ଛାତ୍ରନେତାଙ୍କ ଫେକ୍ ଆଇଡି କରି ସୋସିଆଲ ମିଡିଆରେ ଅଡିଓ ଭାଇରାଲ ଘଟଣା । ଗିରଫ ହେଲା ଅଭିଯୁକ୍ତ ଚଣ୍ଡୀ ପ୍ରସାଦ ମହାପାତ୍ର ଓରଫ ପପି। ଅଭିଯୁକ୍ତର ଘର ବାରଙ୍ଗ ଥାନା ଅନ୍ତର୍ଗତ ନରାଜ। ଅଭିଯୋଗ ମୁତାବକ ପୂର୍ବ ଶତ୍ରୁତାକୁ କେନ୍ଦ୍ରକରି ଅଭିଯୋଗକାରୀ ଛାତ୍ରନେତା ଜଣଙ୍କୁ ଆଶ୍ରାବ୍ୟ ଭାଷାରେ ଗାଳିଗୁଲଜ କରିବା ସହ ତାଙ୍କର ଚରିତ୍ର ସଂହାର କରିଥିଲା। ସୋସିଆସ ମିଡିଆରେ ଫେକ ଆକାଉଣ୍ଟ ଖୋଲିବା ସହ କିଛି ମିଛ ଅଡିଓ ଏଡିଟ କରି ଭାଇରାଲ କରିବାକୁ ଚେଷ୍ଟା କରିଥିଲା। ଅଭିଯୋଗକାରୀଙ୍କ ସାମାଜିକ ପ୍ରତିଷ୍ଠା ନଷ୍ଟ ହେଉଥିବାରୁ ସେ ଏହାକୁ ନେଇ ଆଇନର ଆଶ୍ରୟ ନେଇଥିଲେ। ସାଇବର ଥାନାରେ ଏତଲା ଦେଇଥିଲେ ଓ ଖଣ୍ଡଗିରି ଥାନାର ଦ୍ୱାରସ୍ଥ ହୋଇଥିଲେ। ଅଭିଯୁକ୍ତ ଜଣଙ୍କୁ କଳିଙ୍ଗ ନଗର ଅଞ୍ଚଳରୁ ଗିରଫ କରାଯାଇଛି। ପୋଲିସ ତାଠାରୁ କ୍ରାଇମରେ ବ୍ୟବହୃତ ଡିଜିଟାଲ ଡିଭାଇସ ଜବତ କରିଛି। ଆଇଟି ଆକ୍ଟ ମୁତାବକ ଅଭିଯୁକ୍ତକୁ କୋର୍ଟଚାଲାଣ କରାଯାଇଛି।
ସରୁନି ସାର ସମସ୍ୟା: ସୋସାଇଟି ସାମ୍ନାରେ ପାଞ୍ଚ ଶହ ଚାଷୀଙ୍କ ଅହେତୁକ ଭିଡ଼
ସରୁନି ସାର ସମସ୍ୟା । ଗଞ୍ଜାମ ଜିଲ୍ଲା ଧରାକୋଟ ବ୍ଳକ ମାଣିକ୍ୟପୁର ସୋସାଇଟି ସାମ୍ନାରେ ଚାଷୀଙ୍କ ଅହେତୁକ ଭିଡ଼ ଦେଖିବାକୁ ମିଳିଛି । ତିନୋଟି ପଞ୍ଚାୟତର ପାଞ୍ଚ ଶହରୁ ଅଧିକ ଚାଷୀ ସକାଳୁ ଛିଡା ହୋଇଥିଲେ । ହେଲେ ଚାଷୀଙ୍କ ସଂଖ୍ୟା ତୁଳନାରେ ସୋସାଇଟିରେ କମ ସଂଖ୍ୟକ ପିଡ଼ିଆ ବସ୍ତା ଥିବାରୁ ଚାବି ପକାଇ ପଳାଇ ଯାଇଥିଲେ ଅଧିକାରୀ । ଶେଷରେ ଚାଷୀମାନେ ସୋସାଇଟି ଆଗରେ ଅପେକ୍ଷା କରି ରହିଥିଲେ । ଅନ୍ୟ କେତେକ ଚାଷୀ ନିରାଶ ହୋଇ ଘରକୁ ଫେରିଥିବା ଦେଖିବାକୁ ମିଳିଛି । ଏନେଇ ସୋସାଇଟି ସମ୍ମୁଖରେ ହୋ ହାଲ୍ଲା ପରିସ୍ଥିତି ଉପୁଜିଥିଲା ।
ଜଳପ୍ରପାତରେ ଭାସି ଯୁବକ ନିଖୋଜ ଘଟଣା: ଜାତୀୟ ରାଜପଥ ଅବରୋଧ କଲେ ପରିବାର ଲୋକେ
ଗୁଣ୍ଡିଚାଘାଗି ଜଳପ୍ରପାତରେ ଭାସି ଯୁବକ ନିଖୋଜ ଘଟଣା । ଜାତୀୟ ରାଜପଥ ଅବରୋଧ କଲେ ପରିବାର ଲୋକ । କେନ୍ଦୁଝର ଜିଲ୍ଲା ଘଟଗାଁ ଥାନା ଗୁଣ୍ଡିଚାଘାଗି ଜଳପ୍ରପାତରେ ବୁଡି ଜଣେ ଯୁବକ ନିଖୋଜ ହୋଇ ଯାଇଛନ୍ତି । ଯୁବକ ଜଣଙ୍କ ହେଲେ ବାଲେଶ୍ଵର ଜିଲ୍ଲା ସୋର ଥାନା ବର୍ତନା ଗ୍ରାମର ଦେବେଶ୍ ବେହେରା । ପରିବାର ଲୋକଙ୍କ ସହିତ ବୁଲିବାକୁ ଆସିଥିଲେ ଯୁବକ । ପ୍ରଥମେ ଘଟଗାଁ ମା’ ତାରିଣୀଙ୍କୁ ଦର୍ଶନ କରିବା ପରେ ଗୁଣ୍ଡିଚାଘାଗି ଜଳପ୍ରପାତକୁ ବୁଲିବାକୁ ଆସିଥିଲେ । ଜଳପ୍ରପାତରେ ବୁଲିବା ସମୟରେ ଏକ ସ୍ରୋତରେ ଭାସି ଯାଇଥିଲେ । ନିଖୋଜ ଯୁବକକୁ ଉଦ୍ଧାର କରିବା ପାଇଁ ଚାରିଦିନ ହେବ ଘଟଗାଁ ଅଗ୍ନିଶମ ବିଭାଗ ପ୍ରଚେଷ୍ଟା ଜାରି ରଖିଛି । ଏହି ଉଦ୍ଧାର କାର୍ଯ୍ୟରେ ଆଜି ଦେବଗଡ଼ର ଓଡ୍ରାଫ୍ ଟିମ୍ ସାମିଲ ହୋଇଛି । ପୁଅକୁ ଉଦ୍ଧାର କରିବା ପାଇଁ ପରିବାର ଲୋକ ପ୍ରଶାସନ ନିକଟରେ ଗୁହାରି କରିଛନ୍ତି । ଏହାସହ ଘଟଗାଁ ବାଇପାସ୍ ନିକଟ ୨୦ନଂ ଜାତୀୟ ରାଜପଥକୁ ଅବରୋଧ କରିଛନ୍ତି ନିଖୋଜ ଯୁବକଙ୍କ ପରିବାର ଲୋକ ।
ରାଜ୍ୟରେ ଉତ୍କଟ ହେବାରେ ଲାଗିଛି ସାର ସଙ୍କଟ: ମୁଖ୍ୟମନ୍ତ୍ରୀ ଡାକିଲେ ବୈଠକ
ରାଜ୍ୟରେ ଧୀରେ ଧୀରେ ଉତ୍କଟ ହେବାରେ ଲାଗିଛି ସାର ସଙ୍କଟ। ବିଭିନ୍ନ ଜିଲ୍ଲାରୁ ସାର ଅଭାବୀ ନେଇ ଆସୁଛି ସଙ୍ଗୀନ ଅଭିଯୋଗ। ଏହାକୁ ଗୁରୁତର ସହ ନେଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ଡ଼ାକିଛନ୍ତି ବଡ ବୈଠକ। ସାର ସଙ୍କଟରୁ କେମିତି ବାହାରି ହେବ ସେଥିପାଇଁ ବିଚାର ବିମର୍ଶ କରାଯିବ। ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଉପ ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ ଓ ଖାଦ୍ୟ ଖାଉଟି ଓ ଯୋଗାଣ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ରଙ୍କ ସମତେ ଅନ୍ୟ ମନ୍ତ୍ରୀ ଉପସ୍ଥିତ ରହିବାକୁ ଥିବାବେଳେ ମୁଖ୍ୟ ଶାସନ ସଚିବଙ୍କ ସହ ବରିଷ୍ଠ ଅଧିକାରୀ ବୈଠକରେ ହେବେ ସାମିଲ। ଭିସିରେ ବୈଠକରେ ସାମିଲ ହେବେ ଜିଲ୍ଲାପାଳ।
ନେପାଳରେ ଚାଲିଥିବା ହିଂସାର ପ୍ରଭାବରେ ଭାରତ-ନେପାଳ ସୀମା ସମ୍ପୂର୍ଣ୍ଣ ସିଲ୍
ନେପାଳରେ ଚାଲିଥିବା ହିଂସାର ପ୍ରଭାବ ଭାରତରେ ଭାରତ-ନେପାଳ ସୀମା ସମ୍ପୂର୍ଣ୍ଣ ସିଲ୍ । ଭାରତରୁ ନେପାଳକୁ ମୈତ୍ରୀ ବସ୍ ସେବା ମଧ୍ୟ ବନ୍ଦ । ପ୍ରବଳ ଉତ୍ତେଜନାକୁ ଦୃଷ୍ଟିରେ ରଖି ବଡ଼ ନିଷ୍ପତ୍ତି । ଗୁପ୍ତ ଭାବେ ବ୍ୟବହୃତ ପଥଗୁଡ଼ିକ ଉପରେ କଡ଼ା ନଜର । ହିଂସା ଯୋଗୁଁ ବ୍ୟବସାୟ ମଧ୍ୟ ସମ୍ପୂର୍ଣ୍ଣ ଠପ୍ । ଦୁଇ ଦେଶ ମଧ୍ୟରେ ବ୍ୟବସାୟ ବନ୍ଦ ରହିଛି । ଜେଲରୁ ପଳାୟନ କରୁଥିବା କଏଦୀଙ୍କ ଉପରେ ଫାୟାରିଂ ସୂଚନା । ନେପାଳ ସେନାର ଯବାନଙ୍କ ପକ୍ଷରୁ ଫାୟାରିଂ ସୂଚନା । ଧରାପଡ଼ିଲେ ନେପାଳ ଜେଲରୁ ପଳାୟନ କରିଥିବା ୩୫ କଏଦୀ । ଏହି କଏଦୀଙ୍କ ମଧ୍ୟରୁ 22 ଜଣ ଉତ୍ତର ପ୍ରଦେଶର ଭାରତ-ନେପାଳ ସୀମାରେ, 10 ଜଣ ବିହାରରେ ଏବଂ ତିନି ଜଣ ପଶ୍ଚିମବଂଗରେ ଧରାପଡ଼ିଛନ୍ତି।
ନବୀନ ସରକାରର ବଡ଼ ସଫଳତା: ଓଡ଼ିଶାର ସର୍ବାଧିକ ପିଲା ପାଠ ପଢ଼ା ଜାରିରଖିଥିଲେ
ନବୀନ ପଟ୍ଟନାୟକ ସରକାର ସମୟରେ ଓଡ଼ିଶାର ଷ୍ଟୁଡେଣ୍ଟ ରିଟେନସନ୍ ହାର ଥିଲା ସର୍ବାଧିକ ୯୭ ପ୍ରତିଶତ। ୪ଟି ରାଜ୍ୟରେ ରାଇଟ୍ ଟୁ ଏଜୁକେସନ୍ ଆଇନରେ ସ୍କୁଲରେ ନାଁ ଲେଖାଇଥିବା ପିଲାଙ୍କ ମଧ୍ୟରୁ ସବୁଠୁ ଅଧିକ ପିଲା ପାଠ ପଢ଼ା ଜାରି ରଖିଥିଲେ ଓଡ଼ିଶାରେ। ଏହା ହେଉଛି ୨୦୨୩-୨୪ ର ତଥ୍ୟ। ଏହି ରିପୋର୍ଟ ପ୍ରକାଶ କରିଛି ଇନ୍ଦସ୍ ଆକ୍ସନ। ଏହି ରିପୋର୍ଟ ଅନୁସାରେ ରାଇଟ ଟୁ ଏଜୁକେସନ ଆଇନରେ ୪ଟି ରାଜ୍ୟରେ ନାଁ ଲେଖାଇଥିବା ପିଲାଙ୍କ ମଧ୍ୟରୁ ଓଡ଼ିଶାରେ ୯୭ ପ୍ରତିଶତ ପିଲା ପାଠପଢ଼ା ଜାରି ରଖିଥିଲେ। ଅର୍ଥାତ ମାତ୍ର ୩ ପ୍ରତିଶତ ପିଲା ପାଠ ଛାଡ଼ିଥିଲେ, ଯାହାକି ସର୍ଭେରେ ସାମିଲ ଥିବା ରାଜ୍ୟଗୁଡ଼ିକ ମଧ୍ୟରେ ସର୍ବନିମ୍ନ। 5T ପାଇଁ ଏହା ସମ୍ଭବ ହୋଇପାରିଥିଲା।
ଗରିବ ଓ ଆର୍ଥିକ ଦୁର୍ବଳ ଶ୍ରେଣୀର ପିଲା ଯେମିତି ଉଚ୍ଚମାନର ଶିକ୍ଷା ପାଇବେ, ସେଥିପାଇଁ ନବୀନ ପଟ୍ଟନାୟକଙ୍କ ନେତୃତ୍ଵରେ ସେତେବେଳର ବିଜେଡି ସରକାର ଯେଉଁ ପ୍ରଚେଷ୍ଟା କରିଥିଲା, ତାର ଫଳସ୍ଵରୂପ ଏହି ସଫଳତା ମିଳିଛି। ପ୍ରଭାବଶାଳୀ ଭାବେ ରଣନୀତି କାର୍ଯ୍ୟକାରୀ କରିବା ଓ ଶିକ୍ଷା କ୍ଷେତ୍ରରେ ଉନ୍ନତି ପାଇଁ ଯେଉଁ ପ୍ରତିଶ୍ରୁତିବଦ୍ଧତା ପ୍ରଦର୍ଶନ କରାଯାଇଥିଲା, ସେଥିପାଇଁ ଏହି ସଫଳତା ମିଳିଛି। ତତ୍କାଳୀନ ବିଜେଡି ସରକାର ସମୟରେ 5T ଜରିଆରେ ୭ ହଜାର ସରକାରୀ ସ୍କୁଲର ରୂପାନ୍ତରଣ ହୋଇଥିଲା। ରାଜ୍ୟର ଶିକ୍ଷା ବ୍ୟବସ୍ଥାକୁ ଏହା ନୂଆ ଦିଗ ଦେଇଥିଲା। ଛାତ୍ରଛାତ୍ରୀଙ୍କ ପାଇଁ ସୃଷ୍ଟି କରିଥିଲା ନୂଆ ସମ୍ଭାବନା। ନବୀନ ସରକାର ବିଶ୍ଵାସ କରନ୍ତି ଯେ, ଉତ୍ତମ ମାନର ଶିକ୍ଷା ଦ୍ଵାରା ପ୍ରତ୍ୟେକ ଶିଶୁକୁ ସଶକ୍ତ କଲେ ହିଁ ସମୃଦ୍ଧଶାଳୀ ନୂଆ ଓଡ଼ିଶା ଗଠନ ସମ୍ଭବ।
ଏହି ସଫଳତା ପଛରେ ରହିଛି ସମସ୍ତ ଶିକ୍ଷକ ଶିକ୍ଷୟିତ୍ରୀ, ବାପା ମାଆ, ପ୍ରଶାସକଙ୍କ ପ୍ରତିଶ୍ରୁତିବଦ୍ଧତା ଓ ଅବଦାନ। ଏଥିପାଇଁ ସମସ୍ତଙ୍କୁ ଧନ୍ୟବାଦ ଜ୍ଞାପନ କରାଯାଇଛି। ଏହାକୁ ନେଇ ବିଜୁ ଛାତ୍ର ଜନତା ଦଳର ସଭାନେତ୍ରୀ ଇପସିତା ସାହୁ କହିଛନ୍ତି, ୨୦୦୦ ରେ ଯେବେ ଓଡ଼ିଶାରେ ନବୀନ ପଟ୍ଟନାୟକ ଶାସନକୁ ଆସିଥିଲେ, ସେତେବେଳେ ଡ୍ରପଆଉଟ ସଂଖ୍ୟା ଅଧିକ ଥିଲା। ଦୀର୍ଘ ୨୪ ବର୍ଷ ହେବ ନବୀନ ପଟ୍ଟନାୟକ ଓଡ଼ିଶାକୁ ରୂପାନ୍ତର କରିବାରୁ ଆଜି ରିପୋର୍ଟ ଆସିଛି ଯେ 97% ପିଲା ସ୍କୁଲ ଯାଉଛନ୍ତି। ସେମାନଙ୍କ ପାଠପଢା ପ୍ରତି ଆଗ୍ରହ ଅଛି। ଏହାର କାରଣ ହେଉଛି ଯେବେ ଗରିବ ପିଲା ସ୍କୁଲ ଯାଉଛି, ତାକୁ ମଧ୍ୟାନ୍ନ ଭୋଜନ ମିଳୁଛି। ନବୀନ ଶାସନରେ ଗରିବ ଖାଦ୍ୟ ପାଇଛି। ଶିକ୍ଷାର ବାତାବରଣ ଓ ସୁରକ୍ଷିତ ପରିବେଶ ଦେଇଥିଲେ ନବୀନ ପଟ୍ଟନାୟକ। ସେଥିପାଇଁ ଡ୍ରପଆଉଟ କମିଛି। ଏହି ରିପୋର୍ଟ ଯୋଗୁଁ ଆଜି ଓଡ଼ିଶା ବିଶ୍ୱ ଦରବାରରେ ପ୍ରଶଂସିତ. ହେଲେ ଦୀର୍ଘ ୧୪ ମାସ ହେବ ଛାତ୍ରୀ ଅସୁରକ୍ଷିତ। ସରକାର ସୁଇଚ ଅଫ। ଆମ୍ବ ଟାକୁଆ ଖାଉଛନ୍ତି ଲୋକେ। ଅନାହାରରେ ମରୁଛନ୍ତି। ମଧ୍ୟାନ୍ନ ଭୋଜନ ଦୁର୍ନୀତି ହେଉଛି। ଯେଉଁ ଓଡ଼ିଶାକୁ ନବୀନ ପଟ୍ଟନାୟକ ଜିରୋରୁ ହିରୋ କରିଥିଲେ, ତାକୁ ବିଜେପି ସରକାର ବର୍ବାଦ ନ କରନ୍ତୁ।
ନେପାଳରେ ଶାନ୍ତି ଫେରାଇଵା ନେଇ ବାଲୁକା କଳା ମାଧ୍ୟମରେ ଶାନ୍ତିର ବାର୍ତ୍ତା
ନେପାଳରେ ଶାନ୍ତି ଫେରାଇଵା ନେଇ ବାଲୁକା କଳା ମାଧ୍ୟମରେ ଶାନ୍ତିର ବାର୍ତ୍ତା। ନେପାଳରେ ଯେଉଁ ଘଟଣା ଘଟିଛି ସାରା ବିଶ୍ୱ ପାଇଁ ଚିନ୍ତାଜନକ। ନେପାଳ ସାରା ବିଶ୍ୱ ପାଇଁ ଏକ ଶାନ୍ତି ଦେଶ ରହିଥିବାବେଳେ ନେପାଳରେ ଏହି ଘଟଣା ନେଇ ସାରା ବିଶ୍ୱରେ ଚିନ୍ତା l Gen-Z ଅର୍ଥାତ୍ ଯୁବପିଢ଼ି ଏହାର ବିରୋଧ କରିବା ଆରମ୍ଭ କରିଛନ୍ତି। ଏହି ଯୁବକମାନେ ସେପ୍ଟେମ୍ବର 8 ତାରିଖରୁ Gen-Z ରିଭୋଲ୍ୟୁସନ ନାମରେ ପ୍ରତିବାଦ କରିବା ଆରମ୍ଭ କରିଛନ୍ତି। ପ୍ରତିବାଦ ଏତେ ବଢିଯାଇଛି ଯେ ପରିସ୍ଥିତି ଏବେ ଅନିୟନ୍ତ୍ରିତ ହେବାରେ ଲାଗିଛି। କିପରି ଏହି ଶାନ୍ତି ଦେଶ ପୁନଃବାର ଫେରିବ ସେ ନେଇ ପୁରୀ ବେଳାଭୂମିରେ ଆନ୍ତର୍ଜାତୀୟ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ ବାଲୁକା କଳା ମାଧ୍ୟମରେ ମହାପ୍ରଭୁଙ୍କ ନିକଟରେ ପାର୍ଥନା କରିଛନ୍ତି l ଏହି ବାଲୁକା କଳାରେ praying for peace nepalର ବାର୍ତ୍ତା ଦେଇଛନ୍ତି l
୧୬ରେ ସର୍ବଦଳୀୟ ବୈଠକ: ୧୮ରୁ ୨୫ ଯାଏ ବିଧାନସଭା ମୌସୁମୀ ଅଧିବେଶନ
୧୬ରେ ସର୍ବଦଳୀୟ ବୈଠକ । ୧୮ରୁ ୨୫ ଯାଏ ବିଧାନସଭା ମୌସୁମୀ ଅଧିବେଶନ । ୧୬ରେ ବାଚସ୍ପତିଙ୍କ ଅଧ୍ୟକ୍ଷତାରେ ସର୍ବଦଳୀୟ ବୈଠକ ।
ସୁରୁଖୁରରେ ବିଧାନସଭା ସାରିବା ନେଇ ହେବ ଆଲୋଚନା । ବିଧାନସଭାରେ ୭ଟି କାର୍ଯ୍ୟ ଦିବସ ରହିଛି ।
ଆସନ୍ତା ୧୮ ତାରିଖରୁ ପୁଣି ଆରମ୍ଭ ହେବ ବିଧାନସଭା ଅଧିବେଶନ। ମୌସୁମୀ ଅଧିବେଶନର ଦ୍ଵିତୀୟ ପର୍ଯ୍ୟାୟ ଆରମ୍ଭ ହେବ। ଅଧିବେଶନ ୨୫ ତାରିଖ ଯାଏ ଚାଲିବ। ଅଧିବେଶନରେ ରହିଛି ୭ଟି କାର୍ଯ୍ୟ ଦିବସ। ଏହି ଅଧିବେଶନ ପାଇଁ ଆସନ୍ତା ୧୬ ତାରିଖରେ ବସିବ ସର୍ବଦଳୀୟ ବୈଠକ। ବାଚସ୍ପତି ଏହି ସର୍ବଦଳୀୟ ବୈଠକ ଡାକିଛନ୍ତି। ଗୃହକୁ ସୁରୁଖୁରୁରେ କେମିତି ଚଳାଯିବ, କେମିତି ସମସ୍ତ ପ୍ରସଙ୍ଗ ଉପରେ ଆଲୋଚନା ହେବ, ରାଜ୍ୟର ଗୁରୁତ୍ଵପୂର୍ଣ୍ଣ ପ୍ରସଙ୍ଗ ଉଠାଇବାକୁ କେମିତି ବିରୋଧୀଙ୍କୁ ପୁରା ସୁଯୋଗ ମିଳିବ, ସେ ସଂପର୍କରେ ସର୍ବଦଳୀୟ ବୈଠକରେ ଆଲୋଚନା ହେବାର ସମ୍ଭାବନା ଅଛି।
ବିଶ୍ବର ୧ ନମ୍ବର ଧନୀବ୍ୟକ୍ତି ଲ୍ୟାରୀ ଏଲିସନଙ୍କ ଜୀବନର ସଂଘର୍ଷପୂର୍ଣ୍ଣ କାହାଣୀ
ଏଲନ ମସ୍କଙ୍କୁ ପଛରେ ପକାଇ ସେପ୍ଟେମ୍ବର ୧୦ ତାରିଖରେ ଦୁନିଆର ୧ ନମ୍ବର ଧନୀ ବ୍ୟକ୍ତିର ମୁକୁଟ ପିନ୍ଧିବାର ସୌଭାଗ୍ୟ ହାସଲ କରିଥିଲେ ଓରେକଲର ସହ-ପ୍ରତିଷ୍ଠାତା ଲ୍ୟାରୀ ଏଲିସନ । ତେବେ ଲ୍ୟାରିଙ୍କ ଜୀବନର ସଂଘର୍ଣ୍ଣଭରା କାହାଣୀ ଅନେକ ଜାଣିନଥିବେ । ଜନ୍ମ ହେବା ପରେ ଲ୍ୟାରୀଙ୍କୁ ଛାଡ଼ି ତାଙ୍କର ମା’ ଚାଲିଯାଇଥିଲେ । ଅରବପତିଙ୍କ ଲିଷ୍ଟରେ ଏକ ବଡ଼ ଉପଲବ୍ଧି ହାସଲ କରି ୮୧ ବର୍ଷୀୟ ଲ୍ୟାରୀ ବିଶ୍ବର ୧ ନମ୍ବର ଧନୀ ହୋଇ ପାରିଛନ୍ତି । ତେବେ ଲ୍ୟାରୀଙ୍କ ସଫଳତାର କାହାଣୀ ବେଶ୍ ରୋମାଞ୍ଚକର ଓ କୌଣସି ଫିଲ୍ମ କାହାଣୀ ଠାରୁ କମ୍ ନୁହେଁ । ଛୋଟ ବେଳୁ ମା’ର ମମତାରୁ ବଞ୍ଚିତ ହୋଇଥିବା ଲ୍ୟାରୀଙ୍କ ବାଲ୍ୟଜୀବନ ଗରିବୀରେ ବିତିଥିଲା । ମାତ୍ର ପାଠ ପଢ଼ିବା ସମୟରେ ସେ ଜୀବନରେ କିଛି ବଡ଼ କରିବେ ବୋଲି ତାଙ୍କ ମନରେ ଆଇଡିଆ ଆସିଥିଲା । ତା’ ପରେ ତାଙ୍କର ଜୀବନ ବଦଳି ଯାଇଥିଲା ଓ ସେ ଦୁନିଆର ୧ ନମ୍ବର ଧନୀ ହୋଇ ପାରିଥିଲେ ।
ସେପ୍ଟେମ୍ବର ୧୦ରେ ଲ୍ୟାରୀଙ୍କ କମ୍ପାନୀ ଓରେକଲ କର୍ପୋରେସନର ତିନି ମାସର ଫଳାଫଳ ଶାନଦାର ରହିଥିଲା, ଯାହାର ସିଧାସଳଖ ପ୍ରଭାବ ଶେୟାରରେ ଦେଖିବାକୁ ମିଳିଥିଲା । ଗୋଟିଏ ଦିନରେ ହିଁ ଓରେକଲର ଷ୍ଟକ କାରବାର ୪୧ ପ୍ରତିଶତ ପର୍ଯ୍ୟନ୍ତ ବଢ଼ିଯାଇଥିଲା । ଶେୟାରର ଏହି ଦ୍ରୁତ ବୃଦ୍ଧି ଫଳରେ ଲ୍ୟାରୀଙ୍କ ନେଟଓ୍ବର୍ଥ ମାତ୍ର ୨୪ ଘଣ୍ଟାରେ ୧୦୧ ଅରବ ଡଲାର ବୃଦ୍ଧି ଘଟି ୩୯୩ ଅରବ ଡଲାରରେ ପହଞ୍ଚି ଯାଇଥିଲା । ଫଳରେ ସେ ମସ୍କଙ୍କୁ ହଟାଇ ୧ ନମ୍ବର ଧନୀ ହୋଇପାରିଥିଲେ । ସେ ସମୟରେ ମସ୍କଙ୍କ ନେଟଓ୍ବର୍ଥ ୩୮୫ ଅରବ ଡଲାର ରହିଥିଲା । ପରବର୍ତ୍ତୀ ସମୟରେ ଲ୍ୟାରୀଙ୍କ ସମ୍ପତ୍ତିରେ ହ୍ରାସ ପରିଲକ୍ଷିତ ହୋଇଥିଲା ।
ଟେକ ସେକ୍ଟରରେ ୮୧ ବର୍ଷୀୟ ଲ୍ୟାରି ଏଲିସନ ଏକ ବଡ଼ ନାମ । ତେବେ ଜୀବନର ସଂଘର୍ଷ ଓ ସେଥିରୁ ବାହାରିବା ଲ୍ୟାରିଙ୍କ ସଫଳତା ପଛର ଏକ ବଡ଼ କାରଣ । ୧୯୪୪ ମସିହା ଜୁନରେ ନ୍ୟୁୟର୍କରେ ଲ୍ୟାରୀ ଜନ୍ମଗ୍ରହଣ କରିଥିଲେ । ସେ ୯ ମାସର ହୋଇଥିବା ବେଳେ ତାଙ୍କର ମା’ ତାଙ୍କୁ ଜଣେ ସମ୍ପର୍କୀୟଙ୍କୁ ଦେଇ ଟେକି ଦେଇଥିଲେ । ୪୮ ବର୍ଷ ପର୍ଯ୍ୟନ୍ତ ଲ୍ୟାରୀ ନିଜ ମା’ଙ୍କ ମୁହଁ ଦେଖିନଥିଲେ । ଶିକାଗୋ ୟୁନିଭରସିଟିରେ ଲ୍ୟାରି ଗ୍ରାଜୁଏସନରେ ଆଡମିସନ କରିଥିଲେ । ପାଠପଢ଼ା ମଧ୍ୟରେ କିଛି ଅଲଗା କରିବାର ଆଇଡିଆ ହିଁ ତାଙ୍କ ପାଇଁ କମାଲ ସାବ୍ୟସ୍ତ ହୋଇଥିଲା । କିଛି ବର୍ଷ ଅଲଗା ଅଲଗା କମ୍ପାନୀରେ କାମ କରିବା ସମୟରେ ଲ୍ୟାରୀ କୋଡିଂ ଓ ସଫ୍ଟଓ୍ବୟାରକୁ ଭଲରେ ବୁଝିଥିଲେ । ୧୯୭୭ରେ ମାତ୍ର ୨ ହଜାର ଡଲାର ନିବେଶ କରି ଦୁଇ ବନ୍ଧୁଙ୍କୁ ନେଇ ଲ୍ୟାରୀ କାଲିଫର୍ଣ୍ଣିଆରେ ସଫ୍ଟେଓ୍ବୟାର ଡେଭଲପମେଣ୍ଟ ଲ୍ୟାବରେଟୋରିଜ ସ୍ଥାପନା କରିଥିଲେ । ୫ ବର୍ଷ ପରେ ନାମ ବଦଳାଇ ନିଜର କମ୍ପାନୀର ନାମ ’ଓରେକଲ’ ରଖିଥିଲେ । ୧୯୮୬ରେ ତାଙ୍କର କମ୍ପାନୀ ଶେୟାର କମ୍ପାନୀରେ ଲିଷ୍ଟ ହୋଇଥିଲା ।
ପ୍ରାରମ୍ଭରୁ ୨୦୧୪ ମସିହା ସେପ୍ଟେମ୍ବର ପର୍ଯ୍ୟନ୍ତ ଲ୍ୟାରି କମ୍ପାନୀର ସିଇଓ ଦାୟିତ୍ବ ସମ୍ଭାଳିଥିଲେ । ୨୦୧୨ରେ କମ୍ପାନୀର ପାଖାପାଖି ପୂରା ଅଂଶଧନ ସେ କିଣି ନେଇଥିଲେ । ଲ୍ୟାରି ତାଙ୍କ ଜୀବନରେ ୫ ଥର ବିବାହ କରିଛନ୍ତି । ୧୯୬୭ରେ ପ୍ରଥମ ବିବାହ କରିଥିବା ବେଳେ ତାହା ୧୯୭୪ ପର୍ଯ୍ୟନ୍ତ ଚାଲିଥିଲା । ୧୯୭୭ରେ ଦ୍ବିତୀୟ ବିବାହ ଓ ୧୯୮୩ରେ ତୃତୀୟ ବିବାହ କରିଥିଲେ । ଏହାପରେ ୨୦୦୩ରେ ସେ ଚତୁର୍ଥ ଥର ପାଇଁ ବିବାହ କରିଥିଲେ । ଲ୍ୟାରୀଙ୍କ ପଞ୍ଚମ ପତ୍ନୀ ଜୋଲିନ ଝୁ ତାଙ୍କ ଠାରୁ ପାଖାପାଖି ୪୭ ବର୍ଷ ସାନ ଅଟନ୍ତି । ୫ ଥର ବିବାହ କରିଥିବା ଏଲିସନଙ୍କ ଦୁଇଟି ସନ୍ତାନ ରହିଛି ।
ଉତ୍କଳ ବିଶ୍ଵବିଦ୍ୟାଳୟରୁ ହଟିବେ ଭଡ଼ାଟିଆ ଓ ଜବରଦଖଲକାରୀ
ଉତ୍କଳ ବିଶ୍ଵବିଦ୍ୟାଳୟରୁ ଅଣଛାତ୍ର ପରେ ସରକାରୀ କ୍ୱାର୍ଟରରୁ ହଟିବେ ଭଡ଼ାଟିଆ ଓ ଜବରଦଖଲକାରୀ। କ୍ୟାମ୍ପସରେ ପ୍ରଫେସର ଓ କର୍ମଚାରୀଙ୍କ ପାଇଁ ନିର୍ମାଣ ହୋଇଥିବା କ୍ୱାର୍ଟରଗୁଡିକ ଏବେ ଜବରଦଖଲକାରୀଙ୍କ କବଜାରେ। ବାଣୀ ବିହାର କ୍ୟାମ୍ପସରେ ୬୧୦ କ୍ୱାର୍ଟର ରହିଛି। ୪୯୨ ଷ୍ଟାଫକୁ ଅନୁମତି ମିଳିଛି କ୍ୱାର୍ଟରରେ ରହିବା ପାଇଁ। ବାକି ୧୧୮ କ୍ୱାର୍ଟର ଖାଲି ପଡ଼ିଛି। ତା’ ଭିତରୁ ୪୯ କ୍ୱାର୍ଟରରେ ଲୋକ ଅନଧିକାର ଭାବେ ରହୁଥିଲେ। ତାଙ୍କୁ ଗତକାଲି ସନ୍ଧ୍ୟା ସୁଦ୍ଧା କ୍ୱାର୍ଟର ଚାଡିବା ପାଇଁ ନୋଟିସ ଦିଆଯାଇଥିଲା। ଅନେକ କ୍ୱାର୍ଟର ଖାଲି କରିଥିବାବେଳେ ଆଉ କିଛି ଖାଲି ହେଉଛି। କିଏ ଭଡ଼ା ଲଗାଇଛନ୍ତି ତ ଆଉ କିଏ ଚାକିରି ସରିବା ପରେ ମଧ୍ୟ କ୍ୟାମ୍ପସ ଛାଡ଼ି ଯାଇନାହାନ୍ତି। କିଛି କର୍ମଚାରୀ କ୍ୟାମ୍ପସ ବାହାରେ ରହି ନିଜ କ୍ବାର୍ଟର୍ସ ଅନ୍ୟମାନକୁ ଭଡ଼ାରେ ଦେଇଛନ୍ତି।ମାସିକ ୧୦ରୁ ୧୫ ହଜାର ଟଙ୍କା ଭଡ଼ା ଆଦାୟ ମଧ୍ୟ କରୁଛନ୍ତି। କ୍ବାର୍ଟର୍ସଗୁଡ଼ିକ ଜରାଜୀର୍ଣ୍ଣ କିମ୍ବା ବିପଦସଙ୍କୁଳ ଅବସ୍ଥାରେ ରହିଥିଲେ ମଧ୍ୟ କେହି ଖାତିର କରୁନାହାନ୍ତି। ବିଦ୍ୟୁତ୍ ବିଲ୍ ବାବଦରେ ଗୋଟିଏ ବି ଟଙ୍କା ଦେଉ ନାହାନ୍ତି। ପ୍ରତି ମାସରେ ବ୍ୟବହୃତ ହେଉଥିବା ବିଦ୍ୟୁତ୍ ବାବଦ ଅର୍ଥ ବିଶ୍ବବିଦ୍ୟାଳୟ କର୍ତ୍ତୃପକ୍ଷ ଭରଣା କରୁଛନ୍ତି।ଏପରିକି ହିଟର୍ ବ୍ୟବହାର ହେଉଥିବା ଜଣାପଡ଼ିଛି। ବିଶ୍ବବିଦ୍ୟାଳୟ କ୍ୟାମ୍ପସରେ କର୍ମଚାରୀଙ୍କ ପାଇଁ ଥିବା ଅଧିକାଂଶ କ୍ବାର୍ଟର୍ସ ପରିତ୍ୟକ୍ତ ହୋଇପଡ଼ିଛି। ଠିକ୍ ସମୟରେ ମରାମତି ହେଉ ନଥିବାରୁ ସେଥିରେ ରହିବାକୁ କର୍ମଚାରୀମାନେ ଭୟ କରୁଛନ୍ତି।। ପୋଲିସ କ୍ୟାମ୍ପସରେ ପହଞ୍ଚି ଅପରେସନ ଆରମ୍ଭ କରିଛି। ଖୁବଶୀଘ୍ର ସମସ୍ତ କ୍ୱାର୍ଟର କିଭଳି ଖାଲି ହେବ । ତା’ ଉପରେ ନଜର ରଖିଛନ୍ତି ୪ ପ୍ଲାଟୁନ ପୋଲିସ୍ ଫୋର୍ସ।