ରାଜ୍ୟର ବିକାଶ ପୁରୁଷ କହିଲେ ନବୀନ ପଟ୍ଟନାୟକ। ତାଙ୍କ ମୁଖ୍ୟମନ୍ତ୍ରୀତ୍ବ ସମୟରେ ମହିଳାଙ୍କ ଆର୍ଥିକ ବିକାଶ ସହିତ ସବୁ କ୍ଷେତ୍ରରେ ରାଜ୍ୟ ଏକ ନମ୍ବର ସ୍ଥାନ ପାଇଥିଲା। ଏଭଳି ନେତାଙ୍କ ବିରୋଧରେ ଏକତରଫା ଭାବେ ରାଜ୍ୟର ଦୁଇଟି ନ୍ୟୁଜ ଚାନେଲେ କିପରି ଖବର ପ୍ରସାରଣ କଲେ? ନବୀନ ପଟ୍ଟନାୟକ ହିଞ୍ଜିଳିରୁ ଲଗାତାର ୬ ଥର ନିର୍ବାଚିତ ହୋଇ ହିଞ୍ଜିଳିବାସୀଙ୍କ ବିକାଶ ପାଇଁ ଦୀର୍ଘ ୨୭ ବର୍ଷ ଧରି ସେବା କରିଆସୁଛନ୍ତି। ଅଥଚ ଏଭଳି ବିକାଶ ପୁରୁଷଙ୍କ ବିରୋଧରେ ଯଦି କେହି ଅଭିଯୋଗ ଆଣୁଛି ସେ ଖବର ପ୍ରସାରଣ ପୂର୍ବରୁ କାହିଁକି ବିଜେଡିର ପ୍ରତିକ୍ରିୟା ନିଆଗଲାନି ବୋଲି ଦଳୀୟ ମୁଖପାତ୍ର ପ୍ରଶ୍ନ କରିଛନ୍ତି। ଶିଶିର ଅଭିଯୋଗ କରିଥିଲେ ୨୦୨୪ରେ ହିଞ୍ଜିଳିର ବିଧାୟକ ଭାବେ ନିର୍ବାଚିତ ହେବା ପରେ ୧୮ ମାସ ହେଲାଣି ନବୀନ ତାଙ୍କ ନିର୍ବାଚନମଣ୍ଡଳୀ ଗସ୍ତ କରିନାହାନ୍ତି। ଏହା ସମ୍ପୂର୍ଣ୍ଣ କପୋଳକଳ୍ପିତ ବୋଲି ବିଜେଡି ସ୍ପଷ୍ଟ କରିଛି। ବିଜେଡି ସଭାପତି ନବୀନ ପଟ୍ଟନାୟକ ଅଦିନିଆ ବର୍ଷାରେ କ୍ଷୟକ୍ଷତି ହୋଇଥିବା ଚାଷୀଙ୍କ ଦୁଃଖ ବୁଝିବାକୁ ସେହିବର୍ଷ ଡିସେମ୍ବର ୩୦ ତାରିଖରେ ନିର୍ବାଚନମଣ୍ଡଳୀ ଗସ୍ତ କରି ଚାଷୀଙ୍କ ଦୁଖ ବୁଝିଥିଲେ। ହିଞ୍ଜିଳି ଓ ସେରଗଡ଼ରୁ ନିୟମିତ ଲୋକେ ଆସି ନବୀନଙ୍କୁ ଭେଟି ସେମାନଙ୍କ ସମସ୍ୟା ସମ୍ପର୍କରେ ଆଲୋଚନା କରିଆସୁଛନ୍ତି। ଏବେ ବି ଲୋକଙ୍କ ହୃଦୟରେ ନବୀନଙ୍କ ପାଇଁ ସ୍ବତନ୍ତ୍ର ସ୍ଥାନ ରହିଛି। ହେଲେ ସେଇ ବିକାଶ ପୁରୁଷ ବିରୋଧରେ ଏପରି କାହିଁକି ନିମ୍ମମାନର ଟିପ୍ପଣୀକୁ ଗୁରୁତ୍ବ ଦେଇ ପ୍ରସାରଣ କରାଯାଉଛି ତାକୁ ନେଇ ବିଜେଡି ସମାଲୋଚନା କରିଛି।
ପ୍ରତ୍ୟେକ ସୋମବାର ଲୋକଙ୍କ ଦିନ: ସରକାରୀ ଅଧିକାରୀ ଲୋକଙ୍କ ଅଭିଯୋଗ ଶୁଣିବାର ଦିନ
ପ୍ରତ୍ୟେକ ସୋମବାର ଲୋକଙ୍କ ଦିନ। ସରକାରୀ ଅଧିକାରୀ ଲୋକଙ୍କ ଅଭିଯୋଗ ଶୁଣିବାର ଦିନ। ପ୍ରତ୍ୟେକ ସୋମବାର ଅଭିଯୋଗ ଶୁଣୁଥିବା ଅଧିକାରୀମାନେ କାର୍ଯ୍ୟାଳୟରେ ରହିବା ଜରୁରୀ। ଜାନୁଆରୀ ୫ ତାରିଖ, ସୋମବାର ଦିନ ରାୟଗଡ଼ା ଜିଲ୍ଲାପାଳ ଆଶୁତୋଷ କୁଲକର୍ଣ୍ଣି ଅଭିଯୋଗ ଶୁଣାଣୀକୁ ବିଳମ୍ବରେ ଆସିଥିବାରୁ ୧୨ ଅଧିକାରୀଙ୍କୁ କାର୍ଯ୍ୟାଳୟକୁ ପ୍ରବେଶ ଅନୁମତି ଦେଲେ ନାହିଁ । ଏଥିରେ ଉପଜିଲ୍ଲାପାଳ, ବିଡିଓ, ସୂଚନା ଲୋକସମ୍ପର୍କ ଅଧିକାରୀ, ସାମାଜିକ ସୁରକ୍ଷା ଅଧିକାରୀ ସାମିଲ ଥିଲେ। ଜିଲ୍ଲାପାଳଙ୍କ ସ୍ପଷ୍ଟ ବାର୍ତ୍ତା ଥିଲା, ସମୟାନୁବର୍ତ୍ତିତା ଓ ଉତ୍ତରଦାୟିତ୍ବ । ଲୋକଙ୍କ ଅଭିଯୋଗ ଶୁଣିବା ହେଉଛି ପ୍ରଶାସନର ପ୍ରାଥମିକତା। ଜିଲ୍ଲାପାଳଙ୍କ ଏଭଳି ବାର୍ତ୍ତାକୁ ନେଇ ରାଜ୍ୟବ୍ୟାପୀ ଚର୍ଚ୍ଚା ହେଲା । ଏବେ ରାଜ୍ୟ ସରକାର ମଧ୍ୟ ସେହି ଧାରାରେ ଯାଉଛନ୍ତି । ମୁଖ୍ୟ ଶାସନ ସଚିବ ଭାବେ ଦାୟିତ୍ବ ନେବା ପରେ ଅନୁ ଗର୍ଗଙ୍କ ପ୍ରଥମ ସଚିବ ସ୍ତରୀୟ ବୈଠକରେ ଏକ ଗୁରୁତ୍ବପୂର୍ଣ୍ଣ ନିଷ୍ପତ୍ତି ନେଇଛନ୍ତି । ସୋମବାର ଲୋକଙ୍କ ଅଭିଯୋଗ ଶୁଣିବାର ଦିନ ହୋଇଥିବାରୁ ଲୋକସେବା ଭବନରେ ଅନ୍ୟ କୌଣସି ବୈଠକ ନ ରଖିବାକୁ ସେ ନିର୍ଦ୍ଦେଶ ଦେଇଛନ୍ତି।
କେବଳ ରାଜ୍ୟସ୍ତରୀୟ ନୁହେଁ, ଜିଲ୍ଲା ଓ ବ୍ଲକ ସ୍ତରରେ ମଧ୍ୟ ସୋମବାର କୌଣସି ସରକାରୀ ବୈଠକ ନ କରିବାକୁ ମୁଖ୍ୟ ସଚିବ ନିର୍ଦ୍ଦେଶ ଦେଇଛନ୍ତି । ଭୁବନେଶ୍ବରରେ ସୋମବାର ମୁଖ୍ୟମନ୍ତ୍ରୀ ଓ ମନ୍ତ୍ରୀମାନେ ଲୋକଙ୍କ ଅଭିଯୋଗ ଶୁଣୁଛନ୍ତି। ହେଲେ ମୁଖ୍ୟମନ୍ତ୍ରୀଙ୍କ ଅନ୍ୟ ଗୁରୁତ୍ବପୂର୍ଣ୍ଣ କାର୍ଯ୍ୟ ରହୁଥିବାରୁ ସବୁ ସୋମବାର ଶୁଣାଣି ହୋଇପାରୁନାହିଁ। ହେଲେ ଲୋକସେବା ଭବନରେ ସଚିବମାନେ ସୋମବାର ଲୋକଙ୍କ ଅଭିଯୋଗ ଶୁଣୁଛନ୍ତି। ଜିଲ୍ଲା ସ୍ତରରେ ଜିଲ୍ଲାପାଳ-ଏସପିଙ୍କ ସହ ଜିଲ୍ଲାସ୍ତରୀୟ ଅଧିକାରୀମାନେ ମଧ୍ୟ ଲୋକଙ୍କ ସମସ୍ୟା ଶୁଣୁଛନ୍ତି। ତେଣୁ ପ୍ରତ୍ୟେକ ସୋମବାର ଅଭିଯୋଗ ଶୁଣାଣୀ ପାଇଁ ଉତ୍ସର୍ଗ କରିବାକୁ ଅନ୍ୟ କୌଣସି ସରକାରୀ ବୈଠକ ନ କରିବାକୁ ମୁଖ୍ୟ ସଚିବ ନିର୍ଦ୍ଦେଶ ଦେଇଛନ୍ତି । ଏହାଦ୍ବାରା ରାଜ୍ୟ ଓ ଜିଲ୍ଲା ସ୍ତରର ଅଧିକାରୀମାନେ ଅଧିକ ସଜାଗ ହେବେ ବୋଲି ସମୀକ୍ଷକ କହିଛନ୍ତି । ଗ୍ରାମାଞ୍ଚଳରେ ତହସିଲ, ଥାନା, ବ୍ଲକ ଅଫିସକୁ ନେଇ ଲୋକଙ୍କ ସମସ୍ୟା ଅଧିକ ଥାଏ । ପକ୍କାଘର, ରାସନ କାର୍ଡ, ଭତ୍ତା ସମ୍ପର୍କିତ ଅଭିଯୋଗ ସଂଖ୍ୟା ଅଧିକ ହୋଇଥିବା ବେଳେ ରାଜ୍ୟ ସ୍ତରରେ ପେନସନ୍, ଶିକ୍ଷା, ସ୍ବାସ୍ଥ୍ୟ ସହିତ ଥାନା, କୋର୍ଟ ଅବମାନନା ଭଳି ମାମଲା ଅଧିକ ଆସିବା ନଜିର ରହିଛି।
ସଡ଼କ ସୁରକ୍ଷା ନିୟମ ପାଳନ କରନ୍ତୁ, ପୁରସ୍କାର ଜିତନ୍ତୁ
ସଡ଼କ ସୁରକ୍ଷା ନିୟମ ପାଳନ କରନ୍ତୁ, ପୁରସ୍କାର ଜିତନ୍ତୁ । ସ୍କୁଲସ୍ତରରେ ସଚେତନ ହେଲେ, ଆଗକୁ ଏଡ଼ାଇ ହେବ ବଡ଼ ଦୁର୍ଘଟଣା। ଏଥିପାଇଁ ପାଇଲଟ ପ୍ରୋଜେକ୍ଟ ଭାବେ ଭୁବନେଶ୍ବରର ଦୁଇଟି ସ୍କୁଲରେ ଆରମ୍ଭ ହୋଇଛି ବିଦ୍ୟାଳୟ ଅଞ୍ଚଳ ସୁରକ୍ଷା ରେଟିଂ। ଏହି ଦୁଇଟି ସ୍କୁଲ ହେଉଛି ୟୁନିଟ୍-୩ ଅଞ୍ଚଳର କ୍ୟାପିଟାଲ ହାଇସ୍କୁଲ ଓ ୟୁନିଟ-୩ ଅଞ୍ଚଳର ଭାବଗ୍ରାହୀ ଦୃଷ୍ଟିବାଧିତ ସ୍କୁଲ। ଯେଉଁ ସ୍କୁଲ ସଡ଼କ ସୁରକ୍ଷା ନିୟମ ପାଳନକୁ ପ୍ରାଧାନ୍ୟ ଦେଉଥିବେ, ଛାତ୍ରଛାତ୍ରୀଙ୍କୁ ସଡ଼କ ସୁରକ୍ଷା ଦିଗରେ ସଚେତନ କରାଉଥିବେ, ସେହି ଆଧାରରେ ତାଙ୍କୁ ଷ୍ଟାର ବା ମାର୍କ ମିଳିବା ସହ ସମ୍ମାନିତ କରାଯିବ। ଭବିଷ୍ୟତ ପିଢ଼ିଙ୍କ ସୁରକ୍ଷାକୁ ନଜରରେ ରଖି ଏଭଳି ପ୍ରାଥମିକତା ଦେଇଛି ପରିବହନ ବିଭାଗ।
ସ୍କୁଲ ଜୋନ୍ ନିକଟରେ ସଡ଼କ ସୁରକ୍ଷା ମାନଦଣ୍ଡର ଅନୁପାଳନ ସୁନିଶ୍ଚିତ କରି ଦୁର୍ଘଟଣା ହ୍ରାସ କରିବା ଲକ୍ଷ୍ୟରେ ମାର୍ଗଦର୍ଶିକା ପ୍ରସ୍ତୁତ କରାଯାଇଛି । କ୍ୟାପିଟାଲ ହାଇସ୍କୁଲ ରାଜଧାନୀର ଏକ ମୁଖ୍ୟ ଓ ବ୍ୟସ୍ତବହୁଳ ରାସ୍ତାରେ ଅଛି। ଅନେକ ପିଲା ଯିବା ଆସିବା କରୁଥିବା ବେଳେ ଅସୁବିଧାରେ ସମ୍ମୁଖୀନ ହେଉଛନ୍ତି । ସ୍କୁଲ ଆରମ୍ଭ ପୂର୍ବରୁ ଓ ଶେଷ ହେବା ପରେ ଜଣେ ଶିକ୍ଷକ ପିଲାଙ୍କ ସୁରକ୍ଷା ପାଇଁ ମୁଖ୍ୟ ଗେଟ୍ ନିକଟରେ ରହୁଛନ୍ତି। ପିଲାମାନେ ରାସ୍ତାରେ କିଭଳି ଯିବା ଆସିବା କରିବେ, ସେନେଇ ସବୁବେଳେ ସଚେତନ କରାଯାଉଛି।
ଟ୍ରାଫିକ ନିୟମ ମାନି ଗାଡ଼ି ଚଳାଇବା ପରି ଶିକ୍ଷା ସ୍କୁଲରେ ଦିଆଯାଉଛି। ଯଦି କୌଣସି ଲୋକ ଦୁର୍ଘଟଣାର ଶିକାର ହୁଏ, ତାଙ୍କୁ କିଭଳି ଭାବେ ହସ୍ପିଟାଲକୁ ନିଆଯିବ, ସେନେଇ ମଧ୍ୟ ସଚେତନ କରାଯାଉଛି। ସେହିପରି ସ୍କୁଲ ଆଗରେ ଧୀରେ ଗାଡ଼ି ଚଳନାକୁ ନେଇ ସୂଚନା ଓ ଚିତ୍ର ମଧ୍ୟରେ ଦର୍ଶାଯାଉଛି। ଯାହାଦ୍ବାରା ଦର୍ଘଟଣାରୁ ତ୍ରାହି ମିଳିପାରିବ। ଗୋଟାଏ ପଟେ ବିଦ୍ୟାଳୟ ଅଞ୍ଚଳ ସୁରକ୍ଷା ରେଟିଂ ଆରମ୍ଭ କରିଛନ୍ତି ସରକାର । ସେପଟେ ବିପଦସଙ୍କୁଳ ଭାବେ ସ୍କୁଲ ଆସୁଛନ୍ତି ଛାତ୍ରଛାତ୍ରୀ । ବସ ଓ ଅଟୋ ଓଭରଲୋଡିଂ ହେଉଛି । ସିଟ୍ କ୍ଷମତା ଠାରୁ ଅଧିକ ପିଲା ଜାକିଜୁକି ହୋଇ ସ୍କୁଲ ଆସୁଛନ୍ତି। ତେଣୁ ଏସବୁକୁ ବି ବିଚାରକୁ ନେଇ ଚେକିଂକୁ ଜୋରଦାର କରିବାର ଆବଶ୍ୟକତା ରହିଛି।
କଂଗ୍ରେସରେ ଇସ୍ତଫାର ସୁଅ: ଭକ୍ତଙ୍କୁ ଟାର୍ଗେଟ କଲେ ମୋକିମଙ୍କ ସମର୍ଥକ
କଂଗ୍ରେସରେ ଇସ୍ତଫାର ସୁଅ । ଭକ୍ତଙ୍କୁ ଟାର୍ଗେଟ କଲେ ମୋକିମଙ୍କ ସମର୍ଥକ । ପିସିସିର ପ୍ରଶ୍ନ, କାହା ସ୍ବାର୍ଥରେ ଇସ୍ତଫା ? ଯାହା ଲାଗୁଛି ପିସିସି ସଭାପତିଙ୍କ ଉପରେ କଟକ ବାରବାଟୀର ପୂର୍ବତନ ବିଧାୟକ ମହମ୍ମଦ ମୋକିମଙ୍କ ରାଗ ଥମିନାହିଁ । ନିଜର ସମର୍ଥକଙ୍କ ଜରିଆରେ ପୁଣି ରାଜ୍ୟ କଂଗ୍ରେସ ମଙ୍ଗୁଆଳଙ୍କୁ କରିଛନ୍ତି ନିଶାଣ । ରାଜ୍ୟ କଂଗ୍ରେସର ନେତୃତ୍ବକୁ ଅପାରଗ ଦାୟୀ କରି କଂଗ୍ରେସର ପ୍ରାଥମିକ ସଦସ୍ୟ ପଦରୁ ସମୂହ ଇସ୍ତଫା ଦେଇଛନ୍ତି ୪୧ ଜଣ କଂଗ୍ରେସ ନେତା । ସେମାନଙ୍କ ମଧ୍ୟରେ ଅଛନ୍ତି ପୂର୍ବତନ ପିସିସି ସମ୍ପାଦକ, ପୂର୍ବତନ ମୁଖପାତ୍ର, ପୂର୍ବତନ ବ୍ଲକ କଂଗ୍ରେସ ସଭାପତି, ମହିଳା କଂଗ୍ରେସ ସମ୍ପାଦକ, ଯୁବ ଓ ଛାତ୍ର କର୍ମକର୍ତ୍ତା। ରାଜଧାନୀରେ ମିଳିତ ସାମ୍ବାଦିକ ସମ୍ମିଳନୀ କରି ସମୂହ ଇସ୍ତଫା ଘୋଷଣା କରିଛନ୍ତି । ଇସ୍ତଫା ପରେ ଜଣକ ପରେ ଜଣେ ନେତା ସିଧା ପିସିସି ସଭାପତିଙ୍କୁ ଟାର୍ଗେଟ କରିଛନ୍ତି ।
୪୧ ଜଣ ନେତା ଏକକାଳୀନ କଂଗ୍ରେସରୁ ଇସ୍ତଫା ଦେବାକୁ କିନ୍ତୁ ହାଲକା ଭାବେ ନେଇଛି ଦଳ । ଦଳର ମୁଖପାତ୍ର ରଜନୀ ମହାନ୍ତିଙ୍କ ଯୁକ୍ତି ହେଉଛି କଂଗ୍ରେସ ଏକ ଜାତୀୟ ପାର୍ଟି । ଯଦି ରାଜ୍ୟ ନେତୃତ୍ବକୁ ନେଇ କିଛି ଅଭିଯୋଗ ଥିଲା, ତେବେ ଇସ୍ତଫା ଦେଇଥିବା ନେତାମାନେ କେନ୍ଦ୍ର ନେତୃତ୍ବକୁ ଜଣାଇପାରିଥାନ୍ତେ । ଏ ସମୂହ ଇସ୍ତଫା କେବଳ ବ୍ୟକ୍ତି ବିଶେଷ ପାଇଁ ଉଦ୍ଦିଷ୍ଟ । କଂଗ୍ରେସରୁ ବହିଷ୍କୃତ ହେବା ପରେ ମହମ୍ମଦ ମୋକିମଙ୍କୁ ନେଇ ଦଳ ଭିତରେ ଝଡ଼ ଥମୁନାହିଁ । ଯାହାକୁ ନେଇ ମୁହାଁମୁହିଁ ପିସିସି ଓ ମୋକିମ ଗୋଷ୍ଠୀ ।
ରାଜ୍ୟସଭା ସସପେନ୍ସ: ଚତୁର୍ଥ ପ୍ରାର୍ଥୀଙ୍କୁ ନେଇ କଳ୍ପନାଜଳ୍ପନା
ରାଜ୍ୟସଭା ସସପେନ୍ସ । ଚତୁର୍ଥ ପ୍ରାର୍ଥୀଙ୍କୁ ନେଇ କଳ୍ପନାଜଳ୍ପନା । ଆଇନମନ୍ତ୍ରୀଙ୍କୁ ଭେଟିଲେ ଦିଲୀପ ରାୟ । ବିଜେଡି କହିଲା ନବୀନ ନେବେ ନିଷ୍ପତ୍ତି । ରାଜ୍ୟସଭା ଯିବେ କି ଦିଲୀପ ରାୟ ? ଆଇନମନ୍ତ୍ରୀ ପୃଥ୍ଵୀରାଜ ହରିଚନ୍ଦନଙ୍କୁ ଦିଲୀପ ରାୟ ଭେଟିବା ପରେ ଏହି ଚର୍ଚ୍ଚା ଜୋର୍ ଧରିଛି। ପୃଥ୍ଵୀରାଜ ହରିଚନ୍ଦନଙଅକ ସରକାରୀ ବାସଭବନରେ ଉଭୟଙ୍କ ମଧ୍ୟରେ ଅଧ ଘଣ୍ଟ ଆଲୋଚନା ହୋଇଥିଲା। ସେ ସଂପର୍କରେ ଦିଲୀପ ରାୟ ମୁହଁ ଖୋଲି ନଥିବା ବେଳେ ଆଇନମନ୍ତ୍ରୀ ମଧ୍ୟ ରାଜ୍ୟସଭା ନିର୍ବାଚନ ନେଇ ସିଧାସଳଖ କିଛି ସୂଚନା ଦେଇ ନାହାନ୍ତି। କହିଛନ୍ତି ଦିଲୀପ ରାୟଙ୍କ ସହିତ ପାରିବାରିକ ସମ୍ପର୍କ ଅଛି। ବାପା ବିଶ୍ଵଭୂଷଣ ହରିଚନ୍ଦନ ମୋ ସହିତ ଅଛନ୍ତି। ଦିଲୀପ ରାୟ ତାଙ୍କୁ ମଧ୍ୟ ଭେଟିଛନ୍ତି। ରାଜ୍ୟସଭା ନିର୍ବାଚନ ପ୍ରକ୍ରିୟା ଆରମ୍ଭ ହୋଇଥିବା ବେଳେ ଦିଲୀପ ରାୟଙ୍କ ନାଁକୁ ନେଇ ପୁଣି ଥରେ ରାଜ୍ୟ ରାଜନୀତିରେ ହଟଚମଟ ସୃଷ୍ଟି ହୋଇଛି।
ଓଡ଼ିଶାର ୪ଟି ରାଜ୍ୟସଭା ଆସନ ଖାଲି ପଡ଼ିବ। ବିଧାୟକଙ୍କ ସଂଖ୍ୟା ଦୃଷ୍ଟିରୁ ବିଜେପି ୨ଟି ଓ ବିଜେଡି ଗୋଟିଏ ଆସନ ହାତେଇବା ନିଶ୍ଚିତ। ବାକି ରହିଲା ଚତୁର୍ଥ ଆସନ। ଏହି ଆସନ କାହା ଖାତାକୁ ଯିବ। ଏହି ଆସନରୁ କିଏ ପ୍ରାର୍ଥୀ ହେବ। ତାକୁ ନେଇ ଅନେକ ଅଙ୍କକଷା। ରାଜ୍ୟସଭା ନିର୍ବାଚନ ପାଇଁ ଏପର୍ଯ୍ୟନ୍ତ ବିଜ୍ଞପ୍ତି ପ୍ରକାଶ ପାଇନଥିଲେ ମଧ୍ୟ ଚତୁର୍ଥ ଆସନକୁ ନେଇ ଅନେକ କଳ୍ପନାଜଳ୍ପନା। ବିଜେଡି କହିଛି, ୪ଟି ଆସନରୁ ତ ଆମେ ଗୋଟିଏ ଜିତିବୁ। ଆଉ ଏକ ଆସନ ପାଇଁ କଣ ନିଷ୍ପତ୍ତି ନିଆଯିବ, ତାହା ଆଲୋଚନା ସ୍ତରରେ ଅଛି। ଦଳର ସଭାପତି ନବୀନ ପଟ୍ଟନାୟକ ଠିକ ସମୟରେ ଠିକ ନିଷ୍ପତ୍ତି ନେବେ। ପ୍ରଶାନ୍ତ ମୁଦୁଲି କହିଛନ୍ତି, ରାଜ୍ୟସଭା ଯିବା ପାଇଁ ଯେଉଁ ମାନଦଣ୍ଡ ଅଛି, ବିଜେଡିର ଅନେକ ନେତା ସେହି ମାନଦଣ୍ଡ ପୂରଣ କରୁଛନ୍ତି।
ଆସନ୍ତା ଏପ୍ରିଲରେ ଓଡ଼ିଶାର ୪ଟି ରାଜ୍ୟସଭା ଆସନ ଖାଲି ହେବ। କେଉଁ ଦଳ କାହାକୁ ପାର୍ଲାମେଣ୍ଟର ଉଚ୍ଚ ସଦନକୁ ପଠାଇବେ, ତାହା ଏଯାଏ ସ୍ପଷ୍ଟ ହୋଇନି। ତା ସହିତ ଚତୁର୍ଥ ଆସନ ସୃଷ୍ଟି କରିଛି ସସପେନ୍ସ।
ଓଡ଼ିଶାରେ ମିଳିବ ଦାମୀ ଅର୍କିଡ: ବିନା ମାଟିରେ ଚାଷ ହେବ ବିଭିନ୍ନ ରଙ୍ଗର ଫୁଲ
ଓଡ଼ିଶାରେ ମିଳିବ ଦାମୀ ଅର୍କିଡ । ବିନା ମାଟିରେ ଚାଷ ହେବ ବିଭିନ୍ନ ରଙ୍ଗର ଫୁଲ । କୃଷି ମେଳାରେ ପ୍ରଶିକ୍ଷଣ ପାଇଁ ଉତ୍ସାହିତ ଯୁବଚାଷୀ । ଏଥିପାଇଁ ଥାଇଲାଣ୍ଡ, ସିଙ୍ଗାପୁର ଓ ଚାଇନା ଉପରେ ନିର୍ଭର କରିବାକୁ ପଡିବ ନାହିଁ । ଓଡିଶାରେ ଖୋର୍ଦ୍ଧା, ଢେଙ୍କାନାଳ, ଆଠଗଡ ରେ ଚାଷ ଆରମ୍ଭ ହୋଇଛି ଦାମୀ ଅର୍କିଡ ଚାଷ । ଜଣେ ଚାଷୀ ଏକ ଏକର ଜାଗାରେ ଏହି ଚାଷ କରି ମାସକୁ ୨ ରୁ ଅଢ଼େଇ ଲକ୍ଷ ଟଙ୍କା ରୋଜଗାର କରିପାରିବେ । ଭୁବନେଶ୍ୱର ବରମୁଣ୍ଡା ପଡିଆରେ କୃଷି ମେଳାରେ ଅର୍କିଡ଼ ବାୟୋଟେକ ଷ୍ଟାଲରେ ଏହାକୁ ଦେଖି ଯୁବ ଉଦ୍ୟୋଗୀ ଏଥିପାଇଁ ଆଗ୍ରହ ପ୍ରକାଶ କରିଛନ୍ତି । କେବଳ ଆର୍କିଡ ନୁହେଁ ଜରବେରା, ଗୋଲାପ, ଡିଫଶୋ ଫିଲିଆ, ଅଙ୍କୁରିୟମ ଫୁଲ ମଧ୍ୟ ଚାଷ କରି ଲାଭବାନ ହୋଇ ପାରିବେ ଯୁବ ଉଦ୍ୟୋଗୀ ।
୧୨ ବର୍ଷ ହେଲା ଓଡ଼ିଶାକୁ ଆସିଛି ଅର୍କିଡ । ଏହି ଫୁଲ ଗଛ ପ୍ରାୟ ୧୦ ବର୍ଷ ଯାଏ ବଞ୍ଚି ରହିଥାଏ l ଥାଇଲାଣ୍ଡ ଓ ଚାଇନାରୁ ଆସିଛି ଏହାର ଚାରା l ଜଣେ ଯୁବ ଉଦ୍ୟୋଗୀ ୧୦ ଟଙ୍କା ଖର୍ଚ୍ଚ କରି ଏହାଦ୍ବାରା ରୋଜଗାରକ୍ଷମ ହୋଇ ପାରିବେ । ଗୋଟିଏ ଏକରରେ ଚାଷ କଲେ ୯୦ ଲକ୍ଷରୁ ଏକ କୋଟି ପର୍ଯ୍ୟନ୍ତ ଖର୍ଚ୍ଚ ହୁଏ । ଚାଷ ପାଇଁ କୌଣସି ମାଟିର ଆବଶ୍ୟକତା ନାହିଁ । କେବଳ ନଡ଼ିଆ କତା, npk 999 ସହ ପାଣି ସ୍ପ୍ରେ କରି ଏହି ଫୁଲଚାଷ କରିହେବ । ଓଡିଶାର ସବୁ ଅଂଚଳ ପାଇଁ ଏହି ଫୁଲ ହୋଇପାରିବ l ଲୋକମାନେ ନିଜ ଘରେ ମଧ୍ୟ ଏହି ଫୁଲ ଚାଷ କରିପାରିବେ ବୋଲି କହିଛନ୍ତି ଫୁଲ ଚାଷୀ ତଥା ଧରିତ୍ରୀ ଉଦ୍ୟାନର ମୁଖ୍ୟ। ଭୁବନେଶ୍ୱର କୃଷି ମେଳାରେ ଆର୍କିଡ଼ ବାଇଓଟେକ ଷ୍ଟାଲରେ ଏହାକୁ ଦେଖିବା ପରେ ଓଡିଶାରେ ଏହି ଫୁଲ ଚାଷ ପାଇଁ ଏବେ ଯୁବ ଉଦ୍ୟୋଗୀଙ୍କ ମଧ୍ୟରେ ଉତ୍ସାହ ବଢିଛି।
କେବେ ସରିବ ଜୟପୁର ନୀଳକଣ୍ଠ ସାଗର କାମ: ଠିକା ସଂସ୍ଥାନର ମନମାନି ଯୋଗୁଁ ବଢୁଛି ଖର୍ଚ୍ଚ
କେବେ ସରିବ ଜୟପୁର ନୀଳକଣ୍ଠ ସାଗର କାମ । ଠିକା ସଂସ୍ଥାନର ମନମାନି ଯୋଗୁଁ ବଢୁଛି ଖର୍ଚ୍ଚ । ଅବଧି ପୂର୍ବରୁ ସରିଲାଣି ପୁରୁଣା କାମ । ଅସନ୍ତୋଷ ପରେ ତାଗିଦ କଲେ ଜିଲ୍ଲାପାଳ । କୋରାପୁଟ ଜିଲ୍ଲା ଜୟପୁର ପୌରପାଳିକାର ଏକ ପ୍ରମୁଖ୍ଯ ସ୍ଥାନରେ ରହିଛି ନୀଳକଣ୍ଠ ସାଗର । ପୁର୍ବ ସରକାରଙ୍କ ସମୟରେ ଏହାରୁ ସୌନ୍ଦର୍ଯ୍ୟକରଣ ପାଇଁ ୯ କୋଟି ୯୮ ଲକ୍ଷ ଟଙ୍କା ଅନୁଦାନ ଦିଆଯାଇଥିଲା । ୨୦୨୧ରେ ନ୍ୟାସନାଲ ବ୍ରିଜ କନଷ୍ଟ୍ରକ୍ସନ କମ୍ପାନିକୁ ଦିଆଯାଇଥିଲା ଦାୟିତ୍ବ । ୧୧ ମାସରେ କାମ ସରିବା କଥା । କିନ୍ତୁ ୪ ବର୍ଷ ହେଲାଣି କାମ ସରିବାର ନାଁ ନେଉନି । ବିଳମ୍ବ ଯୋଗୁଁ ଖର୍ଚ୍ଚ ବଢ଼ି ବଢ଼ି ଚାଲିଥିବାବେଳେ ଅନେକ ସ୍ଥାନରେ ଭାଙ୍ଗିରୁଜି ଗଲାଣି । ଯାହାକୁ ନେଇ ଦେଖାଦେଇଛି ଅସନ୍ତୋଷ ।
ଠିକା ସଂସ୍ଥା NBCCର ଅଧିକାରୀ ମାନଙ୍କୁ ଲିଖିତ ଭାବେ ଜଣାଇଛନ୍ତି କର୍ତ୍ତୃପକ୍ଷ । ଏହାସତ୍ତ୍ବେ କୌଣସି ଅଗ୍ରଗତି ହୋଇପାରୁନଥିବାରୁ କୋରାପୁଟ ଜିଲ୍ଲାପାଳ ଏହାର ସମୀକ୍ଷା କରି ଉକ୍ତ ଠିକା ସଂସ୍ଥାକୁ ତାଗିତ୍ କରିଛନ୍ତି । କାମ ନସାରିଲେ କାର୍ଯ୍ୟାନୁଷ୍ଠାନ ନେଇ ମଧ୍ୟ ଚେତାବନୀ ଦେଇଛନ୍ତି । ପୂର୍ବ ସରକାରଙ୍କ ସମୟରେ ସହରର ଅନେକ ଉନ୍ନତିକରଣ କାମ ହାତକୁ ନିଆଯାଇଥିଲା । ତେବେ ସରକାର ବଦଳିବା ପରେ ଏସବୁ ଉପରେ ଦୃଷ୍ଟି ଦିଆଯାଉ ନଥିବା ଅଭିଯୋଗ କରିଛନ୍ତି ଲୋକେ ।
ସୁଧୁରିବ ବ୍ରହ୍ମପୁରର ଟ୍ରାଫିକ ସମସ୍ୟା: ରାସ୍ତାରୁ ଉଠିବେ ଉଠା ଦୋକାନୀ
ସୁଧୁରିବ ବ୍ରହ୍ମପୁରର ଟ୍ରାଫିକ ସମସ୍ୟା । ରାସ୍ତାରୁ ଉଠିବେ ଉଠା ଦୋକାନୀ । ବିଇଏମସି ପକ୍ଷରୁ ଗଠନ ହେଲା ୬ ଟିମ୍ । ନିୟମିତ ସାହି ଗଳି ବୁଲି ସଚେତନ କରିବ ଟିମ୍ । ବାରମ୍ବାର ନିୟମ ଭାଙ୍ଗିଲେ ଆଦାୟ ହେବ ଜୋରିମାନା । ରାସ୍ତାକଡ଼ରେ ଠେଲା ଓ ଉଠା ଦୋକାନୀଙ୍କ ଯୋଗୁଁ ବ୍ରହ୍ମପୁରରେ ସୃଷ୍ଟି ହେଉଛି ଗୁରୁତର ଟ୍ରାଫିକ ସମସ୍ଯା । ବାରମ୍ବାର ଅଭିଯୋଗ ପରେ ବ୍ରହ୍ମପୁର ମହାନଗର ନିଗମ ପକ୍ଷରୁ ନିଆଯାଇଛି ପଦକ୍ଷେପ । ଏଥିପାଇଁ ନୂତନ ଭାବେ ୬ଟି ଏନଫୋସ୍ମେଣ୍ଟ ଟିମ୍ ଗଠନ କରାଯାଇଛି । ଏହି ୬ଟି ଟିମ ସହର ଗଳି ସାହିରେ ବୁଲି ବ୍ୟବସାୟୀଙ୍କ ସଚେତନ କରିବେ । ବାରମ୍ବାର ନିୟମ ଅମାନ୍ୟ କଲେ ଆଦାୟ ହେବ ଜୋରିମାନା ।
ସହରର ଗେଟ୍ ବଜାର, ଖଲ୍ଲିକୋଟ କଲେଜ ଛକ, ବିଜିପୁର ଛକ, ଗୋଷାଣୀ ନୂଆଗାଁ ଛକ, ଅର୍ଣ୍ଣପୂର୍ଣ୍ଣା ବଜାର, ସାନ ବଜାର, ବଡ଼ବଜାର ଭଳି ବିଭିନ୍ନ ସ୍ଥାନକୁ ବୁଲି ବ୍ୟବସାୟୀଙ୍କୁ ସଚେତନ କରାଯାଇଛି । ଅମାନିଆ ହେଲେ ଆଦାୟ କରାଯାଉଛି ଫାଇନ । BEMCର ଏଭଳି ପଦକ୍ଷେପକୁ ସ୍ବାଗତ କରିଛନ୍ତି ଉଠା ଦୋକାନୀ ଓ ଠେଲା ବ୍ୟବସାୟୀ । ତେବେ ବ୍ରହ୍ମପୁର ମହାନଗର ନିଗମ ମୁଖ୍ୟ ଫାଟକ ନିକଟରେ ଥିବା ସିଟି ହାଇସ୍କୁଲ ରୋଡକୁ ମଧ୍ଯ ଉଠାଦୋକାନ ମୁକ୍ତ କରିବାକୁ ଦାବି କରିଛନ୍ତି । ସେମାନଙ୍କ ନ ଉଠାଇ ଅନ୍ୟ ମାସିକିଆ ବଟି ଆଦାୟ କରି ଟିମ୍ ଛାଡ଼ି ଦେଉଥିବା ଅଭିଯୋଗ ହୋଇଛି
ଦେବୀ ନଦୀରେ ପଡିରହିଛି ମୃତ ତିମି ମାଛ
ଦେବୀ ନଦୀରେ ପଡିରହିଛି ମୃତ ତିମି ମାଛ। ଜଗତସିଂହପୁର ଜିଲ୍ଲା ଦେବୀ ନଦୀ ମଧ୍ୟ ବର୍ତ୍ତୀ ଅଂଚଳରେ ଆଜି ସକାଳୁ ମୃତ ତିମି ମାଛ ଦେଖିବାକୁ ମିଳିଛି । ଏହି ସନ୍ଦିଗ୍ଧ ନୀଳ ତିମିଟି କେଉଁ ପ୍ରଜାତିର ତାହା ଏବେ ସୁଦ୍ଧା ଅସ୍ପଷ୍ଟ ରହିଛି। ଅନ୍ୟପଟେ ଏହି ଦେବୀ ନଦୀଟି ରାଜନଗର ଅଞ୍ଚଳରେ ଯାଉଛି। ମୃତ ତିମି ସମ୍ପର୍କିତ ତଥ୍ୟ ଅସ୍ତରଙ୍ଗ ବନାଞ୍ଚଳରେ ନାହିଁ ବୋଲି ପ୍ରାଣୀ ବନାଞ୍ଚଳ ଅଧିକାରିଣୀ ମୋନାଲିଶା ମହାପାତ୍ର କହିଛନ୍ତି
ଆସନ୍ତାକାଲି ମାଘସପ୍ତମୀ ; ଚନ୍ଦ୍ରଭାଗା ବୁଡ଼ ପାଇଁ ଚଳଚଞ୍ଚଳ କୋଣାର୍କ
ନନ୍ଦିଘୋଷ ବ୍ୟୁରୋ : ରାତି ପାହିଲେ ମାଘସପ୍ତମୀ । ଚନ୍ଦ୍ରଭାଗାରେ ବୁଡ ପକାଇବେ ହଜାର ହଜାର ଶ୍ରଦ୍ଧାଳୁ । କୋଣାର୍କକୁ ଲକ୍ଷାଧିକ ଶ୍ରଦ୍ଧାଳୁଙ୍କ ଆଗମନ ହେବ। ଭିଡ଼କୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି ଶେଷ ହୋଇଛି । ପରମ୍ପରା ଅନୁଯାୟୀ ମାଧିପୂରର ତ୍ରିବେଣୀଶ୍ଵର ମହାଦେବ, ସନ୍ଥପୁରର ଐଶାନ୍ୟଶ୍ଵର ମହାଦେବ ଓ କୁରୁଜଙ୍ଗର ଦକ୍ଷିନେଶ୍ବର ମହାଦେବଙ୍କ ଚନ୍ଦ୍ରଭାଗା ତୀର୍ଥରେ ମହାସ୍ନାନ ପରେ ଶ୍ରଦ୍ଧାଳୁ ମାନେ ବୁଡ ପକାଇବେ ।
ଆସନ୍ତାକାଲି ମାଘସପ୍ତମୀ । ଚନ୍ଦ୍ରଭାଗା ବୁଡ ପାଇଁ ଚଳଚଞ୍ଚଳ କୋଣାର୍କ । କାଲି ପ୍ରତ୍ୟୁଷରୁ ପବିତ୍ର ଚନ୍ଦ୍ରଭାଗା ତୀର୍ଥରେ ବୁଡ ପକାଇବେ ହଜାର ହଜାର ଶ୍ରଦ୍ଧାଳୁ । ଏଥିପାଇଁ ତିନି ଠାକୁରଙ୍କ ସେବକ ମାନଙ୍କ ଉପସ୍ଥିତିରେ ସରିଛି ନୀତି ନିର୍ଘଣ୍ଟ । ଆଜି ରାତ୍ରିରେ ତିନି ଠାକୁର ବିମାନରେ ବିଜେ କରି ରାତ୍ର ଏକ ଘଟିକରେ କୋଣାର୍କ ଏନଏସି ଭୋଗ ମଣ୍ଡପରେ ଭୋଗ ଖାଇବେ । ପରେ ପାରମ୍ପାରିକ ଶୋଭାଯାତ୍ରାରେ ତିନି ଠାକୁର ଚନ୍ଦ୍ରଭାଗା ଗସ୍ତ କରି ରାତ୍ର ୪ ଟା ମଧ୍ୟରେ ଚନ୍ଦ୍ରଭାଗା ତୀର୍ଥ ମଣ୍ଡପରେ ପହଞ୍ଚିବା ପରେ ୪ ଟା ୪୧ ମିନିଟରେ ତିନି ଠାକୁରଙ୍କ ମହାସ୍ନାନ ଓ ନୀତିକାନ୍ତି ସମାପନ ହେବ । ପରେ ସମସ୍ତ ସାଧୁସନ୍ଥ ଓ ଭକ୍ତ ମାନେ ବୁଡ ପକାଇବେ । ପ୍ରତିବର୍ଷ ପରି ଚଳିତ ବର୍ଷ ବୁଡକୁ ଶୃଙ୍ଖଳିତ କରିବା ପାଇଁ ତୀର୍ଥ ପୁଷ୍କରଣୀ ଖନନ ହୋଇଛି । କୋଣାର୍କ ଏନଏସି ପକ୍ଷରୁ ତୀର୍ଥ ଜଳର ବିଶୋଧନ ପାଇଁ ବ୍ଲିଚିଂ ପକାଇବା କାର୍ଯ୍ୟ ଶେଷ ହୋଇଛି । ମାଘ ବୁଡ଼ ପାଇଁ ସମସ୍ତ ପ୍ରସ୍ତୁତି ଶେଷ ପର୍ଯ୍ୟାୟରେ ଥିବା ବେଳେ ପୁରୀ ଜିଲ୍ଲାପାଳ ମେଳା ପଡ଼ିଆ ଓ ତୀର୍ଥ ପୁଷ୍କରଣୀର ସ୍ଥିତି ସମୀକ୍ଷା କରିଛନ୍ତି ।
ପୌରାଣିକ ମତରେ ଏହି ଦିନରେ ସୂର୍ଯ୍ଯ ଭଗବାନ ଜନ୍ମଗ୍ରହଣ କରିଥିଲେ । ଏହି ଦିନରେ କୃଷ୍ଣଙ୍କ ପୁତ୍ର ଶାମ୍ବ ଚନ୍ଦ୍ରଭାଗା ନଦୀ ତଟରେ ତପସ୍ୟା କରି ଶାପ ଜନିତ ରୋଗରୁ ମୁକ୍ତି ହୋଇଥିଲେ । ତେଣୁ ଶ୍ରଦ୍ଧାଳୁ ମାନେ ନିଜ ପରିବାରକୁ ରୋଗ ମୁକ୍ତ ରଖିବା ପାଇଁ ଚନ୍ଦ୍ରଭାଗା ତୀର୍ଥରେ ବୁଡ ପକାଇ ସୂର୍ଯ୍ଯଦୋୟ ଦର୍ଶନ କରିଥାନ୍ତି । ସେପଟେ ପୁରୀ ଜିଲ୍ଲା ଅସ୍ତରଙ୍ଗ ଉଦୟ ମଠ ପରିସରରେ ଆଧାତ୍ମିକ ପରିବେଶ। ଗୋଟିଏ ସ୍ଥାନରେ ଶ୍ରୀଜୀଉଙ୍କର ୧୦ପ୍ରକାର ବେଶ । ମହାପ୍ରଭୁଙ୍କ ବେଶ ଦର୍ଶନ କରି କୃତାର୍ଥ ଶ୍ରଦ୍ଧାଳୁ ।