ନନ୍ଦିଘୋଷ ବ୍ୟୁରୋ: ଖଣି ବିଭାଗ କର୍ମଚାରୀଙ୍କ ଠାରୁ ଛଡାଇ ନେଲେ ତିନି ଟ୍ରକ। ଗାଡି ଜାଳିଦେବାକୁ ଧମକ ଦେଲେ ପଥର ମାଫିଆ ଓ ଟ୍ରକ ମାଲିକ l ବାଲେଶ୍ଵର ସୋର ଅଂଚଳରେ ବଢିଚାଲିଛି ପଥର ମାଫିଆ ଓ ଟ୍ରକ ମାଲିକଙ୍କ ଦୌରାତ୍ମ୍ୟ ବଢ଼ି ଚାଲିଛି l ଖଣି ଅଧିକାରୀଙ୍କୁ ଧମକ ଦେଇ ଛଡାଇ ନେଲେ ତିନି ଟ୍ରକ l ଖଣି ଅଧିକାରୀଙ୍କ ଗାଡି ଜାଳିଦେବାକୁ ଧମକ ଦେଇଥିବା ଅଭିଯୋଗ ହୋଇଛି l ବାହାନଗା ଦାଣ୍ଡହରିପୁର ଗ୍ରାମରେ ତିନିଟି ଚୋରା ପଥର ଟ୍ରକ ଥିବା ଖବର ପାଇ ସୋର କନିଷ୍ଠ ଖଣି ଅଧିକାରୀ ଜଗନ୍ନାଥ ଦାସ ଘଟଣାସ୍ଥଳକୁ ଯାଇଥିଲେl ଖଣି ଅଧିକାରୀ ଘଟଣା ସ୍ଥଳରେ ପହଞ୍ଚିବା ପରେ ଗାଁର କିଛି ଯୁବକ, ଟ୍ରକ ମାଲିକ ଓ ପଥର ମାଫିଆ ମିଳିତ ଭାବେ ସୋର ଖଣି କନିଷ୍ଠ ଅଧିକାରୀ ଜଗନ୍ନାଥ ଦାସ, ସମ୍ବିତ କୁମାର ମଣୀ ଓ ଖଣି ବିଭାଗର ଡ୍ରାଇଭରଙ୍କୁ ଧମକ ଦେଇ ଗଣ୍ଡଗୋଳ କରିଥିଲେl ଗଣ୍ଡଗୋଳକାରୀମାନେ ଖଣି ବିଭାଗର ଗାଡିକୁ ପୋଡ଼ିଦେବାକୁ ଧମକ ଦେଇଥିଲେ l ଖଣି ବିଭାଗ ଅଧିକାରୀଙ୍କ ଠାରୁ ଗଣ୍ଡଗୋଳକାରି ତିନୋଟି ବେଆଇନ ପଥର ବୋଝେଇ ଟ୍ରକକୁ ଛଡାଇ ନେଇଥିଲେ l ଘଟଣାକୁ ନେଇ ଖଣି ବିଭାଗ ପକ୍ଷରୁ ସୋର ଥାନାରେ ଅଭିଯୋଗ କରାଯାଇଛି l ସେଠାରୁ ଖଣି ଅଧିକାରୀ ଖଞ୍ଜାମାହଲ ଖାଦାନକୁ ଯାଇ ୫୬ ଖାଦାନରୁ ପାଣି ଶୁଖାଉଥିବା ଏକ ଟ୍ରାକ୍ଟରକୁ ଜବତ କରିଥିଲେl
ବାଲେଶ୍ଵର ଜିଲ୍ଲା ମୁଖ୍ୟ ଚିକିତ୍ସାଳୟରେ ଅଗ୍ନିକାଣ୍ଡ
ନନ୍ଦିଘୋଷ ବ୍ୟୁରୋ: ବାଲେଶ୍ଵର ଜିଲ୍ଲା ମୁଖ୍ୟ ଚିକିତ୍ସାଳୟରେ ଅଗ୍ନିକାଣ୍ଡ । ହସ୍ପିଟାଲର ହାଉସ କିପିଂ ରୁମରେ ନିଆଁ । ବାଲେଶ୍ଵର ଅଗ୍ନିଶମ ବିଭାଗ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛି । ରୁମ ଭିତରେ ଫିନାଇଲ, କପଡ଼ା, ହସ୍ପିଟାଲରେ ବ୍ୟବହୃତ ସାମଗ୍ରୀ ଷ୍ଟକ୍ ରହିଥିଲା । ତେବେ ସକାଳୁ ରୁମ ଭିତରୁ ଧୁଆଁ ବାହାରୁଥିବା ଦେଖି ସ୍ଥାନୀୟ ଲୋକେ ହସ୍ପିଟାଲ କର୍ତ୍ତୃପକ୍ଷଙ୍କୁ ଜଣାଇଥିଲେ । ତେବେ ସଟସର୍କିଟରୁ ନିଆଁ ଲାଗିଥିବା ଅନୁମାନ କରାଯାଉଛି । ନିଆଁରେ କୌଣସି ବଡ଼ କ୍ଷୟକ୍ଷତି ହୋଇନଥିବା ଜଣାପଡିଛି ।
ରାଜ୍ୟରେ ଚାକିରି ଆଶାୟୀଙ୍କ ପରୀକ୍ଷା ଅବ୍ୟବସ୍ଥା ନେଇ ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ନିନ୍ଦା
ନନ୍ଦିଘୋଷ ବ୍ୟୁରୋ: ରାଜ୍ୟରେ ଚାକିରି ଆଶାୟୀଙ୍କ ପରୀକ୍ଷା ଅବ୍ୟବସ୍ଥା ନେଇ ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ନିନ୍ଦା। କହିଛନ୍ତି, ପରୀକ୍ଷା ବାତିଲ ପରେ ବାତିଲ ହେବା ଲକ୍ଷ ଲକ୍ଷ ପିଲାଙ୍କ ସ୍ବପ୍ନକୁ ଧୂଳିସାତ କରୁଛି। ଏଏନଏମ ପରୀକ୍ଷା ବାତିଲ କରି ରାଜ୍ୟ ବିଜେପି ସରକାର ପୁଣି ହଜାର ହଜାର ଆଶାୟୀଙ୍କ ଭବିଷ୍ୟତ ଅନ୍ଧାରକୁ ଠେଲି ଦେଇଛନ୍ତି। ପିଲାଙ୍କ ସ୍ବପ୍ନ କେତେ ଆଉ ଭାଙ୍ଗିବ, କେତେ ଆଉ ପିଲାଙ୍କ ଭବିଷ୍ୟତ ସହ ଖେଳାଯିବ ପୋଲି ପ୍ରଶ୍ନ କରିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ। ପରୀକ୍ଷା ପରେ ପରୀକ୍ଷା ବାତିଲ ହେବା ସହ ସ୍ଥଗିତ ହେବା ବିଜେପି ସରକାରର ଅପାରଗତାକୁ ଦର୍ଶାଉଛି।୧୮ ମାସର ସରକାରରେ ପାଖାପାଖି ୧୮ଟି ନିଯୁକ୍ତି ପରୀକ୍ଷା ବାତିଲ ହେଲାଣି। ସରକାର କ’ଣ ଦର୍ଶାଇବାକୁ ଚାହୁଁଛନ୍ତି। ରାଜ୍ୟର ପିଲାମାନଙ୍କ ଆଶା, ସ୍ବପ୍ନ ଏପରି ଧୂଳିସାତ ହେଉଥିବ କି ବୋଲି ପଚାରିଛନ୍ତି ନବୀନ। ସରକାର ସଜାଗ ହୁଅନ୍ତୁ ସମସ୍ତ ପରୀକ୍ଷା ଯେପରି ନିୟମିତ ଏବଂ ସ୍ବଚ୍ଛତାର ସହ ହେବ ତାହା ସୁନିଶ୍ଚିତ କରନ୍ତୁ ବୋଲି କହିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ
ଲୁଟିନେଲେ ୨୦ ଲକ୍ଷ ଟଙ୍କାର ସୁନା ଅଳଙ୍କାର
ନନ୍ଦିଘୋଷ ବ୍ୟୁରୋ: ବାଲେଶ୍ଵର ଜିଲ୍ଲା ନୀଳଗିରି ଥାନା ଅଞ୍ଚଳରେ ଦୁର୍ବୃତ୍ତଙ୍କ ଆତଙ୍କରାଜ । ଲୁଟିନେଲେ ୨୦ ଲକ୍ଷ ଟଙ୍କାର ସୁନା ଅଳଙ୍କାର । କାଂଶ ଗ୍ରାମର ପ୍ରଶାନ୍ତ ମହାନ୍ତିଙ୍କ ଘରୁ ହୋଇଛି ବଡ ଧରଣର ଲୁଟ୍ । ୪ ଟି ସୁନା ହାର ,୧୪ ଟି ମୁଦି, ୮ଶହ ଗ୍ରାମ ରୂପା ଓ ଅନ୍ୟାନ୍ୟ ଅଳଙ୍କାର ଲୁଟି ଲୁଟେରା ଚମ୍ପଟ ମାରିଛନ୍ତି । ସିସିଟିଭିରେ କଏଦ ହୋଇଛି ଲୁଟ ବେଳର ଦୃଶ୍ୟ । ପ୍ରଶାନ୍ତ ମହାନ୍ତିଙ୍କ ପରିବାର ଲୋକେ ଯାତ୍ରା ଦେଖିବାକୁ ଯାଇଥିବା ବେଳେ ଦୁର୍ବୃତ୍ତ ଘରେ କଳାକନା ବୁଲାଇ ଦେଇଛନ୍ତି । ଥାନାରେ ପରିବାର ପକ୍ଷରୁ ଅଭିଯୋଗ ପରେ ପୋଲିସ ତଦନ୍ତ ଆରମ୍ଭ କରିଛି ।
ହାତୀ ଆକ୍ରମଣରେ ଯୁବକ ମୃତ
ନନ୍ଦିଘୋଷ ବ୍ୟୁରୋ: ମୟୂରଭଞ୍ଜ ଜିଲ୍ଲା କରଞ୍ଜିଆରେ ହାତୀ ଆକ୍ରମଣରେ ଯୁବକ ମୃତ । ମୃତକ ଜାମଦାପାଳ ଗାଁର ଜୁନା ନାଏକ l ଗତକାଲି ସନ୍ଧ୍ୟାରେ ସମୟରେ ପାର୍ବତୀପୁର ଆମ୍ବ ବାଗାନରେ ୨୮ ଟିକିଆ ହାତୀ ହାବୁଡରେ ପଡି ଯାଇଥିଲେ ଜୁନା । ତାଙ୍କୁ ହାତୀ ଆକ୍ରମଣ କରିଥିଲା । ଆହତ ଜୁନାଙ୍କୁ ବନବିଭାଗ ଉଦ୍ଧାର କରି ପ୍ରଥମେ ଶୁକୃଳି ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲା । ପରେ ସ୍ଵାସ୍ଥ୍ୟବସ୍ଥା ଅଧିକ ବିଗିଡିଯିବାରୁ ତାଙ୍କୁ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସେଠାରେ ଚିକିତ୍ସାଧିନ ଅବସ୍ଥାରେ ଯୁବକଙ୍କ ମୃତ୍ୟୁ ଘଟିଛି ।
ସାରା ରାଜ୍ୟରେ ଜାରି ରହିଛି ଶୀତର ପ୍ରକୋପ
ନନ୍ଦିଘୋଷ ବ୍ୟୁରୋ : ସାରା ରାଜ୍ୟରେ ଶୀତର ପ୍ରକୋପ ଦେଖିବାକୁ ମିଳୁଥିବା ବେଳେ ଗଜପତି ଜିଲ୍ଲା ମୋହନାରେ ଭୀଷଣ ଶୀତ । ପାରଦ ୧୧ ଡିଗ୍ରୀ ତଳକୁ ଖସିଥିବା ବେଳେ ଘନକୁହୁଡି ଲାଗି ରହୁଛି । ସକାଳ ୮ ଟାରୁ ୯ଟା ପର୍ଯ୍ୟନ୍ତ କୁହୁଡିରେ ଘୋଡେଇ ହୋଇ ରହୁଛି ରାସ୍ତାଘାଟ । ଶୀତ ଦାଉରୁ ରକ୍ଷା ପାଇବା ପାଇଁ ଶୀତ ଵସ୍ତ୍ର ପରିଧାନ କରିବା ସହ ଲୋକେ ନିଆଁ ପୁଉଁଥିବା ଦେଖିବାକୁ ମିଳୁଛି ।
ରାୟଗଡା ଜିଲ୍ଲା ଗୁଣୁପୁରରେ ଭୀଷଣ ଶୀତ ସହ ଘନକୁହୁଡି । କୁହୁଡି ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇପଡୁଛି । ରାସ୍ତା ଘାଟରେ ଗାଡି ଚଳାଚଳ ବାଧାପ୍ରାପ୍ତ ହେଉଛି । ରାସ୍ତା ଗାଡି ଗୁଡିକ ହେଡଲାଇଟ ଲଗାଇ ଚଳାଚଳ କରୁଥିବା ଦେଖିବାକୁ ମିଳୁଛି । ଅନ୍ୟପଟେ ଶୀତୁଆ ସକାଳରେ କୁହୁଡିର ମଜା ଉଠାଇବା ସହ ଉପଭୋଗ କରୁଛନ୍ତି ଯୁବପିଢି । ନିଜକୁ ସୁସ୍ଥ ରଖିବା ପାଇଁ ଗୁଣୁପୁର ମିନିଷ୍ଟାଡିୟମ, ଶେଫାଳୀ ପାହାଡ ରାସ୍ତା, ବାଇପାସ ରୋଡ ପାର୍ଶ୍ବରେ ବ୍ୟାୟାମ କରୁଥିବା ନଜିର ରହୁଛି ।
ଆଜି ଜନ୍ମଦିନରେ ଏହି ଖେଳାଳିଙ୍କୁ ଦଳରେ ମିଳିନପାରେ ସୁଯୋଗ
ନନ୍ଦିଘୋଷ ବ୍ୟୁରୋ: ଆଜି ଭାରତ-ଦକ୍ଷିଣ ଆଫ୍ରିକା ମଧ୍ୟରେ ଖେଳାଯିବ ତୃତୀୟ ଦିନିକିଆ । ବିଶାଖାପାଟଣାମରେ ଖେଳାଯିବାକୁ ଥିବା ତୃତୀୟ ଦିନିକିଆ ବେଶ ଗୁରୁତ୍ବପୂର୍ଣ୍ଣ ରହିଛି । ୩ ମ୍ୟାଚ ବିଶିଷ୍ଟ ଏହି ଦିନିକିଆ ସିରିଜ ଏବେ ୧-୧ ରହିଛି । ଶେଷ ମ୍ୟାଚ ଯିଏ ଜିତିବ ସିରିଜ ବିଜୟୀ ହେବ । ଦ୍ବିତୀୟ ଦିନିକିଆରେ ଭାରତ ଭଲ ବ୍ୟାଟିଂ କରିଥିଲା ମାତ୍ର ବୋଲିଂ ପାଇଁ ପରାଜୟ ବରଣ କରିଥିଲା । ତେବେ ଆଜିର ମ୍ୟାଚରେ କାହାକୁ ଦଳରେ ସୁଯୋଗ ମିଳିବ ଏହାକୁ ନେଇ ଚର୍ଚ୍ଚା ଆରମ୍ଭ ହୋଇଛି । ତେବେ ଆଜି ମ୍ୟାଚ ଯେତିକି ଗୁରୁତ୍ବପୂର୍ଣ୍ଣ ଟିମ ଇଣ୍ଡିଆ ପାଇଁ ମଧ୍ୟ ସେତିକି ଗୁରୁତ୍ବପୂର୍ଣ୍ଣ । ଆଜି ଟିମ ଇଣ୍ଡିଆର ଅଭିଜ୍ଞ ଅଲରାଉଣ୍ଡର ରବିନ୍ଦ୍ର ଜାଡେଜାଙ୍କ ଜନ୍ମଦିନ । ତେବେ ତାଙ୍କ ଆଜି ଦଳରେ ସ୍ଥାନ ନମିଳିପାରେ ବୋଲି ଚର୍ଚ୍ଚା ହେଉଛି । ପ୍ରଥମ ଦୁଇ ମ୍ୟାଚରେ ଗୋଟିଏ ବି ଓ୍ବିକେଟ ଅକ୍ତିଆର କରିନଥିବା ଜାଡେଜା ବ୍ୟାଟିଂରେ ମଧ୍ୟ କୌଣସି ଭଲ ପ୍ରଦର୍ଶନ କରିନଥିଲେ । ତେବେ ଜନ୍ମଦିନକୁ ବେଶ ଧୁମଧାମରେ ପାଳନ କରାଯିବା ସହ ମ୍ୟାଚକୁ ଜିତି ସିରିଜ ଜିତିବା ପାଇଁ ଚେଷ୍ଟା କରିବ ଭାରତ ।
ଦୁଇ ଦିନିଆ ଗସ୍ତ ସାରି ଫେରିଲେ ରାଷ୍ଟ୍ରପତି ପୁଟିନ, ଜାଣନ୍ତୁ କଣ ଉପହାର ଦେଲେ ମୋଦି
ସରିଲା ରୁଷ ରାଷ୍ଟ୍ରପତି ବ୍ଲାଦିମିର ପୁଟିନଙ୍କ ଭାରତ ଗସ୍ତ। ଦୁଇ ଦିନିଆ ଗସ୍ତ ସାରି ଦିଲ୍ଲୀରୁ ମସ୍କୋ ଫେରିଗଲେ ରାଷ୍ଟ୍ରପତି ପୁଟିନ। ଦିଲ୍ଲୀରେ ରାଷ୍ଟ୍ରପତି ଭବନରେ ରାତ୍ରୀ ନୈଶ ଭୋଜି ପରେ ରୁଷ ଫେରି ଯାଇଛନ୍ତି ରାଷ୍ଟ୍ରପତି ପୁଟିନ। ଦିଲ୍ଲୀ ପାଲମ ଏୟାରପୋର୍ଟରେ ପୁଟିନଙ୍କୁ ବିଦାୟକାଳୀନ ସମ୍ବର୍ଦ୍ଧନା ଦେଇଥିଲେ ବୈଦେଶିକ ମନ୍ତ୍ରୀ ଏସ ଜୟଶଙ୍କର। ପୁଟିନଙ୍କ ଭାରତ ଗସ୍ତ କାଳରେ ୧୯ଟି ଚୁକ୍ତି ସ୍ଵାକ୍ଷରିତ ହୋଇଛି। ସ୍ଵାକ୍ଷରିତ ହୋଇଛି ଅନେକ ବଡ଼ ଡିଲ୍। ପ୍ରତିରକ୍ଷା, ଶିକ୍ଷା, ସ୍ଵାସ୍ଥ୍ୟ, ବାଣିଜ୍ୟ ଓ ପର୍ଯ୍ୟଟନ କ୍ଷେତ୍ରରେ ସହଭାଗିତା ନେଇ ସହମତ ହୋଇଛନ୍ତି ଦୁଇ ଦେଶ। ୨୦୩୦ ପର୍ଯ୍ୟନ୍ତ ଦୁଇ ଦେଶ ମଧ୍ୟରେ ଜାରି ରହିବ ଆର୍ଥିକ ସହଯୋଗ।
ଭାରତର ଆତଙ୍କବାଦ ବିରୋଧୀ ଲଢେଇକୁ ସମର୍ଥନ ଜଣାଇଥିଲେ ରାଷ୍ଟ୍ରପତି ପୁଟିନ। ଭାରତ-ରୁଷ ମଧ୍ୟରେ ଦୀର୍ଘ ୮ ଦଶନ୍ଧିର ବନ୍ଧୁତା ଧ୍ରୁବ ତାରା ସଦୃଶ ସ୍ଥିର ରହିଛି କହିଥିଲେ ପିଏମ ମୋଦି। ଏହି ଅବସରରେ ପିଏମ ମୋଦିଙ୍କୁ ରୁଷରେ ହେବାକୁ ଥିବା ଶିଖର ସମ୍ମିଳନୀ ଲାଗି ଆମନ୍ତ୍ରଣ କରିଛନ୍ତି ପୁଟିନ। ଗତକାଲି ରାଷ୍ଟ୍ରପତି ଭବନରେ ପୁଟିନଙ୍କୁ ଭବ୍ୟ ସ୍ଵାଗତ କରାଯାଇଥିଲା। ରୁଷ ରାଷ୍ଟ୍ରପତିଙ୍କୁ ନିଜେ ସ୍ଵାଗତ କରିଥିଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ରାଷ୍ଟ୍ରପତି ଭବନରେ ଗାର୍ଡ ଅଫ ଅନର ପ୍ରଦାନ କରାଯାଇଥିଲା। ସେଠାରେ ପୁଟିନଙ୍କ ପାଇଁ ଦିଆଯାଇଥିଲା ୨୧ ତୋପ ସଲାମୀ।
ହାଇଦ୍ରାବାଦ ହାଉସରେ ଆୟୋଜିତ ୨୩ତମ ଭାରତ-ରୁଷ ଶିଖର ସମ୍ମିଳନୀରେ ଯୋଗ ଦେଇଥିଲେ ରୁଷ ରାଷ୍ଟ୍ରପତି ପୁଟିନ। ଅପରାହ୍ନରେ ଭାରତ-ରୁଷ ବିଜନେସ ଫୋରମକୁ ସମ୍ବୋଧିତ କରିଥିଲେ ଉଭୟ ରାଷ୍ଟ୍ରମୁଖ୍ୟ। ଏହି ଅବସରରେ ଯୋଗ ଦେଇଥିଲେ ଦେଶ ତଥା ବିଦେଶର ବିଶିଷ୍ଟ ଶିଳ୍ପପତି ଓ ଉଦ୍ୟୋଗୀ।ସଂଧ୍ୟାରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ରୁଷ ରାଷ୍ଟ୍ରପତି ବ୍ଲାଦିମିର ପୁଟିନଙ୍କ ଉଦ୍ଦେଶ୍ୟରେ ରାତ୍ରି ନୈଶ ଭୋଜି କାର୍ଯ୍ୟକ୍ରମ ଆୟୋଜନ କରିଥିଲେ।
କଣ ଉପହାର ଦେଲେ ପ୍ରଧାନମନ୍ତ୍ରୀ
ଭାରତ ଗସ୍ତ ଅବସରରେ ରୁଷ ରାଷ୍ଟ୍ରପତିଙ୍କୁ ଉପହାର ପ୍ରଦାନ। ପ୍ରଧାନମନ୍ତ୍ରୀ ମୋଦି ରାଷ୍ଟ୍ରପତି ପୁଟିନଙ୍କୁ ବିଭିନ୍ନ ପ୍ରକାରର ଉପହାର ପ୍ରଦାନ କରିଛନ୍ତି। ଏହି ଉପହାର ମଧ୍ୟରେ ରହିଛି। ଆସାମର କଳା ଚା ବା ବ୍ଲାକ୍ ଟି। ବ୍ରହ୍ମପୁତ୍ରର ଉର୍ବର ସମତଳ ଭୂମିରେ ଚାଷ କରାଯାଉଥିବା ଆସାମର ଏହି କଳା ଏହାର ସ୍ୱାଦ ପାଇଁ ଜଣାଶୁଣା। 2007 ମସିହାରେ ଏହି ଚାହାକୁ GI ଟ୍ୟାଗ୍ ମିଳିଥଲା। ଅନ୍ୟ ଏକ ଉପହାର ମଧ୍ୟରେ ରହିଛି ରୂପା ଚା ସେଟ୍। ଅତି ସୂକ୍ଷ୍ମ କାରୁକାର୍ଯ୍ୟରେ ଖୋଦିତ ମୁର୍ଶିଦାବାଦର ରୂପା ଚା ସେଟ୍ ପଶ୍ଚିମବଙ୍ଗର ସମୃଦ୍ଧ କଳାକୃତିର ନିଦର୍ଶନ। ଭାରତ ଏବଂ ଋଷ ମଧ୍ୟରେ ଚା’ର ଗଭୀର ସାଂସ୍କୃତିକ ଗୁରୁତ୍ୱକୁ ଏହା ପ୍ରତିଫଳିତ କରୁଛି। ଆଉ ଏହ ଉପହାର ହେଉଛି ରୂପାରେ ନର୍ମତ ଘୋଡା। ମହାରାଷ୍ଟ୍ରର ଏହି ହାତନିର୍ମିତ ରୂପା ଘୋଡାରେ ସୁନ୍ଦର କାରୁକାର୍ଯ୍ୟ ରହିଛି।
ଏହା ଭାରତର ଧାତୁ ହସ୍ତଶିଳ୍ପ ପରମ୍ପରାର ଉତ୍କର୍ଷତାକୁ ପ୍ରଦର୍ଶନ କରୁଛି। ଭାରତ ଏବଂ ରୁଷ ସଂସ୍କୃତିରେ ମର୍ଯ୍ୟାଦା ଏବଂ ବୀରତ୍ୱର ପ୍ରତୀକ ଏହି ଘୋଡ଼ା। ଅନ୍ୟ ଏକ ଉପହାର ମଧ୍ୟରେ ରହିଛି ମାର୍ବଲ୍ ଚେସ୍ ସେଟ୍। ଆଗ୍ରାର ଏହି ହାତନିର୍ମିତ ମାର୍ବଲ୍ ଚେସ୍ ସେଟ୍ ଉତ୍କୃଷ୍ଟ କାରିଗରୀ ଏବଂ ସୌନ୍ଦର୍ଯ୍ୟର ମିଶ୍ରଣ। ଯାହା ଏହି ଅଞ୍ଚଳର ପଥର ଜଡ଼ିତ ଐତିହ୍ୟକୁ ବର୍ଣ୍ଣନା କରୁଛି। ଏହି ସେଟ୍ ଉତ୍ତର ଭାରତୀୟ କଳାକୃତିକୁ ଦର୍ଶାଉଛି। ମାର୍ବଲ, କାଠ ଏବଂ ମୂଲ୍ୟବାନ ପଥରର ମିଶ୍ରଣ ଏହା ନିର୍ମିତ ହୋଇଛି। ଆଉ ଏକ ଉପହାର ହେଲା କାଶ୍ମୀର କେସର। ଯାହାକୁ ସ୍ଥାନୀୟ ଭାବେ କଙ୍ଗ୍ କିମ୍ବା ଜାଫ୍ରାନ୍ ଭାବରେ ଜଣାଶୁଣା। କାଶ୍ମୀରର ପାର୍ବତ୍ୟାଞ୍ଚଳରେ ଚାଷ କରାଯାଏ ଏହି କେଶର। ଏହାର ରଙ୍ଗ, ସୁଗନ୍ଧ ଏବଂ ସ୍ୱାଦ ପାଇଁ ଜଣାଶୁଣା। ଏହାସହ ପୁଟିନଙ୍କୁ ରୁଷୀୟ ଭାଷାରେ ଲିଖିତ ଏକ ଶ୍ରୀମଦ୍ ଭାଗବତ ଗୀତା ଉପହାର ଦେଇଛନ୍ତି ପ୍ରଧାନମନ୍ତ୍ରୀ।
SI ମହାକେଳେଙ୍କାରୀ ମାମଲା ; ଓଡିଶାରୁ ବିହାର ଯାଏଁ ଲମ୍ବିଛି ଠକେଇ ସିଣ୍ଡିକେଟ ର ଚେର
ନନ୍ଦିଘୋଷ ବ୍ୟୁରୋ : ଏସଆଇ ମହାକେଳେଙ୍କାରୀ ମାମଲାରେ CBIର ପ୍ରଥମ ଗିରଫଦାରୀ ପରେ ପାୱାର କରିଡରରେ କୋକୁଆ ଭୟ । ଦୀଘା ମଡ୍ୟୁଲ ସମ୍ଭାଳୁଥିବା ବିରଞ୍ଚି ନାରାୟଣ ନାୟକ ଗିରଫ । ସେପଟେ ଖୁବଶୀଘ୍ର ରିମାଣ୍ଡରେ ଆସିବେ ଶଙ୍କର ପୃଷ୍ଟି ଓ ମୁନା ମହାନ୍ତି । ବିହାରରେ ଖୁବଶୀଘ୍ର ଚଢ଼ାଉ କରିବ ସିବିଆଇର ସ୍ପେଶାଲ ଟିମ ।
ଏସଆଇ ମହାକେଳେଙ୍କାରୀ । ସିବିଆଇ ପଞ୍ଝାରେ ବିରଞ୍ଚି ନାରାୟଣ । ଜେରା ବେଳେ ମିଳିଲା ସାଙ୍ଘାତିକ ତଥ୍ୟ । ଓଡିଶାରୁ ବିହାର ଯାଏଁ ଲମ୍ବିଛି ଠକେଇ ସିଣ୍ଡିକେଟ ର ଚେର । ବିରଞ୍ଚି ଗିରଫ ପରେ ବଡବଡ଼ିଆଙ୍କ ମନରେ ଛନକା । ଇଏ ହେଉଛନ୍ତି ବିରଞ୍ଚି ନାରାୟଣ ନାୟକ । ପାରଳାଖେମୁଣ୍ଡିରୁ ବାବୁ ଜଣଙ୍କୁ ଆଜି ଉଠାଇ ଆଣି ଜେରା କରିବା ପରେ ଗିରଫ ବୋଲି ଦର୍ଶାଇଛି ସିବିଆଇ । ଏହାପରେ କୋର୍ଟଚାଲାଣ କରାଯାଇଛି । ପୂର୍ବରୁ ଏସଆଇ ମହାକେଳେଙ୍କାରୀ ମାମଲାରେ ୧୨ ଦଲାଲଙ୍କୁ କ୍ରାଇମବ୍ରାଞ୍ଚ ଗିରଫ କରିଥିଲା । ସପ୍ତାହେ ତଳେ ରିମାଣ୍ଡରେ ଆସିଥିବା ୪ ଦଲାଲ ଲୋକନାଥ ସାହୁ, ତଫିମ ଅହମ୍ମଦ ଖାଁ, ବିଶ୍ୱଜିତ ହରିଚନ୍ଦନ ଓ ବିଶ୍ୱରଞ୍ଜନ ସେନାପତିଙ୍କ ଠାରୁ ବିରଞ୍ଚିଙ୍କ ସମ୍ପର୍କରେ ସୂଚନା ପାଇଥିଲା ସିବିଆଇ । ଅଭିଯୁକ୍ତ ଜଣଙ୍କ ମୋଟା ଅଙ୍କର କମିଶନ ନେଇ ଦୀଘା ମଡ୍ୟୁଲ ସମ୍ଭାଳୁଥିଲା । ତାକୁ ଖୁବଶୀଘ୍ର ରିମାଣ୍ଡରେ ଆଣି ସିଣ୍ଡିକେଟ ପଛର ମାଷ୍ଟରମାଇଣ୍ଡ ନେଇ ଖୋଳତାଡ଼ କରିପାରେ ସିବିଆଇ ।
ଦୁଇଦିନ ତଳେ ସିଲିକନ ଟେକ ସଂସ୍ଥାକୁ କଳା ତାଲିକାଭୁକ୍ତ କରିଥିଲେ ରାଜ୍ୟ ସରକାର । ପୂର୍ବରୁ ସଂସ୍ଥା ମୁଖ୍ୟ ସୁରେଶ ନାୟକଙ୍କୁ ଗିରଫ କରାଯାଇଥିଲା । କିଛି ଆଶାୟୀଙ୍କୁ ମଧ୍ୟ ଜେରା କରାଯାଇଥିଲା । ଅନ୍ୟପଟେ ଜେରା ବେଳେ ୪ ପୋଲିସ ବାବୁଙ୍କ ସମ୍ପୃକ୍ତି ଏବେ ସନ୍ଦେହ ଘେରକୁ ଆସିଛି । ପୁରା ନେଟୱର୍କର ମାଷ୍ଟରମାଇଣ୍ଡ ବିହାରରେ ଥିବା ଜାଣିବା ପରେ ଖୁବଶୀଘ୍ର ଦିଲ୍ଲୀ ଗସ୍ତ କରିବ ସିବିଆଇ । ସେପଟେ ଶଙ୍କର ପୃଷ୍ଟି ଓ ଦଲାଲ ମୁନା ମହାନ୍ତି ରିମାଣ୍ଡରେ ଆସିବା ପରେ ଠକେଇ ଟଙ୍କାରେ ବାଲିଘାଟ ନିଲାମ, ବେନାମୀ ପ୍ଲଟ କିଣା , ପଥର ଖାଦାନ ନେଇ ସିବିଆଇ କରିପାରେ ବଡ଼ ଖୁଲାସା ।
ପୋଲିସ ଚାକିରୀ ପାଇଁ ମୋଟା ଅଙ୍କର ଟଙ୍କା ନେଇ ଟିଙ୍କ ବନିଥିଲେ ଦଲାଲ । ପ୍ରଚ୍ଛଦପଟରେ ରହି ବ୍ୟାକ୍ ସପୋର୍ଟ ଦେଉଥିଲେ ବଡବଡ଼ିଆ । ସିବିଆଇ ର ଆଜି ପ୍ରଥମ ଗିରଫଦାରୀ ପରେ ଏବେ ହେଭିୱେଟଙ୍କ ଭିତରେ ପଶିଛି ଛନକା ।