କ୍ଷତିପୂରଣ ଚାହିଁଥିଲା।
ରାଜ୍ୟ ସରକାର ଜମି ବାବଦକୁ ୨୬ କୋଟିରୁ ଅଧିକ ଟଙ୍କା ଗତ ଅଗଷ୍ଟ ମାସରେ ପ୍ରଦାନ କରିଥିଲେ। ଜମି ହସ୍ତାନ୍ତର ସଂକ୍ରାନ୍ତୀୟ କାର୍ଯ୍ୟ ରାଜ୍ୟ ସରକାରଙ୍କ ପକ୍ଷରୁ ଆଗରୁ ସମ୍ପନ୍ନ ହୋଇଥିବାରୁ ଗତ ୧୦ ଅକ୍ଟୋବରରେ ଜମି ହସ୍ତାନ୍ତର ପାଇଁ ସ୍ଵତନ୍ତ୍ର କାର୍ଯ୍ୟକ୍ରମର ଆବଶ୍ୟକତା ନଥିବା ରାଜ୍ୟ ସରକାର ଜଣାଇଥିଲେ। ପୂର୍ବରୁ ରାଜ୍ୟ ସରକାରଙ୍କ ପକ୍ଷରୁ ମାଗଣାରେ ଅନେକ ଜମି କେନ୍ଦ୍ର ସରକାରଙ୍କ ଅଧୀନସ୍ଥ ବିଭାଗକୁ ଦିଆଯାଇଛି। ଏଥିପାଇଁ କୈାଣସି କାର୍ଯ୍ୟକ୍ରମର ଆୟୋଜନ କରାଯାଇନାହିଁ। ପ୍ରକ୍ରିୟା ସରିବା ପରେ ତୁରନ୍ତ ଜମି ହସ୍ତାନ୍ତର କରାଯାଏ।
ରାଜ୍ୟ ସରକାର ଅମର୍ଦ୍ଦା ଏୟାରଷ୍ଟ୍ରିପ୍ ପାଇଁ ସମସ୍ତ ପ୍ରକ୍ରିୟା ସାରିଥିବାରୁ ଏଥିରେ ଆଉ କୈାଣସି ସମସ୍ୟା ଉପୁଜିବା କଥା ନୁହେଁ ବୋଲି ମନ୍ତ୍ରୀ ସୁଦାମ ମାର୍ଣ୍ଡି କହିଛନ୍ତି। ନିର୍ବାଚନ ମଣ୍ଡଳୀ ଲୋକଙ୍କ ସ୍ୱାର୍ଥକୁ କେବେ ଗୁରୁତ୍ୱ ଦେଇନାହାନ୍ତି ବିଶ୍ୱେଶ୍ୱର ଟୁଡୁ। ବାଙ୍ଗିରିପୋଷିରୁ ବିଶୋଇ ଘାଟି ରାସ୍ତାର ଅବସ୍ଥା ସଭିଏଁ ଦେଖୁଛନ୍ତି। ସଂକୀର୍ଣ୍ଣ ଓ ଖରାପ ରାସ୍ତା ପାଇଁ ଦୁର୍ଘଟଣାରେ ଲୋକଙ୍କ ଜୀବନ ଯାଉଛି। ଏହି ପ୍ରସଙ୍ଗରେ କେନ୍ଦ୍ରମନ୍ତ୍ରୀ କେବେ ମଧ୍ୟ ମୁହଁ ଖୋଲିନାହାନ୍ତି। ମୟୂରଭଞ୍ଜବାସୀ ସବୁ ଦେଖୁଛନ୍ତି ଓ ଜାଣୁଛନ୍ତି ବୋଲି ସୁଦାମ ମାର୍ଣ୍ଡି କହିଛନ୍ତି।
ଆଫଗାନିସ୍ତାନକୁ ୮ ଓ୍ବିକେଟରେ ହରାଇଲା ଟିମ ଇଣ୍ଡିଆ
ନୂଆଦିଲ୍ଲୀ: ଭାରତର ଦମଦାର ବିଜୟ । ବିଶ୍ବକପର ଭାରତ ନିଜର ଦ୍ବିତୀୟ ମ୍ୟାଚରେ ଆଫଗାନିସ୍ତାନ ବିପକ୍ଷରେ ମଇଦାନକୁ ଓହ୍ଲାଇଥିବାବେଳେ ୮ ଓ୍ବିକେଟରେ ଜିତି ନେଇଛି । ଭାରତର ଅଧିନାୟକ ରୋହିତ ଶର୍ମା ଦମଦାର ଶତକ ମାରିଥିଲେ । ରୋହିତ ୧୩୧ ରନ ସଂଗ୍ରହ କରିଥିବାବେଳେ କିଙ୍ଗ କୋହଲି ଅପରାଜିତ ଅର୍ଦ୍ଧଶତୀୟ ପାଳି ଖେଳିଛନ୍ତି । କୋହଲି ୫୬ ବଲରୁ ୫୫ ରନ କରିଛନ୍ତି । ରୋହିତଙ୍କ ବ୍ୟତୀତ ଭାରତର ଅନ୍ୟତମ ପ୍ରାରମ୍ଭିକ ବ୍ୟାଟର ଈଶାନ କିଶନ ବ୍ୟକ୍ତିଗତ ଭାବେ ୪୭ ରନ୍ ଯୋଗଦାନ ଦେଇଥିଲେ। ସେ ୪୭ଟି ବଲ୍ ଖେଳି ୫ଟି ଚୌକା ଓ ୨ଟି ଛକା ମାରିଥିଲେ। ଭାରତର ପାଳି ଶେଷ କରିଥିଲେ ବିରାଟ କୋହଲି ଓ ଶ୍ରେୟସ ଆୟର। ଉଭୟ ଖେଳାଳି ଅପରାଜିତ ପାଭିଲିୟନକୁ ଫେରିଥିଲେ। କୋହଲି ୫୬ଟି ବଲ୍ ଖେଳି ୬ଟି ଚୌକା ବଳରେ ୫୫ ରନ୍ ସଂଗ୍ରହ କରିଥିବା ବେଳେ ଶ୍ରେୟସ ୨୩ଟି ବଲ୍ରୁ ୨୫ ରନ୍ ସଂଗ୍ରହ କରିଥିଲେ।
ଜାଣନ୍ତୁ ଇସ୍ରାଏଲ ସମର୍ଥନରେ ରହିଛନ୍ତି କେଉଁ ଶକ୍ତିଶାଳି ଦେଶ
ନନ୍ଦିଘୋଷ ବ୍ୟୁରୋ: ହମାସର ବିନାଶକାରୀ ଆକ୍ରମଣ ପରେ ଇସ୍ରାଏଲର କାଉଣ୍ଟର ଆଟାକ୍ । ଯୁଦ୍ଧର ପଞ୍ଚମ ଦିନରେ ଚାରିଆଡେ ଧ୍ବଂସ ଓ ବିଭୀଷିକାର ଚିତ୍ର। ହମାସ ଉପରେ ବୋମା ବର୍ଷଣ କରୁଛନ୍ତି ବାୟୁସେନାର ଲଢୁଆ ବିମାନ । ଏୟାର ଷ୍ଟ୍ରାଇକରେ ଧ୍ବଂସସ୍ତୁପ ପାଲଟିଛି ଗାଜା। ଏସବୁ ମଧ୍ୟରେ ହମାସ ଉପରେ ସ୍ଥଳସେନାର ହମଲା କରିବା ଆଶଂକା କରାଯାଉଛି । ସଂଘର୍ଷରେ ଦୁଇ ଦେଶର ୩ ହଜାରରୁ ଅଧି୍କ ଲୋକଙ୍କ ମୃତ୍ୟୁ ହେଲାଣି, ୨ ଲକ୍ଷରୁ ଅଧିକ ପାଲେଷ୍ଟାଇନ ନାଗରିକ ଘର ଛାଡିଲେଣି` ।
ଇସ୍ରାଏଲର ଟାର୍ଗେଟ, ହମାସର ମୂଳପୋଛ କରିଦେବ । ଏଥିଲାଗି ଜୋରଦାର ପ୍ରସ୍ତୁତି କରିଛି । ସାରା ବିଶ୍ବର ପ୍ରମୁଖ ଶକ୍ତିଶାଳୀ ରାଷ୍ଟ୍ର ସମୂହ ଇସ୍ରାଏଲ ସମର୍ଥନରେ ରହିଛନ୍ତି। ସୁପର ପାୱାର ଆମେରିକା ଇସ୍ରାଏଲକୁ ଆତଙ୍କବାଦ ବିରୋଧ ଲଢେଇରେ ସହଯୋଗ କରିବାକୁ ଯୁଦ୍ଧ ବିମାନ ପଠାଇଛି। ଦକ୍ଷିଣ ଭୂମଧ୍ୟସାଗରୀୟ ଅଂଚଳରେ ଆମେରିକାର ଏୟାରକ୍ରାଫ୍ଟ କ୍ୟାରିଅର ଆସି ପଇଁତରା ମାରୁଛି ।
ଏଫ-୧୫, ଏଫ-୧୬ ଏବଂ ଏ-୧୦ ଭଳି ଲଢୁଆ ବିମାନ ଏଥିରେ ମୂତୟନ ହୋଇଛନ୍ତି । ଏସବୁ ଭିତରେ ହମାସ ଉପରେ ପରମାଣୁ ବୋମା ପ୍ରୟୋଗ କରିବାକୁ ଦାବି କରିଛନ୍ତି ଇସ୍ରାଏଲର ସାଂସଦ ଟାଲି ଗୋଟଲିବ୍। ଏଥିରୁ ଜଣାପଡୁଛି ଖୁବଶୀଘ୍ର ଇସ୍ରାଏଲ ଗାଜାର ସ୍ଥଳ ଭାଗରେ ଆକ୍ରମଣ କରିପାରେ ।ଯଦି ଇସ୍ରାଏଲ ପରମାଣୁ ଆକ୍ରମଣ କଲେ ତେବେ ଜେରିକୋ ମିସାଇଲର ବ୍ୟବହାର କରିବ । ଜେରିକୋ ଇସ୍ରାଏଲର ଏକ ଘାତକ ମିସାଇଲ । ୫ଶହ କିଲୋମିଟର ମଧ୍ୟରେ ୪ କିଲୋଗ୍ରାମର ପେଲୋଡ୍ ଧରି ଏହି ମିସାଇଲ ଧ୍ବଂସଳୀଳା ଖେଳାଇବାର କ୍ଷମତା ରଖୁଛି ।
ଇସ୍ରାଏଲ ସେନାର ପ୍ରତିଆକ୍ରମଣରେ ପ୍ରାୟ ୨ ହଜାରରୁ ଅଧିକ ଆତଙ୍କୀ ନିପାତ ହେଲେଣି । ଏବେବି ପ୍ରତି ଇସ୍ରାଏଲର ବାୟୁସେନା ହମାସ ଆତଙ୍କୀଙ୍କୁ ଟାର୍ଗେଟ କରୁଛନ୍ତି । ଗାଜାରେ ୯ଶହରୁ ଅଧିକ ଲୋକଙ୍କ ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ୨୩୦ ଶିଶୁ ରହିଥିବାବେଳେ ୨୬୦ ମହିଳା । ଗତକାଲି ରାତିରେ ୨ଶହରୁ ଅଧିକ ଆତଙ୍କୀ ଶିବିରକୁ ଟାର୍ଗେଟ କରିଥିଲା ଇସ୍ରାଏଲ ବାୟୁସେନା । ଏହାସହ ହମାସ ଆତଙ୍କୀ ଆକ୍ରମଣର ମାଷ୍ଟରମାଇଣ୍ଡ କୁହାଯାଉଥିବା ସାମରିକ ମୁଖ୍ୟ ମହମ୍ମଦ ଡାଏଫଙ୍କ ଘର ଉପରେ ହମଲା ହୋଇଥିଲା।
୨୦ ଲକ୍ଷରୁ ଅଧିକ ଜନବସତି ଥିବା ପାଲେଷ୍ଟାଇନର ଚିତ୍ର ବଦଳି ଯାଇଛି । ଗାଜାରେ ସଂକଟ ବଢିବାରେ ଲାଗିଛି। ଖାଦ୍ୟ, ପାଣି, ଔଷଧ ଏବଂ ଇନ୍ଧନ ଯାୋଗାଣ ସବୁକିଛି ବନ୍ଦ କରି ଦେଇଛି ଇସ୍ରାଏଲ। ଗାଜାରେ ନାଗରିକଙ୍କ ସ୍ଥିତି ବିଗିଡିବାକୁ ଥିବାବେଳେ ସେମାନଙ୍କୁ ସହାୟତା ପଠାଇବାକୁ ଦାବି କରିଛନ୍ତି ଅନେକ ମାନବାଧିକାର ସଂଗଠନ ।
ଯୁଦ୍ଧର ଘମାଘୋଟ ଲଢେଇ ମଧ୍ୟରେ ଇସ୍ରାଏଲ ଓ ପାଲେଷ୍ଟାଇନରୁ ଭାରତୀୟଙ୍କୁ ଉଦ୍ଧାର ଲାଗି ସତର୍କତା ଜାରି କରିଛି ଭାରତୀୟ ବୈଦେଶିକ ବ୍ୟାପାର ବିଭାଗ । ବୈଦେଶିକ ବ୍ୟାପାର ବିଭାଗରେ ୨୪ ଘଣ୍ଟିଆ କଣ୍ଟ୍ରୋଲ ରୁମ ଖୋଯାଇଛି । ସୂଚନା ପାଇବା ମାତ୍ରେ କଣ୍ଟ୍ରୋଲ ରୁମ ସହ ସମ୍ପର୍କ କରିବାକୁ ଭାରତୀୟ ନାଗରିକଙ୍କୁ ଆଲର୍ଟ କାରାଯାଇଛି ।
ଦଶମୀରେ ସିନ୍ଦୂରୁ ଖେଳି ମାଙ୍କୁ ଆରାଧନା
କଟକ: କଟକ ଦୁର୍ଗା ପୂଜାର ଅନ୍ୟତମ ପ୍ରମୁଖ ଆକର୍ଷଣ ହେଉଛି, ବାଙ୍ଗୀୟ ମଣ୍ଡପରେ ସଧବା ମହିଳା ମାନଙ୍କ ଦଶମୀ ସିନ୍ଦୁର ଖେଳ । ସହରର ପୁରାତନ ତଥା ହାତ ଗଣତି ପୂଜା ମଣ୍ଡପରେ କାହିଁ କେଉଁ କାଳରୁ ଦେଖିବାକୁ ମିଳେ ଏହି ଦୁର୍ଲଭ ଦୃଶ୍ୟ । ମଣ୍ଡପ ରୂପକ ବାପ ଘରେ ମା ଦୁର୍ଗାଙ୍କ ପାଞ୍ଚ ଦିନ ରହଣି ପରେ ସଧବା ବେଶରେ ବିଦାୟ ଦିଆଯାଏ । ଏହି ସମୟରେ ନିଜ ଶଙ୍ଖା ସିନ୍ଦୁରର ସୁରକ୍ଷା ଭିକ୍ଷା କରି ସାଧବା ମହିଳା ମାନେ ପରସ୍ପରକୁ ସିନ୍ଦୁର ଲଗାଇ ନାଚିଥାନ୍ତି। ଚଳିତ ବର୍ଷ ମଧ୍ୟ ଏହି ପର୍ବକୁ ବେଶ ଉତ୍ସାହରେ ପାଳିବା ପାଇଁ ଉତ୍କଣ୍ଠା ସହିତ ସମସ୍ତେ ଅପେକ୍ଷା କରିଛନ୍ତି ।
ଭାଇଚାରାର ସହରରେ ମା ଦୁର୍ଗାଙ୍କ ହେବ ବଙ୍ଗୀୟ ରୀତିନୀତୀରେ ପୂଜାର୍ଚ୍ଚନା । ଦଶମୀରେ ସିନ୍ଦୂରୁ ଖେଳି ମାଙ୍କୁ ଭକ୍ତ କରିବେ ଆରାଧନା । ଏନେଇ ବିଭିନ୍ନ ମଣ୍ଡପରେ ଆରମ୍ଭ ହୋଇଯାଇଛି ପୂଜା ପ୍ରସ୍ତୁତି। କଟକ ସହରରେ ଚୈତନ୍ୟ ମହାପ୍ରଭୁଙ୍କ ସହିତ ନଦିଆ ନବ ଦୀପରୁ ଆସିଥିବା ବଙ୍ଗୀୟ ବ୍ରାହ୍ମଣ ମାନେ ମା’ଙ୍କ ମୂର୍ତ୍ତି ପୂଜା ଆରମ୍ଭ କରିଥିଲେ। ସେବେ ଠାରୁ ସହର ଏକାଧିକ ପୁରାତନ ମଣ୍ଡପରେ ଚାଲିଛି ବଙ୍ଗୀୟ ମାନଙ୍କ ଦ୍ଵାରା ମା’ ଦୁର୍ଗାଙ୍କ ପୂଜା ସାଙ୍ଗକୁ ଦଶମୀରେ ସିନ୍ଦୂର ଖେଳ। ସହରର ସେଲଟର ଛକ ଅଞ୍ଚଳରେ ଥିବା ନେତାଜୀ ନଗରରେ ଆଜକୁ 75 ବର୍ଷରୁ ଅଧିକ ସମୟ ହେବ ପୂଜା ଅନୁଷ୍ଠିତ ହେଉଛି । ଏଠାକାର ବଙ୍ଗୀୟ ସାଧବା ମହିଳା ମାନେ ଦଶମୀରେ ମାଆଙ୍କୁ ସିନ୍ଦୂର ଲଗାଇ ସ୍ବତନ୍ତ୍ର ପୂଜା କରନ୍ତି । ସାଙ୍ଗ ହୋଇ ପରସ୍ପରକୁ ସିନ୍ଦୂର ଲଗାଇ ସଦା ସଧବା ରହିବା ପାଇଁ ମାଆଙ୍କ ନିକଟରେ ପାର୍ଥନା କରନ୍ତି ।
କଟକ ସହରର ଅନ୍ୟତମ ପୁରାତନ ମଣ୍ଡପ କାଜି ବଜ଼ାର ଅଞ୍ଚଳର ଆଦିପୀଠ ଓ ଆଲମଚାନ୍ଦ ବଜ଼ାର ଅଞ୍ଚଳର ଦୁର୍ଗାବାଡ଼ି ପୂଜା ମଣ୍ଡପରେ ମଧ୍ୟ ଦେଖିବାକୁ ମିଳେ ଏହି ଅପୂର୍ବ ଦୃଶ୍ୟ । ଏଠାରେ ଆରମ୍ଭରୁ ବଙ୍ଗୀୟ ପରିବାର ପୂଜାକରି ଆସୁଛନ୍ତି । ବାପ ଘରକୁ ଝିଅକୁ ନିମନ୍ତ୍ରଣ କରିବା ପରି ଏଠାରେ 5ଦିନ ମାଆଙ୍କୁ ମଣ୍ଡପରେ ପୂଜା କରାଯାଏ । ଦଶମୀରେ ମାଆ ମେଲାଣି ନେବା ସମୟ ଆସିଲେ ସଧବା ମାନେ ଏକାଠି ହୋଇ ପାନ ପତ୍ର ସାଙ୍ଗକୁ ନୈବେଦ୍ୟ ଓ ସିନ୍ଦୂର ଲଗାଇ ମାଆଙ୍କୁ ସଜେଇ ଦିୟନ୍ତି। ସେହି ସିନ୍ଦୁର ମୁଣ୍ଡରେ ଲଗାଇ ନାଚନ୍ତି ।
କୁମାର ପୂର୍ଣ୍ଣିମାରେ ଚନ୍ଦ୍ର ଗ୍ରହଣ, ଜାଣନ୍ତୁ କେଉଁ ରାଶିକୁ ମିଳିବ ଶୁଭ ଫଳ
ପୁରୀ: ଆଗାମୀ କୁମାର ପୂର୍ଣ୍ଣିମାରେ ରାହୁଗ୍ରସ୍ତ ଖଣ୍ଡ ଗ୍ରାସ ଚନ୍ଦ୍ର ଗ୍ରହଣ ପଡୁଥିବା ହେତୁ ଶ୍ରୀମନ୍ଦିରରେ ଅନୁଷ୍ଠିତ ହେବ ସ୍ଵତନ୍ତ୍ର ନୀତି । ତେବେ ପରମ୍ପରା ଅନୁସାରେ କୁମାର ପୂର୍ଣ୍ଣିମୀ ଦିନ ଚକ୍ରରାଜ ସୁଦର୍ଶନଙ୍କ ଚାରିଆଶ୍ରମ ବିଜେ ନୀତି ରହିଛି । ଏନେଇ ପରିକ୍ରମା କାର୍ଯ୍ୟ ଗ୍ରହଣ ସ୍ପର୍ଶର ୯ ଘଣ୍ଟା ପୂର୍ବରୁ ସମ୍ପନ୍ନ କରାଯିବ । ଏ ନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ସ୍ବତନ୍ତ୍ର ନୀତି ନିର୍ଘଣ୍ଟ କରାଯାଇଥିବା ବେଳେ ପାଳିଆ ସେବାୟତଙ୍କ ସହଯୋଗ ଲୋଡ଼ାଯାଇଛି । ପ୍ରାୟ ୧ଘଣ୍ଟା ୧୯ ସେକଣ୍ଡ ପର୍ଯ୍ୟନ୍ତ ଚନ୍ଦ୍ର ଗ୍ରହଣ ଦେଖିବାର ସୁଯୋଗ ମିଳୁଥିବା ବେଳେ ୬ଟି ରାଶି ପାଇଁ ଅଶୁଭ ଓ ଅନ୍ୟ ୬ଟି ରାଶି ପାଇଁ ଶୁଭଫଳ ରହିଥିବା ଜୌତିର୍ବିଦ ମତ ରଖିଛନ୍ତି।
ଚଳିତ ବର୍ଷ କୁମାରପୂର୍ଣ୍ଣିମାରେ ପଡୁଛି ରାହୁଗ୍ରସ୍ତ ଖଣ୍ଡଗ୍ରାସ ଚନ୍ଦ୍ରଗ୍ରହଣ । ରାତ୍ରି ୧ଘଣ୍ଟା ୪ ମିନିଟ୍ ୫୫ ସେକେଣ୍ଡ ଆରମ୍ଭ ହେବ ଗ୍ରହଣର ସ୍ପର୍ଶ ସମୟ। ରାତି ୨ଟା ୨୪ମିନିଟ୍ ୨ ସେକେଣ୍ଡରେ ଗ୍ରହଣ ସର୍ବମୋକ୍ଷ । ମୋଟ ଗ୍ରହଣର ଅବଧି ୧ଘଣ୍ଟା ୧୯ମିନିଟ ୭ସେକେଣ୍ଡ ରହିବ। ଗ୍ରହଣର ୯ ଘଣ୍ଟା ପୂର୍ବରୁ ଅର୍ଥାତ୍ ଦିବା ୪ ଘଣ୍ଟା ୪ ମିନିଟ୍ ୫୫ ସେକେଣ୍ଡ ଠାରୁ ରାତ୍ର ୨ଟା ୨୪ମିନିଟି ୨ସେକେଣ୍ଡ ପର୍ଯ୍ୟନ୍ତ ପାକତ୍ୟାଗ, ଅନ୍ନ ଭୋଜନ ଓ ଦେବନୀତି ନିଷିଦ୍ଧ। ଏନେଇ ଶ୍ରୀମନ୍ଦିରର ସ୍ଵତନ୍ତ୍ରତାକୁ ଦୃଷ୍ଟିରେ ରଖି ଗ୍ରହଣ ସ୍ପର୍ଶ ହେବା ମାତ୍ରେ ମହାପ୍ରଭୁଙ୍କର ଦେଵନୀତି ଆରମ୍ଭ କରାଯିବ। ଏହି ଦିନ ପରମ୍ପରା ଅନୁସାରେ ଚକ୍ରରାଜ ସୁଦର୍ଶନ ମାର୍କେଣ୍ଡେୟ , ଅଙ୍ଗିରା, ଭୃଗୁ ଓ କଣ୍ଡୁ ଆଦି ଚାରି ଆଶ୍ରମକୁ ବିଜେ କରିଥାନ୍ତି । ଏଣୁ ଏହି ଚାରି ଆଶ୍ରମ ବିଜେ କରି ସିଂହାସନକୁ ପ୍ରତ୍ୟାବର୍ତ୍ତନ ନୀତି କାର୍ଯ୍ୟ ପାକତ୍ୟାଗ ପୂର୍ବରୁ କରିବା ନେଇ ନୀତି ସବ କମିଟି ବୈଠକରେ ନିଷ୍ପତ୍ତି ନିଆଯାଇଛି ।
ଶ୍ରୀମନ୍ଦିରରେ ଗ୍ରହଣ ସ୍ପର୍ଷ ପରେ ଶ୍ରୀଜିଉଙ୍କ ମହାସ୍ନାନ, ଗ୍ରହଣ ଖଇକୋରା ଭୋଗ ନୀତି ସମ୍ପନ୍ନ କରାଯାଇ ଅନ୍ୟାନ୍ୟ ନୀତି ଅନୁଷ୍ଠିତ ହେବ । ପୂର୍ଣ୍ଣମୀ ଦିନ ସୁଦର୍ଶନଙ୍କ ଚାରିଆଶ୍ରମ ବିଜେ ଭଳି ବିଶେଷ ନୀତି ରହିଥିବା ବେଳେ ପୂର୍ଣ୍ଣିମା ପରଦିନ ଠାରୁ କାର୍ତ୍ତିକ ବ୍ରତ ପାଇଁ ହବିଷ୍ୟାଳୀଙ୍କ ବ୍ରତ ଶଙ୍କଳ୍ପ ନୀତି ସମ୍ପାଦନ କରାଯିବ । ଏନେଇ ପାଳିଆ ସେବକଙ୍କ ସହଯୋଗ ଲୋଡିଛି ପ୍ରଶାସନ। ଅନ୍ୟପଟେ ଜ୍ୟୋତିର୍ବିଦଙ୍କ ମତ ଅନୁସାରେ ଆଗାମୀ ଗ୍ରହଣ ମେଷ, ବୃଷ, କର୍କଟ, ସିଂହ, କନ୍ୟା ଓ ତୁଳା ପାଇଁ ଅଶୁଭ ଥିବା ବେଳେ ମିଥୁନ, ବିଛା, ଧନୁ , ମକର, କୁମ୍ଭ ଓ ମୀନ ରାଶି ପାଇଁ ଶୁଭ ଫଳଦାୟକ ।