ନନ୍ଦିଘୋଷ ବ୍ୟୁରୋ: ଭାରତୀୟ ଚେସ ଖେଳାଳି ଦିବ୍ୟା ଦେଶମୁଖ ଆଣିଲେ ସାଂଘାତିକ ଅଭିଯୋଗ। ନେଦରଲାଣ୍ଡ୍ସରେ ଅନୁଷ୍ଠିତ ହୋଇଥିବା ଟାଟା ଷ୍ଟିଲ ମାଷ୍ଟର ଚେସ ଟୁର୍ଣ୍ଣାମେଣ୍ଟରେ ଦର୍ଶକଙ୍କ ଦ୍ବାରା ମାନସିକ ଭାବେ ଦୁର୍ବ୍ୟବହାର ଶୀକାର ହୋଇଥିବା କଥା ସେ ଉଠାଇଛନ୍ତି । ଟୁର୍ଣ୍ଣାମେଣ୍ଟ ସମୟରେ ଦର୍ଶକ ମାନେ ତାଙ୍କ ଡ୍ରେସ, ତାଙ୍କ ହେୟାର ଷ୍ଟାଇଲ ଉପରେ ନଜର ରଖିବା ସହ ବିଭିନ୍ନ କମେଣ୍ଟ ମଧ୍ୟ କରିଥିଲେ। ନାଗପୁରର ଏହି ଅନ୍ତରାଷ୍ଟ୍ରୀୟ ଚେଷ ମାଷ୍ଟର ମହିଳା ଏସିଆନ ଚାମ୍ପିଆନସିପରେ ମେଡାଲ ହାସଲ କରିଥିଲେ। ଏକ ସୋସିଆଲ ମିଡିଆ ପୋଷ୍ଟରେ ଏଭଳି କିଛି ଲେଖି ନିଜର ଦୁଃଖ ବ୍ୟକ୍ତ କରିଛନ୍ତି ଦିବ୍ୟା ଦେଶମୁଖ। ଟୁର୍ଣ୍ଣାମେଣ୍ଟ ସମୟରେ ଦର୍ଶକ ତାଙ୍କୁ ହୀନ ନଜରରେ ଦେଖିଲେ ବୋଲି କହିଛନ୍ତି । ମହିଳା ଖେଳାଳିଙ୍କୁ ନେଇ ଏଭଳି କିଛି ଅନୁଭବ କରୁଥିଲେ ମଧ୍ୟ ଟୁଣ୍ଣାମେଣ୍ଟ ସରିଲେ ଏଭଳି ଘଟଣା ଲୋକନଜରକୁ ଆଣିବେ ବୋଲି ଭାବିଥିଲେ ଦିବ୍ୟା ଦେଶମୁଖ । ପୁରୁଷ ଖେଳାଳି ମାନଙ୍କ ପ୍ରତି ଦର୍ଶକଙ୍କ ଭଲ ବ୍ୟବହାର ଓ ଖେଳ ପ୍ରତି ଆଗ୍ରହ ରହୁଛି । ହେଲେ ଜଣେ ମହିଳା ଚେସ ଖେଳିଲେ ତାଙ୍କ ଖେଳ ବ୍ଯତିତ ଅନ୍ଯ ଦିଗ ଉପରେ ବିଶେଷ ନଜର ରୁହେ । ଯାହା ତାଙ୍କୁ ବହୁତ ଆଘାତ ଦେଇଛି ବୋଲି କହିଛନ୍ତି ଦିବ୍ଯା ଦେଶ। ଟୁର୍ଣ୍ଣାମେଣ୍ଟରେ ଅନେକ ସମୟରେ ସେ ଭଲ ଖେଳୁଥିଲେ ମଧ୍ଯ କିଛି ଦର୍ଶକଙ୍କ ବ୍ଯତିତ କାହାରି ନଜର ନଥାଏ ବୋଲି କହିଛନ୍ତି ଦିବ୍ୟା।
ମହିଳା ଉପଖଣ୍ଡ ମାଜିଷ୍ଟ୍ରେଟଙ୍କୁ ହତ୍ୟା
ନନ୍ଦିଘୋଷ ବ୍ୟୁରୋ: ମଧ୍ୟପ୍ରଦେଶ ସାହାପୁରାରେ ମହିଳା ଉପଖଣ୍ଡ ମାଜିଷ୍ଟ୍ରେଟଙ୍କୁ ହତ୍ୟା । SDM ନିଶା ନାପିଟଙ୍କ ସ୍ବାମୀ ମନିଷ ଶର୍ମା ତକିଆରେ ନିଶାଙ୍କ ମୁହଁକୁ ଚାପି ହତ୍ୟା କରିଥିବା ପୋଲିସ କହିଛି । ନିଶା ତାଙ୍କ ସର୍ଭିସ ରେକର୍ଡ,ବୀମା ଓ ବ୍ୟାଙ୍କ ରେକର୍ଡରେ ସ୍ବାମୀଙ୍କୁ ନୋମିନି ନରଖିବା ନେଇ ଗଣ୍ଡଗୋଳ ହୋଇଥିଲା । ଉଭୟଙ୍କ ମଧ୍ୟରେ ଗଣ୍ଡଗୋଳ ଚରମସୀମାରେ ପହଞ୍ଚିବା ପରେ ସ୍ବାମୀ ହଠାତ୍ ନିଶାଙ୍କ ମୁହଁକୁ ତକିଆରେ ଚାପି ରଖିଥିଲେ । କିଛି ସମୟ ପରେ ନିଶାଙ୍କ ମୃତ୍ୟୁ ଘଟିଥିବା ଏସପି ଅଖିଳ ପଟେଲ କହିଛନ୍ତି । ମନିଷ ବେରୋଜଗାର ଥିବା ସହ ସବୁବେଳେ ମାଦକଦ୍ରବ୍ୟ ନିଶାରେ ଚୁର ରହୁଥିଲେ । ବିଭିନ୍ନ ସମୟରେ ନିଶାଙ୍କୁ ପଇସା ମାଗିବା ସହ ମାଡ଼ ମାରୁଥିଲେ ବୋଲି ତଦନ୍ତରୁ ଜଣାପଡିଛି । ନିଶାଙ୍କୁ ହତ୍ୟା କରିବା ପରେ, ମନିଷ ଶବ ନିକଟରେ ୬ଘଣ୍ଟା ଧରି ବସିରହିଥିଲେ ।
ପରେ ମୃତଦେହକୁ ନିକଟସ୍ଥ ଡାକ୍ତରଖାନାକୁ ନେବା ପରେ, ହତ୍ୟା ସନ୍ଦେହ କରି ଡାକ୍ତର ପୋଲିସକୁ ଖବର ଦେଇଥିଲେ । ପୋଲିସ ପହଞ୍ଚି ମନିଷଙ୍କୁ ଅଟକ ରଖି ଶବ ବ୍ୟବଛେଦ କରିଥିଲେ । ନିଶା ହତ୍ୟାର ପ୍ରମାଣ ନଷ୍ଟ କରିବାକୁ ମନିଷ ତକିଆରେ ଲାଗିଥିବା ରକ୍ତ ଓ ରକ୍ତଭିଜା ପୋଷାକକୁ ୱାସିଂ ମେସିନରେ ସଫା କରିଦେଇଥିଲେ । ଡିନ୍ଦୋରିଜିଲ୍ଲା ଏସପିଙ୍କ କହିବା ହେଲା ଘଟଣାସ୍ଥଳରୁ ମିଳିଥିବା ପ୍ରମାଣ ଓ ମନିଷଙ୍କୁ ପଚରା ଉଚରା କରିବା ପରେ ସେ ହତ୍ୟା କରିଥିବା ସ୍ବୀକାର କରିଛନ୍ତି । ମନିଷଙ୍କ ବିରୋଧରେ ହତ୍ୟା,ଯୌତୁକ ନିର୍ଯ୍ୟାତନା,ପ୍ରମାଣ ନଷ୍ଟ ଭଳି ମାମଲାରେ ଗିରଫ କରାଯାଇ କୋର୍ଟ ଚାଲାଣ କରାଯାଇଛି । ଏହି ସ୍ପର୍ଶକାତର ମାମଲାର ତଦନ୍ତ ଡିଆଇଜି ମୁକେଶ ଶ୍ରୀବାସ୍ତବ ୨୪ଘଣ୍ଟା ମଧ୍ୟରେ ଶେଷ କରି ଅଭିଯୁକ୍ତକୁ ଗିରଫ କରିଥିବାରୁ ତାଙ୍କୁ ୨୦ହଜାର ଟଙ୍କା ପୁରସ୍କାର ପ୍ରଦାନ କରାଯାଇଥିବା ଏସପି ଅଖିଳ ପଟେଲ କହିଛନ୍ତି ।
ବିନା ପ୍ରଶିକ୍ଷଣରେ ଭଳିବଲ ଖେଳି ସଫଳ ହୋଇଛନ୍ତି ବିକାଶ ବେହେରା
ଯାଜପୁର: ଭଳିବଲ ଖେଳି ସଫଳ ହୋଇଛନ୍ତି ଯାଜପୁର ବଡ଼ଚଣା ବ୍ଲକ ଖଡ଼ଗପୁରର ବିକାଶ ବେହେରା। ଜାତୀୟ, ଅନ୍ତର୍ଜାତୀୟ ସ୍ତରରେ ଖେଳି ଅର୍ଜିଛନ୍ତି ସୁନାମ। ବିନା ପ୍ରଶିକ୍ଷଣରେ ଖେଳୁଛନ୍ତି। ଆର୍ଥିକ ଅନଟନ ମଧ୍ୟରେ ଗତି କରୁଥିବା ବେଳେ ଭଲ ଖେଳିବାର ଥିଲା ସ୍ବପ୍ନ।
ଯାଜପୁର ବଡ଼ଚଣା ବ୍ଲକ ଖଡ଼ଗପୁର ଗାଁର ବିକାଶ ବେହେରା। ଭଳିବଲ ପ୍ରତି ରହିଛି ତାଙ୍କର ଅହେତୁକ ଦୁର୍ବଳତା। ଗ୍ରାମାଞ୍ଚଳରେ ଭଳିବଲ ଖେଳି ବେଶ ସୁନାମ ଆଣିଥିବା ବିକାଶ ଫିଟ ଇଣ୍ଡିଆ ପକ୍ଷରୁ ଅଣ୍ଡର 19ରେ ଖେଳିଛନ୍ତି। ମଧ୍ୟପ୍ରଦେଶରେ ଗୁଆଲିର ଓ ଇଣ୍ଡୋ ନେପାଳରେ ଆୟୋଜିତ ହୋଇଥିବା ଭଳିବଲ ଟୁର୍ଣ୍ଣାମେଣ୍ଟରେ ଭାଗନେଇ ସଫଳତା ପାଇଛନ୍ତି। ଶ୍ରେଷ୍ଠ ଖେଳାଳି ଭାବେ ତାଙ୍କୁ ଚୟନ କରାଯାଇଛି। ରାଜ୍ୟ, ଜାତୀୟ ଓ ଅନ୍ତର୍ଜାତୀୟ ସ୍ତରରେ ଖେଳି ସୁନାମ ଅର୍ଜନ କରିଛନ୍ତି। ଖେଳ ପାଇଁ କୌଣସି ପ୍ରଶିକ୍ଷଣ ନନେଇ ମଧ୍ୟ ସେ ଭଲ ପ୍ରଦର୍ଶନ କରିପାରିଛନ୍ତି।
ପିଲାବେଳୁ ଭଳିବଲ ଖେଳ ପ୍ରତି ବିକାଶଙ୍କର ରହିଛି ଅହେତୁକ ଦୁର୍ବଳତା। ନିଜ ପାଠପଢା ସହ ଖେଳ ପ୍ରତି ତାଙ୍କ ଆଗ୍ରହ ତାଙ୍କୁ ଏହି ସଫଳତା ଆଣି ଦେଇଛି। ହେଲେ ପରିବାର ଆର୍ଥିକ ଅନଟନ ମଧ୍ୟରେ ବିତୁଥିବା ବେଳେ ଖେଳ ପାଇଁ ବେଶ ସମସ୍ୟା ସୃଷ୍ଟି ହେଉଛି। ବିକାଶ ଜଣେ ଚାଷୀକୁଳ ପରିବାରରୁ ଆସିଥିବା ବେଳେ ଭଳିବଲ ଖେଳ ପାଇଁ ଆଗ୍ରହ ରହିଆସିଛି। ଆବଶ୍ୟକୀୟ ପ୍ରଶିକ୍ଷଣ ଅଭାବରୁ ସେ ଆଗକୁ ବଢିବାରେ ନାନା ବାଧାର ସାମ୍ନା କରୁଛନ୍ତି। ସ୍ଥାନୀୟ ଅଂଚଳର କିଛି ସହୃଦୟ ବ୍ୟକ୍ତିଙ୍କ ପାଇଁ ଆଜି ସେ ସଫଳତା ପାଇ ପାରିଛନ୍ତି।
ପାରଳାଖେମୁଣ୍ଡି ମେଡିକାଲରେ ଡାକ୍ତରଙ୍କୁ ମାଡ ମାରିଲେ ମହିଳା
ଗଜପତି: ଗଜପତି ଜିଲ୍ଲା ସଦରମହକୁମା ପାରଳାଖେମୁଣ୍ଡି ସ୍ଥିତ ମୁଖ୍ଯ ଚିକିତ୍ସା କେନ୍ଦ୍ରରେ ଅଭାବନୀୟ ଘଟଣା । ଡାକ୍ତରଙ୍କୁ ମାଡ ମାରିଲେ ମହିଳା । ୨୦୨୩ ଫେବୃଆରୀ ମାସରେ ସୁଜ୍ଞାନୀ ଗମାଙ୍ଗଙ୍କ ଝିଅ ସୌଦାମିନୀ ରଇତଙ୍କ ମୃତ୍ଯୁ ମାମଲାକୁ ନେଇ ବିବାଦ ଦେଖାଦେଇଛି । ସୌଦାମିନୀଙ୍କ ସନ୍ଦେହଜନକ ଅବସ୍ଥାରେ ମୃତ୍ଯୁ ହୋଇଥିଲା । ଯାହାକୁ ପ୍ରାଥମିକ ତଦନ୍ତରେ ଆତ୍ମହତ୍ୟା ବୋଲି ସୂଚନା ଦେଇଥିଲା ପୋଲିସ। ପୋଷ୍ଟମର୍ଟମ ରିପୋର୍ଟରେ ବି ଦୌଡ଼ି ଦେଇ ମୃତ୍ୟୁ ହୋଇଥିବା ଡାକ୍ତର ଦର୍ଶାଇଥିଲେ। ହେଲେ ଏହା ଆତ୍ମହତ୍ୟା ନୁହଁ ହତ୍ୟା ବୋଲି ଅଭିଯୋଗ ଆଣିଥିଲେ ପରିବାର । ଏନେଇ ପ୍ରଥମେ ପାରଳାଖେମୁଣ୍ଡି ପୋଲିସ ପରେ କ୍ରାଇମବ୍ରାଞ୍ଚ କେସଟିକୁ ହାତକୁ ନେଇଥିଲା । ବତ୍ତର୍ମାନ ମଧ୍ୟ ଏହି ଘଟଣାର ତଦନ୍ତ କରୁଛି କ୍ରାଇମବ୍ରାଞ୍ଚ। କିନ୍ତୁ ଆଜି ମୃତ ଛାତ୍ରୀ ସୌଦାମିନିଙ୍କ ମାଁ ସୁଜ୍ଞାନି ଜଣେ ରୋଗୀ ଭାବେ ପାରଳାଖେମୁଣ୍ଡି ଜିଲ୍ଲା ମୁଖ୍ୟ ଚିକିତ୍ସାଳୟକୁ ଯାଇ ଡ୍ୟୁଟିରେ ଥିବା ଡାକ୍ତର ରସ୍ମୀରଞ୍ଜନଙ୍କୁ ନିଜ ଝିଅର ଶବ ବ୍ୟବଛେଦ ରିପୋର୍ଟ ଦେଖାଇ ବିଭିନ୍ନ ପ୍ରଶ୍ନ କରିଥିଲେ । ପରେ ସେ ଧସ୍ତାଧସ୍ତି କରିଥିଲେ ଡାକ୍ତର ମିଶ୍ର ପତିରୋଧ କରିବାରୁ ହଠାତ୍ ତାଙ୍କୁ ଜୋତାରେ ମାଡ ମାରିଥିଲେ । ଘଟଣା ସମ୍ବନ୍ଧରେ ହସ୍ପିଟାଲ କର୍ତ୍ତୁପକ୍ଷ ପାରଳାଖେମୁଣ୍ଡି ପୋଲିସକୁ ସୂଚନା ଦେଇଥିଲେ । ପରେ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
କିଏ କେଉଁଠୁ ଲଢ଼ିବେ ନିର୍ବାଚନ, ପ୍ରଥମ ୧୬ ପ୍ରାର୍ଥୀଙ୍କ ନାମ ଘୋଷଣା କଲା ସମାଜବାଦୀ ପାର୍ଟି
ଲକ୍ଷ୍ନୌ: ଚଳିତ ବର୍ଷ ହେବାକୁ ଥିବା ଲୋକସଭା ନିର୍ବାଚନ ପାଇଁ କାଉଣ୍ଟ ଡାଉନ ଆରମ୍ଭ ହୋଇଥିବାବେଳେ ୟୁପରେ ସମାଜବାଦୀ ପାର୍ଟି ପ୍ରଥମ ୧୬ ପ୍ରାର୍ଥୀଙ୍କ ନାମ ଘୋଷଣା କରିଛି । କିଏ କେଉଁଠି ନିର୍ବାଚନ ଲଢ଼ିବେ ଏସପି ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି । ଯେଉଁଥିରେ ଡିମ୍ପଲ ଯାଦବ, ଧର୍ମେନ୍ଦ୍ର ଯାଦବ ଏବଂ ଅକ୍ଷୟ ଯାଦବଙ୍କ ଭଳି ବରିଷ୍ଠ ନେତାଙ୍କ ନାମ ରହିଛି । ଅଖିଲେଶ ଯାଦବ ୟୁପିରେ କଂଗ୍ରେସକୁ ୧୧ ଆସନ ଅଫର କରିଛି । ଇଣ୍ଡିଆ ମେଣ୍ଟ ବୈଠକରେ ଏହି ନିଷ୍ପତ୍ତି ନିଆଯାଇଥିଲା । ସର୍ବାଧିକ ଲୋକସଭା ଆସନ ବିଶିଷ୍ଟ ୟୁପିର ୮୦ ଆସନ ରହିଥିବାବେଳେ ମେଣ୍ଟରେ ଆସନ ବୁଝାମଣାକୁ ନେଇ ଲାଗିରହିଥିବା ସସପେନ୍ସ ଭିତରେ ୧୬ ପ୍ରାର୍ଥୀଙ୍କ ନାମ ଘୋଷଣା କରିଛି ଏସପି । ଯେଉଁଥିରେ ମେନପୁରରୁ ଡିମ୍ପଲ ଯାଦବ ମଇଦାନକୁ ଓହ୍ଲାଇବେ । ବଦାୟୁରୁ ଧର୍ମେନ୍ଦ୍ର ଯାଦବ, ଖିରିରୁ ଅର୍କେଶ ବର୍ମାଙ୍କ ଭଳି ପ୍ରାର୍ଥୀଙ୍କ ନାମ ଘୋଷଣା କରାଯାଇଛି ।
ପୁଣି ଥରିବ ଓଡ଼ିଶା, କାଲିଠୁ ବଦଳିବ ପାଗ
ଭୁବନେଶ୍ବର: ବୁଧବାରଠାରୁ ରାଜ୍ୟରେ ବଦଳିବ ପାଗ। ଆକାଶ ମେଘାଛନ୍ନ ରହିବା ସହ ହାଲୁକା ବର୍ଷା ହେବ। ବିଶେଷ କରି ଉତ୍ତର ଆଭ୍ୟନ୍ତରୀଣ ଓଡ଼ିଶା ସହ ଉପକୂଳ ଓଡ଼ିଶାରେ ଏଭଳି ପାଗ ରହିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର। ବର୍ତ୍ତମାନ ଓଡ଼ିଶା ଉପକୂଳରେ ଏକ ଗୁରୁଚାପ ବଳୟ ସକ୍ରିୟ ରହିଥିବା ବେଳେ କାଲିଠାରୁ ପଶ୍ଚିମା ଝଡ ପ୍ରଭାବରେ ପାଗ ପରିବର୍ତ୍ତନ ହେବ। ପ୍ରଭାବରେ ଆସନ୍ତା ୧ ତାରିଖରେ ଝାରସୁଗୁଡା, ସୁନ୍ଦରଗଡ, କେନ୍ଦୁଝର, ମୟୁରଭଞ୍ଜ, ଢେଙ୍କାନାଳ, ବାଲେଶ୍ବର ଏବଂ ଭଦ୍ରକର ଗୋଟିଏ ଦୁଇଟି ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ହେବାର ସମ୍ଭାବନା ରହିଛି। ସେହିଭଳି ୨ ତାରିଖରେ ବାଲେଶ୍ବର, ଭଦ୍ରକ, କେନ୍ଦ୍ରାପଡା, ଜଗତସିଂହପୁର, ଯାଜପୁର ଏବଂ ମୟୁରଭଞ୍ଜରେ ବର୍ଷା ନେଇ ଆକଳନ କରିଛି ପାଣିପାଗ କେନ୍ଦ୍ର। ବାକି ଓଡ଼ିଶାର ଅଧିକାଂଶ ଜିଲ୍ଲାରେ ପାଗ ଶୁଖିଲା ରହିବା ସହ ସଂଲଗ୍ନ ଜିଲ୍ଲାଗୁଡିକରେ କୋହଲା ପାଗ ରହିବ। ସେପଟେ ବାୟୁମଣ୍ଡଳରେ ଜଳୀୟବାଷ୍ପର ପରିମାଣ ଅଧିକ ଥିବାରୁ ଆସନ୍ତା ୨ ଦିନ ପର୍ଯ୍ୟନ୍ତ ରାଜ୍ୟରେ ଘନ କୁହୁଡିର ଆସ୍ତରଣ ଦେଖିବାକୁ ମିଳିବ। ଆସନ୍ତା କାଲି ଘନ କୁହୁଡି ପାଇଁ ୧୫ଟି ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଥିବା ବେଳେ ୧ ତାରିଖରେ ପୁରୀ, ଖୋର୍ଦ୍ଧା, ନୟାଗଡ, ଜଗତସିଂହପୁର, କେନ୍ଦ୍ରାପଡା, ଭଦ୍ରକ, ଗଞ୍ଜାମ, କନ୍ଧମାଳ, ସୋନପୁର, ବଲାଙ୍ଗିର, ଢେଙ୍କାନାଳ, ଅନୁଗୁଳ, ଯାଜପୁର, ବାଲେଶ୍ବର, କଟକ, ବୌଦ୍ଧ ଏବଂ କଳହାଣ୍ଡିକୁ ସତର୍କତା ଜାରି କରାଯାଇଛି। ଏହି ସବୁ ଜିଲ୍ଲାରେ ଦୃଶ୍ୟମାନ ଦୂରତା ୫୦ ରୁ ୨୦୦ ମିଟର ମଧ୍ୟରେ ରହିବ। ଘନ କୁହୁଡି ସମୟରେ ଦୃଶ୍ୟମାନ କ୍ଷମତା କମ୍ ରହୁଥିବାରୁ ଯାନବାହାନ ଚଳାଚଳରେ ସତର୍କତା ଅବଲମ୍ବନ କରିବାକୁ ପରାମର୍ଶ ଦିଆଯାଇଛି। ସେପଟେ ଆସନ୍ତା କାଲିଠାରୁ ରାଜ୍ୟରେ ସ୍ବାଭାବିକ ଠାରୁ ୨ ରୁ ୩ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି ହେବ।
ଭୁବନେଶ୍ୱର ରାଜ୍ୟ ସଂଗ୍ରହାଳୟରେ ଖୋଲିଲା ସ୍ବତନ୍ତ୍ର ଗ୍ୟାଲେରୀ
ଭୁବନେଶ୍ବର: ମହାତ୍ମା ଗାନ୍ଧୀଙ୍କ ତିରୋଧାନ ଦିବସରେ ଖୋଲିଲା ସ୍ବତନ୍ତ୍ର ଗ୍ୟାଲେରୀ। ଭୁବନେଶ୍ୱର ରାଜ୍ୟ ସଂଗ୍ରହାଳୟରେ ଏହି ଗ୍ୟାଲେରୀ ଖୋଲିଛି। ଗ୍ୟାଲେରୀର ନାମ ରହିଛି ଓଡ଼ିଶାରେ ମହାତ୍ମା ଗାନ୍ଧୀ। ଏହି ଗ୍ୟାଲେରୀକୁ ଓଡ଼ିଆ ଭାଷା ସାହିତ୍ୟ ଓ ସଂସ୍କୃତି ବିଭାଗ ମନ୍ତ୍ରୀ ଅଶ୍ବିନୀ ପାତ୍ର ଏବଂ ବିଭାଗୀୟ କମିଶନର ତଥା ଶାସନ ସଚିବ ସୁଜାତା ରାଉତ କାର୍ତ୍ତିକେୟନ ଲୋକାର୍ପଣ କରିଛନ୍ତି । ଇନଟାକ୍ ପକ୍ଷରୁ ୧ କୋଟି ୨୫ ଲକ୍ଷ ଟଙ୍କାରେ ଏହା ନିର୍ମାଣ କରାଯାଇଛି। ଏଥିରେ ଡିଜିଟାଲ ଡିସପ୍ଳେ, ଇଣ୍ଟରାକ୍ଟିଭ ଡିସପ୍ଳେ ଏବଂ ପ୍ରଥମ ଥର ପାଇଁ କ୍ୟୁଆର କୋଡ ଡିସପ୍ଳେ ମାଧ୍ୟମରେ ଗାନ୍ଧୀଙ୍କ ସମ୍ପର୍କରେ ସମସ୍ତ ତଥ୍ୟ ଦିଆଯାଇଛି। ମହାତ୍ମା ଗାନ୍ଧୀ ଓଡିଶାକୁ ଆଠଥର ଆସିଥିଲେ। ଗ୍ଯାଲେରୀରେ ଏସବୁର ଚିତ୍ର ସ୍ଥାନିତ ହୋଇଛି।
ନିର୍ବାଚନ ଲଢ଼ିବେନି ବରିଷ୍ଠ କଂଗ୍ରେସ ନେତା ନରସିଂହ ମିଶ୍ର
ଭୁବନେଶ୍ବର: କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ଆସନ୍ତା ନିର୍ବାଚନ ଲଢ଼ିବେ ନାହିଁ । ୫ଟି କର୍ମୀ ସମ୍ମିଳନୀ ନିର୍ବାଚନ ମଣ୍ଡଳୀରେ ଅନୁଷ୍ଠିତ ହୋଇଥିଲା। ସେଠାରେ ସେହି ଏହି ମତ ରଖିଛନ୍ତି। ତାଙ୍କ ସାନ ପୁଅ ସମରେନ୍ଦ୍ର ମିଶ୍ର ତାଙ୍କ ନିର୍ବାଚନ ମଣ୍ଡଳୀରୁ ଲଢିବା ନେଇ କଂଗ୍ରେସ କର୍ମୀ ଇଚ୍ଛା ପ୍ରକାଶ କରିଛନ୍ତି । ଏକଥା AICCକୁ ଜଣାଇଛି ବୋଲି କହିଛନ୍ତି ନରସିଂହ ମିଶ୍ର । ପୂର୍ବରୁ ଲୋକସଭା ପାଇଁ ନିର୍ବାଚନ ଲଢିଥିଲେ ସମରେନ୍ଦ୍ର । ଏବେ ସେ ବିଧାନସଭା ପାଇଁ ଲଢିବେ। ସେଥିପାଇଁ ଲୋକସଭା ପାଇଁ ଭଲ ପ୍ରାଥି ଖୋଜା ଚାଲିଛି ।
ପୁରସ୍କାର ପାଇଲା ଓଡ଼ିଶା ପ୍ରଜ୍ଞାପନ ମେଢ଼
ନୂଆଦିଲ୍ଲୀ: ନୂଆଦିଲ୍ଲୀସ୍ଥିତ କର୍ତ୍ତବ୍ୟ ପଥରେ ଅନୁଷ୍ଠିତ ଜାତୀୟସ୍ତରୀୟ ସାଧାରଣତନ୍ତ୍ର ଦିବସ ପ୍ୟାରେଡରେ ଓଡିଶାର ପ୍ରଜ୍ଞାପନ ମେଢ ସମଗ୍ର ଦେଶରେ ପ୍ରଥମ ସ୍ଥାନ ଅଧିକାର କରିଛି । ମଙ୍ଗଳବାର ନୂଆଦିଲ୍ଲୀରେ ଆୟୋଜିତ ଏକ ବର୍ଣ୍ଣାଢ୍ଯ କାର୍ଯ୍ୟକ୍ରମରେ ଓଡ଼ିଶା ସରକାରଙ୍କ ପକ୍ଷରୁ ସୂଚନା ଓ ଲୋକସମ୍ପର୍କ ବିଭାଗର ସହକାରୀ ସୂଚନା ଅଧିକାରୀ ହରପ୍ରସାଦ ମହାପାତ୍ର ଓ ପ୍ରଜ୍ଞାପନ ମେଢର ଶିଳ୍ପୀ କିର୍ତ୍ତୀ କିଶୋର ମହାରଣା ଭାରତ ସରକାରଙ୍କ ପ୍ରତିରକ୍ଷା ରାଷ୍ଟ୍ର ମନ୍ତ୍ରୀ ଅଜୟ ଭଟ୍ଟଙ୍କ ଠାରୁ ଟ୍ରଫି ଓ ପ୍ରମାଣପତ୍ର ଗ୍ରହଣ କରିଛନ୍ତି । 
ଟିମ ଇଣ୍ଡିଆ ପାଇଁ ବଢ଼ିପାରେ ଚିନ୍ତା, ଦ୍ବିତୀୟ ଟେଷ୍ଟରେ ଇଂଲଣ୍ଡ ଆପଣାଇପାରେ ଏହି ରଣନୀତି
ନନ୍ଦିଘୋଷ ବ୍ୟୁରୋ: ଇଂଲଣ୍ଡ ବିପକ୍ଷ ପ୍ରଥମ ଟେଷ୍ଟ ହାରିବା ପରେ ଦ୍ବିତୀୟ ମ୍ୟାଚ ବିଜୟ ଲକ୍ଷ୍ୟରେ ରୋହିତ ବାହିନୀ । ତେବେ ଦ୍ବିତୀୟ ଟେଷ୍ଟରେ ଇଂଲଣ୍ଡ ୪ ଜଣ ସ୍ପିନରଙ୍କୁ ମଇଦାନକୁ ଓହ୍ଲାଇବ ବୋଲି ସୂଚନା ମିଳିଛି । ଇଂଲଣ୍ଡର ମୁଖ୍ୟ ପ୍ରଶିକ୍ଷକ ବ୍ରେଣ୍ଡମ ମ୍ୟାକୁଲମ ଏଭଳି ସୂଚନା ଦେଇଛନ୍ତି । ବିଶାଖାପାଟଣାମରେ ଅନୁଷ୍ଠିତ ହେବାକୁ ଥିବା ଏହି ମ୍ୟାଚରେ ଜୋ ରୁଟଙ୍କୁ ଛାଡ଼ି ବାକି ଚାରିଜଣ ସ୍ପିନର ଖେଳିବେ । ପ୍ରଥମ ଟେଷ୍ଟରେ ଜେକ୍ ଲିଚ୍, ଟମ ହାର୍ଟ ଲି ଏବଂ ରେହାନ ଅହମ୍ମଦ ଖେଳିଥିଲେ । ତେବେ ଦ୍ବିତୀୟ ଟେଷ୍ଟରେ ସୋଏବ ବଶିର ମଇଦାନକୁ ଓହ୍ଲାଇ ପାରନ୍ତି । ପ୍ରଥମ ଟେଷ୍ଟ ଖେଳିବା ପାଇଁ ଭିସା କାରଣରୁ ସେ ଆସି ପାରିନଥିଲେ । ମାତ୍ର ଦ୍ବିତୀୟ ଟେଷ୍ଟରେ ସେ ମଇଦାନୁ ଓହ୍ଲାଉଥିବାବେଳେ ଭାରତ ପାଇଁ ଅସୁବିଧାର କାରଣ ହୋଇପାରେ । ପ୍ରଥମ ମ୍ୟାଚରେ ଦୁଇ ପାଳିର ୨୦ ଓ୍ବିକେଟରୁ ଭାରତ ୧୮ ଓ୍ବିକେଟ କେବଳ ସ୍ପିନରଙ୍କ ହାତକୁ ଯାଇଥିଲା । ସେପଟେ ବାକି ୨ଟି ରନ ଆଉଟ ହୋଇଥିଲେ । ଏଣୁ ପେସରଙ୍କ ଅପେକ୍ଷା ସ୍ପିନରଙ୍କୁ ସୁଯୋଗ ଦେବ ଇଂଲଣ୍ଡ । ଭାରତ ପକ୍ଷରୁ କେବଳ ରୋହିତ ଶର୍ମା ସ୍ପିନରଙ୍କ ବିପକ୍ଷରେ ଭଲ ଖେଳନ୍ତି । ଶ୍ରେୟସ ଏବଂ ଗିଲ ଏବେ ଭଲ ଫର୍ମରେ ନାହାନ୍ତି । ଏଣୁ ସ୍ପିନରମାନେ ଦ୍ବିତୀୟ ଟେଷ୍ଟରେ ଭାରତ ପାଇଁ କାଳ ସାଜି ପାରନ୍ତି ।